| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. ராஹுலஸுத்தவண்ணனா
7. Rāhulasuttavaṇṇanā
177. ஸத்தமே பத²வீதா⁴துரேவேஸாதி து³விதா⁴பேஸா த²த்³த⁴ட்டே²ன, கக்க²ளட்டே²ன, ப²ருஸட்டே²ன ஏகலக்க²ணா பத²வீதா⁴து ஏவாதி அஜ்ஜ²த்திகங் பா³ஹிராய ஸத்³தி⁴ங் யோஜெத்வா த³ஸ்ஸேதி. கஸ்மா? பா³ஹிராய பத²வீதா⁴துயா அசேதனாபா⁴வோ பாகடோ, ந அஜ்ஜ²த்திகாய, தஸ்மா பா³ஹிராய ஸத்³தி⁴ங் ஏகஸதி³ஸா அசேதனாயேவாதி க³ண்ஹந்தஸ்ஸ ஸுக²பரிக்³கா³ஹா ஹோதி, யதா² கிங்? த³ந்தேன கோ³ணேன ஸத்³தி⁴ங் யோஜிதோ அத³ந்தோ கதிபாஹமேவ விஸுகாயதி விப்ப²ந்த³தி, அத² ந சிரஸ்ஸேவ த³மத²ங் உபேதி, ஏவங் அஜ்ஜ²த்திகங் பா³ஹிராய ஸத்³தி⁴ங் ஏகஸதி³ஸாதி க³ண்ஹந்தஸ்ஸ கதிபாஹமேவ அசேதனபா⁴வேன உபட்டா²தி, அத² ந சிரேனேவஸ்ஸா அசேதனபா⁴வோ பாகடோ ஹோதி தா⁴துமத்ததாய த³ஸ்ஸனதோ. நேதங் மம…பே॰… த³ட்ட²ப்³ப³ந்தி தங் உப⁴யம்பி ‘‘ந ஏதங் மம, ந ஏஸோஹமஸ்மி, ந ஏஸோ மே அத்தா’’தி ஏவங் யதா²பூ⁴தங் ஸம்மப்பஞ்ஞாய த³ட்ட²ப்³ப³ங். யதா²பூ⁴தந்தி யதா²ஸபா⁴வங். தஞ்ஹி அனிச்சாதி³ஸபா⁴வங், தஸ்மா அனிச்சங் து³க்க²மனத்தாதி ஏவங் த³ட்ட²ப்³ப³ந்தி அத்தோ². யஸ்மா ‘‘நேதங் மம, நேஸோஹமஸ்மி, ந மேஸோ அத்தா’’தி பஸ்ஸந்தோ நேவ கத்த²சி அத்தானங் பஸ்ஸதி, ந தங் பரஸ்ஸ கிஞ்சனபா⁴வே உபனேதப்³ப³ங் பஸ்ஸதி, ந பரஸ்ஸ அத்தானங் அத்தனோ கிஞ்சனபா⁴வே உபனேதப்³ப³ங் பஸ்ஸதி, தஸ்மா வுத்தங் ‘‘சதுகோடிகஸுஞ்ஞதா நாம கதி²தா’’தி.
177. Sattame pathavīdhāturevesāti duvidhāpesā thaddhaṭṭhena, kakkhaḷaṭṭhena, pharusaṭṭhena ekalakkhaṇā pathavīdhātu evāti ajjhattikaṃ bāhirāya saddhiṃ yojetvā dasseti. Kasmā? Bāhirāya pathavīdhātuyā acetanābhāvo pākaṭo, na ajjhattikāya, tasmā bāhirāya saddhiṃ ekasadisā acetanāyevāti gaṇhantassa sukhapariggāhā hoti, yathā kiṃ? Dantena goṇena saddhiṃ yojito adanto katipāhameva visukāyati vipphandati, atha na cirasseva damathaṃ upeti, evaṃ ajjhattikaṃ bāhirāya saddhiṃ ekasadisāti gaṇhantassa katipāhameva acetanabhāvena upaṭṭhāti, atha na cirenevassā acetanabhāvo pākaṭo hoti dhātumattatāya dassanato. Netaṃ mama…pe… daṭṭhabbanti taṃ ubhayampi ‘‘na etaṃ mama, na esohamasmi, na eso me attā’’ti evaṃ yathābhūtaṃ sammappaññāya daṭṭhabbaṃ. Yathābhūtanti yathāsabhāvaṃ. Tañhi aniccādisabhāvaṃ, tasmā aniccaṃ dukkhamanattāti evaṃ daṭṭhabbanti attho. Yasmā ‘‘netaṃ mama, nesohamasmi, na meso attā’’ti passanto neva katthaci attānaṃ passati, na taṃ parassa kiñcanabhāve upanetabbaṃ passati, na parassa attānaṃ attano kiñcanabhāve upanetabbaṃ passati, tasmā vuttaṃ ‘‘catukoṭikasuññatā nāma kathitā’’ti.
ராஹுலஸுத்தவண்ணனா நிட்டி²தா.
Rāhulasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. ராஹுலஸுத்தங் • 7. Rāhulasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. ராஹுலஸுத்தவண்ணனா • 7. Rāhulasuttavaṇṇanā
