| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৭. রাহুলসুত্তৰণ্ণনা
7. Rāhulasuttavaṇṇanā
১৭৭. সত্তমে পথৰীধাতুরেৰেসাতি দুৰিধাপেসা থদ্ধট্ঠেন, কক্খল়ট্ঠেন, ফরুসট্ঠেন একলক্খণা পথৰীধাতু এৰাতি অজ্ঝত্তিকং বাহিরায সদ্ধিং যোজেত্ৰা দস্সেতি। কস্মা? বাহিরায পথৰীধাতুযা অচেতনাভাৰো পাকটো, ন অজ্ঝত্তিকায, তস্মা বাহিরায সদ্ধিং একসদিসা অচেতনাযেৰাতি গণ্হন্তস্স সুখপরিগ্গাহা হোতি, যথা কিং? দন্তেন গোণেন সদ্ধিং যোজিতো অদন্তো কতিপাহমেৰ ৰিসুকাযতি ৰিপ্ফন্দতি, অথ ন চিরস্সেৰ দমথং উপেতি, এৰং অজ্ঝত্তিকং বাহিরায সদ্ধিং একসদিসাতি গণ্হন্তস্স কতিপাহমেৰ অচেতনভাৰেন উপট্ঠাতি, অথ ন চিরেনেৰস্সা অচেতনভাৰো পাকটো হোতি ধাতুমত্ততায দস্সনতো। নেতং মম…পে॰… দট্ঠব্বন্তি তং উভযম্পি ‘‘ন এতং মম, ন এসোহমস্মি, ন এসো মে অত্তা’’তি এৰং যথাভূতং সম্মপ্পঞ্ঞায দট্ঠব্বং। যথাভূতন্তি যথাসভাৰং। তঞ্হি অনিচ্চাদিসভাৰং, তস্মা অনিচ্চং দুক্খমনত্তাতি এৰং দট্ঠব্বন্তি অত্থো। যস্মা ‘‘নেতং মম, নেসোহমস্মি, ন মেসো অত্তা’’তি পস্সন্তো নেৰ কত্থচি অত্তানং পস্সতি, ন তং পরস্স কিঞ্চনভাৰে উপনেতব্বং পস্সতি, ন পরস্স অত্তানং অত্তনো কিঞ্চনভাৰে উপনেতব্বং পস্সতি, তস্মা ৰুত্তং ‘‘চতুকোটিকসুঞ্ঞতা নাম কথিতা’’তি।
177. Sattame pathavīdhāturevesāti duvidhāpesā thaddhaṭṭhena, kakkhaḷaṭṭhena, pharusaṭṭhena ekalakkhaṇā pathavīdhātu evāti ajjhattikaṃ bāhirāya saddhiṃ yojetvā dasseti. Kasmā? Bāhirāya pathavīdhātuyā acetanābhāvo pākaṭo, na ajjhattikāya, tasmā bāhirāya saddhiṃ ekasadisā acetanāyevāti gaṇhantassa sukhapariggāhā hoti, yathā kiṃ? Dantena goṇena saddhiṃ yojito adanto katipāhameva visukāyati vipphandati, atha na cirasseva damathaṃ upeti, evaṃ ajjhattikaṃ bāhirāya saddhiṃ ekasadisāti gaṇhantassa katipāhameva acetanabhāvena upaṭṭhāti, atha na cirenevassā acetanabhāvo pākaṭo hoti dhātumattatāya dassanato. Netaṃ mama…pe… daṭṭhabbanti taṃ ubhayampi ‘‘na etaṃ mama, na esohamasmi, na eso me attā’’ti evaṃ yathābhūtaṃ sammappaññāya daṭṭhabbaṃ. Yathābhūtanti yathāsabhāvaṃ. Tañhi aniccādisabhāvaṃ, tasmā aniccaṃ dukkhamanattāti evaṃ daṭṭhabbanti attho. Yasmā ‘‘netaṃ mama, nesohamasmi, na meso attā’’ti passanto neva katthaci attānaṃ passati, na taṃ parassa kiñcanabhāve upanetabbaṃ passati, na parassa attānaṃ attano kiñcanabhāve upanetabbaṃ passati, tasmā vuttaṃ ‘‘catukoṭikasuññatā nāma kathitā’’ti.
রাহুলসুত্তৰণ্ণনা নিট্ঠিতা।
Rāhulasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৭. রাহুলসুত্তং • 7. Rāhulasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. রাহুলসুত্তৰণ্ণনা • 7. Rāhulasuttavaṇṇanā
