| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ராஹுலவத்து²கதா²வண்ணனா
Rāhulavatthukathāvaṇṇanā
105. பொக்க²ரவஸ்ஸந்தி பொக்க²ரே பது³மக³ச்சே² விய அதேமிதுகாமானங் ஸரீரதோ பவட்டனகவஸ்ஸங். தஸ்மிங் கிர வஸ்ஸந்தே தேமிதுகாமாவ தேமெந்தி, ந இதரே. ‘‘பி⁴க்க²ங் க³ண்ஹதா²’’தி வத்வா க³தோ நாம நத்தீ²தி அத்தனோ ஸந்தகே ரஜ்ஜே ஸப்³ப³ம்பி ஸாபதெய்யங் ஸயமேவ பரிபு⁴ஞ்ஜிஸ்ஸதீதி கா³ரவேன ஸுத்³தோ⁴த³னமஹாராஜாபி ந நிமந்தேஸி, க³ந்த்வா பன கே³ஹே ஸகலரத்திங் மஹாதா³னஞ்சேவ பு³த்³த⁴ப்பமுக²ஸ்ஸ ஸங்க⁴ஸ்ஸ ஆஸனபஞ்ஞத்திட்டா²னாலங்காரஞ்ச ஸங்வித³ஹந்தோவ வீதினாமேஸி.
105.Pokkharavassanti pokkhare padumagacche viya atemitukāmānaṃ sarīrato pavaṭṭanakavassaṃ. Tasmiṃ kira vassante temitukāmāva tementi, na itare. ‘‘Bhikkhaṃ gaṇhathā’’ti vatvā gato nāma natthīti attano santake rajje sabbampi sāpateyyaṃ sayameva paribhuñjissatīti gāravena suddhodanamahārājāpi na nimantesi, gantvā pana gehe sakalarattiṃ mahādānañceva buddhappamukhassa saṅghassa āsanapaññattiṭṭhānālaṅkārañca saṃvidahantova vītināmesi.
ந கோசி…பே॰… பத்தங் வா அக்³க³ஹேஸீதி ப⁴க³வா அத்தனோ பிது நிவேஸனமேவ க³மிஸ்ஸதீதிஸஞ்ஞாய நக்³க³ஹேஸி. குலனக³ரேதி ஞாதிகுலந்தகே நக³ரே. பிண்ட³சாரியவத்தந்தி அத்தனோ ஞாதிகா³மேஸுபி ஸபதா³னசாரிகவத்தங். பி⁴க்கா²ய சாரோ சரணங் ஏதஸ்ஸாதி பி⁴க்கா²சாரோ, க²த்தியோ.
Nakoci…pe… pattaṃ vā aggahesīti bhagavā attano pitu nivesanameva gamissatītisaññāya naggahesi. Kulanagareti ñātikulantake nagare. Piṇḍacāriyavattanti attano ñātigāmesupi sapadānacārikavattaṃ. Bhikkhāya cāro caraṇaṃ etassāti bhikkhācāro, khattiyo.
உத்திட்டே²தி உத்திட்டி²த்வா பரேஸங் க⁴ரத்³வாரே உத்³தி³ஸ்ஸ ட²த்வா க³ஹேதப்³ப³பிண்டே³. நப்பமஜ்ஜெய்யாதி நிமந்தனாதி³வஸேன லப்³ப⁴மானபணீதபோ⁴ஜனங் படிக்கி²பித்வா பிண்டா³ய சரணவஸேன தத்த² நப்பமஜ்ஜெய்ய. த⁴ம்மந்தி அனேஸனங் பஹாய ஸபதா³னங் சரந்தோ தமேவ பி⁴க்கா²சரியத⁴ம்மங் ஸுசரிதங் சரெய்ய. ஸுக²ங் ஸேதீதி சதூஹி இரியாபதே²ஹி ஸுக²ங் விஹரதீதி அத்தோ².
Uttiṭṭheti uttiṭṭhitvā paresaṃ gharadvāre uddissa ṭhatvā gahetabbapiṇḍe. Nappamajjeyyāti nimantanādivasena labbhamānapaṇītabhojanaṃ paṭikkhipitvā piṇḍāya caraṇavasena tattha nappamajjeyya. Dhammanti anesanaṃ pahāya sapadānaṃ caranto tameva bhikkhācariyadhammaṃ sucaritaṃ careyya. Sukhaṃ setīti catūhi iriyāpathehi sukhaṃ viharatīti attho.
து³தியகா³தா²யங் ந நங் து³ச்சரிதந்தி வேஸியாதி³பே⁴தே³ அகோ³சரே சரணவஸேன தங் யதா²வுத்தங் த⁴ம்மங் து³ச்சரிதங் ந ச சரே. ஸேஸங் வுத்தனயமேவ. இமங் பன கா³த²ங் ஸுத்வாதி நிவேஸனே நிஸின்னேன ப⁴க³வதா ஞாதிஸமாக³மே அத்தனோ பிண்டா³ய சரணங் நிஸ்ஸாய பவத்தாய கா³தா²ய வுத்தங் இமங் து³தியகா³த²ங் ஸுத்வா.
Dutiyagāthāyaṃ na naṃ duccaritanti vesiyādibhede agocare caraṇavasena taṃ yathāvuttaṃ dhammaṃ duccaritaṃ na ca care. Sesaṃ vuttanayameva. Imaṃ pana gāthaṃ sutvāti nivesane nisinnena bhagavatā ñātisamāgame attano piṇḍāya caraṇaṃ nissāya pavattāya gāthāya vuttaṃ imaṃ dutiyagāthaṃ sutvā.
த⁴ம்மபாலஜாதகந்திஆதீ³ஸு பன ததோ பரகாலேஸுபி ரஞ்ஞோ பவத்தி பரினிப்³பா³னங் பாபெத்வா யதா²பஸங்க³வஸேன த³ஸ்ஸேதுங் வுத்தா. தேனாஹ ‘‘ஸோதாபத்திப²லங் ஸச்சி²கத்வா’’திஆதி³. ஸிரிக³ப்³ப⁴ங் க³ந்த்வாதி எத்த² யதி³ ஹி ப⁴க³வா தத³ஹேவ க³ந்த்வா ந பஸ்ஸெய்ய, ஸா ஹத³யேன ப²லிதேன மரெய்யாதி அக³மாஸீதி த³ட்ட²ப்³ப³ங்.
Dhammapālajātakantiādīsu pana tato parakālesupi rañño pavatti parinibbānaṃ pāpetvā yathāpasaṅgavasena dassetuṃ vuttā. Tenāha ‘‘sotāpattiphalaṃ sacchikatvā’’tiādi. Sirigabbhaṃ gantvāti ettha yadi hi bhagavā tadaheva gantvā na passeyya, sā hadayena phalitena mareyyāti agamāsīti daṭṭhabbaṃ.
தங் தி³வஸமேவாதி தஸ்மிங் ராஹுலமாதுத³ஸ்ஸனதி³வஸேயேவ. த⁴ம்மபத³ட்ட²கதா²யங் பன ‘‘ஸத்தா² கபிலபுரங் க³ந்த்வா ததியதி³வஸே நந்த³ங் பப்³பா³ஜேஸீ’’தி (த⁴॰ ப॰ அட்ட²॰ 1.12 நந்த³த்தே²ரவத்து²) வுத்தங். கேஸவிஸ்ஸஜ்ஜனந்தி ராஜமோளிப³ந்த⁴னத்த²ங் குமாரகாலே ப³ந்தி⁴தஸிகா²வேணிமோசனங், தங் கிர கரொந்தா மங்க³லங் கரொந்தி. ஸாரத்த²தீ³பனியங் பன ‘‘கேஸவிஸ்ஸஜ்ஜனந்தி குலமரியாத³வஸேன கேஸோரோபன’’ந்தி (ஸாரத்த²॰ டீ॰ மஹாவக்³க³ 3.105) வுத்தங். பட்டப³ந்தோ⁴தி ‘‘அஸுகராஜா’’தி நளாடே ஸுவண்ணபட்டப³ந்த⁴னங். அபி⁴னவபாஸாத³ப்பவேஸமங்க³லங் க⁴ரமங்க³லங். ச²த்துஸ்ஸாபனே மங்க³லங் ச²த்தமங்க³லங். ஜனபத³கல்யாணீதி ஜனபத³ம்ஹி கல்யாணீ பரேஹி அஸாதா⁴ரணேஹி பஞ்சகல்யாணாதீ³ஹி ஸஹிதத்தா ஸா ஏவங் வுத்தா. துவடந்தி ஸீக⁴ங். அனிச்ச²மானந்தி மனஸா அரோசெந்தங், வாசாய பன ப⁴க³வதா ‘‘பப்³ப³ஜிஸ்ஸஸி நந்தா³’’தி வுத்தே கா³ரவேன படிக்கி²பிதுங் அவிஸஹந்தோ ‘‘ஆமா’’தி அவோச. ப⁴க³வா ச ஏதேன லேஸேன பப்³பா³ஜேஸி.
Taṃ divasamevāti tasmiṃ rāhulamātudassanadivaseyeva. Dhammapadaṭṭhakathāyaṃ pana ‘‘satthā kapilapuraṃ gantvā tatiyadivase nandaṃ pabbājesī’’ti (dha. pa. aṭṭha. 1.12 nandattheravatthu) vuttaṃ. Kesavissajjananti rājamoḷibandhanatthaṃ kumārakāle bandhitasikhāveṇimocanaṃ, taṃ kira karontā maṅgalaṃ karonti. Sāratthadīpaniyaṃ pana ‘‘kesavissajjananti kulamariyādavasena kesoropana’’nti (sārattha. ṭī. mahāvagga 3.105) vuttaṃ. Paṭṭabandhoti ‘‘asukarājā’’ti naḷāṭe suvaṇṇapaṭṭabandhanaṃ. Abhinavapāsādappavesamaṅgalaṃ gharamaṅgalaṃ. Chattussāpane maṅgalaṃ chattamaṅgalaṃ. Janapadakalyāṇīti janapadamhi kalyāṇī parehi asādhāraṇehi pañcakalyāṇādīhi sahitattā sā evaṃ vuttā. Tuvaṭanti sīghaṃ. Anicchamānanti manasā arocentaṃ, vācāya pana bhagavatā ‘‘pabbajissasi nandā’’ti vutte gāravena paṭikkhipituṃ avisahanto ‘‘āmā’’ti avoca. Bhagavā ca etena lesena pabbājesi.
ப்³ரஹ்மரூபவண்ணந்தி ப்³ரஹ்மரூபஸமானரூபங். த்யஸ்ஸாதி தே அஸ்ஸ. நிவத்தேதுங் ந விஸஹீதி ‘‘மா நங் நிவத்தயித்தா²’’தி ப⁴க³வதா வுத்தத்தா நாஸக்கி². ஸத்தவித⁴ங் அரியத⁴னந்தி –
Brahmarūpavaṇṇanti brahmarūpasamānarūpaṃ. Tyassāti te assa. Nivattetuṃ na visahīti ‘‘mā naṃ nivattayitthā’’ti bhagavatā vuttattā nāsakkhi. Sattavidhaṃ ariyadhananti –
‘‘ஸத்³தா⁴த⁴னங் ஸீலத⁴னங், ஹிரிஒத்தப்பியங் த⁴னங்;
‘‘Saddhādhanaṃ sīladhanaṃ, hiriottappiyaṃ dhanaṃ;
ஸுதத⁴னஞ்ச சாகோ³ ச, பஞ்ஞா வே ஸத்தமங் த⁴ன’’ந்தி. (அ॰ நி॰ 7.5, 6) –
Sutadhanañca cāgo ca, paññā ve sattamaṃ dhana’’nti. (a. ni. 7.5, 6) –
ஏவங் வுத்தங் ஸத்தவித⁴ங் அரியத⁴னங். அதி⁴மத்தங் ராஹுலேதி ராஹுலே பப்³ப³ஜிதே நந்த³பப்³ப³ஜ்ஜாய உப்பன்னது³க்க²தோபி அதி⁴கதரங் து³க்க²ங் அஹோஸீதி அத்தோ². இதோ பச்சா²தி இதோ வுத்தஸோகுப்பத்திதோ அபரதி³வஸேஸு அனாகா³மீனங் ஞாதிஸினேஹபடிக⁴சித்துப்பாதா³பா⁴வா. பாளியங் புத்தபேமந்திஆதி³ ரஞ்ஞா புத்தஸினேஹஸ்ஸ திப்³ப³பா⁴வங் த³ஸ்ஸேதுங் வுத்தங். புத்தஸினேஹோ ஹி அத்தனா ஸஹஜாதபீதிவேக³ஸமுட்டி²தானங் ரூபத⁴ம்மானங் ஸகலஸரீரங் கோ²பெ⁴த்வா பவத்தனவஸேன ‘‘ச²விங்…பே॰… அட்டி²மிஞ்ஜங் ஆஹச்ச திட்ட²தீ’’தி வுத்தோ. அத்தனோ பியதராதி ப⁴க³வந்தங் ஸந்தா⁴ய வத³தி. புத்தேதி ராஹுலங். ஸத்³த³ஹந்தேனாதி தஸ்ஸ வசனேன அவேமதிகேனாதி அத்தோ². விமதியா ஸதி ஆபத்தி ஏவ.
Evaṃ vuttaṃ sattavidhaṃ ariyadhanaṃ. Adhimattaṃ rāhuleti rāhule pabbajite nandapabbajjāya uppannadukkhatopi adhikataraṃ dukkhaṃ ahosīti attho. Ito pacchāti ito vuttasokuppattito aparadivasesu anāgāmīnaṃ ñātisinehapaṭighacittuppādābhāvā. Pāḷiyaṃ puttapemantiādi raññā puttasinehassa tibbabhāvaṃ dassetuṃ vuttaṃ. Puttasineho hi attanā sahajātapītivegasamuṭṭhitānaṃ rūpadhammānaṃ sakalasarīraṃ khobhetvā pavattanavasena ‘‘chaviṃ…pe… aṭṭhimiñjaṃ āhacca tiṭṭhatī’’ti vutto. Attano piyatarāti bhagavantaṃ sandhāya vadati. Putteti rāhulaṃ. Saddahantenāti tassa vacanena avematikenāti attho. Vimatiyā sati āpatti eva.
ராஹுலவத்து²கதா²வண்ணனா நிட்டி²தா.
Rāhulavatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 41. ராஹுலவத்து² • 41. Rāhulavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ராஹுலவத்து²கதா² • Rāhulavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ராஹுலவத்து²கதா²வண்ணனா • Rāhulavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ராஹுலவத்து²கதா²வண்ணனா • Rāhulavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 41. ராஹுலவத்து²கதா² • 41. Rāhulavatthukathā
