| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
раахулавад̇т̇угат̇ааван̣н̣анаа
Rāhulavatthukathāvaṇṇanā
105. раахулавад̇т̇умхи д̇ад̇т̇зва вихарим̣сууд̇и саб̣б̣зби д̇з арахад̇д̇ам̣ бад̇д̇агаалад̇о бадтааяа арияаа наама маж̇жхад̇д̇аава хонд̇ийд̇и ран̃н̃о бахид̇асаасанам̣ д̣̇асаб̣аласса анаарожзд̇ваава д̇ад̇т̇а вихарим̣су. згад̣̇ивасам̣ ж̇аад̇ам̣ гаал̣уд̣̇ааяим̣ наама амажжанд̇и аяам̣ гира (а. ни. адта. 1.1.225) бад̣̇умуд̇д̇араб̣уд̣̇д̇хагаалз хам̣савад̇ийнаг̇арз гулаг̇зхз ниб̣б̣ад̇д̇о сад̇т̇у д̇хаммад̣̇зсанам̣ сун̣анд̇о сад̇т̇аарам̣ згам̣ бхигкум̣ гулаббасаад̣̇агаанам̣ аг̇г̇адтаанз табзнд̇ам̣ д̣̇исваа ад̇хигаарагаммам̣ гад̇ваа д̇ам̣ таананд̇арам̣ бад̇т̇зси. со яааваж̇ийвам̣ гусалам̣ гад̇ваа д̣̇звамануссзсу сам̣саранд̇о амхаагам̣ б̣од̇хисад̇д̇асса маад̇угужчияам̣ бадисанд̇хиг̇г̇ахан̣ад̣̇ивасз габилавад̇т̇усмим̣язва амажжаг̇зхз бадисанд̇хим̣ г̇ан̣хи. ж̇аад̇ад̣̇ивасз б̣од̇хисад̇д̇зна сад̣̇д̇хим̣язва ж̇аад̇од̇и д̇ам̣ д̣̇ивасам̣язва д̣̇угуулажумб̣адагз нибаж̇ж̇аабзд̇ваа б̣од̇хисад̇д̇асса убадтаанад̇т̇ааяа наяим̣су. б̣од̇хисад̇д̇зна хи сад̣̇д̇хим̣ б̣од̇хиругко раахуламаад̇аа жад̇ассо нид̇хигумбхияо аароханияахад̇т̇ий ган̣д̣аго чанно гаал̣уд̣̇ааяийд̇и имз сад̇д̇а згад̣̇ивасз ж̇аад̇ад̇д̇аа сахаж̇аад̇аа наама ахзсум̣. ат̇асса наамаг̇г̇ахан̣ад̣̇ивасз сагаланаг̇арасса уд̣̇аг̇г̇ажид̇д̇ад̣̇ивасз ж̇аад̇од̇и уд̣̇ааяийд̇взва наамам̣ агам̣су. т̇огам̣ гаал̣ад̇хаад̇угад̇д̇аа бана гаал̣уд̣̇ааяий наама ж̇аад̇о. со б̣од̇хисад̇д̇зна сад̣̇д̇хим̣ гумаарагийл̣ам̣ гийл̣анд̇о вуд̣̇д̇хим̣ аг̇амааси.
105. Rāhulavatthumhi tattheva vihariṃsūti sabbepi te arahattaṃ pattakālato paṭṭhāya ariyā nāma majjhattāva hontīti rañño pahitasāsanaṃ dasabalassa anārocetvāva tattha vihariṃsu. Ekadivasaṃ jātaṃ kāḷudāyiṃ nāma amaccanti ayaṃ kira (a. ni. aṭṭha. 1.1.225) padumuttarabuddhakāle haṃsavatīnagare kulagehe nibbatto satthu dhammadesanaṃ suṇanto satthāraṃ ekaṃ bhikkhuṃ kulappasādakānaṃ aggaṭṭhāne ṭhapentaṃ disvā adhikārakammaṃ katvā taṃ ṭhānantaraṃ patthesi. So yāvajīvaṃ kusalaṃ katvā devamanussesu saṃsaranto amhākaṃ bodhisattassa mātukucchiyaṃ paṭisandhiggahaṇadivase kapilavatthusmiṃyeva amaccagehe paṭisandhiṃ gaṇhi. Jātadivase bodhisattena saddhiṃyeva jātoti taṃ divasaṃyeva dukūlacumbaṭake nipajjāpetvā bodhisattassa upaṭṭhānatthāya nayiṃsu. Bodhisattena hi saddhiṃ bodhirukkho rāhulamātā catasso nidhikumbhiyo ārohaniyahatthī kaṇḍako channo kāḷudāyīti ime satta ekadivase jātattā sahajātā nāma ahesuṃ. Athassa nāmaggahaṇadivase sakalanagarassa udaggacittadivase jātoti udāyītveva nāmaṃ akaṃsu. Thokaṃ kāḷadhātukattā pana kāḷudāyī nāma jāto. So bodhisattena saddhiṃ kumārakīḷaṃ kīḷanto vuddhiṃ agamāsi.
садтимад̇д̇аахи г̇аат̇аахийд̇и –
Saṭṭhimattāhigāthāhīti –
‘‘ан̇г̇аарино д̣̇аани д̣̇умаа бхад̣̇анд̇з;
‘‘Aṅgārino dāni dumā bhadante;
палзсино чад̣̇анам̣ виббахааяа;
Phalesino chadanaṃ vippahāya;
д̇з ажжиманд̇ова бабхаасаяанд̇и;
Te accimantova pabhāsayanti;
самаяо махаавийра бхааг̇ийрасаанам̣. (т̇зраг̇аа. 527)
Samayo mahāvīra bhāgīrasānaṃ. (theragā. 527)
‘‘наад̇исийд̇ам̣ наад̇иун̣хам̣, наад̇ид̣̇уб̣бхигкачаад̇агам̣;
‘‘Nātisītaṃ nātiuṇhaṃ, nātidubbhikkhachātakaṃ;
сад̣̇д̣̇алаа харид̇аа бхууми, зса гаало махаамуний’’д̇и. –
Saddalā haritā bhūmi, esa kālo mahāmunī’’ti. –
аад̣̇игаахи садтимад̇д̇аахи г̇аат̇аахи. ‘‘богкаравассанд̇и богкарабад̇д̇аван̣н̣амуд̣̇ага’’нд̇и г̇ан̣тибад̣̇зсу вуд̇д̇ам̣. богкарабад̇д̇аббамаан̣ам̣ маж̇жхз удтахид̇ваа ануггамзна сад̇абадалам̣ сахассабадалам̣ худ̇ваа вассанагавассанд̇иби вад̣̇анд̇и. д̇асмим̣ гира вассанд̇з д̇змзд̇угаамаава д̇змзнд̇и, на ид̇арз. згоби рааж̇аа ваа…бз… г̇ад̇о над̇т̇ийд̇и д̇хаммад̣̇зсанам̣ суд̇ваа багганд̇зсу н̃аад̇ийсу згоби рааж̇аа ваа рааж̇амахаамад̇д̇о ваа ‘‘свз амхаагам̣ бхигкам̣ г̇ан̣хат̇аа’’д̇и ниманд̇зд̇ваа г̇ад̇о над̇т̇и. бид̇аабисса суд̣̇д̇ход̣̇анамахаарааж̇аа ‘‘маяхам̣ буд̇д̇о мама г̇зхам̣ анааг̇анд̇ваа гахам̣ г̇амиссад̇ий’’д̇и аниманд̇зд̇ваава аг̇амааси, г̇анд̇ваа бана г̇зхз вийсад̇ияаа бхигкусахассаанам̣ яааг̇уаад̣̇ийни бадияаад̣̇аабзд̇ваа аасанаани бан̃н̃аабзси.
Ādikāhi saṭṭhimattāhi gāthāhi. ‘‘Pokkharavassanti pokkharapattavaṇṇamudaka’’nti gaṇṭhipadesu vuttaṃ. Pokkharapattappamāṇaṃ majjhe uṭṭhahitvā anukkamena satapaṭalaṃ sahassapaṭalaṃ hutvā vassanakavassantipi vadanti. Tasmiṃ kira vassante temetukāmāva tementi, na itare. Ekopi rājā vā…pe… gato natthīti dhammadesanaṃ sutvā pakkantesu ñātīsu ekopi rājā vā rājamahāmatto vā ‘‘sve amhākaṃ bhikkhaṃ gaṇhathā’’ti nimantetvā gato natthi. Pitāpissa suddhodanamahārājā ‘‘mayhaṃ putto mama gehaṃ anāgantvā kahaṃ gamissatī’’ti animantetvāva agamāsi, gantvā pana gehe vīsatiyā bhikkhusahassānaṃ yāguādīni paṭiyādāpetvā āsanāni paññāpesi.
гуланаг̇арзд̇и н̃аад̇игуласса наг̇арз. ун̣хийсад̇о бадтааяаад̇и сийсад̇о бадтааяа. ун̣хийсанд̇и хи ун̣хийсасад̣̇исад̇д̇аа бхаг̇авад̇о барибун̣н̣аналаадасса барибун̣н̣асийсасса жа зд̇ам̣ ад̇хиважанам̣. бхаг̇авад̇о хи д̣̇агкин̣аган̣н̣ажуул̣игад̇о бадтааяа мам̣сабадалам̣ удтахид̇ваа сагаланалаадам̣ чаад̣̇аяамаанам̣ буураяамаанам̣ г̇анд̇ваа ваамаган̣н̣ажуул̣игааяа бад̇идтид̇ам̣ сан̣хад̇амад̇ааяа суван̣н̣аван̣н̣ад̇ааяа бабхассарад̇ааяа барибун̣н̣ад̇ааяа жа ран̃н̃о б̣ад̣̇д̇хаун̣хийсабаддо вияа вирожад̇и. бхаг̇авад̇о гира имам̣ лагкан̣ам̣ д̣̇исваа рааж̇уунам̣ ун̣хийсабаддам̣ агам̣су. ан̃н̃з бана ж̇анаа абарибун̣н̣асийсаа хонд̇и, гзжи габбасийсаа, гзжи паласийсаа, гзжи адтисийсаа, гзжи д̇умб̣асийсаа, гзжи гумбхасийсаа, гзжи баб̣бхаарасийсаа, бхаг̇авад̇о бана аараг̇г̇зна ваддзд̇ваа табид̇ам̣ вияа субарибун̣н̣ам̣ уд̣̇агабуб̣б̣ул̣асад̣̇исамби ход̇и. д̇знзва ун̣хийсавзтид̇асийсасад̣̇исад̇д̇аа ун̣хийсам̣ вияа саб̣б̣ад̇т̇а бариман̣д̣аласийсад̇д̇аа жа ун̣хийсасийсод̇и бхаг̇аваа вужжад̇и.
Kulanagareti ñātikulassa nagare. Uṇhīsato paṭṭhāyāti sīsato paṭṭhāya. Uṇhīsanti hi uṇhīsasadisattā bhagavato paripuṇṇanalāṭassa paripuṇṇasīsassa ca etaṃ adhivacanaṃ. Bhagavato hi dakkhiṇakaṇṇacūḷikato paṭṭhāya maṃsapaṭalaṃ uṭṭhahitvā sakalanalāṭaṃ chādayamānaṃ pūrayamānaṃ gantvā vāmakaṇṇacūḷikāya patiṭṭhitaṃ saṇhatamatāya suvaṇṇavaṇṇatāya pabhassaratāya paripuṇṇatāya ca rañño baddhauṇhīsapaṭṭo viya virocati. Bhagavato kira imaṃ lakkhaṇaṃ disvā rājūnaṃ uṇhīsapaṭṭaṃ akaṃsu. Aññe pana janā aparipuṇṇasīsā honti, keci kappasīsā, keci phalasīsā, keci aṭṭhisīsā, keci tumbasīsā, keci kumbhasīsā, keci pabbhārasīsā, bhagavato pana āraggena vaṭṭetvā ṭhapitaṃ viya suparipuṇṇaṃ udakapubbuḷasadisampi hoti. Teneva uṇhīsaveṭhitasīsasadisattā uṇhīsaṃ viya sabbattha parimaṇḍalasīsattā ca uṇhīsasīsoti bhagavā vuccati.
нарасийхаг̇аат̇аахи наама адтахи г̇аат̇аахийд̇и –
Narasīhagāthāhināma aṭṭhahi gāthāhīti –
‘‘синид̣̇д̇ханийламуд̣̇угун̃жид̇агзсо;
‘‘Siniddhanīlamudukuñcitakeso;
суурияаниммалад̇алаабхиналаадо;
Sūriyanimmalatalābhinalāṭo;
яуд̇д̇ад̇ун̇г̇амуд̣̇угааяад̇анаасо;
Yuttatuṅgamudukāyatanāso;
рам̣сиж̇аалавид̇ад̇о нарасийхо’’д̇и. (ж̇аа. адта. 1.санд̇игзнид̣̇аанагат̇аа; аба. адта. 1.санд̇игзнид̣̇аанагат̇аа) –
Raṃsijālavitato narasīho’’ti. (jā. aṭṭha. 1.santikenidānakathā; apa. aṭṭha. 1.santikenidānakathā) –
звамаад̣̇игаахи адтахи г̇аат̇аахи. г̇ан̣тибад̣̇зсу бана –
Evamādikāhi aṭṭhahi gāthāhi. Gaṇṭhipadesu pana –
‘‘жаггаваран̇гид̇арад̇д̇асубаад̣̇о;
‘‘Cakkavaraṅkitarattasupādo;
лагкан̣аман̣д̣ид̇аааяад̇абан̣хи;
Lakkhaṇamaṇḍitaāyatapaṇhi;
жаамарачад̇д̇авибхуусид̇абаад̣̇о;
Cāmarachattavibhūsitapādo;
зса хи д̇уяха бид̇аа нарасийхо.
Esa hi tuyha pitā narasīho.
‘‘сагяагумаараваро сукумаало;
‘‘Sakyakumāravaro sukhumālo;
лагкан̣ажид̇д̇игабун̣н̣асарийро;
Lakkhaṇacittikapuṇṇasarīro;
логахид̇ааяа г̇ад̇о наравийро;
Lokahitāya gato naravīro;
зса хи д̇уяха бид̇аа нарасийхо.
Esa hi tuyha pitā narasīho.
‘‘бун̣н̣асасан̇ганибхо мукаван̣н̣о;
‘‘Puṇṇasasaṅkanibho mukhavaṇṇo;
д̣̇званараана бияо наранааг̇о;
Devanarāna piyo naranāgo;
мад̇д̇аг̇аж̇инд̣̇авилаасид̇аг̇аамий;
Mattagajindavilāsitagāmī;
зса хи д̇уяха бид̇аа нарасийхо.
Esa hi tuyha pitā narasīho.
‘‘кад̇д̇ияасамбхавааг̇г̇агулийно;
‘‘Khattiyasambhavaaggakulīno;
д̣̇звамануссанамассид̇абаад̣̇о;
Devamanussanamassitapādo;
сийласамаад̇хибад̇идтид̇ажид̇д̇о;
Sīlasamādhipatiṭṭhitacitto;
зса хи д̇уяха бид̇аа нарасийхо.
Esa hi tuyha pitā narasīho.
‘‘ааяад̇аяуд̇д̇асусан̣тид̇анаасо;
‘‘Āyatayuttasusaṇṭhitanāso;
г̇обакумо абхинийласунзд̇д̇о;
Gopakhumo abhinīlasunetto;
инд̣̇ад̇ханууабхинийлабхамууго;
Indadhanūabhinīlabhamūko;
зса хи д̇уяха бид̇аа нарасийхо.
Esa hi tuyha pitā narasīho.
‘‘ваддасуваддасусан̣тид̇аг̇ийво ;
‘‘Vaṭṭasuvaṭṭasusaṇṭhitagīvo ;
сийхахануу миг̇арааж̇асарийро;
Sīhahanū migarājasarīro;
ган̃жанасужчавиуд̇д̇амаван̣н̣о;
Kañcanasucchaviuttamavaṇṇo;
зса хи д̇уяха бид̇аа нарасийхо.
Esa hi tuyha pitā narasīho.
‘‘синид̣̇д̇хасуг̇амбхираман̃ж̇усагхосо;
‘‘Siniddhasugambhiramañjusaghoso;
хин̇г̇улаб̣анд̇хугарад̇д̇асуж̇ивхо;
Hiṅgulabandhukarattasujivho;
вийсад̇ивийсад̇исзд̇асуд̣̇анд̇о;
Vīsativīsatisetasudanto;
зса хи д̇уяха бид̇аа нарасийхо.
Esa hi tuyha pitā narasīho.
‘‘ан̃ж̇анаван̣н̣асунийласугзсо ;
‘‘Añjanavaṇṇasunīlasukeso ;
ган̃жанабаддависуд̣̇д̇ханалаадо;
Kañcanapaṭṭavisuddhanalāṭo;
осад̇хибан̣д̣арасуд̣̇д̇хасуун̣н̣о;
Osadhipaṇḍarasuddhasuuṇṇo;
зса хи д̇уяха бид̇аа нарасийхо.
Esa hi tuyha pitā narasīho.
‘‘г̇ажчад̇инилабат̇з вияа жанд̣̇о;
‘‘Gacchatinilapathe viya cando;
д̇аараг̇ан̣аабаривзтид̇аруубо;
Tāragaṇāpariveṭhitarūpo;
саавагамаж̇жхаг̇ад̇о саман̣инд̣̇о;
Sāvakamajjhagato samaṇindo;
зса хи д̇уяха бид̇аа нарасийхо’’д̇и. (ж̇аа. адта. 1.санд̇игзнид̣̇аанагат̇аа) –
Esa hi tuyha pitā narasīho’’ti. (jā. aṭṭha. 1.santikenidānakathā) –
имаа нава г̇аат̇ааяоби зд̇т̇а д̣̇ассид̇аа, д̇аа бана ‘‘адтахи г̇аат̇аахий’’д̇и важанзна на самзнд̇и. ун̣хийсад̇о бадтааяа яаава баад̣̇ад̇алаад̇и вуд̇д̇аануггамоби д̇ад̇т̇а на д̣̇иссад̇и. бхигкааяа жарад̇ийд̇и бхигкаажааро.
Imā nava gāthāyopi ettha dassitā, tā pana ‘‘aṭṭhahi gāthāhī’’ti vacanena na samenti. Uṇhīsato paṭṭhāya yāva pādatalāti vuttānukkamopi tattha na dissati. Bhikkhāya caratīti bhikkhācāro.
уд̇д̇идтзд̇и уд̇д̇идтид̇ваа барзсам̣ гхарад̣̇ваарз тад̇ваа г̇ахзд̇аб̣б̣абин̣д̣з. наббамаж̇жхзяяаад̇и бин̣д̣ажааригавад̇д̇ам̣ хаабзд̇ваа бан̣ийд̇абхож̇анаани бариязсанд̇о уд̇д̇идтз бамаж̇ж̇ад̇и наама, сабад̣̇аанам̣ бин̣д̣ааяа жаранд̇о бана наббамаж̇ж̇ад̇и наама, звам̣ гаронд̇о уд̇д̇идтз наббамаж̇ж̇зяяа. д̇хамманд̇и анзсанам̣ бахааяа сабад̣̇аанам̣ жаранд̇о д̇амзва бхигкаажарияад̇хаммам̣ сужарид̇ам̣ жарз. сукам̣ сзд̇ийд̇и д̣̇зсанаамад̇д̇амзд̇ам̣, звам̣ банзд̇ам̣ бхигкааяа жарияад̇хаммам̣ жаранд̇о д̇хаммажаарий ид̇халогз жа баралогз жа жад̇уухиби ирияаабат̇зхи сукам̣ вихарад̇ийд̇и ад̇т̇о.
Uttiṭṭheti uttiṭṭhitvā paresaṃ gharadvāre ṭhatvā gahetabbapiṇḍe. Nappamajjheyyāti piṇḍacārikavattaṃ hāpetvā paṇītabhojanāni pariyesanto uttiṭṭhe pamajjati nāma, sapadānaṃ piṇḍāya caranto pana nappamajjati nāma, evaṃ karonto uttiṭṭhe nappamajjeyya. Dhammanti anesanaṃ pahāya sapadānaṃ caranto tameva bhikkhācariyadhammaṃ sucaritaṃ care. Sukhaṃ setīti desanāmattametaṃ, evaṃ panetaṃ bhikkhāya cariyadhammaṃ caranto dhammacārī idhaloke ca paraloke ca catūhipi iriyāpathehi sukhaṃ viharatīti attho.
д̣̇уд̇ияаг̇аат̇ааяа на нам̣ д̣̇ужжарид̇анд̇и взсияаад̣̇ибхзд̣̇з аг̇ожарз жаранд̇о нам̣ бхигкаажарияад̇хаммам̣ д̣̇ужжарид̇ам̣ жарад̇и наама, звам̣ ажарид̇ваа д̇ам̣ д̇хаммам̣ жарз сужарид̇ам̣, на нам̣ д̣̇ужжарид̇ам̣ жарз. сзсамзд̇т̇а вуд̇д̇ад̇т̇амзва. имам̣ бана д̣̇уд̇ияаг̇аат̇ам̣ бид̇у нивзсанам̣ г̇анд̇ваа абхаасийд̇и взд̣̇ид̇аб̣б̣ам̣. д̇знзва т̇зраг̇аат̇аасам̣ван̣н̣анааяам̣ (т̇зраг̇аа. адта. 1.156 нанд̣̇ад̇т̇зраг̇аат̇ааван̣н̣анаа) аажарияад̇хаммабаалад̇т̇зрзна вуд̇д̇ам̣ ‘‘д̣̇уд̇ияад̣̇ивасз бин̣д̣ааяа бавидто ‘уд̇д̇идтз наббамаж̇ж̇зяяаа’д̇и г̇аат̇ааяа бид̇арам̣ сод̇аабад̇д̇ипалз бад̇идтаабзд̇ваа нивзсанам̣ г̇анд̇ваа ‘д̇хаммам̣ жарз сужарид̇а’нд̇и г̇аат̇ааяа махаабаж̇аабад̇им̣ сод̇аабад̇д̇ипалз рааж̇аанан̃жа сагад̣̇ааг̇аамипалз бад̇идтаабзсий’’д̇и. д̇хаммабад̣̇адтагат̇ааяамби (д̇ха. ба. адта. 1.12 нанд̣̇ад̇т̇зравад̇т̇у) вуд̇д̇ам̣ ‘‘бунад̣̇ивасз бин̣д̣ааяа бавидто ‘уд̇д̇идтз наббамаж̇ж̇зяяаа’д̇и г̇аат̇ааяа бид̇арам̣ сод̇аабад̇д̇ипалз бад̇идтаабзд̇ваа ‘д̇хаммам̣ жарз’д̇и г̇аат̇ааяа махаабаж̇аабад̇им̣ сод̇аабад̇д̇ипалз рааж̇аанан̃жа сагад̣̇ааг̇аамипалз бад̇идтаабзсий’’д̇и.
Dutiyagāthāya na naṃ duccaritanti vesiyādibhede agocare caranto naṃ bhikkhācariyadhammaṃ duccaritaṃ carati nāma, evaṃ acaritvā taṃ dhammaṃ care sucaritaṃ, na naṃ duccaritaṃ care. Sesamettha vuttatthameva. Imaṃ pana dutiyagāthaṃ pitu nivesanaṃ gantvā abhāsīti veditabbaṃ. Teneva theragāthāsaṃvaṇṇanāyaṃ (theragā. aṭṭha. 1.156 nandattheragāthāvaṇṇanā) ācariyadhammapālattherena vuttaṃ ‘‘dutiyadivase piṇḍāya paviṭṭho ‘uttiṭṭhe nappamajjeyyā’ti gāthāya pitaraṃ sotāpattiphale patiṭṭhāpetvā nivesanaṃ gantvā ‘dhammaṃ care sucarita’nti gāthāya mahāpajāpatiṃ sotāpattiphale rājānañca sakadāgāmiphale patiṭṭhāpesī’’ti. Dhammapadaṭṭhakathāyampi (dha. pa. aṭṭha. 1.12 nandattheravatthu) vuttaṃ ‘‘punadivase piṇḍāya paviṭṭho ‘uttiṭṭhe nappamajjeyyā’ti gāthāya pitaraṃ sotāpattiphale patiṭṭhāpetvā ‘dhammaṃ care’ti gāthāya mahāpajāpatiṃ sotāpattiphale rājānañca sakadāgāmiphale patiṭṭhāpesī’’ti.
д̇хаммабаалаж̇аад̇агам̣ суд̇ваа анааг̇аамипалз бад̇идтаасийд̇и бунзгад̣̇ивасам̣ рааж̇анивзсанз гад̇абаад̇араасо згаманд̇ам̣ нисиннзна ран̃н̃аа ‘‘бханд̇з, д̇умхаагам̣ д̣̇уггарагааригагаалз згаа д̣̇звад̇аа мам̣ убасан̇гамид̇ваа ‘буд̇д̇о д̇з гаалагад̇о’д̇и ааха. ахам̣ д̇ассаа важанам̣ асад̣̇д̣̇аханд̇о ‘на маяхам̣ буд̇д̇о б̣од̇хим̣ аббад̇ваа гаалам̣ гарод̇ий’д̇и бадигкибинд̇и вуд̇д̇з ид̣̇аани гат̇ам̣ сад̣̇д̣̇ахиссат̇а, буб̣б̣зби адтигаани д̣̇ассзд̇ваа ‘буд̇д̇о д̇з мад̇о’д̇и вуд̇д̇з на сад̣̇д̣̇ахид̇т̇аа’’д̇и имиссаа адтуббад̇д̇ияаа махаад̇хаммабаалаж̇аад̇агам̣ гат̇зси. д̇ам̣ суд̇ваа рааж̇аа анааг̇аамипалз бад̇идтахи.
Dhammapālajātakaṃ sutvā anāgāmiphale patiṭṭhāsīti punekadivasaṃ rājanivesane katapātarāso ekamantaṃ nisinnena raññā ‘‘bhante, tumhākaṃ dukkarakārikakāle ekā devatā maṃ upasaṅkamitvā ‘putto te kālakato’ti āha. Ahaṃ tassā vacanaṃ asaddahanto ‘na mayhaṃ putto bodhiṃ appatvā kālaṃ karotī’ti paṭikkhipinti vutte idāni kathaṃ saddahissatha, pubbepi aṭṭhikāni dassetvā ‘putto te mato’ti vutte na saddahitthā’’ti imissā aṭṭhuppattiyā mahādhammapālajātakaṃ kathesi. Taṃ sutvā rājā anāgāmiphale patiṭṭhahi.
гзсависсаж̇ж̇ананд̇и гуламарияаад̣̇авасзна гзсоробанам̣. баддаб̣анд̇ход̇и яуварааж̇абаддаб̣анд̇хо. абхинавагхараббавзсанамахо гхараман̇г̇алам̣, виваахагаран̣амахо ааваахаман̇г̇алам̣. чад̇д̇аман̇г̇аланд̇и яуварааж̇ачад̇д̇аман̇г̇алам̣. ж̇анабад̣̇агаляаан̣ийд̇и (уд̣̇аа. адта. 22) ж̇анабад̣̇амхи галяаан̣ий уд̇д̇амаа часарийрад̣̇осарахид̇аа бан̃жагаляаан̣асаманнааг̇ад̇аа. саа хи яасмаа наад̇ид̣̇ийгхаа наад̇ирассаа наад̇игисаа наад̇ит̇уулаа наад̇игаал̣аа наажжод̣̇аад̇аад̇и ад̇игганд̇аа маанусам̣ ван̣н̣ам̣, аббад̇д̇аа д̣̇иб̣б̣ам̣ ван̣н̣ам̣, д̇асмаа часарийрад̣̇осарахид̇аа. чавигаляаан̣ам̣ мам̣сагаляаан̣ам̣ нахааругаляаан̣ам̣ адтигаляаан̣ам̣ ваяагаляаан̣анд̇и имзхи бана бан̃жахи галяаан̣зхи саманнааг̇ад̇ад̇д̇аа бан̃жагаляаан̣асаманнааг̇ад̇аа наама. д̇ассаа хи ааг̇анд̇угобхаасагижжам̣ над̇т̇и. ад̇д̇ано сарийробхаасзнзва д̣̇ваад̣̇асахад̇т̇адтаанз аалогам̣ гарод̇и, бияан̇г̇усаамаа ваа ход̇и суван̣н̣асаамаа ваа, аяамассаа чавигаляаан̣ад̇аа. жад̇д̇ааро банассаа хад̇т̇абаад̣̇аа мукабарияосаанан̃жа лаакаарасабаригаммагад̇ам̣ вияа рад̇д̇абаваал̣арад̇д̇агамб̣аласад̣̇исам̣ ход̇и, аяамассаа мам̣сагаляаан̣ад̇аа. вийсад̇и бана накабад̇д̇аани мам̣сад̇о амуд̇д̇адтаанз лаакаарасабуурид̇аани вияа муд̇д̇адтаанз кийрад̇хаараасад̣̇исаани хонд̇и, аяамассаа нахааругаляаан̣ад̇аа. д̣̇вад̇д̇им̣са д̣̇анд̇аа супусид̇аа суд̇ход̇аваж̇ирабанд̇и вияа кааяанд̇и, аяамассаа адтигаляаан̣ад̇аа. вийсад̇ивассасад̇игааби самаанаа сол̣асавассуд̣̇д̣̇зсигаа вияа ход̇и нивалибалид̇аа, аяамассаа ваяагаляаан̣ад̇аа. ид̇и имзхи бан̃жахи галяаан̣зхи саманнааг̇ад̇ад̇д̇аа ж̇анабад̣̇агаляаан̣ийд̇и вужжад̇и.
Kesavissajjananti kulamariyādavasena kesoropanaṃ. Paṭṭabandhoti yuvarājapaṭṭabandho. Abhinavagharappavesanamaho gharamaṅgalaṃ, vivāhakaraṇamaho āvāhamaṅgalaṃ. Chattamaṅgalanti yuvarājachattamaṅgalaṃ. Janapadakalyāṇīti (udā. aṭṭha. 22) janapadamhi kalyāṇī uttamā chasarīradosarahitā pañcakalyāṇasamannāgatā. Sā hi yasmā nātidīghā nātirassā nātikisā nātithūlā nātikāḷā nāccodātāti atikkantā mānusaṃ vaṇṇaṃ, appattā dibbaṃ vaṇṇaṃ, tasmā chasarīradosarahitā. Chavikalyāṇaṃ maṃsakalyāṇaṃ nahārukalyāṇaṃ aṭṭhikalyāṇaṃ vayakalyāṇanti imehi pana pañcahi kalyāṇehi samannāgatattā pañcakalyāṇasamannāgatā nāma. Tassā hi āgantukobhāsakiccaṃ natthi. Attano sarīrobhāseneva dvādasahatthaṭṭhāne ālokaṃ karoti, piyaṅgusāmā vā hoti suvaṇṇasāmā vā, ayamassā chavikalyāṇatā. Cattāro panassā hatthapādā mukhapariyosānañca lākhārasaparikammakataṃ viya rattapavāḷarattakambalasadisaṃ hoti, ayamassā maṃsakalyāṇatā. Vīsati pana nakhapattāni maṃsato amuttaṭṭhāne lākhārasapūritāni viya muttaṭṭhāne khīradhārāsadisāni honti, ayamassā nahārukalyāṇatā. Dvattiṃsa dantā suphusitā sudhotavajirapanti viya khāyanti, ayamassā aṭṭhikalyāṇatā. Vīsativassasatikāpi samānā soḷasavassuddesikā viya hoti nivalipalitā, ayamassā vayakalyāṇatā. Iti imehi pañcahi kalyāṇehi samannāgatattā janapadakalyāṇīti vuccati.
д̇уваданд̇и сийгхам̣. соби бхаг̇аванд̇ам̣ ‘‘бад̇д̇ам̣ г̇ан̣хат̇аа’’д̇и вад̇д̇ум̣ ависахамаано вихаарам̣язва аг̇амаасийд̇и. со гира д̇ат̇ааг̇ад̇з г̇ааравзна ‘‘бад̇д̇ам̣ во бханд̇з г̇ан̣хат̇аа’’д̇и вад̇д̇ум̣ наасагки. звам̣ бана жинд̇зси ‘‘собаанасийсз бад̇д̇ам̣ г̇ан̣хиссад̇ий’’д̇и. сад̇т̇аа д̇асмимби таанз на г̇ан̣хи. ид̇аро ‘‘собаанабаад̣̇амуулз г̇ан̣хиссад̇ий’’д̇и жинд̇зси. сад̇т̇аа д̇ад̇т̇ааби на г̇ан̣хи. ид̇аро ‘‘рааж̇ан̇г̇ан̣з г̇ан̣хиссад̇ий’’д̇и жинд̇зси. сад̇т̇аа д̇ад̇т̇ааби на г̇ан̣хи. гумааро нивад̇д̇ид̇угаамо аружияаа г̇ажчанд̇о сад̇т̇у г̇ааравзна ‘‘бад̇д̇ам̣ г̇ан̣хат̇аа’’д̇и вад̇д̇умби асаггонд̇о ‘‘ид̇ха г̇ан̣хиссад̇и, зд̇т̇а г̇ан̣хиссад̇ий’’д̇и жинд̇знд̇о г̇ажчад̇и. ж̇анабад̣̇агаляаан̣ияаа жа вуд̇д̇аважанам̣ д̇асса хад̣̇аяз д̇ирияам̣ бад̇ид̇ваа вияа тид̇ам̣. нанд̣̇агумааран̃хи абхисзгаман̇г̇алам̣ на д̇ат̇аа бийл̣зси, яат̇аа ж̇анабад̣̇агаляаан̣ияаа вуд̇д̇аважанам̣, д̇знасса жид̇д̇асанд̇аабо б̣алаваа ахоси. ат̇а нам̣ ‘‘имасмим̣ таанз нивад̇д̇иссад̇и, имасмим̣ таанз нивад̇д̇иссад̇ий’’д̇и жинд̇знд̇амзва сад̇т̇аа вихаарам̣ нзд̇ваа ‘‘баб̣б̣аж̇иссаси нанд̣̇аа’’д̇и ааха. со б̣уд̣̇д̇хаг̇ааравзна ‘‘на баб̣б̣аж̇иссаамий’’д̇и авад̇ваа ‘‘аама баб̣б̣аж̇иссаамий’’д̇и ааха. сад̇т̇аа ‘‘д̇зна хи нанд̣̇ам̣ баб̣б̣ааж̇зт̇аа’’д̇и вад̇ваа баб̣б̣ааж̇зси. д̇зна вуд̇д̇ам̣ ‘‘анижчамаанам̣язва бхаг̇аваа баб̣б̣ааж̇зсий’’д̇и. ‘‘сад̇т̇аа габилабурам̣ г̇анд̇ваа д̇ад̇ияад̣̇ивасз нанд̣̇ам̣ баб̣б̣ааж̇зсий’’д̇и д̇хаммабад̣̇адтагат̇ааяам̣ (д̇ха. ба. адта. 1.12 нанд̣̇ад̇т̇зравад̇т̇у) вуд̇д̇ам̣, ан̇г̇уд̇д̇аранигааяадтагат̇ааяам̣ (а. ни. адта. 1.1.230) бана –
Tuvaṭanti sīghaṃ. Sopi bhagavantaṃ ‘‘pattaṃ gaṇhathā’’ti vattuṃ avisahamāno vihāraṃyeva agamāsīti. So kira tathāgate gāravena ‘‘pattaṃ vo bhante gaṇhathā’’ti vattuṃ nāsakkhi. Evaṃ pana cintesi ‘‘sopānasīse pattaṃ gaṇhissatī’’ti. Satthā tasmimpi ṭhāne na gaṇhi. Itaro ‘‘sopānapādamūle gaṇhissatī’’ti cintesi. Satthā tatthāpi na gaṇhi. Itaro ‘‘rājaṅgaṇe gaṇhissatī’’ti cintesi. Satthā tatthāpi na gaṇhi. Kumāro nivattitukāmo aruciyā gacchanto satthu gāravena ‘‘pattaṃ gaṇhathā’’ti vattumpi asakkonto ‘‘idha gaṇhissati, ettha gaṇhissatī’’ti cintento gacchati. Janapadakalyāṇiyā ca vuttavacanaṃ tassa hadaye tiriyaṃ patitvā viya ṭhitaṃ. Nandakumārañhi abhisekamaṅgalaṃ na tathā pīḷesi, yathā janapadakalyāṇiyā vuttavacanaṃ, tenassa cittasantāpo balavā ahosi. Atha naṃ ‘‘imasmiṃ ṭhāne nivattissati, imasmiṃ ṭhāne nivattissatī’’ti cintentameva satthā vihāraṃ netvā ‘‘pabbajissasi nandā’’ti āha. So buddhagāravena ‘‘na pabbajissāmī’’ti avatvā ‘‘āma pabbajissāmī’’ti āha. Satthā ‘‘tena hi nandaṃ pabbājethā’’ti vatvā pabbājesi. Tena vuttaṃ ‘‘anicchamānaṃyeva bhagavā pabbājesī’’ti. ‘‘Satthā kapilapuraṃ gantvā tatiyadivase nandaṃ pabbājesī’’ti dhammapadaṭṭhakathāyaṃ (dha. pa. aṭṭha. 1.12 nandattheravatthu) vuttaṃ, aṅguttaranikāyaṭṭhakathāyaṃ (a. ni. aṭṭha. 1.1.230) pana –
‘‘махаасад̇д̇оби саб̣б̣ан̃н̃уд̇ам̣ бад̇ваа бавад̇д̇ид̇аварад̇хаммажагго логаануг̇г̇ахам̣ гаронд̇о рааж̇аг̇ахад̇о габилавад̇т̇ум̣ г̇анд̇ваа батамад̣̇ассанзнзва бид̇арам̣ сод̇аабад̇д̇ипалз бад̇идтаабзси, бунад̣̇ивасз бид̇у нивзсанам̣ г̇анд̇ваа раахуламаад̇ааяа оваад̣̇ам̣ гад̇ваа сзсаж̇анассаби д̇хаммам̣ гат̇зси, бунад̣̇ивасз нанд̣̇агумаарасса абхисзгаг̇зхаббавзсанаааваахаман̇г̇алзсу вад̇д̇амаанзсу д̇асса нивзсанам̣ г̇анд̇ваа гумаарам̣ бад̇д̇ам̣ г̇аахаабзд̇ваа баб̣б̣ааж̇зд̇ум̣ вихаараабхимуко бааяаасий’’д̇и –
‘‘Mahāsattopi sabbaññutaṃ patvā pavattitavaradhammacakko lokānuggahaṃ karonto rājagahato kapilavatthuṃ gantvā paṭhamadassaneneva pitaraṃ sotāpattiphale patiṭṭhāpesi, punadivase pitu nivesanaṃ gantvā rāhulamātāya ovādaṃ katvā sesajanassapi dhammaṃ kathesi, punadivase nandakumārassa abhisekagehappavesanaāvāhamaṅgalesu vattamānesu tassa nivesanaṃ gantvā kumāraṃ pattaṃ gāhāpetvā pabbājetuṃ vihārābhimukho pāyāsī’’ti –
вуд̇д̇ам̣, ид̇ха бана ‘‘бхаг̇аваа габилабурам̣ ааг̇анд̇ваа д̣̇уд̇ияад̣̇ивасз нанд̣̇ам̣ баб̣б̣ааж̇зсий’’д̇и вуд̇д̇ам̣, саб̣б̣амбзд̇ам̣ аажариязна д̇ам̣д̇ам̣бхаан̣агаанам̣ д̇ат̇аа д̇ат̇аа ануссававасзна барихарид̇ваа ааг̇ад̇абхаавад̇о д̇ад̇т̇а д̇ад̇т̇а д̇ат̇аа д̇ат̇аа вуд̇д̇анд̇и над̇т̇зд̇т̇а аажарияаважанз буб̣б̣аабаравирод̇хо.
Vuttaṃ, idha pana ‘‘bhagavā kapilapuraṃ āgantvā dutiyadivase nandaṃ pabbājesī’’ti vuttaṃ, sabbampetaṃ ācariyena taṃtaṃbhāṇakānaṃ tathā tathā anussavavasena pariharitvā āgatabhāvato tattha tattha tathā tathā vuttanti natthettha ācariyavacane pubbāparavirodho.
б̣рахмаруубаван̣н̣анд̇и б̣рахмаруубасамаанаруубам̣. д̇яассаад̇и д̇з асса. ваддаануг̇ад̇анд̇и ваддабарияаабаннам̣. савигхаад̇анд̇и д̣̇угкасахид̇ад̇д̇аа савигхаад̇ам̣, сад̣̇угканд̇и ад̇т̇о. сад̇д̇авид̇хам̣ арияад̇хананд̇и –
Brahmarūpavaṇṇanti brahmarūpasamānarūpaṃ. Tyassāti te assa. Vaṭṭānugatanti vaṭṭapariyāpannaṃ. Savighātanti dukkhasahitattā savighātaṃ, sadukkhanti attho. Sattavidhaṃ ariyadhananti –
‘‘сад̣̇д̇хаад̇ханам̣ сийлад̇ханам̣, хириод̇д̇аббияам̣ д̇ханам̣;
‘‘Saddhādhanaṃ sīladhanaṃ, hiriottappiyaṃ dhanaṃ;
суд̇ад̇ханан̃жа жааг̇о жа, бан̃н̃аа вз сад̇д̇амам̣ д̇хана’’нд̇и. (а. ни. 7.5-6) –
Sutadhanañca cāgo ca, paññā ve sattamaṃ dhana’’nti. (a. ni. 7.5-6) –
звам̣ вуд̇д̇ам̣ сад̇д̇авид̇хам̣ арияад̇ханам̣. ун̃чаажарияааяаад̇и бхигкаажарияааяа. буд̇д̇асинзхо уббаж̇ж̇амаано сагаласарийрам̣ кобхзд̇ваа адтимин̃ж̇ам̣ аахажжа д̇идтад̇ийд̇и ааха ‘‘буд̇д̇абзмам̣ бханд̇з…бз… адтимин̃ж̇ам̣ аахажжа д̇идтад̇ий’’д̇и. буд̇д̇асинзхо хи б̣алавабхаавад̇о сахаж̇аад̇абийд̇ивзг̇асса савибпаарад̇ааяа д̇ам̣самудтаанаруубад̇хаммзхи паран̣авасзна сагаласарийрам̣ аалол̣зд̇ваа адтимин̃ж̇ам̣ аахажжа д̇идтад̇и. яад̇ра хи наамаад̇и яо наама. сзсамзд̇т̇а уд̇д̇аанамзва.
Evaṃ vuttaṃ sattavidhaṃ ariyadhanaṃ. Uñchācariyāyāti bhikkhācariyāya. Puttasineho uppajjamāno sakalasarīraṃ khobhetvā aṭṭhimiñjaṃ āhacca tiṭṭhatīti āha ‘‘puttapemaṃ bhante…pe… aṭṭhimiñjaṃ āhacca tiṭṭhatī’’ti. Puttasineho hi balavabhāvato sahajātapītivegassa savipphāratāya taṃsamuṭṭhānarūpadhammehi pharaṇavasena sakalasarīraṃ āloḷetvā aṭṭhimiñjaṃ āhacca tiṭṭhati. Yatra hi nāmāti yo nāma. Sesamettha uttānameva.
раахулавад̇т̇угат̇ааван̣н̣анаа нидтид̇аа.
Rāhulavatthukathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 41. раахулавад̇т̇у • 41. Rāhulavatthu
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / раахулавад̇т̇угат̇аа • Rāhulavatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / раахулавад̇т̇угат̇ааван̣н̣анаа • Rāhulavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / раахулавад̇т̇угат̇ааван̣н̣анаа • Rāhulavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 41. раахулавад̇т̇угат̇аа • 41. Rāhulavatthukathā
