| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
5. ராஹுலோவாத³ஸுத்தவண்ணனா
5. Rāhulovādasuttavaṇṇanā
416. விமுத்திங் பரிபாசெந்தீதி கிலேஸானங் படிப்பஸ்ஸத்³தி⁴விமுத்திபூ⁴தங் அரஹத்தங் ஸப்³ப³ஸோ பாசெந்தி ஸாதெ⁴ந்தி நிப்³பா³பெந்தீதி விமுத்திபரிபாசனீயா. த⁴ம்மாதி காரணத⁴ம்மா. தேனாஹ – ‘‘விஸுத்³தி⁴காரணவஸேனா’’தி, அரஹத்தஸங்கா²தாய விஸுத்³தி⁴யா ஸம்பாத³னவஸேனாதி அத்தோ². ஸத்³தி⁴ந்த்³ரியாத³யோ விஸுஜ்ஜ²மானா மக்³க³படிபாடியாவ ஸப்³ப³ஸோ அஸ்ஸத்³தி⁴யாதீ³ஹி சித்தங் விமோசெந்தா அக்³க³ப²லவிமுத்திங் ஸம்பாதெ³ந்தி. தேஸங் பன விஸுத்³தி⁴ பா³லபரிவஜ்ஜனேன பண்டி³தபயிருபாஸனேன பஸாதா³வஹத⁴ம்மபச்சவெக்க²ணாய ச ஹோதி. ததோ இத⁴ பன்னரஸ த⁴ம்மா அதி⁴ப்பேதாதி த³ஸ்ஸெந்தோ, ‘‘வுத்தஞ்ஹேத’’ந்திஆதி³மாஹ.
416.Vimuttiṃparipācentīti kilesānaṃ paṭippassaddhivimuttibhūtaṃ arahattaṃ sabbaso pācenti sādhenti nibbāpentīti vimuttiparipācanīyā. Dhammāti kāraṇadhammā. Tenāha – ‘‘visuddhikāraṇavasenā’’ti, arahattasaṅkhātāya visuddhiyā sampādanavasenāti attho. Saddhindriyādayo visujjhamānā maggapaṭipāṭiyāva sabbaso assaddhiyādīhi cittaṃ vimocentā aggaphalavimuttiṃ sampādenti. Tesaṃ pana visuddhi bālaparivajjanena paṇḍitapayirupāsanena pasādāvahadhammapaccavekkhaṇāya ca hoti. Tato idha pannarasa dhammā adhippetāti dassento, ‘‘vuttañheta’’ntiādimāha.
தத்த² அஸ்ஸத்³தே⁴ புக்³க³லேதி ஸத்³தா⁴ரஹிதே புக்³க³லே. தே ஹி நிஸ்ஸாய ந கதா³சி ஸத்³தா⁴ ஸம்ப⁴வதி, தேஸங் பன தி³ட்டா²னுக³திஆபஜ்ஜனேன அஞ்ஞத³த்து² அஸத்³தி⁴யமேவ வட்³ட⁴தி, தஸ்மா தே படிப⁴யமக்³கோ³ விய தூ³ரதோ வஜ்ஜேதப்³பா³. அஸ்ஸத்³தி⁴யந்தி ச ஸத்³தா⁴ய படிபக்க²பூ⁴தா அஸத்³தெ⁴ய்யவத்து²ஸ்மிங் அதி⁴முச்சனாகாரேன பவத்தா ஸங்கிலேஸத⁴ம்மா வேதி³தப்³பா³. ஸத்³தே⁴ புக்³க³லேதி ஸத்³தா⁴ஸம்பன்னே புக்³க³லே. தே ஹி நிஸ்ஸாய ஸத்³தெ⁴ய்யவத்து²ஸ்மிங் அனுப்பன்னா உப்பஜ்ஜதி, உப்பன்னா பி⁴ய்யோபா⁴வங் வேபுல்லங் ஆபஜ்ஜதி. ஸத்³தெ⁴ய்யவத்தூ²தி ச பு³த்³தா⁴தீ³னி ரதனானி கம்மகம்மப²லானி ச. ஸேவதோதி லப்³ப⁴மானங் ஸத்³தா⁴ஸம்பத³ங் உப்பாதே³துங் வட்³டே⁴துஞ்ச நிஸேவதோ. ஸேஸபதா³னி தஸ்ஸேவ வேவசனானி. அத² வா ஸேவதோ உபஸங்கமதோ. ப⁴ஜதோ தேஸங் படிபத்தியங் ப⁴த்திங் குப்³ப³தோ. பயிருபாஸதோதி தேஸங் ஓவாதா³னுஸாஸனிகரணவஸேன உபட்ட²ஹதோ. பஸாத³னீயஸுத்தந்தா நாம பு³த்³தா⁴தி³கு³ணபடிஸங்யுத்தா பஸாதா³வஹா ஸம்பஸாத³னீயஸுத்தாத³யோ. தே ஹி பச்சவெக்க²தோ பு³த்³தா⁴தீ³ஸு அனுப்பன்னா பஸன்னா உபஜ்ஜதி, உப்பன்னா பி⁴ய்யோபா⁴வங் வேபுல்லங் ஆபஜ்ஜதி. இமேஹி தீஹாகாரேஹீதி இமேஹி யதா²வுத்தேஹி தீஹி காரணேஹி. படிபக்க²தூ³ரீபா⁴வதோ பச்சேகங் ஸூபஹாரதோ ச ஆஸேவனங் பா⁴வனங் லப⁴ந்தி. ஸத்³தி⁴ந்த்³ரியங் விஸுஜ்ஜ²தி மக்³க³ப²லாவஹபா⁴வேன அச்ச²தி விஸுத்³தி⁴ங் பாபுணாதி. இமினா நயேன ஸேஸபதே³ஸுபி அத்தோ² வேதி³தப்³போ³.
Tattha assaddhe puggaleti saddhārahite puggale. Te hi nissāya na kadāci saddhā sambhavati, tesaṃ pana diṭṭhānugatiāpajjanena aññadatthu asaddhiyameva vaḍḍhati, tasmā te paṭibhayamaggo viya dūrato vajjetabbā. Assaddhiyanti ca saddhāya paṭipakkhabhūtā asaddheyyavatthusmiṃ adhimuccanākārena pavattā saṃkilesadhammā veditabbā. Saddhe puggaleti saddhāsampanne puggale. Te hi nissāya saddheyyavatthusmiṃ anuppannā uppajjati, uppannā bhiyyobhāvaṃ vepullaṃ āpajjati. Saddheyyavatthūti ca buddhādīni ratanāni kammakammaphalāni ca. Sevatoti labbhamānaṃ saddhāsampadaṃ uppādetuṃ vaḍḍhetuñca nisevato. Sesapadāni tasseva vevacanāni. Atha vā sevato upasaṅkamato. Bhajato tesaṃ paṭipattiyaṃ bhattiṃ kubbato. Payirupāsatoti tesaṃ ovādānusāsanikaraṇavasena upaṭṭhahato. Pasādanīyasuttantā nāma buddhādiguṇapaṭisaṃyuttā pasādāvahā sampasādanīyasuttādayo. Te hi paccavekkhato buddhādīsu anuppannā pasannā upajjati, uppannā bhiyyobhāvaṃ vepullaṃ āpajjati. Imehi tīhākārehīti imehi yathāvuttehi tīhi kāraṇehi. Paṭipakkhadūrībhāvato paccekaṃ sūpahārato ca āsevanaṃ bhāvanaṃ labhanti. Saddhindriyaṃ visujjhati maggaphalāvahabhāvena acchati visuddhiṃ pāpuṇāti. Iminā nayena sesapadesupi attho veditabbo.
அயங் பன விஸேஸோ – குஸீதேதி அலஸே ஸம்மாபடிபத்தியங் நிக்கி²த்தது⁴ரே. ஆரத்³த⁴வீரியேதி பக்³க³ஹிதவீரியே ஸம்மாபடிபன்னே. ஸம்மப்பதா⁴னேதி அனுப்பன்னானங் அகுஸலானங் அனுப்பாத³னாதி³வஸேன பவத்தே சத்தாரோ உபாயப்பதா⁴னே. பச்சவெக்க²தோ படிபத்திங் அவெக்க²தோ. தே ஹி பச்சவெக்க²தோ லீனங் அபி⁴ப⁴வித்வா ஸம்மதே³வ ஆரம்ப⁴தா⁴துஆதி³ அனுப்பன்னானங் விதி⁴னா ஸதிஸம்பதா³ய உப்பாதா³ய பி⁴ய்யோபா⁴வாய ஸங்வத்ததி. அஸமாஹிதே ப⁴ந்தமிக³ப⁴ந்தகோ³ணஸப்படிபா⁴கே³ விப்³ப⁴ந்தசித்தே. ஸமாஹிதே உபசாரஸமாதி⁴னா அப்பனாஸமாதி⁴னா ச ஸம்மதே³வ ஸமாஹிதசித்தே. ஜா²னவிமொக்கே²தி ஸவிதக்கஸவிசாராதி³ஜா²னானி பட²மாதி³விமொக்கே² ச. தேஸஞ்ஹி பச்சவெக்க²ணா உபரூபரி அச்சந்தமேவ ஸமாதா⁴னாய ஸங்வத்ததி. து³ப்பஞ்ஞேதி நிப்பஞ்ஞே, அரியத⁴ம்மஸ்ஸ உக்³க³ஹபரிபுச்சா²ஸவனஸம்மஸனாபா⁴வேன ஸப்³ப³ஸோ பஞ்ஞாரஹிதே ச. பஞ்ஞவந்தேதி விபஸ்ஸனாபஞ்ஞாய சேவ மக்³க³பஞ்ஞாய ச ஸமன்னாக³தே. க³ம்பீ⁴ரஞாணசரியந்தி க³ம்பீ⁴ரங் க²ந்தா⁴யதனதா⁴துஸச்சபடிச்சஸமுப்பாதா³தி³பே⁴த³ங் ஞாணஸ்ஸ சரிதப்³ப³ட்டா²னங், யத்த² வா க³ம்பீ⁴ரஞாணஸ்ஸ சரியங் பவத்ததி. தத்த² ஹி பச்சவெக்க²ணா ஸம்மோஹங் வித⁴மதி, அனுப்பன்னாய பஞ்ஞாய உப்பாதா³ய பி⁴ய்யோபா⁴வாய ஸங்வத்ததி. ஸுத்தந்தக்க²ந்தே⁴தி ஸுத்தஸமூஹே.
Ayaṃ pana viseso – kusīteti alase sammāpaṭipattiyaṃ nikkhittadhure. Āraddhavīriyeti paggahitavīriye sammāpaṭipanne. Sammappadhāneti anuppannānaṃ akusalānaṃ anuppādanādivasena pavatte cattāro upāyappadhāne. Paccavekkhato paṭipattiṃ avekkhato. Te hi paccavekkhato līnaṃ abhibhavitvā sammadeva ārambhadhātuādi anuppannānaṃ vidhinā satisampadāya uppādāya bhiyyobhāvāya saṃvattati. Asamāhite bhantamigabhantagoṇasappaṭibhāge vibbhantacitte. Samāhite upacārasamādhinā appanāsamādhinā ca sammadeva samāhitacitte. Jhānavimokkheti savitakkasavicārādijhānāni paṭhamādivimokkhe ca. Tesañhi paccavekkhaṇā uparūpari accantameva samādhānāya saṃvattati. Duppaññeti nippaññe, ariyadhammassa uggahaparipucchāsavanasammasanābhāvena sabbaso paññārahite ca. Paññavanteti vipassanāpaññāya ceva maggapaññāya ca samannāgate. Gambhīrañāṇacariyanti gambhīraṃ khandhāyatanadhātusaccapaṭiccasamuppādādibhedaṃ ñāṇassa caritabbaṭṭhānaṃ, yattha vā gambhīrañāṇassa cariyaṃ pavattati. Tattha hi paccavekkhaṇā sammohaṃ vidhamati, anuppannāya paññāya uppādāya bhiyyobhāvāya saṃvattati. Suttantakkhandheti suttasamūhe.
புப்³பே³ ஸத்³தி⁴ந்த்³ரியாதீ³னங் விஸுத்³தி⁴காரணானி, ‘‘விமுத்திபரிபாசனீயா த⁴ம்மா’’தி வுத்தானீதி இத⁴ ஸத்³தா⁴தி³கே அஞ்ஞே ச த⁴ம்மே த³ஸ்ஸெந்தோ, ‘‘அபரேபீ’’திஆதி³மாஹ. தத்த² ஸத்³தா⁴தீ³னங் விமுத்திபரிபாசனீயதா த³ஸ்ஸிதா ஏவ, அனிச்சஸஞ்ஞாதீ³னங் பன விமுத்திபரிபாசனீயதாய வத்தப்³ப³மேவ நத்தி² விபஸ்ஸனாபா⁴வதோ. தேனாஹ – ‘‘இமே பஞ்ச நிப்³பே³த⁴பா⁴கி³யா ஸஞ்ஞா’’தி. கல்யாணமித்ததாத³யோதி கல்யாணமித்ததா ஸீலஸங்வரோ அபி⁴ஸல்லேக²கதா² வீரியாரம்போ⁴ நிப்³பே³தி⁴கா பஞ்ஞா இமே கல்யாணமித்ததாத³யோ பஞ்ச த⁴ம்மா. அயமெத்த² ஸங்கே²போ, வித்தா²ரோ பன ‘‘மேகி⁴யஸுத்தஸங்வண்ணனாயங்’’ (உதா³॰ அட்ட²॰ 31) வுத்தனயேன வேதி³தப்³போ³. லோகங் வோலோகெந்தஸ்ஸாதி பு³த்³த⁴வேனெய்யஸத்தலோகங் பு³த்³த⁴சக்கு²னா விஸேஸதோ ஓலோகெந்தஸ்ஸ.
Pubbe saddhindriyādīnaṃ visuddhikāraṇāni, ‘‘vimuttiparipācanīyā dhammā’’ti vuttānīti idha saddhādike aññe ca dhamme dassento, ‘‘aparepī’’tiādimāha. Tattha saddhādīnaṃ vimuttiparipācanīyatā dassitā eva, aniccasaññādīnaṃ pana vimuttiparipācanīyatāya vattabbameva natthi vipassanābhāvato. Tenāha – ‘‘ime pañca nibbedhabhāgiyā saññā’’ti. Kalyāṇamittatādayoti kalyāṇamittatā sīlasaṃvaro abhisallekhakathā vīriyārambho nibbedhikā paññā ime kalyāṇamittatādayo pañca dhammā. Ayamettha saṅkhepo, vitthāro pana ‘‘meghiyasuttasaṃvaṇṇanāyaṃ’’ (udā. aṭṭha. 31) vuttanayena veditabbo. Lokaṃ volokentassāti buddhaveneyyasattalokaṃ buddhacakkhunā visesato olokentassa.
419. ஆயஸ்மதோ ராஹுலஸ்ஸ இந்த்³ரியானங் பரிபக்கத்தா ஸத்³தி⁴ங் பட்ட²பிதபத்த²னா தே³வதா உதி³க்க²மானா திட்ட²ந்தி, – ‘‘கதா³ நு கோ² உத்தரி ஆஸவானங் க²யே வினெஸ்ஸதீ’’தி. யதா³ பன ஸத்தா² ஏவங் பரிவிதக்கேஸி, தாவதே³வ ஸமானஜ்ஜா²ஸயதாய ஸப்³ப³காலங் தங்க²ணங் ஆக³மெந்தியோ தா தே³வதாயோ தங் ஸமவாயங் தி³ஸ்வா ஏகஸ்மிங் அந்த⁴வனஸ்மிங்யேவ ஸன்னிபதிதா. உபாலிஸ்ஸ க³ஹபதினோ தீ³க⁴னக²பரிப்³பா³ஜகஸ்ஸ சதுஸச்சத⁴ம்மேஸு த³ஸ்ஸனகிச்சேன பவத்தோ ஸோதாபத்திமக்³கோ³தி தேஸு ஸுத்தேஸு (படி॰ ம॰ அட்ட²॰ 2.2.30) பட²மமக்³கோ³ ‘‘த⁴ம்மசக்கு²’’ந்தி வுத்தோ, தஸ்ஸ த³ஸ்ஸனத்த²ஸ்ஸ ஸாதிஸயத்தா, ப்³ரஹ்மாயுனோ பன ப²லஞாணானி ஹெட்டி²மானி தீணி ஸாதிஸயானீதி ப்³ரஹ்மாயுஸுத்தே(ம॰ நி॰ 2.383 ஆத³யோ) தீணி ப²லானி ‘‘த⁴ம்மசக்கு²’’ந்தி வுத்தானி. இத³ங் பனெத்த² ஆயஸ்மதோ ராஹுலஸ்ஸ மக்³க³ஞாணங் ப²லஞாணஞ்ச த³ஸ்ஸனத்தோ² ஸாதிஸயோ, தாஹி ச தே³வதாஹி யங் ஞாணங் அதி⁴க³தங், தங் ஸாதிஸயமேவாதி வுத்தங் – ‘‘இமஸ்மிங் ஸுத்தே சத்தாரோ மக்³கா³, சத்தாரி ச ப²லானி த⁴ம்மசக்கு²ந்தி வேதி³தப்³பா³னீ’’தி. கிங் பன ஸாவகானங் ஸச்சாபி⁴ஸமயஞாணே அத்தி² கோசி விஸேஸோதி? ஆம அத்தி². ஸோ ச கோ² புப்³ப³பா⁴கே³ வுட்டா²னகா³மினிவிபஸ்ஸனாய பவத்தியாகாரவிஸேஸேன லபெ⁴ய்ய காசி விஸேஸமத்தா. ஸ்வாயமத்தோ² அபி⁴த⁴ம்மே ‘‘நோ ச கோ² யதா² தி³ட்டி²ப்பத்தஸ்ஸா’’தி ஸத்³தா⁴விமுத்ததோ தி³ட்டி²ப்பத்தஸ்ஸ கிலேஸப்பஹானங் பதி விஸேஸகித்தனேன தீ³பேதப்³போ³. கிங் பன ஆயஸ்மா ராஹுலோ விய தா தே³வதா ஸப்³பா³ ஏகசித்தா பகே³வ சத்தாரி ப²லானி அதி⁴க³ண்ஹிங்ஸூதி? நோதி த³ஸ்ஸெந்தோ ‘‘தத்த² ஹீ’’திஆதி³மாஹ. கித்தகா பன தா தே³வதாதி ஆஹ ‘‘தாஸஞ்ச பனா’’திஆதி³.
419. Āyasmato rāhulassa indriyānaṃ paripakkattā saddhiṃ paṭṭhapitapatthanā devatā udikkhamānā tiṭṭhanti, – ‘‘kadā nu kho uttari āsavānaṃ khaye vinessatī’’ti. Yadā pana satthā evaṃ parivitakkesi, tāvadeva samānajjhāsayatāya sabbakālaṃ taṅkhaṇaṃ āgamentiyo tā devatāyo taṃ samavāyaṃ disvā ekasmiṃ andhavanasmiṃyeva sannipatitā. Upālissa gahapatino dīghanakhaparibbājakassa catusaccadhammesu dassanakiccena pavatto sotāpattimaggoti tesu suttesu (paṭi. ma. aṭṭha. 2.2.30) paṭhamamaggo ‘‘dhammacakkhu’’nti vutto, tassa dassanatthassa sātisayattā, brahmāyuno pana phalañāṇāni heṭṭhimāni tīṇi sātisayānīti brahmāyusutte(ma. ni. 2.383 ādayo) tīṇi phalāni ‘‘dhammacakkhu’’nti vuttāni. Idaṃ panettha āyasmato rāhulassa maggañāṇaṃ phalañāṇañca dassanattho sātisayo, tāhi ca devatāhi yaṃ ñāṇaṃ adhigataṃ, taṃ sātisayamevāti vuttaṃ – ‘‘imasmiṃ sutte cattāro maggā, cattāri ca phalāni dhammacakkhuntiveditabbānī’’ti. Kiṃ pana sāvakānaṃ saccābhisamayañāṇe atthi koci visesoti? Āma atthi. So ca kho pubbabhāge vuṭṭhānagāminivipassanāya pavattiyākāravisesena labheyya kāci visesamattā. Svāyamattho abhidhamme ‘‘no ca kho yathā diṭṭhippattassā’’ti saddhāvimuttato diṭṭhippattassa kilesappahānaṃ pati visesakittanena dīpetabbo. Kiṃ pana āyasmā rāhulo viya tā devatā sabbā ekacittā pageva cattāri phalāni adhigaṇhiṃsūti? Noti dassento ‘‘tattha hī’’tiādimāha. Kittakā pana tā devatāti āha ‘‘tāsañca panā’’tiādi.
ராஹுலோவாத³ஸுத்தவண்ணனாய லீனத்த²ப்பகாஸனா ஸமத்தா.
Rāhulovādasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. சூளராஹுலோவாத³ஸுத்தங் • 5. Cūḷarāhulovādasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 5. ராஹுலோவாத³ஸுத்தவண்ணனா • 5. Rāhulovādasuttavaṇṇanā
