| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. রাহুলোৰাদসুত্তৰণ্ণনা
8. Rāhulovādasuttavaṇṇanā
১২১. যে ধম্মা সম্মদেৰ ভাৰিতা বহুলীকতা ৰিমুত্তিযা অরহত্তস্স সচ্ছিকিরিযায সংৰত্তন্তি, তে সদ্ধাদযো সম্ভারা ৰিমুত্তিপরিপাচনিযাতি অধিপ্পেতা। পরিপাচেন্তীতি পরিপাকং পরিণামং গমেন্তি। ধম্মাতি কারণভূতা ধম্মা। ৰিসুদ্ধিকারণৰসেনাতি ৰিসুদ্ধিকারণতাৰসেন, সা পন সদ্ধিন্দ্রিযাদীনং কারণতো ৰিসুদ্ধি। যথা নাম জাতিসম্পন্নস্স খত্তিযকুমারস্স ৰিপক্খৰিগমেন পক্খসঙ্গহেন পৰত্তিট্ঠানসম্পত্তিযা চ পরিসুদ্ধি হোতি, এৰমেৰং দট্ঠব্বাতি দস্সেন্তো ‘‘ৰুত্তং হেত’’ন্তিআদিমাহ।
121. Ye dhammā sammadeva bhāvitā bahulīkatā vimuttiyā arahattassa sacchikiriyāya saṃvattanti, te saddhādayo sambhārā vimuttiparipācaniyāti adhippetā. Paripācentīti paripākaṃ pariṇāmaṃ gamenti. Dhammāti kāraṇabhūtā dhammā. Visuddhikāraṇavasenāti visuddhikāraṇatāvasena, sā pana saddhindriyādīnaṃ kāraṇato visuddhi. Yathā nāma jātisampannassa khattiyakumārassa vipakkhavigamena pakkhasaṅgahena pavattiṭṭhānasampattiyā ca parisuddhi hoti, evamevaṃ daṭṭhabbāti dassento ‘‘vuttaṃ heta’’ntiādimāha.
অস্সদ্ধাদযোপি পুগ্গলা সদ্ধাদীনং যাৰদেৰ পরিহানায হোন্তি, সদ্ধাদযো পারিপূরিযাৰ, তথা পসাদনিযসুত্তন্তাদিপচ্চৰেক্খণা, পসাদনিযসুত্তন্তা নাম সম্পসাদনীযসুত্তাদযো। সম্মপ্পধানেতি সম্মপ্পধানসুত্তন্তে। সতিপট্ঠানেতি চত্তারো সতিপট্ঠানে। ঝানৰিমোক্খেতি ঝানানি চেৰ ৰিমোক্খে চ উদ্দিস্স পৰত্তসুত্তন্তে। গম্ভীরঞাণচরিযেতি খন্ধাযতনধাতুপটিচ্চসমুপ্পাদপটিসংযুত্তসুত্তন্তে।
Assaddhādayopi puggalā saddhādīnaṃ yāvadeva parihānāya honti, saddhādayo pāripūriyāva, tathā pasādaniyasuttantādipaccavekkhaṇā, pasādaniyasuttantā nāma sampasādanīyasuttādayo. Sammappadhāneti sammappadhānasuttante. Satipaṭṭhāneti cattāro satipaṭṭhāne. Jhānavimokkheti jhānāni ceva vimokkhe ca uddissa pavattasuttante. Gambhīrañāṇacariyeti khandhāyatanadhātupaṭiccasamuppādapaṭisaṃyuttasuttante.
কল্যাণমিত্ততাদযোতি কল্যাণমিত্ততা সীলসংৰরো অভিসল্লেখকথা ৰীরিযারম্ভো নিব্বেধিকপঞ্ঞাতি ইমে কল্যাণমিত্তাদযো পঞ্চ ধম্মা, যে ‘‘ইধ, মেঘিয, ভিক্খু কল্যাণমিত্তো হোতী’’তিআদিনা উদানে (উদা॰ ৩১) কথিতা। লোকং ৰোলোকেন্তস্সাতি আযস্মতো রাহুলস্স তাসঞ্চ দেৰতানং ইন্দ্রিযপরিপাকং পস্সন্তস্স। ততো যেন অন্ধৰনং, তত্থ দিৰাৰিহারায মহাসমাগমো ভৰিস্সতীতি। তথা হি ৰক্খতি ‘‘এত্তকাতি গণনাৰসেন পরিচ্ছেদো নত্থী’’তি।
Kalyāṇamittatādayoti kalyāṇamittatā sīlasaṃvaro abhisallekhakathā vīriyārambho nibbedhikapaññāti ime kalyāṇamittādayo pañca dhammā, ye ‘‘idha, meghiya, bhikkhu kalyāṇamitto hotī’’tiādinā udāne (udā. 31) kathitā. Lokaṃ volokentassāti āyasmato rāhulassa tāsañca devatānaṃ indriyaparipākaṃ passantassa. Tato yena andhavanaṃ, tattha divāvihārāya mahāsamāgamo bhavissatīti. Tathā hi vakkhati ‘‘ettakāti gaṇanāvasena paricchedo natthī’’ti.
রুক্খপব্বতনিস্সিতা ভূমট্ঠকা, আকাসচারিৰিমানৰাসিনো অন্তলিক্খট্ঠকা। ধম্মচক্খুন্তি ৰেদিতব্বানি চতুসচ্চধম্মানং দস্সনট্ঠেন।
Rukkhapabbatanissitā bhūmaṭṭhakā, ākāsacārivimānavāsino antalikkhaṭṭhakā. Dhammacakkhunti veditabbāni catusaccadhammānaṃ dassanaṭṭhena.
রাহুলোৰাদসুত্তৰণ্ণনা নিট্ঠিতা।
Rāhulovādasuttavaṇṇanā niṭṭhitā.
লোককামগুণৰগ্গৰণ্ণনা নিট্ঠিতা।
Lokakāmaguṇavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. রাহুলোৰাদসুত্তং • 8. Rāhulovādasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. রাহুলোৰাদসুত্তৰণ্ণনা • 8. Rāhulovādasuttavaṇṇanā
