| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៨. រាហុលោវាទសុត្តវណ្ណនា
8. Rāhulovādasuttavaṇṇanā
១២១. យេ ធម្មា សម្មទេវ ភាវិតា ពហុលីកតា វិមុត្តិយា អរហត្តស្ស សច្ឆិកិរិយាយ សំវត្តន្តិ, តេ សទ្ធាទយោ សម្ភារា វិមុត្តិបរិបាចនិយាតិ អធិប្បេតា។ បរិបាចេន្តីតិ បរិបាកំ បរិណាមំ គមេន្តិ។ ធម្មាតិ ការណភូតា ធម្មា។ វិសុទ្ធិការណវសេនាតិ វិសុទ្ធិការណតាវសេន, សា បន សទ្ធិន្ទ្រិយាទីនំ ការណតោ វិសុទ្ធិ។ យថា នាម ជាតិសម្បន្នស្ស ខត្តិយកុមារស្ស វិបក្ខវិគមេន បក្ខសង្គហេន បវត្តិដ្ឋានសម្បត្តិយា ច បរិសុទ្ធិ ហោតិ, ឯវមេវំ ទដ្ឋព្ពាតិ ទស្សេន្តោ ‘‘វុត្តំ ហេត’’ន្តិអាទិមាហ។
121. Ye dhammā sammadeva bhāvitā bahulīkatā vimuttiyā arahattassa sacchikiriyāya saṃvattanti, te saddhādayo sambhārā vimuttiparipācaniyāti adhippetā. Paripācentīti paripākaṃ pariṇāmaṃ gamenti. Dhammāti kāraṇabhūtā dhammā. Visuddhikāraṇavasenāti visuddhikāraṇatāvasena, sā pana saddhindriyādīnaṃ kāraṇato visuddhi. Yathā nāma jātisampannassa khattiyakumārassa vipakkhavigamena pakkhasaṅgahena pavattiṭṭhānasampattiyā ca parisuddhi hoti, evamevaṃ daṭṭhabbāti dassento ‘‘vuttaṃ heta’’ntiādimāha.
អស្សទ្ធាទយោបិ បុគ្គលា សទ្ធាទីនំ យាវទេវ បរិហានាយ ហោន្តិ, សទ្ធាទយោ បារិបូរិយាវ, តថា បសាទនិយសុត្តន្តាទិបច្ចវេក្ខណា, បសាទនិយសុត្តន្តា នាម សម្បសាទនីយសុត្តាទយោ។ សម្មប្បធានេតិ សម្មប្បធានសុត្តន្តេ។ សតិបដ្ឋានេតិ ចត្តារោ សតិបដ្ឋានេ។ ឈានវិមោក្ខេតិ ឈានានិ ចេវ វិមោក្ខេ ច ឧទ្ទិស្ស បវត្តសុត្តន្តេ។ គម្ភីរញាណចរិយេតិ ខន្ធាយតនធាតុបដិច្ចសមុប្បាទបដិសំយុត្តសុត្តន្តេ។
Assaddhādayopi puggalā saddhādīnaṃ yāvadeva parihānāya honti, saddhādayo pāripūriyāva, tathā pasādaniyasuttantādipaccavekkhaṇā, pasādaniyasuttantā nāma sampasādanīyasuttādayo. Sammappadhāneti sammappadhānasuttante. Satipaṭṭhāneti cattāro satipaṭṭhāne. Jhānavimokkheti jhānāni ceva vimokkhe ca uddissa pavattasuttante. Gambhīrañāṇacariyeti khandhāyatanadhātupaṭiccasamuppādapaṭisaṃyuttasuttante.
កល្យាណមិត្តតាទយោតិ កល្យាណមិត្តតា សីលសំវរោ អភិសល្លេខកថា វីរិយារម្ភោ និព្ពេធិកបញ្ញាតិ ឥមេ កល្យាណមិត្តាទយោ បញ្ច ធម្មា, យេ ‘‘ឥធ, មេឃិយ, ភិក្ខុ កល្យាណមិត្តោ ហោតី’’តិអាទិនា ឧទានេ (ឧទា. ៣១) កថិតា។ លោកំ វោលោកេន្តស្សាតិ អាយស្មតោ រាហុលស្ស តាសញ្ច ទេវតានំ ឥន្ទ្រិយបរិបាកំ បស្សន្តស្ស។ តតោ យេន អន្ធវនំ, តត្ថ ទិវាវិហារាយ មហាសមាគមោ ភវិស្សតីតិ។ តថា ហិ វក្ខតិ ‘‘ឯត្តកាតិ គណនាវសេន បរិច្ឆេទោ នត្ថី’’តិ។
Kalyāṇamittatādayoti kalyāṇamittatā sīlasaṃvaro abhisallekhakathā vīriyārambho nibbedhikapaññāti ime kalyāṇamittādayo pañca dhammā, ye ‘‘idha, meghiya, bhikkhu kalyāṇamitto hotī’’tiādinā udāne (udā. 31) kathitā. Lokaṃ volokentassāti āyasmato rāhulassa tāsañca devatānaṃ indriyaparipākaṃ passantassa. Tato yena andhavanaṃ, tattha divāvihārāya mahāsamāgamo bhavissatīti. Tathā hi vakkhati ‘‘ettakāti gaṇanāvasena paricchedo natthī’’ti.
រុក្ខបព្ពតនិស្សិតា ភូមដ្ឋកា, អាកាសចារិវិមានវាសិនោ អន្តលិក្ខដ្ឋកា។ ធម្មចក្ខុន្តិ វេទិតព្ពានិ ចតុសច្ចធម្មានំ ទស្សនដ្ឋេន។
Rukkhapabbatanissitā bhūmaṭṭhakā, ākāsacārivimānavāsino antalikkhaṭṭhakā. Dhammacakkhunti veditabbāni catusaccadhammānaṃ dassanaṭṭhena.
រាហុលោវាទសុត្តវណ្ណនា និដ្ឋិតា។
Rāhulovādasuttavaṇṇanā niṭṭhitā.
លោកកាមគុណវគ្គវណ្ណនា និដ្ឋិតា។
Lokakāmaguṇavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. រាហុលោវាទសុត្តំ • 8. Rāhulovādasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. រាហុលោវាទសុត្តវណ្ណនា • 8. Rāhulovādasuttavaṇṇanā
