| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೮. ರಾಹುಲೋವಾದಸುತ್ತವಣ್ಣನಾ
8. Rāhulovādasuttavaṇṇanā
೧೨೧. ಯೇ ಧಮ್ಮಾ ಸಮ್ಮದೇವ ಭಾವಿತಾ ಬಹುಲೀಕತಾ ವಿಮುತ್ತಿಯಾ ಅರಹತ್ತಸ್ಸ ಸಚ್ಛಿಕಿರಿಯಾಯ ಸಂವತ್ತನ್ತಿ, ತೇ ಸದ್ಧಾದಯೋ ಸಮ್ಭಾರಾ ವಿಮುತ್ತಿಪರಿಪಾಚನಿಯಾತಿ ಅಧಿಪ್ಪೇತಾ। ಪರಿಪಾಚೇನ್ತೀತಿ ಪರಿಪಾಕಂ ಪರಿಣಾಮಂ ಗಮೇನ್ತಿ। ಧಮ್ಮಾತಿ ಕಾರಣಭೂತಾ ಧಮ್ಮಾ। ವಿಸುದ್ಧಿಕಾರಣವಸೇನಾತಿ ವಿಸುದ್ಧಿಕಾರಣತಾವಸೇನ, ಸಾ ಪನ ಸದ್ಧಿನ್ದ್ರಿಯಾದೀನಂ ಕಾರಣತೋ ವಿಸುದ್ಧಿ। ಯಥಾ ನಾಮ ಜಾತಿಸಮ್ಪನ್ನಸ್ಸ ಖತ್ತಿಯಕುಮಾರಸ್ಸ ವಿಪಕ್ಖವಿಗಮೇನ ಪಕ್ಖಸಙ್ಗಹೇನ ಪವತ್ತಿಟ್ಠಾನಸಮ್ಪತ್ತಿಯಾ ಚ ಪರಿಸುದ್ಧಿ ಹೋತಿ, ಏವಮೇವಂ ದಟ್ಠಬ್ಬಾತಿ ದಸ್ಸೇನ್ತೋ ‘‘ವುತ್ತಂ ಹೇತ’’ನ್ತಿಆದಿಮಾಹ।
121. Ye dhammā sammadeva bhāvitā bahulīkatā vimuttiyā arahattassa sacchikiriyāya saṃvattanti, te saddhādayo sambhārā vimuttiparipācaniyāti adhippetā. Paripācentīti paripākaṃ pariṇāmaṃ gamenti. Dhammāti kāraṇabhūtā dhammā. Visuddhikāraṇavasenāti visuddhikāraṇatāvasena, sā pana saddhindriyādīnaṃ kāraṇato visuddhi. Yathā nāma jātisampannassa khattiyakumārassa vipakkhavigamena pakkhasaṅgahena pavattiṭṭhānasampattiyā ca parisuddhi hoti, evamevaṃ daṭṭhabbāti dassento ‘‘vuttaṃ heta’’ntiādimāha.
ಅಸ್ಸದ್ಧಾದಯೋಪಿ ಪುಗ್ಗಲಾ ಸದ್ಧಾದೀನಂ ಯಾವದೇವ ಪರಿಹಾನಾಯ ಹೋನ್ತಿ, ಸದ್ಧಾದಯೋ ಪಾರಿಪೂರಿಯಾವ, ತಥಾ ಪಸಾದನಿಯಸುತ್ತನ್ತಾದಿಪಚ್ಚವೇಕ್ಖಣಾ, ಪಸಾದನಿಯಸುತ್ತನ್ತಾ ನಾಮ ಸಮ್ಪಸಾದನೀಯಸುತ್ತಾದಯೋ। ಸಮ್ಮಪ್ಪಧಾನೇತಿ ಸಮ್ಮಪ್ಪಧಾನಸುತ್ತನ್ತೇ। ಸತಿಪಟ್ಠಾನೇತಿ ಚತ್ತಾರೋ ಸತಿಪಟ್ಠಾನೇ। ಝಾನವಿಮೋಕ್ಖೇತಿ ಝಾನಾನಿ ಚೇವ ವಿಮೋಕ್ಖೇ ಚ ಉದ್ದಿಸ್ಸ ಪವತ್ತಸುತ್ತನ್ತೇ। ಗಮ್ಭೀರಞಾಣಚರಿಯೇತಿ ಖನ್ಧಾಯತನಧಾತುಪಟಿಚ್ಚಸಮುಪ್ಪಾದಪಟಿಸಂಯುತ್ತಸುತ್ತನ್ತೇ।
Assaddhādayopi puggalā saddhādīnaṃ yāvadeva parihānāya honti, saddhādayo pāripūriyāva, tathā pasādaniyasuttantādipaccavekkhaṇā, pasādaniyasuttantā nāma sampasādanīyasuttādayo. Sammappadhāneti sammappadhānasuttante. Satipaṭṭhāneti cattāro satipaṭṭhāne. Jhānavimokkheti jhānāni ceva vimokkhe ca uddissa pavattasuttante. Gambhīrañāṇacariyeti khandhāyatanadhātupaṭiccasamuppādapaṭisaṃyuttasuttante.
ಕಲ್ಯಾಣಮಿತ್ತತಾದಯೋತಿ ಕಲ್ಯಾಣಮಿತ್ತತಾ ಸೀಲಸಂವರೋ ಅಭಿಸಲ್ಲೇಖಕಥಾ ವೀರಿಯಾರಮ್ಭೋ ನಿಬ್ಬೇಧಿಕಪಞ್ಞಾತಿ ಇಮೇ ಕಲ್ಯಾಣಮಿತ್ತಾದಯೋ ಪಞ್ಚ ಧಮ್ಮಾ, ಯೇ ‘‘ಇಧ, ಮೇಘಿಯ, ಭಿಕ್ಖು ಕಲ್ಯಾಣಮಿತ್ತೋ ಹೋತೀ’’ತಿಆದಿನಾ ಉದಾನೇ (ಉದಾ॰ ೩೧) ಕಥಿತಾ। ಲೋಕಂ ವೋಲೋಕೇನ್ತಸ್ಸಾತಿ ಆಯಸ್ಮತೋ ರಾಹುಲಸ್ಸ ತಾಸಞ್ಚ ದೇವತಾನಂ ಇನ್ದ್ರಿಯಪರಿಪಾಕಂ ಪಸ್ಸನ್ತಸ್ಸ। ತತೋ ಯೇನ ಅನ್ಧವನಂ, ತತ್ಥ ದಿವಾವಿಹಾರಾಯ ಮಹಾಸಮಾಗಮೋ ಭವಿಸ್ಸತೀತಿ। ತಥಾ ಹಿ ವಕ್ಖತಿ ‘‘ಏತ್ತಕಾತಿ ಗಣನಾವಸೇನ ಪರಿಚ್ಛೇದೋ ನತ್ಥೀ’’ತಿ।
Kalyāṇamittatādayoti kalyāṇamittatā sīlasaṃvaro abhisallekhakathā vīriyārambho nibbedhikapaññāti ime kalyāṇamittādayo pañca dhammā, ye ‘‘idha, meghiya, bhikkhu kalyāṇamitto hotī’’tiādinā udāne (udā. 31) kathitā. Lokaṃ volokentassāti āyasmato rāhulassa tāsañca devatānaṃ indriyaparipākaṃ passantassa. Tato yena andhavanaṃ, tattha divāvihārāya mahāsamāgamo bhavissatīti. Tathā hi vakkhati ‘‘ettakāti gaṇanāvasena paricchedo natthī’’ti.
ರುಕ್ಖಪಬ್ಬತನಿಸ್ಸಿತಾ ಭೂಮಟ್ಠಕಾ, ಆಕಾಸಚಾರಿವಿಮಾನವಾಸಿನೋ ಅನ್ತಲಿಕ್ಖಟ್ಠಕಾ। ಧಮ್ಮಚಕ್ಖುನ್ತಿ ವೇದಿತಬ್ಬಾನಿ ಚತುಸಚ್ಚಧಮ್ಮಾನಂ ದಸ್ಸನಟ್ಠೇನ।
Rukkhapabbatanissitā bhūmaṭṭhakā, ākāsacārivimānavāsino antalikkhaṭṭhakā. Dhammacakkhunti veditabbāni catusaccadhammānaṃ dassanaṭṭhena.
ರಾಹುಲೋವಾದಸುತ್ತವಣ್ಣನಾ ನಿಟ್ಠಿತಾ।
Rāhulovādasuttavaṇṇanā niṭṭhitā.
ಲೋಕಕಾಮಗುಣವಗ್ಗವಣ್ಣನಾ ನಿಟ್ಠಿತಾ।
Lokakāmaguṇavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ರಾಹುಲೋವಾದಸುತ್ತಂ • 8. Rāhulovādasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ರಾಹುಲೋವಾದಸುತ್ತವಣ್ಣನಾ • 8. Rāhulovādasuttavaṇṇanā
