| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
8. රාහුලොවාදසුත්‌තවණ්‌ණනා
8. Rāhulovādasuttavaṇṇanā
121. යෙ ධම්‌මා සම්‌මදෙව භාවිතා බහුලීකතා විමුත්‌තියා අරහත්‌තස්‌ස සච්‌ඡිකිරියාය සංවත්‌තන්‌ති, තෙ සද්‌ධාදයො සම්‌භාරා විමුත්‌තිපරිපාචනියාති අධිප්‌පෙතා. පරිපාචෙන්‌තීති පරිපාකං පරිණාමං ගමෙන්‌ති. ධම්‌මාති කාරණභූතා ධම්‌මා. විසුද්‌ධිකාරණවසෙනාති විසුද්‌ධිකාරණතාවසෙන, සා පන සද්‌ධින්‌ද්‍රියාදීනං කාරණතො විසුද්‌ධි. යථා නාම ජාතිසම්‌පන්‌නස්‌ස ඛත්‌තියකුමාරස්‌ස විපක්‌ඛවිගමෙන පක්‌ඛසඞ්‌ගහෙන පවත්‌තිට්‌ඨානසම්‌පත්‌තියා ච පරිසුද්‌ධි හොති, එවමෙවං දට්‌ඨබ්‌බාති දස්‌සෙන්‌තො ‘‘වුත්‌තං හෙත’’න්‌තිආදිමාහ.
121. Ye dhammā sammadeva bhāvitā bahulīkatā vimuttiyā arahattassa sacchikiriyāya saṃvattanti, te saddhādayo sambhārā vimuttiparipācaniyāti adhippetā. Paripācentīti paripākaṃ pariṇāmaṃ gamenti. Dhammāti kāraṇabhūtā dhammā. Visuddhikāraṇavasenāti visuddhikāraṇatāvasena, sā pana saddhindriyādīnaṃ kāraṇato visuddhi. Yathā nāma jātisampannassa khattiyakumārassa vipakkhavigamena pakkhasaṅgahena pavattiṭṭhānasampattiyā ca parisuddhi hoti, evamevaṃ daṭṭhabbāti dassento ‘‘vuttaṃ heta’’ntiādimāha.
අස්‌සද්‌ධාදයොපි පුග්‌ගලා සද්‌ධාදීනං යාවදෙව පරිහානාය හොන්‌ති, සද්‌ධාදයො පාරිපූරියාව, තථා පසාදනියසුත්‌තන්‌තාදිපච්‌චවෙක්‌ඛණා, පසාදනියසුත්‌තන්‌තා නාම සම්‌පසාදනීයසුත්‌තාදයො. සම්‌මප්‌පධානෙති සම්‌මප්‌පධානසුත්‌තන්‌තෙ. සතිපට්‌ඨානෙති චත්‌තාරො සතිපට්‌ඨානෙ. ඣානවිමොක්‌ඛෙති ඣානානි චෙව විමොක්‌ඛෙ ච උද්‌දිස්‌ස පවත්‌තසුත්‌තන්‌තෙ. ගම්‌භීරඤාණචරියෙති ඛන්‌ධායතනධාතුපටිච්‌චසමුප්‌පාදපටිසංයුත්‌තසුත්‌තන්‌තෙ.
Assaddhādayopi puggalā saddhādīnaṃ yāvadeva parihānāya honti, saddhādayo pāripūriyāva, tathā pasādaniyasuttantādipaccavekkhaṇā, pasādaniyasuttantā nāma sampasādanīyasuttādayo. Sammappadhāneti sammappadhānasuttante. Satipaṭṭhāneti cattāro satipaṭṭhāne. Jhānavimokkheti jhānāni ceva vimokkhe ca uddissa pavattasuttante. Gambhīrañāṇacariyeti khandhāyatanadhātupaṭiccasamuppādapaṭisaṃyuttasuttante.
කල්‍යාණමිත්‌තතාදයොති කල්‍යාණමිත්‌තතා සීලසංවරො අභිසල්‌ලෙඛකථා වීරියාරම්‌භො නිබ්‌බෙධිකපඤ්‌ඤාති ඉමෙ කල්‍යාණමිත්‌තාදයො පඤ්‌ච ධම්‌මා, යෙ ‘‘ඉධ, මෙඝිය, භික්‌ඛු කල්‍යාණමිත්‌තො හොතී’’තිආදිනා උදානෙ (උදා. 31) කථිතා. ලොකං වොලොකෙන්‌තස්‌සාති ආයස්‌මතො රාහුලස්‌ස තාසඤ්‌ච දෙවතානං ඉන්‌ද්‍රියපරිපාකං පස්‌සන්‌තස්‌ස. තතො යෙන අන්‌ධවනං, තත්‌ථ දිවාවිහාරාය මහාසමාගමො භවිස්‌සතීති. තථා හි වක්‌ඛති ‘‘එත්‌තකාති ගණනාවසෙන පරිච්‌ඡෙදො නත්‌ථී’’ති.
Kalyāṇamittatādayoti kalyāṇamittatā sīlasaṃvaro abhisallekhakathā vīriyārambho nibbedhikapaññāti ime kalyāṇamittādayo pañca dhammā, ye ‘‘idha, meghiya, bhikkhu kalyāṇamitto hotī’’tiādinā udāne (udā. 31) kathitā. Lokaṃ volokentassāti āyasmato rāhulassa tāsañca devatānaṃ indriyaparipākaṃ passantassa. Tato yena andhavanaṃ, tattha divāvihārāya mahāsamāgamo bhavissatīti. Tathā hi vakkhati ‘‘ettakāti gaṇanāvasena paricchedo natthī’’ti.
රුක්‌ඛපබ්‌බතනිස්‌සිතා භූමට්‌ඨකා, ආකාසචාරිවිමානවාසිනො අන්‌තලික්‌ඛට්‌ඨකා. ධම්‌මචක්‌ඛුන්‌ති වෙදිතබ්‌බානි චතුසච්‌චධම්‌මානං දස්‌සනට්‌ඨෙන.
Rukkhapabbatanissitā bhūmaṭṭhakā, ākāsacārivimānavāsino antalikkhaṭṭhakā. Dhammacakkhunti veditabbāni catusaccadhammānaṃ dassanaṭṭhena.
රාහුලොවාදසුත්‌තවණ්‌ණනා නිට්‌ඨිතා.
Rāhulovādasuttavaṇṇanā niṭṭhitā.
ලොකකාමගුණවග්‌ගවණ්‌ණනා නිට්‌ඨිතා.
Lokakāmaguṇavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. රාහුලොවාදසුත්‌තං • 8. Rāhulovādasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. රාහුලොවාදසුත්‌තවණ්‌ණනා • 8. Rāhulovādasuttavaṇṇanā
