| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༧. རཱཛབྷཊཝཏྠུ
27. Rājabhaṭavatthu
༩༠. ཏེན ཁོ པན སམཡེན རཉྙོ མཱགདྷསྶ སེནིཡསྶ བིམྦིསཱརསྶ པཙྩནྟོ ཀུཔིཏོ ཧོཏི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ སེནཱནཱཡཀེ མཧཱམཏྟེ ཨཱཎཱཔེསི – ‘‘གཙྪཐ, བྷཎེ, པཙྩནྟཾ ཨུཙྩིནཐཱ’’ཏི། ‘‘ཨེཝཾ, དེཝཱ’’ཏི ཁོ སེནཱནཱཡཀཱ མཧཱམཏྟཱ རཉྙོ མཱགདྷསྶ སེནིཡསྶ བིམྦིསཱརསྶ པཙྩསྶོསུཾ། ཨཐ ཁོ ཨབྷིཉྙཱཏཱནཾ ཨབྷིཉྙཱཏཱནཾ ཡོདྷཱནཾ ཨེཏདཧོསི – ‘‘མཡཾ ཁོ ཡུདྡྷཱབྷིནནྡིནོ གཙྪནྟཱ པཱཔཉྩ ཀརོམ, བཧུཉྩ ཨཔུཉྙཾ པསཝཱམ། ཀེན ནུ ཁོ མཡཾ ཨུཔཱཡེན པཱཔཱ ཙ ཝིརམེཡྻཱམ ཀལྱཱཎཉྩ ཀརེཡྻཱམཱ’’ཏི? ཨཐ ཁོ ཏེསཾ ཡོདྷཱནཾ ཨེཏདཧོསི – ‘‘ཨིམེ ཁོ སམཎཱ སཀྱཔུཏྟིཡཱ དྷམྨཙཱརིནོ སམཙཱརིནོ བྲཧྨཙཱརིནོ སཙྩཝཱདིནོ སཱིལཝནྟོ ཀལྱཱཎདྷམྨཱ། སཙེ ཁོ མཡཾ སམཎེསུ སཀྱཔུཏྟིཡེསུ པབྦཛེཡྻཱམ, ཨེཝཾ མཡཾ པཱཔཱ ཙ ཝིརམེཡྻཱམ ཀལྱཱཎཉྩ ཀརེཡྻཱམཱ’’ཏི། ཨཐ ཁོ ཏེ ཡོདྷཱ བྷིཀྑཱུ ཨུཔསངྐམིཏྭཱ པབྦཛྫཾ ཡཱཙིཾསུ། ཏེ བྷིཀྑཱུ པབྦཱཛེསུཾ, ཨུཔསམྤཱདེསུཾ། སེནཱནཱཡཀཱ མཧཱམཏྟཱ རཱཛབྷཊེ པུཙྪིཾསུ – ‘‘ཀིཾ ནུ ཁོ, བྷཎེ, ཨིཏྠནྣཱམོ ཙ ཨིཏྠནྣཱམོ ཙ ཡོདྷཱ ན དིསྶནྟཱི’’ཏི? ‘‘ཨིཏྠནྣཱམོ ཙ ཨིཏྠནྣཱམོ ཙ, སཱམི, ཡོདྷཱ བྷིཀྑཱུསུ པབྦཛིཏཱ’’ཏི། སེནཱནཱཡཀཱ མཧཱམཏྟཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སམཎཱ སཀྱཔུཏྟིཡཱ རཱཛབྷཊཾ པབྦཱཛེསྶནྟཱི’’ཏི། སེནཱནཱཡཀཱ མཧཱམཏྟཱ རཉྙོ མཱགདྷསྶ སེནིཡསྶ བིམྦིསཱརསྶ ཨེཏམཏྠཾ ཨཱརོཙེསུཾ། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཝོཧཱརིཀེ མཧཱམཏྟེ པུཙྪི – ‘‘ཡོ, བྷཎེ, རཱཛབྷཊཾ པབྦཱཛེཏི, ཀིཾ སོ པསཝཏཱི’’ཏི? ‘‘ཨུཔཛ྄ཛྷཱཡསྶ, དེཝ, སཱིསཾ ཚེཏབྦཾ, ཨནུསྶཱཝཀསྶ 1 ཛིཝ྄ཧཱ ཨུདྡྷརིཏབྦཱ, གཎསྶ ཨུཔཌྜྷཕཱསུཀཱ བྷཉྫིཏབྦཱ’’ཏི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ རཱཛཱ མཱགདྷོ སེནིཡོ བིམྦིསཱརོ བྷགཝནྟཾ ཨེཏདཝོཙ – ‘‘སནྟི, བྷནྟེ, རཱཛཱནོ ཨསྶདྡྷཱ ཨཔྤསནྣཱ། ཏེ ཨཔྤམཏྟཀེནཔི བྷིཀྑཱུ ཝིཧེཋེཡྻུཾ། སཱདྷུ, བྷནྟེ, ཨཡྻཱ རཱཛབྷཊཾ ན པབྦཱཛེཡྻུ’’ནྟི། ཨཐ ཁོ བྷགཝཱ རཱཛཱནཾ མཱགདྷཾ སེནིཡཾ བིམྦིསཱརཾ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ བྷགཝཏཱ དྷམྨིཡཱ ཀཐཱཡ སནྡསྶིཏོ སམཱདཔིཏོ སམུཏྟེཛིཏོ སམྤཧཾསིཏོ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ན, བྷིཀྑཝེ, རཱཛབྷཊོ པབྦཱཛེཏབྦོ། ཡོ པབྦཱཛེཡྻ, ཨཱཔཏྟི དུཀྐཊསྶཱ’’ཏི།
90. Tena kho pana samayena rañño māgadhassa seniyassa bimbisārassa paccanto kupito hoti. Atha kho rājā māgadho seniyo bimbisāro senānāyake mahāmatte āṇāpesi – ‘‘gacchatha, bhaṇe, paccantaṃ uccinathā’’ti. ‘‘Evaṃ, devā’’ti kho senānāyakā mahāmattā rañño māgadhassa seniyassa bimbisārassa paccassosuṃ. Atha kho abhiññātānaṃ abhiññātānaṃ yodhānaṃ etadahosi – ‘‘mayaṃ kho yuddhābhinandino gacchantā pāpañca karoma, bahuñca apuññaṃ pasavāma. Kena nu kho mayaṃ upāyena pāpā ca virameyyāma kalyāṇañca kareyyāmā’’ti? Atha kho tesaṃ yodhānaṃ etadahosi – ‘‘ime kho samaṇā sakyaputtiyā dhammacārino samacārino brahmacārino saccavādino sīlavanto kalyāṇadhammā. Sace kho mayaṃ samaṇesu sakyaputtiyesu pabbajeyyāma, evaṃ mayaṃ pāpā ca virameyyāma kalyāṇañca kareyyāmā’’ti. Atha kho te yodhā bhikkhū upasaṅkamitvā pabbajjaṃ yāciṃsu. Te bhikkhū pabbājesuṃ, upasampādesuṃ. Senānāyakā mahāmattā rājabhaṭe pucchiṃsu – ‘‘kiṃ nu kho, bhaṇe, itthannāmo ca itthannāmo ca yodhā na dissantī’’ti? ‘‘Itthannāmo ca itthannāmo ca, sāmi, yodhā bhikkhūsu pabbajitā’’ti. Senānāyakā mahāmattā ujjhāyanti khiyyanti vipācenti – ‘‘kathañhi nāma samaṇā sakyaputtiyā rājabhaṭaṃ pabbājessantī’’ti. Senānāyakā mahāmattā rañño māgadhassa seniyassa bimbisārassa etamatthaṃ ārocesuṃ. Atha kho rājā māgadho seniyo bimbisāro vohārike mahāmatte pucchi – ‘‘yo, bhaṇe, rājabhaṭaṃ pabbājeti, kiṃ so pasavatī’’ti? ‘‘Upajjhāyassa, deva, sīsaṃ chetabbaṃ, anussāvakassa 2 jivhā uddharitabbā, gaṇassa upaḍḍhaphāsukā bhañjitabbā’’ti. Atha kho rājā māgadho seniyo bimbisāro yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro bhagavantaṃ etadavoca – ‘‘santi, bhante, rājāno assaddhā appasannā. Te appamattakenapi bhikkhū viheṭheyyuṃ. Sādhu, bhante, ayyā rājabhaṭaṃ na pabbājeyyu’’nti. Atha kho bhagavā rājānaṃ māgadhaṃ seniyaṃ bimbisāraṃ dhammiyā kathāya sandassesi samādapesi samuttejesi sampahaṃsesi. Atha kho rājā māgadho seniyo bimbisāro bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘na, bhikkhave, rājabhaṭo pabbājetabbo. Yo pabbājeyya, āpatti dukkaṭassā’’ti.
རཱཛབྷཊཝཏྠུ ནིཊྛིཏཾ།
Rājabhaṭavatthu niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / རཱཛབྷཊཝཏྠུཀཐཱ • Rājabhaṭavatthukathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / རཱཛབྷཊཱདིཝཏྠུཀཐཱཝཎྞནཱ • Rājabhaṭādivatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / རཱཛབྷཊཝཏྠུཀཐཱཝཎྞནཱ • Rājabhaṭavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༢༧. རཱཛབྷཊཝཏྠུཀཐཱ • 27. Rājabhaṭavatthukathā
