| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
27. ராஜப⁴டவத்து²கதா²
27. Rājabhaṭavatthukathā
90. உச்சினதா²தி எத்த² சிதா⁴துயா வட்³ட⁴னத்த²ங் த³ஸ்ஸெந்தோ ஆஹ ‘‘வட்³டே⁴தா²’’தி. ஸோதாபன்னத்தாதி பி³ம்பி³ஸாரரஞ்ஞோ =08 ஸோதாபன்னபா⁴வதோ. கா⁴தேதா²தி ஜீவிதா வோரோபேத². ஹனதா²தி பஹரத². ததோதி உபஜ்ஜா²யதோ. ஆசரியோ ஸெட்டோ²தி ஸம்ப³ந்தோ⁴. ததோதி ஆசரியதோ. இத³ந்தி வசனங், ஆக³தந்தி ஸம்ப³ந்தோ⁴. ஆஹங்ஸு வோஹாரிகா மஹாமத்தா முஸாவாதே³னாதி யோஜனா. அமச்சோதி ஸப்³ப³ராஜகிச்சேஸு அமா ஸஹ ரஞ்ஞா ப⁴வதீதி அமச்சோ. அமாஸத்³தோ³ ஸஹத்தே² நிபாதோ. ‘‘அமா’’தி நிபாததோ ப⁴வத்தே² அச்சபச்சயோ (மொக்³க³ல்லானே 4.23 ஸுத்தே). மஹாமத்தோதி மஹந்தோ மத்தா இஸ்ஸரியா ஏதஸ்ஸாதி மஹாமத்தோ. மத்தாஸத்³தோ³ ஹெத்த² இஸ்ஸரியவாசகோ. ஸேவகோதி ராஜானங் ஸேவதி ப⁴ஜதீதி ஸேவகோ. ப⁴த்தவேதனப⁴டோதி ப⁴த்தவேதனானமத்தா²ய ப⁴டோ. தஸ்ஸாதி ராஜப⁴டஸ்ஸ. புத்தனத்தபா⁴துகாத³யோதிஆதி³ஸத்³தே³ன பா⁴கி³னெய்யாத³யோ ஸங்க³ண்ஹாதி. யோ பனாதி ராஜப⁴டோ பன. நிய்யாதேதீதி அப்பேதி. தங் டா²னந்தி தங் ராஜப⁴டட்டா²னங். யேன வாதி கம்மகாரேன வா. யங்கம்மகாரணாதி யஸ்ஸ கம்மஸ்ஸ காரணா. யோ வாதி ராஜப⁴டோ வா. பப்³ப³ஜஸ்ஸூதி பப்³பா³ஜேஹி.
90.Uccinathāti ettha cidhātuyā vaḍḍhanatthaṃ dassento āha ‘‘vaḍḍhethā’’ti. Sotāpannattāti bimbisārarañño =08 sotāpannabhāvato. Ghātethāti jīvitā voropetha. Hanathāti paharatha. Tatoti upajjhāyato. Ācariyo seṭṭhoti sambandho. Tatoti ācariyato. Idanti vacanaṃ, āgatanti sambandho. Āhaṃsu vohārikā mahāmattā musāvādenāti yojanā. Amaccoti sabbarājakiccesu amā saha raññā bhavatīti amacco. Amāsaddo sahatthe nipāto. ‘‘Amā’’ti nipātato bhavatthe accapaccayo (moggallāne 4.23 sutte). Mahāmattoti mahanto mattā issariyā etassāti mahāmatto. Mattāsaddo hettha issariyavācako. Sevakoti rājānaṃ sevati bhajatīti sevako. Bhattavetanabhaṭoti bhattavetanānamatthāya bhaṭo. Tassāti rājabhaṭassa. Puttanattabhātukādayotiādisaddena bhāgineyyādayo saṅgaṇhāti. Yo panāti rājabhaṭo pana. Niyyātetīti appeti. Taṃ ṭhānanti taṃ rājabhaṭaṭṭhānaṃ. Yena vāti kammakārena vā. Yaṃkammakāraṇāti yassa kammassa kāraṇā. Yo vāti rājabhaṭo vā. Pabbajassūti pabbājehi.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 27. ராஜப⁴டவத்து² • 27. Rājabhaṭavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ராஜப⁴டவத்து²கதா² • Rājabhaṭavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ராஜப⁴டாதி³வத்து²கதா²வண்ணனா • Rājabhaṭādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ராஜப⁴டவத்து²கதா²வண்ணனா • Rājabhaṭavatthukathāvaṇṇanā
