| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
রাজভটৰত্থুকথা
Rājabhaṭavatthukathā
৯০. রাজভটৰত্থুস্মিং – পচ্চন্তং উচ্চিনথাতি পচ্চন্তং ৰড্ঢেথ। চোরে পলাপেত্ৰা চোরভযেন ৰুট্ঠিতে গামে আৰাসাপেত্ৰা আরক্খং দত্ৰা কসিকম্মাদীনি পৰত্তাপেথাতি ৰুত্তং হোতি। রাজা পন সোতাপন্নত্তা ‘‘চোরে ঘাতেথ, হনথা’’তি ন আণাপেতি। উপজ্ঝাযস্স দেৰ সীসং ছিন্দিতব্বন্তিআদি সব্বং ‘‘পব্বজ্জায উপজ্ঝাযো সেট্ঠো, ততো আচরিযো, ততো গণো’’তি চিন্তেত্ৰা ইদং ৰোহারে অড্ডৰিনিচ্ছযে আগতন্তি আহংসু। ন ভিক্খৰে রাজভটো পব্বাজেতব্বোতি এত্থ অমচ্চো ৰা হোতু মহামত্তো ৰা সেৰকো ৰা কিঞ্চি ঠানন্তরং পত্তো ৰা অপ্পত্তো ৰা, যো কোচি রঞ্ঞো ভত্তৰেতনভটো, সব্বো রাজভটোতি সঙ্খ্যং গচ্ছতি, সো ন পব্বাজেতব্বো। তস্স পন পুত্তনত্তভাতুকা যে রাজতো ভত্তৰেতনং ন গণ্হন্তি, তে পব্বাজেতুং ৰট্টতি। যো পন রাজতো লদ্ধং নিবদ্ধভোগং ৰা মাসসংৰচ্ছরপরিব্বযং ৰা রঞ্ঞোযেৰ নিয্যাতেতি, পুত্তভাতুকে ৰা তং ঠানং সম্পটিচ্ছাপেত্ৰা রাজানং ‘‘ন দানাহং দেৰস্স ভটো’’তি আপুচ্ছতি, যেন ৰা যং কম্মকারণা ৰেতনং গহিতং, তং কম্মং কতং হোতি, যো ৰা পব্বজস্সূতি রঞ্ঞা অনুঞ্ঞাতো হোতি, তম্পি পব্বাজেতুং ৰট্টতি।
90. Rājabhaṭavatthusmiṃ – paccantaṃ uccinathāti paccantaṃ vaḍḍhetha. Core palāpetvā corabhayena vuṭṭhite gāme āvāsāpetvā ārakkhaṃ datvā kasikammādīni pavattāpethāti vuttaṃ hoti. Rājā pana sotāpannattā ‘‘core ghātetha, hanathā’’ti na āṇāpeti. Upajjhāyassa deva sīsaṃchinditabbantiādi sabbaṃ ‘‘pabbajjāya upajjhāyo seṭṭho, tato ācariyo, tato gaṇo’’ti cintetvā idaṃ vohāre aḍḍavinicchaye āgatanti āhaṃsu. Na bhikkhave rājabhaṭo pabbājetabboti ettha amacco vā hotu mahāmatto vā sevako vā kiñci ṭhānantaraṃ patto vā appatto vā, yo koci rañño bhattavetanabhaṭo, sabbo rājabhaṭoti saṅkhyaṃ gacchati, so na pabbājetabbo. Tassa pana puttanattabhātukā ye rājato bhattavetanaṃ na gaṇhanti, te pabbājetuṃ vaṭṭati. Yo pana rājato laddhaṃ nibaddhabhogaṃ vā māsasaṃvaccharaparibbayaṃ vā raññoyeva niyyāteti, puttabhātuke vā taṃ ṭhānaṃ sampaṭicchāpetvā rājānaṃ ‘‘na dānāhaṃ devassa bhaṭo’’ti āpucchati, yena vā yaṃ kammakāraṇā vetanaṃ gahitaṃ, taṃ kammaṃ kataṃ hoti, yo vā pabbajassūti raññā anuññāto hoti, tampi pabbājetuṃ vaṭṭati.
রাজভটৰত্থুকথা নিট্ঠিতা।
Rājabhaṭavatthukathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২৭. রাজভটৰত্থু • 27. Rājabhaṭavatthu
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / রাজভটাদিৰত্থুকথাৰণ্ণনা • Rājabhaṭādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / রাজভটৰত্থুকথাৰণ্ণনা • Rājabhaṭavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২৭. রাজভটৰত্থুকথা • 27. Rājabhaṭavatthukathā
