| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ರಾಜಭಟವತ್ಥುಕಥಾ
Rājabhaṭavatthukathā
೯೦. ರಾಜಭಟವತ್ಥುಸ್ಮಿಂ – ಪಚ್ಚನ್ತಂ ಉಚ್ಚಿನಥಾತಿ ಪಚ್ಚನ್ತಂ ವಡ್ಢೇಥ। ಚೋರೇ ಪಲಾಪೇತ್ವಾ ಚೋರಭಯೇನ ವುಟ್ಠಿತೇ ಗಾಮೇ ಆವಾಸಾಪೇತ್ವಾ ಆರಕ್ಖಂ ದತ್ವಾ ಕಸಿಕಮ್ಮಾದೀನಿ ಪವತ್ತಾಪೇಥಾತಿ ವುತ್ತಂ ಹೋತಿ। ರಾಜಾ ಪನ ಸೋತಾಪನ್ನತ್ತಾ ‘‘ಚೋರೇ ಘಾತೇಥ, ಹನಥಾ’’ತಿ ನ ಆಣಾಪೇತಿ। ಉಪಜ್ಝಾಯಸ್ಸ ದೇವ ಸೀಸಂ ಛಿನ್ದಿತಬ್ಬನ್ತಿಆದಿ ಸಬ್ಬಂ ‘‘ಪಬ್ಬಜ್ಜಾಯ ಉಪಜ್ಝಾಯೋ ಸೇಟ್ಠೋ, ತತೋ ಆಚರಿಯೋ, ತತೋ ಗಣೋ’’ತಿ ಚಿನ್ತೇತ್ವಾ ಇದಂ ವೋಹಾರೇ ಅಡ್ಡವಿನಿಚ್ಛಯೇ ಆಗತನ್ತಿ ಆಹಂಸು। ನ ಭಿಕ್ಖವೇ ರಾಜಭಟೋ ಪಬ್ಬಾಜೇತಬ್ಬೋತಿ ಏತ್ಥ ಅಮಚ್ಚೋ ವಾ ಹೋತು ಮಹಾಮತ್ತೋ ವಾ ಸೇವಕೋ ವಾ ಕಿಞ್ಚಿ ಠಾನನ್ತರಂ ಪತ್ತೋ ವಾ ಅಪ್ಪತ್ತೋ ವಾ, ಯೋ ಕೋಚಿ ರಞ್ಞೋ ಭತ್ತವೇತನಭಟೋ, ಸಬ್ಬೋ ರಾಜಭಟೋತಿ ಸಙ್ಖ್ಯಂ ಗಚ್ಛತಿ, ಸೋ ನ ಪಬ್ಬಾಜೇತಬ್ಬೋ। ತಸ್ಸ ಪನ ಪುತ್ತನತ್ತಭಾತುಕಾ ಯೇ ರಾಜತೋ ಭತ್ತವೇತನಂ ನ ಗಣ್ಹನ್ತಿ, ತೇ ಪಬ್ಬಾಜೇತುಂ ವಟ್ಟತಿ। ಯೋ ಪನ ರಾಜತೋ ಲದ್ಧಂ ನಿಬದ್ಧಭೋಗಂ ವಾ ಮಾಸಸಂವಚ್ಛರಪರಿಬ್ಬಯಂ ವಾ ರಞ್ಞೋಯೇವ ನಿಯ್ಯಾತೇತಿ, ಪುತ್ತಭಾತುಕೇ ವಾ ತಂ ಠಾನಂ ಸಮ್ಪಟಿಚ್ಛಾಪೇತ್ವಾ ರಾಜಾನಂ ‘‘ನ ದಾನಾಹಂ ದೇವಸ್ಸ ಭಟೋ’’ತಿ ಆಪುಚ್ಛತಿ, ಯೇನ ವಾ ಯಂ ಕಮ್ಮಕಾರಣಾ ವೇತನಂ ಗಹಿತಂ, ತಂ ಕಮ್ಮಂ ಕತಂ ಹೋತಿ, ಯೋ ವಾ ಪಬ್ಬಜಸ್ಸೂತಿ ರಞ್ಞಾ ಅನುಞ್ಞಾತೋ ಹೋತಿ, ತಮ್ಪಿ ಪಬ್ಬಾಜೇತುಂ ವಟ್ಟತಿ।
90. Rājabhaṭavatthusmiṃ – paccantaṃ uccinathāti paccantaṃ vaḍḍhetha. Core palāpetvā corabhayena vuṭṭhite gāme āvāsāpetvā ārakkhaṃ datvā kasikammādīni pavattāpethāti vuttaṃ hoti. Rājā pana sotāpannattā ‘‘core ghātetha, hanathā’’ti na āṇāpeti. Upajjhāyassa deva sīsaṃchinditabbantiādi sabbaṃ ‘‘pabbajjāya upajjhāyo seṭṭho, tato ācariyo, tato gaṇo’’ti cintetvā idaṃ vohāre aḍḍavinicchaye āgatanti āhaṃsu. Na bhikkhave rājabhaṭo pabbājetabboti ettha amacco vā hotu mahāmatto vā sevako vā kiñci ṭhānantaraṃ patto vā appatto vā, yo koci rañño bhattavetanabhaṭo, sabbo rājabhaṭoti saṅkhyaṃ gacchati, so na pabbājetabbo. Tassa pana puttanattabhātukā ye rājato bhattavetanaṃ na gaṇhanti, te pabbājetuṃ vaṭṭati. Yo pana rājato laddhaṃ nibaddhabhogaṃ vā māsasaṃvaccharaparibbayaṃ vā raññoyeva niyyāteti, puttabhātuke vā taṃ ṭhānaṃ sampaṭicchāpetvā rājānaṃ ‘‘na dānāhaṃ devassa bhaṭo’’ti āpucchati, yena vā yaṃ kammakāraṇā vetanaṃ gahitaṃ, taṃ kammaṃ kataṃ hoti, yo vā pabbajassūti raññā anuññāto hoti, tampi pabbājetuṃ vaṭṭati.
ರಾಜಭಟವತ್ಥುಕಥಾ ನಿಟ್ಠಿತಾ।
Rājabhaṭavatthukathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೨೭. ರಾಜಭಟವತ್ಥು • 27. Rājabhaṭavatthu
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ರಾಜಭಟಾದಿವತ್ಥುಕಥಾವಣ್ಣನಾ • Rājabhaṭādivatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ರಾಜಭಟವತ್ಥುಕಥಾವಣ್ಣನಾ • Rājabhaṭavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨೭. ರಾಜಭಟವತ್ಥುಕಥಾ • 27. Rājabhaṭavatthukathā
