| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৫. পঞ্চকনিপাতো
5. Pañcakanipāto
১. রাজদত্তত্থেরগাথাৰণ্ণনা
1. Rājadattattheragāthāvaṇṇanā
পঞ্চকনিপাতে ভিক্খু সিৰথিকং গন্ত্ৰাতিআদিকা আযস্মতো রাজদত্তত্থেরস্স গাথা। কা উপ্পত্তি? অযম্পি পুরিমবুদ্ধেসু কতাধিকারো, তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো, ইতো চতুদ্দসে কপ্পে বুদ্ধসুঞ্ঞে লোকে কুলগেহে নিব্বত্তিত্ৰা ৰিঞ্ঞুতং পত্তো, একদিৰসং কেনচিদেৰ করণীযেন ৰনন্তং উপগতো তত্থ অঞ্ঞতরং পচ্চেকবুদ্ধং রুক্খমূলে নিসিন্নং দিস্ৰা পসন্নমানসো সুপরিসুদ্ধং অম্বাটকফলং অদাসি। সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং সত্থৰাহকুলে নিব্বত্তি। তস্স মহারাজং ৰেস্সৰণং আরাধেত্ৰা পটিলদ্ধভাৰতো মাতাপিতরো রাজদত্তোতি নামং অকংসু। সো ৰযপ্পত্তো পঞ্চহি সকটসতেহি ভণ্ডং আদায ৰাণিজ্জৰসেন রাজগহং অগমাসি। তেন চ সমযেন রাজগহে অঞ্ঞতরা গণিকা অভিরূপা দস্সনীযা পরমসোভগ্গযোগতো দিৰসে দিৰসে সহস্সং লভতি। অথ সো সত্থৰাহপুত্তো দিৰসে দিৰসে তস্সা গণিকায সহস্সং দত্ৰা সংৰাসং কপ্পেন্তো নচিরস্সেৰ সব্বং ধনং খেপেত্ৰা দুগ্গতো হুত্ৰা ঘাসচ্ছাদনমত্তম্পি অলভন্তো ইতো চিতো চ পরিব্ভমন্তো সংৰেগপ্পত্তো অহোসি। সো একদিৰসং উপাসকেহি সদ্ধিং ৰেল়ুৰনং অগমাসি।
Pañcakanipāte bhikkhu sivathikaṃ gantvātiādikā āyasmato rājadattattherassa gāthā. Kā uppatti? Ayampi purimabuddhesu katādhikāro, tattha tattha bhave vivaṭṭūpanissayaṃ puññaṃ upacinanto, ito catuddase kappe buddhasuññe loke kulagehe nibbattitvā viññutaṃ patto, ekadivasaṃ kenacideva karaṇīyena vanantaṃ upagato tattha aññataraṃ paccekabuddhaṃ rukkhamūle nisinnaṃ disvā pasannamānaso suparisuddhaṃ ambāṭakaphalaṃ adāsi. So tena puññakammena devamanussesu saṃsaranto imasmiṃ buddhuppāde sāvatthiyaṃ satthavāhakule nibbatti. Tassa mahārājaṃ vessavaṇaṃ ārādhetvā paṭiladdhabhāvato mātāpitaro rājadattoti nāmaṃ akaṃsu. So vayappatto pañcahi sakaṭasatehi bhaṇḍaṃ ādāya vāṇijjavasena rājagahaṃ agamāsi. Tena ca samayena rājagahe aññatarā gaṇikā abhirūpā dassanīyā paramasobhaggayogato divase divase sahassaṃ labhati. Atha so satthavāhaputto divase divase tassā gaṇikāya sahassaṃ datvā saṃvāsaṃ kappento nacirasseva sabbaṃ dhanaṃ khepetvā duggato hutvā ghāsacchādanamattampi alabhanto ito cito ca paribbhamanto saṃvegappatto ahosi. So ekadivasaṃ upāsakehi saddhiṃ veḷuvanaṃ agamāsi.
তেন চ সমযেন সত্থা মহতিযা পরিসায পরিৰুতো ধম্মং দেসেন্তো নিসিন্নো হোতি। সো পরিসপরিযন্তে নিসীদিত্ৰা সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ধুতঙ্গানি সমাদিযিত্ৰা সুসানে ৰসতি। তদা অঞ্ঞতরোপি সত্থৰাহপুত্তো সহস্সং দত্ৰা তায গণিকায সহ ৰসতি। সা চ গণিকা তস্স হত্থে মহগ্ঘরতনং দিস্ৰা লোভং উপ্পাদেত্ৰা অঞ্ঞেহি ধুত্তপুরিসেহি তং মারাপেত্ৰা তং রতনং গণ্হি। অথ তস্স সত্থৰাহপুত্তস্স মনুস্সা তং পৰত্তিং সুত্ৰা ওচরকমনুস্সে পেসেসুং। তে রত্তিযং তস্সা গণিকায ঘরং পৰিসিত্ৰা ছৰিআদীনি অনুপহচ্চেৰ তং মারেত্ৰা সিৰথিকায ছড্ডেসুং। রাজদত্তত্থেরো অসুভনিমিত্তং গহেতুং সুসানে ৰিচরন্তো তস্সা গণিকায কল়েৰরং পটিক্কুলতো মনসি কাতুং উপগতো কতিপযৰারে যোনিসো মনসি কত্ৰা অচিরমতভাৰতো সোণসিঙ্গালাদীহি অনুপহতছৰিতায ৰিসভাগৰত্থুতায চ অযোনিসো মনসিকরোন্তো, তত্থ কামরাগং উপ্পাদেত্ৰা সংৰিগ্গতরমানসো অত্তনো চিত্তং পরিভাসিত্ৰা মুহুত্তং একমন্তং অপসক্কিত্ৰা আদিতো উপট্ঠিতং অসুভনিমিত্তমেৰ গহেত্ৰা যোনিসো মনসিকরোন্তো ঝানং উপ্পাদেত্ৰা তং ঝানং পাদকং কত্ৰা ৰিপস্সনং পট্ঠপেত্ৰা তাৰদেৰ অরহত্তং পাপুণি। তেন ৰুত্তং অপদানে (অপ॰ থের ২.৪৪.৫৫-৫৯) –
Tena ca samayena satthā mahatiyā parisāya parivuto dhammaṃ desento nisinno hoti. So parisapariyante nisīditvā satthu santike dhammaṃ sutvā paṭiladdhasaddho pabbajitvā dhutaṅgāni samādiyitvā susāne vasati. Tadā aññataropi satthavāhaputto sahassaṃ datvā tāya gaṇikāya saha vasati. Sā ca gaṇikā tassa hatthe mahaggharatanaṃ disvā lobhaṃ uppādetvā aññehi dhuttapurisehi taṃ mārāpetvā taṃ ratanaṃ gaṇhi. Atha tassa satthavāhaputtassa manussā taṃ pavattiṃ sutvā ocarakamanusse pesesuṃ. Te rattiyaṃ tassā gaṇikāya gharaṃ pavisitvā chaviādīni anupahacceva taṃ māretvā sivathikāya chaḍḍesuṃ. Rājadattatthero asubhanimittaṃ gahetuṃ susāne vicaranto tassā gaṇikāya kaḷevaraṃ paṭikkulato manasi kātuṃ upagato katipayavāre yoniso manasi katvā aciramatabhāvato soṇasiṅgālādīhi anupahatachavitāya visabhāgavatthutāya ca ayoniso manasikaronto, tattha kāmarāgaṃ uppādetvā saṃviggataramānaso attano cittaṃ paribhāsitvā muhuttaṃ ekamantaṃ apasakkitvā ādito upaṭṭhitaṃ asubhanimittameva gahetvā yoniso manasikaronto jhānaṃ uppādetvā taṃ jhānaṃ pādakaṃ katvā vipassanaṃ paṭṭhapetvā tāvadeva arahattaṃ pāpuṇi. Tena vuttaṃ apadāne (apa. thera 2.44.55-59) –
‘‘ৰিপিনে বুদ্ধং দিস্ৰান, সযম্ভুং অপরাজিতং।
‘‘Vipine buddhaṃ disvāna, sayambhuṃ aparājitaṃ;
অম্বাটকং গহেত্ৰান, সযম্ভুস্স অদাসহং॥
Ambāṭakaṃ gahetvāna, sayambhussa adāsahaṃ.
‘‘একতিংসে ইতো কপ্পে, যং ফলমদদিং তদা।
‘‘Ekatiṃse ito kappe, yaṃ phalamadadiṃ tadā;
দুগ্গতিং নাভিজানামি, ফলদানস্সিদং ফলং॥
Duggatiṃ nābhijānāmi, phaladānassidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা অত্তনো পটিপত্তিং পচ্চৰেক্খিত্ৰা পীতিসোমনস্সজাতো –
Arahattaṃ pana patvā attano paṭipattiṃ paccavekkhitvā pītisomanassajāto –
৩১৫.
315.
‘‘ভিক্খু সিৰথিকং গন্ত্ৰা, অদ্দস ইত্থিমুজ্ঝিতং।
‘‘Bhikkhu sivathikaṃ gantvā, addasa itthimujjhitaṃ;
অপৰিদ্ধং সুসানস্মিং, খজ্জন্তিং কিমিহী ফুটং॥
Apaviddhaṃ susānasmiṃ, khajjantiṃ kimihī phuṭaṃ.
৩১৬.
316.
‘‘যঞ্হি একে জিগুচ্ছন্তি, মতং দিস্ৰান পাপকং।
‘‘Yañhi eke jigucchanti, mataṃ disvāna pāpakaṃ;
কামরাগো পাতুরহু, অন্ধোৰ সৰতী অহুং॥
Kāmarāgo pāturahu, andhova savatī ahuṃ.
৩১৭.
317.
‘‘ওরং ওদনপাকম্হা, তম্হা ঠানা অপক্কমিং।
‘‘Oraṃ odanapākamhā, tamhā ṭhānā apakkamiṃ;
সতিমা সম্পজানোহং, একমন্তং উপাৰিসিং॥
Satimā sampajānohaṃ, ekamantaṃ upāvisiṃ.
৩১৮.
318.
‘‘ততো মে মনসীকারো, যোনিসো উদপজ্জথ।
‘‘Tato me manasīkāro, yoniso udapajjatha;
আদীনৰো পাতুরহু, নিব্বিদা সমতিট্ঠথ॥
Ādīnavo pāturahu, nibbidā samatiṭṭhatha.
৩১৯.
319.
‘‘ততো চিত্তং ৰিমুচ্চি মে, পস্স ধম্মসুধম্মতং।
‘‘Tato cittaṃ vimucci me, passa dhammasudhammataṃ;
তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি॥ –
Tisso vijjā anuppattā, kataṃ buddhassa sāsana’’nti. –
ইমা পঞ্চ গাথা অভাসি।
Imā pañca gāthā abhāsi.
তত্থ ভিক্খু সিৰথিকং গন্ত্ৰাতি সংসারে ভযস্স ইক্খনতো ভিক্খু, অসুভকম্মট্ঠানত্থং আমকসুসানং উপগন্ত্ৰা। ‘‘ভিক্খূ’’তি চেতং অত্তানং সন্ধায থেরো সযং ৰদতি। ইত্থিন্তি থীযতি এত্থ সুক্কসোণিতং সত্তসন্তানভাৰেন সংহঞ্ঞতীতি থী, মাতুগামো। এৰঞ্চ সভাৰনিরুত্তিৰসেন ‘‘ইত্থী’’তিপি ৰুচ্চতি। ৰঞ্ঝাদীসু পন তংসদিসতায তংসভাৰানতিৰত্তনতো চ তব্বোহারো। ‘‘ইত্থী’’তি ইত্থিকল়েৰরং ৰদতি। উজ্ঝিতন্তি পরিচ্চত্তং উজ্ঝনিযত্তা এৰ অপৰিদ্ধং অনপেক্খভাৰেন খিত্তং। খজ্জন্তিং কিমিহী ফুটন্তি কিমীহি পূরিতং হুত্ৰা খজ্জমানং।
Tattha bhikkhu sivathikaṃ gantvāti saṃsāre bhayassa ikkhanato bhikkhu, asubhakammaṭṭhānatthaṃ āmakasusānaṃ upagantvā. ‘‘Bhikkhū’’ti cetaṃ attānaṃ sandhāya thero sayaṃ vadati. Itthinti thīyati ettha sukkasoṇitaṃ sattasantānabhāvena saṃhaññatīti thī, mātugāmo. Evañca sabhāvaniruttivasena ‘‘itthī’’tipi vuccati. Vañjhādīsu pana taṃsadisatāya taṃsabhāvānativattanato ca tabbohāro. ‘‘Itthī’’ti itthikaḷevaraṃ vadati. Ujjhitanti pariccattaṃ ujjhaniyattā eva apaviddhaṃ anapekkhabhāvena khittaṃ. Khajjantiṃ kimihī phuṭanti kimīhi pūritaṃ hutvā khajjamānaṃ.
যঞ্হি একে জিগুচ্ছন্তি, মতং দিস্ৰান পাপকন্তি যং অপগতাযুউস্মাৰিঞ্ঞাণতায মতং কল়েৰরং পাপকং নিহীনং লামকং একে চোক্খজাতিকা জিগুচ্ছন্তি, ওলোকেতুম্পি ন ইচ্ছন্তি। কামরাগো পাতুরহূতি তস্মিং কুণপে অযোনিসোমনসিকারস্স বলৰতায কামরাগো ময্হং পাতুরহোসি উপ্পজ্জি। অন্ধোৰ সৰতী অহুন্তি তস্মিং কল়েৰরে নৰহি দ্ৰারেহি অসুচিং সৰতি সন্দন্তে অসুচিভাৰস্স অদস্সনেন অন্ধো ৰিয অহোসিং। তেনাহ –
Yañhi eke jigucchanti, mataṃ disvāna pāpakanti yaṃ apagatāyuusmāviññāṇatāya mataṃ kaḷevaraṃ pāpakaṃ nihīnaṃ lāmakaṃ eke cokkhajātikā jigucchanti, oloketumpi na icchanti. Kāmarāgo pāturahūti tasmiṃ kuṇape ayonisomanasikārassa balavatāya kāmarāgo mayhaṃ pāturahosi uppajji. Andhova savatī ahunti tasmiṃ kaḷevare navahi dvārehi asuciṃ savati sandante asucibhāvassa adassanena andho viya ahosiṃ. Tenāha –
‘‘রত্তো অত্থং ন জানাতি, রত্তো ধম্মং ন পস্সতি।
‘‘Ratto atthaṃ na jānāti, ratto dhammaṃ na passati;
অন্ধতমং তদা হোতি, যং রাগো সহতে নর’’ন্তি চ॥
Andhatamaṃ tadā hoti, yaṃ rāgo sahate nara’’nti ca.
‘‘কামচ্ছন্দো খো, ব্রাহ্মণ, অন্ধকরণো অচক্খুকরণো’’তি চ আদি। কেচি পনেত্থ তকারাগমং কত্ৰা ‘‘কিলেসপরিযুট্ঠানেন অৰসৰত্তি কিলেসস্স ৰা ৰসৰত্তী’’তি অত্থং ৰদন্তি। অপরে ‘‘অন্ধোৰ অসতি অহু’’ন্তি পাল়িং ৰত্ৰা ‘‘কামরাগেন অন্ধো এৰ হুত্ৰা সতিরহিতো অহোসি’’ন্তি অত্থং ৰদন্তি। তদুভযং পন পাল়িযং নত্থি।
‘‘Kāmacchando kho, brāhmaṇa, andhakaraṇo acakkhukaraṇo’’ti ca ādi. Keci panettha takārāgamaṃ katvā ‘‘kilesapariyuṭṭhānena avasavatti kilesassa vā vasavattī’’ti atthaṃ vadanti. Apare ‘‘andhova asati ahu’’nti pāḷiṃ vatvā ‘‘kāmarāgena andho eva hutvā satirahito ahosi’’nti atthaṃ vadanti. Tadubhayaṃ pana pāḷiyaṃ natthi.
ওরং ওদনপাকম্হাতি ওদনপাকতো ওরং, যাৰতা কালেন সুপরিধোততিন্ততণ্ডুলনাল়িযা ওদনং পচতি, ততো ওরমেৰ কালং, ততোপি লহুকালেন রাগং ৰিনোদেন্তো, তম্হা ঠানা অপক্কমিং যস্মিং ঠানে ঠিতস্স মে রাগো উপ্পজ্জি, তম্হা ঠানা অপক্কমিং অপসক্কিং। অপক্কন্তোৰ সতিমা সম্পজানোহং সমণসঞ্ঞং উপট্ঠপেত্ৰা সতিপট্ঠানমনসিকারৰসেন সতিমা, সম্মদেৰ ধম্মসভাৰজাননেন সম্পজানো চ হুত্ৰা একমন্তং উপাৰিসিং, পল্লঙ্কং আভুজিত্ৰা নিসীদিং। নিসিন্নস্স চ ততো মে মনসীকারো, যোনিসো উদপজ্জথাতিআদি সব্বং হেট্ঠা ৰুত্তনযমেৰাতি।
Oraṃ odanapākamhāti odanapākato oraṃ, yāvatā kālena suparidhotatintataṇḍulanāḷiyā odanaṃ pacati, tato orameva kālaṃ, tatopi lahukālena rāgaṃ vinodento, tamhā ṭhānā apakkamiṃ yasmiṃ ṭhāne ṭhitassa me rāgo uppajji, tamhā ṭhānā apakkamiṃ apasakkiṃ. Apakkantova satimā sampajānohaṃ samaṇasaññaṃ upaṭṭhapetvā satipaṭṭhānamanasikāravasena satimā, sammadeva dhammasabhāvajānanena sampajāno ca hutvā ekamantaṃ upāvisiṃ, pallaṅkaṃ ābhujitvā nisīdiṃ. Nisinnassa ca tato me manasīkāro, yoniso udapajjathātiādi sabbaṃ heṭṭhā vuttanayamevāti.
রাজদত্তত্থেরগাথাৰণ্ণনা নিট্ঠিতা।
Rājadattattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ১. রাজদত্তত্থেরগাথা • 1. Rājadattattheragāthā
