| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
5. චිත්‌තාගාරවග්‌ගො
5. Cittāgāravaggo
1. රාජාගාරසික්‌ඛාපදවණ්‌ණනා
1. Rājāgārasikkhāpadavaṇṇanā
කීළනචිත්‌තසාලන්‌ති න රඤ්‌ඤොව කීළනචිත්‌තසාලං, අථ ඛො යෙසං කෙසඤ්‌චි මනුස්‌සානං කීළනත්‌ථං යත්‌ථ කත්‌ථචි කතසාලං. එස නයො ‘‘කීළනඋපවන’’න්‌තිආදීසුපි. යථාහ ‘‘රාජාගාරං නාම යත්‌ථ කත්‌ථචි රඤ්‌ඤො කීළිතුං රමිතුං කතං හොතී’’තිආදිකො (පාචි. 979) විත්‌ථාරො. තත්‌ථ කීළනඋපවනන්‌ති කීළනත්‌ථං අන්‌තොනගරෙ කතං ආරාමං. කීළනුය්‍යානන්‌ති තථෙව බහිනගරෙ කතං උය්‍යානං.
Kīḷanacittasālanti na raññova kīḷanacittasālaṃ, atha kho yesaṃ kesañci manussānaṃ kīḷanatthaṃ yattha katthaci katasālaṃ. Esa nayo ‘‘kīḷanaupavana’’ntiādīsupi. Yathāha ‘‘rājāgāraṃ nāma yattha katthaci rañño kīḷituṃ ramituṃ kataṃ hotī’’tiādiko (pāci. 979) vitthāro. Tattha kīḷanaupavananti kīḷanatthaṃ antonagare kataṃ ārāmaṃ. Kīḷanuyyānanti tatheva bahinagare kataṃ uyyānaṃ.
රාජාගාරසික්‌ඛාපදවණ්‌ණනා නිට්‌ඨිතා.
Rājāgārasikkhāpadavaṇṇanā niṭṭhitā.
