| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
4. ரஜனநித்³தே³ஸவண்ணனா
4. Rajananiddesavaṇṇanā
58. இதா³னி தேஸங் சீவரானங் ரஜனவிதா⁴னங் த³ஸ்ஸேதுங் ‘‘ரஜனானி சா’’தி வுத்தங். தத்த² ‘‘அனுஜானாமி, பி⁴க்க²வே, ச² ரஜனானி மூலரஜனங் க²ந்த⁴ரஜனங் தசரஜனங் பத்தரஜனங் புப்ப²ரஜனங் ப²லரஜன’’ந்தி (மஹாவ॰ 344) ஏவங் ப⁴க³வதா அனுஞ்ஞாதத்தா ‘‘ச²ப்பகாரானி அனுஞ்ஞாதானி ஸத்து²னா’’தி வுத்தங்.
58. Idāni tesaṃ cīvarānaṃ rajanavidhānaṃ dassetuṃ ‘‘rajanāni cā’’ti vuttaṃ. Tattha ‘‘anujānāmi, bhikkhave, cha rajanāni mūlarajanaṃ khandharajanaṃ tacarajanaṃ pattarajanaṃ puppharajanaṃ phalarajana’’nti (mahāva. 344) evaṃ bhagavatā anuññātattā ‘‘chappakārāni anuññātāni satthunā’’ti vuttaṃ.
59. தத்த² மூலேதி மூலரஜனேதி அத்தோ². ஹலித்³தி³ங் விவஜ்ஜிய ஸப்³ப³ங் லப்³ப⁴ந்தி ஸம்ப³ந்தோ⁴. ஏவங் ஸேஸேஸுபி. துங்க³ஹாரகோ நாம ஏகோ ஸகண்டகருக்கோ², தஸ்ஸ ஹரிதாலவண்ணங் க²ந்த⁴ரஜனங் ஹோதி. கி³ஹிபரிபு⁴த்தங் பன அல்லிபத்தேன ஏகவாரங் ரஜிதுங் வட்டதி. ப²லரஜனே அகப்பியங் நாம நத்தி², ஸப்³ப³ங் வட்டதீதி. ரஜனவினிச்ச²யோ.
59. Tattha mūleti mūlarajaneti attho. Haliddiṃ vivajjiya sabbaṃ labbhanti sambandho. Evaṃ sesesupi. Tuṅgahārako nāma eko sakaṇṭakarukkho, tassa haritālavaṇṇaṃ khandharajanaṃ hoti. Gihiparibhuttaṃ pana allipattena ekavāraṃ rajituṃ vaṭṭati. Phalarajane akappiyaṃ nāma natthi, sabbaṃ vaṭṭatīti. Rajanavinicchayo.
ரஜனநித்³தே³ஸவண்ணனா நிட்டி²தா.
Rajananiddesavaṇṇanā niṭṭhitā.
