| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༨. རཛནཱིཡསཎྛིཏསུཏྟཾ
8. Rajanīyasaṇṭhitasuttaṃ
༧༠. སཱཝཏྠིནིདཱནཾ། ཨཐ ཁོ ཨཉྙཏརོ བྷིཀྑུ…པེ॰… ཨེཀམནྟཾ ནིསིནྣོ ཁོ སོ བྷིཀྑུ བྷགཝནྟཾ ཨེཏདཝོཙ – ‘‘སཱདྷུ མེ, བྷནྟེ, བྷགཝཱ སཾཁིཏྟེན དྷམྨཾ དེསེཏུ, ཡམཧཾ བྷགཝཏོ དྷམྨཾ སུཏྭཱ…པེ॰… ཝིཧརེཡྻ’’ནྟི། ‘‘ཡཾ ཁོ, བྷིཀྑུ, རཛནཱིཡསཎྛིཏཾ; ཏཏྲ ཏེ ཚནྡོ པཧཱཏབྦོ’’ཏི། ‘‘ཨཉྙཱཏཾ, བྷགཝཱ; ཨཉྙཱཏཾ, སུགཏཱ’’ཏི།
70. Sāvatthinidānaṃ. Atha kho aññataro bhikkhu…pe… ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu, yamahaṃ bhagavato dhammaṃ sutvā…pe… vihareyya’’nti. ‘‘Yaṃ kho, bhikkhu, rajanīyasaṇṭhitaṃ; tatra te chando pahātabbo’’ti. ‘‘Aññātaṃ, bhagavā; aññātaṃ, sugatā’’ti.
‘‘ཡཐཱ ཀཐཾ པན ཏྭཾ, བྷིཀྑུ, མཡཱ སཾཁིཏྟེན བྷཱསིཏསྶ ཝིཏྠཱརེན ཨཏྠཾ ཨཱཛཱནཱསཱི’’ཏི? ‘‘རཱུཔཾ ཁོ, བྷནྟེ, རཛནཱིཡསཎྛིཏཾ; ཏཏྲ མེ ཚནྡོ པཧཱཏབྦོ། ཝེདནཱ… སཉྙཱ… སངྑཱརཱ… ཝིཉྙཱཎཾ རཛནཱིཡསཎྛིཏཾ; ཏཏྲ མེ ཚནྡོ པཧཱཏབྦོ། ཨིམསྶ ཁྭཱཧཾ, བྷནྟེ, བྷགཝཏཱ སཾཁིཏྟེན བྷཱསིཏསྶ ཨེཝཾ ཝིཏྠཱརེན ཨཏྠཾ ཨཱཛཱནཱམཱི’’ཏི།
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ kho, bhante, rajanīyasaṇṭhitaṃ; tatra me chando pahātabbo. Vedanā… saññā… saṅkhārā… viññāṇaṃ rajanīyasaṇṭhitaṃ; tatra me chando pahātabbo. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘སཱདྷུ སཱདྷུ བྷིཀྑུ! སཱདྷུ ཁོ ཏྭཾ, བྷིཀྑུ, མཡཱ སཾཁིཏྟེན བྷཱསིཏསྶ ཝིཏྠཱརེན ཨཏྠཾ ཨཱཛཱནཱསི། རཱུཔཾ ཁོ, བྷིཀྑུ, རཛནཱིཡསཎྛིཏཾ; ཏཏྲ ཏེ ཚནྡོ པཧཱཏབྦོ། ཝེདནཱ… སཉྙཱ… སངྑཱརཱ… ཝིཉྙཱཎཾ རཛནཱིཡསཎྛིཏཾ; ཏཏྲ ཏེ ཚནྡོ པཧཱཏབྦོ། ཨིམསྶ ཁོ, བྷིཀྑུ, མཡཱ སཾཁིཏྟེན བྷཱསིཏསྶ ཨེཝཾ ཝིཏྠཱརེན ཨཏྠོ དཊྛབྦོ’’ཏི…པེ॰… ཨཉྙཏརོ ཙ པན སོ བྷིཀྑུ ཨརཧཏཾ ཨཧོསཱིཏི། ཨཊྛམཾ།
‘‘Sādhu sādhu bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ kho, bhikkhu, rajanīyasaṇṭhitaṃ; tatra te chando pahātabbo. Vedanā… saññā… saṅkhārā… viññāṇaṃ rajanīyasaṇṭhitaṃ; tatra te chando pahātabbo. Imassa kho, bhikkhu, mayā saṃkhittena bhāsitassa evaṃ vitthārena attho daṭṭhabbo’’ti…pe… aññataro ca pana so bhikkhu arahataṃ ahosīti. Aṭṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༨-༡༠. རཛནཱིཡསཎྛིཏསུཏྟཱདིཝཎྞནཱ • 8-10. Rajanīyasaṇṭhitasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༨-༡༠. རཛནཱིཡསཎྛིཏསུཏྟཱདིཝཎྞནཱ • 8-10. Rajanīyasaṇṭhitasuttādivaṇṇanā
