| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༥. རཱཛནྟེཔུརཔྤཝེསནསུཏྟཾ
5. Rājantepurappavesanasuttaṃ
༤༥. 1 ‘‘དསཡིམེ , བྷིཀྑཝེ, ཨཱདཱིནཝཱ རཱཛནྟེཔུརཔྤཝེསནེ། ཀཏམེ དས? ཨིདྷ, བྷིཀྑཝེ, རཱཛཱ མཧེསིཡཱ སདྡྷིཾ ནིསིནྣོ ཧོཏི། ཏཏྲ བྷིཀྑུ པཝིསཏི། མཧེསཱི ཝཱ བྷིཀྑུཾ དིསྭཱ སིཏཾ པཱཏུཀརོཏི, བྷིཀྑུ ཝཱ མཧེསིཾ དིསྭཱ སིཏཾ པཱཏུཀརོཏི། ཏཏྠ རཉྙོ ཨེཝཾ ཧོཏི – ‘ཨདྡྷཱ ཨིམེསཾ ཀཏཾ ཝཱ ཀརིསྶནྟི ཝཱ’ཏི! ཨཡཾ, བྷིཀྑཝེ, པཋམོ ཨཱདཱིནཝོ རཱཛནྟེཔུརཔྤཝེསནེ།
45.2 ‘‘Dasayime , bhikkhave, ādīnavā rājantepurappavesane. Katame dasa? Idha, bhikkhave, rājā mahesiyā saddhiṃ nisinno hoti. Tatra bhikkhu pavisati. Mahesī vā bhikkhuṃ disvā sitaṃ pātukaroti, bhikkhu vā mahesiṃ disvā sitaṃ pātukaroti. Tattha rañño evaṃ hoti – ‘addhā imesaṃ kataṃ vā karissanti vā’ti! Ayaṃ, bhikkhave, paṭhamo ādīnavo rājantepurappavesane.
‘‘པུན ཙཔརཾ, བྷིཀྑཝེ, རཱཛཱ བཧུཀིཙྩོ བཧུཀརཎཱིཡོ ཨཉྙཏརཾ ཨིཏྠིཾ གནྟྭཱ ན སརཏི – ‘སཱ ཏེན གབྦྷཾ གཎྷཱཏི’། ཏཏྠ རཉྙོ ཨེཝཾ ཧོཏི – ‘ན ཁོ ཨིདྷ ཨཉྙོ ཀོཙི པཝིསཏི, ཨཉྙཏྲ པབྦཛིཏེན། སིཡཱ ནུ ཁོ པབྦཛིཏསྶ ཀམྨ’ནྟི། ཨཡཾ, བྷིཀྑཝེ, དུཏིཡོ ཨཱདཱིནཝོ རཱཛནྟེཔུརཔྤཝེསནེ།
‘‘Puna caparaṃ, bhikkhave, rājā bahukicco bahukaraṇīyo aññataraṃ itthiṃ gantvā na sarati – ‘sā tena gabbhaṃ gaṇhāti’. Tattha rañño evaṃ hoti – ‘na kho idha añño koci pavisati, aññatra pabbajitena. Siyā nu kho pabbajitassa kamma’nti. Ayaṃ, bhikkhave, dutiyo ādīnavo rājantepurappavesane.
‘‘པུན ཙཔརཾ, བྷིཀྑཝེ, རཉྙོ ཨནྟེཔུརེ ཨཉྙཏརཾ རཏནཾ ནསྶཏི། ཏཏྠ རཉྙོ ཨེཝཾ ཧོཏི – ‘ན ཁོ ཨིདྷ ཨཉྙོ ཀོཙི པཝིསཏི, ཨཉྙཏྲ པབྦཛིཏེན། སིཡཱ ནུ ཁོ པབྦཛིཏསྶ ཀམྨ’ནྟི། ཨཡཾ, བྷིཀྑཝེ, ཏཏིཡོ ཨཱདཱིནཝོ རཱཛནྟེཔུརཔྤཝེསནེ།
‘‘Puna caparaṃ, bhikkhave, rañño antepure aññataraṃ ratanaṃ nassati. Tattha rañño evaṃ hoti – ‘na kho idha añño koci pavisati, aññatra pabbajitena. Siyā nu kho pabbajitassa kamma’nti. Ayaṃ, bhikkhave, tatiyo ādīnavo rājantepurappavesane.
‘‘པུན ཙཔརཾ, བྷིཀྑཝེ, རཉྙོ ཨནྟེཔུརེ ཨབྦྷནྟརཱ གུཡ྄ཧམནྟཱ བཧིདྡྷཱ སམྦྷེདཾ གཙྪནྟི། ཏཏྠ རཉྙོ ཨེཝཾ ཧོཏི – ‘ན ཁོ ཨིདྷ ཨཉྙོ ཀོཙི པཝིསཏི, ཨཉྙཏྲ པབྦཛིཏེན ། སིཡཱ ནུ ཁོ པབྦཛིཏསྶ ཀམྨ’ནྟི། ཨཡཾ, བྷིཀྑཝེ, ཙཏུཏྠོ ཨཱདཱིནཝོ རཱཛནྟེཔུརཔྤཝེསནེ།
‘‘Puna caparaṃ, bhikkhave, rañño antepure abbhantarā guyhamantā bahiddhā sambhedaṃ gacchanti. Tattha rañño evaṃ hoti – ‘na kho idha añño koci pavisati, aññatra pabbajitena . Siyā nu kho pabbajitassa kamma’nti. Ayaṃ, bhikkhave, catuttho ādīnavo rājantepurappavesane.
‘‘པུན ཙཔརཾ, བྷིཀྑཝེ, རཉྙོ ཨནྟེཔུརེ པིཏཱ ཝཱ པུཏྟཾ པཏྠེཏི པུཏྟོ ཝཱ པིཏརཾ པཏྠེཏི། ཏེསཾ ཨེཝཾ ཧོཏི – ‘ན ཁོ ཨིདྷ ཨཉྙོ ཀོཙི པཝིསཏི, ཨཉྙཏྲ པབྦཛིཏེན། སིཡཱ ནུ ཁོ པབྦཛིཏསྶ ཀམྨ’ནྟི། ཨཡཾ, བྷིཀྑཝེ, པཉྩམོ ཨཱདཱིནཝོ རཱཛནྟེཔུརཔྤཝེསནེ།
‘‘Puna caparaṃ, bhikkhave, rañño antepure pitā vā puttaṃ pattheti putto vā pitaraṃ pattheti. Tesaṃ evaṃ hoti – ‘na kho idha añño koci pavisati, aññatra pabbajitena. Siyā nu kho pabbajitassa kamma’nti. Ayaṃ, bhikkhave, pañcamo ādīnavo rājantepurappavesane.
‘‘པུན ཙཔརཾ, བྷིཀྑཝེ, རཱཛཱ ནཱིཙཊྛཱནིཡཾ ཨུཙྩེ ཋཱནེ ཋཔེཏི། ཡེསཾ ཏཾ ཨམནཱཔཾ ཏེསཾ ཨེཝཾ ཧོཏི – ‘རཱཛཱ ཁོ པབྦཛིཏེན སཾསཊྛོ། སིཡཱ ནུ ཁོ པབྦཛིཏསྶ ཀམྨ’ནྟི། ཨཡཾ, བྷིཀྑཝེ, ཚཊྛོ ཨཱདཱིནཝོ རཱཛནྟེཔུརཔྤཝེསནེ།
‘‘Puna caparaṃ, bhikkhave, rājā nīcaṭṭhāniyaṃ ucce ṭhāne ṭhapeti. Yesaṃ taṃ amanāpaṃ tesaṃ evaṃ hoti – ‘rājā kho pabbajitena saṃsaṭṭho. Siyā nu kho pabbajitassa kamma’nti. Ayaṃ, bhikkhave, chaṭṭho ādīnavo rājantepurappavesane.
‘‘པུན ཙཔརཾ, བྷིཀྑཝེ, རཱཛཱ ཨུཙྩཊྛཱནིཡཾ ནཱིཙེ ཋཱནེ ཋཔེཏི། ཡེསཾ ཏཾ ཨམནཱཔཾ ཏེསཾ ཨེཝཾ ཧོཏི – ‘རཱཛཱ ཁོ པབྦཛིཏེན སཾསཊྛོ། སིཡཱ ནུ ཁོ པབྦཛིཏསྶ ཀམྨ’ནྟི། ཨཡཾ, བྷིཀྑཝེ, སཏྟམོ ཨཱདཱིནཝོ རཱཛནྟེཔུརཔྤཝེསནེ།
‘‘Puna caparaṃ, bhikkhave, rājā uccaṭṭhāniyaṃ nīce ṭhāne ṭhapeti. Yesaṃ taṃ amanāpaṃ tesaṃ evaṃ hoti – ‘rājā kho pabbajitena saṃsaṭṭho. Siyā nu kho pabbajitassa kamma’nti. Ayaṃ, bhikkhave, sattamo ādīnavo rājantepurappavesane.
‘‘པུན ཙཔརཾ, བྷིཀྑཝེ, རཱཛཱ ཨཀཱལེ སེནཾ ཨུཡྻོཛེཏི། ཡེསཾ ཏཾ ཨམནཱཔཾ ཏེསཾ ཨེཝཾ ཧོཏི – ‘རཱཛཱ ཁོ པབྦཛིཏེན སཾསཊྛོ། སིཡཱ ནུ ཁོ པབྦཛིཏསྶ ཀམྨ’ནྟི། ཨཡཾ, བྷིཀྑཝེ, ཨཊྛམོ ཨཱདཱིནཝོ རཱཛནྟེཔུརཔྤཝེསནེ།
‘‘Puna caparaṃ, bhikkhave, rājā akāle senaṃ uyyojeti. Yesaṃ taṃ amanāpaṃ tesaṃ evaṃ hoti – ‘rājā kho pabbajitena saṃsaṭṭho. Siyā nu kho pabbajitassa kamma’nti. Ayaṃ, bhikkhave, aṭṭhamo ādīnavo rājantepurappavesane.
‘‘པུན ཙཔརཾ, བྷིཀྑཝེ, རཱཛཱ ཀཱལེ སེནཾ ཨུཡྻོཛེཏྭཱ ཨནྟརཱམགྒཏོ ནིཝཏྟཱཔེཏི། ཡེསཾ ཏཾ ཨམནཱཔཾ ཏེསཾ ཨེཝཾ ཧོཏི – ‘རཱཛཱ ཁོ པབྦཛིཏེན སཾསཊྛོ། སིཡཱ ནུ ཁོ པབྦཛིཏསྶ ཀམྨ’ནྟི། ཨཡཾ, བྷིཀྑཝེ, ནཝམོ ཨཱདཱིནཝོ རཱཛནྟེཔུརཔྤཝེསནེ།
‘‘Puna caparaṃ, bhikkhave, rājā kāle senaṃ uyyojetvā antarāmaggato nivattāpeti. Yesaṃ taṃ amanāpaṃ tesaṃ evaṃ hoti – ‘rājā kho pabbajitena saṃsaṭṭho. Siyā nu kho pabbajitassa kamma’nti. Ayaṃ, bhikkhave, navamo ādīnavo rājantepurappavesane.
‘‘པུན ཙཔརཾ, བྷིཀྑཝེ, རཉྙོ ཨནྟེཔུརཾ ཧཏྠིསམྨདྡཾ ཨསྶསམྨདྡཾ རཐསམྨདྡཾ རཛནཱིཡཱནི རཱུཔསདྡགནྡྷརསཕོཊྛབྦཱནི, ཡཱནི ན པབྦཛིཏསྶ སཱརུཔྤཱནི། ཨཡཾ, བྷིཀྑཝེ, དསམོ ཨཱདཱིནཝོ རཱཛནྟེཔུརཔྤཝེསནེ། ཨིམེ ཁོ, བྷིཀྑཝེ, དས ཨཱདཱིནཝཱ རཱཛནྟེཔུརཔྤཝེསནེ’’ཏི། པཉྩམཾ།
‘‘Puna caparaṃ, bhikkhave, rañño antepuraṃ hatthisammaddaṃ assasammaddaṃ rathasammaddaṃ rajanīyāni rūpasaddagandharasaphoṭṭhabbāni, yāni na pabbajitassa sāruppāni. Ayaṃ, bhikkhave, dasamo ādīnavo rājantepurappavesane. Ime kho, bhikkhave, dasa ādīnavā rājantepurappavesane’’ti. Pañcamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥. རཱཛནྟེཔུརཔྤཝེསནསུཏྟཝཎྞནཱ • 5. Rājantepurappavesanasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༨. ཝིཝཱདསུཏྟཱདིཝཎྞནཱ • 1-8. Vivādasuttādivaṇṇanā
