| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
৭. রাজপুত্তপেতৰত্থুৰণ্ণনা
7. Rājaputtapetavatthuvaṇṇanā
পুব্বে কতানং কম্মানন্তি ইদং সত্থা জেতৰনে ৰিহরন্তো রাজপুত্তপেতং আরব্ভ কথেসি। তত্থ যো সো অতীতে কিতৰস্স নাম রঞ্ঞো পুত্তো অতীতে পচ্চেকবুদ্ধে অপরজ্ঝিত্ৰা বহূনি ৰস্সসহস্সানি নিরযে পচ্চিত্ৰা তস্সেৰ কম্মস্স ৰিপাকাৰসেসেন পেতেসু উপ্পন্নো। সো ইধ ‘‘রাজপুত্তপেতো’’তি অধিপ্পেতো। তস্স ৰত্থু হেট্ঠা সাণৰাসিপেতৰত্থুম্হি ৰিত্থারতো আগতমেৰ, তস্মা তত্থ ৰুত্তনযেনেৰ গহেতব্বং। সত্থা হি তদা থেরেন অত্তনো ঞাতিপেতানং পৰত্তিযা কথিতায ‘‘ন কেৰলং তৰ ঞাতকাযেৰ, অথ খো ত্ৰম্পি ইতো অনন্তরাতীতে অত্তভাৰে পেতো হুত্ৰা মহাদুক্খং অনুভৰী’’তি ৰত্ৰা তেন যাচিতো –
Pubbekatānaṃ kammānanti idaṃ satthā jetavane viharanto rājaputtapetaṃ ārabbha kathesi. Tattha yo so atīte kitavassa nāma rañño putto atīte paccekabuddhe aparajjhitvā bahūni vassasahassāni niraye paccitvā tasseva kammassa vipākāvasesena petesu uppanno. So idha ‘‘rājaputtapeto’’ti adhippeto. Tassa vatthu heṭṭhā sāṇavāsipetavatthumhi vitthārato āgatameva, tasmā tattha vuttanayeneva gahetabbaṃ. Satthā hi tadā therena attano ñātipetānaṃ pavattiyā kathitāya ‘‘na kevalaṃ tava ñātakāyeva, atha kho tvampi ito anantarātīte attabhāve peto hutvā mahādukkhaṃ anubhavī’’ti vatvā tena yācito –
৭৫৩.
753.
‘‘পুব্বে কতানং কম্মানং, ৰিপাকো মথযে মনং।
‘‘Pubbe katānaṃ kammānaṃ, vipāko mathaye manaṃ;
রূপে সদ্দে রসে গন্ধে, ফোট্ঠব্বে চ মনোরমে॥
Rūpe sadde rase gandhe, phoṭṭhabbe ca manorame.
৭৫৪.
754.
‘‘ইচ্চং গীতং রতিং খিড্ডং, অনুভুত্ৰা অনপ্পকং।
‘‘Iccaṃ gītaṃ ratiṃ khiḍḍaṃ, anubhutvā anappakaṃ;
উয্যানে পরিচরিত্ৰা, পৰিসন্তো গিরিব্বজং॥
Uyyāne paricaritvā, pavisanto giribbajaṃ.
৭৫৫.
755.
‘‘ইসিং সুনেত্তমদ্দক্খি, অত্তদন্তং সমাহিতং।
‘‘Isiṃ sunettamaddakkhi, attadantaṃ samāhitaṃ;
অপ্পিচ্ছং হিরিসম্পন্নং, উঞ্ছে পত্তগতে রতং॥
Appicchaṃ hirisampannaṃ, uñche pattagate rataṃ.
৭৫৬.
756.
‘‘হত্থিক্খন্ধতো ওরুয্হ, লদ্ধা ভন্তেতি চাব্রৰি।
‘‘Hatthikkhandhato oruyha, laddhā bhanteti cābravi;
তস্স পত্তং গহেত্ৰান, উচ্চং পগ্গয্হ খত্তিযো॥
Tassa pattaṃ gahetvāna, uccaṃ paggayha khattiyo.
৭৫৭.
757.
‘‘থণ্ডিলে পত্তং ভিন্দিত্ৰা, হসমানো অপক্কমি।
‘‘Thaṇḍile pattaṃ bhinditvā, hasamāno apakkami;
রঞ্ঞো কিতৰস্সাহং পুত্তো, কিং মং ভিক্খু করিস্সসি॥
Rañño kitavassāhaṃ putto, kiṃ maṃ bhikkhu karissasi.
৭৫৮.
758.
‘‘তস্স কম্মস্স ফরুসস্স, ৰিপাকো কটুকো অহু।
‘‘Tassa kammassa pharusassa, vipāko kaṭuko ahu;
যং রাজপুত্তো ৰেদেসি, নিরযম্হি সমপ্পিতো॥
Yaṃ rājaputto vedesi, nirayamhi samappito.
৭৫৯.
759.
‘‘ছল়েৰ চতুরাসীতি, ৰস্সানি নহুতানি চ।
‘‘Chaḷeva caturāsīti, vassāni nahutāni ca;
ভুসং দুক্খং নিগচ্ছিত্থো, নিরযে কতকিব্বিসো॥
Bhusaṃ dukkhaṃ nigacchittho, niraye katakibbiso.
৭৬০.
760.
‘‘উত্তানোপি চ পচ্চিত্থ, নিকুজ্জো ৰামদক্খিণো।
‘‘Uttānopi ca paccittha, nikujjo vāmadakkhiṇo;
উদ্ধংপাদো ঠিতো চেৰ, চিরং বালো অপচ্চথ॥
Uddhaṃpādo ṭhito ceva, ciraṃ bālo apaccatha.
৭৬১.
761.
‘‘বহূনি ৰস্সসহস্সানি, পূগানি নহুতানি চ।
‘‘Bahūni vassasahassāni, pūgāni nahutāni ca;
ভুসং দুক্খং নিগচ্ছিত্থো, নিরযে কতকিব্বিসো॥
Bhusaṃ dukkhaṃ nigacchittho, niraye katakibbiso.
৭৬২.
762.
‘‘এতাদিসং খো কটুকং, অপ্পদুট্ঠপ্পদোসিনং।
‘‘Etādisaṃ kho kaṭukaṃ, appaduṭṭhappadosinaṃ;
পচ্চন্তি পাপকম্মন্তা, ইসিমাসজ্জ সুব্বতং॥
Paccanti pāpakammantā, isimāsajja subbataṃ.
৭৬৩.
763.
‘‘সো তত্থ বহুৰস্সানি, ৰেদযিত্ৰা বহুং দুখং।
‘‘So tattha bahuvassāni, vedayitvā bahuṃ dukhaṃ;
খুপ্পিপাসহতো নাম, পেতো আসি ততো চুতো॥
Khuppipāsahato nāma, peto āsi tato cuto.
৭৬৪.
764.
‘‘এতমাদীনৰং ঞত্ৰা, ইস্সরমদসম্ভৰং।
‘‘Etamādīnavaṃ ñatvā, issaramadasambhavaṃ;
পহায ইস্সরমদং, নিৰাতমনুৰত্তযে॥
Pahāya issaramadaṃ, nivātamanuvattaye.
৭৬৫.
765.
‘‘দিট্ঠেৰ ধম্মে পাসংসো, যো বুদ্ধেসু সগারৰো।
‘‘Diṭṭheva dhamme pāsaṃso, yo buddhesu sagāravo;
কাযস্স ভেদা সপ্পঞ্ঞো, সগ্গং সো উপপজ্জতী’’তি॥ –
Kāyassa bhedā sappañño, saggaṃ so upapajjatī’’ti. –
ইদং পেতৰত্থুং কথেসি।
Idaṃ petavatthuṃ kathesi.
৭৫৩. তত্থ পুব্বে কতানং কম্মানং, ৰিপাকো মথযে মনন্তি পুরিমাসু জাতীসু কতানং অকুসলকম্মানং ফলং উল়ারং হুত্ৰা উপ্পজ্জমানং অন্ধবালানং চিত্তং মথযেয্য অভিভৰেয্য, পরেসং অনত্থকরণমুখেন অত্তনো অত্থং উপ্পাদেয্যাতি অধিপ্পাযো।
753. Tattha pubbe katānaṃ kammānaṃ, vipāko mathaye mananti purimāsu jātīsu katānaṃ akusalakammānaṃ phalaṃ uḷāraṃ hutvā uppajjamānaṃ andhabālānaṃ cittaṃ mathayeyya abhibhaveyya, paresaṃ anatthakaraṇamukhena attano atthaṃ uppādeyyāti adhippāyo.
ইদানি তং চিত্তমথনং ৰিসযেন সদ্ধিং দস্সেতুং ‘‘রূপে সদ্দে’’তিআদি ৰুত্তং। তত্থ রূপেতি রূপহেতু, যথিচ্ছিতস্স মনাপিযস্স রূপারম্মণস্স পটিলাভনিমিত্তন্তি অত্থো। সদ্দেতিআদীসুপি এসেৰ নযো।
Idāni taṃ cittamathanaṃ visayena saddhiṃ dassetuṃ ‘‘rūpe sadde’’tiādi vuttaṃ. Tattha rūpeti rūpahetu, yathicchitassa manāpiyassa rūpārammaṇassa paṭilābhanimittanti attho. Saddetiādīsupi eseva nayo.
৭৫৪. এৰং সাধারণতো ৰুত্তমত্থং অসাধারণতো নিযমেত্ৰা দস্সেন্তো ‘‘নচ্চং গীত’’ন্তিআদিমাহ। তত্থ রতিন্তি কামরতিং। খিড্ডন্তি সহাযকাদীহি কেল়িং। গিরিব্বজন্তি রাজগহং।
754. Evaṃ sādhāraṇato vuttamatthaṃ asādhāraṇato niyametvā dassento ‘‘naccaṃ gīta’’ntiādimāha. Tattha ratinti kāmaratiṃ. Khiḍḍanti sahāyakādīhi keḷiṃ. Giribbajanti rājagahaṃ.
৭৫৫. ইসিন্তি অসেক্খানং সীলক্খন্ধাদীনং এসনট্ঠেন ইসিং। সুনেত্তন্তি এৰংনামকং পচ্চেকবুদ্ধং। অত্তদন্তন্তি উত্তমেন দমথেন দমিতচিত্তং। সমাহিতন্তি অরহত্তফলসমাধিনা সমাহিতং। উঞ্ছে পত্তগতে রতন্তি উঞ্ছেন ভিক্খাচারেন লদ্ধে পত্তগতে পত্তপরিযাপন্নে আহারে রতং সন্তুট্ঠং।
755.Isinti asekkhānaṃ sīlakkhandhādīnaṃ esanaṭṭhena isiṃ. Sunettanti evaṃnāmakaṃ paccekabuddhaṃ. Attadantanti uttamena damathena damitacittaṃ. Samāhitanti arahattaphalasamādhinā samāhitaṃ. Uñche pattagate ratanti uñchena bhikkhācārena laddhe pattagate pattapariyāpanne āhāre rataṃ santuṭṭhaṃ.
৭৫৬. লদ্ধা, ভন্তেতি চাব্রৰীতি ‘‘অপি, ভন্তে, ভিক্খা লদ্ধা’’তি ৰিস্সাসজননত্থং কথেসি। উচ্চং পগ্গয্হাতি উচ্চতরং কত্ৰা পত্তং উক্খিপিত্ৰা।
756.Laddhā, bhanteti cābravīti ‘‘api, bhante, bhikkhā laddhā’’ti vissāsajananatthaṃ kathesi. Uccaṃ paggayhāti uccataraṃ katvā pattaṃ ukkhipitvā.
৭৫৭. থণ্ডিলে পত্তং ভিন্দিত্ৰাতি খরকঠিনে ভূমিপ্পদেসে খিপন্তো পত্তং ভিন্দিত্ৰা। অপক্কমীতি থোকং অপসক্কি। অপসক্কন্তো চ ‘‘অকারণেনেৰ অন্ধবালো মহন্তং অনত্থং অত্তনো অকাসী’’তি করুণাযনৰসেন ওলোকেন্তং পচ্চেকবুদ্ধং রাজপুত্তো আহ ‘‘রঞ্ঞো কিতৰস্সাহং পুত্তো, কিং মং ভিক্খু করিস্সসী’’তি।
757.Thaṇḍile pattaṃ bhinditvāti kharakaṭhine bhūmippadese khipanto pattaṃ bhinditvā. Apakkamīti thokaṃ apasakki. Apasakkanto ca ‘‘akāraṇeneva andhabālo mahantaṃ anatthaṃ attano akāsī’’ti karuṇāyanavasena olokentaṃ paccekabuddhaṃ rājaputto āha ‘‘rañño kitavassāhaṃ putto, kiṃ maṃ bhikkhu karissasī’’ti.
৭৫৮. ফরুসস্সাতি দারুণস্স। কটুকোতি অনিট্ঠো। যন্তি যং ৰিপাকং। সমপ্পিতোতি অল্লীনো।
758.Pharusassāti dāruṇassa. Kaṭukoti aniṭṭho. Yanti yaṃ vipākaṃ. Samappitoti allīno.
৭৫৯. ছল়েৰ চতুরাসীতি, ৰস্সানি নহুতানি চাতি উত্তানো নিপন্নো চতুরাসীতিৰস্সসহস্সানি, নিকুজ্জো, ৰামপস্সেন, দক্খিণপস্সেন, উদ্ধংপাদো, ওলম্বিকো, যথাঠিতো চাতি এৰং ছ চতুরাসীতিসহস্সানি ৰস্সানি হোন্তি। তেনাহ –
759.Chaḷeva caturāsīti, vassāni nahutāni cāti uttāno nipanno caturāsītivassasahassāni, nikujjo, vāmapassena, dakkhiṇapassena, uddhaṃpādo, olambiko, yathāṭhito cāti evaṃ cha caturāsītisahassāni vassāni honti. Tenāha –
৭৬০.
760.
‘‘উত্তানোপি চ পচ্চিত্থ, নিকুজ্জো ৰামদক্খিণো।
‘‘Uttānopi ca paccittha, nikujjo vāmadakkhiṇo;
উদ্ধংপাদো ঠিতো চেৰ, চিরং বালো অপচ্চথা’’তি॥
Uddhaṃpādo ṭhito ceva, ciraṃ bālo apaccathā’’ti.
তানি পন ৰস্সানি যস্মা অনেকানি নহুতানি হোন্তি, তস্মা ৰুত্তং ‘‘নহুতানী’’তি। ভুসং দুক্খং নিগচ্ছিত্থোতি অতিৰিয দুক্খং পাপুণি।
Tāni pana vassāni yasmā anekāni nahutāni honti, tasmā vuttaṃ ‘‘nahutānī’’ti. Bhusaṃ dukkhaṃ nigacchitthoti ativiya dukkhaṃ pāpuṇi.
৭৬১. পূগানীতি ৰস্সসমূহে, ইধ পুরিমগাথায চ অচ্চন্তসংযোগে উপযোগৰচনং দট্ঠব্বং।
761.Pūgānīti vassasamūhe, idha purimagāthāya ca accantasaṃyoge upayogavacanaṃ daṭṭhabbaṃ.
৭৬২. এতাদিসন্তি এৰরূপং। কটুকন্তি অতিদুক্খং, ভাৰনপংসকনিদ্দেসোযং ‘‘একমন্তং নিসীদী’’তিআদীসু ৰিয। অপ্পদুট্ঠপ্পদোসিনং ইসিং সুব্বতং আসজ্জ আসাদেত্ৰা পাপকম্মন্তা পুগ্গলা এৰরূপং কটুকং অতিৰিয দুক্খং পচ্চন্তীতি যোজনা।
762.Etādisanti evarūpaṃ. Kaṭukanti atidukkhaṃ, bhāvanapaṃsakaniddesoyaṃ ‘‘ekamantaṃ nisīdī’’tiādīsu viya. Appaduṭṭhappadosinaṃ isiṃ subbataṃ āsajja āsādetvā pāpakammantā puggalā evarūpaṃ kaṭukaṃ ativiya dukkhaṃ paccantīti yojanā.
৭৬৩. সোতি সো রাজপুত্তপেতো। তত্থাতি নিরযে। ৰেদযিত্ৰাতি অনুভৰিত্ৰা। নামাতি ব্যত্তপাকটভাৰেন। ততো চুতোতি নিরযতো চুতো। সেসং ৰুত্তনযমেৰ।
763.Soti so rājaputtapeto. Tatthāti niraye. Vedayitvāti anubhavitvā. Nāmāti byattapākaṭabhāvena. Tato cutoti nirayato cuto. Sesaṃ vuttanayameva.
এৰং ভগৰা রাজপুত্তপেতকথায তত্থ সন্নিপতিতং মহাজনং সংৰেজেত্ৰা উপরি সচ্চানি পকাসেসি। সচ্চপরিযোসানে বহূ সোতাপত্তিফলাদীনি সম্পাপুণিংসূতি।
Evaṃ bhagavā rājaputtapetakathāya tattha sannipatitaṃ mahājanaṃ saṃvejetvā upari saccāni pakāsesi. Saccapariyosāne bahū sotāpattiphalādīni sampāpuṇiṃsūti.
রাজপুত্তপেতৰত্থুৰণ্ণনা নিট্ঠিতা।
Rājaputtapetavatthuvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ৭. রাজপুত্তপেতৰত্থু • 7. Rājaputtapetavatthu
