| Library / Tipiṭaka / д̇ибидага • Tipiṭaka / бзд̇авад̇т̇у-адтагат̇аа • Petavatthu-aṭṭhakathā |
7. рааж̇абуд̇д̇абзд̇авад̇т̇уван̣н̣анаа
7. Rājaputtapetavatthuvaṇṇanā
буб̣б̣з гад̇аанам̣ гаммаананд̇и ид̣̇ам̣ сад̇т̇аа ж̇зд̇аванз вихаранд̇о рааж̇абуд̇д̇абзд̇ам̣ аараб̣бха гат̇зси. д̇ад̇т̇а яо со ад̇ийд̇з гид̇авасса наама ран̃н̃о буд̇д̇о ад̇ийд̇з бажжзгаб̣уд̣̇д̇хз абараж̇жхид̇ваа б̣ахууни вассасахассаани нираяз бажжид̇ваа д̇ассзва гаммасса вибаагаавасзсзна бзд̇зсу уббанно. со ид̇ха ‘‘рааж̇абуд̇д̇абзд̇о’’д̇и ад̇хиббзд̇о. д̇асса вад̇т̇у хздтаа саан̣аваасибзд̇авад̇т̇умхи вид̇т̇аарад̇о ааг̇ад̇амзва, д̇асмаа д̇ад̇т̇а вуд̇д̇анаязнзва г̇ахзд̇аб̣б̣ам̣. сад̇т̇аа хи д̇ад̣̇аа т̇зрзна ад̇д̇ано н̃аад̇ибзд̇аанам̣ бавад̇д̇ияаа гат̇ид̇ааяа ‘‘на гзвалам̣ д̇ава н̃аад̇агааязва, ат̇а ко д̇вамби ид̇о ананд̇араад̇ийд̇з ад̇д̇абхаавз бзд̇о худ̇ваа махаад̣̇угкам̣ анубхавий’’д̇и вад̇ваа д̇зна яаажид̇о –
Pubbekatānaṃ kammānanti idaṃ satthā jetavane viharanto rājaputtapetaṃ ārabbha kathesi. Tattha yo so atīte kitavassa nāma rañño putto atīte paccekabuddhe aparajjhitvā bahūni vassasahassāni niraye paccitvā tasseva kammassa vipākāvasesena petesu uppanno. So idha ‘‘rājaputtapeto’’ti adhippeto. Tassa vatthu heṭṭhā sāṇavāsipetavatthumhi vitthārato āgatameva, tasmā tattha vuttanayeneva gahetabbaṃ. Satthā hi tadā therena attano ñātipetānaṃ pavattiyā kathitāya ‘‘na kevalaṃ tava ñātakāyeva, atha kho tvampi ito anantarātīte attabhāve peto hutvā mahādukkhaṃ anubhavī’’ti vatvā tena yācito –
753.
753.
‘‘буб̣б̣з гад̇аанам̣ гаммаанам̣, вибааго мат̇аяз манам̣;
‘‘Pubbe katānaṃ kammānaṃ, vipāko mathaye manaṃ;
руубз сад̣̇д̣̇з расз г̇анд̇хз, подтаб̣б̣з жа манорамз.
Rūpe sadde rase gandhe, phoṭṭhabbe ca manorame.
754.
754.
‘‘ижжам̣ г̇ийд̇ам̣ рад̇им̣ кид̣д̣ам̣, анубхуд̇ваа анаббагам̣;
‘‘Iccaṃ gītaṃ ratiṃ khiḍḍaṃ, anubhutvā anappakaṃ;
уяяаанз барижарид̇ваа, бависанд̇о г̇ириб̣б̣аж̇ам̣.
Uyyāne paricaritvā, pavisanto giribbajaṃ.
755.
755.
‘‘исим̣ сунзд̇д̇амад̣̇д̣̇агки, ад̇д̇ад̣̇анд̇ам̣ самаахид̇ам̣;
‘‘Isiṃ sunettamaddakkhi, attadantaṃ samāhitaṃ;
аббижчам̣ хирисамбаннам̣, ун̃чз бад̇д̇аг̇ад̇з рад̇ам̣.
Appicchaṃ hirisampannaṃ, uñche pattagate rataṃ.
756.
756.
‘‘хад̇т̇игканд̇хад̇о оруяха, лад̣̇д̇хаа бханд̇зд̇и жааб̣рави;
‘‘Hatthikkhandhato oruyha, laddhā bhanteti cābravi;
д̇асса бад̇д̇ам̣ г̇ахзд̇ваана, ужжам̣ баг̇г̇аяха кад̇д̇ияо.
Tassa pattaṃ gahetvāna, uccaṃ paggayha khattiyo.
757.
757.
‘‘т̇ан̣д̣илз бад̇д̇ам̣ бхинд̣̇ид̇ваа, хасамаано абаггами;
‘‘Thaṇḍile pattaṃ bhinditvā, hasamāno apakkami;
ран̃н̃о гид̇авассаахам̣ буд̇д̇о, гим̣ мам̣ бхигку гариссаси.
Rañño kitavassāhaṃ putto, kiṃ maṃ bhikkhu karissasi.
758.
758.
‘‘д̇асса гаммасса парусасса, вибааго гадуго аху;
‘‘Tassa kammassa pharusassa, vipāko kaṭuko ahu;
яам̣ рааж̇абуд̇д̇о взд̣̇зси, нираяамхи самаббид̇о.
Yaṃ rājaputto vedesi, nirayamhi samappito.
759.
759.
‘‘чал̣зва жад̇ураасийд̇и, вассаани нахуд̇аани жа;
‘‘Chaḷeva caturāsīti, vassāni nahutāni ca;
бхусам̣ д̣̇угкам̣ ниг̇ажчид̇т̇о, нираяз гад̇агиб̣б̣исо.
Bhusaṃ dukkhaṃ nigacchittho, niraye katakibbiso.
760.
760.
‘‘уд̇д̇ааноби жа бажжид̇т̇а, нигуж̇ж̇о ваамад̣̇агкин̣о;
‘‘Uttānopi ca paccittha, nikujjo vāmadakkhiṇo;
уд̣̇д̇хам̣баад̣̇о тид̇о жзва, жирам̣ б̣аало абажжат̇а.
Uddhaṃpādo ṭhito ceva, ciraṃ bālo apaccatha.
761.
761.
‘‘б̣ахууни вассасахассаани, бууг̇аани нахуд̇аани жа;
‘‘Bahūni vassasahassāni, pūgāni nahutāni ca;
бхусам̣ д̣̇угкам̣ ниг̇ажчид̇т̇о, нираяз гад̇агиб̣б̣исо.
Bhusaṃ dukkhaṃ nigacchittho, niraye katakibbiso.
762.
762.
‘‘зд̇аад̣̇исам̣ ко гадугам̣, аббад̣̇удтаббад̣̇осинам̣;
‘‘Etādisaṃ kho kaṭukaṃ, appaduṭṭhappadosinaṃ;
бажжанд̇и баабагамманд̇аа, исимаасаж̇ж̇а суб̣б̣ад̇ам̣.
Paccanti pāpakammantā, isimāsajja subbataṃ.
763.
763.
‘‘со д̇ад̇т̇а б̣ахувассаани, взд̣̇аяид̇ваа б̣ахум̣ д̣̇укам̣;
‘‘So tattha bahuvassāni, vedayitvā bahuṃ dukhaṃ;
куббибаасахад̇о наама, бзд̇о ааси д̇ад̇о жуд̇о.
Khuppipāsahato nāma, peto āsi tato cuto.
764.
764.
‘‘зд̇амаад̣̇ийнавам̣ н̃ад̇ваа, иссарамад̣̇асамбхавам̣;
‘‘Etamādīnavaṃ ñatvā, issaramadasambhavaṃ;
бахааяа иссарамад̣̇ам̣, ниваад̇аманувад̇д̇аяз.
Pahāya issaramadaṃ, nivātamanuvattaye.
765.
765.
‘‘д̣̇идтзва д̇хаммз баасам̣со, яо б̣уд̣̇д̇хзсу саг̇аараво;
‘‘Diṭṭheva dhamme pāsaṃso, yo buddhesu sagāravo;
гааяасса бхзд̣̇аа саббан̃н̃о, саг̇г̇ам̣ со убабаж̇ж̇ад̇ий’’д̇и. –
Kāyassa bhedā sappañño, saggaṃ so upapajjatī’’ti. –
ид̣̇ам̣ бзд̇авад̇т̇ум̣ гат̇зси.
Idaṃ petavatthuṃ kathesi.
753. д̇ад̇т̇а буб̣б̣з гад̇аанам̣ гаммаанам̣, вибааго мат̇аяз мананд̇и буримаасу ж̇аад̇ийсу гад̇аанам̣ агусалагаммаанам̣ палам̣ ул̣аарам̣ худ̇ваа уббаж̇ж̇амаанам̣ анд̇хаб̣аалаанам̣ жид̇д̇ам̣ мат̇аязяяа абхибхавзяяа, барзсам̣ анад̇т̇агаран̣амукзна ад̇д̇ано ад̇т̇ам̣ уббаад̣̇зяяаад̇и ад̇хиббааяо.
753. Tattha pubbe katānaṃ kammānaṃ, vipāko mathaye mananti purimāsu jātīsu katānaṃ akusalakammānaṃ phalaṃ uḷāraṃ hutvā uppajjamānaṃ andhabālānaṃ cittaṃ mathayeyya abhibhaveyya, paresaṃ anatthakaraṇamukhena attano atthaṃ uppādeyyāti adhippāyo.
ид̣̇аани д̇ам̣ жид̇д̇амат̇анам̣ висаязна сад̣̇д̇хим̣ д̣̇ассзд̇ум̣ ‘‘руубз сад̣̇д̣̇з’’д̇иаад̣̇и вуд̇д̇ам̣. д̇ад̇т̇а руубзд̇и руубахзд̇у, яат̇ижчид̇асса манаабияасса руубаарамман̣асса бадилаабханимид̇д̇анд̇и ад̇т̇о. сад̣̇д̣̇зд̇иаад̣̇ийсуби зсзва наяо.
Idāni taṃ cittamathanaṃ visayena saddhiṃ dassetuṃ ‘‘rūpe sadde’’tiādi vuttaṃ. Tattha rūpeti rūpahetu, yathicchitassa manāpiyassa rūpārammaṇassa paṭilābhanimittanti attho. Saddetiādīsupi eseva nayo.
754. звам̣ саад̇хааран̣ад̇о вуд̇д̇амад̇т̇ам̣ асаад̇хааран̣ад̇о нияамзд̇ваа д̣̇ассзнд̇о ‘‘нажжам̣ г̇ийд̇а’’нд̇иаад̣̇имааха. д̇ад̇т̇а рад̇инд̇и гаамарад̇им̣. кид̣д̣анд̇и сахааяагаад̣̇ийхи гзл̣им̣. г̇ириб̣б̣аж̇анд̇и рааж̇аг̇ахам̣.
754. Evaṃ sādhāraṇato vuttamatthaṃ asādhāraṇato niyametvā dassento ‘‘naccaṃ gīta’’ntiādimāha. Tattha ratinti kāmaratiṃ. Khiḍḍanti sahāyakādīhi keḷiṃ. Giribbajanti rājagahaṃ.
755. исинд̇и асзгкаанам̣ сийлагканд̇хаад̣̇ийнам̣ зсанадтзна исим̣. сунзд̇д̇анд̇и звам̣наамагам̣ бажжзгаб̣уд̣̇д̇хам̣. ад̇д̇ад̣̇анд̇анд̇и уд̇д̇амзна д̣̇амат̇зна д̣̇амид̇ажид̇д̇ам̣. самаахид̇анд̇и арахад̇д̇апаласамаад̇хинаа самаахид̇ам̣. ун̃чз бад̇д̇аг̇ад̇з рад̇анд̇и ун̃чзна бхигкаажаарзна лад̣̇д̇хз бад̇д̇аг̇ад̇з бад̇д̇абарияаабаннз аахаарз рад̇ам̣ санд̇удтам̣.
755.Isinti asekkhānaṃ sīlakkhandhādīnaṃ esanaṭṭhena isiṃ. Sunettanti evaṃnāmakaṃ paccekabuddhaṃ. Attadantanti uttamena damathena damitacittaṃ. Samāhitanti arahattaphalasamādhinā samāhitaṃ. Uñche pattagate ratanti uñchena bhikkhācārena laddhe pattagate pattapariyāpanne āhāre rataṃ santuṭṭhaṃ.
756. лад̣̇д̇хаа, бханд̇зд̇и жааб̣равийд̇и ‘‘аби, бханд̇з, бхигкаа лад̣̇д̇хаа’’д̇и виссаасаж̇ананад̇т̇ам̣ гат̇зси. ужжам̣ баг̇г̇аяхаад̇и ужжад̇арам̣ гад̇ваа бад̇д̇ам̣ угкибид̇ваа.
756.Laddhā, bhanteti cābravīti ‘‘api, bhante, bhikkhā laddhā’’ti vissāsajananatthaṃ kathesi. Uccaṃ paggayhāti uccataraṃ katvā pattaṃ ukkhipitvā.
757. т̇ан̣д̣илз бад̇д̇ам̣ бхинд̣̇ид̇ваад̇и карагатинз бхуумиббад̣̇зсз кибанд̇о бад̇д̇ам̣ бхинд̣̇ид̇ваа. абаггамийд̇и т̇огам̣ абасагги. абасагганд̇о жа ‘‘агааран̣знзва анд̇хаб̣аало маханд̇ам̣ анад̇т̇ам̣ ад̇д̇ано агаасий’’д̇и гарун̣ааяанавасзна ологзнд̇ам̣ бажжзгаб̣уд̣̇д̇хам̣ рааж̇абуд̇д̇о ааха ‘‘ран̃н̃о гид̇авассаахам̣ буд̇д̇о, гим̣ мам̣ бхигку гариссасий’’д̇и.
757.Thaṇḍile pattaṃ bhinditvāti kharakaṭhine bhūmippadese khipanto pattaṃ bhinditvā. Apakkamīti thokaṃ apasakki. Apasakkanto ca ‘‘akāraṇeneva andhabālo mahantaṃ anatthaṃ attano akāsī’’ti karuṇāyanavasena olokentaṃ paccekabuddhaṃ rājaputto āha ‘‘rañño kitavassāhaṃ putto, kiṃ maṃ bhikkhu karissasī’’ti.
758. парусассаад̇и д̣̇аарун̣асса. гадугод̇и анидто. яанд̇и яам̣ вибаагам̣. самаббид̇од̇и аллийно.
758.Pharusassāti dāruṇassa. Kaṭukoti aniṭṭho. Yanti yaṃ vipākaṃ. Samappitoti allīno.
759. чал̣зва жад̇ураасийд̇и, вассаани нахуд̇аани жаад̇и уд̇д̇аано нибанно жад̇ураасийд̇ивассасахассаани, нигуж̇ж̇о, ваамабассзна, д̣̇агкин̣абассзна, уд̣̇д̇хам̣баад̣̇о, оламб̣иго, яат̇аатид̇о жаад̇и звам̣ ча жад̇ураасийд̇исахассаани вассаани хонд̇и. д̇знааха –
759.Chaḷeva caturāsīti, vassāni nahutāni cāti uttāno nipanno caturāsītivassasahassāni, nikujjo, vāmapassena, dakkhiṇapassena, uddhaṃpādo, olambiko, yathāṭhito cāti evaṃ cha caturāsītisahassāni vassāni honti. Tenāha –
760.
760.
‘‘уд̇д̇ааноби жа бажжид̇т̇а, нигуж̇ж̇о ваамад̣̇агкин̣о;
‘‘Uttānopi ca paccittha, nikujjo vāmadakkhiṇo;
уд̣̇д̇хам̣баад̣̇о тид̇о жзва, жирам̣ б̣аало абажжат̇аа’’д̇и.
Uddhaṃpādo ṭhito ceva, ciraṃ bālo apaccathā’’ti.
д̇аани бана вассаани яасмаа анзгаани нахуд̇аани хонд̇и, д̇асмаа вуд̇д̇ам̣ ‘‘нахуд̇ааний’’д̇и. бхусам̣ д̣̇угкам̣ ниг̇ажчид̇т̇од̇и ад̇ивияа д̣̇угкам̣ баабун̣и.
Tāni pana vassāni yasmā anekāni nahutāni honti, tasmā vuttaṃ ‘‘nahutānī’’ti. Bhusaṃ dukkhaṃ nigacchitthoti ativiya dukkhaṃ pāpuṇi.
761. бууг̇аанийд̇и вассасамуухз, ид̇ха буримаг̇аат̇ааяа жа ажжанд̇асам̣яог̇з убаяог̇аважанам̣ д̣̇адтаб̣б̣ам̣.
761.Pūgānīti vassasamūhe, idha purimagāthāya ca accantasaṃyoge upayogavacanaṃ daṭṭhabbaṃ.
762. зд̇аад̣̇исанд̇и зваруубам̣. гадуганд̇и ад̇ид̣̇угкам̣, бхааванабам̣саганид̣̇д̣̇зсояам̣ ‘‘згаманд̇ам̣ нисийд̣̇ий’’д̇иаад̣̇ийсу вияа. аббад̣̇удтаббад̣̇осинам̣ исим̣ суб̣б̣ад̇ам̣ аасаж̇ж̇а аасаад̣̇зд̇ваа баабагамманд̇аа буг̇г̇алаа зваруубам̣ гадугам̣ ад̇ивияа д̣̇угкам̣ бажжанд̇ийд̇и яож̇анаа.
762.Etādisanti evarūpaṃ. Kaṭukanti atidukkhaṃ, bhāvanapaṃsakaniddesoyaṃ ‘‘ekamantaṃ nisīdī’’tiādīsu viya. Appaduṭṭhappadosinaṃ isiṃ subbataṃ āsajja āsādetvā pāpakammantā puggalā evarūpaṃ kaṭukaṃ ativiya dukkhaṃ paccantīti yojanā.
763. сод̇и со рааж̇абуд̇д̇абзд̇о. д̇ад̇т̇аад̇и нираяз. взд̣̇аяид̇ваад̇и анубхавид̇ваа. наамаад̇и б̣яад̇д̇абаагадабхаавзна. д̇ад̇о жуд̇од̇и нираяад̇о жуд̇о. сзсам̣ вуд̇д̇анаяамзва.
763.Soti so rājaputtapeto. Tatthāti niraye. Vedayitvāti anubhavitvā. Nāmāti byattapākaṭabhāvena. Tato cutoti nirayato cuto. Sesaṃ vuttanayameva.
звам̣ бхаг̇аваа рааж̇абуд̇д̇абзд̇агат̇ааяа д̇ад̇т̇а саннибад̇ид̇ам̣ махааж̇анам̣ сам̣взж̇зд̇ваа убари сажжаани багаасзси. сажжабарияосаанз б̣ахуу сод̇аабад̇д̇ипалаад̣̇ийни самбаабун̣им̣сууд̇и.
Evaṃ bhagavā rājaputtapetakathāya tattha sannipatitaṃ mahājanaṃ saṃvejetvā upari saccāni pakāsesi. Saccapariyosāne bahū sotāpattiphalādīni sampāpuṇiṃsūti.
рааж̇абуд̇д̇абзд̇авад̇т̇уван̣н̣анаа нидтид̇аа.
Rājaputtapetavatthuvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бзд̇авад̇т̇убаал̣и • Petavatthupāḷi / 7. рааж̇абуд̇д̇абзд̇авад̇т̇у • 7. Rājaputtapetavatthu
