| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
10. ராஜஸிக்கா²பத³ங்
10. Rājasikkhāpadaṃ
537. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மதோ உபனந்த³ஸ்ஸ ஸக்யபுத்தஸ்ஸ உபட்டா²கோ மஹாமத்தோ ஆயஸ்மதோ உபனந்த³ஸ்ஸ ஸக்யபுத்தஸ்ஸ தூ³தேன சீவரசேதாபன்னங் பாஹேஸி – ‘‘இமினா சீவரசேதாபன்னேன சீவரங் சேதாபெத்வா அய்யங் உபனந்த³ங் சீவரேன அச்சா²தே³ஹீ’’தி. அத² கோ² ஸோ தூ³தோ யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தங் உபனந்த³ங் ஸக்யபுத்தங் ஏதத³வோச – ‘‘இத³ங் கோ², ப⁴ந்தே, ஆயஸ்மந்தங் உத்³தி³ஸ்ஸ சீவரசேதாபன்னங் ஆப⁴தங். படிக்³க³ண்ஹாது ஆயஸ்மா சீவரசேதாபன்ன’’ந்தி. ஏவங் வுத்தே ஆயஸ்மா உபனந்தோ³ ஸக்யபுத்தோ தங் தூ³தங் ஏதத³வோச – ‘‘ந கோ² மயங், ஆவுஸோ, சீவரசேதாபன்னங் படிக்³க³ண்ஹாம, சீவரஞ்ச கோ² மயங் படிக்³க³ண்ஹாம காலேன கப்பிய’’ந்தி. ஏவங் வுத்தே ஸோ தூ³தோ ஆயஸ்மந்தங் உபனந்த³ங் ஸக்யபுத்தங் ஏதத³வோச – ‘‘அத்தி² பனாயஸ்மதோ கோசி வெய்யாவச்சகரோ’’தி ? தேன கோ² பன ஸமயேன அஞ்ஞதரோ உபாஸகோ ஆராமங் அக³மாஸி கேனசிதே³வ கரணீயேன. அத² கோ² ஆயஸ்மா உபனந்தோ³ ஸக்யபுத்தோ தங் தூ³தங் ஏதத³வோச – ‘‘ஏஸோ கோ², ஆவுஸோ, உபாஸகோ பி⁴க்கூ²னங் வெய்யாவச்சகரோ’’தி. அத² கோ² ஸோ தூ³தோ தங் உபாஸகங் ஸஞ்ஞாபெத்வா யேனாயஸ்மா உபனந்தோ³ ஸக்யபுத்தோ தேனுபஸங்கமி ; உபஸங்கமித்வா ஆயஸ்மந்தங் உபனந்த³ங் ஸக்யபுத்தங் ஏதத³வோச – ‘‘யங் கோ², ப⁴ந்தே, ஆயஸ்மா வெய்யாவச்சகரங் நித்³தி³ஸி ஸஞ்ஞத்தோ ஸோ மயா. உபஸங்கமது ஆயஸ்மா காலேன, சீவரேன தங் அச்சா²தெ³ஸ்ஸதீ’’தி.
537. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmato upanandassa sakyaputtassa upaṭṭhāko mahāmatto āyasmato upanandassa sakyaputtassa dūtena cīvaracetāpannaṃ pāhesi – ‘‘iminā cīvaracetāpannena cīvaraṃ cetāpetvā ayyaṃ upanandaṃ cīvarena acchādehī’’ti. Atha kho so dūto yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ etadavoca – ‘‘idaṃ kho, bhante, āyasmantaṃ uddissa cīvaracetāpannaṃ ābhataṃ. Paṭiggaṇhātu āyasmā cīvaracetāpanna’’nti. Evaṃ vutte āyasmā upanando sakyaputto taṃ dūtaṃ etadavoca – ‘‘na kho mayaṃ, āvuso, cīvaracetāpannaṃ paṭiggaṇhāma, cīvarañca kho mayaṃ paṭiggaṇhāma kālena kappiya’’nti. Evaṃ vutte so dūto āyasmantaṃ upanandaṃ sakyaputtaṃ etadavoca – ‘‘atthi panāyasmato koci veyyāvaccakaro’’ti ? Tena kho pana samayena aññataro upāsako ārāmaṃ agamāsi kenacideva karaṇīyena. Atha kho āyasmā upanando sakyaputto taṃ dūtaṃ etadavoca – ‘‘eso kho, āvuso, upāsako bhikkhūnaṃ veyyāvaccakaro’’ti. Atha kho so dūto taṃ upāsakaṃ saññāpetvā yenāyasmā upanando sakyaputto tenupasaṅkami ; upasaṅkamitvā āyasmantaṃ upanandaṃ sakyaputtaṃ etadavoca – ‘‘yaṃ kho, bhante, āyasmā veyyāvaccakaraṃ niddisi saññatto so mayā. Upasaṅkamatu āyasmā kālena, cīvarena taṃ acchādessatī’’ti.
தேன கோ² பன ஸமயேன ஸோ மஹாமத்தோ ஆயஸ்மதோ உபனந்த³ஸ்ஸ ஸக்யபுத்தஸ்ஸ ஸந்திகே தூ³தங் பாஹேஸி – ‘‘பரிபு⁴ஞ்ஜது அய்யோ தங் சீவரங், இச்சா²ம மயங் அய்யேன தங் சீவரங் பரிபு⁴த்த’’ந்தி. அத² கோ² ஆயஸ்மா உபனந்தோ³ ஸக்யபுத்தோ தங் உபாஸகங் ந கிஞ்சி அவசாஸி. து³தியம்பி கோ² ஸோ மஹாமத்தோ ஆயஸ்மதோ உபனந்த³ஸ்ஸ ஸக்யபுத்தஸ்ஸ ஸந்திகே தூ³தங் பாஹேஸி – ‘‘பரிபு⁴ஞ்ஜது அய்யோ தங் சீவரங், இச்சா²ம மயங் அய்யேன தங் சீவரங் பரிபு⁴த்த’’ந்தி. து³தியம்பி கோ² ஆயஸ்மா உபனந்தோ³ ஸக்யபுத்தோ தங் உபாஸகங் ந கிஞ்சி அவசாஸி. ததியம்பி கோ² ஸோ மஹாமத்தோ ஆயஸ்மதோ உபனந்த³ஸ்ஸ ஸக்யபுத்தஸ்ஸ ஸந்திகே தூ³தங் பாஹேஸி – ‘‘பரிபு⁴ஞ்ஜது அய்யோ தங் சீவரங், இச்சா²ம மயங் அய்யேன தங் சீவரங் பரிபு⁴த்த’’ந்தி.
Tena kho pana samayena so mahāmatto āyasmato upanandassa sakyaputtassa santike dūtaṃ pāhesi – ‘‘paribhuñjatu ayyo taṃ cīvaraṃ, icchāma mayaṃ ayyena taṃ cīvaraṃ paribhutta’’nti. Atha kho āyasmā upanando sakyaputto taṃ upāsakaṃ na kiñci avacāsi. Dutiyampi kho so mahāmatto āyasmato upanandassa sakyaputtassa santike dūtaṃ pāhesi – ‘‘paribhuñjatu ayyo taṃ cīvaraṃ, icchāma mayaṃ ayyena taṃ cīvaraṃ paribhutta’’nti. Dutiyampi kho āyasmā upanando sakyaputto taṃ upāsakaṃ na kiñci avacāsi. Tatiyampi kho so mahāmatto āyasmato upanandassa sakyaputtassa santike dūtaṃ pāhesi – ‘‘paribhuñjatu ayyo taṃ cīvaraṃ, icchāma mayaṃ ayyena taṃ cīvaraṃ paribhutta’’nti.
தேன கோ² பன ஸமயேன நேக³மஸ்ஸ ஸமயோ ஹோதி. நேக³மேன ச கதிகா கதா ஹோதி – ‘‘யோ பச்சா² ஆக³ச்ச²தி பஞ்ஞாஸங் ப³த்³தோ⁴’’தி. அத² கோ² ஆயஸ்மா உபனந்தோ³ ஸக்யபுத்தோ யேன ஸோ உபாஸகோ தேனுபஸங்கமி; உபஸங்கமித்வா தங் உபாஸகங் ஏதத³வோச – ‘‘அத்தோ² மே, ஆவுஸோ, சீவரேனா’’தி. ‘‘அஜ்ஜண்ஹோ, ப⁴ந்தே , ஆக³மேஹி, அஜ்ஜ நேக³மஸ்ஸ ஸமயோ. நேக³மேன ச கதிகா கதா ஹோதி – ‘யோ பச்சா² ஆக³ச்ச²தி பஞ்ஞாஸங் ப³த்³தோ⁴’’’தி. ‘‘அஜ்ஜேவ மே, ஆவுஸோ, சீவரங் தே³ஹீ’’தி ஓவட்டிகாய பராமஸி. அத² கோ² ஸோ உபாஸகோ ஆயஸ்மதா உபனந்தே³ன ஸக்யபுத்தேன நிப்பீளியமானோ ஆயஸ்மதோ உபனந்த³ஸ்ஸ ஸக்யபுத்தஸ்ஸ சீவரங் சேதாபெத்வா பச்சா² அக³மாஸி. மனுஸ்ஸா தங் உபாஸகங் ஏதத³வோசுங் – ‘‘கிஸ்ஸ த்வங், அய்யோ, பச்சா² ஆக³தோ, பஞ்ஞாஸங் ஜீனோஸீ’’தி.
Tena kho pana samayena negamassa samayo hoti. Negamena ca katikā katā hoti – ‘‘yo pacchā āgacchati paññāsaṃ baddho’’ti. Atha kho āyasmā upanando sakyaputto yena so upāsako tenupasaṅkami; upasaṅkamitvā taṃ upāsakaṃ etadavoca – ‘‘attho me, āvuso, cīvarenā’’ti. ‘‘Ajjaṇho, bhante , āgamehi, ajja negamassa samayo. Negamena ca katikā katā hoti – ‘yo pacchā āgacchati paññāsaṃ baddho’’’ti. ‘‘Ajjeva me, āvuso, cīvaraṃ dehī’’ti ovaṭṭikāya parāmasi. Atha kho so upāsako āyasmatā upanandena sakyaputtena nippīḷiyamāno āyasmato upanandassa sakyaputtassa cīvaraṃ cetāpetvā pacchā agamāsi. Manussā taṃ upāsakaṃ etadavocuṃ – ‘‘kissa tvaṃ, ayyo, pacchā āgato, paññāsaṃ jīnosī’’ti.
அத² கோ² ஸோ உபாஸகோ தேஸங் மனுஸ்ஸானங் ஏதமத்த²ங் ஆரோசேஸி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘மஹிச்சா² இமே ஸமணா ஸக்யபுத்தியா அஸந்துட்டா² . நயிமேஸங் ஸுகரங் வெய்யாவச்சம்பி காதுங். கத²ஞ்ஹி நாம ஆயஸ்மா உபனந்தோ³ உபாஸகேன – ‘அஜ்ஜண்ஹோ, ப⁴ந்தே, ஆக³மேஹீ’தி வுச்சமானோ நாக³மெஸ்ஸதீ’’தி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ உபாஸகேன – ‘அஜ்ஜண்ஹோ, ப⁴ந்தே, ஆக³மேஹீ’தி வுச்சமானோ நாக³மெஸ்ஸதீ’’தி! அத² கோ² தே பி⁴க்கூ² ஆயஸ்மந்தங் உபனந்த³ங் ஸக்யபுத்தங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர த்வங், உபனந்த³, உபாஸகேன – ‘அஜ்ஜண்ஹோ, ப⁴ந்தே, ஆக³மேஹீ’தி வுச்சமானோ நாக³மேஸீ’’தி ? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம த்வங், மோக⁴புரிஸ, உபாஸகேன – ‘அஜ்ஜண்ஹோ, ப⁴ந்தே, ஆக³மேஹீ’தி வுச்சமானோ நாக³மெஸ்ஸஸி! நேதங், மோக⁴புரிஸ, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Atha kho so upāsako tesaṃ manussānaṃ etamatthaṃ ārocesi. Manussā ujjhāyanti khiyyanti vipācenti – ‘‘mahicchā ime samaṇā sakyaputtiyā asantuṭṭhā . Nayimesaṃ sukaraṃ veyyāvaccampi kātuṃ. Kathañhi nāma āyasmā upanando upāsakena – ‘ajjaṇho, bhante, āgamehī’ti vuccamāno nāgamessatī’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā… te ujjhāyanti khiyyanti vipācenti – ‘‘kathañhi nāma āyasmā upanando sakyaputto upāsakena – ‘ajjaṇho, bhante, āgamehī’ti vuccamāno nāgamessatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, upāsakena – ‘ajjaṇho, bhante, āgamehī’ti vuccamāno nāgamesī’’ti ? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, upāsakena – ‘ajjaṇho, bhante, āgamehī’ti vuccamāno nāgamessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
538. ‘‘பி⁴க்கு²ங் பனேவ உத்³தி³ஸ்ஸ ராஜா வா ராஜபொ⁴க்³கோ³ வா ப்³ராஹ்மணோ வா க³ஹபதிகோ வா தூ³தேன சீவரசேதாபன்னங் பஹிணெய்ய – ‘இமினா சீவரசேதாபன்னேன சீவரங் சேதாபெத்வா இத்த²ன்னாமங் பி⁴க்கு²ங் சீவரேன அச்சா²தே³ஹீ’தி. ஸோ சே தூ³தோ தங் பி⁴க்கு²ங் உபஸங்கமித்வா ஏவங் வதெ³ய்ய – ‘இத³ங் கோ², ப⁴ந்தே, ஆயஸ்மந்தங் உத்³தி³ஸ்ஸ சீவரசேதாபன்னங் ஆப⁴தங், படிக்³க³ண்ஹாது ஆயஸ்மா சீவரசேதாபன்ன’ந்தி, தேன பி⁴க்கு²னா ஸோ தூ³தோ ஏவமஸ்ஸ வசனீயோ – ‘ந கோ² மயங், ஆவுஸோ, சீவரசேதாபன்னங் படிக்³க³ண்ஹாம. சீவரஞ்ச கோ² மயங் படிக்³க³ண்ஹாம, காலேன கப்பிய’ந்தி. ஸோ சே தூ³தோ தங் பி⁴க்கு²ங் ஏவங் வதெ³ய்ய – ‘அத்தி² பனாயஸ்மதோ கோசி வெய்யாவச்சகரோ’தி, சீவரத்தி²கேன, பி⁴க்க²வே, பி⁴க்கு²னா வெய்யாவச்சகரோ நித்³தி³ஸிதப்³போ³ ஆராமிகோ வா உபாஸகோ வா – ‘ஏஸோ கோ², ஆவுஸோ, பி⁴க்கூ²னங் வெய்யாவச்சகரோ’தி. ஸோ சே தூ³தோ தங் வெய்யாவச்சகரங் ஸஞ்ஞாபெத்வா தங் பி⁴க்கு²ங் உபஸங்கமித்வா ஏவங் வதெ³ய்ய – ‘யங் கோ², ப⁴ந்தே, ஆயஸ்மா வெய்யாவச்சகரங் நித்³தி³ஸி ஸஞ்ஞத்தோ ஸோ மயா, உபஸங்கமது ஆயஸ்மா காலேன, சீவரேன தங் அச்சா²தெ³ஸ்ஸதீ’தி, சீவரத்தி²கேன, பி⁴க்க²வே, பி⁴க்கு²னா வெய்யாவச்சகரோ உபஸங்கமித்வா த்³வத்திக்க²த்துங் சோதே³தப்³போ³ ஸாரேதப்³போ³ – ‘அத்தோ² மே, ஆவுஸோ, சீவரேனா’தி. த்³வத்திக்க²த்துங் சோத³யமானோ ஸாரயமானோ தங் சீவரங் அபி⁴னிப்பா²தெ³ய்ய, இச்சேதங் குஸலங்; நோ சே அபி⁴னிப்பா²தெ³ய்ய, சதுக்க²த்துங் பஞ்சக்க²த்துங் ச²க்க²த்துபரமங் துண்ஹீபூ⁴தேன உத்³தி³ஸ்ஸ டா²தப்³ப³ங். சதுக்க²த்துங் பஞ்சக்க²த்துங் ச²க்க²த்துபரமங் துண்ஹீபூ⁴தோ உத்³தி³ஸ்ஸ திட்ட²மானோ தங் சீவரங் அபி⁴னிப்பா²தெ³ய்ய, இச்சேதங் குஸலங்; ததோ சே உத்தரி வாயமமானோ தங் சீவர அபி⁴னிப்பா²தெ³ய்ய, நிஸ்ஸக்³கி³யங் பாசித்தியங். நோ சே அபி⁴னிப்பா²தெ³ய்ய, யதஸ்ஸ சீவரசேதாபன்னங் ஆப⁴தங், தத்த² ஸாமங் வா க³ந்தப்³ப³ங் தூ³தோ வா பாஹேதப்³போ³ – ‘யங் கோ² தும்ஹே ஆயஸ்மந்தோ பி⁴க்கு²ங் உத்³தி³ஸ்ஸ சீவரசேதாபன்னங் பஹிணித்த², ந தங் தஸ்ஸ பி⁴க்கு²னோ கிஞ்சி அத்த²ங் அனுபோ⁴தி, யுஞ்ஜந்தாயஸ்மந்தோ ஸகங், மா வோ ஸகங் வினஸ்ஸா’தி, அயங் தத்த² ஸாமீசீ’’தி.
538.‘‘Bhikkhuṃ paneva uddissa rājā vā rājabhoggo vā brāhmaṇo vā gahapatiko vā dūtena cīvaracetāpannaṃ pahiṇeyya – ‘iminā cīvaracetāpannena cīvaraṃ cetāpetvā itthannāmaṃ bhikkhuṃ cīvarena acchādehī’ti. So ce dūto taṃ bhikkhuṃ upasaṅkamitvā evaṃ vadeyya – ‘idaṃ kho, bhante, āyasmantaṃ uddissa cīvaracetāpannaṃ ābhataṃ, paṭiggaṇhātu āyasmā cīvaracetāpanna’nti, tena bhikkhunā so dūto evamassa vacanīyo – ‘na kho mayaṃ, āvuso, cīvaracetāpannaṃ paṭiggaṇhāma. Cīvarañca kho mayaṃ paṭiggaṇhāma, kālena kappiya’nti. So ce dūto taṃ bhikkhuṃ evaṃ vadeyya – ‘atthi panāyasmato koci veyyāvaccakaro’ti, cīvaratthikena, bhikkhave, bhikkhunā veyyāvaccakaro niddisitabbo ārāmiko vā upāsako vā – ‘eso kho, āvuso, bhikkhūnaṃ veyyāvaccakaro’ti. So ce dūto taṃ veyyāvaccakaraṃ saññāpetvā taṃ bhikkhuṃ upasaṅkamitvā evaṃ vadeyya – ‘yaṃ kho, bhante, āyasmā veyyāvaccakaraṃ niddisi saññatto so mayā, upasaṅkamatu āyasmā kālena, cīvarena taṃ acchādessatī’ti, cīvaratthikena, bhikkhave, bhikkhunā veyyāvaccakaro upasaṅkamitvā dvattikkhattuṃ codetabbo sāretabbo – ‘attho me, āvuso, cīvarenā’ti. Dvattikkhattuṃ codayamāno sārayamāno taṃ cīvaraṃ abhinipphādeyya, iccetaṃ kusalaṃ; no ce abhinipphādeyya, catukkhattuṃpañcakkhattuṃ chakkhattuparamaṃ tuṇhībhūtena uddissa ṭhātabbaṃ. Catukkhattuṃ pañcakkhattuṃ chakkhattuparamaṃ tuṇhībhūto uddissa tiṭṭhamāno taṃ cīvaraṃ abhinipphādeyya, iccetaṃ kusalaṃ; tato ce uttarivāyamamāno taṃ cīvara abhinipphādeyya, nissaggiyaṃ pācittiyaṃ. No ce abhinipphādeyya, yatassa cīvaracetāpannaṃ ābhataṃ, tattha sāmaṃ vā gantabbaṃ dūto vā pāhetabbo – ‘yaṃ kho tumhe āyasmanto bhikkhuṃ uddissa cīvaracetāpannaṃ pahiṇittha, na taṃ tassa bhikkhuno kiñci atthaṃ anubhoti, yuñjantāyasmanto sakaṃ, mā vo sakaṃ vinassā’ti, ayaṃ tattha sāmīcī’’ti.
539. பி⁴க்கு²ங் பனேவ உத்³தி³ஸ்ஸாதி பி⁴க்கு²ஸ்ஸத்தா²ய, பி⁴க்கு²ங் ஆரம்மணங் கரித்வா , பி⁴க்கு²ங் அச்சா²தே³துகாமோ.
539.Bhikkhuṃ paneva uddissāti bhikkhussatthāya, bhikkhuṃ ārammaṇaṃ karitvā , bhikkhuṃ acchādetukāmo.
ராஜா நாம யோ கோசி ரஜ்ஜங் காரேதி.
Rājā nāma yo koci rajjaṃ kāreti.
ராஜபொ⁴க்³கோ³ நாம யோ கோசி ரஞ்ஞோ ப⁴த்தவேதனாஹாரோ.
Rājabhoggo nāma yo koci rañño bhattavetanāhāro.
ப்³ராஹ்மணோ நாம ஜாதியா ப்³ராஹ்மணோ.
Brāhmaṇo nāma jātiyā brāhmaṇo.
க³ஹபதிகோ நாம ட²பெத்வா ராஜங் ராஜபொ⁴க்³க³ங் ப்³ராஹ்மணங் அவஸேஸோ க³ஹபதிகோ நாம.
Gahapatiko nāma ṭhapetvā rājaṃ rājabhoggaṃ brāhmaṇaṃ avaseso gahapatiko nāma.
சீவரசேதாபன்னங் நாம ஹிரஞ்ஞங் வா ஸுவண்ணங் வா முத்தா வா மணி வா.
Cīvaracetāpannaṃ nāma hiraññaṃ vā suvaṇṇaṃ vā muttā vā maṇi vā.
இமினா சீவரசேதாபன்னேனாதி பச்சுபட்டி²தேன.
Iminā cīvaracetāpannenāti paccupaṭṭhitena.
சேதாபெத்வாதி பரிவத்தெத்வா.
Cetāpetvāti parivattetvā.
அச்சா²தே³ஹீதி த³ஜ்ஜேஹி.
Acchādehīti dajjehi.
ஸோ சே தூ³தோ தங் பி⁴க்கு²ங் உபஸங்கமித்வா ஏவங் வதெ³ய்ய – ‘‘இத³ங் கோ², ப⁴ந்தே, ஆயஸ்மந்தங் உத்³தி³ஸ்ஸ சீவரசேதாபன்னங் ஆப⁴தங். படிக்³க³ண்ஹாது ஆயஸ்மா சீவரசேதாபன்ன’’ந்தி, தேன பி⁴க்கு²னா ஸோ தூ³தோ ஏவமஸ்ஸ வசனீயோ – ‘‘ந கோ² மயங், ஆவுஸோ, சீவரசேதாபன்னங் படிக்³க³ண்ஹாம. சீவரஞ்ச கோ² மயங் படிக்³க³ண்ஹாம, காலேன கப்பிய’’ந்தி. ஸோ சே தூ³தோ தங் பி⁴க்கு²ங் ஏவங் வதெ³ய்ய – ‘‘அத்தி² பனாயஸ்மதோ கோசி வெய்யாவச்சகரோ’’தி? சீவரத்தி²கேன, பி⁴க்க²வே, பி⁴க்கு²னா வெய்யாவச்சகரோ நித்³தி³ஸிதப்³போ³ ஆராமிகோ வா உபாஸகோ வா – ‘‘ஏஸோ கோ², ஆவுஸோ , பி⁴க்கூ²னங் வெய்யாவச்சகரோ’’தி. ந வத்தப்³போ³ – ‘‘தஸ்ஸ தே³ஹீதி வா, ஸோ வா நிக்கி²பிஸ்ஸதி, ஸோ வா பரிவத்தெஸ்ஸதி, ஸோ வா சேதாபெஸ்ஸதீ’’தி.
So ce dūto taṃ bhikkhuṃ upasaṅkamitvā evaṃ vadeyya – ‘‘idaṃ kho, bhante, āyasmantaṃ uddissa cīvaracetāpannaṃ ābhataṃ. Paṭiggaṇhātu āyasmā cīvaracetāpanna’’nti, tena bhikkhunā so dūto evamassa vacanīyo – ‘‘na kho mayaṃ, āvuso, cīvaracetāpannaṃ paṭiggaṇhāma. Cīvarañca kho mayaṃ paṭiggaṇhāma, kālena kappiya’’nti. So ce dūto taṃ bhikkhuṃ evaṃ vadeyya – ‘‘atthi panāyasmato koci veyyāvaccakaro’’ti? Cīvaratthikena, bhikkhave, bhikkhunā veyyāvaccakaro niddisitabbo ārāmiko vā upāsako vā – ‘‘eso kho, āvuso , bhikkhūnaṃ veyyāvaccakaro’’ti. Na vattabbo – ‘‘tassa dehīti vā, so vā nikkhipissati, so vā parivattessati, so vā cetāpessatī’’ti.
ஸோ சே தூ³தோ தங் வெய்யாவச்சகரங் ஸஞ்ஞாபெத்வா தங் பி⁴க்கு²ங் உபஸங்கமித்வா ஏவங் வதெ³ய்ய – ‘‘யங் கோ², ப⁴ந்தே, ஆயஸ்மா வெய்யாவச்சகரங் நித்³தி³ஸி ஸஞ்ஞத்தோ ஸோ மயா. உபஸங்கமது ஆயஸ்மா காலேன, சீவரேன தங் அச்சா²தெ³ஸ்ஸதீ’’தி, சீவரத்தி²கேன, பி⁴க்க²வே, பி⁴க்கு²னா வெய்யாவச்சகரோ உபஸங்கமித்வா த்³வத்திக்க²த்துங் சோதே³தப்³போ³ ஸாரேதப்³போ³ – ‘‘அத்தோ² மே, ஆவுஸோ, சீவரேனா’’தி. ந வத்தப்³போ³ – ‘‘தே³ஹி மே சீவரங், ஆஹர மே சீவரங், பரிவத்தேஹி மே சீவரங், சேதாபேஹி மே சீவர’’ந்தி. து³தியம்பி வத்தப்³போ³. ததியம்பி வத்தப்³போ³. ஸசே அபி⁴னிப்பா²தே³தி, இச்சேதங் குஸலங்; நோ சே அபி⁴னிப்பா²தே³தி, தத்த² க³ந்த்வா துண்ஹீபூ⁴தேன உத்³தி³ஸ்ஸ டா²தப்³ப³ங். ந ஆஸனே நிஸீதி³தப்³ப³ங். ந ஆமிஸங் படிக்³க³ஹேதப்³ப³ங். ந த⁴ம்மோ பா⁴ஸிதப்³போ³. ‘‘கிங் காரணா ஆக³தோஸீ’’தி புச்சி²யமானோ ‘‘ஜானாஹி, ஆவுஸோ’’தி வத்தப்³போ³. ஸசே ஆஸனே வா நிஸீத³தி , ஆமிஸங் வா படிக்³க³ண்ஹாதி, த⁴ம்மங் வா பா⁴ஸதி, டா²னங் ப⁴ஞ்ஜதி. து³தியம்பி டா²தப்³ப³ங். ததியம்பி டா²தப்³ப³ங். சதுக்க²த்துங் சோதெ³த்வா சதுக்க²த்துங் டா²தப்³ப³ங். பஞ்சக்க²துங் சோதெ³த்வா த்³விக்க²த்துங் டா²தப்³ப³ங். ச²க்க²த்துங் சோதெ³த்வா ந டா²தப்³ப³ங். ததோ சே உத்தரி வாயமமானோ தங் சீவரங் அபி⁴னிப்பா²தே³தி, பயோகே³ து³க்கடங். படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே , ப⁴ந்தே, சீவரங் அதிரேகதிக்க²த்துங் சோத³னாய அதிரேகச²க்க²த்துங் டா²னேன அபி⁴னிப்பா²தி³தங் நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
So ce dūto taṃ veyyāvaccakaraṃ saññāpetvā taṃ bhikkhuṃ upasaṅkamitvā evaṃ vadeyya – ‘‘yaṃ kho, bhante, āyasmā veyyāvaccakaraṃ niddisi saññatto so mayā. Upasaṅkamatu āyasmā kālena, cīvarena taṃ acchādessatī’’ti, cīvaratthikena, bhikkhave, bhikkhunā veyyāvaccakaro upasaṅkamitvā dvattikkhattuṃ codetabbo sāretabbo – ‘‘attho me, āvuso, cīvarenā’’ti. Na vattabbo – ‘‘dehi me cīvaraṃ, āhara me cīvaraṃ, parivattehi me cīvaraṃ, cetāpehi me cīvara’’nti. Dutiyampi vattabbo. Tatiyampi vattabbo. Sace abhinipphādeti, iccetaṃ kusalaṃ; no ce abhinipphādeti, tattha gantvā tuṇhībhūtena uddissa ṭhātabbaṃ. Na āsane nisīditabbaṃ. Na āmisaṃ paṭiggahetabbaṃ. Na dhammo bhāsitabbo. ‘‘Kiṃ kāraṇā āgatosī’’ti pucchiyamāno ‘‘jānāhi, āvuso’’ti vattabbo. Sace āsane vā nisīdati , āmisaṃ vā paṭiggaṇhāti, dhammaṃ vā bhāsati, ṭhānaṃ bhañjati. Dutiyampi ṭhātabbaṃ. Tatiyampi ṭhātabbaṃ. Catukkhattuṃ codetvā catukkhattuṃ ṭhātabbaṃ. Pañcakkhatuṃ codetvā dvikkhattuṃ ṭhātabbaṃ. Chakkhattuṃ codetvā na ṭhātabbaṃ. Tato ce uttari vāyamamāno taṃ cīvaraṃ abhinipphādeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me , bhante, cīvaraṃ atirekatikkhattuṃ codanāya atirekachakkhattuṃ ṭhānena abhinipphāditaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
நோ சே அபி⁴னிப்பா²தெ³ய்ய, யதஸ்ஸ சீவரசேதாபன்னங் ஆப⁴தங் தத்த² ஸாமங் வா க³ந்தப்³ப³ங் தூ³தோ வா பாஹேதப்³போ³ – ‘‘யங் கோ² தும்ஹே ஆயஸ்மந்தோ பி⁴க்கு²ங் உத்³தி³ஸ்ஸ சீவரசேதாபன்னங் பஹிணித்த² ந தங் தஸ்ஸ பி⁴க்கு²னோ கிஞ்சி அத்த²ங் அனுபோ⁴தி. யுஞ்ஜந்தாயஸ்மந்தோ ஸகங், மா வோ ஸகங் வினஸ்ஸா’’தி.
No ce abhinipphādeyya, yatassa cīvaracetāpannaṃ ābhataṃ tattha sāmaṃ vā gantabbaṃ dūto vā pāhetabbo – ‘‘yaṃ kho tumhe āyasmanto bhikkhuṃ uddissa cīvaracetāpannaṃ pahiṇittha na taṃ tassa bhikkhuno kiñci atthaṃ anubhoti. Yuñjantāyasmanto sakaṃ, mā vo sakaṃ vinassā’’ti.
அயங் தத்த² ஸாமீசீதி அயங் தத்த² அனுத⁴ம்மதா.
Ayaṃ tattha sāmīcīti ayaṃ tattha anudhammatā.
540. அதிரேகதிக்க²த்துங் சோத³னாய அதிரேகச²க்க²த்துங் டா²னேன அதிரேகஸஞ்ஞீ அபி⁴னிப்பா²தே³தி, நிஸ்ஸக்³கி³யங் பாசித்தியங். அதிரேகதிக்க²த்துங் சோத³னாய அதிரேகச²க்க²த்துங் டா²னேன வேமதிகோ அபி⁴னிப்பா²தே³தி, நிஸ்ஸக்³கி³யங் பாசித்தியங். அதிரேகதிக்க²த்துங் சோத³னாய அதிரேகச²க்க²த்துங் டா²னேன ஊனகஸஞ்ஞீ அபி⁴னிப்பா²தே³தி, நிஸ்ஸக்³கி³யங் பாசித்தியங்.
540. Atirekatikkhattuṃ codanāya atirekachakkhattuṃ ṭhānena atirekasaññī abhinipphādeti, nissaggiyaṃ pācittiyaṃ. Atirekatikkhattuṃ codanāya atirekachakkhattuṃ ṭhānena vematiko abhinipphādeti, nissaggiyaṃ pācittiyaṃ. Atirekatikkhattuṃ codanāya atirekachakkhattuṃ ṭhānena ūnakasaññī abhinipphādeti, nissaggiyaṃ pācittiyaṃ.
ஊனகதிக்க²த்துங் சோத³னாய ஊனகச²க்க²த்துங் டா²னேன அதிரேகஸஞ்ஞீ, ஆபத்தி து³க்கடஸ்ஸ. ஊனகதிக்க²த்துங் சோத³னாய ஊனகச²க்க²த்துங் டா²னேன வேமதிகோ, ஆபத்தி து³க்கடஸ்ஸ. ஊனகதிக்க²த்துங் சோத³னாய ஊனகச²க்க²த்துங் டா²னேன ஊனகஸஞ்ஞீ அனாபத்தி.
Ūnakatikkhattuṃ codanāya ūnakachakkhattuṃ ṭhānena atirekasaññī, āpatti dukkaṭassa. Ūnakatikkhattuṃ codanāya ūnakachakkhattuṃ ṭhānena vematiko, āpatti dukkaṭassa. Ūnakatikkhattuṃ codanāya ūnakachakkhattuṃ ṭhānena ūnakasaññī anāpatti.
541. அனாபத்தி – திக்க²த்துங் சோத³னாய, ச²க்க²த்துங் டா²னேன, ஊனகதிக்க²த்துங் சோத³னாய, ஊனகச²க்க²த்துங் டா²னேன, அசோதி³யமானோ தே³தி, ஸாமிகா சோதெ³த்வா தெ³ந்தி, உம்மத்தகஸ்ஸ, ஆதி³கம்மிகஸ்ஸாதி.
541. Anāpatti – tikkhattuṃ codanāya, chakkhattuṃ ṭhānena, ūnakatikkhattuṃ codanāya, ūnakachakkhattuṃ ṭhānena, acodiyamāno deti, sāmikā codetvā denti, ummattakassa, ādikammikassāti.
ராஜஸிக்கா²பத³ங் நிட்டி²தங் த³ஸமங்.
Rājasikkhāpadaṃ niṭṭhitaṃ dasamaṃ.
கதி²னவக்³கோ³ பட²மோ.
Kathinavaggo paṭhamo.
தஸ்ஸுத்³தா³னங் –
Tassuddānaṃ –
உப்³ப⁴தங் கதி²னங் தீணி, தோ⁴வனஞ்ச படிக்³க³ஹோ;
Ubbhataṃ kathinaṃ tīṇi, dhovanañca paṭiggaho;
அஞ்ஞாதகானி தீணேவ, உபி⁴ன்னங் தூ³தகேன சாதி.
Aññātakāni tīṇeva, ubhinnaṃ dūtakena cāti.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
