| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
10. ராஜஸிக்கா²பத³வண்ணனா
10. Rājasikkhāpadavaṇṇanā
ராஜதோ பொ⁴க்³க³ந்தி ராஜதோ லத்³த⁴பொ⁴க்³க³ங். ராஜபொ⁴க்³கோ³தி ராஜாமத்தோ. ராஜதோ போ⁴கோ³தி ரஞ்ஞா தி³ன்னங் இஸ்ஸரியங். இமினாதிஆதீ³தி ‘‘இமினா சீவரசேதாபன்னேன சீவரங் சேதாபெத்வா இத்த²ன்னாமங் பி⁴க்கு²ங் சீவரேன அச்சா²தே³ஹீ’’தி இத³ங். ஆக³மனஸுத்³தி⁴ந்தி மூலஸுத்³தி⁴ங். யதி³ ஹி இமினா கப்பியனீஹாரேன அபேஸெத்வா ‘‘இத³ங் இத்த²ன்னாமஸ்ஸ பி⁴க்கு²னோ தே³ஹீ’’தி பேஸெய்ய, ஸோபி தூ³தோ தங் பி⁴க்கு²ங் உபஸங்கமித்வா ஏவங் வதெ³ய்ய ‘‘இத³ங் கோ², ப⁴ந்தே, ஆயஸ்மந்தங் உத்³தி³ஸ்ஸ சீவரசேதாபன்னங் ஆப⁴தங், படிக்³க³ண்ஹாது ஆயஸ்மா சீவரசேதாபன்ன’’ந்தி (பாரா॰ 538), ததா³ படிக்கி²பித்வாபி கப்பியகாரகங் புட்டே²ன தங் நித்³தி³ஸிதுங் ந வட்டதி. தேனாஹ ‘‘ஸசே ஹீ’’திஆதி³. அகப்பியவத்து²ங் ஆரப்³பா⁴தி ஹிரஞ்ஞாதி³ங் ஆரப்³ப⁴. ஈதி³ஸேன தூ³தவசனேனாதி ‘‘படிக்³க³ண்ஹாது ஆயஸ்மா சீவரசேதாபன்ன’’ந்தி ஏவரூபேன தூ³தவசனேன. தஸ்மாதி யஸ்மா ஸம்படிச்சி²துங் அகப்பியங் ஹோதி, தஸ்மா. ஸுவண்ணந்தி ஜாதரூபங். ரஜதந்தி ரூபியங். கஹாபணேனாதி ஸுவண்ணமயோ வா ரூபியமயோ வா பாகதிகோ வா கஹாபணோ. மாஸகோதி லோஹமாஸகோ வா ஹோது, தா³ருமாஸகோ வா ஹோது, ஜதுமாஸகோ வா ஹோது, யோ யோ யத்த² யத்த² ஜனபதே³ யதா³ யதா³ வோஹாரங் க³ச்ச²தி, அந்தமஸோ அட்டி²மயோபி சம்மமயோபி ருக்க²ப²லபீ³ஜமயோபி ஸமுட்டா²பிதரூபோபி அஸமுட்டா²பிதரூபோபி ஸப்³போ³ இத⁴ மாஸகோதி வேதி³தப்³போ³. எத்த² ச யங் வத்தப்³ப³ங், தங் ரூபியஸிக்கா²பதே³ வக்கா²ம.
Rājatobhogganti rājato laddhabhoggaṃ. Rājabhoggoti rājāmatto. Rājato bhogoti raññā dinnaṃ issariyaṃ. Iminātiādīti ‘‘iminā cīvaracetāpannena cīvaraṃ cetāpetvā itthannāmaṃ bhikkhuṃ cīvarena acchādehī’’ti idaṃ. Āgamanasuddhinti mūlasuddhiṃ. Yadi hi iminā kappiyanīhārena apesetvā ‘‘idaṃ itthannāmassa bhikkhuno dehī’’ti peseyya, sopi dūto taṃ bhikkhuṃ upasaṅkamitvā evaṃ vadeyya ‘‘idaṃ kho, bhante, āyasmantaṃ uddissa cīvaracetāpannaṃ ābhataṃ, paṭiggaṇhātu āyasmā cīvaracetāpanna’’nti (pārā. 538), tadā paṭikkhipitvāpi kappiyakārakaṃ puṭṭhena taṃ niddisituṃ na vaṭṭati. Tenāha ‘‘sace hī’’tiādi. Akappiyavatthuṃ ārabbhāti hiraññādiṃ ārabbha. Īdisena dūtavacanenāti ‘‘paṭiggaṇhātu āyasmā cīvaracetāpanna’’nti evarūpena dūtavacanena. Tasmāti yasmā sampaṭicchituṃ akappiyaṃ hoti, tasmā. Suvaṇṇanti jātarūpaṃ. Rajatanti rūpiyaṃ. Kahāpaṇenāti suvaṇṇamayo vā rūpiyamayo vā pākatiko vā kahāpaṇo. Māsakoti lohamāsako vā hotu, dārumāsako vā hotu, jatumāsako vā hotu, yo yo yattha yattha janapade yadā yadā vohāraṃ gacchati, antamaso aṭṭhimayopi cammamayopi rukkhaphalabījamayopi samuṭṭhāpitarūpopi asamuṭṭhāpitarūpopi sabbo idha māsakoti veditabbo. Ettha ca yaṃ vattabbaṃ, taṃ rūpiyasikkhāpade vakkhāma.
முத்தாதி ஹத்தி²கும்ப⁴ஜாதி³கா அட்ட²விதா⁴ முத்தா. ததா² ஹி ஹத்தி²கும்ப⁴ங் வராஹதா³ட²ங், பு⁴ஜங்க³ஸீஸங், வலாஹகங், வேளு, மச்ச²ஸிரோ, ஸங்கோ², ஸிப்பீதி அட்ட² முத்தாயோனியோ. தத்த² யா மச்ச²ஸங்க²ஸிப்பிஜாதா, ஸா ஸாமுத்³தி³கா, பு⁴ஜங்க³ஜாபி காசி ஸாமுத்³தி³கா ஹோதி. இதரா அஸாமுத்³தி³கா. யஸ்மா பன ப³ஹுலங் ஸாமுத்³தி³காவ முத்தா லோகே தி³ஸ்ஸந்தி, தத்தா²பி ஸிப்பிஜாவ, இதரா கதா³சி. தஸ்மா ஸம்மோஹவினோத³னியங் ‘‘முத்தாதி ஸாமுத்³தி³கமுத்தா’’தி (விப⁴॰ அட்ட²॰ 172) வுத்தங். மணீதி ட²பெத்வா வேளுரியாதி³கே அந்தமஸோ ஜாதிப²லிகங் உபாதா³ய ஸப்³போ³பி நீலபீதாதி³வண்ணபே⁴தோ³ மணீதி வேதி³தப்³போ³, பசித்வா கதோ பன காசமணியேவேகோ பத்தாதி³ப⁴ண்ட³மூலத்த²ங் ஸம்படிச்சி²துங் வட்டதி. வேளுரியோ நாம வங்ஸவண்ணமணி. ஸங்கோ²தி த⁴மனஸங்கோ² தோ⁴தவித்³தோ⁴ ரதனமிஸ்ஸோ, பானீயஸங்கோ² பன ரதனாமிஸ்ஸகதோ, ஸோ ச அஞ்ஜனாதி³பே⁴ஸஜ்ஜத்தா²ய, ப⁴ண்ட³மூலத்தா²ய ச ஸம்படிச்சி²துங் வட்டதி. ஸிலாதி தோ⁴தவித்³தா⁴ ரதனஸங்யுத்தா முக்³க³வண்ணா ஸிலா. ரதனேன பன அமிஸ்ஸா ஸத்த²கனிஸானாதி³அத்தா²ய படிக்³க³ண்ஹிதுங் வட்டதி. எத்த² ச ‘‘ரதனஸங்யுத்தாதி ஸுவண்ணேன ஸத்³தி⁴ங் யோஜெத்வா பசித்வா கதா’’தி வத³ந்தி. பவாளந்தி தோ⁴தம்பி அதோ⁴தம்பி ஸப்³ப³ங் பவாளங். லோஹிதங்கோதி ரத்தமணி. மஸாரக³ல்லந்தி கப³ரமணி. யங் ‘‘மரகத’’ந்திபி வுச்சதி.
Muttāti hatthikumbhajādikā aṭṭhavidhā muttā. Tathā hi hatthikumbhaṃ varāhadāṭhaṃ, bhujaṅgasīsaṃ, valāhakaṃ, veḷu, macchasiro, saṅkho, sippīti aṭṭha muttāyoniyo. Tattha yā macchasaṅkhasippijātā, sā sāmuddikā, bhujaṅgajāpi kāci sāmuddikā hoti. Itarā asāmuddikā. Yasmā pana bahulaṃ sāmuddikāva muttā loke dissanti, tatthāpi sippijāva, itarā kadāci. Tasmā sammohavinodaniyaṃ ‘‘muttāti sāmuddikamuttā’’ti (vibha. aṭṭha. 172) vuttaṃ. Maṇīti ṭhapetvā veḷuriyādike antamaso jātiphalikaṃ upādāya sabbopi nīlapītādivaṇṇabhedo maṇīti veditabbo, pacitvā kato pana kācamaṇiyeveko pattādibhaṇḍamūlatthaṃ sampaṭicchituṃ vaṭṭati. Veḷuriyo nāma vaṃsavaṇṇamaṇi. Saṅkhoti dhamanasaṅkho dhotaviddho ratanamisso, pānīyasaṅkho pana ratanāmissakato, so ca añjanādibhesajjatthāya, bhaṇḍamūlatthāya ca sampaṭicchituṃ vaṭṭati. Silāti dhotaviddhā ratanasaṃyuttā muggavaṇṇā silā. Ratanena pana amissā satthakanisānādiatthāya paṭiggaṇhituṃ vaṭṭati. Ettha ca ‘‘ratanasaṃyuttāti suvaṇṇena saddhiṃ yojetvā pacitvā katā’’ti vadanti. Pavāḷanti dhotampi adhotampi sabbaṃ pavāḷaṃ. Lohitaṅkoti rattamaṇi. Masāragallanti kabaramaṇi. Yaṃ ‘‘marakata’’ntipi vuccati.
ஸத்த த⁴ஞ்ஞானீதி ஸானுலோமானி ஸாலிஆதீ³னி ஸத்த த⁴ஞ்ஞானி. நீவாராதி³உபத⁴ஞ்ஞஸ்ஸ பன ஸாலிஆதி³மூலத⁴ஞ்ஞந்தோக³த⁴த்தா ‘‘ஸத்த த⁴ஞ்ஞானீ’’தி வுத்தங். தா³ஸிதா³ஸகெ²த்தவத்து²புப்பா²ராமப²லாராமாத³யோதி எத்த² தா³ஸீ நாம அந்தோஜாதத⁴னக்கீதகரமரானீதப்பபே⁴தா³. ததா² தா³ஸோ. கெ²த்தங் நாம யஸ்மிங் புப்³ப³ண்ணங் ருஹதி. வத்து² நாம யஸ்மிங் அபரண்ணங் ருஹதி. யத்த² வா உப⁴யம்பி ருஹதி, தங் கெ²த்தங். தத³த்தா²ய அகதபூ⁴மிபா⁴கோ³ வத்து². கெ²த்தவத்து²ஸீஸேன செத்த² வாபிதளாகாதீ³னிபி ஸங்க³ஹிதானேவ. வஸ்ஸிகாதீ³னங் புப்ப²னகோ புப்பா²ராமோ. அம்ப³ப²லாதீ³னங் ப²லனகோ ப²லாராமோ. ந கேவலஞ்ச அத்தனோயேவத்தா²ய ஸம்படிச்சி²துங் ந வட்டதி, ஸசேபி கோசி ஜாதரூபரஜதங் ஆனெத்வா ‘‘இத³ங் ஸங்க⁴ஸ்ஸ த³ம்மி, ஆராமங் வா கரோத², சேதியங் வா போ⁴ஜனஸாலாதீ³னங் வா அஞ்ஞதர’’ந்தி வத³தி, இத³ம்பி ஸம்படிச்சி²துங் ந வட்டதி. ‘‘யஸ்ஸ கஸ்ஸசி ஹி அஞ்ஞஸ்ஸ அத்தா²ய ஸம்படிச்ச²ந்தஸ்ஸ து³க்கடங் ஹோதீ’’தி (பாரா॰ அட்ட²॰ 2.538-539) மஹாபச்சரியங் வுத்தங். தேனாஹ ‘‘சேதியஸங்க⁴க³ணபுக்³க³லானங் வா அத்தா²ய ஸம்படிச்சி²துங் ந வட்டந்தீ’’தி.
Satta dhaññānīti sānulomāni sāliādīni satta dhaññāni. Nīvārādiupadhaññassa pana sāliādimūladhaññantogadhattā ‘‘satta dhaññānī’’ti vuttaṃ. Dāsidāsakhettavatthupupphārāmaphalārāmādayoti ettha dāsī nāma antojātadhanakkītakaramarānītappabhedā. Tathā dāso. Khettaṃ nāma yasmiṃ pubbaṇṇaṃ ruhati. Vatthu nāma yasmiṃ aparaṇṇaṃ ruhati. Yattha vā ubhayampi ruhati, taṃ khettaṃ. Tadatthāya akatabhūmibhāgo vatthu. Khettavatthusīsena cettha vāpitaḷākādīnipi saṅgahitāneva. Vassikādīnaṃ pupphanako pupphārāmo. Ambaphalādīnaṃ phalanako phalārāmo. Na kevalañca attanoyevatthāya sampaṭicchituṃ na vaṭṭati, sacepi koci jātarūparajataṃ ānetvā ‘‘idaṃ saṅghassa dammi, ārāmaṃ vā karotha, cetiyaṃ vā bhojanasālādīnaṃ vā aññatara’’nti vadati, idampi sampaṭicchituṃ na vaṭṭati. ‘‘Yassa kassaci hi aññassa atthāya sampaṭicchantassa dukkaṭaṃ hotī’’ti (pārā. aṭṭha. 2.538-539) mahāpaccariyaṃ vuttaṃ. Tenāha ‘‘cetiyasaṅghagaṇapuggalānaṃ vā atthāya sampaṭicchituṃ na vaṭṭantī’’ti.
ஸசே பன ஸங்க⁴ங் வா க³ணங் வா புக்³க³லங் வா அனாமஸித்வா ‘‘இத³ங் ஹிரஞ்ஞஸுவண்ணங் சேதியஸ்ஸ தே³ம, விஹாரஸ்ஸ தே³ம, நவகம்மஸ்ஸ தே³மா’’தி வத³ந்தி, படிக்கி²பிதுங் ந வட்டதி. ‘‘இமே இத³ங் ப⁴ணந்தீ’’தி கப்பியகாரகானங் ஆசிக்கி²தப்³ப³ங். ‘‘சேதியாதீ³னங் அத்தா²ய தும்ஹே க³ஹெத்வா ட²பேதா²’’தி வுத்தே பன ‘‘அம்ஹாகங் க³ஹேதுங் ந வட்டதீ’’தி படிக்கி²பிதப்³ப³ங்.
Sace pana saṅghaṃ vā gaṇaṃ vā puggalaṃ vā anāmasitvā ‘‘idaṃ hiraññasuvaṇṇaṃ cetiyassa dema, vihārassa dema, navakammassa demā’’ti vadanti, paṭikkhipituṃ na vaṭṭati. ‘‘Ime idaṃ bhaṇantī’’ti kappiyakārakānaṃ ācikkhitabbaṃ. ‘‘Cetiyādīnaṃ atthāya tumhe gahetvā ṭhapethā’’ti vutte pana ‘‘amhākaṃ gahetuṃ na vaṭṭatī’’ti paṭikkhipitabbaṃ.
வெய்யாவச்சகரோதி கிச்சகரோ. இத⁴ பன ஸப்³போ³ கிச்சகரோவ ‘‘வெய்யாவச்சகரோ’’தி அதி⁴ப்பேதோதி ஆஹ ‘‘கப்பியகாரகோ’’தி. ஏஸோ கோ²தி ‘‘அஸுகவீதி²யங் அஸுகக⁴ரே அஸுகனாமோ’’தி பரம்முக²ங் வத³தி. இதரம்பீதி பரம்முகா²னித்³தி³ட்ட²ம்பி. ‘‘அத்தோ² மே, ஆவுஸோ, சீவரேனா’’தி ஏதங் சோத³னாலக்க²ணனித³ஸ்ஸனந்தி ஸம்ப³ந்தோ⁴. தத்த² சோத³னாலக்க²ணனித³ஸ்ஸனந்தி வாசாய சோத³னாலக்க²ணனித³ஸ்ஸனங். தேனாஹ ‘‘ஸசே ஹீ’’திஆதி³. இத³ங் வா வசனங் வத்தப்³ப³ந்தி ஸம்ப³ந்தோ⁴. ஏதஸ்ஸ வா அத்தோ² யாய காயசி பா⁴ஸாய வத்தப்³போ³தி ஸம்ப³ந்தோ⁴. ‘‘தே³ஹி மே சீவரங், ஆஹர மே சீவரங், பரிவத்தேஹி மே சீவரங், சேதாபேஹி மே சீவர’’ந்தி ஏதானி பன வசனானி ஏதேஸங் வா அத்தோ² யாய காயசி பா⁴ஸாய ந வத்தப்³போ³. தேனாஹ ‘‘தே³ஹி மே’’திஆதி³. ஸாதெ⁴ய்யாதி நிப்பா²தெ³ய்ய. இச்சேதங் குஸலந்தி ஏவங் யாவததியங் சோத³னேன தஸ்ஸ சீவரஸ்ஸ யதே³தங் அபி⁴னிப்பா²த³னங், ஏதங் குஸலங் ஸாது⁴ ஸுட்டூ²தி அத்தோ². தேனாஹ ‘‘ஏதங் ஸுந்த³ர’’ந்தி.
Veyyāvaccakaroti kiccakaro. Idha pana sabbo kiccakarova ‘‘veyyāvaccakaro’’ti adhippetoti āha ‘‘kappiyakārako’’ti. Eso khoti ‘‘asukavīthiyaṃ asukaghare asukanāmo’’ti parammukhaṃ vadati. Itarampīti parammukhāniddiṭṭhampi. ‘‘Attho me, āvuso, cīvarenā’’ti etaṃ codanālakkhaṇanidassananti sambandho. Tattha codanālakkhaṇanidassananti vācāya codanālakkhaṇanidassanaṃ. Tenāha ‘‘sace hī’’tiādi. Idaṃ vā vacanaṃ vattabbanti sambandho. Etassa vā attho yāya kāyaci bhāsāya vattabboti sambandho. ‘‘Dehi me cīvaraṃ, āhara me cīvaraṃ, parivattehi me cīvaraṃ, cetāpehi me cīvara’’nti etāni pana vacanāni etesaṃ vā attho yāya kāyaci bhāsāya na vattabbo. Tenāha ‘‘dehi me’’tiādi. Sādheyyāti nipphādeyya. Iccetaṃ kusalanti evaṃ yāvatatiyaṃ codanena tassa cīvarassa yadetaṃ abhinipphādanaṃ, etaṃ kusalaṃ sādhu suṭṭhūti attho. Tenāha ‘‘etaṃ sundara’’nti.
ச²க்க²த்துங் பரமோ பரிச்சே²தோ³ அஸ்ஸாதி ச²க்க²த்துபரமங். இத³ஞ்ஹி ‘‘டா²தப்³ப³’’ந்தி இமிஸ்ஸா கிரியாய விஸேஸனங், ச²க்க²த்துபரமங் டா²னங் காதப்³ப³ந்தி அத்தோ². தேனாஹ ‘‘பா⁴வனபுங்ஸகவசனமேத’’ந்தி, ஏதங் பா⁴வே டா²தப்³ப³ந்தி வுத்ததா⁴த்வத்த²மத்தே ஸாதே⁴தப்³பே³ நபுங்ஸகலிங்க³வசனந்தி அத்தோ². ந நிஸீதி³தப்³ப³ந்தி ‘‘இத⁴, ப⁴ந்தே, நிஸீத³தா²’’தி வுத்தேபி ந நிஸீதி³தப்³ப³ங் . ந ஆமிஸங் படிக்³க³ஹேதப்³ப³ந்தி யாகு³க²ஜ்ஜகாதி³பே⁴த³ங் கிஞ்சி ஆமிஸங் ‘‘க³ண்ஹத², ப⁴ந்தே’’தி யாசியமானேனாபி ந க³ண்ஹிதப்³ப³ங். ந த⁴ம்மோ பா⁴ஸிதப்³போ³தி (பாரா॰ அட்ட²॰ 2.538-539) ‘‘மங்க³லங் வா அனுமோத³னங் வா பா⁴ஸதா²’’தி யாசியமானேனாபி ந கிஞ்சி பா⁴ஸிதப்³ப³ங். டா²னங் ப⁴ஞ்ஜதீதி டி²திங் வினாஸேதி. ட²த்வா சீவரங் க³ஹேதுங் ஆக³தேன ஹி தங் உத்³தி³ஸ்ஸ துண்ஹீபூ⁴தேன டா²தப்³ப³மேவ, ந நிஸஜ்ஜாதி³கங் காதப்³ப³ங். இமினா பன தங் கதந்தி டா²னங் வினாஸிதங் ஹோதி. தேனாஹ ‘‘ஆக³தகாரணங் வினாஸேதீ’’தி. ‘‘ஆக³தகாரணங் நாம டா²னமேவ, தஸ்மா ‘ந காதப்³ப³’ந்தி வாரிதஸ்ஸ கதத்தா நிஸஜ்ஜாதீ³ஸு கதேஸு ச²ஸு டா²னேஸு ஏகங் டா²னங் ப⁴ஞ்ஜதீ’’தி (ஸாரத்த²॰ டீ॰ 2.537-539) அயமெத்த² அதி⁴ப்பாயோ. ச²க்க²த்துபரமங் துண்ஹீபூ⁴தேன உத்³தி³ஸ்ஸ டா²தப்³ப³ங். ‘‘ந அஞ்ஞங் கிஞ்சி காதப்³ப³’’ந்தி ஹி இத³ங் டா²னலக்க²ணங். தேனேவாஹ ‘‘இத³’’ந்திஆதி³. தத்த² இத³ந்தி ‘‘சதுக்க²த்துங் பஞ்சக்க²த்துங், ச²க்க²த்துபரமங் துண்ஹீபூ⁴தேன உத்³தி³ஸ்ஸ டா²தப்³ப³’’ந்தி வசனங். எத்த² ச ‘‘நிஸீத³னாதி³ம்ஹி கதே புன சீவரங் க³ஹேதுங் ந லப⁴தீ’’தி கேசி. ‘‘த்³வே டா²னானி பரிஹாயந்தீ’’தி அஞ்ஞே. ‘‘ஏகங் டா²னங் பரிஹாயதீ’’தி அபரே. உப⁴யங் கரோதீதி சோதே³திபி திட்ட²திபி.
Chakkhattuṃ paramo paricchedo assāti chakkhattuparamaṃ. Idañhi ‘‘ṭhātabba’’nti imissā kiriyāya visesanaṃ, chakkhattuparamaṃ ṭhānaṃ kātabbanti attho. Tenāha ‘‘bhāvanapuṃsakavacanameta’’nti, etaṃ bhāve ṭhātabbanti vuttadhātvatthamatte sādhetabbe napuṃsakaliṅgavacananti attho. Na nisīditabbanti ‘‘idha, bhante, nisīdathā’’ti vuttepi na nisīditabbaṃ . Na āmisaṃ paṭiggahetabbanti yāgukhajjakādibhedaṃ kiñci āmisaṃ ‘‘gaṇhatha, bhante’’ti yāciyamānenāpi na gaṇhitabbaṃ. Na dhammo bhāsitabboti (pārā. aṭṭha. 2.538-539) ‘‘maṅgalaṃ vā anumodanaṃ vā bhāsathā’’ti yāciyamānenāpi na kiñci bhāsitabbaṃ. Ṭhānaṃ bhañjatīti ṭhitiṃ vināseti. Ṭhatvā cīvaraṃ gahetuṃ āgatena hi taṃ uddissa tuṇhībhūtena ṭhātabbameva, na nisajjādikaṃ kātabbaṃ. Iminā pana taṃ katanti ṭhānaṃ vināsitaṃ hoti. Tenāha ‘‘āgatakāraṇaṃ vināsetī’’ti. ‘‘Āgatakāraṇaṃ nāma ṭhānameva, tasmā ‘na kātabba’nti vāritassa katattā nisajjādīsu katesu chasu ṭhānesu ekaṃ ṭhānaṃ bhañjatī’’ti (sārattha. ṭī. 2.537-539) ayamettha adhippāyo. Chakkhattuparamaṃ tuṇhībhūtena uddissa ṭhātabbaṃ. ‘‘Na aññaṃ kiñci kātabba’’nti hi idaṃ ṭhānalakkhaṇaṃ. Tenevāha ‘‘ida’’ntiādi. Tattha idanti ‘‘catukkhattuṃ pañcakkhattuṃ, chakkhattuparamaṃ tuṇhībhūtena uddissa ṭhātabba’’nti vacanaṃ. Ettha ca ‘‘nisīdanādimhi kate puna cīvaraṃ gahetuṃ na labhatī’’ti keci. ‘‘Dve ṭhānāni parihāyantī’’ti aññe. ‘‘Ekaṃ ṭhānaṃ parihāyatī’’ti apare. Ubhayaṃ karotīti codetipi tiṭṭhatipi.
‘‘தத்ர தத்ர டா²னே திட்ட²தீ’’தி இத³ங் சோத³கஸ்ஸ டி²தட்டி²தட்டா²னதோ அபக்கம்ம தத்ர தத்ர சீவரங் உத்³தி³ஸ்ஸ டா²னங்யேவ ஸந்தா⁴ய வுத்தங். எத்தா²தி ஏதேஸு த்³வீஸு சோத³னாட்டா²னேஸு.
‘‘Tatra tatra ṭhāne tiṭṭhatī’’ti idaṃ codakassa ṭhitaṭṭhitaṭṭhānato apakkamma tatra tatra cīvaraṃ uddissa ṭhānaṃyeva sandhāya vuttaṃ. Etthāti etesu dvīsu codanāṭṭhānesu.
கிங் பன ஸப்³ப³கப்பியகாரகேஸு (பாரா॰ அட்ட²॰ 2.538-539; வி॰ ஸங்க³॰ அட்ட²॰ 65) ஏவங் படிபஜ்ஜிதப்³ப³ந்தி? ந படிபஜ்ஜிதப்³ப³ங். அயஞ்ஹி கப்பியகாரகோ நாம ஸங்கே²பதோ து³விதோ⁴ நித்³தி³ட்டோ² ச அனித்³தி³ட்டோ² ச. தத்த² ச நித்³தி³ட்டோ² து³விதோ⁴ பி⁴க்கு²னா நித்³தி³ட்டோ², தூ³தேன நித்³தி³ட்டோ²தி. அனித்³தி³ட்டோ²பி து³விதோ⁴ முக²வேவடிககப்பியகாரகோ, பரம்முக²கப்பியகாரகோதி. தேஸு பி⁴க்கு²னா நித்³தி³ட்டோ² ஸம்முகா²ஸம்முக²வஸேன சதுப்³பி³தோ⁴ ஹோதி, ததா² தூ³தேன நித்³தி³ட்டோ²பி.
Kiṃ pana sabbakappiyakārakesu (pārā. aṭṭha. 2.538-539; vi. saṅga. aṭṭha. 65) evaṃ paṭipajjitabbanti? Na paṭipajjitabbaṃ. Ayañhi kappiyakārako nāma saṅkhepato duvidho niddiṭṭho ca aniddiṭṭho ca. Tattha ca niddiṭṭho duvidho bhikkhunā niddiṭṭho, dūtena niddiṭṭhoti. Aniddiṭṭhopi duvidho mukhavevaṭikakappiyakārako, parammukhakappiyakārakoti. Tesu bhikkhunā niddiṭṭho sammukhāsammukhavasena catubbidho hoti, tathā dūtena niddiṭṭhopi.
கத²ங்? இதே⁴கச்சோ பி⁴க்கு²ஸ்ஸ சீவரத்தா²ய தூ³தேன அகப்பியவத்து²ங் பஹிணதி, தூ³தோ ச தங் பி⁴க்கு²ங் உபஸங்கமித்வா ‘‘இத³ங், ப⁴ந்தே, இத்த²ன்னாமேன தும்ஹாகங் சீவரத்தா²ய பஹிதங், க³ண்ஹத² ந’’ந்தி வத³தி. பி⁴க்கு² ‘‘இத³ங் ந கப்பதீ’’தி படிக்கி²பதி. தூ³தோ ‘‘அத்தி² பன தே, ப⁴ந்தே, வெய்யாவச்சகரோ’’தி புச்ச²தி, புஞ்ஞத்தி²கேஹி ச உபாஸகேஹி ‘‘பி⁴க்கூ²னங் வெய்யாவச்சங் கரோதா²’’தி ஆணத்தா வா பி⁴க்கூ²னங் வா ஸந்தி³ட்டா² ஸம்ப⁴த்தா கேசி வெய்யாவச்சகரா ஹொந்தி, தேஸங் அஞ்ஞதரோ தஸ்மிங் க²ணே பி⁴க்கு²ஸ்ஸ ஸந்திகே நிஸின்னோ ஹோதி, பி⁴க்கு² தங் நித்³தி³ஸதி ‘‘அயங் பி⁴க்கூ²னங் வெய்யாவச்சகரோ’’தி . தூ³தோ தஸ்ஸ ஹத்தே² அகப்பியவத்து²ங் த³த்வா ‘‘தே²ரஸ்ஸ சீவரங் கிணித்வா தே³ஹீ’’தி க³ச்ச²தி, அயங் பி⁴க்கு²னா ஸம்முகா²னித்³தி³ட்டோ².
Kathaṃ? Idhekacco bhikkhussa cīvaratthāya dūtena akappiyavatthuṃ pahiṇati, dūto ca taṃ bhikkhuṃ upasaṅkamitvā ‘‘idaṃ, bhante, itthannāmena tumhākaṃ cīvaratthāya pahitaṃ, gaṇhatha na’’nti vadati. Bhikkhu ‘‘idaṃ na kappatī’’ti paṭikkhipati. Dūto ‘‘atthi pana te, bhante, veyyāvaccakaro’’ti pucchati, puññatthikehi ca upāsakehi ‘‘bhikkhūnaṃ veyyāvaccaṃ karothā’’ti āṇattā vā bhikkhūnaṃ vā sandiṭṭhā sambhattā keci veyyāvaccakarā honti, tesaṃ aññataro tasmiṃ khaṇe bhikkhussa santike nisinno hoti, bhikkhu taṃ niddisati ‘‘ayaṃ bhikkhūnaṃ veyyāvaccakaro’’ti . Dūto tassa hatthe akappiyavatthuṃ datvā ‘‘therassa cīvaraṃ kiṇitvā dehī’’ti gacchati, ayaṃ bhikkhunā sammukhāniddiṭṭho.
நோ சே பி⁴க்கு²ஸ்ஸ (பாரா॰ அட்ட²॰ 2.537; வி॰ ஸங்க³॰ அட்ட²॰ 65) ஸந்திகே நிஸின்னோ ஹோதி, அபிச கோ² பி⁴க்கு² நித்³தி³ஸதி ‘‘அஸுகஸ்மிங் நாம கா³மே இத்த²ன்னாமோ பி⁴க்கூ²னங் வெய்யாவச்சகரோ’’தி. ஸோ க³ந்த்வா தஸ்ஸ ஹத்தே² அகப்பியவத்து²ங் த³த்வா ‘‘தே²ரஸ்ஸ சீவரங் கிணித்வா த³தெ³ய்யாஸீ’’தி ஆக³ந்த்வா பி⁴க்கு²ஸ்ஸ ஆரோசெத்வா க³ச்ச²தி, அயமேகோ பி⁴க்கு²னா அஸம்முகா²னித்³தி³ட்டோ².
No ce bhikkhussa (pārā. aṭṭha. 2.537; vi. saṅga. aṭṭha. 65) santike nisinno hoti, apica kho bhikkhu niddisati ‘‘asukasmiṃ nāma gāme itthannāmo bhikkhūnaṃ veyyāvaccakaro’’ti. So gantvā tassa hatthe akappiyavatthuṃ datvā ‘‘therassa cīvaraṃ kiṇitvā dadeyyāsī’’ti āgantvā bhikkhussa ārocetvā gacchati, ayameko bhikkhunā asammukhāniddiṭṭho.
ந ஹேவ கோ² ஸோ தூ³தோ அத்தனா ஆக³ந்த்வா ஆரோசேதி, அபிச கோ² அஞ்ஞங் பஹிணதி ‘‘தி³ன்னங் மயா, ப⁴ந்தே, தஸ்ஸ ஹத்தே² சீவரசேதாபன்னங், சீவரங் க³ண்ஹெய்யாதா²’’தி, அயங் து³தியோ பி⁴க்கு²னா அஸம்முகா²னித்³தி³ட்டோ².
Na heva kho so dūto attanā āgantvā āroceti, apica kho aññaṃ pahiṇati ‘‘dinnaṃ mayā, bhante, tassa hatthe cīvaracetāpannaṃ, cīvaraṃ gaṇheyyāthā’’ti, ayaṃ dutiyo bhikkhunā asammukhāniddiṭṭho.
ந ஹேவ கோ² அஞ்ஞங் பஹிணதி, அபிச கோ² க³ச்ச²ந்தோவ பி⁴க்கு²ங் வத³தி ‘‘அஹங் தஸ்ஸ ஹத்தே² சீவரசேதாபன்னங் த³ஸ்ஸாமி, தும்ஹே சீவரங் க³ண்ஹெய்யாதா²’’தி, அயங் ததியோ பி⁴க்கு²னா அஸம்முகா²னித்³தி³ட்டோ²தி ஏவங் ஏகோ ஸம்முகா²னித்³தி³ட்டோ² தயோ அஸம்முகா²னித்³தி³ட்டா²தி இமே சத்தாரோ பி⁴க்கு²னா நித்³தி³ட்ட²வெய்யாவச்சகரா நாம. ஏதேஸு இமஸ்மிங் ராஜஸிக்கா²பதே³ வுத்தனயேனேவ படிபஜ்ஜிதப்³ப³ங்.
Na heva kho aññaṃ pahiṇati, apica kho gacchantova bhikkhuṃ vadati ‘‘ahaṃ tassa hatthe cīvaracetāpannaṃ dassāmi, tumhe cīvaraṃ gaṇheyyāthā’’ti, ayaṃ tatiyo bhikkhunā asammukhāniddiṭṭhoti evaṃ eko sammukhāniddiṭṭho tayo asammukhāniddiṭṭhāti ime cattāro bhikkhunā niddiṭṭhaveyyāvaccakarā nāma. Etesu imasmiṃ rājasikkhāpade vuttanayeneva paṭipajjitabbaṃ.
அபரோ பி⁴க்கு² புரிமனயேனேவ தூ³தேன புச்சி²தோ நத்தி²தாய வா அவிசாரேதுகாமதாய வா ‘‘நத்த²ம்ஹாகங் கப்பியகாரகோ’’தி வத³தி, தஸ்மிஞ்ச க²ணே கோசி மனுஸ்ஸோ ஆக³ச்ச²தி, தூ³தோ தஸ்ஸ ஹத்தே² அகப்பியவத்து²ங் த³த்வா ‘‘இமஸ்ஸ ஹத்த²தோ சீவரங் க³ண்ஹெய்யாதா²’’தி வத்வா க³ச்ச²தி, அயங் தூ³தேன ஸம்முகா²னித்³தி³ட்டோ².
Aparo bhikkhu purimanayeneva dūtena pucchito natthitāya vā avicāretukāmatāya vā ‘‘natthamhākaṃ kappiyakārako’’ti vadati, tasmiñca khaṇe koci manusso āgacchati, dūto tassa hatthe akappiyavatthuṃ datvā ‘‘imassa hatthato cīvaraṃ gaṇheyyāthā’’ti vatvā gacchati, ayaṃ dūtena sammukhāniddiṭṭho.
அபரோ தூ³தோ கா³மங் பவிஸித்வா அத்தனா அபி⁴ருசிதஸ்ஸ கஸ்ஸசி ஹத்தே² அகப்பியவத்து²ங் த³த்வா புரிமனயேனேவ ஆக³ந்த்வா வா ஆரோசேதி, அஞ்ஞங் வா பஹிணதி, ‘‘அஹங் அஸுகஸ்ஸ நாம ஹத்தே² சீவரசேதாபன்னங் த³ஸ்ஸாமி, தும்ஹே சீவரங் க³ண்ஹெய்யாதா²’’தி வத்வா வா க³ச்ச²தி, அயங் ததியோ தூ³தேன அஸம்முகா²னித்³தி³ட்டோ²தி ஏவங் ஏகோ ஸம்முகா²னித்³தி³ட்டோ², தயோ அஸம்முகா²னித்³தி³ட்டா²தி இமே சத்தாரோ தூ³தேன நித்³தி³ட்ட²வெய்யாவச்சகரா நாம. ஏதேஸு மெண்ட³கஸிக்கா²பதே³ வுத்தனயேனேவ படிபஜ்ஜிதப்³ப³ங்.
Aparo dūto gāmaṃ pavisitvā attanā abhirucitassa kassaci hatthe akappiyavatthuṃ datvā purimanayeneva āgantvā vā āroceti, aññaṃ vā pahiṇati, ‘‘ahaṃ asukassa nāma hatthe cīvaracetāpannaṃ dassāmi, tumhe cīvaraṃ gaṇheyyāthā’’ti vatvā vā gacchati, ayaṃ tatiyo dūtena asammukhāniddiṭṭhoti evaṃ eko sammukhāniddiṭṭho, tayo asammukhāniddiṭṭhāti ime cattāro dūtena niddiṭṭhaveyyāvaccakarā nāma. Etesu meṇḍakasikkhāpade vuttanayeneva paṭipajjitabbaṃ.
வுத்தஞ்ஹேதங் –
Vuttañhetaṃ –
‘‘ஸந்தி, பி⁴க்க²வே, மனுஸ்ஸா ஸத்³தா⁴ பஸன்னா, தே கப்பியகாரகானங் ஹத்தே² ஹிரஞ்ஞங் உபனிக்கி²பந்தி ‘இமினா அய்யஸ்ஸ யங் கப்பியங், தங் தே³தா²’தி. அனுஜானாமி, பி⁴க்க²வே, யங் ததோ கப்பியங், தங் ஸாதி³துங், ந த்வேவாஹங், பி⁴க்க²வே, கேனசி பரியாயேன ஜாதரூபரஜதங் ஸாதி³தப்³ப³ங் பரியேஸிதப்³ப³ந்தி வதா³மீ’’தி (மஹாவ॰ 299).
‘‘Santi, bhikkhave, manussā saddhā pasannā, te kappiyakārakānaṃ hatthe hiraññaṃ upanikkhipanti ‘iminā ayyassa yaṃ kappiyaṃ, taṃ dethā’ti. Anujānāmi, bhikkhave, yaṃ tato kappiyaṃ, taṃ sādituṃ, na tvevāhaṃ, bhikkhave, kenaci pariyāyena jātarūparajataṃ sāditabbaṃ pariyesitabbanti vadāmī’’ti (mahāva. 299).
எத்த² ச சோத³னாய பரிமாணங் நத்தி². மூலங் அஸாதி³யந்தேன ஸஹஸ்ஸக்க²த்தும்பி சோத³னாய வா டா²னேன வா கப்பியப⁴ண்ட³ங் ஸாதி³துங் வட்டதி. நோ சே தே³தி, அஞ்ஞங் கப்பியகாரகங் ட²பெத்வாபி ஆஹராபேதப்³ப³ங். ஸசே இச்ச²தி, மூலஸாமிகானம்பி கதே²தப்³ப³ங். நோ சே இச்ச²தி, ந கதே²தப்³ப³ங்.
Ettha ca codanāya parimāṇaṃ natthi. Mūlaṃ asādiyantena sahassakkhattumpi codanāya vā ṭhānena vā kappiyabhaṇḍaṃ sādituṃ vaṭṭati. No ce deti, aññaṃ kappiyakārakaṃ ṭhapetvāpi āharāpetabbaṃ. Sace icchati, mūlasāmikānampi kathetabbaṃ. No ce icchati, na kathetabbaṃ.
அபரோ பி⁴க்கு² புரிமனயேனேவ தூ³தேன புச்சி²தோ ‘‘நத்த²ம்ஹாகங் கப்பியகாரகோ’’தி வத³தி, தத³ஞ்ஞோ ஸமீபே டி²தோ ஸுத்வா ‘‘ஆஹர, போ⁴, அஹங் அய்யஸ்ஸ சீவரங் சேதாபெத்வா த³ஸ்ஸாமீ’’தி வத³தி. தூ³தோ ‘‘ஹந்த³, போ⁴, த³தெ³ய்யாஸீ’’தி தஸ்ஸ ஹத்தே² த³த்வா பி⁴க்கு²ஸ்ஸ அனாரோசெத்வாவ க³ச்ச²தி, அயங் முக²வேவடிககப்பியகாரகோ.
Aparo bhikkhu purimanayeneva dūtena pucchito ‘‘natthamhākaṃ kappiyakārako’’ti vadati, tadañño samīpe ṭhito sutvā ‘‘āhara, bho, ahaṃ ayyassa cīvaraṃ cetāpetvā dassāmī’’ti vadati. Dūto ‘‘handa, bho, dadeyyāsī’’ti tassa hatthe datvā bhikkhussa anārocetvāva gacchati, ayaṃ mukhavevaṭikakappiyakārako.
அபரோ (பாரா॰ அட்ட²॰ 2.538-539; வி॰ ஸங்க³॰ அட்ட²॰ 65) பி⁴க்கு²னோ உபட்டா²கஸ்ஸ வா அஞ்ஞஸ்ஸ வா ஹத்தே² அகப்பியவத்து²ங் த³த்வா ‘‘தே²ரஸ்ஸ சீவரங் த³தெ³ய்யாஸீ’’தி எத்தோவ பக்கமதி, அயங் பரம்முக²கப்பியகாரகோதி இமே த்³வே அனித்³தி³ட்ட²கப்பியகாரகா நாம. ஏதேஸு அஞ்ஞாதகஅப்பவாரிதேஸு விய படிபஜ்ஜிதப்³ப³ங்.
Aparo (pārā. aṭṭha. 2.538-539; vi. saṅga. aṭṭha. 65) bhikkhuno upaṭṭhākassa vā aññassa vā hatthe akappiyavatthuṃ datvā ‘‘therassa cīvaraṃ dadeyyāsī’’ti ettova pakkamati, ayaṃ parammukhakappiyakārakoti ime dve aniddiṭṭhakappiyakārakā nāma. Etesu aññātakaappavāritesu viya paṭipajjitabbaṃ.
ஸசே ஸயமேவ சீவரங் ஆனெத்வா தெ³ந்தி, க³ஹேதப்³ப³ங். நோ சே, ந கிஞ்சி வத்தப்³பா³. தேனாஹ ‘‘ஸசே’’திஆதி³. கப்பியகாரகேதி ஸம்முகா²ஸம்முக²வஸேன சத்தாரோ கப்பியகாரகேதி அத்தோ². ‘‘தா³யகோ ஸயமேவா’’தி இமினா பி⁴க்கு²ங் படிக்கி²பதி, ந தூ³தங். தஸ்மா தூ³தேன நித்³தி³ட்டோ²பி யதா²ருசி சோதே³துங் வட்டதி. முக²ங் விவரித்வா ஸயமேவ கப்பியகாரகத்தங் உபக³தோதி முக²வேவடிககப்பியகாரகோ. ஏவந்தி ‘‘ஏஸோ கோ²’’திஆதி³னா யதா²வுத்தேன ஆகாரேன. த³ஸ்ஸிதா ஹொந்தி ஸங்கே²பதோதி அதி⁴ப்பாயோ.
Sace sayameva cīvaraṃ ānetvā denti, gahetabbaṃ. No ce, na kiñci vattabbā. Tenāha ‘‘sace’’tiādi. Kappiyakāraketi sammukhāsammukhavasena cattāro kappiyakāraketi attho. ‘‘Dāyako sayamevā’’ti iminā bhikkhuṃ paṭikkhipati, na dūtaṃ. Tasmā dūtena niddiṭṭhopi yathāruci codetuṃ vaṭṭati. Mukhaṃ vivaritvā sayameva kappiyakārakattaṃ upagatoti mukhavevaṭikakappiyakārako. Evanti ‘‘eso kho’’tiādinā yathāvuttena ākārena. Dassitā honti saṅkhepatoti adhippāyo.
வுத்தசோத³னாட்டா²னபரிமாணதோதி வுத்தசோத³னாபரிமாணதோ ச வுத்தட்டா²னபரிமாணதோ ச. ஸந்திகந்தி ஸமீபங். தத்தா²தி எத்த² கத²மயமத்தோ² லப்³ப⁴தீதி ஆஹ ‘‘ஸமீபத்தே² ஹி இத³ங் பு⁴ம்மவசன’’ந்தி . இத³ங் வுத்தங் ஹோதி – ‘‘க³ங்கா³யங் கோ³யூதா²னி சரந்தி, கூபே க³க்³க³கூல’’ந்திஆதீ³ஸு விய யஸ்மா ஸமீபாதா⁴ரே இத³ங் ஸத்தமீவிப⁴த்திவசனங், தஸ்மா அயமத்தோ² லப்³ப⁴தீதி. ஏவங் அகரொந்தோதி ஸாமங் வா அக³ச்ச²ந்தோ, தூ³தங் வா அபாஹெந்தோ.
Vuttacodanāṭṭhānaparimāṇatoti vuttacodanāparimāṇato ca vuttaṭṭhānaparimāṇato ca. Santikanti samīpaṃ. Tatthāti ettha kathamayamattho labbhatīti āha ‘‘samīpatthe hi idaṃ bhummavacana’’nti . Idaṃ vuttaṃ hoti – ‘‘gaṅgāyaṃ goyūthāni caranti, kūpe gaggakūla’’ntiādīsu viya yasmā samīpādhāre idaṃ sattamīvibhattivacanaṃ, tasmā ayamattho labbhatīti. Evaṃ akarontoti sāmaṃ vā agacchanto, dūtaṃ vā apāhento.
அஜ்ஜண்ஹோ, ப⁴ந்தே, ஆக³மேஹீதி, ப⁴ந்தே, அஜ்ஜ ஏகதி³வஸங் அம்ஹாகங் திட்ட², அதி⁴வாஸேஹீதி அத்தோ². திகபாசித்தியந்தி அதிரேகேஸு சோத³னாட்டா²னேஸு அதிரேகஸஞ்ஞிவேமதிகஊனகஸஞ்ஞீனங் வஸேன தீணி பாசித்தியானி. திக்க²த்துங் சோத³னாய ச²க்க²த்துங் டா²னேன, ஊனகதிக்க²த்துங் சோத³னாய ஊனகச்ச²க்க²த்துங் டா²னேன லத்³தே⁴பி அனாபத்தி. அப்பிததாதி பதிட்டா²பிததா, ‘‘ஸஞ்ஞத்தோ ஸோ மயா’’திஆதி³னா (பாரா॰ 538) கதி²ததாதி வுத்தங் ஹோதி.
Ajjaṇho, bhante, āgamehīti, bhante, ajja ekadivasaṃ amhākaṃ tiṭṭha, adhivāsehīti attho. Tikapācittiyanti atirekesu codanāṭṭhānesu atirekasaññivematikaūnakasaññīnaṃ vasena tīṇi pācittiyāni. Tikkhattuṃ codanāya chakkhattuṃ ṭhānena, ūnakatikkhattuṃ codanāya ūnakacchakkhattuṃ ṭhānena laddhepi anāpatti. Appitatāti patiṭṭhāpitatā, ‘‘saññatto so mayā’’tiādinā (pārā. 538) kathitatāti vuttaṃ hoti.
ராஜஸிக்கா²பத³வண்ணனா நிட்டி²தா.
Rājasikkhāpadavaṇṇanā niṭṭhitā.
சீவரவக்³கோ³ பட²மோ.
Cīvaravaggo paṭhamo.
