| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
10. ராஜஸிக்கா²பத³வண்ணனா
10. Rājasikkhāpadavaṇṇanā
537. ‘‘ந கோ² மயங், ஆவுஸோ, சீவரசேதாபன்னங் படிக்³க³ண்ஹாம…பே॰… காலேன கப்பிய’’ந்தி இதோ புப்³பே³ ஏவ ரூபியபடிக்³க³ஹணஸிக்கா²பத³ஸ்ஸ பஞ்ஞத்தத்தா வுத்தங். அஞ்ஞதா² ஆயஸ்மா உபனந்தோ³ மங்ஸஸ்ஸ சேதாபன்னங் ஏகம்பி கஹாபணங் ஹத்தே²ன படிக்³க³ண்ஹந்தோ ததோ மஹந்ததரங் சீவரசேதாபன்னங் கத²ங் ந படிக்³க³ண்ஹிஸ்ஸதி, ஏவங் ஸந்தேபி சீவரபடிஸங்யுத்தத்தா சீவரவக்³கே³ ஸங்கா³யிங்ஸூதி.
537.‘‘Nakho mayaṃ, āvuso, cīvaracetāpannaṃ paṭiggaṇhāma…pe… kālena kappiya’’nti ito pubbe eva rūpiyapaṭiggahaṇasikkhāpadassa paññattattā vuttaṃ. Aññathā āyasmā upanando maṃsassa cetāpannaṃ ekampi kahāpaṇaṃ hatthena paṭiggaṇhanto tato mahantataraṃ cīvaracetāpannaṃ kathaṃ na paṭiggaṇhissati, evaṃ santepi cīvarapaṭisaṃyuttattā cīvaravagge saṅgāyiṃsūti.
538-9. ‘‘ஆக³தகாரணங் ப⁴ஞ்ஜதீ’’தி வுத்தத்தா நனு புன சோதே³துங் ந லப⁴தீதி ஏகே. ஆக³மனஸ்ஸ ஸாத்த²கங் ந ஹோதி, சீவரங் ந லபி⁴ஸ்ஸதி படிஸந்தா²ரஸ்ஸ கதத்தாதி ஏகே. சோத³னாலக்க²ணங் ந ஹோதீதி கத்வா வுத்தந்தி ஏகே. ‘‘ட²த்வா சோதே³மீ’’தி ஆக³தோ தங் டா²னங் ப⁴ஞ்ஜதி, கரோதி சேகங், தீணிபி சே கரோதி, ஏகமேவ, ஏகவசனத்தாதி ஏகே. தீணி டா²னானி ப⁴ஞ்ஜதீதி ஏகே. உபதிஸ்ஸத்தே²ரோ ‘‘ந சோத³னாதி³ங் ப⁴ஞ்ஜதி, சோதே³துகாமோ அகத்தப்³ப³ங் அகாஸி, தேன வத்தபே⁴தே³ து³க்கட’’ந்தி வத³தி. த⁴ம்மஸிரித்தே²ரோ பன ‘‘ஆஸனே சே நிஸீத³தி, ஏகாய நிஸஜ்ஜாய த்³வே டா²னானி ப⁴ஞ்ஜதி. ஆமிஸங் சே படிக்³க³ண்ஹாதி, ஏகேன படிக்³க³ஹேன த்³வே டா²னானி ப⁴ஞ்ஜதி. த⁴ம்மங் சே பா⁴ஸதி, த⁴ம்மதே³ஸனஸிக்கா²பதே³ வுத்தபரிச்சே²தா³ய ஏகாய வாசாய த்³வே டா²னானி ப⁴ஞ்ஜதி, தங் ஸந்தா⁴ய வுத்த’’ந்தி வத³தி. ‘‘யத்தா²’’தி வுத்தே அத்தனோ ஏவ ஸந்திகங் க³ந்தப்³ப³ந்தி வுத்தங் விய ஹோதி. தேன வுத்தங் ‘‘ப்³யஞ்ஜனங் பன ந ஸமேதீ’’தி. உபாஸகேஹி ஆணத்தா தங். மூலங் அஸாதி³யந்தேனாதி மூலஸ்ஸ அகப்பியபா⁴வே ஸதி அஸாதி³யந்தேன. தஞ்ச கோ² சித்தேன , ந முகே²ன. ஸசே ஏவங் வுத்தே அகப்பியங் த³ஸ்ஸேதீதி கத்வா சித்தேன அகப்பியங் இச்ச²ந்தோவ முகே²ன கப்பியங் நித்³தி³ஸதி ‘‘சீவரங் மே தே³தா²’’தி, ந வட்டதி. படிலாபே⁴ ரூபியபடிக்³க³ஹணஸிக்கா²பதே³ன ஆபத்தி.
538-9. ‘‘Āgatakāraṇaṃ bhañjatī’’ti vuttattā nanu puna codetuṃ na labhatīti eke. Āgamanassa sātthakaṃ na hoti, cīvaraṃ na labhissati paṭisanthārassa katattāti eke. Codanālakkhaṇaṃ na hotīti katvā vuttanti eke. ‘‘Ṭhatvā codemī’’ti āgato taṃ ṭhānaṃ bhañjati, karoti cekaṃ, tīṇipi ce karoti, ekameva, ekavacanattāti eke. Tīṇi ṭhānāni bhañjatīti eke. Upatissatthero ‘‘na codanādiṃ bhañjati, codetukāmo akattabbaṃ akāsi, tena vattabhede dukkaṭa’’nti vadati. Dhammasiritthero pana ‘‘āsane ce nisīdati, ekāya nisajjāya dve ṭhānāni bhañjati. Āmisaṃ ce paṭiggaṇhāti, ekena paṭiggahena dve ṭhānāni bhañjati. Dhammaṃ ce bhāsati, dhammadesanasikkhāpade vuttaparicchedāya ekāya vācāya dve ṭhānāni bhañjati, taṃ sandhāya vutta’’nti vadati. ‘‘Yatthā’’ti vutte attano eva santikaṃ gantabbanti vuttaṃ viya hoti. Tena vuttaṃ ‘‘byañjanaṃ pana na sametī’’ti. Upāsakehi āṇattā taṃ. Mūlaṃ asādiyantenāti mūlassa akappiyabhāve sati asādiyantena. Tañca kho cittena , na mukhena. Sace evaṃ vutte akappiyaṃ dassetīti katvā cittena akappiyaṃ icchantova mukhena kappiyaṃ niddisati ‘‘cīvaraṃ me dethā’’ti, na vaṭṭati. Paṭilābhe rūpiyapaṭiggahaṇasikkhāpadena āpatti.
தத்ராயங் விசாரணா – சித்தேன ஸாதி³யந்தோபி முகே²ன கப்பியவோஹாரேன சே வோஹரதி ‘‘கஹாபணாரஹேன, பாதா³ரஹேன வா கப்பியப⁴ண்டே³ன இத³ஞ்சித³ஞ்ச ஆஹரா’’தி. கிஞ்சாபி ரூபியங் ஸந்தா⁴ய வத³தி, வட்டதி ஏவ. கஸ்மா? கஞ்சி ஸஸ்ஸுட்டா²னகங் பூ⁴மிபதே³ஸங் ஸந்தா⁴ய ‘‘ஸீமங் தே³மாதி வத³ந்தி, வட்டதீ’’தி வசனதோ, ‘‘விஹாரஸ்ஸ தே³மா’’தி வுத்தே ‘‘படிக்கி²பிதுங் ந வட்டதீ’’தி வசனதோ ச. அனுக³ண்டி²பதே³ பன வுத்தங் ‘‘ஸங்க⁴ங் ஸந்தா⁴ய ‘விஹாரஸ்ஸ தே³மா’தி தி³ன்னங் க³ருப⁴ண்ட³ங் ந ஹோதி, த³க்கி²ணோத³கங் ஸம்படிச்சி²துங், ‘ஸாதூ⁴’தி ச வத்துங், அனுமோதே³துஞ்ச வட்டதி. கஸ்மா? ஸங்க⁴ஸ்ஸ ‘விஹாரோ’தி நாமாபா⁴வதோ, கெ²த்தஸ்ஸேவ ‘ஸீமா’தி நாமபா⁴வதோ ச, சித்தேன ஆரம்மணங் கதங் அப்பமாணங், கப்பியவோஹாரோவ பமாணங். கப்பியமேவாசிக்கி²தத்தா ‘ந த்வேவாஹங், பி⁴க்க²வே, கேனசி பரியாயேன ஜாதரூபரஜதங் ஸாதி³தப்³ப³ங் பரியேஸிதப்³ப³ந்தி வதா³மீ’தி (மஹாவ॰ 299) வசனேனபி ந விருஜ்ஜ²தி. கப்பியவசனபச்சயா தா³யகோ ஸயமேவ கத்தப்³ப³யுத்தகங் ஜானிஸ்ஸதீதி அதி⁴ப்பாயதோ தா³யகேன ஏதஸ்ஸ அதி⁴ப்பாயங் ஞத்வா கப்பியகாரகஸ்ஸ ஹத்தே² ட²பிதங் பி⁴க்கு²ஸ்ஸ ஸந்தகமேவ ஹோதீ’’தி. இத³ங் ஸப்³ப³மயுத்தங், கஸ்மா? ஸீமாவிஹாரவசனஸ்ஸ தா³யகவசனத்தா. இத⁴ ச பி⁴க்கு²னோ வசனங் பமாணங். தேனேவாஹ ‘‘அதா²பி ‘மம தளாகங் வா பொக்க²ரணிங் வா ஸங்க⁴ஸ்ஸ த³ம்மீ’தி வுத்தே ‘ஸாது⁴, உபாஸக, ஸங்கோ⁴ பானீயங் பிவிஸ்ஸதீ’திஆதீ³னி வத்வா பரிபு⁴ஞ்ஜிதுங் வட்டதி ஏவா’’தி. அஞ்ஞதா² கெ²த்தங் ஸந்தா⁴ய பி⁴க்கு²னோ கெ²த்தபடிப³த்³த⁴வசனானி ஸீமாவசனேன கப்பந்தீதி ஆபஜ்ஜதி. அவிஹாரஸ்ஸ ச பி⁴க்கு²ஸ்ஸ ரூபியங் த³ஸ்ஸெத்வா ‘‘இத³ங் விஹாரஸ்ஸ த³ம்மீ’’தி வுத்தே அத்தனோ அத்தா²ய தி³ய்யமானங் ஜானந்தேனாபி தங் அப்படிக்கி²பிதப்³ப³ங். ததா² கஹாபணாரஹாதி³னோ அகப்பியப⁴ண்ட³பா⁴வங், கஹாபணாதி³பா⁴வமேவ வா ஜானந்தமேவ ஸந்தா⁴ய ததா²வோஹரந்தஸ்ஸ ச அனாபத்தீதி ஆபஜ்ஜதி. ‘‘ந த்வேவாஹங், பி⁴க்க²வே, கேனசி பரியாயேனா’’தி நிப்பதே³ஸதோ வுத்தத்தா ந ஸக்கா லேஸங் ஒட்³டே³துந்தி நோ தக்கோ, விசாரெத்வா பன க³ஹேதப்³ப³ங். ‘‘நோ சே இச்ச²தி, ந கதே²தப்³ப³’’ந்தி வசனதோ யதா²வுத்தஸாமிசியா அகரணே அனாபத்தி து³க்கடஸ்ஸாதி த³ஸ்ஸேதி.
Tatrāyaṃ vicāraṇā – cittena sādiyantopi mukhena kappiyavohārena ce voharati ‘‘kahāpaṇārahena, pādārahena vā kappiyabhaṇḍena idañcidañca āharā’’ti. Kiñcāpi rūpiyaṃ sandhāya vadati, vaṭṭati eva. Kasmā? Kañci sassuṭṭhānakaṃ bhūmipadesaṃ sandhāya ‘‘sīmaṃ demāti vadanti, vaṭṭatī’’ti vacanato, ‘‘vihārassa demā’’ti vutte ‘‘paṭikkhipituṃ na vaṭṭatī’’ti vacanato ca. Anugaṇṭhipade pana vuttaṃ ‘‘saṅghaṃ sandhāya ‘vihārassa demā’ti dinnaṃ garubhaṇḍaṃ na hoti, dakkhiṇodakaṃ sampaṭicchituṃ, ‘sādhū’ti ca vattuṃ, anumodetuñca vaṭṭati. Kasmā? Saṅghassa ‘vihāro’ti nāmābhāvato, khettasseva ‘sīmā’ti nāmabhāvato ca, cittena ārammaṇaṃ kataṃ appamāṇaṃ, kappiyavohārova pamāṇaṃ. Kappiyamevācikkhitattā ‘na tvevāhaṃ, bhikkhave, kenaci pariyāyena jātarūparajataṃ sāditabbaṃ pariyesitabbanti vadāmī’ti (mahāva. 299) vacanenapi na virujjhati. Kappiyavacanapaccayā dāyako sayameva kattabbayuttakaṃ jānissatīti adhippāyato dāyakena etassa adhippāyaṃ ñatvā kappiyakārakassa hatthe ṭhapitaṃ bhikkhussa santakameva hotī’’ti. Idaṃ sabbamayuttaṃ, kasmā? Sīmāvihāravacanassa dāyakavacanattā. Idha ca bhikkhuno vacanaṃ pamāṇaṃ. Tenevāha ‘‘athāpi ‘mama taḷākaṃ vā pokkharaṇiṃ vā saṅghassa dammī’ti vutte ‘sādhu, upāsaka, saṅgho pānīyaṃ pivissatī’tiādīni vatvā paribhuñjituṃ vaṭṭati evā’’ti. Aññathā khettaṃ sandhāya bhikkhuno khettapaṭibaddhavacanāni sīmāvacanena kappantīti āpajjati. Avihārassa ca bhikkhussa rūpiyaṃ dassetvā ‘‘idaṃ vihārassa dammī’’ti vutte attano atthāya diyyamānaṃ jānantenāpi taṃ appaṭikkhipitabbaṃ. Tathā kahāpaṇārahādino akappiyabhaṇḍabhāvaṃ, kahāpaṇādibhāvameva vā jānantameva sandhāya tathāvoharantassa ca anāpattīti āpajjati. ‘‘Na tvevāhaṃ, bhikkhave, kenaci pariyāyenā’’ti nippadesato vuttattā na sakkā lesaṃ oḍḍetunti no takko, vicāretvā pana gahetabbaṃ. ‘‘No ce icchati, na kathetabba’’nti vacanato yathāvuttasāmiciyā akaraṇe anāpatti dukkaṭassāti dasseti.
‘‘அஞ்ஞாதகஅப்பவாரிதேஸு விய படிபஜ்ஜிதப்³ப³’’ந்தி வசனதோ யதா²வுத்தஸாமிசிம்பி ந கத்வா சே நிப்பா²தே³தி, அஞ்ஞாதகவிஞ்ஞத்திஸிக்கா²பதே³ன காரேதப்³போ³தி த³ஸ்ஸேதி. கப்பியகாரகா ஸயமேவ சோதெ³த்வா தெ³ந்தி, வட்டதி. ‘‘ஸயங் கரணமேவ படிக்கி²த்த’’ந்தி ச வத³ந்தி. பிண்ட³பாதாதீ³னங் …பே॰… ஏஸேவ நயோதி எத்த² ‘‘து³க்கட’’ந்தி வத³ந்தி, தங் ந ஸுந்த³ரங், த³த³ந்தேஸுபீதி அபி-ஸத்³தே³ன ஸங்க³ஹிதத்தா நிஸ்ஸக்³கி³யபாசித்தியமேவ. ஜாதரூபரஜதங் ‘‘ஸங்கே⁴ ஸாதி³தே து³க்கட’’ந்தி ச விகப்பெந்தி. தங் விஸேஸெத்வா நவுத்தத்தா பாசித்தியமேவாதி த³ஸ்ஸேதி. ‘‘நிஸ்ஸக்³கி³யமேவாதி யேவாபனகஸிக்கா²பதே³ஸு ஸியா’’தி வத³ந்தி, உபபரிக்கி²தப்³ப³ங். ‘‘யஸ்ஸ கஸ்ஸசி ஹி அஞ்ஞஸ்ஸ…பே॰… மஹாபச்சரியங் வுத்த’’ந்தி வசனதோ அபப்³ப³ஜிதானங் அந்தமஸோ மாதாபிதூனம்பி அத்தா²ய ஸம்படிச்ச²ந்தஸ்ஸ து³க்கடமேவாதி த³ஸ்ஸேதி.
‘‘Aññātakaappavāritesu viya paṭipajjitabba’’nti vacanato yathāvuttasāmicimpi na katvā ce nipphādeti, aññātakaviññattisikkhāpadena kāretabboti dasseti. Kappiyakārakā sayameva codetvā denti, vaṭṭati. ‘‘Sayaṃ karaṇameva paṭikkhitta’’nti ca vadanti. Piṇḍapātādīnaṃ…pe… eseva nayoti ettha ‘‘dukkaṭa’’nti vadanti, taṃ na sundaraṃ, dadantesupīti api-saddena saṅgahitattā nissaggiyapācittiyameva. Jātarūparajataṃ ‘‘saṅghe sādite dukkaṭa’’nti ca vikappenti. Taṃ visesetvā navuttattā pācittiyamevāti dasseti. ‘‘Nissaggiyamevāti yevāpanakasikkhāpadesu siyā’’ti vadanti, upaparikkhitabbaṃ. ‘‘Yassa kassaci hi aññassa…pe… mahāpaccariyaṃ vutta’’nti vacanato apabbajitānaṃ antamaso mātāpitūnampi atthāya sampaṭicchantassa dukkaṭamevāti dasseti.
ஸப்³ப³த்த² ஸம்படிச்ச²னங் நாம ‘‘உக்³க³ண்ஹெய்ய வா உக்³க³ண்ஹாபெய்யவா உபனிக்கி²த்தங் வா ஸாதி³யெய்யா’’தி ஏவங் வுத்தலக்க²ணமேவ. ஏவங் ஸந்தேபி கத்த²சி படிக்கி²பிதப்³ப³ங், கத்த²சி ந படிக்கி²பிதப்³ப³ங், கத்த²சி படிக்கி²த்தங் ஸாதி³துங் வட்டதி, ஏவங் அப்படிக்கி²த்தங் கிஞ்சி வட்டதி, இத³ங் ஸப்³ப³ம்பி த³ஸ்ஸேதுங் ‘‘ஸசே பனா’’தி வித்தா²ரோ ஆரத்³தோ⁴. தத்த² ‘‘சேதியஸ்ஸ…பே॰… ந வட்டதீ’’தி வசனதோ அப்படிக்கி²த்தங் விஹாரஸ்ஸ தி³ன்னங் ஸாதி³துங் வட்டதீதி ஸித்³த⁴ங். ததா² தே²ரஸ்ஸ ‘‘மாதுயா தே³மா’’திஆதி³னா வுத்தேபி படிக்³க³ஹணே ஆபத்தி பாசித்தியமேவ. ஸாபத்திகோ ஹோதீதி எத்த² காய ஆபத்தியா ஸாபத்திகோ ஹோதீதி? து³க்கடாபத்தியாதி ஏகே. ந யாய காயசி, கேவலங் அட்டா²னே சோதே³தீதி கத்வா ‘‘ஸாபத்திகோ’’தி வுத்தங். யதா² கத²ந்தி? ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ ஸத்³தி⁴விஹாரிகோ பணாமேதப்³போ³…பே॰… பணாமெந்தோ அனதிஸாரோ’’தி (மஹாவ॰ 68) எத்த² ந ஸம்மாவத்தந்தங்யேவ அபணாமெந்தஸ்ஸ து³க்கடங் வுத்தங். யதா²ஹ – ‘‘ந ச, பி⁴க்க²வே, அஸம்மாவத்தந்தோ ந பணாமேதப்³போ³, யோ ந பணாமெய்ய, ஆபத்திது³க்கடஸ்ஸா’’தி (மஹாவ॰ 68), தஸ்மா அதி⁴மத்தபேமாதி³அபா⁴வேபி அபணாமெந்தஸ்ஸ அனாபத்தி தி³ஸ்ஸதி. அபிச ‘‘ஸாதிஸாரோ ஹோதீ’’தி வுத்தங். ஏவங்ஸம்பத³மித³ங் த³ட்ட²ப்³ப³ங். அட்ட²கதா²ய ‘‘ஸாதிஸாரோ ஹோதீதி ஸதோ³ஸோ ஹோதி, ஆபத்திங் ஆபஜ்ஜதீ’’தி (மஹாவ॰ அட்ட²॰ 68) வுத்தத்தா ந யுத்தந்தி சே? ந, தத³னந்தரமேவ தங்மிச்சா²கா³ஹனிவத்தனத்த²ங், தஸ்மா ‘‘ந ஸம்மாவத்தந்தோ பணாமேதப்³போ³’’தி வுத்தத்தா அனாபத்திகா கதாதி. து³க்கடாபத்தி ஹோதீதி ஆசரியோ, வீமங்ஸிதப்³ப³ங். ‘‘கப்பியப⁴ண்ட³ம்பி அகப்பியமேவாதி தளாகதோ நிப்ப²ன்னத⁴ஞ்ஞேன பரிவத்தெத்வா லத்³த⁴ங் கோ³ரஸம்பி ந வட்டதீ’’தி வுத்தங்.
Sabbattha sampaṭicchanaṃ nāma ‘‘uggaṇheyya vā uggaṇhāpeyyavā upanikkhittaṃ vā sādiyeyyā’’ti evaṃ vuttalakkhaṇameva. Evaṃ santepi katthaci paṭikkhipitabbaṃ, katthaci na paṭikkhipitabbaṃ, katthaci paṭikkhittaṃ sādituṃ vaṭṭati, evaṃ appaṭikkhittaṃ kiñci vaṭṭati, idaṃ sabbampi dassetuṃ ‘‘sace panā’’ti vitthāro āraddho. Tattha ‘‘cetiyassa…pe… na vaṭṭatī’’ti vacanato appaṭikkhittaṃ vihārassa dinnaṃ sādituṃ vaṭṭatīti siddhaṃ. Tathā therassa ‘‘mātuyā demā’’tiādinā vuttepi paṭiggahaṇe āpatti pācittiyameva. Sāpattiko hotīti ettha kāya āpattiyā sāpattiko hotīti? Dukkaṭāpattiyāti eke. Na yāya kāyaci, kevalaṃ aṭṭhāne codetīti katvā ‘‘sāpattiko’’ti vuttaṃ. Yathā kathanti? ‘‘Pañcahi, bhikkhave, aṅgehi samannāgato saddhivihāriko paṇāmetabbo…pe… paṇāmento anatisāro’’ti (mahāva. 68) ettha na sammāvattantaṃyeva apaṇāmentassa dukkaṭaṃ vuttaṃ. Yathāha – ‘‘na ca, bhikkhave, asammāvattanto na paṇāmetabbo, yo na paṇāmeyya, āpattidukkaṭassā’’ti (mahāva. 68), tasmā adhimattapemādiabhāvepi apaṇāmentassa anāpatti dissati. Apica ‘‘sātisāro hotī’’ti vuttaṃ. Evaṃsampadamidaṃ daṭṭhabbaṃ. Aṭṭhakathāya ‘‘sātisāro hotīti sadoso hoti, āpattiṃ āpajjatī’’ti (mahāva. aṭṭha. 68) vuttattā na yuttanti ce? Na, tadanantarameva taṃmicchāgāhanivattanatthaṃ, tasmā ‘‘na sammāvattanto paṇāmetabbo’’ti vuttattā anāpattikā katāti. Dukkaṭāpatti hotīti ācariyo, vīmaṃsitabbaṃ. ‘‘Kappiyabhaṇḍampi akappiyamevāti taḷākato nipphannadhaññena parivattetvā laddhaṃ gorasampi na vaṭṭatī’’ti vuttaṃ.
கப்பியவோஹாரேபி விதா⁴னங் வக்கா²ம, ஸெய்யதி²த³ங் – ‘‘உத³கவஸேனா’’திஆதி³. து³ப்³பி³னிப்³போ⁴க³ங் ஹோதீதி இத³ங் பரதோ ‘‘தஸ்ஸேவ அகப்பியங். கஸ்மா? த⁴ஞ்ஞஸ்ஸ விசாரிதத்தா’’தி இமினா அஸதி³ஸங், தஸ்மா ஸுவுத்தங். இத³ஞ்ஹி பி⁴க்கு²ஸ்ஸ பயோக³வஸேன ஆதி³தோ பட்டா²ய உப்பன்னேன மிஸ்ஸந்தி. அகதபுப்³ப³ங் நவஸஸ்ஸங் நாம. க²லே வா ட²த்வா ரக்க²தீதி ‘‘இத³ங் வா எத்தகங் வா மா க³ண்ஹ, இத³ங் க³ஹேதுங் லப்³ப⁴தீ’’தி வா ‘‘இதோ அபனேஹி, இத⁴ புஞ்ஜங் கரோஹீ’’தி ஏவமாதி³னா வா பயோகே³ன சே ரக்க²தி, தங் அகப்பியங். ‘‘ஸசே ‘மயிடி²தே ரக்கி²தங் ஹோதீ’தி ரக்க²தி, க³ண்ஹந்தே வா பஸ்ஸித்வா ‘கிங் கரோதா²’தி, ப⁴ணதி வட்டதீ’’தி வுத்தங், தங் யுத்தங். ரூபியபடிக்³க³ஹணஸிக்கா²பதே³ ‘‘த்³வாரங் பித³ஹித்வா ரக்க²ந்தேன வஸிதப்³ப³’’ந்தி ஹி வுத்தங். தஸ்ஸேவ தங் அகப்பியங். கஸ்மா? அபுப்³ப³ஸ்ஸ அனுப்பாதி³தத்தா. ஹெட்டா² ‘‘ஸஸ்ஸங் கத்வா ஆஹரதா²’’தி வத்துங் பன ந வட்டதீதி. பண்ணேபி ஏஸேவ நயோ. ‘‘பகதியா ஸயமேவ கரொந்தானங் உஸ்ஸாஹஜனநதோ’’தி வுத்தங். கஸ்மா? ‘‘கஹாபணானங் விசாரிதத்தா’’தி வசனதோ, பகே³வ உட்டா²பிதத்தாதி ஸித்³த⁴ங் ஹோதி. ஸசே தா³யகா வா ஸங்க⁴ஸ்ஸ கா³மகெ²த்தாராமாதி³ங் கேணியா க³ஹிதமனுஸ்ஸா வா தத்த² குடும்பி³னோ ‘‘இமே ஸங்க⁴ஸ்ஸ கஹாபணா ஆஹடா’’தி வத³ந்தி, ‘‘ந கப்பதீ’’தி எத்தகமேவ வத்தப்³ப³ங். கப்பியகாரகாவ சே வத³ந்தி, ‘‘ஸங்க⁴ஸ்ஸ கஹாபணா ந கப்பந்தி, ஸப்பிஆதீ³னி வட்டந்தீ’’தி வத்தப்³ப³ங், தஸ்மா ‘‘ஸங்க⁴ஸ்ஸ கப்பியகாரகே வா கு³த்தட்டா²னங் வா ஆசிக்க²தா²’’தி வத்வா தேஹி ஸம்பாதி³தங் கேனசி அகத்தப்³ப³தாய ‘‘இமினா ஸப்பிங் ஆஹராஹீ’’தி விசாரேதி நிட்டா²பெத்வா இதரேஸங் கப்பியங் பரதோ பத்தசதுக்கே சதுத்த²பத்தோ விய. வுத்தஞ்ஹி தத்த² ‘‘இமே கஹாபணே க³ஹெத்வா இமங் தே³ஹீ’தி கஹாபணே தா³பெத்வா க³ஹிதோ, அயங் பத்தோ ஏதஸ்ஸேவ பி⁴க்கு²னோ ந வட்டதி, து³ப்³பி³சாரிதத்தா, அஞ்ஞேஸங் பன வட்டதி, மூலஸ்ஸ அஸம்படிச்சி²தத்தா’’திஆதி³. யதி³ ஏவங் ஸப்³பே³ஸங் அகப்பியங். கஸ்மா? கஹாபணானங் விசாரிதத்தாதி. இத³ங் து³வுத்தந்தி சே? ந, மூலஸ்ஸ ஸம்படிச்சி²தட்டா²னங் ஸந்தா⁴ய இமஸ்ஸ வுத்தத்தா பத்தசதுக்கே து³தியததியபத்தா விய, தேனேவ வுத்தங் ஸயங்காரிவாரே ‘‘ந கப்பதீ’’தி எத்தகமேவ வத்தப்³ப³’ந்தி. ததோ பரங் மூலங் ஸம்படிச்ச²தி நாம.
Kappiyavohārepi vidhānaṃ vakkhāma, seyyathidaṃ – ‘‘udakavasenā’’tiādi. Dubbinibbhogaṃ hotīti idaṃ parato ‘‘tasseva akappiyaṃ. Kasmā? Dhaññassa vicāritattā’’ti iminā asadisaṃ, tasmā suvuttaṃ. Idañhi bhikkhussa payogavasena ādito paṭṭhāya uppannena missanti. Akatapubbaṃ navasassaṃ nāma. Khale vā ṭhatvā rakkhatīti ‘‘idaṃ vā ettakaṃ vā mā gaṇha, idaṃ gahetuṃ labbhatī’’ti vā ‘‘ito apanehi, idha puñjaṃ karohī’’ti evamādinā vā payogena ce rakkhati, taṃ akappiyaṃ. ‘‘Sace ‘mayiṭhite rakkhitaṃ hotī’ti rakkhati, gaṇhante vā passitvā ‘kiṃ karothā’ti, bhaṇati vaṭṭatī’’ti vuttaṃ, taṃ yuttaṃ. Rūpiyapaṭiggahaṇasikkhāpade ‘‘dvāraṃ pidahitvā rakkhantena vasitabba’’nti hi vuttaṃ. Tasseva taṃ akappiyaṃ. Kasmā? Apubbassa anuppāditattā. Heṭṭhā ‘‘sassaṃ katvā āharathā’’ti vattuṃ pana na vaṭṭatīti. Paṇṇepi eseva nayo. ‘‘Pakatiyā sayameva karontānaṃ ussāhajananato’’ti vuttaṃ. Kasmā? ‘‘Kahāpaṇānaṃ vicāritattā’’ti vacanato, pageva uṭṭhāpitattāti siddhaṃ hoti. Sace dāyakā vā saṅghassa gāmakhettārāmādiṃ keṇiyā gahitamanussā vā tattha kuṭumbino ‘‘ime saṅghassa kahāpaṇā āhaṭā’’ti vadanti, ‘‘na kappatī’’ti ettakameva vattabbaṃ. Kappiyakārakāva ce vadanti, ‘‘saṅghassa kahāpaṇā na kappanti, sappiādīni vaṭṭantī’’ti vattabbaṃ, tasmā ‘‘saṅghassa kappiyakārake vā guttaṭṭhānaṃ vā ācikkhathā’’ti vatvā tehi sampāditaṃ kenaci akattabbatāya ‘‘iminā sappiṃ āharāhī’’ti vicāreti niṭṭhāpetvā itaresaṃ kappiyaṃ parato pattacatukke catutthapatto viya. Vuttañhi tattha ‘‘ime kahāpaṇe gahetvā imaṃ dehī’ti kahāpaṇe dāpetvā gahito, ayaṃ patto etasseva bhikkhuno na vaṭṭati, dubbicāritattā, aññesaṃ pana vaṭṭati, mūlassa asampaṭicchitattā’’tiādi. Yadi evaṃ sabbesaṃ akappiyaṃ. Kasmā? Kahāpaṇānaṃ vicāritattāti. Idaṃ duvuttanti ce? Na, mūlassa sampaṭicchitaṭṭhānaṃ sandhāya imassa vuttattā pattacatukke dutiyatatiyapattā viya, teneva vuttaṃ sayaṃkārivāre ‘‘na kappatī’’ti ettakameva vattabba’nti. Tato paraṃ mūlaṃ sampaṭicchati nāma.
மஹாவிஸயஸிக்க²த்தா, ராஜஸிக்கா²பத³ங் இத³ங்;
Mahāvisayasikkhattā, rājasikkhāpadaṃ idaṃ;
ரஞ்ஞோ விய து³விஞ்ஞெய்யங், சித்தாதி⁴ப்பாயதோபி வா.
Rañño viya duviññeyyaṃ, cittādhippāyatopi vā.
ராஜஸிக்கா²பத³வண்ணனா நிட்டி²தா.
Rājasikkhāpadavaṇṇanā niṭṭhitā.
நிட்டி²தோ சீவரவக்³கோ³ பட²மோ.
Niṭṭhito cīvaravaggo paṭhamo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 10. ராஜஸிக்கா²பத³ங் • 10. Rājasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
