| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
10. ராஜஸிக்கா²பத³வண்ணனா
10. Rājasikkhāpadavaṇṇanā
537. த³ஸமே ‘‘அஜ்ஜண்ஹோ’’தி ‘‘அஜ்ஜ நோ’’தி வத்தப்³பே³ ஹ-காராக³மங், ந-காரஸ்ஸ ச ண-காரங் கத்வா வுத்தோதி ஆஹ ‘‘அஜ்ஜ ஏகதி³வஸங் அம்ஹாக’’ந்தி.
537. Dasame ‘‘ajjaṇho’’ti ‘‘ajja no’’ti vattabbe ha-kārāgamaṃ, na-kārassa ca ṇa-kāraṃ katvā vuttoti āha ‘‘ajja ekadivasaṃ amhāka’’nti.
538-9. யங் வுத்தங் மாதிகாட்ட²கதா²யங் (கங்கா²॰ அட்ட²॰ ராஜஸிக்கா²பத³வண்ணனா) ‘‘இமினா சீவரசேதாபன்னேன சீவரங் சேதாபெத்வா இத்த²ன்னாமங் பி⁴க்கு²ங் சீவரேன அச்சா²தே³ஹீதி இத³ங் ஆக³மனஸுத்³தி⁴ங் த³ஸ்ஸேதுங் வுத்தங், ஸசே ஹி ‘இத³ங் இத்த²ன்னாமஸ்ஸ பி⁴க்கு²னோ தே³ஹீ’தி பேஸெய்ய, ஆக³மனஸ்ஸ அஸுத்³த⁴த்தா அகப்பியவத்து²ங் ஆரப்³ப⁴ பி⁴க்கு²னா கப்பியகாரகோபி நித்³தி³ஸிதப்³போ³ ந ப⁴வெய்யா’’தி, தங் நிஸ்ஸக்³கி³யவத்து²து³க்கடவத்து²பூ⁴தங் அகப்பியசீவரசேதாபன்னங் ‘‘அஸுகஸ்ஸ பி⁴க்கு²னோ தே³ஹீ’’தி ஏவங் ஆக³மனஸுத்³தி⁴யா அஸதி, ஸிக்கா²பதே³ ஆக³தனயேன தூ³தவசனே ச அஸுத்³தே⁴ ஸப்³ப³தா² படிக்கே²போ ஏவ காதுங் வட்டதி, ந பன ‘‘சீவரஞ்ச கோ² மயங் படிக்³க³ண்ஹாமா’’தி வத்துங், தத³னுஸாரேன ந வெய்யாவச்சகரஞ்ச நித்³தி³ஸிதுங் ஆக³மனதூ³தவசனானங் உபி⁴ன்னங் அஸுத்³த⁴த்தா. பாளியங் ஆக³தனயேன பன ஆக³மனஸுத்³தி⁴யா ஸதி தூ³தவசனே அஸுத்³தே⁴பி ஸிக்கா²பதே³ ஆக³தனயேன ஸப்³ப³ங் காதுங் வட்டதீதி த³ஸ்ஸனத்த²ங் வுத்தங். தேன ச யதா² தூ³தவசனாஸுத்³தி⁴யம்பி ஆக³மனே ஸுத்³தே⁴ வெய்யாவச்சகரம்பி நித்³தி³ஸிதுங் வட்டதி, ஏவங் ஆக³மனாஸுத்³தி⁴யம்பி தூ³தவசனே ஸுத்³தே⁴ வட்டதி ஏவாதி அயமத்தோ² அத்த²தோ ஸித்³தோ⁴வ ஹோதி, உப⁴யஸுத்³தி⁴யங் வத்தப்³ப³மேவ நத்தீ²தி உப⁴யாஸுத்³தி⁴பக்க²மேவ ஸந்தா⁴ய மாதிகாட்ட²கதா²யங் (கங்கா²॰ அட்ட²॰ ராஜஸிக்கா²பத³வண்ணனா) ‘‘கப்பியகாரகோபி நித்³தி³ஸிதப்³போ³ ந ப⁴வெய்யா’’தி வுத்தந்தி வேதி³தப்³ப³ங்.
538-9. Yaṃ vuttaṃ mātikāṭṭhakathāyaṃ (kaṅkhā. aṭṭha. rājasikkhāpadavaṇṇanā) ‘‘iminā cīvaracetāpannena cīvaraṃ cetāpetvā itthannāmaṃ bhikkhuṃ cīvarena acchādehīti idaṃ āgamanasuddhiṃ dassetuṃ vuttaṃ, sace hi ‘idaṃ itthannāmassa bhikkhuno dehī’ti peseyya, āgamanassa asuddhattā akappiyavatthuṃ ārabbha bhikkhunā kappiyakārakopi niddisitabbo na bhaveyyā’’ti, taṃ nissaggiyavatthudukkaṭavatthubhūtaṃ akappiyacīvaracetāpannaṃ ‘‘asukassa bhikkhuno dehī’’ti evaṃ āgamanasuddhiyā asati, sikkhāpade āgatanayena dūtavacane ca asuddhe sabbathā paṭikkhepo eva kātuṃ vaṭṭati, na pana ‘‘cīvarañca kho mayaṃ paṭiggaṇhāmā’’ti vattuṃ, tadanusārena na veyyāvaccakarañca niddisituṃ āgamanadūtavacanānaṃ ubhinnaṃ asuddhattā. Pāḷiyaṃ āgatanayena pana āgamanasuddhiyā sati dūtavacane asuddhepi sikkhāpade āgatanayena sabbaṃ kātuṃ vaṭṭatīti dassanatthaṃ vuttaṃ. Tena ca yathā dūtavacanāsuddhiyampi āgamane suddhe veyyāvaccakarampi niddisituṃ vaṭṭati, evaṃ āgamanāsuddhiyampi dūtavacane suddhe vaṭṭati evāti ayamattho atthato siddhova hoti, ubhayasuddhiyaṃ vattabbameva natthīti ubhayāsuddhipakkhameva sandhāya mātikāṭṭhakathāyaṃ (kaṅkhā. aṭṭha. rājasikkhāpadavaṇṇanā) ‘‘kappiyakārakopi niddisitabbo na bhaveyyā’’ti vuttanti veditabbaṃ.
யங் பனெத்த² ஸாரத்த²தீ³பனியங் (ஸாரத்த²॰ டீ॰ 2.537-539) ‘‘ஆக³மனஸ்ஸ ஸுத்³தி⁴யா வா அஸுத்³தி⁴யா வா விஸேஸப்பயோஜனங் ந தி³ஸ்ஸதீ’’திஆதி³ வுத்தங், தங் மாதிகாட்ட²கதா²வசனஸ்ஸ அதி⁴ப்பாயங் அஸல்லக்கெ²த்வா வுத்தங் யதா²வுத்தனயேன ஆக³மனஸுத்³தி⁴ஆதி³னா ஸப்பயோஜனத்தா. யோ பனெத்த² ‘‘மூலஸாமிகேன கப்பியவோஹாரவஸேன, பேஸிதஸ்ஸ தூ³தஸ்ஸ அகப்பியவோஹாரவஸேன ச வத³தோபி கப்பியகாரகோ நித்³தி³ஸிதப்³போ³ ப⁴வெய்யா’’தி அனிட்ட²ப்பஸங்கோ³ வுத்தோ, ஸோ அனிட்ட²ப்பஸங்கோ³ ஏவ ந ஹோதி அபி⁴மதத்தா. ததா² ஹி ஸிக்கா²பதே³ ஏவ ‘‘படிக்³க³ண்ஹாது ஆயஸ்மா சீவரசேதாபன்ன’’ந்தி அகப்பியவோஹாரேன வத³தோ தூ³தஸ்ஸ கப்பியேன கம்மேன வெய்யாவச்சகரோ நித்³தி³ஸிதப்³போ³ வுத்தோ ஆக³மனஸ்ஸ ஸுத்³த⁴த்தா, ஆக³மனஸ்ஸாபி அஸுத்³தி⁴யங் பன கப்பியேனாபி கம்மேன வெய்யாவச்சகரோ ந நித்³தி³ஸிதப்³போ³தி அத்தே²வ ஆக³மனஸ்ஸ ஸுத்³தி⁴அஸுத்³தீ⁴ஸு பயோஜனங். கத²ங் பன தூ³தவசனேன ஆக³மனஸுத்³தி⁴ விஞ்ஞாயதீதி? நாயங் பா⁴ரோ. தூ³தேன ஹி அகப்பியவோஹாரேனேவ வுத்தே ஏவ ஆக³மனஸுத்³தி⁴ க³வேஸிதப்³பா³, ந இதரதா², தத்த² ச தஸ்ஸ வசனக்கமேன புச்சி²த்வா ச யுத்திஆதீ³ஹி ச ஸக்கா விஞ்ஞாதுங். இதா⁴பி ஹி ஸிக்கா²பதே³ ‘‘சீவரசேதாபன்னங் ஆப⁴த’’ந்தி தூ³தவசனேனேவ சீவரங் கிணித்வா தா³துங் பேஸிதபா⁴வோ விஞ்ஞாயதி. யதி³ ஹி ஸப்³ப³தா² ஆக³மனஸுத்³தி⁴ ந விஞ்ஞாயதி, படிக்கே²போ ஏவ கத்தப்³போ³தி.
Yaṃ panettha sāratthadīpaniyaṃ (sārattha. ṭī. 2.537-539) ‘‘āgamanassa suddhiyā vā asuddhiyā vā visesappayojanaṃ na dissatī’’tiādi vuttaṃ, taṃ mātikāṭṭhakathāvacanassa adhippāyaṃ asallakkhetvā vuttaṃ yathāvuttanayena āgamanasuddhiādinā sappayojanattā. Yo panettha ‘‘mūlasāmikena kappiyavohāravasena, pesitassa dūtassa akappiyavohāravasena ca vadatopi kappiyakārako niddisitabbo bhaveyyā’’ti aniṭṭhappasaṅgo vutto, so aniṭṭhappasaṅgo eva na hoti abhimatattā. Tathā hi sikkhāpade eva ‘‘paṭiggaṇhātu āyasmā cīvaracetāpanna’’nti akappiyavohārena vadato dūtassa kappiyena kammena veyyāvaccakaro niddisitabbo vutto āgamanassa suddhattā, āgamanassāpi asuddhiyaṃ pana kappiyenāpi kammena veyyāvaccakaro na niddisitabboti attheva āgamanassa suddhiasuddhīsu payojanaṃ. Kathaṃ pana dūtavacanena āgamanasuddhi viññāyatīti? Nāyaṃ bhāro. Dūtena hi akappiyavohāreneva vutte eva āgamanasuddhi gavesitabbā, na itarathā, tattha ca tassa vacanakkamena pucchitvā ca yuttiādīhi ca sakkā viññātuṃ. Idhāpi hi sikkhāpade ‘‘cīvaracetāpannaṃ ābhata’’nti dūtavacaneneva cīvaraṃ kiṇitvā dātuṃ pesitabhāvo viññāyati. Yadi hi sabbathā āgamanasuddhi na viññāyati, paṭikkhepo eva kattabboti.
பாளியஞ்ச ‘‘சீவரஞ்ச கோ² மயங் படிக்³க³ண்ஹாமா’’திஆதி³ தூ³தவசனஸ்ஸ அகப்பியத்தேபி ஆக³மனஸுத்³தி⁴யா ஸதி படிபஜ்ஜனவிதி⁴த³ஸ்ஸனத்த²ங் வுத்தங். ‘‘ஏஸோ கோ²…பே॰… ந வத்தப்³போ³ ‘தஸ்ஸ தே³ஹீ’’’திஆதி³ அகப்பியவத்து²ஸாதி³யனபரிமோசனத்த²ங் வுத்தங். ‘‘ஸஞ்ஞத்தோ’’திஆதி³ ‘‘ஏவங் தூ³தேன புன வுத்தே ஏவ சோதே³துங் வட்டதி, ந இதரதா²’’தி த³ஸ்ஸனத்த²ங் வுத்தங். ‘‘ந வத்தப்³போ³ ‘தே³ஹி மே சீவரங்…பே॰… சேதாபேஹி மே சீவர’’’ந்தி இத³ங் தூ³தேனாப⁴தரூபியங் படிக்³க³ஹேதுங் அத்தனா நித்³தி³ட்ட²கப்பியகாரகத்தாவ ‘‘தே³ஹி மே சீவரங்…பே॰… சேதாபேஹி மே சீவர’’ந்தி வத³ந்தோ ரூபியஸ்ஸ பகதத்தா தேன ரூபியேன பரிவத்தெத்வா ‘‘தே³ஹி சேதாபேஹீ’’தி ரூபியஸங்வோஹாரங் ஸமாபஜ்ஜந்தோ நாம ஹோதீதி தங் தோ³ஸங் தூ³ரதோ பரிவஜ்ஜேதுங் வுத்தங் ரூபியபடிக்³க³ஹணேன ஸங்க⁴மஜ்ஜே² நிஸ்ஸட்ட²ரூபியே விய. வுத்தஞ்ஹி தத்த² ‘‘ந வத்தப்³போ³ இமங் வா இமங் வா ஆஹரா’’தி. தஸ்மா ந இத³ங் விஞ்ஞத்திதோ³ஸங் பரிவஜ்ஜேதுங் வுத்தந்தி வேதி³தப்³ப³ங், ‘‘அத்தோ² மே, ஆவுஸோ, சீவரேனா’’திபி அவத்தப்³ப³தாபஸங்க³தோ, தேனேவ தூ³தனித்³தி³ட்டே²ஸு ரூபியஸங்வோஹாரஸங்காபா⁴வதோ அஞ்ஞங் கப்பியகாரகங் ட²பெத்வாபி ஆஹராபேதப்³ப³ந்தி வுத்தங். தத்தா²பி ‘‘தூ³தேன ட²பிதரூபியேன சேதாபெத்வா சீவரங் ஆஹராபேஹீ’’தி அவத்வா கேவலங் ‘‘சீவரங் ஆஹராபேஹீ’’தி ஏவங் ஆஹராபேதப்³ப³ந்தி அதி⁴ப்பாயோ க³ஹேதப்³போ³. டா²னங் ப⁴ஞ்ஜதீதி எத்த² டா²னந்தி டி²தியா ச காரணஸ்ஸ ச நாமங், தஸ்மா ஆஸனே நிஸீத³னேன டா²னம்பி குப்பதி, ஆக³தகாரணம்பி தேஸங் ந விஞ்ஞாயதி. டி²தங் பன அகோபெத்வா ஆமிஸபடிக்³க³ஹணாதீ³ஸு ஆக³தகாரணமேவ ப⁴ஞ்ஜதி, ந டா²னங். தேனாஹ ‘‘ஆக³தகாரணங் ப⁴ஞ்ஜதீ’’தி . கேசி பன ‘‘ஆமிஸபடிக்³க³ஹணாதி³னா டா²னம்பி ப⁴ஞ்ஜதீ’’தி வத³ந்தி, தங் அட்ட²கதா²ய ந ஸமேதி.
Pāḷiyañca ‘‘cīvarañca kho mayaṃ paṭiggaṇhāmā’’tiādi dūtavacanassa akappiyattepi āgamanasuddhiyā sati paṭipajjanavidhidassanatthaṃ vuttaṃ. ‘‘Eso kho…pe… na vattabbo ‘tassa dehī’’’tiādi akappiyavatthusādiyanaparimocanatthaṃ vuttaṃ. ‘‘Saññatto’’tiādi ‘‘evaṃ dūtena puna vutte eva codetuṃ vaṭṭati, na itarathā’’ti dassanatthaṃ vuttaṃ. ‘‘Na vattabbo ‘dehi me cīvaraṃ…pe… cetāpehi me cīvara’’’nti idaṃ dūtenābhatarūpiyaṃ paṭiggahetuṃ attanā niddiṭṭhakappiyakārakattāva ‘‘dehi me cīvaraṃ…pe… cetāpehi me cīvara’’nti vadanto rūpiyassa pakatattā tena rūpiyena parivattetvā ‘‘dehi cetāpehī’’ti rūpiyasaṃvohāraṃ samāpajjanto nāma hotīti taṃ dosaṃ dūrato parivajjetuṃ vuttaṃ rūpiyapaṭiggahaṇena saṅghamajjhe nissaṭṭharūpiye viya. Vuttañhi tattha ‘‘na vattabbo imaṃ vā imaṃ vā āharā’’ti. Tasmā na idaṃ viññattidosaṃ parivajjetuṃ vuttanti veditabbaṃ, ‘‘attho me, āvuso, cīvarenā’’tipi avattabbatāpasaṅgato, teneva dūtaniddiṭṭhesu rūpiyasaṃvohārasaṅkābhāvato aññaṃ kappiyakārakaṃ ṭhapetvāpi āharāpetabbanti vuttaṃ. Tatthāpi ‘‘dūtena ṭhapitarūpiyena cetāpetvā cīvaraṃ āharāpehī’’ti avatvā kevalaṃ ‘‘cīvaraṃ āharāpehī’’ti evaṃ āharāpetabbanti adhippāyo gahetabbo. Ṭhānaṃ bhañjatīti ettha ṭhānanti ṭhitiyā ca kāraṇassa ca nāmaṃ, tasmā āsane nisīdanena ṭhānampi kuppati, āgatakāraṇampi tesaṃ na viññāyati. Ṭhitaṃ pana akopetvā āmisapaṭiggahaṇādīsu āgatakāraṇameva bhañjati, na ṭhānaṃ. Tenāha ‘‘āgatakāraṇaṃ bhañjatī’’ti . Keci pana ‘‘āmisapaṭiggahaṇādinā ṭhānampi bhañjatī’’ti vadanti, taṃ aṭṭhakathāya na sameti.
யதஸ்ஸ சீவரசேதாபன்னந்திஆதி³ யேன அத்தனா வெய்யாவச்சகரோ நித்³தி³ட்டோ², சீவரஞ்ச அனிப்பா²தி³தங், தஸ்ஸ கத்தப்³ப³விதி⁴த³ஸ்ஸனங். ஏவங் பி⁴க்கு²னா வத்து²ஸாமிகானங் வுத்தே தே சோதெ³த்வா தெ³ந்தி, வட்டதி ‘‘ஸாமிகா சோதெ³த்வா தெ³ந்தீ’’தி அனாபத்தியங் வுத்தத்தா. தேன ச யோ ஸயங் அசோதெ³த்வா உபாஸகாதீ³ஹி பரியாயேன வத்வா சோதா³பேதி, தேஸு ஸத்தக்க²த்தும்பி சோதெ³த்வா சீவரங் தா³பெந்தேஸு தஸ்ஸ அனாபத்தி ஸித்³தா⁴ ஹோதி ஸிக்கா²பத³ஸ்ஸ அனாணத்திகத்தா.
Yatassacīvaracetāpannantiādi yena attanā veyyāvaccakaro niddiṭṭho, cīvarañca anipphāditaṃ, tassa kattabbavidhidassanaṃ. Evaṃ bhikkhunā vatthusāmikānaṃ vutte te codetvā denti, vaṭṭati ‘‘sāmikā codetvā dentī’’ti anāpattiyaṃ vuttattā. Tena ca yo sayaṃ acodetvā upāsakādīhi pariyāyena vatvā codāpeti, tesu sattakkhattumpi codetvā cīvaraṃ dāpentesu tassa anāpatti siddhā hoti sikkhāpadassa anāṇattikattā.
கேனசி அனித்³தி³ட்டோ² அத்தனோ முகே²னேவ ப்³யாவடபா⁴வங் வெய்யாவச்சகரத்தங் பத்தோ முக²வேவடிகோ. ‘‘அவிசாரேதுகாமதாயா’’தி இமினா விஜ்ஜமானம்பி தா³துங் அனிச்ச²ந்தா அரியாபி வஞ்சனாதி⁴ப்பாயங் வினா வோஹாரதோ நத்தீ²தி வத³ந்தீதி த³ஸ்ஸேதி. பே⁴ஸஜ்ஜக்க²ந்த⁴கே மெண்ட³கஸெட்டி²வத்து²ம்ஹி (மஹாவ॰ 299) வுத்தங் ‘‘ஸந்தி, பி⁴க்க²வே’’திஆதி³வசனமேவ (மஹாவ॰ 299) மெண்ட³கஸிக்கா²பத³ங் நாம. கப்பியகாரகானங் ஹத்தே²தி தூ³தேன நித்³தி³ட்ட²கப்பியகாரகே ஸந்தா⁴ய வுத்தங், ந பன பி⁴க்கு²னா நித்³தி³ட்டே², அனித்³தி³ட்டே² வாதி. தேனாஹ ‘‘எத்த² ச சோத³னாய பமாணங் நத்தீ²’’திஆதி³.
Kenaci aniddiṭṭho attano mukheneva byāvaṭabhāvaṃ veyyāvaccakarattaṃ patto mukhavevaṭiko. ‘‘Avicāretukāmatāyā’’ti iminā vijjamānampi dātuṃ anicchantā ariyāpi vañcanādhippāyaṃ vinā vohārato natthīti vadantīti dasseti. Bhesajjakkhandhake meṇḍakaseṭṭhivatthumhi (mahāva. 299) vuttaṃ ‘‘santi, bhikkhave’’tiādivacanameva (mahāva. 299) meṇḍakasikkhāpadaṃ nāma. Kappiyakārakānaṃ hattheti dūtena niddiṭṭhakappiyakārake sandhāya vuttaṃ, na pana bhikkhunā niddiṭṭhe, aniddiṭṭhe vāti. Tenāha ‘‘ettha ca codanāya pamāṇaṃ natthī’’tiādi.
ஸயங் ஆஹரித்வா த³த³ந்தேஸூதி ஸம்ப³ந்தோ⁴. ‘‘பிண்ட³பாதாதீ³னங் அத்தா²யா’’தி இமினா சீவரத்தா²யேவ ந ஹோதீதி த³ஸ்ஸேதி. ‘‘ஏஸேவ நயோ’’தி இமினா வத்து²ஸாமினா நித்³தி³ட்ட²கப்பியகாரகபே⁴தே³ஸுபி பிண்ட³பாதாதீ³னம்பி அத்தா²ய தி³ன்னே ச டா²னசோத³னாதி³ ஸப்³ப³ங் ஹெட்டா² வுத்தனயேனேவ காதப்³ப³ந்தி த³ஸ்ஸேதி.
Sayaṃ āharitvā dadantesūti sambandho. ‘‘Piṇḍapātādīnaṃ atthāyā’’ti iminā cīvaratthāyeva na hotīti dasseti. ‘‘Eseva nayo’’ti iminā vatthusāminā niddiṭṭhakappiyakārakabhedesupi piṇḍapātādīnampi atthāya dinne ca ṭhānacodanādi sabbaṃ heṭṭhā vuttanayeneva kātabbanti dasseti.
‘‘ஸங்க⁴ங் வா…பே॰… அனாமஸித்வா’’தி வுத்தத்தா ‘‘ஸங்க⁴ஸ்ஸ விஹாரத்தா²ய தே³மா’’திஆதி³னா ஆமஸித்வா வத³ந்தேஸு படிக்கி²பிதப்³ப³மேவ. ‘‘ஸங்கோ⁴ ஸம்படிச்ச²தீ’’தி இத³ங் உக்கட்ட²வஸேன வுத்தங், க³ணாதீ³ஸுபி ஸங்க⁴ஸ்ஸத்தா²ய ஸம்படிச்ச²ந்தேஸுபி படிக்³க³ஹணேபி பரிபோ⁴கே³பி து³க்கடமேவ. ஸாரத்த²தீ³பனியங் ‘‘படிக்³க³ஹணே பாசித்திய’’ந்தி (ஸாரத்த²॰ டீ॰ 2.537-539) வுத்தங், தங் ந யுத்தங் ஸங்க⁴சேதியாதீ³னங் அத்தா²ய து³க்கடஸ்ஸ வுத்தத்தா. சோதே³தீதி தஸ்ஸ தோ³ஸாபா⁴வங் ஞத்வாபி கோதே⁴ன வா லோபே⁴ன வா ப⁴ண்ட³தெ³ய்யந்தி சோதே³தி. ஸோ ஏவ ஹி முஸாவாதா³தி³பச்சயா பாசித்தியது³க்கடாதி³ஆபத்தீஹி ஸாபத்திகோ ஹோதி, கீ³வாதிஸஞ்ஞாய பன வத்வா நித்³தோ³ஸபா⁴வங் ஞத்வா விரமந்தஸ்ஸ நத்தி² ஆபத்தி.
‘‘Saṅghaṃ vā…pe… anāmasitvā’’ti vuttattā ‘‘saṅghassa vihāratthāya demā’’tiādinā āmasitvā vadantesu paṭikkhipitabbameva. ‘‘Saṅgho sampaṭicchatī’’ti idaṃ ukkaṭṭhavasena vuttaṃ, gaṇādīsupi saṅghassatthāya sampaṭicchantesupi paṭiggahaṇepi paribhogepi dukkaṭameva. Sāratthadīpaniyaṃ ‘‘paṭiggahaṇe pācittiya’’nti (sārattha. ṭī. 2.537-539) vuttaṃ, taṃ na yuttaṃ saṅghacetiyādīnaṃ atthāya dukkaṭassa vuttattā. Codetīti tassa dosābhāvaṃ ñatvāpi kodhena vā lobhena vā bhaṇḍadeyyanti codeti. So eva hi musāvādādipaccayā pācittiyadukkaṭādiāpattīhi sāpattiko hoti, gīvātisaññāya pana vatvā niddosabhāvaṃ ñatvā viramantassa natthi āpatti.
தளாகங் கெ²த்தே பவிட்ட²த்தா ‘‘ந ஸம்படிச்சி²தப்³ப³’’ந்தி வுத்தங். சத்தாரோ பச்சயே ஸங்கோ⁴ பரிபு⁴ஞ்ஜதூதி தே³தி, வட்டதீதி எத்த² ‘‘பி⁴க்கு²ஸங்க⁴ஸ்ஸ சதுபச்சயபரிபோ⁴க³த்தா²ய தளாகங் த³ம்மீ’’தி வா ‘‘பி⁴க்கு²ஸங்கோ⁴ சத்தாரோ பச்சயே பரிபு⁴ஞ்ஜிதுங் தளாகங் த³ம்மீ’’தி வா ‘‘இதோ தளாகதோ உப்பன்னே சத்தாரோ பச்சயே த³ம்மீ’’தி வா வத்தும்பி வட்டதி, இத³ஞ்ச ஸங்க⁴ஸ்ஸ பரிபோ⁴க³த்தா²ய தி³ய்யமானஞ்ஞேவ ஸந்தா⁴ய வுத்தங், புக்³க³லஸ்ஸ பன ஏவம்பி தி³ன்னங் தளாககெ²த்தாதி³ ந வட்டதி. ஸுத்³த⁴சித்தஸ்ஸ பன உத³கபரிபோ⁴க³த்த²ங் கூபபொக்க²ரணீஆத³யோ வட்டந்தி. ‘‘ஸங்க⁴ஸ்ஸ தளாகங் அத்தி², தங் கத²’’ந்தி ஹி ஆதி³னா ஸப்³ப³த்த² ஸங்க⁴வஸேனேவ வுத்தங். ஹத்தே²தி வஸே.
Taḷākaṃ khette paviṭṭhattā ‘‘na sampaṭicchitabba’’nti vuttaṃ. Cattāro paccaye saṅgho paribhuñjatūti deti, vaṭṭatīti ettha ‘‘bhikkhusaṅghassa catupaccayaparibhogatthāya taḷākaṃ dammī’’ti vā ‘‘bhikkhusaṅgho cattāro paccaye paribhuñjituṃ taḷākaṃ dammī’’ti vā ‘‘ito taḷākato uppanne cattāro paccaye dammī’’ti vā vattumpi vaṭṭati, idañca saṅghassa paribhogatthāya diyyamānaññeva sandhāya vuttaṃ, puggalassa pana evampi dinnaṃ taḷākakhettādi na vaṭṭati. Suddhacittassa pana udakaparibhogatthaṃ kūpapokkharaṇīādayo vaṭṭanti. ‘‘Saṅghassa taḷākaṃ atthi, taṃ katha’’nti hi ādinā sabbattha saṅghavaseneva vuttaṃ. Hattheti vase.
‘‘ட²பேதா²தி வுத்தே’’தி இத³ங் ஸாமீசிவஸேன வுத்தங், அவுத்தேபி ட²பெந்தஸ்ஸ தோ³ஸோ நத்தி². தேனாஹ ‘‘உத³கங் வாரேதுங் லப்³ப⁴தீ’’தி. ஸஸ்ஸகாலேபி தாஸெத்வா முஞ்சிதுங் வட்டதி, அமுஞ்சதோ பன ப⁴ண்ட³தெ³ய்யங். புன தே³தீதி அச்சி²ந்தி³த்வா புன தே³தி, ஏவம்பி வட்டதீதி ஸம்ப³ந்தோ⁴. இமினா ‘‘யேன கேனசி இஸ்ஸரேன ‘பரிச்சத்தமித³ங் பி⁴க்கூ²ஹி, அஸ்ஸாமிக’ந்திஸஞ்ஞாய அத்தனா க³ஹெத்வா தி³ன்னங் வட்டதீ’’தி த³ஸ்ஸேதி. கப்பியவோஹாரேபி வினிச்ச²யங் வக்கா²மாதி பாட²ஸேஸோ.
‘‘Ṭhapethāti vutte’’ti idaṃ sāmīcivasena vuttaṃ, avuttepi ṭhapentassa doso natthi. Tenāha ‘‘udakaṃ vāretuṃ labbhatī’’ti. Sassakālepi tāsetvā muñcituṃ vaṭṭati, amuñcato pana bhaṇḍadeyyaṃ. Puna detīti acchinditvā puna deti, evampi vaṭṭatīti sambandho. Iminā ‘‘yena kenaci issarena ‘pariccattamidaṃ bhikkhūhi, assāmika’ntisaññāya attanā gahetvā dinnaṃ vaṭṭatī’’ti dasseti. Kappiyavohārepi vinicchayaṃ vakkhāmāti pāṭhaseso.
உத³கவஸேனாதி உத³கபரிபோ⁴க³த்த²ங். ‘‘ஸுத்³த⁴சித்தான’’ந்தி இத³ங் ஸஹத்தே²ன ச அகப்பியவோஹாரேன ச கரொந்தே ஸந்தா⁴ய வுத்தங். ஸஸ்ஸஸம்பாத³னத்த²ந்தி ஏவங் அஸுத்³த⁴சித்தானம்பி பன ஸயங் அகத்வா கப்பியவோஹாரேன ஆணாபேதுங் வட்டதி ஏவ. ‘‘கப்பியகாரகங் ட²பேதுங் ந வட்டதீ’’தி இத³ங் ஸஹத்தா²தி³னா கததளாகத்தா ‘‘அஸாருப்ப’’ந்தி வுத்தங், ட²பெந்தஸ்ஸ, பன தங் பச்சயங் பரிபு⁴ஞ்ஜந்தஸ்ஸபி வா ஸங்க⁴ஸ்ஸ ஆபத்தி ந விஞ்ஞாயதி, அட்ட²கதா²பமாணேன வா எத்த² ஆபத்தி க³ஹேதப்³பா³. லஜ்ஜிபி⁴க்கு²னாதி லஜ்ஜினாபி, பகே³வ அலஜ்ஜினா மத்திகுத்³த⁴ரணாதீ³ஸு காராபிதேஸூதி அதி⁴ப்பாயோ. நவஸஸ்ஸேதி அகதபுப்³பே³ கேதா³ரே. ‘‘கஹாபணே’’தி இமினா த⁴ஞ்ஞுட்டா²பனே தஸ்ஸேவ அகப்பியந்தி த³ஸ்ஸேதி, த⁴ஞ்ஞுட்டா²பனே சஸ்ஸ பயோகே³பி து³க்கடமேவ, ந கஹாபணுட்டா²பனே விய.
Udakavasenāti udakaparibhogatthaṃ. ‘‘Suddhacittāna’’nti idaṃ sahatthena ca akappiyavohārena ca karonte sandhāya vuttaṃ. Sassasampādanatthanti evaṃ asuddhacittānampi pana sayaṃ akatvā kappiyavohārena āṇāpetuṃ vaṭṭati eva. ‘‘Kappiyakārakaṃ ṭhapetuṃ na vaṭṭatī’’ti idaṃ sahatthādinā katataḷākattā ‘‘asāruppa’’nti vuttaṃ, ṭhapentassa, pana taṃ paccayaṃ paribhuñjantassapi vā saṅghassa āpatti na viññāyati, aṭṭhakathāpamāṇena vā ettha āpatti gahetabbā. Lajjibhikkhunāti lajjināpi, pageva alajjinā mattikuddharaṇādīsu kārāpitesūti adhippāyo. Navasasseti akatapubbe kedāre. ‘‘Kahāpaṇe’’ti iminā dhaññuṭṭhāpane tasseva akappiyanti dasseti, dhaññuṭṭhāpane cassa payogepi dukkaṭameva, na kahāpaṇuṭṭhāpane viya.
‘‘கஸத² வபதா²’’தி வசனே ஸப்³பே³ஸம்பி அகப்பியங் ஸியாதி ஆஹ ‘‘அவத்வா’’தி. எத்தகோ நாம பா⁴கோ³தி எத்த² எத்தகோ கஹாபணோதி இத³ம்பி ஸந்தா⁴ய வத³தி. ததா² வுத்தேபி ஹி ததா³ கஹாபணானங் அவிஜ்ஜமானத்தா ஆயதிங் உப்பன்னங் அஞ்ஞேஸங் வட்டதி ஏவ. தேனாஹ ‘‘தஸ்ஸேவ தங் அகப்பிய’’ந்தி. தஸ்ஸ பன ஸப்³ப³பயோகே³ஸு, பரிபோ⁴கே³ஸுபி து³க்கடங். கேசி பன ‘‘த⁴ஞ்ஞபரிபோ⁴கே³ ஏவ ஆபத்தி, ந புப்³ப³பயோகே³’’தி வத³ந்தி, தங் ந யுத்தங், யேன மினநரக்க²ணாதி³பயோகே³ன பச்சா² த⁴ஞ்ஞபரிபோ⁴கே³ ஆபத்தி ஹோதி, தஸ்ஸ பயோக³ஸ்ஸ கரணே அனாபத்தியா அயுத்தத்தா. பரியாயகதா²ய பன ஸப்³ப³த்த² அனாபத்தி. தேனேவ ‘‘எத்தகேஹி வீஹீஹி இத³ஞ்சித³ஞ்ச ஆஹரதா²’’தி நியமவசனே அகப்பியங் வுத்தங், கஹாபணவிசாரணேபி ஏஸேவ நயோ. வத்து² ச ஏவரூபங் நாம ஸங்விஜ்ஜதி, கப்பியகாரகோ நத்தீ²தி வத்தப்³ப³ந்திஆதி³வசனஞ்செத்த² ஸாத⁴கங்.
‘‘Kasatha vapathā’’ti vacane sabbesampi akappiyaṃ siyāti āha ‘‘avatvā’’ti. Ettako nāma bhāgoti ettha ettako kahāpaṇoti idampi sandhāya vadati. Tathā vuttepi hi tadā kahāpaṇānaṃ avijjamānattā āyatiṃ uppannaṃ aññesaṃ vaṭṭati eva. Tenāha ‘‘tasseva taṃ akappiya’’nti. Tassa pana sabbapayogesu, paribhogesupi dukkaṭaṃ. Keci pana ‘‘dhaññaparibhoge eva āpatti, na pubbapayoge’’ti vadanti, taṃ na yuttaṃ, yena minanarakkhaṇādipayogena pacchā dhaññaparibhoge āpatti hoti, tassa payogassa karaṇe anāpattiyā ayuttattā. Pariyāyakathāya pana sabbattha anāpatti. Teneva ‘‘ettakehi vīhīhi idañcidañca āharathā’’ti niyamavacane akappiyaṃ vuttaṃ, kahāpaṇavicāraṇepi eseva nayo. Vatthu ca evarūpaṃ nāma saṃvijjati, kappiyakārako natthīti vattabbantiādivacanañcettha sādhakaṃ.
வனங் த³ம்மி…பே॰… வட்டதீதி எத்த² நிவாஸட்டா²னத்தா புக்³க³லஸ்ஸாபி ஸுத்³த⁴சித்தேன க³ஹேதுங் வட்டதி. ஸீமங் தே³மாதி விஹாரஸீமாதி³ஸாதா⁴ரணவசனேன வுத்தத்தா ‘‘வட்டதீ’’தி வுத்தங்.
Vanaṃ dammi…pe… vaṭṭatīti ettha nivāsaṭṭhānattā puggalassāpi suddhacittena gahetuṃ vaṭṭati. Sīmaṃ demāti vihārasīmādisādhāraṇavacanena vuttattā ‘‘vaṭṭatī’’ti vuttaṃ.
‘‘வெய்யாவச்சகர’’ந்திஆதி³னா வுத்தேபி புக்³க³லஸ்ஸபி தா³ஸங் க³ஹேதுங் வட்டதி ‘‘அனுஜானாமி, பி⁴க்க²வே, ஆராமிக’’ந்தி (பாரா॰ 619; மஹாவ॰ 270) விஸேஸெத்வா அனுஞ்ஞாதத்தா, தஞ்ச கோ² பிலிந்த³வச்சே²ன க³ஹிதபரிபு⁴த்தக்கமேன, ந க³ஹட்டா²னங் தா³ஸபரிபோ⁴க³க்கமேன. கெ²த்தாத³யோ பன ஸப்³பே³ ஸங்க⁴ஸ்ஸேவ வட்டந்தி பாளியங் புக்³க³லிகவஸேன க³ஹேதுங் அனநுஞ்ஞாதத்தாதி த³ட்ட²ப்³ப³ங். விஹாரஸ்ஸ தே³மாதி ஸங்கி⁴கவிஹாரங் ஸந்தா⁴ய வுத்தங், ‘‘கெ²த்தவத்து²படிக்³க³ஹணா படிவிரதோ ஹோதீ’’திஆதி³னா (தீ³॰ நி॰ 1.10, 194) ஸுத்தந்தேஸு ஆக³தபடிக்கே²போ ப⁴க³வதா ஆபத்தியாபி ஹேதுபா⁴வேன கதோதி ப⁴க³வதோ அதி⁴ப்பாயங் ஜானந்தேஹி ஸங்கீ³திமஹாதே²ரேஹி கெ²த்தபடிக்³க³ஹணாதி³னிஸ்ஸிதோ அயங் ஸப்³போ³பி பாளிமுத்தவினிச்ச²யோ வுத்தோதி க³ஹேதப்³போ³. கப்பியகாரகஸ்ஸ நித்³தி³ட்ட²பா⁴வோ, தூ³தேன அப்பிததா, ததுத்தரி வாயாமோ, தேன படிலாபோ⁴தி இமானெத்த² சத்தாரி அங்கா³னி.
‘‘Veyyāvaccakara’’ntiādinā vuttepi puggalassapi dāsaṃ gahetuṃ vaṭṭati ‘‘anujānāmi, bhikkhave, ārāmika’’nti (pārā. 619; mahāva. 270) visesetvā anuññātattā, tañca kho pilindavacchena gahitaparibhuttakkamena, na gahaṭṭhānaṃ dāsaparibhogakkamena. Khettādayo pana sabbe saṅghasseva vaṭṭanti pāḷiyaṃ puggalikavasena gahetuṃ ananuññātattāti daṭṭhabbaṃ. Vihārassa demāti saṅghikavihāraṃ sandhāya vuttaṃ, ‘‘khettavatthupaṭiggahaṇā paṭivirato hotī’’tiādinā (dī. ni. 1.10, 194) suttantesu āgatapaṭikkhepo bhagavatā āpattiyāpi hetubhāvena katoti bhagavato adhippāyaṃ jānantehi saṅgītimahātherehi khettapaṭiggahaṇādinissito ayaṃ sabbopi pāḷimuttavinicchayo vuttoti gahetabbo. Kappiyakārakassa niddiṭṭhabhāvo, dūtena appitatā, tatuttari vāyāmo, tena paṭilābhoti imānettha cattāri aṅgāni.
ராஜஸிக்கா²பத³வண்ணனா நிட்டி²தா.
Rājasikkhāpadavaṇṇanā niṭṭhitā.
நிட்டி²தோ சீவரவக்³கோ³ பட²மோ.
Niṭṭhito cīvaravaggo paṭhamo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 10. ராஜஸிக்கா²பத³ங் • 10. Rājasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. ராஜஸிக்கா²பத³வண்ணனா • 10. Rājasikkhāpadavaṇṇanā
