| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
10. рааж̇асигкаабад̣̇аван̣н̣анаа
10. Rājasikkhāpadavaṇṇanā
537-539. рааж̇асигкаабад̣̇з бана ‘‘аж̇ж̇ан̣хо’’д̇и баатз ‘‘аж̇ж̇ун̣хо’’д̇иби батанд̇и. бхог̇од̇и бхун̃ж̇ид̇аб̣б̣о. яам̣ вуд̇д̇ам̣ маад̇игаадтагат̇ааяам̣ ‘‘иминаа жийваражзд̇аабаннзна жийварам̣ жзд̇аабзд̇ваа ид̇т̇аннаамам̣ бхигкум̣ жийварзна ажчаад̣̇зхийд̇и ид̣̇ам̣ ааг̇аманасуд̣̇д̇хим̣ д̣̇ассзд̇ум̣ вуд̇д̇ам̣. сажз хи ‘ид̣̇ам̣ ид̇т̇аннаамасса бхигкуно д̣̇зхий’д̇и бзсзяяа, ааг̇аманасса асуд̣̇д̇хад̇д̇аа агаббияавад̇т̇ум̣ аараб̣бха бхигкунаа габбияагаарагоби нид̣̇д̣̇исид̇аб̣б̣о на бхавзяяаа’’д̇и, д̇ад̇т̇а ааг̇аманасса суд̣̇д̇хияаа ваа асуд̣̇д̇хияаа ваа висзсаббаяож̇анам̣ на д̣̇иссад̇и. сад̇иби хи ааг̇аманасса асуд̣̇д̇хабхаавз д̣̇ууд̇о ад̇д̇ано гусалад̇ааяа габбияавохаарзна вад̣̇ад̇и, ‘‘габбияагаараго на нид̣̇д̣̇исид̇аб̣б̣о’’д̇и ид̣̇ам̣ над̇т̇и, на жа д̣̇ууд̇зна габбияавохааравасзна вуд̇д̇з д̣̇ааяагзна ид̣̇ам̣ гат̇ам̣ бзсид̇анд̇и ийд̣̇исий вижааран̣аа убалаб̣бхад̇и, авижаарзд̇ваа жа д̇ам̣ на саггаа ж̇аанид̇ум̣, яад̣̇и бана ааг̇аманасса асуд̣̇д̇хад̇д̇аа габбияагаараго нид̣̇д̣̇исид̇аб̣б̣о на бхавзяяа, жийвараанам̣ ад̇т̇ааяа д̣̇ууд̇асса хад̇т̇з агаббияавад̇т̇усмим̣ бзсид̇з саб̣б̣ад̇т̇а д̣̇ааяагзна гат̇ам̣ бзсид̇анд̇и бужчид̇ваава габбияагаараго нид̣̇д̣̇исид̇аб̣б̣о бхавзяяа. д̇асмаа асад̇иби ааг̇аманасуд̣̇д̇хияам̣ сажз со д̣̇ууд̇о ад̇д̇ано гусалад̇ааяа габбияавохааравасзна вад̣̇ад̇и, д̣̇ууд̇ассзва важанам̣ г̇ахзд̇аб̣б̣ам̣. яад̣̇и хи ааг̇аманасуд̣̇д̇хиязвзд̇т̇а бамаан̣ам̣, мууласаамигзна габбияавохааравасзна бзсид̇асса д̣̇ууд̇асса агаббияавохааравасзна вад̣̇ад̇оби габбияагаараго нид̣̇д̣̇исид̇аб̣б̣о бхавзяяа, д̇асмаа саб̣б̣ад̇т̇а д̣̇ууд̇аважанамзва бамаан̣анд̇и г̇ахзд̇аб̣б̣ам̣.
537-539. Rājasikkhāpade pana ‘‘ajjaṇho’’ti pāṭhe ‘‘ajjuṇho’’tipi paṭhanti. Bhogoti bhuñjitabbo. Yaṃ vuttaṃ mātikāṭṭhakathāyaṃ ‘‘iminā cīvaracetāpannena cīvaraṃ cetāpetvā itthannāmaṃ bhikkhuṃ cīvarena acchādehīti idaṃ āgamanasuddhiṃ dassetuṃ vuttaṃ. Sace hi ‘idaṃ itthannāmassa bhikkhuno dehī’ti peseyya, āgamanassa asuddhattā akappiyavatthuṃ ārabbha bhikkhunā kappiyakārakopi niddisitabbo na bhaveyyā’’ti, tattha āgamanassa suddhiyā vā asuddhiyā vā visesappayojanaṃ na dissati. Satipi hi āgamanassa asuddhabhāve dūto attano kusalatāya kappiyavohārena vadati, ‘‘kappiyakārako na niddisitabbo’’ti idaṃ natthi, na ca dūtena kappiyavohāravasena vutte dāyakena idaṃ kathaṃ pesitanti īdisī vicāraṇā upalabbhati, avicāretvā ca taṃ na sakkā jānituṃ, yadi pana āgamanassa asuddhattā kappiyakārako niddisitabbo na bhaveyya, cīvarānaṃ atthāya dūtassa hatthe akappiyavatthusmiṃ pesite sabbattha dāyakena kathaṃ pesitanti pucchitvāva kappiyakārako niddisitabbo bhaveyya. Tasmā asatipi āgamanasuddhiyaṃ sace so dūto attano kusalatāya kappiyavohāravasena vadati, dūtasseva vacanaṃ gahetabbaṃ. Yadi hi āgamanasuddhiyevettha pamāṇaṃ, mūlasāmikena kappiyavohāravasena pesitassa dūtassa akappiyavohāravasena vadatopi kappiyakārako niddisitabbo bhaveyya, tasmā sabbattha dūtavacanameva pamāṇanti gahetabbaṃ.
иминаа жийваражзд̇аабаннзнаад̇иаад̣̇инаа бана имамад̇т̇ам̣ д̣̇ассзд̇и – габбияа васзна ааг̇ад̇амби жийварамуулам̣ ийд̣̇исзна д̣̇ууд̇аважанзна агаббияам̣ ход̇и, д̇асмаа д̇ам̣ бадигкибид̇аб̣б̣анд̇и. д̇знзвааха – ‘‘д̇зна бхигкунаа со д̣̇ууд̇о звамасса важанийяо’’д̇иаад̣̇и. суван̣н̣ам̣, раж̇ад̇ам̣, гахаабан̣о, маасагод̇и имаани хи жад̇д̇аари ниссаг̇г̇ияавад̇т̇ууни, муд̇д̇аа, ман̣и, взл̣урияо, сан̇ко, силаа, баваал̣ам̣, лохид̇ан̇го, масаараг̇аллам̣, сад̇д̇а д̇хан̃н̃аани, д̣̇аасид̣̇аасам̣, кзд̇д̇ам̣, вад̇т̇у, бубпаараамапалаараамаад̣̇аяод̇и имаани д̣̇уггадавад̇т̇ууни жа ад̇д̇ано ваа жзд̇ияасан̇гхаг̇ан̣абуг̇г̇алаанам̣ ваа ад̇т̇ааяа самбадижчид̇ум̣ на вадданд̇и, д̇асмаа д̇ам̣ саад̣̇ид̇ум̣ на ваддад̇ийд̇и д̣̇ассанад̇т̇ам̣ ‘‘на ко маяам̣, аавусо, жийваражзд̇аабаннам̣ бадиг̇г̇ан̣хаамаа’’д̇и вуд̇д̇ам̣, ‘‘жийваран̃жа ко маяам̣ бадиг̇г̇ан̣хаамаа’’д̇и ид̣̇ам̣ бана ад̇д̇аанам̣ уд̣̇д̣̇исса аабхад̇ад̇д̇аа вад̇д̇ум̣ ваддад̇и, д̇асмаа вуд̇д̇ам̣. ‘‘взяяааважжагаро нид̣̇д̣̇исид̇аб̣б̣о’’д̇и ид̣̇ам̣ ‘‘ад̇т̇и банааяасмад̇о гожи взяяааважжагаро’’д̇и габбияаважанзна вуд̇д̇ад̇д̇аа анун̃н̃аад̇ам̣. сажз бана д̣̇ууд̇о ‘‘го имам̣ г̇ан̣хаад̇ий’’д̇и ваа ‘‘гасса д̣̇змий’’д̇и ваа вад̣̇ад̇и, на нид̣̇д̣̇исид̇аб̣б̣о. ‘‘аараамиго ваа убаасаго ваа’’д̇и ид̣̇ам̣ сааруббад̇ааяа вуд̇д̇ам̣, табзд̇ваа бана бан̃жа сахад̇хаммигз яо гожи габбияагаараго ваддад̇и. ‘‘зсо ко, аавусо, бхигкуунам̣ взяяааважжагаро’’д̇и ид̣̇ам̣ бхигкусса габбияаважанад̣̇ассанад̇т̇ам̣ вуд̇д̇ам̣. звамзва хи вад̇д̇аб̣б̣ам̣, ‘‘зд̇асса д̣̇зхий’’д̇иаад̣̇и на вад̇д̇аб̣б̣ам̣. со ваа жзд̇аабзссад̇и ваад̇и зд̇т̇а зго ваа-сад̣̇д̣̇о бад̣̇абууран̣о, ‘‘сан̃н̃ад̇д̇о со маяаа’’д̇иаад̣̇и бана д̣̇ууд̇зна звам̣ аарожид̇зязва д̇ам̣ жод̣̇зд̇ум̣ ваддад̇и, нзваасса хад̇т̇з д̣̇ад̇ваа г̇ад̇амад̇д̇агааран̣знаад̇и д̣̇ассанад̇т̇ам̣ вуд̇д̇ам̣.
Iminā cīvaracetāpannenātiādinā pana imamatthaṃ dasseti – kappiya vasena āgatampi cīvaramūlaṃ īdisena dūtavacanena akappiyaṃ hoti, tasmā taṃ paṭikkhipitabbanti. Tenevāha – ‘‘tena bhikkhunā so dūto evamassa vacanīyo’’tiādi. Suvaṇṇaṃ, rajataṃ, kahāpaṇo, māsakoti imāni hi cattāri nissaggiyavatthūni, muttā, maṇi, veḷuriyo, saṅkho, silā, pavāḷaṃ, lohitaṅko, masāragallaṃ, satta dhaññāni, dāsidāsaṃ, khettaṃ, vatthu, pupphārāmaphalārāmādayoti imāni dukkaṭavatthūni ca attano vā cetiyasaṅghagaṇapuggalānaṃ vā atthāya sampaṭicchituṃ na vaṭṭanti, tasmā taṃ sādituṃ na vaṭṭatīti dassanatthaṃ ‘‘na kho mayaṃ, āvuso, cīvaracetāpannaṃ paṭiggaṇhāmā’’ti vuttaṃ, ‘‘cīvarañca kho mayaṃ paṭiggaṇhāmā’’ti idaṃ pana attānaṃ uddissa ābhatattā vattuṃ vaṭṭati, tasmā vuttaṃ. ‘‘Veyyāvaccakaro niddisitabbo’’ti idaṃ ‘‘atthi panāyasmato koci veyyāvaccakaro’’ti kappiyavacanena vuttattā anuññātaṃ. Sace pana dūto ‘‘ko imaṃ gaṇhātī’’ti vā ‘‘kassa demī’’ti vā vadati, na niddisitabbo. ‘‘Ārāmiko vā upāsako vā’’ti idaṃ sāruppatāya vuttaṃ, ṭhapetvā pana pañca sahadhammike yo koci kappiyakārako vaṭṭati. ‘‘Eso kho, āvuso, bhikkhūnaṃ veyyāvaccakaro’’ti idaṃ bhikkhussa kappiyavacanadassanatthaṃ vuttaṃ. Evameva hi vattabbaṃ, ‘‘etassa dehī’’tiādi na vattabbaṃ. So vā cetāpessati vāti ettha eko vā-saddo padapūraṇo, ‘‘saññatto so mayā’’tiādi pana dūtena evaṃ ārociteyeva taṃ codetuṃ vaṭṭati, nevāssa hatthe datvā gatamattakāraṇenāti dassanatthaṃ vuttaṃ.
зд̇аани хи важанаани…бз… на вад̇д̇аб̣б̣од̇и зд̇т̇а ‘‘звам̣ вад̣̇анд̇о бадигкид̇д̇асса гад̇ад̇д̇аа вад̇д̇абхзд̣̇з д̣̇уггадам̣ аабаж̇ж̇ад̇и, жод̣̇анаа бана ход̇иязваа’’д̇и махааг̇ан̣тибад̣̇з маж̇жхимаг̇ан̣тибад̣̇з жа вуд̇д̇ам̣. уд̣̇д̣̇идтажод̣̇анаабарижчзд̣̇ам̣ д̣̇ассзд̇ваад̇и ‘‘д̣̇уд̇ияамби вад̇д̇аб̣б̣о’’д̇иаад̣̇инаа д̣̇ассзд̇ваа. бужчияамаанод̇и зд̇т̇а бужчияамаанзнаад̇и ад̇т̇о г̇ахзд̇аб̣б̣од̇и ааха ‘‘гаран̣ад̇т̇з бажжад̇д̇аважана’’нд̇и. ааг̇ад̇агааран̣ам̣ бхан̃ж̇ад̇ийд̇и ааг̇ад̇агааран̣ам̣ винаасзд̇и.
Etānihi vacanāni…pe… na vattabboti ettha ‘‘evaṃ vadanto paṭikkhittassa katattā vattabhede dukkaṭaṃ āpajjati, codanā pana hotiyevā’’ti mahāgaṇṭhipade majjhimagaṇṭhipade ca vuttaṃ. Uddiṭṭhacodanāparicchedaṃ dassetvāti ‘‘dutiyampi vattabbo’’tiādinā dassetvā. Pucchiyamānoti ettha pucchiyamānenāti attho gahetabboti āha ‘‘karaṇatthe paccattavacana’’nti. Āgatakāraṇaṃ bhañjatīti āgatakāraṇaṃ vināseti.
зд̇т̇а гзжи вад̣̇анд̇и ‘‘ааг̇ад̇агааран̣ам̣ наама жийвараг̇г̇ахан̣ам̣, д̇ам̣ бхан̃ж̇ад̇ийд̇и вуд̇д̇ад̇д̇аа буна д̇ам̣ жийварам̣ язна гзнажи аагаарзна г̇ахзд̇ум̣ на ваддад̇ий’’д̇и. гзжи бана ‘‘ааг̇ад̇агааран̣ам̣ наама гааяаваажаахи жод̣̇анаа, д̇ам̣ бхан̃ж̇ад̇ийд̇и вуд̇д̇ад̇д̇аа буна д̇ам̣ язна гзнажи аагаарзна жод̣̇зд̇ум̣ на лабхад̇и. сажз саяамзва д̣̇зд̇и, мууласаамиго ваа д̣̇аабзд̇и, г̇ахзд̇ум̣ ваддад̇ий’’д̇и вад̣̇анд̇и. абарз бана ‘‘ааг̇ад̇агааран̣ам̣ наама таанам̣, д̇ам̣ бхан̃ж̇ад̇ийд̇и вуд̇д̇ад̇д̇аа яат̇аа ‘ад̇т̇о мз, аавусо, жийварзнаа’д̇и згааяа жод̣̇анааяа д̣̇вз таанаани бхан̃ж̇ад̇и, звамид̇хааби сажз аасанз нисийд̣̇ад̇и, згааяа нисаж̇ж̇ааяа д̣̇вз таанаани бхан̃ж̇ад̇и. аамисам̣ жз бадиг̇г̇ан̣хаад̇и, згзна бадиг̇г̇ахан̣зна д̣̇вз таанаани бхан̃ж̇ад̇и. д̇хаммам̣ жз бхаасад̇и, д̇хаммад̣̇зсанаасигкаабад̣̇з вуд̇д̇абарижчзд̣̇ааяа згааяа ваажааяа д̣̇вз таанаани бхан̃ж̇ад̇ий’’д̇и вад̣̇анд̇и. имзсам̣ бана саб̣б̣зсамби ваад̣̇ам̣ ‘‘аяуд̇д̇а’’нд̇и бадигкибид̇ваа д̇ийсуби г̇ан̣тибад̣̇зсу ид̣̇ам̣ вуд̇д̇ам̣ ‘‘ааг̇ад̇агааран̣ам̣ наама таанамзва, д̇асмаа ‘на гад̇д̇аб̣б̣а’нд̇и ваарид̇асса гад̇ад̇д̇аа нисаж̇ж̇аад̣̇ийсу гад̇зсу часу таанзсу згам̣ таанам̣ бхан̃ж̇ад̇ий’’д̇и.
Ettha keci vadanti ‘‘āgatakāraṇaṃ nāma cīvaraggahaṇaṃ, taṃ bhañjatīti vuttattā puna taṃ cīvaraṃ yena kenaci ākārena gahetuṃ na vaṭṭatī’’ti. Keci pana ‘‘āgatakāraṇaṃ nāma kāyavācāhi codanā, taṃ bhañjatīti vuttattā puna taṃ yena kenaci ākārena codetuṃ na labhati. Sace sayameva deti, mūlasāmiko vā dāpeti, gahetuṃ vaṭṭatī’’ti vadanti. Apare pana ‘‘āgatakāraṇaṃ nāma ṭhānaṃ, taṃ bhañjatīti vuttattā yathā ‘attho me, āvuso, cīvarenā’ti ekāya codanāya dve ṭhānāni bhañjati, evamidhāpi sace āsane nisīdati, ekāya nisajjāya dve ṭhānāni bhañjati. Āmisaṃ ce paṭiggaṇhāti, ekena paṭiggahaṇena dve ṭhānāni bhañjati. Dhammaṃ ce bhāsati, dhammadesanāsikkhāpade vuttaparicchedāya ekāya vācāya dve ṭhānāni bhañjatī’’ti vadanti. Imesaṃ pana sabbesampi vādaṃ ‘‘ayutta’’nti paṭikkhipitvā tīsupi gaṇṭhipadesu idaṃ vuttaṃ ‘‘āgatakāraṇaṃ nāma ṭhānameva, tasmā ‘na kattabba’nti vāritassa katattā nisajjādīsu katesu chasu ṭhānesu ekaṃ ṭhānaṃ bhañjatī’’ti.
д̇ад̇ра д̇ад̇ра таанз д̇идтад̇ийд̇и ид̣̇ам̣ жод̣̇агасса тид̇адтаанад̇о абаггамма д̇ад̇ра д̇ад̇ра уд̣̇д̣̇исса таанам̣язва санд̇хааяа вуд̇д̇ам̣. ‘‘саамам̣ ваа г̇анд̇аб̣б̣ам̣, д̣̇ууд̇о ваа баахзд̇аб̣б̣о’’д̇и ид̣̇ам̣ сабхаавад̇о жод̣̇зд̇ум̣ анижчанд̇знаби гаад̇аб̣б̣амзваад̇и вад̣̇анд̇и. мукам̣ виварид̇ваа саяамзва габбияагаарагад̇д̇ам̣ убаг̇ад̇од̇и мукавзвадигагаббияагаараго. авижаарзд̇угаамад̇ааяаад̇и имасмим̣ багкз ‘‘над̇т̇амхаагам̣ габбияагаараго’’д̇и ид̣̇ам̣ ‘‘д̇аад̣̇исам̣ гаронд̇о габбияагаараго над̇т̇ий’’д̇и иминаа ад̇хиббааязна вуд̇д̇ам̣.
Tatratatra ṭhāne tiṭṭhatīti idaṃ codakassa ṭhitaṭṭhānato apakkamma tatra tatra uddissa ṭhānaṃyeva sandhāya vuttaṃ. ‘‘Sāmaṃ vā gantabbaṃ, dūto vā pāhetabbo’’ti idaṃ sabhāvato codetuṃ anicchantenapi kātabbamevāti vadanti. Mukhaṃ vivaritvā sayameva kappiyakārakattaṃ upagatoti mukhavevaṭikakappiyakārako. Avicāretukāmatāyāti imasmiṃ pakkhe ‘‘natthamhākaṃ kappiyakārako’’ti idaṃ ‘‘tādisaṃ karonto kappiyakārako natthī’’ti iminā adhippāyena vuttaṃ.
‘‘мзн̣д̣агасигкаабад̣̇з вуд̇д̇анаязна бадибаж̇ж̇ид̇аб̣б̣а’’нд̇и вад̇ваа ид̣̇аани д̇ам̣ мзн̣д̣агасигкаабад̣̇ам̣ д̣̇ассзнд̇о ‘‘вуд̇д̇ан̃хзд̇а’’нд̇иаад̣̇имааха. ид̣̇амзва хи ‘‘санд̇и, бхигкавз, сад̣̇д̇хаа басаннаа’’д̇иаад̣̇иважанам̣ бхзсаж̇ж̇агканд̇хагз мзн̣д̣агавад̇т̇усмим̣ (махаава. 299) вуд̇д̇ад̇д̇аа ‘‘мзн̣д̣агасигкаабад̣̇а’’нд̇и вуд̇д̇ам̣. д̇ад̇т̇а хи мзн̣д̣агзна наама сздтинаа –
‘‘Meṇḍakasikkhāpade vuttanayena paṭipajjitabba’’nti vatvā idāni taṃ meṇḍakasikkhāpadaṃ dassento ‘‘vuttañheta’’ntiādimāha. Idameva hi ‘‘santi, bhikkhave, saddhā pasannā’’tiādivacanaṃ bhesajjakkhandhake meṇḍakavatthusmiṃ (mahāva. 299) vuttattā ‘‘meṇḍakasikkhāpada’’nti vuttaṃ. Tattha hi meṇḍakena nāma seṭṭhinā –
‘‘санд̇и , бханд̇з, маг̇г̇аа ганд̇аараа аббод̣̇агаа аббабхагкаа, на сугараа абаат̇зяязна г̇анд̇ум̣, саад̇ху, бханд̇з, бхаг̇аваа бхигкуунам̣ баат̇зяяам̣ ануж̇аанаад̇уу’’д̇и –
‘‘Santi , bhante, maggā kantārā appodakā appabhakkhā, na sukarā apātheyyena gantuṃ, sādhu, bhante, bhagavā bhikkhūnaṃ pātheyyaṃ anujānātū’’ti –
яаажид̇зна бхаг̇авад̇аа –
Yācitena bhagavatā –
‘‘ануж̇аанаами, бхигкавз, баат̇зяяам̣ бариязсид̇ум̣. д̇ан̣д̣уло д̇ан̣д̣улад̇т̇игзна, муг̇г̇о муг̇г̇ад̇т̇игзна, маасо маасад̇т̇игзна, лон̣ам̣ лон̣ад̇т̇игзна, г̇ул̣о г̇ул̣ад̇т̇игзна, д̇злам̣ д̇злад̇т̇игзна, сабби саббид̇т̇игзнаа’’д̇и –
‘‘Anujānāmi, bhikkhave, pātheyyaṃ pariyesituṃ. Taṇḍulo taṇḍulatthikena, muggo muggatthikena, māso māsatthikena, loṇaṃ loṇatthikena, guḷo guḷatthikena, telaṃ telatthikena, sappi sappitthikenā’’ti –
вад̇ваа ид̣̇ам̣ вуд̇д̇ам̣ –
Vatvā idaṃ vuttaṃ –
‘‘санд̇и, бхигкавз, мануссаа сад̣̇д̇хаа басаннаа, д̇з габбияагаарагаанам̣ хад̇т̇з хиран̃н̃ам̣ убанигкибанд̇и ‘иминаа аяяасса яам̣ габбияам̣, д̇ам̣ д̣̇зт̇аа’д̇и. ануж̇аанаами, бхигкавз, яам̣ д̇ад̇о габбияам̣, д̇ам̣ саад̣̇ид̇ум̣, на д̇взваахам̣ бхигкавз гзнажи барияааязна ж̇аад̇аруубараж̇ад̇ам̣ саад̣̇ид̇аб̣б̣ам̣ бариязсид̇аб̣б̣анд̇и вад̣̇аамий’’д̇и.
‘‘Santi, bhikkhave, manussā saddhā pasannā, te kappiyakārakānaṃ hatthe hiraññaṃ upanikkhipanti ‘iminā ayyassa yaṃ kappiyaṃ, taṃ dethā’ti. Anujānāmi, bhikkhave, yaṃ tato kappiyaṃ, taṃ sādituṃ, na tvevāhaṃ bhikkhave kenaci pariyāyena jātarūparajataṃ sāditabbaṃ pariyesitabbanti vadāmī’’ti.
хиран̃н̃ам̣ убанигкибанд̇ийд̇и зд̇т̇ааби бхигкусса аарожанам̣ ад̇т̇иязваад̇и г̇ахзд̇аб̣б̣ам̣. ан̃н̃ат̇аа анид̣̇д̣̇идтагаббияагаарагад̇д̇ам̣ бхаж̇ад̇ийд̇и на жод̣̇зд̇аб̣б̣о сияаа. яад̣̇и муулам̣ санд̇хааяа жод̣̇зд̇и, д̇ам̣ саад̣̇ид̇амзва сияаад̇и ааха ‘‘муулам̣ асаад̣̇ияанд̇знаа’’д̇и.
Hiraññaṃupanikkhipantīti etthāpi bhikkhussa ārocanaṃ atthiyevāti gahetabbaṃ. Aññathā aniddiṭṭhakappiyakārakattaṃ bhajatīti na codetabbo siyā. Yadi mūlaṃ sandhāya codeti, taṃ sāditameva siyāti āha ‘‘mūlaṃ asādiyantenā’’ti.
‘‘ан̃н̃аад̇агааббаваарид̇зсу вияа бадибаж̇ж̇ид̇аб̣б̣анд̇и ид̣̇ам̣ ад̇д̇анаа жод̣̇анаатаанан̃жа на гаад̇аб̣б̣анд̇и д̣̇ассанад̇т̇ам̣ вуд̇д̇ам̣. ан̃н̃ам̣ бана габбияагаарагам̣ бзсзд̇ваа логажаарид̇д̇авасзна ануяун̃ж̇ид̇вааби габбияавад̇т̇ум̣ аахараабзд̇ум̣ ваддад̇и ад̇д̇аанам̣ уд̣̇д̣̇исса нигкид̇д̇асса ад̇д̇ано санд̇агад̇д̇аа’’д̇и гзжи вад̣̇анд̇и, д̇ам̣ адтагат̇ааяам̣ ‘‘ан̃н̃аад̇агааббаваарид̇зсу вияа бадибаж̇ж̇ид̇аб̣б̣ам̣. сажз саяамзва жийварам̣ аанзд̇ваа д̣̇знд̇и, г̇ахзд̇аб̣б̣ам̣. но жз, гин̃жи на вад̇д̇аб̣б̣аа’’д̇и д̣̇ал̣хам̣ гад̇ваа вуд̇д̇ад̇д̇аа на г̇ахзд̇аб̣б̣анд̇и амхаагам̣ канд̇и. на хи ан̃н̃аад̇агааббаваарид̇ам̣ саяам̣ авин̃н̃аабзд̇ваа ан̃н̃зна вин̃н̃аабзд̇ум̣ ваддад̇и, на жа яад̇т̇а ан̃н̃ам̣ бзсзд̇ваа аахараабзд̇ум̣ ваддад̇и, д̇ад̇т̇а саяам̣ г̇анд̇ваа на аахараабзд̇аб̣б̣анд̇и саггаа вад̇т̇ум̣. яад̣̇и жзд̇т̇а ан̃н̃зна аахараабзд̇ум̣ ваддад̇и, ‘‘ан̃н̃аад̇агааббаваарид̇зсу вияа бадибаж̇ж̇ид̇аб̣б̣а’’нд̇иаад̣̇иважанамзва нирад̇т̇агам̣ сияаа. ‘‘д̣̇ууд̇знаа’’д̇и имасса б̣яабхижаарам̣ д̣̇ассзд̇и ‘‘саяам̣ аахарид̇ваабий’’д̇и. д̣̇ад̣̇анд̇зсууд̇и иминаа самб̣анд̇хо . бин̣д̣абаад̇аад̣̇ийнам̣ ад̇т̇ааяаад̇и иминаа бана ‘‘жийваражзд̇аабанна’’нд̇и имасса б̣яабхижаарам̣ д̣̇ассзд̇и. ‘‘зсзва наяо’’д̇и вуд̇д̇ад̇д̇аа бин̣д̣абаад̇аад̣̇ийнам̣ ад̇т̇ааяа д̣̇иннзби таанажод̣̇анаад̣̇и саб̣б̣ам̣ хздтаа вуд̇д̇анаязнзва гаад̇аб̣б̣ам̣.
‘‘Aññātakaappavāritesu viya paṭipajjitabbanti idaṃ attanā codanāṭhānañca na kātabbanti dassanatthaṃ vuttaṃ. Aññaṃ pana kappiyakārakaṃ pesetvā lokacārittavasena anuyuñjitvāpi kappiyavatthuṃ āharāpetuṃ vaṭṭati attānaṃ uddissa nikkhittassa attano santakattā’’ti keci vadanti, taṃ aṭṭhakathāyaṃ ‘‘aññātakaappavāritesu viya paṭipajjitabbaṃ. Sace sayameva cīvaraṃ ānetvā denti, gahetabbaṃ. No ce, kiñci na vattabbā’’ti daḷhaṃ katvā vuttattā na gahetabbanti amhākaṃ khanti. Na hi aññātakaappavāritaṃ sayaṃ aviññāpetvā aññena viññāpetuṃ vaṭṭati, na ca yattha aññaṃ pesetvā āharāpetuṃ vaṭṭati, tattha sayaṃ gantvā na āharāpetabbanti sakkā vatthuṃ. Yadi cettha aññena āharāpetuṃ vaṭṭati, ‘‘aññātakaappavāritesu viya paṭipajjitabba’’ntiādivacanameva niratthakaṃ siyā. ‘‘Dūtenā’’ti imassa byabhicāraṃ dasseti ‘‘sayaṃ āharitvāpī’’ti. Dadantesūti iminā sambandho . Piṇḍapātādīnaṃ atthāyāti iminā pana ‘‘cīvaracetāpanna’’nti imassa byabhicāraṃ dasseti. ‘‘Eseva nayo’’ti vuttattā piṇḍapātādīnaṃ atthāya dinnepi ṭhānacodanādi sabbaṃ heṭṭhā vuttanayeneva kātabbaṃ.
бадиг̇г̇ахан̣зби барибхог̇зби аабад̇д̇ийд̇и бадиг̇г̇ахан̣з баажид̇д̇ияам̣, барибхог̇з д̣̇уггадам̣. свзва саабад̇д̇игод̇и д̣̇уггадаабад̇д̇им̣ санд̇хааяа вад̣̇ад̇и. ид̣̇ан̃жа адтагат̇аабамаан̣знзва г̇ахзд̇аб̣б̣ам̣. ‘‘барасса нид̣̇д̣̇осабхаавад̣̇ассанад̇т̇ам̣ свзва саабад̇д̇иго сад̣̇осод̇и вуд̇д̇ам̣ ход̇ий’’д̇иби вад̣̇анд̇и. ‘‘жод̣̇зд̇ийд̇и вуд̇д̇ад̇д̇аа бана аабад̇д̇ияаа жод̣̇зд̇ийд̇и гад̇ваа свзва саабад̇д̇игод̇и ид̣̇ам̣ д̣̇уггадам̣язва санд̇хааяа вад̇д̇ум̣ яуд̇д̇а’’нд̇и д̇ийсуби г̇ан̣тибад̣̇зсу вуд̇д̇ам̣. бадиг̇г̇ахан̣зби барибхог̇зби аабад̇д̇иязваад̇и д̣̇уггадамзва санд̇хааяа вуд̇д̇ам̣. д̇ал̣аагассаби кзд̇д̇асан̇г̇ахид̇ад̇д̇аа д̇асса бадиг̇г̇ахан̣зби аабад̇д̇и вуд̇д̇аа. жад̇д̇ааро бажжаяз сан̇гхо барибхун̃ж̇ад̇ууд̇и д̣̇зд̇ийд̇и зд̇т̇а ‘‘бхигкусан̇гхо жад̇д̇ааро бажжаяз барибхун̃жад̇у, д̇ал̣аагам̣ д̣̇аммий’’д̇и ваа ‘‘жад̇убажжаяабарибхог̇ад̇т̇ам̣ д̇ал̣аагам̣ д̣̇аммий’’д̇и ваа вад̣̇ад̇и, ваддад̇иязва. ‘‘ид̇о д̇ал̣аагад̇о уббаннз жад̇д̇ааро бажжаяз д̣̇аммий’’д̇и вуд̇д̇з бана вад̇д̇аб̣б̣амзва над̇т̇и.
Paṭiggahaṇepi paribhogepi āpattīti paṭiggahaṇe pācittiyaṃ, paribhoge dukkaṭaṃ. Sveva sāpattikoti dukkaṭāpattiṃ sandhāya vadati. Idañca aṭṭhakathāpamāṇeneva gahetabbaṃ. ‘‘Parassa niddosabhāvadassanatthaṃ sveva sāpattiko sadosoti vuttaṃ hotī’’tipi vadanti. ‘‘Codetīti vuttattā pana āpattiyā codetīti katvā sveva sāpattikoti idaṃ dukkaṭaṃyeva sandhāya vattuṃ yutta’’nti tīsupi gaṇṭhipadesu vuttaṃ. Paṭiggahaṇepi paribhogepi āpattiyevāti dukkaṭameva sandhāya vuttaṃ. Taḷākassapi khettasaṅgahitattā tassa paṭiggahaṇepi āpatti vuttā. Cattāro paccaye saṅgho paribhuñjatūti detīti ettha ‘‘bhikkhusaṅgho cattāro paccaye paribhuñcatu, taḷākaṃ dammī’’ti vā ‘‘catupaccayaparibhogatthaṃ taḷākaṃ dammī’’ti vā vadati, vaṭṭatiyeva. ‘‘Ito taḷākato uppanne cattāro paccaye dammī’’ti vutte pana vattabbameva natthi.
амхаагам̣ згам̣ габбияагаарагам̣ табзт̇аад̇и вуд̇д̇зд̇и ид̣̇ам̣ ийд̣̇исам̣язва санд̇хааяа вуд̇д̇ам̣. габбияаггамзна самбадижчид̇зсу кзд̇д̇ад̇ал̣аагаад̣̇ийсу бана авуд̇д̇зби габбияагаарагам̣ табзд̇ум̣ лаб̣бхад̇иязва. яасмаа барасанд̇агам̣ наасзд̇ум̣ бхигкуунам̣ на ваддад̇и, д̇асмаа ‘‘на сассагаалз’’д̇и вуд̇д̇ам̣. ‘‘ж̇анабад̣̇асса саамигод̇и иминаава яо д̇ам̣ ж̇анабад̣̇ам̣ вижаарзд̇и, д̇знаби ажчинд̣̇ид̇ваа д̣̇иннам̣ ваддад̇иязваа’’д̇и вад̣̇анд̇и. уд̣̇агаваахаганд̇и уд̣̇агамаад̇игам̣. габбияавохаарзбийд̇и зд̇т̇а ‘‘вид̇хаанам̣ вагкаамаа’’д̇и баатасзсо. уд̣̇агавасзнаад̇и уд̣̇агабарибхог̇ад̇т̇ам̣. суд̣̇д̇хажид̇д̇аананд̇и гзвалам̣ уд̣̇агабарибхог̇ад̇т̇амзваад̇и ад̇хиббааяо. алаж̇ж̇инаа гаараабид̇з вад̇д̇аб̣б̣амзва над̇т̇ийд̇и ааха ‘‘лаж̇ж̇ийбхигкунаа’’д̇и. багад̇ибхааг̇о наама имасмим̣ радтз жад̇уамб̣ан̣амад̇д̇ам̣. агадтабуб̣б̣ам̣ навасассам̣ наама. абарижчиннабхааг̇зд̇и ‘‘зд̇д̇агз бхуумибхааг̇з зд̇д̇аго бхааг̇о д̣̇аад̇аб̣б̣о’’д̇и звам̣ абарижчиннабхааг̇з.
Amhākaṃ ekaṃ kappiyakārakaṃ ṭhapethāti vutteti idaṃ īdisaṃyeva sandhāya vuttaṃ. Kappiyakkamena sampaṭicchitesu khettataḷākādīsu pana avuttepi kappiyakārakaṃ ṭhapetuṃ labbhatiyeva. Yasmā parasantakaṃ nāsetuṃ bhikkhūnaṃ na vaṭṭati, tasmā ‘‘na sassakāle’’ti vuttaṃ. ‘‘Janapadassa sāmikoti imināva yo taṃ janapadaṃ vicāreti, tenapi acchinditvā dinnaṃ vaṭṭatiyevā’’ti vadanti. Udakavāhakanti udakamātikaṃ. Kappiyavohārepīti ettha ‘‘vidhānaṃ vakkhāmā’’ti pāṭhaseso. Udakavasenāti udakaparibhogatthaṃ. Suddhacittānanti kevalaṃ udakaparibhogatthamevāti adhippāyo. Alajjinā kārāpite vattabbameva natthīti āha ‘‘lajjībhikkhunā’’ti. Pakatibhāgo nāma imasmiṃ raṭṭhe catuambaṇamattaṃ. Akaṭṭhapubbaṃ navasassaṃ nāma. Aparicchinnabhāgeti ‘‘ettake bhūmibhāge ettako bhāgo dātabbo’’ti evaṃ aparicchinnabhāge.
раж̇ж̇уяаа ваа д̣̇ан̣д̣зна ваад̇и зд̇т̇а ‘‘баад̣̇зхиби минид̇ум̣ на ваддад̇ий’’д̇и вад̣̇анд̇и. калз ваа тад̇ваа рагкад̇ийд̇и зд̇т̇а бана т̇знзд̇ваа г̇ан̣ханд̇з д̣̇исваа ‘‘маа г̇ан̣хат̇аа’’д̇и ниваарзнд̇о рагкад̇и наама. сажз бана авижаарзд̇ваа гзвалам̣ д̇ун̣хийбхууд̇ова рагкан̣ад̇т̇ааяа ологзнд̇о д̇идтад̇и, ваддад̇и. сажзби д̇асмим̣ д̇ун̣хийбхууд̇з жоригааяа харанд̇и, ‘‘маяам̣ бхигкусан̇гхасса аарожзссаамаа’’д̇и звам̣ вад̇д̇ум̣ ваддад̇ийд̇и вад̣̇анд̇и. нийхараабзд̇и бадисаамзд̇ийд̇и зд̇т̇ааби ‘‘сажз барияааязна вад̣̇ад̇и, ваддад̇ий’’д̇и вад̣̇анд̇и. абуб̣б̣асса ануббаад̣̇ид̇ад̇д̇аа ан̃н̃зсам̣ ваддад̇ийд̇и ааха ‘‘д̇ассзва д̇ам̣ агаббияа’’нд̇и.
Rajjuyā vā daṇḍena vāti ettha ‘‘pādehipi minituṃ na vaṭṭatī’’ti vadanti. Khale vā ṭhatvā rakkhatīti ettha pana thenetvā gaṇhante disvā ‘‘mā gaṇhathā’’ti nivārento rakkhati nāma. Sace pana avicāretvā kevalaṃ tuṇhībhūtova rakkhaṇatthāya olokento tiṭṭhati, vaṭṭati. Sacepi tasmiṃ tuṇhībhūte corikāya haranti, ‘‘mayaṃ bhikkhusaṅghassa ārocessāmā’’ti evaṃ vattuṃ vaṭṭatīti vadanti. Nīharāpeti paṭisāmetīti etthāpi ‘‘sace pariyāyena vadati, vaṭṭatī’’ti vadanti. Apubbassa anuppāditattā aññesaṃ vaṭṭatīti āha ‘‘tasseva taṃ akappiya’’nti.
нану жа д̣̇уб̣б̣ижаарид̇амад̇д̇зна д̇ассзва д̇ам̣ агаббияам̣, на саб̣б̣зсам̣ руубияасам̣вохаарз жад̇уд̇т̇абад̇д̇о вияа. вуд̇д̇ан̃хи д̇ад̇т̇а (баараа. адта. 2.589) ‘‘яо бана руубияам̣ асамбадижчид̇ваа ‘т̇зрасса бад̇д̇ам̣ гин̣ид̇ваа д̣̇зхий’д̇и бахид̇агаббияагаарагзна сад̣̇д̇хим̣ гаммаарагулам̣ г̇анд̇ваа бад̇д̇ам̣ д̣̇исваа ‘имз гахаабан̣з г̇ахзд̇ваа имам̣ д̣̇зхий’д̇и гахаабан̣з д̣̇аабзд̇ваа г̇ахид̇о, аяам̣ бад̇д̇о зд̇ассзва бхигкуно на ваддад̇и д̣̇уб̣б̣ижаарид̇ад̇д̇аа, ан̃н̃зсам̣ бана ваддад̇и мууласса асамбадижчид̇ад̇д̇аа’’д̇и. д̇асмаа яам̣ д̇з аахаранд̇и, саб̣б̣зсам̣ агаббияам̣. гасмаа? гахаабан̣аанам̣ вижаарид̇ад̇д̇аад̇и ид̣̇ам̣ гасмаа вуд̇д̇анд̇и? зд̇т̇а гзжи вад̣̇анд̇и ‘‘гахаабан̣з саад̣̇ияид̇ваа вижаарид̇ам̣ санд̇хааяа звам̣ вуд̇д̇а’’нд̇и. сан̇гхигад̇д̇аа жа ниссаж̇ж̇ид̇ум̣ на саггаа, д̇асмаа саб̣б̣зсам̣ на габбад̇ийд̇и д̇зсам̣ ад̇хиббааяо. гзжи бана ‘‘асаад̣̇ияид̇вааби гахаабан̣аанам̣ вижаарид̇ад̇д̇аа руубияасам̣вохааро гад̇о ход̇и, сан̇гхигад̇д̇аа жа ниссаж̇ж̇ид̇ум̣ на саггаа, д̇асмаа саб̣б̣зсам̣ на габбад̇ий’’д̇и вад̣̇анд̇и. г̇ан̣тибад̣̇зсу бана д̇ийсуби ид̣̇ам̣ вуд̇д̇ам̣ ‘‘жад̇уд̇т̇абад̇д̇о г̇ихисанд̇агаанам̣язва гахаабан̣аанам̣ вижаарид̇ад̇д̇аа ан̃н̃зсам̣ габбад̇и, ид̇ха бана сан̇гхигаанам̣ вижаарид̇ад̇д̇аа саб̣б̣зсам̣ на габбад̇ий’’д̇и. саб̣б̣зсамби ваад̣̇о д̇зна д̇зна барияааязна яуж̇ж̇ад̇иязва.
Nanu ca dubbicāritamattena tasseva taṃ akappiyaṃ, na sabbesaṃ rūpiyasaṃvohāre catutthapatto viya. Vuttañhi tattha (pārā. aṭṭha. 2.589) ‘‘yo pana rūpiyaṃ asampaṭicchitvā ‘therassa pattaṃ kiṇitvā dehī’ti pahitakappiyakārakena saddhiṃ kammārakulaṃ gantvā pattaṃ disvā ‘ime kahāpaṇe gahetvā imaṃ dehī’ti kahāpaṇe dāpetvā gahito, ayaṃ patto etasseva bhikkhuno na vaṭṭati dubbicāritattā, aññesaṃ pana vaṭṭati mūlassa asampaṭicchitattā’’ti. Tasmā yaṃ te āharanti, sabbesaṃ akappiyaṃ. Kasmā? Kahāpaṇānaṃ vicāritattāti idaṃ kasmā vuttanti? Ettha keci vadanti ‘‘kahāpaṇe sādiyitvā vicāritaṃ sandhāya evaṃ vutta’’nti. Saṅghikattā ca nissajjituṃ na sakkā, tasmā sabbesaṃ na kappatīti tesaṃ adhippāyo. Keci pana ‘‘asādiyitvāpi kahāpaṇānaṃ vicāritattā rūpiyasaṃvohāro kato hoti, saṅghikattā ca nissajjituṃ na sakkā, tasmā sabbesaṃ na kappatī’’ti vadanti. Gaṇṭhipadesu pana tīsupi idaṃ vuttaṃ ‘‘catutthapatto gihisantakānaṃyeva kahāpaṇānaṃ vicāritattā aññesaṃ kappati, idha pana saṅghikānaṃ vicāritattā sabbesaṃ na kappatī’’ti. Sabbesampi vādo tena tena pariyāyena yujjatiyeva.
жад̇усаалад̣̇ваарзд̇и бхож̇анасаалам̣ санд̇хааяа вуд̇д̇ам̣. барияааязна гат̇ид̇ад̇д̇аад̇и ‘‘г̇ан̣хаа’’д̇и авад̇ваа ‘‘сиймаа г̇ад̇аа’’д̇и барияааязна гат̇ид̇ад̇д̇аа. багад̇ибхуумигаран̣ад̇т̇ам̣ ‘‘хздтаа г̇ахид̇ам̣ бам̣су’’нд̇иаад̣̇и вуд̇д̇ам̣. д̣̇аасам̣ д̣̇аммийд̇и зд̇т̇а ‘‘мануссам̣ д̣̇аммийд̇и вуд̇д̇з ваддад̇ий’’д̇и вад̣̇анд̇и. гуггудасуугараа…бз… ваддад̇ийд̇и зд̇т̇а гуггудасуугарзсу д̣̇ийяамаанзсу ‘‘имзхи амхаагам̣ ад̇т̇о над̇т̇и, сукам̣ ж̇ийванд̇у, аран̃н̃з виссаж̇ж̇зт̇аа’’д̇и вад̇д̇ум̣ ваддад̇и. ‘‘кзд̇д̇авад̇т̇убадиг̇г̇ахан̣аа бадивирад̇о ход̇ий’’д̇иаад̣̇иважанад̇о (д̣̇ий. ни. 1.10, 194) кзд̇д̇аад̣̇ийнам̣ бадиг̇г̇ахан̣з аяам̣ саб̣б̣о винижчаяо вуд̇д̇о. габбияагаарагасса бхигкунаа нид̣̇д̣̇идтабхааво, д̣̇ууд̇зна аббид̇ад̇аа, д̇ад̇уд̇д̇ари вааяаамо, д̇зна вааяаамзна бадилаабход̇и имаанзд̇т̇а жад̇д̇аари ан̇г̇аани.
Catusāladvāreti bhojanasālaṃ sandhāya vuttaṃ. Pariyāyena kathitattāti ‘‘gaṇhā’’ti avatvā ‘‘sīmā gatā’’ti pariyāyena kathitattā. Pakatibhūmikaraṇatthaṃ ‘‘heṭṭhā gahitaṃ paṃsu’’ntiādi vuttaṃ. Dāsaṃ dammīti ettha ‘‘manussaṃ dammīti vutte vaṭṭatī’’ti vadanti. Kukkuṭasūkarā…pe… vaṭṭatīti ettha kukkuṭasūkaresu dīyamānesu ‘‘imehi amhākaṃ attho natthi, sukhaṃ jīvantu, araññe vissajjethā’’ti vattuṃ vaṭṭati. ‘‘Khettavatthupaṭiggahaṇā paṭivirato hotī’’tiādivacanato (dī. ni. 1.10, 194) khettādīnaṃ paṭiggahaṇe ayaṃ sabbo vinicchayo vutto. Kappiyakārakassa bhikkhunā niddiṭṭhabhāvo, dūtena appitatā, tatuttari vāyāmo, tena vāyāmena paṭilābhoti imānettha cattāri aṅgāni.
рааж̇асигкаабад̣̇аван̣н̣анаа нидтид̇аа.
Rājasikkhāpadavaṇṇanā niṭṭhitā.
нидтид̇о жийвараваг̇г̇о батамо.
Niṭṭhito cīvaravaggo paṭhamo.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 10. рааж̇асигкаабад̣̇ам̣ • 10. Rājasikkhāpadaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 10. рааж̇асигкаабад̣̇аван̣н̣анаа • 10. Rājasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 10. рааж̇асигкаабад̣̇аван̣н̣анаа • 10. Rājasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 10. рааж̇асигкаабад̣̇аван̣н̣анаа • 10. Rājasikkhāpadavaṇṇanā
