| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
10. рааж̇асигкаабад̣̇аван̣н̣анаа
10. Rājasikkhāpadavaṇṇanā
537. ‘‘на ко маяам̣, аавусо, жийваражзд̇аабаннам̣ бадиг̇г̇ан̣хаама…бз… гаалзна габбияа’’нд̇и ид̇о буб̣б̣з зва руубияабадиг̇г̇ахан̣асигкаабад̣̇асса бан̃н̃ад̇д̇ад̇д̇аа вуд̇д̇ам̣. ан̃н̃ат̇аа ааяасмаа убананд̣̇о мам̣сасса жзд̇аабаннам̣ згамби гахаабан̣ам̣ хад̇т̇зна бадиг̇г̇ан̣ханд̇о д̇ад̇о маханд̇ад̇арам̣ жийваражзд̇аабаннам̣ гат̇ам̣ на бадиг̇г̇ан̣хиссад̇и, звам̣ санд̇зби жийварабадисам̣яуд̇д̇ад̇д̇аа жийвараваг̇г̇з сан̇г̇ааяим̣сууд̇и.
537.‘‘Nakho mayaṃ, āvuso, cīvaracetāpannaṃ paṭiggaṇhāma…pe… kālena kappiya’’nti ito pubbe eva rūpiyapaṭiggahaṇasikkhāpadassa paññattattā vuttaṃ. Aññathā āyasmā upanando maṃsassa cetāpannaṃ ekampi kahāpaṇaṃ hatthena paṭiggaṇhanto tato mahantataraṃ cīvaracetāpannaṃ kathaṃ na paṭiggaṇhissati, evaṃ santepi cīvarapaṭisaṃyuttattā cīvaravagge saṅgāyiṃsūti.
538-9. ‘‘ааг̇ад̇агааран̣ам̣ бхан̃ж̇ад̇ий’’д̇и вуд̇д̇ад̇д̇аа нану буна жод̣̇зд̇ум̣ на лабхад̇ийд̇и згз. ааг̇аманасса саад̇т̇агам̣ на ход̇и, жийварам̣ на лабхиссад̇и бадисант̇аарасса гад̇ад̇д̇аад̇и згз. жод̣̇анаалагкан̣ам̣ на ход̇ийд̇и гад̇ваа вуд̇д̇анд̇и згз. ‘‘тад̇ваа жод̣̇змий’’д̇и ааг̇ад̇о д̇ам̣ таанам̣ бхан̃ж̇ад̇и, гарод̇и жзгам̣, д̇ийн̣иби жз гарод̇и, згамзва, згаважанад̇д̇аад̇и згз. д̇ийн̣и таанаани бхан̃ж̇ад̇ийд̇и згз. убад̇иссад̇т̇зро ‘‘на жод̣̇анаад̣̇им̣ бхан̃ж̇ад̇и, жод̣̇зд̇угаамо агад̇д̇аб̣б̣ам̣ агааси, д̇зна вад̇д̇абхзд̣̇з д̣̇уггада’’нд̇и вад̣̇ад̇и. д̇хаммасирид̇т̇зро бана ‘‘аасанз жз нисийд̣̇ад̇и, згааяа нисаж̇ж̇ааяа д̣̇вз таанаани бхан̃ж̇ад̇и. аамисам̣ жз бадиг̇г̇ан̣хаад̇и, згзна бадиг̇г̇ахзна д̣̇вз таанаани бхан̃ж̇ад̇и. д̇хаммам̣ жз бхаасад̇и, д̇хаммад̣̇зсанасигкаабад̣̇з вуд̇д̇абарижчзд̣̇ааяа згааяа ваажааяа д̣̇вз таанаани бхан̃ж̇ад̇и, д̇ам̣ санд̇хааяа вуд̇д̇а’’нд̇и вад̣̇ад̇и. ‘‘яад̇т̇аа’’д̇и вуд̇д̇з ад̇д̇ано зва санд̇игам̣ г̇анд̇аб̣б̣анд̇и вуд̇д̇ам̣ вияа ход̇и. д̇зна вуд̇д̇ам̣ ‘‘б̣яан̃ж̇анам̣ бана на самзд̇ий’’д̇и. убаасагзхи аан̣ад̇д̇аа д̇ам̣. муулам̣ асаад̣̇ияанд̇знаад̇и мууласса агаббияабхаавз сад̇и асаад̣̇ияанд̇зна. д̇ан̃жа ко жид̇д̇зна , на мукзна. сажз звам̣ вуд̇д̇з агаббияам̣ д̣̇ассзд̇ийд̇и гад̇ваа жид̇д̇зна агаббияам̣ ижчанд̇ова мукзна габбияам̣ нид̣̇д̣̇исад̇и ‘‘жийварам̣ мз д̣̇зт̇аа’’д̇и, на ваддад̇и. бадилаабхз руубияабадиг̇г̇ахан̣асигкаабад̣̇зна аабад̇д̇и.
538-9. ‘‘Āgatakāraṇaṃ bhañjatī’’ti vuttattā nanu puna codetuṃ na labhatīti eke. Āgamanassa sātthakaṃ na hoti, cīvaraṃ na labhissati paṭisanthārassa katattāti eke. Codanālakkhaṇaṃ na hotīti katvā vuttanti eke. ‘‘Ṭhatvā codemī’’ti āgato taṃ ṭhānaṃ bhañjati, karoti cekaṃ, tīṇipi ce karoti, ekameva, ekavacanattāti eke. Tīṇi ṭhānāni bhañjatīti eke. Upatissatthero ‘‘na codanādiṃ bhañjati, codetukāmo akattabbaṃ akāsi, tena vattabhede dukkaṭa’’nti vadati. Dhammasiritthero pana ‘‘āsane ce nisīdati, ekāya nisajjāya dve ṭhānāni bhañjati. Āmisaṃ ce paṭiggaṇhāti, ekena paṭiggahena dve ṭhānāni bhañjati. Dhammaṃ ce bhāsati, dhammadesanasikkhāpade vuttaparicchedāya ekāya vācāya dve ṭhānāni bhañjati, taṃ sandhāya vutta’’nti vadati. ‘‘Yatthā’’ti vutte attano eva santikaṃ gantabbanti vuttaṃ viya hoti. Tena vuttaṃ ‘‘byañjanaṃ pana na sametī’’ti. Upāsakehi āṇattā taṃ. Mūlaṃ asādiyantenāti mūlassa akappiyabhāve sati asādiyantena. Tañca kho cittena , na mukhena. Sace evaṃ vutte akappiyaṃ dassetīti katvā cittena akappiyaṃ icchantova mukhena kappiyaṃ niddisati ‘‘cīvaraṃ me dethā’’ti, na vaṭṭati. Paṭilābhe rūpiyapaṭiggahaṇasikkhāpadena āpatti.
д̇ад̇рааяам̣ вижааран̣аа – жид̇д̇зна саад̣̇ияанд̇оби мукзна габбияавохаарзна жз вохарад̇и ‘‘гахаабан̣аарахзна, баад̣̇аарахзна ваа габбияабхан̣д̣зна ид̣̇ан̃жид̣̇ан̃жа аахараа’’д̇и. гин̃жааби руубияам̣ санд̇хааяа вад̣̇ад̇и, ваддад̇и зва. гасмаа? ган̃жи сассудтаанагам̣ бхуумибад̣̇зсам̣ санд̇хааяа ‘‘сиймам̣ д̣̇змаад̇и вад̣̇анд̇и, ваддад̇ий’’д̇и важанад̇о, ‘‘вихаарасса д̣̇змаа’’д̇и вуд̇д̇з ‘‘бадигкибид̇ум̣ на ваддад̇ий’’д̇и важанад̇о жа. ануг̇ан̣тибад̣̇з бана вуд̇д̇ам̣ ‘‘сан̇гхам̣ санд̇хааяа ‘вихаарасса д̣̇змаа’д̇и д̣̇иннам̣ г̇арубхан̣д̣ам̣ на ход̇и, д̣̇агкин̣од̣̇агам̣ самбадижчид̇ум̣, ‘саад̇хуу’д̇и жа вад̇д̇ум̣, анумод̣̇зд̇ун̃жа ваддад̇и. гасмаа? сан̇гхасса ‘вихааро’д̇и наамаабхаавад̇о, кзд̇д̇ассзва ‘сиймаа’д̇и наамабхаавад̇о жа, жид̇д̇зна аарамман̣ам̣ гад̇ам̣ аббамаан̣ам̣, габбияавохаарова бамаан̣ам̣. габбияамзваажигкид̇ад̇д̇аа ‘на д̇взваахам̣, бхигкавз, гзнажи барияааязна ж̇аад̇аруубараж̇ад̇ам̣ саад̣̇ид̇аб̣б̣ам̣ бариязсид̇аб̣б̣анд̇и вад̣̇аамий’д̇и (махаава. 299) важанзнаби на вируж̇жхад̇и. габбияаважанабажжаяаа д̣̇ааяаго саяамзва гад̇д̇аб̣б̣аяуд̇д̇агам̣ ж̇ааниссад̇ийд̇и ад̇хиббааяад̇о д̣̇ааяагзна зд̇асса ад̇хиббааяам̣ н̃ад̇ваа габбияагаарагасса хад̇т̇з табид̇ам̣ бхигкусса санд̇агамзва ход̇ий’’д̇и. ид̣̇ам̣ саб̣б̣амаяуд̇д̇ам̣, гасмаа? сиймаавихаараважанасса д̣̇ааяагаважанад̇д̇аа. ид̇ха жа бхигкуно важанам̣ бамаан̣ам̣. д̇знзвааха ‘‘ат̇ааби ‘мама д̇ал̣аагам̣ ваа богкаран̣им̣ ваа сан̇гхасса д̣̇аммий’д̇и вуд̇д̇з ‘саад̇ху, убаасага, сан̇гхо баанийяам̣ бивиссад̇ий’д̇иаад̣̇ийни вад̇ваа барибхун̃ж̇ид̇ум̣ ваддад̇и зваа’’д̇и. ан̃н̃ат̇аа кзд̇д̇ам̣ санд̇хааяа бхигкуно кзд̇д̇абадиб̣ад̣̇д̇хаважанаани сиймааважанзна габбанд̇ийд̇и аабаж̇ж̇ад̇и. авихаарасса жа бхигкусса руубияам̣ д̣̇ассзд̇ваа ‘‘ид̣̇ам̣ вихаарасса д̣̇аммий’’д̇и вуд̇д̇з ад̇д̇ано ад̇т̇ааяа д̣̇ияяамаанам̣ ж̇аананд̇знааби д̇ам̣ аббадигкибид̇аб̣б̣ам̣. д̇ат̇аа гахаабан̣аарахаад̣̇ино агаббияабхан̣д̣абхаавам̣, гахаабан̣аад̣̇ибхаавамзва ваа ж̇аананд̇амзва санд̇хааяа д̇ат̇аавохаранд̇асса жа анаабад̇д̇ийд̇и аабаж̇ж̇ад̇и. ‘‘на д̇взваахам̣, бхигкавз, гзнажи барияааязнаа’’д̇и ниббад̣̇зсад̇о вуд̇д̇ад̇д̇аа на саггаа лзсам̣ од̣д̣зд̇унд̇и но д̇агго, вижаарзд̇ваа бана г̇ахзд̇аб̣б̣ам̣. ‘‘но жз ижчад̇и, на гат̇зд̇аб̣б̣а’’нд̇и важанад̇о яат̇аавуд̇д̇асаамижияаа агаран̣з анаабад̇д̇и д̣̇уггадассаад̇и д̣̇ассзд̇и.
Tatrāyaṃ vicāraṇā – cittena sādiyantopi mukhena kappiyavohārena ce voharati ‘‘kahāpaṇārahena, pādārahena vā kappiyabhaṇḍena idañcidañca āharā’’ti. Kiñcāpi rūpiyaṃ sandhāya vadati, vaṭṭati eva. Kasmā? Kañci sassuṭṭhānakaṃ bhūmipadesaṃ sandhāya ‘‘sīmaṃ demāti vadanti, vaṭṭatī’’ti vacanato, ‘‘vihārassa demā’’ti vutte ‘‘paṭikkhipituṃ na vaṭṭatī’’ti vacanato ca. Anugaṇṭhipade pana vuttaṃ ‘‘saṅghaṃ sandhāya ‘vihārassa demā’ti dinnaṃ garubhaṇḍaṃ na hoti, dakkhiṇodakaṃ sampaṭicchituṃ, ‘sādhū’ti ca vattuṃ, anumodetuñca vaṭṭati. Kasmā? Saṅghassa ‘vihāro’ti nāmābhāvato, khettasseva ‘sīmā’ti nāmabhāvato ca, cittena ārammaṇaṃ kataṃ appamāṇaṃ, kappiyavohārova pamāṇaṃ. Kappiyamevācikkhitattā ‘na tvevāhaṃ, bhikkhave, kenaci pariyāyena jātarūparajataṃ sāditabbaṃ pariyesitabbanti vadāmī’ti (mahāva. 299) vacanenapi na virujjhati. Kappiyavacanapaccayā dāyako sayameva kattabbayuttakaṃ jānissatīti adhippāyato dāyakena etassa adhippāyaṃ ñatvā kappiyakārakassa hatthe ṭhapitaṃ bhikkhussa santakameva hotī’’ti. Idaṃ sabbamayuttaṃ, kasmā? Sīmāvihāravacanassa dāyakavacanattā. Idha ca bhikkhuno vacanaṃ pamāṇaṃ. Tenevāha ‘‘athāpi ‘mama taḷākaṃ vā pokkharaṇiṃ vā saṅghassa dammī’ti vutte ‘sādhu, upāsaka, saṅgho pānīyaṃ pivissatī’tiādīni vatvā paribhuñjituṃ vaṭṭati evā’’ti. Aññathā khettaṃ sandhāya bhikkhuno khettapaṭibaddhavacanāni sīmāvacanena kappantīti āpajjati. Avihārassa ca bhikkhussa rūpiyaṃ dassetvā ‘‘idaṃ vihārassa dammī’’ti vutte attano atthāya diyyamānaṃ jānantenāpi taṃ appaṭikkhipitabbaṃ. Tathā kahāpaṇārahādino akappiyabhaṇḍabhāvaṃ, kahāpaṇādibhāvameva vā jānantameva sandhāya tathāvoharantassa ca anāpattīti āpajjati. ‘‘Na tvevāhaṃ, bhikkhave, kenaci pariyāyenā’’ti nippadesato vuttattā na sakkā lesaṃ oḍḍetunti no takko, vicāretvā pana gahetabbaṃ. ‘‘No ce icchati, na kathetabba’’nti vacanato yathāvuttasāmiciyā akaraṇe anāpatti dukkaṭassāti dasseti.
‘‘ан̃н̃аад̇агааббаваарид̇зсу вияа бадибаж̇ж̇ид̇аб̣б̣а’’нд̇и важанад̇о яат̇аавуд̇д̇асаамижимби на гад̇ваа жз нибпаад̣̇зд̇и, ан̃н̃аад̇агавин̃н̃ад̇д̇исигкаабад̣̇зна гаарзд̇аб̣б̣од̇и д̣̇ассзд̇и. габбияагаарагаа саяамзва жод̣̇зд̇ваа д̣̇знд̇и, ваддад̇и. ‘‘саяам̣ гаран̣амзва бадигкид̇д̇а’’нд̇и жа вад̣̇анд̇и. бин̣д̣абаад̇аад̣̇ийнам̣ …бз… зсзва наяод̇и зд̇т̇а ‘‘д̣̇уггада’’нд̇и вад̣̇анд̇и, д̇ам̣ на сунд̣̇арам̣, д̣̇ад̣̇анд̇зсубийд̇и аби-сад̣̇д̣̇зна сан̇г̇ахид̇ад̇д̇аа ниссаг̇г̇ияабаажид̇д̇ияамзва. ж̇аад̇аруубараж̇ад̇ам̣ ‘‘сан̇гхз саад̣̇ид̇з д̣̇уггада’’нд̇и жа вигаббзнд̇и. д̇ам̣ висзсзд̇ваа навуд̇д̇ад̇д̇аа баажид̇д̇ияамзваад̇и д̣̇ассзд̇и. ‘‘ниссаг̇г̇ияамзваад̇и язваабанагасигкаабад̣̇зсу сияаа’’д̇и вад̣̇анд̇и, убабаригкид̇аб̣б̣ам̣. ‘‘яасса гассажи хи ан̃н̃асса…бз… махаабажжарияам̣ вуд̇д̇а’’нд̇и важанад̇о абаб̣б̣аж̇ид̇аанам̣ анд̇амасо маад̇аабид̇уунамби ад̇т̇ааяа самбадижчанд̇асса д̣̇уггадамзваад̇и д̣̇ассзд̇и.
‘‘Aññātakaappavāritesu viya paṭipajjitabba’’nti vacanato yathāvuttasāmicimpi na katvā ce nipphādeti, aññātakaviññattisikkhāpadena kāretabboti dasseti. Kappiyakārakā sayameva codetvā denti, vaṭṭati. ‘‘Sayaṃ karaṇameva paṭikkhitta’’nti ca vadanti. Piṇḍapātādīnaṃ…pe… eseva nayoti ettha ‘‘dukkaṭa’’nti vadanti, taṃ na sundaraṃ, dadantesupīti api-saddena saṅgahitattā nissaggiyapācittiyameva. Jātarūparajataṃ ‘‘saṅghe sādite dukkaṭa’’nti ca vikappenti. Taṃ visesetvā navuttattā pācittiyamevāti dasseti. ‘‘Nissaggiyamevāti yevāpanakasikkhāpadesu siyā’’ti vadanti, upaparikkhitabbaṃ. ‘‘Yassa kassaci hi aññassa…pe… mahāpaccariyaṃ vutta’’nti vacanato apabbajitānaṃ antamaso mātāpitūnampi atthāya sampaṭicchantassa dukkaṭamevāti dasseti.
саб̣б̣ад̇т̇а самбадижчанам̣ наама ‘‘уг̇г̇ан̣хзяяа ваа уг̇г̇ан̣хаабзяяаваа убанигкид̇д̇ам̣ ваа саад̣̇иязяяаа’’д̇и звам̣ вуд̇д̇алагкан̣амзва. звам̣ санд̇зби гад̇т̇ажи бадигкибид̇аб̣б̣ам̣, гад̇т̇ажи на бадигкибид̇аб̣б̣ам̣, гад̇т̇ажи бадигкид̇д̇ам̣ саад̣̇ид̇ум̣ ваддад̇и, звам̣ аббадигкид̇д̇ам̣ гин̃жи ваддад̇и, ид̣̇ам̣ саб̣б̣амби д̣̇ассзд̇ум̣ ‘‘сажз банаа’’д̇и вид̇т̇ааро аарад̣̇д̇хо. д̇ад̇т̇а ‘‘жзд̇ияасса…бз… на ваддад̇ий’’д̇и важанад̇о аббадигкид̇д̇ам̣ вихаарасса д̣̇иннам̣ саад̣̇ид̇ум̣ ваддад̇ийд̇и сид̣̇д̇хам̣. д̇ат̇аа т̇зрасса ‘‘маад̇уяаа д̣̇змаа’’д̇иаад̣̇инаа вуд̇д̇зби бадиг̇г̇ахан̣з аабад̇д̇и баажид̇д̇ияамзва. саабад̇д̇иго ход̇ийд̇и зд̇т̇а гааяа аабад̇д̇ияаа саабад̇д̇иго ход̇ийд̇и? д̣̇уггадаабад̇д̇ияаад̇и згз. на яааяа гааяажи, гзвалам̣ адтаанз жод̣̇зд̇ийд̇и гад̇ваа ‘‘саабад̇д̇иго’’д̇и вуд̇д̇ам̣. яат̇аа гат̇анд̇и? ‘‘бан̃жахи, бхигкавз, ан̇г̇зхи саманнааг̇ад̇о сад̣̇д̇хивихаариго бан̣аамзд̇аб̣б̣о…бз… бан̣аамзнд̇о анад̇исааро’’д̇и (махаава. 68) зд̇т̇а на саммаавад̇д̇анд̇ам̣язва абан̣аамзнд̇асса д̣̇уггадам̣ вуд̇д̇ам̣. яат̇ааха – ‘‘на жа, бхигкавз, асаммаавад̇д̇анд̇о на бан̣аамзд̇аб̣б̣о, яо на бан̣аамзяяа, аабад̇д̇ид̣̇уггадассаа’’д̇и (махаава. 68), д̇асмаа ад̇химад̇д̇абзмаад̣̇иабхаавзби абан̣аамзнд̇асса анаабад̇д̇и д̣̇иссад̇и. абижа ‘‘саад̇исааро ход̇ий’’д̇и вуд̇д̇ам̣. звам̣самбад̣̇амид̣̇ам̣ д̣̇адтаб̣б̣ам̣. адтагат̇ааяа ‘‘саад̇исааро ход̇ийд̇и сад̣̇осо ход̇и, аабад̇д̇им̣ аабаж̇ж̇ад̇ий’’д̇и (махаава. адта. 68) вуд̇д̇ад̇д̇аа на яуд̇д̇анд̇и жз? на, д̇ад̣̇ананд̇арамзва д̇ам̣мижчааг̇ааханивад̇д̇анад̇т̇ам̣, д̇асмаа ‘‘на саммаавад̇д̇анд̇о бан̣аамзд̇аб̣б̣о’’д̇и вуд̇д̇ад̇д̇аа анаабад̇д̇игаа гад̇аад̇и. д̣̇уггадаабад̇д̇и ход̇ийд̇и аажарияо, виймам̣сид̇аб̣б̣ам̣. ‘‘габбияабхан̣д̣амби агаббияамзваад̇и д̇ал̣аагад̇о нибпаннад̇хан̃н̃зна баривад̇д̇зд̇ваа лад̣̇д̇хам̣ г̇орасамби на ваддад̇ий’’д̇и вуд̇д̇ам̣.
Sabbattha sampaṭicchanaṃ nāma ‘‘uggaṇheyya vā uggaṇhāpeyyavā upanikkhittaṃ vā sādiyeyyā’’ti evaṃ vuttalakkhaṇameva. Evaṃ santepi katthaci paṭikkhipitabbaṃ, katthaci na paṭikkhipitabbaṃ, katthaci paṭikkhittaṃ sādituṃ vaṭṭati, evaṃ appaṭikkhittaṃ kiñci vaṭṭati, idaṃ sabbampi dassetuṃ ‘‘sace panā’’ti vitthāro āraddho. Tattha ‘‘cetiyassa…pe… na vaṭṭatī’’ti vacanato appaṭikkhittaṃ vihārassa dinnaṃ sādituṃ vaṭṭatīti siddhaṃ. Tathā therassa ‘‘mātuyā demā’’tiādinā vuttepi paṭiggahaṇe āpatti pācittiyameva. Sāpattiko hotīti ettha kāya āpattiyā sāpattiko hotīti? Dukkaṭāpattiyāti eke. Na yāya kāyaci, kevalaṃ aṭṭhāne codetīti katvā ‘‘sāpattiko’’ti vuttaṃ. Yathā kathanti? ‘‘Pañcahi, bhikkhave, aṅgehi samannāgato saddhivihāriko paṇāmetabbo…pe… paṇāmento anatisāro’’ti (mahāva. 68) ettha na sammāvattantaṃyeva apaṇāmentassa dukkaṭaṃ vuttaṃ. Yathāha – ‘‘na ca, bhikkhave, asammāvattanto na paṇāmetabbo, yo na paṇāmeyya, āpattidukkaṭassā’’ti (mahāva. 68), tasmā adhimattapemādiabhāvepi apaṇāmentassa anāpatti dissati. Apica ‘‘sātisāro hotī’’ti vuttaṃ. Evaṃsampadamidaṃ daṭṭhabbaṃ. Aṭṭhakathāya ‘‘sātisāro hotīti sadoso hoti, āpattiṃ āpajjatī’’ti (mahāva. aṭṭha. 68) vuttattā na yuttanti ce? Na, tadanantarameva taṃmicchāgāhanivattanatthaṃ, tasmā ‘‘na sammāvattanto paṇāmetabbo’’ti vuttattā anāpattikā katāti. Dukkaṭāpatti hotīti ācariyo, vīmaṃsitabbaṃ. ‘‘Kappiyabhaṇḍampi akappiyamevāti taḷākato nipphannadhaññena parivattetvā laddhaṃ gorasampi na vaṭṭatī’’ti vuttaṃ.
габбияавохаарзби вид̇хаанам̣ вагкаама, сзяяат̇ид̣̇ам̣ – ‘‘уд̣̇агавасзнаа’’д̇иаад̣̇и. д̣̇уб̣б̣иниб̣бхог̇ам̣ ход̇ийд̇и ид̣̇ам̣ барад̇о ‘‘д̇ассзва агаббияам̣. гасмаа? д̇хан̃н̃асса вижаарид̇ад̇д̇аа’’д̇и иминаа асад̣̇исам̣, д̇асмаа сувуд̇д̇ам̣. ид̣̇ан̃хи бхигкусса баяог̇авасзна аад̣̇ид̇о бадтааяа уббаннзна миссанд̇и. агад̇абуб̣б̣ам̣ навасассам̣ наама. калз ваа тад̇ваа рагкад̇ийд̇и ‘‘ид̣̇ам̣ ваа зд̇д̇агам̣ ваа маа г̇ан̣ха, ид̣̇ам̣ г̇ахзд̇ум̣ лаб̣бхад̇ий’’д̇и ваа ‘‘ид̇о абанзхи, ид̇ха бун̃ж̇ам̣ гарохий’’д̇и звамаад̣̇инаа ваа баяог̇зна жз рагкад̇и, д̇ам̣ агаббияам̣. ‘‘сажз ‘маяитид̇з рагкид̇ам̣ ход̇ий’д̇и рагкад̇и, г̇ан̣ханд̇з ваа бассид̇ваа ‘гим̣ гарот̇аа’д̇и, бхан̣ад̇и ваддад̇ий’’д̇и вуд̇д̇ам̣, д̇ам̣ яуд̇д̇ам̣. руубияабадиг̇г̇ахан̣асигкаабад̣̇з ‘‘д̣̇ваарам̣ бид̣̇ахид̇ваа рагканд̇зна васид̇аб̣б̣а’’нд̇и хи вуд̇д̇ам̣. д̇ассзва д̇ам̣ агаббияам̣. гасмаа? абуб̣б̣асса ануббаад̣̇ид̇ад̇д̇аа. хздтаа ‘‘сассам̣ гад̇ваа аахарат̇аа’’д̇и вад̇д̇ум̣ бана на ваддад̇ийд̇и. бан̣н̣зби зсзва наяо. ‘‘багад̇ияаа саяамзва гаронд̇аанам̣ уссаахаж̇ананад̇о’’д̇и вуд̇д̇ам̣. гасмаа? ‘‘гахаабан̣аанам̣ вижаарид̇ад̇д̇аа’’д̇и важанад̇о, баг̇зва удтаабид̇ад̇д̇аад̇и сид̣̇д̇хам̣ ход̇и. сажз д̣̇ааяагаа ваа сан̇гхасса г̇аамакзд̇д̇аараамаад̣̇им̣ гзн̣ияаа г̇ахид̇амануссаа ваа д̇ад̇т̇а гудумб̣ино ‘‘имз сан̇гхасса гахаабан̣аа аахадаа’’д̇и вад̣̇анд̇и, ‘‘на габбад̇ий’’д̇и зд̇д̇агамзва вад̇д̇аб̣б̣ам̣. габбияагаарагаава жз вад̣̇анд̇и, ‘‘сан̇гхасса гахаабан̣аа на габбанд̇и, саббиаад̣̇ийни вадданд̇ий’’д̇и вад̇д̇аб̣б̣ам̣, д̇асмаа ‘‘сан̇гхасса габбияагаарагз ваа г̇уд̇д̇адтаанам̣ ваа аажигкат̇аа’’д̇и вад̇ваа д̇зхи самбаад̣̇ид̇ам̣ гзнажи агад̇д̇аб̣б̣ад̇ааяа ‘‘иминаа саббим̣ аахараахий’’д̇и вижаарзд̇и нидтаабзд̇ваа ид̇арзсам̣ габбияам̣ барад̇о бад̇д̇ажад̇уггз жад̇уд̇т̇абад̇д̇о вияа. вуд̇д̇ан̃хи д̇ад̇т̇а ‘‘имз гахаабан̣з г̇ахзд̇ваа имам̣ д̣̇зхий’д̇и гахаабан̣з д̣̇аабзд̇ваа г̇ахид̇о, аяам̣ бад̇д̇о зд̇ассзва бхигкуно на ваддад̇и, д̣̇уб̣б̣ижаарид̇ад̇д̇аа, ан̃н̃зсам̣ бана ваддад̇и, мууласса асамбадижчид̇ад̇д̇аа’’д̇иаад̣̇и. яад̣̇и звам̣ саб̣б̣зсам̣ агаббияам̣. гасмаа? гахаабан̣аанам̣ вижаарид̇ад̇д̇аад̇и. ид̣̇ам̣ д̣̇увуд̇д̇анд̇и жз? на, мууласса самбадижчид̇адтаанам̣ санд̇хааяа имасса вуд̇д̇ад̇д̇аа бад̇д̇ажад̇уггз д̣̇уд̇ияад̇ад̇ияабад̇д̇аа вияа, д̇знзва вуд̇д̇ам̣ саяам̣гаариваарз ‘‘на габбад̇ий’’д̇и зд̇д̇агамзва вад̇д̇аб̣б̣а’нд̇и. д̇ад̇о барам̣ муулам̣ самбадижчад̇и наама.
Kappiyavohārepi vidhānaṃ vakkhāma, seyyathidaṃ – ‘‘udakavasenā’’tiādi. Dubbinibbhogaṃ hotīti idaṃ parato ‘‘tasseva akappiyaṃ. Kasmā? Dhaññassa vicāritattā’’ti iminā asadisaṃ, tasmā suvuttaṃ. Idañhi bhikkhussa payogavasena ādito paṭṭhāya uppannena missanti. Akatapubbaṃ navasassaṃ nāma. Khale vā ṭhatvā rakkhatīti ‘‘idaṃ vā ettakaṃ vā mā gaṇha, idaṃ gahetuṃ labbhatī’’ti vā ‘‘ito apanehi, idha puñjaṃ karohī’’ti evamādinā vā payogena ce rakkhati, taṃ akappiyaṃ. ‘‘Sace ‘mayiṭhite rakkhitaṃ hotī’ti rakkhati, gaṇhante vā passitvā ‘kiṃ karothā’ti, bhaṇati vaṭṭatī’’ti vuttaṃ, taṃ yuttaṃ. Rūpiyapaṭiggahaṇasikkhāpade ‘‘dvāraṃ pidahitvā rakkhantena vasitabba’’nti hi vuttaṃ. Tasseva taṃ akappiyaṃ. Kasmā? Apubbassa anuppāditattā. Heṭṭhā ‘‘sassaṃ katvā āharathā’’ti vattuṃ pana na vaṭṭatīti. Paṇṇepi eseva nayo. ‘‘Pakatiyā sayameva karontānaṃ ussāhajananato’’ti vuttaṃ. Kasmā? ‘‘Kahāpaṇānaṃ vicāritattā’’ti vacanato, pageva uṭṭhāpitattāti siddhaṃ hoti. Sace dāyakā vā saṅghassa gāmakhettārāmādiṃ keṇiyā gahitamanussā vā tattha kuṭumbino ‘‘ime saṅghassa kahāpaṇā āhaṭā’’ti vadanti, ‘‘na kappatī’’ti ettakameva vattabbaṃ. Kappiyakārakāva ce vadanti, ‘‘saṅghassa kahāpaṇā na kappanti, sappiādīni vaṭṭantī’’ti vattabbaṃ, tasmā ‘‘saṅghassa kappiyakārake vā guttaṭṭhānaṃ vā ācikkhathā’’ti vatvā tehi sampāditaṃ kenaci akattabbatāya ‘‘iminā sappiṃ āharāhī’’ti vicāreti niṭṭhāpetvā itaresaṃ kappiyaṃ parato pattacatukke catutthapatto viya. Vuttañhi tattha ‘‘ime kahāpaṇe gahetvā imaṃ dehī’ti kahāpaṇe dāpetvā gahito, ayaṃ patto etasseva bhikkhuno na vaṭṭati, dubbicāritattā, aññesaṃ pana vaṭṭati, mūlassa asampaṭicchitattā’’tiādi. Yadi evaṃ sabbesaṃ akappiyaṃ. Kasmā? Kahāpaṇānaṃ vicāritattāti. Idaṃ duvuttanti ce? Na, mūlassa sampaṭicchitaṭṭhānaṃ sandhāya imassa vuttattā pattacatukke dutiyatatiyapattā viya, teneva vuttaṃ sayaṃkārivāre ‘‘na kappatī’’ti ettakameva vattabba’nti. Tato paraṃ mūlaṃ sampaṭicchati nāma.
махаависаяасигкад̇д̇аа, рааж̇асигкаабад̣̇ам̣ ид̣̇ам̣;
Mahāvisayasikkhattā, rājasikkhāpadaṃ idaṃ;
ран̃н̃о вияа д̣̇увин̃н̃зяяам̣, жид̇д̇аад̇хиббааяад̇оби ваа.
Rañño viya duviññeyyaṃ, cittādhippāyatopi vā.
рааж̇асигкаабад̣̇аван̣н̣анаа нидтид̇аа.
Rājasikkhāpadavaṇṇanā niṭṭhitā.
нидтид̇о жийвараваг̇г̇о батамо.
Niṭṭhito cīvaravaggo paṭhamo.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 10. рааж̇асигкаабад̣̇ам̣ • 10. Rājasikkhāpadaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 10. рааж̇асигкаабад̣̇аван̣н̣анаа • 10. Rājasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 10. рааж̇асигкаабад̣̇аван̣н̣анаа • 10. Rājasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 10. рааж̇асигкаабад̣̇аван̣н̣анаа • 10. Rājasikkhāpadavaṇṇanā
