Library / Tipiṭaka / తిపిటక • Tipiṭaka / అఙ్గుత్తరనికాయ • Aṅguttaranikāya

    ౮. రాజాసుత్తం

    8. Rājāsuttaṃ

    ౧౭౮. ‘‘తం కిం మఞ్ఞథ, భిక్ఖవే, అపి ను తుమ్హేహి దిట్ఠం వా సుతం వా – ‘అయం పురిసో పాణాతిపాతం పహాయ పాణాతిపాతా పటివిరతోతి 1. తమేనం రాజానో గహేత్వా పాణాతిపాతా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’’’తి? ‘‘నో హేతం, భన్తే’’. ‘‘సాధు, భిక్ఖవే! మయాపి ఖో ఏతం, భిక్ఖవే, నేవ దిట్ఠం న సుతం – ‘అయం పురిసో పాణాతిపాతం పహాయ పాణాతిపాతా పటివిరతోతి. తమేనం రాజానో గహేత్వా పాణాతిపాతా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’తి. అపి చ, ఖ్వస్స తథేవ పాపకమ్మం పవేదేన్తి 2 – ‘అయం పురిసో ఇత్థిం వా పురిసం వా జీవితా వోరోపేసీతి 3. తమేనం రాజానో గహేత్వా పాణాతిపాతహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తి. అపి ను తుమ్హేహి ఏవరూపం దిట్ఠం వా సుతం వా’’’తి? ‘‘దిట్ఠఞ్చ నో, భన్తే, సుతఞ్చ సుయ్యిస్సతి 4 చా’’తి.

    178. ‘‘Taṃ kiṃ maññatha, bhikkhave, api nu tumhehi diṭṭhaṃ vā sutaṃ vā – ‘ayaṃ puriso pāṇātipātaṃ pahāya pāṇātipātā paṭiviratoti 5. Tamenaṃ rājāno gahetvā pāṇātipātā veramaṇihetu hananti vā bandhanti vā pabbājenti vā yathāpaccayaṃ vā karontī’’’ti? ‘‘No hetaṃ, bhante’’. ‘‘Sādhu, bhikkhave! Mayāpi kho etaṃ, bhikkhave, neva diṭṭhaṃ na sutaṃ – ‘ayaṃ puriso pāṇātipātaṃ pahāya pāṇātipātā paṭiviratoti. Tamenaṃ rājāno gahetvā pāṇātipātā veramaṇihetu hananti vā bandhanti vā pabbājenti vā yathāpaccayaṃ vā karontī’ti. Api ca, khvassa tatheva pāpakammaṃ pavedenti 6 – ‘ayaṃ puriso itthiṃ vā purisaṃ vā jīvitā voropesīti 7. Tamenaṃ rājāno gahetvā pāṇātipātahetu hananti vā bandhanti vā pabbājenti vā yathāpaccayaṃ vā karonti. Api nu tumhehi evarūpaṃ diṭṭhaṃ vā sutaṃ vā’’’ti? ‘‘Diṭṭhañca no, bhante, sutañca suyyissati 8 cā’’ti.

    ‘‘తం కిం మఞ్ఞథ, భిక్ఖవే, అపి ను తుమ్హేహి దిట్ఠం వా సుతం వా – ‘అయం పురిసో అదిన్నాదానం పహాయ అదిన్నాదానా పటివిరతోతి. తమేనం రాజానో గహేత్వా అదిన్నాదానా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’’’తి? ‘‘నో హేతం భన్తే’’. ‘‘సాధు, భిక్ఖవే! మయాపి ఖో ఏతం, భిక్ఖవే, నేవ దిట్ఠం న సుతం – ‘అయం పురిసో అదిన్నాదానం పహాయ అదిన్నాదానా పటివిరతోతి. తమేనం రాజానో గహేత్వా అదిన్నాదానా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’తి. అపి చ ఖ్వస్స తథేవ పాపకమ్మం పవేదేన్తి – ‘అయం పురిసో గామా వా అరఞ్ఞా వా అదిన్నం థేయ్యసఙ్ఖాతం ఆదియీతి 9. తమేనం రాజానో గహేత్వా అదిన్నాదానహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తి. అపి ను తుమ్హేహి ఏవరూపం దిట్ఠం వా సుతం వా’’’తి? ‘‘దిట్ఠఞ్చ నో, భన్తే, సుతఞ్చ సుయ్యిస్సతి చా’’తి.

    ‘‘Taṃ kiṃ maññatha, bhikkhave, api nu tumhehi diṭṭhaṃ vā sutaṃ vā – ‘ayaṃ puriso adinnādānaṃ pahāya adinnādānā paṭiviratoti. Tamenaṃ rājāno gahetvā adinnādānā veramaṇihetu hananti vā bandhanti vā pabbājenti vā yathāpaccayaṃ vā karontī’’’ti? ‘‘No hetaṃ bhante’’. ‘‘Sādhu, bhikkhave! Mayāpi kho etaṃ, bhikkhave, neva diṭṭhaṃ na sutaṃ – ‘ayaṃ puriso adinnādānaṃ pahāya adinnādānā paṭiviratoti. Tamenaṃ rājāno gahetvā adinnādānā veramaṇihetu hananti vā bandhanti vā pabbājenti vā yathāpaccayaṃ vā karontī’ti. Api ca khvassa tatheva pāpakammaṃ pavedenti – ‘ayaṃ puriso gāmā vā araññā vā adinnaṃ theyyasaṅkhātaṃ ādiyīti 10. Tamenaṃ rājāno gahetvā adinnādānahetu hananti vā bandhanti vā pabbājenti vā yathāpaccayaṃ vā karonti. Api nu tumhehi evarūpaṃ diṭṭhaṃ vā sutaṃ vā’’’ti? ‘‘Diṭṭhañca no, bhante, sutañca suyyissati cā’’ti.

    ‘‘తం కిం మఞ్ఞథ, భిక్ఖవే, అపి ను తుమ్హేహి దిట్ఠం వా సుతం వా – ‘అయం పురిసో కామేసుమిచ్ఛాచారం పహాయ కామేసుమిచ్ఛాచారా పటివిరతోతి. తమేనం రాజానో గహేత్వా కామేసుమిచ్ఛాచారా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’’’తి? ‘‘నో హేతం , భన్తే’’. ‘‘సాధు, భిక్ఖవే! మయాపి ఖో ఏతం, భిక్ఖవే, నేవ దిట్ఠం న సుతం – ‘అయం పురిసో కామేసుమిచ్ఛాచారం పహాయ కామేసుమిచ్ఛాచారా పటివిరతోతి. తమేనం రాజానో గహేత్వా కామేసుమిచ్ఛాచారా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’తి. అపి చ ఖ్వస్స తథేవ పాపకమ్మం పవేదేన్తి – ‘అయం పురిసో పరిత్థీసు పరకుమారీసు చారిత్తం ఆపజ్జీతి 11. తమేనం రాజానో గహేత్వా కామేసుమిచ్ఛాచారహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తి. అపి ను తుమ్హేహి ఏవరూపం దిట్ఠం వా సుతం వా’’’తి? ‘‘దిట్ఠఞ్చ నో, భన్తే, సుతఞ్చ సుయ్యిస్సతి చా’’తి.

    ‘‘Taṃ kiṃ maññatha, bhikkhave, api nu tumhehi diṭṭhaṃ vā sutaṃ vā – ‘ayaṃ puriso kāmesumicchācāraṃ pahāya kāmesumicchācārā paṭiviratoti. Tamenaṃ rājāno gahetvā kāmesumicchācārā veramaṇihetu hananti vā bandhanti vā pabbājenti vā yathāpaccayaṃ vā karontī’’’ti? ‘‘No hetaṃ , bhante’’. ‘‘Sādhu, bhikkhave! Mayāpi kho etaṃ, bhikkhave, neva diṭṭhaṃ na sutaṃ – ‘ayaṃ puriso kāmesumicchācāraṃ pahāya kāmesumicchācārā paṭiviratoti. Tamenaṃ rājāno gahetvā kāmesumicchācārā veramaṇihetu hananti vā bandhanti vā pabbājenti vā yathāpaccayaṃ vā karontī’ti. Api ca khvassa tatheva pāpakammaṃ pavedenti – ‘ayaṃ puriso paritthīsu parakumārīsu cārittaṃ āpajjīti 12. Tamenaṃ rājāno gahetvā kāmesumicchācārahetu hananti vā bandhanti vā pabbājenti vā yathāpaccayaṃ vā karonti. Api nu tumhehi evarūpaṃ diṭṭhaṃ vā sutaṃ vā’’’ti? ‘‘Diṭṭhañca no, bhante, sutañca suyyissati cā’’ti.

    ‘‘తం కిం మఞ్ఞథ, భిక్ఖవే, అపి ను తుమ్హేహి దిట్ఠం వా సుతం వా – ‘అయం పురిసో ముసావాదం పహాయ ముసావాదా పటివిరతోతి. తమేనం రాజానో గహేత్వా ముసావాదా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’’’తి? ‘‘నో హేతం, భన్తే’’. ‘‘సాధు, భిక్ఖవే! మయాపి ఖో ఏతం, భిక్ఖవే, నేవ దిట్ఠం న సుతం – ‘అయం పురిసో ముసావాదం పహాయ ముసావాదా పటివిరతోతి. తమేనం రాజానో గహేత్వా ముసావాదా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’తి. అపి చ ఖ్వస్స తథేవ పాపకమ్మం పవేదేన్తి – ‘అయం పురిసో గహపతిస్స వా గహపతిపుత్తస్స వా ముసావాదేన అత్థం పభఞ్జీతి 13. తమేనం రాజానో గహేత్వా ముసావాదహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తి. అపి ను తుమ్హేహి ఏవరూపం దిట్ఠం వా సుతం వా’’’తి? ‘‘దిట్ఠఞ్చ నో, భన్తే, సుతఞ్చ సుయ్యిస్సతి చా’’తి .

    ‘‘Taṃ kiṃ maññatha, bhikkhave, api nu tumhehi diṭṭhaṃ vā sutaṃ vā – ‘ayaṃ puriso musāvādaṃ pahāya musāvādā paṭiviratoti. Tamenaṃ rājāno gahetvā musāvādā veramaṇihetu hananti vā bandhanti vā pabbājenti vā yathāpaccayaṃ vā karontī’’’ti? ‘‘No hetaṃ, bhante’’. ‘‘Sādhu, bhikkhave! Mayāpi kho etaṃ, bhikkhave, neva diṭṭhaṃ na sutaṃ – ‘ayaṃ puriso musāvādaṃ pahāya musāvādā paṭiviratoti. Tamenaṃ rājāno gahetvā musāvādā veramaṇihetu hananti vā bandhanti vā pabbājenti vā yathāpaccayaṃ vā karontī’ti. Api ca khvassa tatheva pāpakammaṃ pavedenti – ‘ayaṃ puriso gahapatissa vā gahapatiputtassa vā musāvādena atthaṃ pabhañjīti 14. Tamenaṃ rājāno gahetvā musāvādahetu hananti vā bandhanti vā pabbājenti vā yathāpaccayaṃ vā karonti. Api nu tumhehi evarūpaṃ diṭṭhaṃ vā sutaṃ vā’’’ti? ‘‘Diṭṭhañca no, bhante, sutañca suyyissati cā’’ti .

    ‘‘తం కిం మఞ్ఞథ, భిక్ఖవే, అపి ను తుమ్హేహి దిట్ఠం వా సుతం వా – ‘అయం పురిసో సురామేరయమజ్జపమాదట్ఠానం పహాయ సురామేరయమజ్జపమాదట్ఠానా పటివిరతోతి. తమేనం రాజానో గహేత్వా సురామేరయమజ్జపమాదట్ఠానా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’తి? ‘‘నో హేతం, భన్తే’’. ‘‘సాధు, భిక్ఖవే! మయాపి ఖో ఏతం, భిక్ఖవే, నేవ దిట్ఠం న సుతం – ‘అయం పురిసో సురామేరయమజ్జపమాదట్ఠానం పహాయ సురామేరయమజ్జపమాదట్ఠానా పటివిరతోతి. తమేనం రాజానో గహేత్వా సురామేరయమజ్జపమాదట్ఠానా వేరమణిహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తీ’తి. అపి చ ఖ్వస్స తథేవ పాపకమ్మం పవేదేన్తి – ‘అయం పురిసో సురామేరయమజ్జపమాదట్ఠానం అనుయుత్తో ఇత్థిం వా పురిసం వా జీవితా వోరోపేసి 15; అయం పురిసో సురామేరయమజ్జపమాదట్ఠానం అనుయుత్తో గామా వా అరఞ్ఞా వా అదిన్నం థేయ్యసఙ్ఖాతం ఆదియి 16; అయం పురిసో సురామేరయమజ్జపమాదట్ఠానం అనుయుత్తో పరిత్థీసు పరకుమారీసు చారిత్తం ఆపజ్జి 17; అయం పురిసో సురామేరయమజ్జపమాదట్ఠానం అనుయుత్తో గహపతిస్స వా గహపతిపుత్తస్స వా ముసావాదేన అత్థం పభఞ్జీతి. తమేనం రాజానో గహేత్వా సురామేరయమజ్జపమాదట్ఠానహేతు హనన్తి వా బన్ధన్తి వా పబ్బాజేన్తి వా యథాపచ్చయం వా కరోన్తి. అపి ను తుమ్హేహి ఏవరూపం దిట్ఠం వా సుతం వా’’’తి? ‘‘దిట్ఠఞ్చ నో, భన్తే, సుతఞ్చ సుయ్యిస్సతి చా’’తి. అట్ఠమం.

    ‘‘Taṃ kiṃ maññatha, bhikkhave, api nu tumhehi diṭṭhaṃ vā sutaṃ vā – ‘ayaṃ puriso surāmerayamajjapamādaṭṭhānaṃ pahāya surāmerayamajjapamādaṭṭhānā paṭiviratoti. Tamenaṃ rājāno gahetvā surāmerayamajjapamādaṭṭhānā veramaṇihetu hananti vā bandhanti vā pabbājenti vā yathāpaccayaṃ vā karontī’ti? ‘‘No hetaṃ, bhante’’. ‘‘Sādhu, bhikkhave! Mayāpi kho etaṃ, bhikkhave, neva diṭṭhaṃ na sutaṃ – ‘ayaṃ puriso surāmerayamajjapamādaṭṭhānaṃ pahāya surāmerayamajjapamādaṭṭhānā paṭiviratoti. Tamenaṃ rājāno gahetvā surāmerayamajjapamādaṭṭhānā veramaṇihetu hananti vā bandhanti vā pabbājenti vā yathāpaccayaṃ vā karontī’ti. Api ca khvassa tatheva pāpakammaṃ pavedenti – ‘ayaṃ puriso surāmerayamajjapamādaṭṭhānaṃ anuyutto itthiṃ vā purisaṃ vā jīvitā voropesi 18; ayaṃ puriso surāmerayamajjapamādaṭṭhānaṃ anuyutto gāmā vā araññā vā adinnaṃ theyyasaṅkhātaṃ ādiyi 19; ayaṃ puriso surāmerayamajjapamādaṭṭhānaṃ anuyutto paritthīsu parakumārīsu cārittaṃ āpajji 20; ayaṃ puriso surāmerayamajjapamādaṭṭhānaṃ anuyutto gahapatissa vā gahapatiputtassa vā musāvādena atthaṃ pabhañjīti. Tamenaṃ rājāno gahetvā surāmerayamajjapamādaṭṭhānahetu hananti vā bandhanti vā pabbājenti vā yathāpaccayaṃ vā karonti. Api nu tumhehi evarūpaṃ diṭṭhaṃ vā sutaṃ vā’’’ti? ‘‘Diṭṭhañca no, bhante, sutañca suyyissati cā’’ti. Aṭṭhamaṃ.




    Next: ౯. గిహిసుత్తం • 9. Gihisuttaṃ




    Footnotes:
    1. పటివిరతో హోతీతి (సీ॰), పటివిరతో హోతి (స్యా॰ కం॰ పీ॰)
    2. తథేవ పాపకం కమ్మం పవేదయన్తి (సీ॰), తదేవ పాపకమ్మం పవేదేతి (స్యా॰ కం॰)
    3. వోరోపేతీతి (స్యా॰ కం॰)
    4. సూయిస్సతి (సీ॰ పీ॰)
    5. paṭivirato hotīti (sī.), paṭivirato hoti (syā. kaṃ. pī.)
    6. tatheva pāpakaṃ kammaṃ pavedayanti (sī.), tadeva pāpakammaṃ pavedeti (syā. kaṃ.)
    7. voropetīti (syā. kaṃ.)
    8. sūyissati (sī. pī.)
    9. ఆదియతి (స్యా॰ కం॰)
    10. ādiyati (syā. kaṃ.)
    11. ఆపజ్జతి (స్యా॰ కం॰)
    12. āpajjati (syā. kaṃ.)
    13. భఞ్జతీతి (సీ॰), భఞ్జతి (స్యా॰ కం॰), భఞ్జీతి (పీ॰)
    14. bhañjatīti (sī.), bhañjati (syā. kaṃ.), bhañjīti (pī.)
    15. వోరోపేతి (స్యా॰)
    16. ఆదియతి (సీ॰ స్యా॰)
    17. ఆపజ్జతి (సీ॰ స్యా॰)
    18. voropeti (syā.)
    19. ādiyati (sī. syā.)
    20. āpajjati (sī. syā.)



    Related texts:



    అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) / ౮. రాజసుత్తవణ్ణనా • 8. Rājasuttavaṇṇanā

    టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౭-౮. వణిజ్జాసుత్తాదివణ్ణనా • 7-8. Vaṇijjāsuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact