| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
2. рааж̇асуд̇д̇аван̣н̣анаа
2. Rājasuttavaṇṇanā
12. д̣̇уд̇ияз самб̣ахулаананд̇и винаяабарияааязна д̇аяо ж̇анаа ‘‘самб̣ахулаа’’д̇и вужжанд̇и, д̇ад̇о барам̣ сан̇гхо. суд̇д̇анд̇абарияааязна бана д̇аяо д̇аяо зва, д̇ад̇о уд̣̇д̇хам̣ самб̣ахулаа. д̇асмаа ид̇хааби суд̇д̇анд̇абарияааязна самб̣ахулаад̇и взд̣̇ид̇аб̣б̣аа. убадтаанасаалааяанд̇и д̇хаммасабхааман̣д̣абз. саа хи д̇хаммам̣ д̣̇зсзд̇ум̣ ааг̇ад̇асса д̇ат̇ааг̇ад̇асса бхигкуунам̣ убадтаанагаран̣адтаананд̇и ‘‘убадтаанасаалаа’’д̇и вужжад̇и. ат̇а ваа яад̇т̇а бхигкуу винаяам̣ винижчинанд̇и, д̇хаммам̣ гат̇знд̇и, саагажчам̣ самаабаж̇ж̇анд̇и, саннибад̇анавасзна багад̇ияаа убад̇идтанд̇и, саа саалааби ман̣д̣абоби ‘‘убадтаанасаалаа’’д̇взва вужжад̇и. д̇ад̇т̇ааби хи б̣уд̣̇д̇хаасанам̣ нижжам̣ бан̃н̃ад̇д̇амзва ход̇и. ид̣̇ан̃хи б̣уд̣̇д̇хаанам̣ д̇харамаанагаалз бхигкуунам̣ жаарид̇д̇ам̣. саннисиннаананд̇и нисаж̇ж̇анавасзна сан̇г̇амма нисиннаанам̣. саннибад̇ид̇аананд̇и д̇ад̇о д̇ад̇о ааг̇анд̇ваа саннибад̇анавасзна саннибад̇ид̇аанам̣. ат̇а ваа б̣уд̣̇д̇хаасанам̣ бурад̇о гад̇ваа сад̇т̇у саммукз вияа аад̣̇аруббад̇д̇ияаа саггажжам̣ нисийд̣̇анавасзна саннисиннаанам̣, самаанаж̇жхаасаяад̇д̇аа ан̃н̃аман̃н̃асмим̣ аж̇жхаасаязна судту саммаа жа нибад̇анавасзна саннибад̇ид̇аанам̣. аяанд̇и ид̣̇аани вужжамаанам̣ нид̣̇д̣̇исад̇и. анд̇араагат̇аад̇и гаммадтаанаманасигаарауд̣̇д̣̇зсабарибужчаад̣̇ийнам̣ анд̇араа ан̃н̃аа згаа гат̇аа, ат̇а ваа маж̇жханхигз лад̣̇д̇хасса суг̇ад̇оваад̣̇асса, сааяам̣ лабхид̇аб̣б̣асса д̇хаммассаванасса жа анд̇араа бавад̇д̇ад̇д̇аа анд̇араагат̇аа, саман̣асамаажаарассзва ваа анд̇араа бавад̇д̇аа ан̃н̃аа згаа гат̇аад̇и анд̇араагат̇аа. уд̣̇абаад̣̇ийд̇и уббаннаа.
12. Dutiye sambahulānanti vinayapariyāyena tayo janā ‘‘sambahulā’’ti vuccanti, tato paraṃ saṅgho. Suttantapariyāyena pana tayo tayo eva, tato uddhaṃ sambahulā. Tasmā idhāpi suttantapariyāyena sambahulāti veditabbā. Upaṭṭhānasālāyanti dhammasabhāmaṇḍape. Sā hi dhammaṃ desetuṃ āgatassa tathāgatassa bhikkhūnaṃ upaṭṭhānakaraṇaṭṭhānanti ‘‘upaṭṭhānasālā’’ti vuccati. Atha vā yattha bhikkhū vinayaṃ vinicchinanti, dhammaṃ kathenti, sākacchaṃ samāpajjanti, sannipatanavasena pakatiyā upatiṭṭhanti, sā sālāpi maṇḍapopi ‘‘upaṭṭhānasālā’’tveva vuccati. Tatthāpi hi buddhāsanaṃ niccaṃ paññattameva hoti. Idañhi buddhānaṃ dharamānakāle bhikkhūnaṃ cārittaṃ. Sannisinnānanti nisajjanavasena saṅgamma nisinnānaṃ. Sannipatitānanti tato tato āgantvā sannipatanavasena sannipatitānaṃ. Atha vā buddhāsanaṃ purato katvā satthu sammukhe viya ādaruppattiyā sakkaccaṃ nisīdanavasena sannisinnānaṃ, samānajjhāsayattā aññamaññasmiṃ ajjhāsayena suṭṭhu sammā ca nipatanavasena sannipatitānaṃ. Ayanti idāni vuccamānaṃ niddisati. Antarākathāti kammaṭṭhānamanasikārauddesaparipucchādīnaṃ antarā aññā ekā kathā, atha vā majjhanhike laddhassa sugatovādassa, sāyaṃ labhitabbassa dhammassavanassa ca antarā pavattattā antarākathā, samaṇasamācārasseva vā antarā pavattā aññā ekā kathāti antarākathā. Udapādīti uppannā.
имзсам̣ д̣̇виннам̣ рааж̇уунанд̇и нид̣̇д̇хааран̣з саамиважанам̣. махад̣̇д̇ханад̇аро ваад̇иаад̣̇ийсу бат̇авияам̣ никан̣ид̇ваа табид̇ам̣ сад̇д̇арад̇ананижаяасан̇каад̇ам̣ маханд̇ам̣ д̇ханам̣ зд̇ассаад̇и махад̣̇д̇хано, д̣̇вийсу аяам̣ ад̇исаязна махад̣̇д̇ханод̇и махад̣̇д̇ханад̇аро. ваасад̣̇д̣̇о вигаббад̇т̇о. сзсабад̣̇зсуби зсзва наяо. аяам̣ бана висзсо – нижжабариб̣б̣аяавасзна маханд̇о бхог̇о зд̇ассаад̇и махаабхог̇о. д̣̇звасигам̣ бависанаааяабхууд̇о маханд̇о госо зд̇ассаад̇и махаагосо. абарз бана ‘‘д̣̇звасигам̣ бависанаааяабхууд̇ам̣ ман̣исаарапзг̇г̇уг̇умб̣аад̣̇ибхзд̣̇абхиннам̣ бариг̇г̇ахавад̇т̇у д̇ханам̣, д̇ад̣̇зва саараг̇аб̣бхаад̣̇ийсу нихид̇ам̣ госо’’д̇и вад̣̇анд̇и. важ̇иро, махаанийло, инд̣̇анийло, марагад̇о, взл̣урияо, бад̣̇умарааг̇о, пуссарааг̇о, гаггзд̇ано, булааго, вимало, лохид̇ан̇го , палиго, баваал̣о, ж̇од̇ирасо, г̇омуд̇д̇аго, г̇омзд̣̇аго, сог̇анд̇хиго, муд̇д̇аа, сан̇ко, ан̃ж̇анамууло, рааж̇абаддо, амад̇ам̣саго, бияаго, б̣раахман̣ий жаад̇и жад̇уб̣б̣ийсад̇и ман̣и наама. сад̇д̇а лохаани гахаабан̣о жа сааро наама. саяанажчаад̣̇анабаавуран̣аг̇аж̇ад̣̇анд̇асилаад̣̇ийни пзг̇г̇у наама. жанд̣̇анааг̇аругун̇гумад̇аг̇арагаббуураад̣̇и г̇умб̣аа наама. д̇ад̇т̇а буримзна аад̣̇исад̣̇д̣̇зна сааливийхиаад̣̇имуг̇г̇амаасаад̣̇ибуб̣б̣ан̣н̣аабаран̣н̣абхзд̣̇ам̣ д̇хан̃н̃авигад̇им̣ аад̣̇им̣ гад̇ваа яам̣ сад̇д̇аанам̣ убабхог̇абарибхог̇абхууд̇ам̣ вад̇т̇у, д̇ам̣ саб̣б̣ам̣ сан̇г̇аяхад̇и. маханд̇ам̣ виж̇ид̇ам̣ радтам̣ зд̇ассаад̇и махаавиж̇ид̇о. маханд̇о хад̇т̇иассаад̣̇иваахано зд̇ассаад̇и махааваахано. маханд̇ам̣ сзнааб̣алан̃жзва т̇аамаб̣алан̃жа зд̇ассаад̇и махаб̣б̣ало. ижчид̇аниб̣б̣ад̇д̇исан̇каад̇аа бун̃н̃агамманибпаннаа махад̇ий ид̣̇д̇хи зд̇ассаад̇и махид̣̇д̇хиго. д̇зж̇асан̇каад̇о уссаахаманд̇абабхусад̇д̇исан̇каад̇о ваа маханд̇о аанубхааво зд̇ассаад̇и махаанубхааво.
Imesaṃ dvinnaṃ rājūnanti niddhāraṇe sāmivacanaṃ. Mahaddhanataro vātiādīsu pathaviyaṃ nikhaṇitvā ṭhapitaṃ sattaratananicayasaṅkhātaṃ mahantaṃ dhanaṃ etassāti mahaddhano, dvīsu ayaṃ atisayena mahaddhanoti mahaddhanataro. Vāsaddo vikappattho. Sesapadesupi eseva nayo. Ayaṃ pana viseso – niccaparibbayavasena mahanto bhogo etassāti mahābhogo. Devasikaṃ pavisanaāyabhūto mahanto koso etassāti mahākoso. Apare pana ‘‘devasikaṃ pavisanaāyabhūtaṃ maṇisārapheggugumbādibhedabhinnaṃ pariggahavatthu dhanaṃ, tadeva sāragabbhādīsu nihitaṃ koso’’ti vadanti. Vajiro, mahānīlo, indanīlo, marakato, veḷuriyo, padumarāgo, phussarāgo, kakketano, pulāko, vimalo, lohitaṅko , phaliko, pavāḷo, jotiraso, gomuttako, gomedako, sogandhiko, muttā, saṅkho, añjanamūlo, rājapaṭṭo, amataṃsako, piyako, brāhmaṇī cāti catubbīsati maṇi nāma. Satta lohāni kahāpaṇo ca sāro nāma. Sayanacchādanapāvuraṇagajadantasilādīni pheggu nāma. Candanāgarukuṅkumatagarakappūrādi gumbā nāma. Tattha purimena ādisaddena sālivīhiādimuggamāsādipubbaṇṇāparaṇṇabhedaṃ dhaññavikatiṃ ādiṃ katvā yaṃ sattānaṃ upabhogaparibhogabhūtaṃ vatthu, taṃ sabbaṃ saṅgayhati. Mahantaṃ vijitaṃ raṭṭhaṃ etassāti mahāvijito. Mahanto hatthiassādivāhano etassāti mahāvāhano. Mahantaṃ senābalañceva thāmabalañca etassāti mahabbalo. Icchitanibbattisaṅkhātā puññakammanipphannā mahatī iddhi etassāti mahiddhiko. Tejasaṅkhāto ussāhamantapabhusattisaṅkhāto vā mahanto ānubhāvo etassāti mahānubhāvo.
зд̇т̇а жа батамзна ааяасамбад̣̇аа, д̣̇уд̇иязна вид̇д̇уубагаран̣асамбад̣̇аа, д̇ад̇иязна вибхавасамбад̣̇аа, жад̇уд̇т̇зна ж̇анабад̣̇асамбад̣̇аа, бан̃жамзна яаанасамбад̣̇аа, чадтзна бариваарасамбад̣̇ааяа сад̣̇д̇хим̣ ад̇д̇асамбад̣̇аа, сад̇д̇амзна бун̃н̃агаммасамбад̣̇аа, адтамзна бабхаавасамбад̣̇аа д̇зсам̣ рааж̇уунам̣ багаасид̇аа ход̇и. д̇зна яаа саа саамисамбад̇д̇и, амажжасамбад̇д̇и, сзнаасамбад̇д̇и, радтасамбад̇д̇и, вибхавасамбад̇д̇и, мид̇д̇асамбад̇д̇и, д̣̇уг̇г̇асамбад̇д̇ийд̇и сад̇д̇а багад̇исамбад̣̇аа рааж̇уунам̣ ижчид̇аб̣б̣аа. д̇аа саб̣б̣аа яат̇аарахам̣ барид̣̇ийбид̇аад̇и взд̣̇ид̇аб̣б̣аа.
Ettha ca paṭhamena āyasampadā, dutiyena vittūpakaraṇasampadā, tatiyena vibhavasampadā, catutthena janapadasampadā, pañcamena yānasampadā, chaṭṭhena parivārasampadāya saddhiṃ attasampadā, sattamena puññakammasampadā, aṭṭhamena pabhāvasampadā tesaṃ rājūnaṃ pakāsitā hoti. Tena yā sā sāmisampatti, amaccasampatti, senāsampatti, raṭṭhasampatti, vibhavasampatti, mittasampatti, duggasampattīti satta pakatisampadā rājūnaṃ icchitabbā. Tā sabbā yathārahaṃ paridīpitāti veditabbā.
д̣̇аанаад̣̇ийхи жад̇уухи сан̇г̇ахавад̇т̇уухи барисам̣ ран̃ж̇зд̇ийд̇и рааж̇аа. маг̇ад̇хаанам̣ иссарод̇и мааг̇ад̇хо. махад̇ияаа сзнааяа саманнааг̇ад̇ад̇д̇аа сзнияаг̇од̇д̇ад̇д̇аа ваа сзнияо. б̣имб̣и вужжад̇и суван̣н̣ам̣, д̇асмаа саараб̣имб̣иван̣н̣ад̇ааяа б̣имб̣исааро. гзжи бана ‘‘наамамзвзд̇ам̣ д̇асса ран̃н̃о’’д̇и вад̣̇анд̇и. бажжаамид̇д̇ам̣ барасзнам̣ ж̇инаад̇ийд̇и басзнад̣̇и. госаларадтасса ад̇хибад̇ийд̇и госало. аяан̃жарахийд̇и зд̇т̇а жарахийд̇и нибаад̇амад̇д̇ам̣. виббагад̇аад̇и абарияосид̇аа. аяам̣ д̇зсам̣ бхигкуунам̣ анд̇араагат̇аа анидтид̇аад̇и ад̇т̇о.
Dānādīhi catūhi saṅgahavatthūhi parisaṃ rañjetīti rājā. Magadhānaṃ issaroti māgadho. Mahatiyā senāya samannāgatattā seniyagottattā vā seniyo. Bimbi vuccati suvaṇṇaṃ, tasmā sārabimbivaṇṇatāya bimbisāro. Keci pana ‘‘nāmamevetaṃ tassa rañño’’ti vadanti. Paccāmittaṃ parasenaṃ jinātīti pasenadi. Kosalaraṭṭhassa adhipatīti kosalo. Ayañcarahīti ettha carahīti nipātamattaṃ. Vippakatāti apariyositā. Ayaṃ tesaṃ bhikkhūnaṃ antarākathā aniṭṭhitāti attho.
сааяанхасамаяанд̇и сааяанхз згам̣ самаяам̣. бадисаллаанаа вудтид̇од̇и д̇ад̇о д̇ад̇о руубаад̣̇иаарамман̣ад̇о жид̇д̇асса бадисам̣харан̣ад̇о бадисаллаанасан̇каад̇ааяа паласамаабад̇д̇ид̇о яат̇аагаалабарижчзд̣̇ам̣ вудтид̇о. бхаг̇аваа хи буб̣б̣ан̣хасамаяам̣ бхигкусан̇гхабаривуд̇о саавад̇т̇им̣ бависид̇ваа бхигкуунам̣ сулабхабин̣д̣абаад̇ам̣ гад̇ваа гад̇абхад̇д̇агижжо бхигкуухи сад̣̇д̇хим̣ саавад̇т̇ид̇о нигкамид̇ваа вихаарам̣ бависид̇ваа г̇анд̇хагудиббамукз тад̇ваа вад̇д̇ам̣ д̣̇ассзд̇ваа тид̇аанам̣ бхигкуунам̣ яат̇аасамудтид̇ам̣ суг̇ад̇оваад̣̇ам̣ д̣̇ад̇ваа д̇зсу аран̃н̃аругкамуулаад̣̇ид̣̇иваадтаанам̣ уд̣̇д̣̇исса г̇ад̇зсу г̇анд̇хагудим̣ бависид̇ваа паласамаабад̇д̇исукзна д̣̇ивасабхааг̇ам̣ вийд̇инаамзд̇ваа яат̇аагаалабарижчзд̣̇з самаабад̇д̇ид̇о вудтааяа, ‘‘маяхам̣ убаг̇аманам̣ ааг̇амаяамаанаа жад̇ассо барисаа сагалавихаарам̣ барибуурзнд̇ияо нисиннаа, ид̣̇аани мз д̇хаммад̣̇зсанад̇т̇ам̣ д̇хаммасабхааман̣д̣алам̣ убаг̇анд̇ум̣ гаало’’д̇и аасанад̇о вудтааяа, гзсарасийхо вияа ган̃жанаг̇ухааяа сурабхиг̇анд̇хагудид̇о нигкамид̇ваа яуут̇ам̣ убасан̇гаманд̇о мад̇д̇аваравааран̣о вияа агааяажаабаллзна жаарувигганд̇аг̇амано асийд̇иануб̣яан̃ж̇анаббадиман̣д̣ид̇аб̣аад̇д̇им̣самахаабурисалагкан̣асамуж̇ж̇алааяа б̣яаамаббабхааяа баригкзбавилаасасамбаннааяа бабхассарагзд̇умаалаалан̇гад̇ааяа нийлабийд̇алохид̇од̣̇аад̇аман̃ж̇идтабабхассараанам̣ васзна чаб̣б̣ан̣н̣аб̣уд̣̇д̇харам̣сияо виссаж̇ж̇знд̇ияаа ажинд̇зяяаанубхаавааяа анубамааяа б̣уд̣̇д̇халийлааяа саманнааг̇ад̇ааяа руубагааяасамбад̇д̇ияаа сагалавихаарам̣ згаалогам̣ гурумаано убадтаанасаалам̣ убасан̇гами. д̇зна вуд̇д̇ам̣ – ‘‘ат̇а ко бхаг̇аваа…бз… д̇знубасан̇гамий’’д̇и.
Sāyanhasamayanti sāyanhe ekaṃ samayaṃ. Paṭisallānā vuṭṭhitoti tato tato rūpādiārammaṇato cittassa paṭisaṃharaṇato paṭisallānasaṅkhātāya phalasamāpattito yathākālaparicchedaṃ vuṭṭhito. Bhagavā hi pubbaṇhasamayaṃ bhikkhusaṅghaparivuto sāvatthiṃ pavisitvā bhikkhūnaṃ sulabhapiṇḍapātaṃ katvā katabhattakicco bhikkhūhi saddhiṃ sāvatthito nikkhamitvā vihāraṃ pavisitvā gandhakuṭippamukhe ṭhatvā vattaṃ dassetvā ṭhitānaṃ bhikkhūnaṃ yathāsamuṭṭhitaṃ sugatovādaṃ datvā tesu araññarukkhamūlādidivāṭṭhānaṃ uddissa gatesu gandhakuṭiṃ pavisitvā phalasamāpattisukhena divasabhāgaṃ vītināmetvā yathākālaparicchede samāpattito vuṭṭhāya, ‘‘mayhaṃ upagamanaṃ āgamayamānā catasso parisā sakalavihāraṃ paripūrentiyo nisinnā, idāni me dhammadesanatthaṃ dhammasabhāmaṇḍalaṃ upagantuṃ kālo’’ti āsanato vuṭṭhāya, kesarasīho viya kañcanaguhāya surabhigandhakuṭito nikkhamitvā yūthaṃ upasaṅkamanto mattavaravāraṇo viya akāyacāpallena cāruvikkantagamano asītianubyañjanappaṭimaṇḍitabāttiṃsamahāpurisalakkhaṇasamujjalāya byāmappabhāya parikkhepavilāsasampannāya pabhassaraketumālālaṅkatāya nīlapītalohitodātamañjiṭṭhapabhassarānaṃ vasena chabbaṇṇabuddharaṃsiyo vissajjentiyā acinteyyānubhāvāya anupamāya buddhalīlāya samannāgatāya rūpakāyasampattiyā sakalavihāraṃ ekālokaṃ kurumāno upaṭṭhānasālaṃ upasaṅkami. Tena vuttaṃ – ‘‘atha kho bhagavā…pe… tenupasaṅkamī’’ti.
звам̣ убасан̇гамид̇ваа вад̇д̇ам̣ д̣̇ассзд̇ваа нисиннз д̇з бхигкуу д̇ун̣хийбхууд̇з д̣̇исваа ‘‘маяи агат̇знд̇з имз бхигкуу б̣уд̣̇д̇хаг̇ааравзна габбамби на гат̇зссанд̇ий’’д̇и гат̇аасамудтаабанад̇т̇ам̣ ‘‘гааяа нуд̇т̇а, бхигкавз’’д̇иаад̣̇имааха. д̇ад̇т̇а гааяа нуд̇т̇аад̇и гад̇амааяа ну бхават̇а. ‘‘гааяа нод̇т̇аа’’д̇иби баал̣и, со звад̇т̇о, ‘‘гааяа нвзд̇т̇аа’’д̇иби батанд̇и, д̇асса гад̇амааяа ну зд̇т̇аад̇и ад̇т̇о. д̇ад̇рааяам̣ сан̇кзбад̇т̇о – бхигкавз, гад̇амааяа наама гат̇ааяа ид̇ха саннисиннаа бхават̇а, гад̇амаа жа д̇умхаагам̣ гат̇аа мамааг̇аманабажжаяаа анидтид̇аа, д̇ам̣ нидтаабзссаамийд̇и звам̣ саб̣б̣ан̃н̃убавааран̣ааяа баваарзси.
Evaṃ upasaṅkamitvā vattaṃ dassetvā nisinne te bhikkhū tuṇhībhūte disvā ‘‘mayi akathente ime bhikkhū buddhagāravena kappampi na kathessantī’’ti kathāsamuṭṭhāpanatthaṃ ‘‘kāya nuttha, bhikkhave’’tiādimāha. Tattha kāya nutthāti katamāya nu bhavatha. ‘‘Kāya notthā’’tipi pāḷi, so evattho, ‘‘kāya nvetthā’’tipi paṭhanti, tassa katamāya nu etthāti attho. Tatrāyaṃ saṅkhepattho – bhikkhave, katamāya nāma kathāya idha sannisinnā bhavatha, katamā ca tumhākaṃ kathā mamāgamanapaccayā aniṭṭhitā, taṃ niṭṭhāpessāmīti evaṃ sabbaññupavāraṇāya pavāresi.
на квзд̇анд̇и на ко зд̇ам̣, аяамзва ваа баато. ‘‘на код̇а’’нд̇иби батанд̇и, на ко зд̇ам̣ ижжзва бад̣̇авибхааг̇о. гулабуд̇д̇аананд̇и ж̇аад̇иаажаарагулабуд̇д̇аанам̣. сад̣̇д̇хаад̇и сад̣̇д̇хааяа, гаммапаласад̣̇д̇хааяа рад̇анад̇д̇аяасад̣̇д̇хааяа жа. аг̇аарасмаад̇и гхарад̇о, г̇ахадтабхааваад̇и ад̇т̇о. анаг̇аарияанд̇и баб̣б̣аж̇ж̇ам̣. баб̣б̣аж̇ид̇аананд̇и убаг̇ад̇аанам̣ . яанд̇и гирияаабараамасанам̣. д̇ад̇т̇ааяам̣ бад̣̇аяож̇анаа – ‘‘бхигкавз, д̇умхз нзва рааж̇аабхинийд̇аа на жораабхинийд̇аа на ин̣аддаа на ж̇ийвид̇абагад̇аа баб̣б̣аж̇ид̇аа, ат̇а ко сад̣̇д̇хааяа аг̇аарад̇о нигкамид̇ваа мама саасанз баб̣б̣аж̇ид̇аа, д̇умхз зд̇арахи зваруубим̣ рааж̇аббадисам̣яуд̇д̇ам̣ д̇иражчаанагат̇ам̣ гат̇зяяаат̇а, яам̣ зваруубааяа гат̇ааяа гат̇анам̣, зд̇ам̣ д̇умхаагам̣ на ко бад̇ируубам̣ на яуд̇д̇амзваа’’д̇и.
Na khvetanti na kho etaṃ, ayameva vā pāṭho. ‘‘Na khota’’ntipi paṭhanti, na kho etaṃ icceva padavibhāgo. Kulaputtānanti jātiācārakulaputtānaṃ. Saddhāti saddhāya, kammaphalasaddhāya ratanattayasaddhāya ca. Agārasmāti gharato, gahaṭṭhabhāvāti attho. Anagāriyanti pabbajjaṃ. Pabbajitānanti upagatānaṃ . Yanti kiriyāparāmasanaṃ. Tatthāyaṃ padayojanā – ‘‘bhikkhave, tumhe neva rājābhinītā na corābhinītā na iṇaṭṭā na jīvitapakatā pabbajitā, atha kho saddhāya agārato nikkhamitvā mama sāsane pabbajitā, tumhe etarahi evarūpiṃ rājappaṭisaṃyuttaṃ tiracchānakathaṃ katheyyātha, yaṃ evarūpāya kathāya kathanaṃ, etaṃ tumhākaṃ na kho patirūpaṃ na yuttamevā’’ti.
звам̣ саннибад̇ид̇аанам̣ баб̣б̣аж̇ид̇аанам̣ аббад̇ируубам̣ бадигкибид̇ваа ид̣̇аани нзсам̣ бад̇ируубам̣ бадибад̇д̇им̣ ануж̇аананд̇о ‘‘саннибад̇ид̇аанам̣ во, бхигкавз, д̣̇ваяам̣ гаран̣ийяам̣ д̇хаммий ваа гат̇аа арияо ваа д̇ун̣хийбхааво’’д̇и ааха. д̇ад̇т̇а вод̇и д̇умхаагам̣. гаран̣ийяанд̇и хи бад̣̇ам̣ абзгкид̇ваа гад̇д̇ари саамиважанамзд̇ам̣, д̇асмаа д̇умхзхийд̇и ад̇т̇о. д̣̇ваяам̣ гаран̣ийяанд̇и д̣̇вз гаад̇аб̣б̣аа. д̇хаммий гат̇аад̇и жад̇усажжад̇хаммад̇о анабзд̇аа гат̇аа, бавад̇д̇инивад̇д̇ибарид̣̇ийбиний д̇хаммад̣̇зсанаад̇и ад̇т̇о. д̣̇асагат̇аавад̇т̇усан̇каад̇ааби хи д̇хаммагат̇аа д̇ад̣̇згад̣̇зсаа зваад̇и. арияод̇и зганд̇ахид̇аавахад̇д̇аа арияо, висуд̣̇д̇хо уд̇д̇амод̇и ваа арияо. д̇ун̣хийбхаавод̇и самат̇авибассанаабхааванаабхууд̇ам̣ агат̇анам̣. гзжи бана ‘‘важийсан̇каарабадибагкабхаавад̇о д̣̇уд̇ияаж̇жхаанам̣ арияо д̇ун̣хийбхааво’’д̇и вад̣̇анд̇и. абарз ‘‘жад̇уд̇т̇аж̇жхаанам̣ арияо д̇ун̣хийбхааво’’д̇и вад̣̇анд̇и. аяам̣ банзд̇т̇а ад̇т̇о – ‘‘бхигкавз, жид̇д̇авивзгасса бариб̣рууханад̇т̇ам̣ вивзгадтагааяаа сун̃н̃ааг̇аарз вихаранд̇аа сажз гад̣̇аажи саннибад̇ат̇а, звам̣ саннибад̇ид̇зхи д̇умхзхи ‘ассуд̇ам̣ саавзд̇и суд̇ам̣ ваа барияод̣̇абзд̇ий’д̇и вуд̇д̇анаязна ан̃н̃аман̃н̃ассуубагаарааяа канд̇хаад̣̇ийнам̣ анижжад̇аад̣̇ибадисам̣яуд̇д̇аа д̇хаммагат̇аа ваа бавад̇д̇зд̇аб̣б̣аа, ан̃н̃аман̃н̃ам̣ аб̣яааб̣аад̇ханад̇т̇ам̣ жхаанасамаабад̇д̇ияаа ваа вихарид̇аб̣б̣а’’нд̇и.
Evaṃ sannipatitānaṃ pabbajitānaṃ appatirūpaṃ paṭikkhipitvā idāni nesaṃ patirūpaṃ paṭipattiṃ anujānanto ‘‘sannipatitānaṃ vo, bhikkhave, dvayaṃ karaṇīyaṃ dhammī vā kathā ariyo vā tuṇhībhāvo’’ti āha. Tattha voti tumhākaṃ. Karaṇīyanti hi padaṃ apekkhitvā kattari sāmivacanametaṃ, tasmā tumhehīti attho. Dvayaṃ karaṇīyanti dve kātabbā. Dhammī kathāti catusaccadhammato anapetā kathā, pavattinivattiparidīpinī dhammadesanāti attho. Dasakathāvatthusaṅkhātāpi hi dhammakathā tadekadesā evāti. Ariyoti ekantahitāvahattā ariyo, visuddho uttamoti vā ariyo. Tuṇhībhāvoti samathavipassanābhāvanābhūtaṃ akathanaṃ. Keci pana ‘‘vacīsaṅkhārapaṭipakkhabhāvato dutiyajjhānaṃ ariyo tuṇhībhāvo’’ti vadanti. Apare ‘‘catutthajjhānaṃ ariyo tuṇhībhāvo’’ti vadanti. Ayaṃ panettha attho – ‘‘bhikkhave, cittavivekassa paribrūhanatthaṃ vivekaṭṭhakāyā suññāgāre viharantā sace kadāci sannipatatha, evaṃ sannipatitehi tumhehi ‘assutaṃ sāveti sutaṃ vā pariyodapetī’ti vuttanayena aññamaññassūpakārāya khandhādīnaṃ aniccatādipaṭisaṃyuttā dhammakathā vā pavattetabbā, aññamaññaṃ abyābādhanatthaṃ jhānasamāpattiyā vā viharitabba’’nti.
д̇ад̇т̇а буримзна гаран̣ийяаважанзна анод̇ин̣н̣аанам̣ саасанз од̇аран̣уубааяам̣ д̣̇ассзд̇и, бажчимзна од̇ин̣н̣аанам̣ сам̣саарад̇о ниссаран̣уубааяам̣. буримзна ваа ааг̇амавзяяад̇д̇ияз нияож̇зд̇и, бажчимзна ад̇хиг̇амавзяяад̇д̇ияз. ат̇а ваа буримзна саммаад̣̇идтияаа батамам̣ уббад̇д̇ихзд̇ум̣ д̣̇ийбзд̇и, д̣̇уд̇иязна д̣̇уд̇ияам̣. вуд̇д̇ан̃хзд̇ам̣ –
Tattha purimena karaṇīyavacanena anotiṇṇānaṃ sāsane otaraṇūpāyaṃ dasseti, pacchimena otiṇṇānaṃ saṃsārato nissaraṇūpāyaṃ. Purimena vā āgamaveyyattiye niyojeti, pacchimena adhigamaveyyattiye. Atha vā purimena sammādiṭṭhiyā paṭhamaṃ uppattihetuṃ dīpeti, dutiyena dutiyaṃ. Vuttañhetaṃ –
‘‘д̣̇взмз, бхигкавз, хзд̇уу д̣̇вз бажжаяаа саммаад̣̇идтияаа уббаад̣̇ааяа барад̇о жа гхосо, бажжад̇д̇ан̃жа яонисо манасигааро’’д̇и (а. ни. 2.127).
‘‘Dveme, bhikkhave, hetū dve paccayā sammādiṭṭhiyā uppādāya parato ca ghoso, paccattañca yoniso manasikāro’’ti (a. ni. 2.127).
буримзна ваа логияасаммаад̣̇идтияаа муулагааран̣ам̣ вибхаавзд̇и, бажчимзна логуд̇д̇арасаммаад̣̇идтияаа муулагааран̣анд̇и звамаад̣̇инаа зд̇т̇а яож̇анаа взд̣̇ид̇аб̣б̣аа.
Purimena vā lokiyasammādiṭṭhiyā mūlakāraṇaṃ vibhāveti, pacchimena lokuttarasammādiṭṭhiyā mūlakāraṇanti evamādinā ettha yojanā veditabbā.
зд̇амад̇т̇ам̣ вид̣̇ид̇ваад̇и д̇зхи бхигкуухи гид̇д̇ид̇агаамасамбад̇д̇ид̇о жхаанаад̣̇исамбад̇д̇и санд̇ад̇араа жзва бан̣ийд̇ад̇араа жаад̇и зд̇амад̇т̇ам̣ саб̣б̣аагаарад̇о вид̣̇ид̇ваа. имам̣ уд̣̇аананд̇и имам̣ арияавихаарасукаанубхаавад̣̇ийбагам̣ уд̣̇аанам̣ уд̣̇аанзси.
Etamatthaṃ viditvāti tehi bhikkhūhi kittitakāmasampattito jhānādisampatti santatarā ceva paṇītatarā cāti etamatthaṃ sabbākārato viditvā. Imaṃ udānanti imaṃ ariyavihārasukhānubhāvadīpakaṃ udānaṃ udānesi.
д̇ад̇т̇а яан̃жа гаамасукам̣ логзд̇и логасад̣̇д̣̇о ‘‘канд̇халого ааяад̇аналого д̇хаад̇улого’’д̇иаад̣̇ийсу (махаани. 3, 7; жуул̣ани. аж̇ид̇амаан̣авабужчаанид̣̇д̣̇зса 2) сан̇каарзсу ааг̇ад̇о.
Tattha yañca kāmasukhaṃ loketi lokasaddo ‘‘khandhaloko āyatanaloko dhātuloko’’tiādīsu (mahāni. 3, 7; cūḷani. ajitamāṇavapucchāniddesa 2) saṅkhāresu āgato.
‘‘яаавад̇аа жанд̣̇имасуурияаа барихаранд̇и,
‘‘Yāvatā candimasūriyā pariharanti,
д̣̇исаа бханд̇и вирожанаа;
Disā bhanti virocanā;
д̇аава сахассад̇хаа лого,
Tāva sahassadhā loko,
зд̇т̇а д̇з вад̇д̇ад̇ий васо’’д̇и. –
Ettha te vattatī vaso’’ti. –
аад̣̇ийсу (ма. ни. 1.503) огаасз ааг̇ад̇о. ‘‘ад̣̇д̣̇асаа ко бхаг̇аваа б̣уд̣̇д̇хажагкунаа логам̣ вологзнд̇о’’д̇иаад̣̇ийсу (махаава. 9; ма. ни. 1.283) сад̇д̇зсу. ид̇ха бана сад̇д̇алогз огаасалогз жа взд̣̇ид̇аб̣б̣о. д̇асмаа авийжид̇о бадтааяа убари б̣рахмалогад̇о хздтаа зд̇асмим̣ логз яам̣ вад̇т̇угаамз бадижжа гилзсагаамавасзна уббаж̇ж̇анад̇о гаамасахаг̇ад̇ам̣ сукам̣. яан̃жид̣̇ам̣ д̣̇ивияам̣ суканд̇и яан̃жа ид̣̇ам̣ д̣̇иви бхавам̣ д̣̇иб̣б̣авихааравасзна жа лад̣̇д̇хаб̣б̣ам̣ б̣рахмаанам̣ мануссаанан̃жа руубасамаабад̇д̇исукам̣. д̇ан̣хагкаяасукассаад̇и яам̣ ааг̇амма д̇ан̣хаа кийяад̇и, д̇ам̣ ниб̣б̣аанам̣ аарамман̣ам̣ гад̇ваа д̇ан̣хааяа жа бадибассамбханавасзна бавад̇д̇апаласамаабад̇д̇исукам̣ д̇ан̣хагкаяасукам̣ наама, д̇асса д̇ан̣хагкаяасукасса. зд̇зд̇и лин̇г̇авибаллаасзна нид̣̇д̣̇зсо, зд̇аани сукаанийд̇и ад̇т̇о. гзжи убхаяамби сукасааман̃н̃зна г̇ахзд̇ваа ‘‘зд̇а’’нд̇и батанд̇и, д̇зсам̣ ‘‘галам̣ нааг̇гхад̇ий’’д̇и баатзна бхавид̇аб̣б̣ам̣.
Ādīsu (ma. ni. 1.503) okāse āgato. ‘‘Addasā kho bhagavā buddhacakkhunā lokaṃ volokento’’tiādīsu (mahāva. 9; ma. ni. 1.283) sattesu. Idha pana sattaloke okāsaloke ca veditabbo. Tasmā avīcito paṭṭhāya upari brahmalokato heṭṭhā etasmiṃ loke yaṃ vatthukāme paṭicca kilesakāmavasena uppajjanato kāmasahagataṃ sukhaṃ. Yañcidaṃ diviyaṃ sukhanti yañca idaṃ divi bhavaṃ dibbavihāravasena ca laddhabbaṃ brahmānaṃ manussānañca rūpasamāpattisukhaṃ. Taṇhakkhayasukhassāti yaṃ āgamma taṇhā khīyati, taṃ nibbānaṃ ārammaṇaṃ katvā taṇhāya ca paṭipassambhanavasena pavattaphalasamāpattisukhaṃ taṇhakkhayasukhaṃ nāma, tassa taṇhakkhayasukhassa. Eteti liṅgavipallāsena niddeso, etāni sukhānīti attho. Keci ubhayampi sukhasāmaññena gahetvā ‘‘eta’’nti paṭhanti, tesaṃ ‘‘kalaṃ nāgghatī’’ti pāṭhena bhavitabbaṃ.
сол̣асинд̇и сол̣асаннам̣ бууран̣им̣. аяан̃хзд̇т̇а сан̇кзбад̇т̇о – жаггавад̇д̇исукам̣ аад̣̇им̣ гад̇ваа саб̣б̣асмим̣ мануссалогз мануссасукам̣, нааг̇асубан̣н̣аад̣̇илогз нааг̇аад̣̇ийхи анубхавид̇аб̣б̣ам̣ сукам̣, жаад̇умахаарааж̇игаад̣̇ид̣̇звалогз чаб̣б̣ид̇хам̣ гаамасуканд̇и яам̣ згаад̣̇асавид̇хз гаамалогз уббаж̇ж̇анд̇ам̣ гаамасукам̣, яан̃жа ид̣̇ам̣ руубааруубад̣̇звзсу д̣̇иб̣б̣авихаарабхууд̇зсу руубааруубаж̇жхаанзсу жа уббаннад̇д̇аа ‘‘д̣̇ивияа’’нд̇и лад̣̇д̇ханаамам̣ логияаж̇жхаанасукам̣, сагаламби д̇ад̣̇убхаяам̣ д̇ан̣хагкаяасукасан̇каад̇ам̣ паласамаабад̇д̇исукам̣ сол̣аса бхааг̇з гад̇ваа д̇ад̇о згабхааг̇ам̣ сол̣асабхааг̇аг̇ун̣з лад̣̇д̇хам̣ згабхааг̇асан̇каад̇ам̣ галам̣ на аг̇гхад̇ийд̇и.
Soḷasinti soḷasannaṃ pūraṇiṃ. Ayañhettha saṅkhepattho – cakkavattisukhaṃ ādiṃ katvā sabbasmiṃ manussaloke manussasukhaṃ, nāgasupaṇṇādiloke nāgādīhi anubhavitabbaṃ sukhaṃ, cātumahārājikādidevaloke chabbidhaṃ kāmasukhanti yaṃ ekādasavidhe kāmaloke uppajjantaṃ kāmasukhaṃ, yañca idaṃ rūpārūpadevesu dibbavihārabhūtesu rūpārūpajjhānesu ca uppannattā ‘‘diviya’’nti laddhanāmaṃ lokiyajjhānasukhaṃ, sakalampi tadubhayaṃ taṇhakkhayasukhasaṅkhātaṃ phalasamāpattisukhaṃ soḷasa bhāge katvā tato ekabhāgaṃ soḷasabhāgaguṇe laddhaṃ ekabhāgasaṅkhātaṃ kalaṃ na agghatīti.
аяан̃жа ад̇т̇аван̣н̣анаа паласамаабад̇д̇исааман̃н̃зна вуд̇д̇аа. баал̣ияам̣ ависзсзна д̇ан̣хагкаяасса ааг̇ад̇ад̇д̇аа батамапаласамаабад̇д̇исукассааби галам̣ логияам̣ на аг̇гхад̇и зва. д̇ат̇аа хи вуд̇д̇ам̣ –
Ayañca atthavaṇṇanā phalasamāpattisāmaññena vuttā. Pāḷiyaṃ avisesena taṇhakkhayassa āgatattā paṭhamaphalasamāpattisukhassāpi kalaṃ lokiyaṃ na agghati eva. Tathā hi vuttaṃ –
‘‘бат̇аб̣яаа згараж̇ж̇зна, саг̇г̇асса г̇аманзна ваа;
‘‘Pathabyā ekarajjena, saggassa gamanena vā;
саб̣б̣алогаад̇хибажжзна, сод̇аабад̇д̇ипалам̣ вара’’нд̇и. (д̇ха. ба. 178);
Sabbalokādhipaccena, sotāpattiphalaṃ vara’’nti. (dha. pa. 178);
сод̇аабад̇д̇исам̣яуд̇д̇зби вуд̇д̇ам̣ –
Sotāpattisaṃyuttepi vuttaṃ –
‘‘гин̃жааби, бхигкавз, рааж̇аа жаггавад̇д̇ий жад̇уннам̣ д̣̇ийбаанам̣ иссарияаад̇хибажжам̣ раж̇ж̇ам̣ гаарзд̇ваа гааяасса бхзд̣̇аа барам̣ маран̣аа суг̇ад̇им̣ саг̇г̇ам̣ логам̣ убабаж̇ж̇ад̇и д̣̇зваанам̣ д̇аавад̇им̣саанам̣ сахаб̣яад̇ам̣, со д̇ад̇т̇а нанд̣̇анз ванз ажчараасан̇гхабаривуд̇о д̣̇иб̣б̣зхи жа бан̃жахи гаамаг̇ун̣зхи самаббид̇о саман̇г̇ийбхууд̇о барижаарзд̇и, со жад̇уухи д̇хаммзхи асаманнааг̇ад̇о. ат̇а ко со абаримуд̇д̇ова нираяаа, абаримуд̇д̇о д̇иражчаанаяонияаа, абаримуд̇д̇о бзд̇д̇ивисаяаа, абаримуд̇д̇о абааяад̣̇уг̇г̇ад̇ивинибаад̇аа. гин̃жааби, бхигкавз, арияасааваго бин̣д̣ияаалобзна яаабзд̇и, нанд̇агаани жа д̇хаарзд̇и, со жад̇уухи д̇хаммзхи саманнааг̇ад̇о, ат̇а ко со баримуд̇д̇о нираяаа, баримуд̇д̇о д̇иражчаанаяонияаа, баримуд̇д̇о бзд̇д̇ивисаяаа, баримуд̇д̇о абааяад̣̇уг̇г̇ад̇ивинибаад̇аа.
‘‘Kiñcāpi, bhikkhave, rājā cakkavattī catunnaṃ dīpānaṃ issariyādhipaccaṃ rajjaṃ kāretvā kāyassa bhedā paraṃ maraṇā sugatiṃ saggaṃ lokaṃ upapajjati devānaṃ tāvatiṃsānaṃ sahabyataṃ, so tattha nandane vane accharāsaṅghaparivuto dibbehi ca pañcahi kāmaguṇehi samappito samaṅgībhūto paricāreti, so catūhi dhammehi asamannāgato. Atha kho so aparimuttova nirayā, aparimutto tiracchānayoniyā, aparimutto pettivisayā, aparimutto apāyaduggativinipātā. Kiñcāpi, bhikkhave, ariyasāvako piṇḍiyālopena yāpeti, nantakāni ca dhāreti, so catūhi dhammehi samannāgato, atha kho so parimutto nirayā, parimutto tiracchānayoniyā, parimutto pettivisayā, parimutto apāyaduggativinipātā.
‘‘гад̇амзхи жад̇уухи? ид̇ха, бхигкавз, арияасааваго б̣уд̣̇д̇хз авзжжаббасаад̣̇зна саманнааг̇ад̇о ход̇и ‘ид̇иби со бхаг̇аваа арахам̣…бз... б̣уд̣̇д̇хо бхаг̇аваа’д̇и. д̇хаммз авзжжаббасаад̣̇зна…бз… вин̃н̃уухий’д̇и. сан̇гхз авзжжаббасаад̣̇зна…бз… бун̃н̃агкзд̇д̇ам̣ логассаа’д̇и. арияаганд̇зхи сийлзхи саманнааг̇ад̇о ход̇и акан̣д̣зхи…бз… самаад̇хисам̣вад̇д̇анигзхи. имзхи жад̇уухи д̇хаммзхи саманнааг̇ад̇о ход̇и. яо жа, бхигкавз, жад̇уннам̣ д̣̇ийбаанам̣ бадилаабхо, яо жад̇уннам̣ д̇хаммаанам̣ бадилаабхо, жад̇уннам̣ д̣̇ийбаанам̣ бадилаабхо жад̇уннам̣ д̇хаммаанам̣ бадилаабхасса галам̣ нааг̇гхад̇и сол̣аси’’нд̇и (сам̣. ни. 5.997).
‘‘Katamehi catūhi? Idha, bhikkhave, ariyasāvako buddhe aveccappasādena samannāgato hoti ‘itipi so bhagavā arahaṃ…pe... buddho bhagavā’ti. Dhamme aveccappasādena…pe… viññūhī’ti. Saṅghe aveccappasādena…pe… puññakkhettaṃ lokassā’ti. Ariyakantehi sīlehi samannāgato hoti akhaṇḍehi…pe… samādhisaṃvattanikehi. Imehi catūhi dhammehi samannāgato hoti. Yo ca, bhikkhave, catunnaṃ dīpānaṃ paṭilābho, yo catunnaṃ dhammānaṃ paṭilābho, catunnaṃ dīpānaṃ paṭilābho catunnaṃ dhammānaṃ paṭilābhassa kalaṃ nāgghati soḷasi’’nti (saṃ. ni. 5.997).
звам̣ бхаг̇аваа саб̣б̣ад̇т̇а логияасукам̣ сауд̇д̇арам̣ саад̇исаяам̣, логуд̇д̇арасукамзва ануд̇д̇аранд̇и ад̇исаяанд̇и бхааж̇зсийд̇и.
Evaṃ bhagavā sabbattha lokiyasukhaṃ sauttaraṃ sātisayaṃ, lokuttarasukhameva anuttaranti atisayanti bhājesīti.
д̣̇уд̇ияасуд̇д̇аван̣н̣анаа нидтид̇аа.
Dutiyasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 2. рааж̇асуд̇д̇ам̣ • 2. Rājasuttaṃ
