| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ராஜாயதனகதா²
Rājāyatanakathā
6. முசலிந்த³மூலாதி மஹாபோ³தி⁴தோ பாசீனகோணே டி²தமுசலிந்த³ருக்க²மூலா. ராஜாயதனந்தி த³க்கி²ணதி³ஸாபா⁴கே³ டி²தங் ராஜாயதனருக்க²ங் உபஸங்கமி . தேன கோ² பன ஸமயேனாதி கதரேன ஸமயேன. ப⁴க³வதோ கிர ராஜாயதனமூலே ஸத்தாஹங் ஏகபல்லங்கேன நிஸின்னஸ்ஸ ஸமாதி⁴தோ வுட்டா²னதி³வஸே அருணுக்³க³மனவேலாயமேவ ‘‘போ⁴ஜனகிச்சேன ப⁴விதப்³ப³’’ந்தி ஞத்வா ஸக்கோ தே³வராஜா ஓஸத⁴ஹரீதகங் உபனேஸி. ப⁴க³வா தங் பரிபு⁴ஞ்ஜி, பரிபு⁴த்தமத்தஸ்ஸேவ ஸரீரகிச்சங் அஹோஸி. ஸக்கோ முகோ²த³கங் அதா³ஸி. ப⁴க³வா முக²ங் தோ⁴வித்வா தஸ்மிங்யேவ ருக்க²மூலே நிஸீதி³. ஏவங் உக்³க³தே அருணம்ஹி நிஸின்னே ப⁴க³வதி.
6.Mucalindamūlāti mahābodhito pācīnakoṇe ṭhitamucalindarukkhamūlā. Rājāyatananti dakkhiṇadisābhāge ṭhitaṃ rājāyatanarukkhaṃ upasaṅkami . Tena kho pana samayenāti katarena samayena. Bhagavato kira rājāyatanamūle sattāhaṃ ekapallaṅkena nisinnassa samādhito vuṭṭhānadivase aruṇuggamanavelāyameva ‘‘bhojanakiccena bhavitabba’’nti ñatvā sakko devarājā osadhaharītakaṃ upanesi. Bhagavā taṃ paribhuñji, paribhuttamattasseva sarīrakiccaṃ ahosi. Sakko mukhodakaṃ adāsi. Bhagavā mukhaṃ dhovitvā tasmiṃyeva rukkhamūle nisīdi. Evaṃ uggate aruṇamhi nisinne bhagavati.
தேன கோ² பன ஸமயேன தபுஸ்ஸப⁴ல்லிகா வாணிஜாதி தபுஸ்ஸோ ச ப⁴ல்லிகோ சாதி த்³வே பா⁴தரோ வாணிஜா. உக்கலாதி உக்கலஜனபத³தோ. தங் தே³ஸந்தி யஸ்மிங் தே³ஸே ப⁴க³வா விஹரதி. கதரஸ்மிஞ்ச தே³ஸே ப⁴க³வா விஹரதி? மஜ்ஜி²மதே³ஸே. தஸ்மா மஜ்ஜி²மதே³ஸங் க³ந்துங் அத்³தா⁴னமக்³க³ப்படிபன்னா ஹொந்தீதி அயமெத்த² அத்தோ². ஞாதிஸாலோஹிதா தே³வதாதி தேஸங் ஞாதிபூ⁴தபுப்³பா³ தே³வதா. ஏதத³வோசாதி ஸா கிர நேஸங் ஸப்³ப³ஸகடானி அப்பவத்தீனி அகாஸி. ததோ தே கிங் இத³ந்தி மக்³க³தே³வதானங் ப³லிங் அகங்ஸு. தேஸங் ப³லிகம்மகாலே ஸா தே³வதா தி³ஸ்ஸமானேனேவ காயேன ஏதங் அவோச. மந்தே²ன ச மது⁴பிண்டி³காய சாதி அப³த்³த⁴ஸத்துனா ச ஸப்பிமது⁴பா²ணிதாதீ³ஹி யோஜெத்வா ப³த்³த⁴ஸத்துனா ச. பதிமானேதா²தி உபட்ட²ஹத². தங் வோதி தங் பதிமானநங் தும்ஹாகங் ப⁴விஸ்ஸதி தீ³க⁴ரத்தங் ஹிதாய ஸுகா²ய. யங் அம்ஹாகந்தி யங் படிக்³க³ஹணங் அம்ஹாகங் அஸ்ஸ தீ³க⁴ரத்தங் ஹிதாய ஸுகா²ய. ப⁴க³வதோ ஏதத³ஹோஸீதி யோ கிரஸ்ஸ பதா⁴னானுயோக³காலே பத்தோ அஹோஸி, ஸோ ஸுஜாதாய பாயாஸங் தா³துங் ஆக³ச்ச²ந்தியா ஏவ அந்தரதா⁴யி. தேனஸ்ஸ ஏதத³ஹோஸி – ‘‘பத்தோ மே நத்தி², புரிமகாபி ச ந கோ² ததா²க³தா ஹத்தே²ஸு படிக்³க³ண்ஹந்தி, கிம்ஹி நு கோ² அஹங் படிக்³க³ண்ஹெய்யங் மந்த²ஞ்ச மது⁴பிண்ட³கஞ்சா’’தி.
Tena kho pana samayena tapussabhallikā vāṇijāti tapusso ca bhalliko cāti dve bhātaro vāṇijā. Ukkalāti ukkalajanapadato. Taṃ desanti yasmiṃ dese bhagavā viharati. Katarasmiñca dese bhagavā viharati? Majjhimadese. Tasmā majjhimadesaṃ gantuṃ addhānamaggappaṭipannā hontīti ayamettha attho. Ñātisālohitā devatāti tesaṃ ñātibhūtapubbā devatā. Etadavocāti sā kira nesaṃ sabbasakaṭāni appavattīni akāsi. Tato te kiṃ idanti maggadevatānaṃ baliṃ akaṃsu. Tesaṃ balikammakāle sā devatā dissamāneneva kāyena etaṃ avoca. Manthena ca madhupiṇḍikāya cāti abaddhasattunā ca sappimadhuphāṇitādīhi yojetvā baddhasattunā ca. Patimānethāti upaṭṭhahatha. Taṃ voti taṃ patimānanaṃ tumhākaṃ bhavissati dīgharattaṃ hitāya sukhāya. Yaṃ amhākanti yaṃ paṭiggahaṇaṃ amhākaṃ assa dīgharattaṃ hitāya sukhāya. Bhagavato etadahosīti yo kirassa padhānānuyogakāle patto ahosi, so sujātāya pāyāsaṃ dātuṃ āgacchantiyā eva antaradhāyi. Tenassa etadahosi – ‘‘patto me natthi, purimakāpi ca na kho tathāgatā hatthesu paṭiggaṇhanti, kimhi nu kho ahaṃ paṭiggaṇheyyaṃ manthañca madhupiṇḍakañcā’’ti.
பரிவிதக்கமஞ்ஞாயாதி இதோ புப்³பே³வ ப⁴க³வதோ ஸுஜாதாய தி³ன்னபோ⁴ஜனங்யேவ ஓஜானுப்பப³ந்த⁴னவஸேன அட்டா²ஸி, எத்தகங் காலங் நேவ ஜிக⁴ச்சா² ந பிபாஸா ந காயது³ப்³ப³ல்யங் அஹோஸி. இதா³னி பனஸ்ஸ ஆஹாரங் படிக்³க³ஹேதுகாமதாய ‘‘ந கோ² ததா²க³தா’’திஆதி³னா நயேன பரிவிதக்கோ உத³பாதி³ . தங் ஏவங் உப்பன்னங் அத்தனோ சேதஸா ப⁴க³வதோ சேதோபரிவிதக்கமஞ்ஞாய. சதுத்³தி³ஸாதி சதூஹி தி³ஸாஹி. ஸேலமயே பத்தேதி முக்³க³வண்ணஸேலமயே பத்தே. இத³ங்யேவ ப⁴க³வா படிக்³க³ஹேஸி, தேயேவ ஸந்தா⁴ய வுத்தங். சத்தாரோ பன மஹாராஜானோ பட²மங் இந்த³னீலமணிமயே பத்தே உபனாமேஸுங், ந தே ப⁴க³வா அக்³க³ஹேஸி. ததோ இமே சத்தாரோபி முக்³க³வண்ணஸிலாமயே பத்தே உபனாமேஸுங், ப⁴க³வா சத்தாரோபி பத்தே அக்³க³ஹேஸி தேஸங் பஸாதா³னுரக்க²ணத்தா²ய, நோ மஹிச்ச²தாய. க³ஹெத்வா ச பன சத்தாரோபி யதா² ஏகோவ பத்தோ ஹோதி ததா² அதி⁴ட்ட²ஹி, சதுன்னம்பி ஏகஸதி³ஸோ புஞ்ஞவிபாகோ அஹோஸி. ஏவங் ஏகங் கத்வா அதி⁴ட்டி²தே படிக்³க³ஹேஸி ப⁴க³வா பச்சக்³கே⁴ ஸேலமயே பத்தே மந்த²ஞ்ச மது⁴பிண்டி³கஞ்ச. பச்சக்³கே⁴தி பச்சக்³க⁴ஸ்மிங்; பாடேக்கங் மஹக்³க⁴ஸ்மிந்தி அத்தோ². அத² வா பச்சக்³கே⁴தி அபி⁴னவே அப்³பு⁴ண்ஹே; தங்க²ணே நிப்³ப³த்தஸ்மிந்தி அத்தோ². த்³வே வாசா ஏதேஸங் அஹேஸுந்தி த்³வேவாசிகா. அத² வா த்³வீஹி வாசாஹி உபாஸகபா⁴வங் பத்தாதி அத்தோ² . தே ஏவங் உபாஸகபா⁴வங் படிவேதெ³த்வா ப⁴க³வந்தங் ஆஹங்ஸு – ‘‘கஸ்ஸ தா³னி ப⁴ந்தே அம்ஹேஹி அஜ்ஜ பட்டா²ய அபி⁴வாத³னபச்சுட்டா²னங் காதப்³ப³’’ந்தி? அத² ப⁴க³வா ஸீஸங் பராமஸி, கேஸா ஹத்தே² லக்³கி³ங்ஸு. தே தேஸங் அதா³ஸி ‘‘இமே தும்ஹே பரிஹரதா²’’தி. தே கேஸதா⁴துயோ லபி⁴த்வா அமதேனேவ அபி⁴ஸித்தா ஹட்ட²துட்டா² ப⁴க³வந்தங் வந்தி³த்வா பக்கமிங்ஸு.
Parivitakkamaññāyāti ito pubbeva bhagavato sujātāya dinnabhojanaṃyeva ojānuppabandhanavasena aṭṭhāsi, ettakaṃ kālaṃ neva jighacchā na pipāsā na kāyadubbalyaṃ ahosi. Idāni panassa āhāraṃ paṭiggahetukāmatāya ‘‘na kho tathāgatā’’tiādinā nayena parivitakko udapādi . Taṃ evaṃ uppannaṃ attano cetasā bhagavato cetoparivitakkamaññāya. Catuddisāti catūhi disāhi. Selamaye patteti muggavaṇṇaselamaye patte. Idaṃyeva bhagavā paṭiggahesi, teyeva sandhāya vuttaṃ. Cattāro pana mahārājāno paṭhamaṃ indanīlamaṇimaye patte upanāmesuṃ, na te bhagavā aggahesi. Tato ime cattāropi muggavaṇṇasilāmaye patte upanāmesuṃ, bhagavā cattāropi patte aggahesi tesaṃ pasādānurakkhaṇatthāya, no mahicchatāya. Gahetvā ca pana cattāropi yathā ekova patto hoti tathā adhiṭṭhahi, catunnampi ekasadiso puññavipāko ahosi. Evaṃ ekaṃ katvā adhiṭṭhite paṭiggahesi bhagavā paccagghe selamaye patte manthañca madhupiṇḍikañca. Paccaggheti paccagghasmiṃ; pāṭekkaṃ mahagghasminti attho. Atha vā paccaggheti abhinave abbhuṇhe; taṅkhaṇe nibbattasminti attho. Dve vācā etesaṃ ahesunti dvevācikā. Atha vā dvīhi vācāhi upāsakabhāvaṃ pattāti attho . Te evaṃ upāsakabhāvaṃ paṭivedetvā bhagavantaṃ āhaṃsu – ‘‘kassa dāni bhante amhehi ajja paṭṭhāya abhivādanapaccuṭṭhānaṃ kātabba’’nti? Atha bhagavā sīsaṃ parāmasi, kesā hatthe laggiṃsu. Te tesaṃ adāsi ‘‘ime tumhe pariharathā’’ti. Te kesadhātuyo labhitvā amateneva abhisittā haṭṭhatuṭṭhā bhagavantaṃ vanditvā pakkamiṃsu.
ராஜாயதனகதா² நிட்டி²தா.
Rājāyatanakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 4. ராஜாயதனகதா² • 4. Rājāyatanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ராஜாயதனகதா²வண்ணனா • Rājāyatanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ராஜாயதனகதா²வண்ணனா • Rājāyatanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ராஜாயதனகதா²வண்ணனா • Rājāyatanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. ராஜாயதனகதா² • 4. Rājāyatanakathā
