| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
4. ராஜாயதனகதா²
4. Rājāyatanakathā
6. பாசீனகோணேதி புரத்தி²மஅஸ்ஸே, புப்³ப³த³க்கி²ணதி³ஸாபா⁴கே³தி அத்தோ². ராஜாயதனருக்க²ந்தி கீ²ரிகாருக்க²ங். தேன கோ² பன ஸமயேனாதி எத்த² தஸத்³த³ஸ்ஸ விஸயங் புச்சி²த்வா த³ஸ்ஸெந்தோ ஆஹ ‘‘கதரேன ஸமயேனா’’தி. நிஸின்னஸ்ஸ ப⁴க³வதோதி யோஜனா. தே³வராஜஸத்³த³ஸ்ஸ அஞ்ஞே பஜாபதிஆத³யோ தே³வராஜானோ நிவத்தேதுங் ‘‘ஸக்கோ’’தி வுத்தங். தந்தி ஹரீதகங். பரிபு⁴த்தமத்தஸ்ஸேவ ப⁴க³வதோதி ஸம்ப³ந்தோ⁴. நிஸின்னே ப⁴க³வதி.
6.Pācīnakoṇeti puratthimaasse, pubbadakkhiṇadisābhāgeti attho. Rājāyatanarukkhanti khīrikārukkhaṃ. Tena kho pana samayenāti ettha tasaddassa visayaṃ pucchitvā dassento āha ‘‘katarena samayenā’’ti. Nisinnassa bhagavatoti yojanā. Devarājasaddassa aññe pajāpatiādayo devarājāno nivattetuṃ ‘‘sakko’’ti vuttaṃ. Tanti harītakaṃ. Paribhuttamattasseva bhagavatoti sambandho. Nisinne bhagavati.
‘‘தேன கோ² பன ஸமயேனா’’தி இமினா யேன ஸமயேன ப⁴க³வா ராஜாயதனமூலே நிஸீதி³, தேன கோ² பன ஸமயேனாதி அத்த²ங் த³ஸ்ஸேதி. உக்கலஜனபத³தோதி உக்கலனாமகா ஜனபத³ம்ஹா. யஸ்மிங் தே³ஸே ப⁴க³வா விஹரதி, தங் தே³ஸந்தி யோஜனா. எத்தா²தி ‘‘தங் தே³ஸங் அத்³தா⁴னமக்³க³ப்படிபன்னா’’திபதே³. தேஸந்தி வாணிஜானங். ஞாதிஸாலோஹிதஸத்³தா³னங் அஞ்ஞமஞ்ஞவேவசனத்தா ‘‘ஞாதீ’’தி வுத்தே ஸாலோஹிதஸத்³த³ஸ்ஸ அத்தோ² ஸித்³தோ⁴தி த³ஸ்ஸேதுங் வுத்தங் ‘‘ஞாதிபூ⁴தபுப்³பா³ தே³வதா’’தி. ஸாதி தே³வதா. நேஸந்தி வாணிஜானங். ததோதி அபவத்தனகாரணா. தேதி வாணிஜா . இத³ந்தி அபவத்தனங். ப³லிந்தி உபஹாரங். தேஸந்தி வாணிஜானங். ‘‘ஸப்³பி³மது⁴பா²ணிதாதீ³ஹி யோஜெத்வா’’தி பத³ங் புப்³பா³பராபெக்க²ங், தஸ்மா மஜ்ஜே² வுத்தங். பதிமானேதா²தி எத்த² மான பூஜாயங் பேமனேதி தா⁴துபாடே²ஸு (ஸத்³த³னீதிதா⁴துமாலாயங் 18 நகாரந்ததா⁴து) வுத்தத்தா பூஜனபேமனங் நாம அத்த²தோ உபட்ட²ஹனந்தி ஆஹ ‘‘உபட்ட²ஹதா²’’தி. தங் வோதி எத்த² தங்ஸத்³தோ³ பதிமானநவிஸயோ, வோஸத்³தோ³ தீஸு வோஸத்³தே³ஸு தும்ஹஸத்³த³ஸ்ஸ காரியோ வோஸத்³தோ³, ஸோ ச சதுத்த்²யத்தோ²தி ஆஹ ‘‘தங் பதிமானங் தும்ஹாக’’ந்தி. வோகாரோ ஹி திவிதோ⁴ தும்ஹஸத்³த³ஸ்ஸ காரியோ, யோவசனஸ்ஸ காரியோ, பத³பூரணோதி. தத்த² தும்ஹஸத்³த³ஸ்ஸ காரியோ பஞ்சவிதோ⁴ பச்சத்தஉபயோக³கரணஸம்பதா³னஸாமிவசனவஸேனாதி. தத்த² தும்ஹஸத்³த³காரியோ ஸம்பதா³னவசனோ இதா⁴தி⁴ப்பேதோ. தேனாஹ ‘‘தும்ஹாக’’ந்தி. ‘‘ய’’ந்திஸத்³த³ஸ்ஸ விஸயோ படிக்³க³ஹணத்தோ²தி ஆஹ ‘‘யங் படிக்³க³ஹண’’ந்தி. அஸ்ஸாதி ப⁴வெய்ய. யோ பத்தோ அஹோஸீதி யோஜனா. அஸ்ஸாதி ப⁴க³வதோ. ஸோதி பத்தோ. ஸுஜாதாய ஆக³ச்ச²ந்தியா ஏவாதி ஸம்ப³ந்தோ⁴. அனாத³ரே சேதங் ஸாமிவசனங். தேனாதி அந்தரதா⁴யஹேதுனா. அஸ்ஸாதி ப⁴க³வதோ. ஹத்தே²ஸூதி கரணத்தே² சேதங் பு⁴ம்மவசனங். ஹத்தே²ஹீதி ஹி அத்தோ². கிம்ஹீதி கேன.
‘‘Tena kho pana samayenā’’ti iminā yena samayena bhagavā rājāyatanamūle nisīdi, tena kho pana samayenāti atthaṃ dasseti. Ukkalajanapadatoti ukkalanāmakā janapadamhā. Yasmiṃ dese bhagavā viharati, taṃ desanti yojanā. Etthāti ‘‘taṃ desaṃ addhānamaggappaṭipannā’’tipade. Tesanti vāṇijānaṃ. Ñātisālohitasaddānaṃ aññamaññavevacanattā ‘‘ñātī’’ti vutte sālohitasaddassa attho siddhoti dassetuṃ vuttaṃ ‘‘ñātibhūtapubbā devatā’’ti. Sāti devatā. Nesanti vāṇijānaṃ. Tatoti apavattanakāraṇā. Teti vāṇijā . Idanti apavattanaṃ. Balinti upahāraṃ. Tesanti vāṇijānaṃ. ‘‘Sabbimadhuphāṇitādīhi yojetvā’’ti padaṃ pubbāparāpekkhaṃ, tasmā majjhe vuttaṃ. Patimānethāti ettha māna pūjāyaṃ pemaneti dhātupāṭhesu (saddanītidhātumālāyaṃ 18 nakārantadhātu) vuttattā pūjanapemanaṃ nāma atthato upaṭṭhahananti āha ‘‘upaṭṭhahathā’’ti. Taṃ voti ettha taṃsaddo patimānanavisayo, vosaddo tīsu vosaddesu tumhasaddassa kāriyo vosaddo, so ca catutthyatthoti āha ‘‘taṃ patimānaṃ tumhāka’’nti. Vokāro hi tividho tumhasaddassa kāriyo, yovacanassa kāriyo, padapūraṇoti. Tattha tumhasaddassa kāriyo pañcavidho paccattaupayogakaraṇasampadānasāmivacanavasenāti. Tattha tumhasaddakāriyo sampadānavacano idhādhippeto. Tenāha ‘‘tumhāka’’nti. ‘‘Ya’’ntisaddassa visayo paṭiggahaṇatthoti āha ‘‘yaṃ paṭiggahaṇa’’nti. Assāti bhaveyya. Yo patto ahosīti yojanā. Assāti bhagavato. Soti patto. Sujātāya āgacchantiyā evāti sambandho. Anādare cetaṃ sāmivacanaṃ. Tenāti antaradhāyahetunā. Assāti bhagavato. Hatthesūti karaṇatthe cetaṃ bhummavacanaṃ. Hatthehīti hi attho. Kimhīti kena.
இதோதி ஆஸள்ஹீமாஸஜுண்ஹபக்க²பஞ்சமிதோ. எத்தகங் காலந்தி ஏதங் பமாணங் ஏகூனபஞ்ஞாஸதி³வஸகாலங். ஜிக⁴ச்சா²தி க⁴ஸிதுமிச்சா². பிபாஸாதி பாதுமிச்சா². அஸ்ஸாதி ப⁴க³வதோ. சேதஸா-சேதோஸத்³தா³னங் ஸம்ப³ந்தா⁴பெக்க²த்தா தேஸங் ஸம்ப³ந்த⁴ங் த³ஸ்ஸேதுங் வுத்தங் ‘‘அத்தனோ’’தி ச ‘‘ப⁴க³வதோ’’தி ச. இமேஹி ஸம்ப³ந்தி⁴ஸத்³தா³னமஸதி³ஸத்தா ஸம்ப³ந்தோ⁴பி அஸதி³ஸோதி த³ஸ்ஸேதி. அத்தனோதி சதுன்னங் மஹாராஜானங். ஸமாஸோயேவ அவயவீபதா⁴னோ ஹோதி, வாக்யங் பன அவயவபதா⁴னோயேவாதி த³ஸ்ஸெந்தோ ஆஹ ‘‘சதூஹி தி³ஸாஹீ’’தி. பாளியங் ‘‘ஆக³ந்த்வா’’தி பாட²ஸேஸோ யோஜேதப்³போ³. ‘‘ஸிலாமயே’’தி இமினா ஸிலாமயமேவ ஸேலாமயந்தி அத்த²ங் த³ஸ்ஸேதி. இத³ந்தி ‘‘ஸேலாமயே பத்தே’’தி வசனங். யேதி முக்³க³வண்ணஸிலாமயே பத்தே. ததோதி இந்த³னீலமணிமயபத்தஉபனாமனதோ, பரந்தி ஸம்ப³ந்தோ⁴. தேஸந்தி சதுன்னங் மஹாராஜானங். சத்தாரோபி அதி⁴ட்ட²ஹீதி ஸம்ப³ந்தோ⁴ . யதா²தி யேனாகாரேன, அதி⁴ட்டி²யமானேதி யோஜனா. ஏகஸதி³ஸோதி ஏகங்ஸேன ஸதி³ஸோ. அதி⁴ட்டி²தே பத்தேதி ஸம்ப³ந்தோ⁴. பத்தேதி ச கரணத்தே² பு⁴ம்மவசனங். பத்தேன படிக்³க³ஹேஸீதி ஹி அத்தோ². பச்சக்³கே⁴தி எத்த² ஏகாரோ ஸ்மிங்வசனஸ்ஸ காரியோதி ஆஹ ‘‘பச்சக்³க⁴ஸ்மி’’ந்தி. படி அக்³க⁴ந்தி பத³விபா⁴க³ங் கத்வா படிஸத்³தோ³ பாடேக்கத்தோ², ‘‘அக்³க⁴’’ந்தி ஸாமஞ்ஞதோ வுத்தேபி மஹக்³க⁴த்தோ²தி த³ஸ்ஸெந்தோ ஆஹ ‘‘பாடேக்கங் மஹக்³க⁴ஸ்மி’’ந்தி. இமினா சத்தாரோ ஏகதோ ஹுத்வா ந மஹக்³கா⁴ ஹொந்தி, பாடேக்கங் பன மஹக்³கா⁴ ஹொந்தீதி த³ஸ்ஸேதி. அத² வா ஸஉபஸக்³கோ³ பச்சக்³க⁴ஸத்³தோ³ அபி⁴னவபரியாயோதி ஆஹ ‘‘அபி⁴னவே’’தி. அபி⁴னவோதி ச அசிரதனவத்து²ஸ்ஸ நாமங். அசிரதனவத்து² அசிரதனத்தா அப்³பு⁴ண்ஹங் விய ஹோதி, தஸ்மா வுத்தங் ‘‘அப்³பு⁴ண்ஹே’’தி. ‘‘தங்க²ணே நிப்³ப³த்தஸ்மி’’ந்தி இமினா தமேவத்த²ங் விபா⁴வேதி. த்³வேவாசிகாதிபத³ஸ்ஸ ஸமாஸவஸேன ச தத்³தி⁴தவஸேன ச நிப்ப²ன்னபா⁴வங் த³ஸ்ஸெந்தோ ஆஹ ‘‘த்³வே வாசா’’திஆதி³. பத்தாதி எத்த² ஏகோ இதிஸத்³தோ³ லுத்தனித்³தி³ட்டோ². இதி தஸ்மா த்³வேவாசிகாஇதி அத்தோ²தி யோஜனா. தேதி வாணிஜா. அதா²தி தஸ்மிங் காலே. தேதி கேஸே. தேஸந்தி வாணிஜானங். பரிஹரதா²தி அத்தனோ அபி⁴வாத³னபச்சுட்டா²னட்டா²னந்தி படிக்³க³ஹெத்வா, பரிச்சி²ந்தி³த்வா வா ஹரதா²தி அத்தோ². தேதி வாணிஜா. அமதேனேவாதி அமதேன இவ, அபி⁴ஸித்தா இவாதி யோஜனா.
Itoti āsaḷhīmāsajuṇhapakkhapañcamito. Ettakaṃ kālanti etaṃ pamāṇaṃ ekūnapaññāsadivasakālaṃ. Jighacchāti ghasitumicchā. Pipāsāti pātumicchā. Assāti bhagavato. Cetasā-cetosaddānaṃ sambandhāpekkhattā tesaṃ sambandhaṃ dassetuṃ vuttaṃ ‘‘attano’’ti ca ‘‘bhagavato’’ti ca. Imehi sambandhisaddānamasadisattā sambandhopi asadisoti dasseti. Attanoti catunnaṃ mahārājānaṃ. Samāsoyeva avayavīpadhāno hoti, vākyaṃ pana avayavapadhānoyevāti dassento āha ‘‘catūhi disāhī’’ti. Pāḷiyaṃ ‘‘āgantvā’’ti pāṭhaseso yojetabbo. ‘‘Silāmaye’’ti iminā silāmayameva selāmayanti atthaṃ dasseti. Idanti ‘‘selāmaye patte’’ti vacanaṃ. Yeti muggavaṇṇasilāmaye patte. Tatoti indanīlamaṇimayapattaupanāmanato, paranti sambandho. Tesanti catunnaṃ mahārājānaṃ. Cattāropi adhiṭṭhahīti sambandho . Yathāti yenākārena, adhiṭṭhiyamāneti yojanā. Ekasadisoti ekaṃsena sadiso. Adhiṭṭhite patteti sambandho. Patteti ca karaṇatthe bhummavacanaṃ. Pattena paṭiggahesīti hi attho. Paccaggheti ettha ekāro smiṃvacanassa kāriyoti āha ‘‘paccagghasmi’’nti. Paṭi agghanti padavibhāgaṃ katvā paṭisaddo pāṭekkattho, ‘‘aggha’’nti sāmaññato vuttepi mahagghatthoti dassento āha ‘‘pāṭekkaṃ mahagghasmi’’nti. Iminā cattāro ekato hutvā na mahagghā honti, pāṭekkaṃ pana mahagghā hontīti dasseti. Atha vā saupasaggo paccagghasaddo abhinavapariyāyoti āha ‘‘abhinave’’ti. Abhinavoti ca aciratanavatthussa nāmaṃ. Aciratanavatthu aciratanattā abbhuṇhaṃ viya hoti, tasmā vuttaṃ ‘‘abbhuṇhe’’ti. ‘‘Taṅkhaṇe nibbattasmi’’nti iminā tamevatthaṃ vibhāveti. Dvevācikātipadassa samāsavasena ca taddhitavasena ca nipphannabhāvaṃ dassento āha ‘‘dve vācā’’tiādi. Pattāti ettha eko itisaddo luttaniddiṭṭho. Iti tasmā dvevācikāiti atthoti yojanā. Teti vāṇijā. Athāti tasmiṃ kāle. Teti kese. Tesanti vāṇijānaṃ. Pariharathāti attano abhivādanapaccuṭṭhānaṭṭhānanti paṭiggahetvā, paricchinditvā vā harathāti attho. Teti vāṇijā. Amatenevāti amatena iva, abhisittā ivāti yojanā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 4. ராஜாயதனகதா² • 4. Rājāyatanakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ராஜாயதனகதா² • Rājāyatanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ராஜாயதனகதா²வண்ணனா • Rājāyatanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ராஜாயதனகதா²வண்ணனா • Rājāyatanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ராஜாயதனகதா²வண்ணனா • Rājāyatanakathāvaṇṇanā
