| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
রাজাযতনকথা
Rājāyatanakathā
৬. মুচলিন্দমূলাতি মহাবোধিতো পাচীনকোণে ঠিতমুচলিন্দরুক্খমূলা। রাজাযতনন্তি দক্খিণদিসাভাগে ঠিতং রাজাযতনরুক্খং উপসঙ্কমি । তেন খো পন সমযেনাতি কতরেন সমযেন। ভগৰতো কির রাজাযতনমূলে সত্তাহং একপল্লঙ্কেন নিসিন্নস্স সমাধিতো ৰুট্ঠানদিৰসে অরুণুগ্গমনৰেলাযমেৰ ‘‘ভোজনকিচ্চেন ভৰিতব্ব’’ন্তি ঞত্ৰা সক্কো দেৰরাজা ওসধহরীতকং উপনেসি। ভগৰা তং পরিভুঞ্জি, পরিভুত্তমত্তস্সেৰ সরীরকিচ্চং অহোসি। সক্কো মুখোদকং অদাসি। ভগৰা মুখং ধোৰিত্ৰা তস্মিংযেৰ রুক্খমূলে নিসীদি। এৰং উগ্গতে অরুণম্হি নিসিন্নে ভগৰতি।
6.Mucalindamūlāti mahābodhito pācīnakoṇe ṭhitamucalindarukkhamūlā. Rājāyatananti dakkhiṇadisābhāge ṭhitaṃ rājāyatanarukkhaṃ upasaṅkami . Tena kho pana samayenāti katarena samayena. Bhagavato kira rājāyatanamūle sattāhaṃ ekapallaṅkena nisinnassa samādhito vuṭṭhānadivase aruṇuggamanavelāyameva ‘‘bhojanakiccena bhavitabba’’nti ñatvā sakko devarājā osadhaharītakaṃ upanesi. Bhagavā taṃ paribhuñji, paribhuttamattasseva sarīrakiccaṃ ahosi. Sakko mukhodakaṃ adāsi. Bhagavā mukhaṃ dhovitvā tasmiṃyeva rukkhamūle nisīdi. Evaṃ uggate aruṇamhi nisinne bhagavati.
তেন খো পন সমযেন তপুস্সভল্লিকা ৰাণিজাতি তপুস্সো চ ভল্লিকো চাতি দ্ৰে ভাতরো ৰাণিজা। উক্কলাতি উক্কলজনপদতো। তং দেসন্তি যস্মিং দেসে ভগৰা ৰিহরতি। কতরস্মিঞ্চ দেসে ভগৰা ৰিহরতি? মজ্ঝিমদেসে। তস্মা মজ্ঝিমদেসং গন্তুং অদ্ধানমগ্গপ্পটিপন্না হোন্তীতি অযমেত্থ অত্থো। ঞাতিসালোহিতা দেৰতাতি তেসং ঞাতিভূতপুব্বা দেৰতা। এতদৰোচাতি সা কির নেসং সব্বসকটানি অপ্পৰত্তীনি অকাসি। ততো তে কিং ইদন্তি মগ্গদেৰতানং বলিং অকংসু। তেসং বলিকম্মকালে সা দেৰতা দিস্সমানেনেৰ কাযেন এতং অৰোচ। মন্থেন চ মধুপিণ্ডিকায চাতি অবদ্ধসত্তুনা চ সপ্পিমধুফাণিতাদীহি যোজেত্ৰা বদ্ধসত্তুনা চ। পতিমানেথাতি উপট্ঠহথ। তং ৰোতি তং পতিমাননং তুম্হাকং ভৰিস্সতি দীঘরত্তং হিতায সুখায। যং অম্হাকন্তি যং পটিগ্গহণং অম্হাকং অস্স দীঘরত্তং হিতায সুখায। ভগৰতো এতদহোসীতি যো কিরস্স পধানানুযোগকালে পত্তো অহোসি, সো সুজাতায পাযাসং দাতুং আগচ্ছন্তিযা এৰ অন্তরধাযি। তেনস্স এতদহোসি – ‘‘পত্তো মে নত্থি, পুরিমকাপি চ ন খো তথাগতা হত্থেসু পটিগ্গণ্হন্তি, কিম্হি নু খো অহং পটিগ্গণ্হেয্যং মন্থঞ্চ মধুপিণ্ডকঞ্চা’’তি।
Tena kho pana samayena tapussabhallikā vāṇijāti tapusso ca bhalliko cāti dve bhātaro vāṇijā. Ukkalāti ukkalajanapadato. Taṃ desanti yasmiṃ dese bhagavā viharati. Katarasmiñca dese bhagavā viharati? Majjhimadese. Tasmā majjhimadesaṃ gantuṃ addhānamaggappaṭipannā hontīti ayamettha attho. Ñātisālohitā devatāti tesaṃ ñātibhūtapubbā devatā. Etadavocāti sā kira nesaṃ sabbasakaṭāni appavattīni akāsi. Tato te kiṃ idanti maggadevatānaṃ baliṃ akaṃsu. Tesaṃ balikammakāle sā devatā dissamāneneva kāyena etaṃ avoca. Manthena ca madhupiṇḍikāya cāti abaddhasattunā ca sappimadhuphāṇitādīhi yojetvā baddhasattunā ca. Patimānethāti upaṭṭhahatha. Taṃ voti taṃ patimānanaṃ tumhākaṃ bhavissati dīgharattaṃ hitāya sukhāya. Yaṃ amhākanti yaṃ paṭiggahaṇaṃ amhākaṃ assa dīgharattaṃ hitāya sukhāya. Bhagavato etadahosīti yo kirassa padhānānuyogakāle patto ahosi, so sujātāya pāyāsaṃ dātuṃ āgacchantiyā eva antaradhāyi. Tenassa etadahosi – ‘‘patto me natthi, purimakāpi ca na kho tathāgatā hatthesu paṭiggaṇhanti, kimhi nu kho ahaṃ paṭiggaṇheyyaṃ manthañca madhupiṇḍakañcā’’ti.
পরিৰিতক্কমঞ্ঞাযাতি ইতো পুব্বেৰ ভগৰতো সুজাতায দিন্নভোজনংযেৰ ওজানুপ্পবন্ধনৰসেন অট্ঠাসি, এত্তকং কালং নেৰ জিঘচ্ছা ন পিপাসা ন কাযদুব্বল্যং অহোসি। ইদানি পনস্স আহারং পটিগ্গহেতুকামতায ‘‘ন খো তথাগতা’’তিআদিনা নযেন পরিৰিতক্কো উদপাদি । তং এৰং উপ্পন্নং অত্তনো চেতসা ভগৰতো চেতোপরিৰিতক্কমঞ্ঞায। চতুদ্দিসাতি চতূহি দিসাহি। সেলমযে পত্তেতি মুগ্গৰণ্ণসেলমযে পত্তে। ইদংযেৰ ভগৰা পটিগ্গহেসি, তেযেৰ সন্ধায ৰুত্তং। চত্তারো পন মহারাজানো পঠমং ইন্দনীলমণিমযে পত্তে উপনামেসুং, ন তে ভগৰা অগ্গহেসি। ততো ইমে চত্তারোপি মুগ্গৰণ্ণসিলামযে পত্তে উপনামেসুং, ভগৰা চত্তারোপি পত্তে অগ্গহেসি তেসং পসাদানুরক্খণত্থায, নো মহিচ্ছতায। গহেত্ৰা চ পন চত্তারোপি যথা একোৰ পত্তো হোতি তথা অধিট্ঠহি, চতুন্নম্পি একসদিসো পুঞ্ঞৰিপাকো অহোসি। এৰং একং কত্ৰা অধিট্ঠিতে পটিগ্গহেসি ভগৰা পচ্চগ্ঘে সেলমযে পত্তে মন্থঞ্চ মধুপিণ্ডিকঞ্চ। পচ্চগ্ঘেতি পচ্চগ্ঘস্মিং; পাটেক্কং মহগ্ঘস্মিন্তি অত্থো। অথ ৰা পচ্চগ্ঘেতি অভিনৰে অব্ভুণ্হে; তঙ্খণে নিব্বত্তস্মিন্তি অত্থো। দ্ৰে ৰাচা এতেসং অহেসুন্তি দ্ৰেৰাচিকা। অথ ৰা দ্ৰীহি ৰাচাহি উপাসকভাৰং পত্তাতি অত্থো । তে এৰং উপাসকভাৰং পটিৰেদেত্ৰা ভগৰন্তং আহংসু – ‘‘কস্স দানি ভন্তে অম্হেহি অজ্জ পট্ঠায অভিৰাদনপচ্চুট্ঠানং কাতব্ব’’ন্তি? অথ ভগৰা সীসং পরামসি, কেসা হত্থে লগ্গিংসু। তে তেসং অদাসি ‘‘ইমে তুম্হে পরিহরথা’’তি। তে কেসধাতুযো লভিত্ৰা অমতেনেৰ অভিসিত্তা হট্ঠতুট্ঠা ভগৰন্তং ৰন্দিত্ৰা পক্কমিংসু।
Parivitakkamaññāyāti ito pubbeva bhagavato sujātāya dinnabhojanaṃyeva ojānuppabandhanavasena aṭṭhāsi, ettakaṃ kālaṃ neva jighacchā na pipāsā na kāyadubbalyaṃ ahosi. Idāni panassa āhāraṃ paṭiggahetukāmatāya ‘‘na kho tathāgatā’’tiādinā nayena parivitakko udapādi . Taṃ evaṃ uppannaṃ attano cetasā bhagavato cetoparivitakkamaññāya. Catuddisāti catūhi disāhi. Selamaye patteti muggavaṇṇaselamaye patte. Idaṃyeva bhagavā paṭiggahesi, teyeva sandhāya vuttaṃ. Cattāro pana mahārājāno paṭhamaṃ indanīlamaṇimaye patte upanāmesuṃ, na te bhagavā aggahesi. Tato ime cattāropi muggavaṇṇasilāmaye patte upanāmesuṃ, bhagavā cattāropi patte aggahesi tesaṃ pasādānurakkhaṇatthāya, no mahicchatāya. Gahetvā ca pana cattāropi yathā ekova patto hoti tathā adhiṭṭhahi, catunnampi ekasadiso puññavipāko ahosi. Evaṃ ekaṃ katvā adhiṭṭhite paṭiggahesi bhagavā paccagghe selamaye patte manthañca madhupiṇḍikañca. Paccaggheti paccagghasmiṃ; pāṭekkaṃ mahagghasminti attho. Atha vā paccaggheti abhinave abbhuṇhe; taṅkhaṇe nibbattasminti attho. Dve vācā etesaṃ ahesunti dvevācikā. Atha vā dvīhi vācāhi upāsakabhāvaṃ pattāti attho . Te evaṃ upāsakabhāvaṃ paṭivedetvā bhagavantaṃ āhaṃsu – ‘‘kassa dāni bhante amhehi ajja paṭṭhāya abhivādanapaccuṭṭhānaṃ kātabba’’nti? Atha bhagavā sīsaṃ parāmasi, kesā hatthe laggiṃsu. Te tesaṃ adāsi ‘‘ime tumhe pariharathā’’ti. Te kesadhātuyo labhitvā amateneva abhisittā haṭṭhatuṭṭhā bhagavantaṃ vanditvā pakkamiṃsu.
রাজাযতনকথা নিট্ঠিতা।
Rājāyatanakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৪. রাজাযতনকথা • 4. Rājāyatanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / রাজাযতনকথাৰণ্ণনা • Rājāyatanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / রাজাযতনকথাৰণ্ণনা • Rājāyatanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / রাজাযতনকথাৰণ্ণনা • Rājāyatanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪. রাজাযতনকথা • 4. Rājāyatanakathā
