| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. রজ্জসুত্তং
10. Rajjasuttaṃ
১৫৬. একং সমযং ভগৰা কোসলেসু ৰিহরতি হিমৰন্তপদেসে 1 অরঞ্ঞকুটিকাযং। অথ খো ভগৰতো রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘সক্কা নু খো রজ্জং কারেতুং অহনং অঘাতযং অজিনং অজাপযং অসোচং অসোচাপযং ধম্মেনা’’তি?
156. Ekaṃ samayaṃ bhagavā kosalesu viharati himavantapadese 2 araññakuṭikāyaṃ. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘sakkā nu kho rajjaṃ kāretuṃ ahanaṃ aghātayaṃ ajinaṃ ajāpayaṃ asocaṃ asocāpayaṃ dhammenā’’ti?
অথ খো মারো পাপিমা ভগৰতো চেতসা চেতোপরিৰিতক্কমঞ্ঞায যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘কারেতু, ভন্তে, ভগৰা রজ্জং, কারেতু, সুগতো, রজ্জং অহনং অঘাতযং অজিনং অজাপযং অসোচং অসোচাপযং ধম্মেনা’’তি। ‘‘কিং পন মে ত্ৰং, পাপিম, পস্সসি যং মং ত্ৰং এৰং ৰদেসি – ‘কারেতু, ভন্তে, ভগৰা রজ্জং, কারেতু সুগতো , রজ্জং অহনং অঘাতযং অজিনং অজাপযং অসোচং অসোচাপযং ধম্মেনা’’’তি? ‘‘ভগৰতা খো, ভন্তে, চত্তারো ইদ্ধিপাদা ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা। আকঙ্খমানো চ, ভন্তে, ভগৰা হিমৰন্তং পব্বতরাজং সুৰণ্ণং ত্ৰেৰ অধিমুচ্চেয্য সুৰণ্ণঞ্চ পনস্সা’’তি 3।
Atha kho māro pāpimā bhagavato cetasā cetoparivitakkamaññāya yena bhagavā tenupasaṅkami; upasaṅkamitvā bhagavantaṃ etadavoca – ‘‘kāretu, bhante, bhagavā rajjaṃ, kāretu, sugato, rajjaṃ ahanaṃ aghātayaṃ ajinaṃ ajāpayaṃ asocaṃ asocāpayaṃ dhammenā’’ti. ‘‘Kiṃ pana me tvaṃ, pāpima, passasi yaṃ maṃ tvaṃ evaṃ vadesi – ‘kāretu, bhante, bhagavā rajjaṃ, kāretu sugato , rajjaṃ ahanaṃ aghātayaṃ ajinaṃ ajāpayaṃ asocaṃ asocāpayaṃ dhammenā’’’ti? ‘‘Bhagavatā kho, bhante, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā. Ākaṅkhamāno ca, bhante, bhagavā himavantaṃ pabbatarājaṃ suvaṇṇaṃ tveva adhimucceyya suvaṇṇañca panassā’’ti 4.
‘‘পব্বতস্স সুৰণ্ণস্স, জাতরূপস্স কেৰলো।
‘‘Pabbatassa suvaṇṇassa, jātarūpassa kevalo;
দ্ৰিত্তাৰ নালমেকস্স, ইতি ৰিদ্ৰা সমঞ্চরে॥
Dvittāva nālamekassa, iti vidvā samañcare.
‘‘যো দুক্খমদ্দক্খি যতোনিদানং,
‘‘Yo dukkhamaddakkhi yatonidānaṃ,
কামেসু সো জন্তু কথং নমেয্য।
Kāmesu so jantu kathaṃ nameyya;
উপধিং ৰিদিত্ৰা সঙ্গোতি লোকে,
Upadhiṃ viditvā saṅgoti loke,
তস্সেৰ জন্তু ৰিনযায সিক্খে’’তি॥
Tasseva jantu vinayāya sikkhe’’ti.
অথ খো মারো পাপিমা ‘‘জানাতি মং ভগৰা, জানাতি মং সুগতো’’তি দুক্খী দুম্মনো তত্থেৰন্তরধাযীতি।
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
দুতিযো ৰগ্গো।
Dutiyo vaggo.
তস্সুদ্দানং –
Tassuddānaṃ –
পত্তং আযতনং পিণ্ডং, কস্সকং রজ্জেন তে দসাতি॥
Pattaṃ āyatanaṃ piṇḍaṃ, kassakaṃ rajjena te dasāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. রজ্জসুত্তৰণ্ণনা • 10. Rajjasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. রজ্জসুত্তৰণ্ণনা • 10. Rajjasuttavaṇṇanā
