| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. ரஜ்ஜஸுத்தவண்ணனா
10. Rajjasuttavaṇṇanā
156. த³ஸமே அஹனங் அகா⁴தயந்தி அஹனந்தேன அகா⁴தயந்தேன. அஜினங் அஜாபயந்தி பரஸ்ஸ த⁴னஜானிங் அகரொந்தேன அகாராபெந்தேன. அஸோசங் அஸோசாபயந்தி அஸோசந்தேன அஸோசாபயந்தேன. இதி ப⁴க³வா அத⁴ம்மிகராஜூனங் ரஜ்ஜே விஜிதே த³ண்ட³கரபீளிதே மனுஸ்ஸே தி³ஸ்வா காருஞ்ஞவஸேன ஏவங் சிந்தேஸி. உபஸங்கமீதி ‘‘ஸமணோ கோ³தமோ ‘ஸக்கா நு கோ² ரஜ்ஜங் காரேது’ந்தி சிந்தேஸி, ரஜ்ஜங் காரேதுகாமோ ப⁴விஸ்ஸதி, ரஜ்ஜஞ்ச நாமேதங் பமாத³ட்டா²னங், ரஜ்ஜங் காரெந்தே ஸக்கா ஓதாரங் லபி⁴துங், க³ச்சா²மி உஸ்ஸாஹமஸ்ஸ ஜனெஸ்ஸாமீ’’தி சிந்தெத்வா உபஸங்கமி. இத்³தி⁴பாதா³தி இஜ்ஜ²னககொட்டா²ஸா . பா⁴விதாதி வட்³டி⁴தா. ப³ஹுலீகதாதி புனப்புனங் கதா. யானீகதாதி யுத்தயானங் விய கதா. வத்து²கதாதி பதிட்ட²ட்டே²னவத்து²கதா. அனுட்டி²தாதி அவிஜஹிதா நிச்சானுப³த்³தா⁴. பரிசிதாதி ஸாதச்சகிரியாய ஸுபரிசிதா கதா இஸ்ஸாஸஸ்ஸ அவிராதி⁴தவேதி⁴ஹத்தோ² விய. ஸுஸமாரத்³தா⁴தி ஸுட்டு² ஸமாரத்³தா⁴ பரிபுண்ணபா⁴வனா. அதி⁴முச்செய்யாதி சிந்தெய்ய.
156. Dasame ahanaṃ aghātayanti ahanantena aghātayantena. Ajinaṃ ajāpayanti parassa dhanajāniṃ akarontena akārāpentena. Asocaṃ asocāpayanti asocantena asocāpayantena. Iti bhagavā adhammikarājūnaṃ rajje vijite daṇḍakarapīḷite manusse disvā kāruññavasena evaṃ cintesi. Upasaṅkamīti ‘‘samaṇo gotamo ‘sakkā nu kho rajjaṃ kāretu’nti cintesi, rajjaṃ kāretukāmo bhavissati, rajjañca nāmetaṃ pamādaṭṭhānaṃ, rajjaṃ kārente sakkā otāraṃ labhituṃ, gacchāmi ussāhamassa janessāmī’’ti cintetvā upasaṅkami. Iddhipādāti ijjhanakakoṭṭhāsā . Bhāvitāti vaḍḍhitā. Bahulīkatāti punappunaṃ katā. Yānīkatāti yuttayānaṃ viya katā. Vatthukatāti patiṭṭhaṭṭhenavatthukatā. Anuṭṭhitāti avijahitā niccānubaddhā. Paricitāti sātaccakiriyāya suparicitā katā issāsassa avirādhitavedhihattho viya. Susamāraddhāti suṭṭhu samāraddhā paripuṇṇabhāvanā. Adhimucceyyāti cinteyya.
பப்³ப³தஸ்ஸாதி பப்³ப³தோ ப⁴வெய்ய. த்³வித்தாவாதி திட்ட²து ஏகோ பப்³ப³தோ, த்³விக்க²த்தும்பி தாவ மஹந்தோ ஸுவண்ணபப்³ப³தோ ஏகஸ்ஸ நாலங், ந பரியத்தோதி அத்தோ². இதி வித்³வா ஸமஞ்சரேதி ஏவங் ஜானந்தோ ஸமங் சரெய்ய. யதோனிதா³னந்தி து³க்க²ங் நாம பஞ்சகாமகு³ணனிதா³னங், தங் யதோனிதா³னங் ஹோதி, ஏவங் யோ அத³க்கி². கத²ங் நமெய்யாதி ஸோ ஜந்து தேஸு து³க்க²ஸ்ஸ நிதா³னபூ⁴தேஸு காமேஸு கேன காரணேன நமெய்ய. உபதி⁴ங் விதி³த்வாதி காமகு³ணஉபதி⁴ங் ‘‘ஸங்கோ³ ஏஸோ, லக்³க³னமேத’’ந்தி ஏவங் விதி³த்வா. தஸ்ஸேவ ஜந்து வினயாய ஸிக்கே²தி தஸ்ஸேவ உபதி⁴ஸ்ஸ வினயாய ஸிக்கெ²ய்ய. த³ஸமங்.
Pabbatassāti pabbato bhaveyya. Dvittāvāti tiṭṭhatu eko pabbato, dvikkhattumpi tāva mahanto suvaṇṇapabbato ekassa nālaṃ, na pariyattoti attho. Iti vidvā samañcareti evaṃ jānanto samaṃ careyya. Yatonidānanti dukkhaṃ nāma pañcakāmaguṇanidānaṃ, taṃ yatonidānaṃ hoti, evaṃ yo adakkhi. Kathaṃ nameyyāti so jantu tesu dukkhassa nidānabhūtesu kāmesu kena kāraṇena nameyya. Upadhiṃ viditvāti kāmaguṇaupadhiṃ ‘‘saṅgo eso, lagganameta’’nti evaṃ viditvā. Tasseva jantu vinayāya sikkheti tasseva upadhissa vinayāya sikkheyya. Dasamaṃ.
து³தியோ வக்³கோ³.
Dutiyo vaggo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ரஜ்ஜஸுத்தங் • 10. Rajjasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ரஜ்ஜஸுத்தவண்ணனா • 10. Rajjasuttavaṇṇanā
