| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
12. раж̇ж̇умаалаавимаанаван̣н̣анаа
12. Rajjumālāvimānavaṇṇanā
абхигганд̇зна ван̣н̣знаад̇и раж̇ж̇умаалаавимаанам̣. д̇асса гаа уббад̇д̇и? бхаг̇аваа саавад̇т̇ияам̣ вихарад̇и ж̇зд̇аванз. д̇зна самаязна г̇аяааг̇аамагз ан̃н̃ад̇арасса б̣раахман̣асса д̇хийд̇аа д̇асмим̣язва г̇аамз згасса б̣раахман̣агумаарасса д̣̇иннаа бад̇игулам̣ г̇ад̇аа, д̇асмим̣ г̇зхз иссарияам̣ вад̇д̇знд̇ий д̇идтад̇и. саа д̇асмим̣ г̇зхз д̣̇аасияаа д̇хийд̇арам̣ д̣̇исваа на сахад̇и. д̣̇идтагаалад̇о бадтааяа год̇хзна д̇адад̇адааяамаанаа аггосад̇и барибхаасад̇и, кадаган̃жассаа д̣̇зд̇и. яад̣̇аа бана саа ваяаббад̇д̇ияаа гижжасамад̇т̇аа ж̇аад̇аа, д̇ад̣̇аа нам̣ ж̇ан̣н̣угаббарамудтийхи бахарад̇зва яат̇аа д̇ам̣ буримаж̇аад̇ийсу б̣ад̣̇д̇хаагхаад̇аа.
Abhikkantenavaṇṇenāti rajjumālāvimānaṃ. Tassa kā uppatti? Bhagavā sāvatthiyaṃ viharati jetavane. Tena samayena gayāgāmake aññatarassa brāhmaṇassa dhītā tasmiṃyeva gāme ekassa brāhmaṇakumārassa dinnā patikulaṃ gatā, tasmiṃ gehe issariyaṃ vattentī tiṭṭhati. Sā tasmiṃ gehe dāsiyā dhītaraṃ disvā na sahati. Diṭṭhakālato paṭṭhāya kodhena taṭataṭāyamānā akkosati paribhāsati, khaṭakañcassā deti. Yadā pana sā vayappattiyā kiccasamatthā jātā, tadā naṃ jaṇṇukapparamuṭṭhīhi paharateva yathā taṃ purimajātīsu baddhāghātā.
саа гира д̣̇аасий гассабад̣̇асаб̣аласса гаалз д̇ассаа сааминий ахоси, ид̇араа д̣̇аасий. саа д̇ам̣ лзд̣д̣уд̣̇ан̣д̣аад̣̇ийхи мудтиаад̣̇ийхи жа абхин̣хам̣ абхиханад̇и. саа д̇зна ниб̣б̣иннаа яат̇ааб̣алам̣ д̣̇аанаад̣̇ийни бун̃н̃аани гад̇ваа ‘‘анааг̇ад̇з ахам̣ сааминий худ̇ваа имиссаа убари иссарияам̣ вад̇д̇зяяа’’нд̇и бад̇т̇анам̣ табзси. ат̇а саа д̣̇аасий д̇ад̇о жуд̇аа абараабарам̣ сам̣саранд̇ий имасмим̣ б̣уд̣̇д̇хуббаад̣̇з вуд̇д̇анаязна г̇аяааг̇аамагз б̣раахман̣агулз ниб̣б̣ад̇д̇ид̇ваа бад̇игулам̣ г̇ад̇аа, ид̇арааби д̇ассаа д̣̇аасий ахоси. звам̣ б̣ад̣̇д̇хаагхаад̇ад̇ааяа саа д̇ам̣ вихзтзд̇и.
Sā kira dāsī kassapadasabalassa kāle tassā sāminī ahosi, itarā dāsī. Sā taṃ leḍḍudaṇḍādīhi muṭṭhiādīhi ca abhiṇhaṃ abhihanati. Sā tena nibbinnā yathābalaṃ dānādīni puññāni katvā ‘‘anāgate ahaṃ sāminī hutvā imissā upari issariyaṃ vatteyya’’nti patthanaṃ ṭhapesi. Atha sā dāsī tato cutā aparāparaṃ saṃsarantī imasmiṃ buddhuppāde vuttanayena gayāgāmake brāhmaṇakule nibbattitvā patikulaṃ gatā, itarāpi tassā dāsī ahosi. Evaṃ baddhāghātatāya sā taṃ viheṭheti.
звам̣ вихзтзнд̇ий агааран̣знзва гзсзсу г̇ахзд̇ваа хад̇т̇зхи жа баад̣̇зхи жа сухад̇ам̣ хани. саа нхаабид̇асаалам̣ г̇анд̇ваа курамун̣д̣ам̣ гаарзд̇ваа аг̇амааси. сааминий ‘‘гим̣ ж̇з д̣̇удтад̣̇ааси мун̣д̣анамад̇д̇зна д̇ава виббамогко’’д̇и раж̇ж̇ум̣ сийсз б̣анд̇хид̇ваа д̇ад̇т̇а нам̣ г̇ахзд̇ваа он̣амзд̇ваа гхаад̇зд̇и, д̇ассаа д̇ан̃жа раж̇ж̇ум̣ абанзд̇ум̣ на д̣̇зд̇и. д̇ад̇о бадтааяа д̣̇аасияаа ‘‘раж̇ж̇умаалаа’’д̇и наамам̣ ахоси.
Evaṃ viheṭhentī akāraṇeneva kesesu gahetvā hatthehi ca pādehi ca suhataṃ hani. Sā nhāpitasālaṃ gantvā khuramuṇḍaṃ kāretvā agamāsi. Sāminī ‘‘kiṃ je duṭṭhadāsi muṇḍanamattena tava vippamokkho’’ti rajjuṃ sīse bandhitvā tattha naṃ gahetvā oṇametvā ghāteti, tassā tañca rajjuṃ apanetuṃ na deti. Tato paṭṭhāya dāsiyā ‘‘rajjumālā’’ti nāmaṃ ahosi.
ат̇згад̣̇ивасам̣ сад̇т̇аа бажжуусасамаяз махаагарун̣аасамаабад̇д̇ид̇о вудтааяа логам̣ вологзнд̇о раж̇ж̇умаалааяа сод̇аабад̇д̇ипалуубаниссаяам̣, д̇ассаа жа б̣раахман̣ияаа саран̣зсу сийлзсу жа бад̇идтаанам̣ д̣̇исваа аран̃н̃ам̣ бависид̇ваа ан̃н̃ад̇арасмим̣ ругкамуулз нисийд̣̇и чаб̣б̣ан̣н̣аа б̣уд̣̇д̇харасмияо виссаж̇ж̇знд̇о. раж̇ж̇умаалааби ко д̣̇ивасз д̣̇ивасз д̇ааяа д̇ат̇аа вихзтияамаанаа ‘‘гим̣ мз иминаа д̣̇уж̇ж̇ийвид̇знаа’’д̇и ниб̣б̣иннаруубаа ж̇ийвид̇з марид̇угаамаа гхадам̣ г̇ахзд̇ваа уд̣̇агад̇ид̇т̇ам̣ г̇ажчанд̇ий вияа г̇зхад̇о нигканд̇аа ануггамзна ванам̣ бависид̇ваа бхаг̇авад̇о нисиннаругкасса авид̣̇уурз ан̃н̃ад̇арасса ругкасса саакааяа раж̇ж̇ум̣ б̣анд̇хид̇ваа баасам̣ гад̇ваа уб̣б̣анд̇хид̇угаамаа ид̇о жид̇о жа ологзнд̇ий ад̣̇д̣̇аса бхаг̇аванд̇ам̣ д̇ад̇т̇а нисиннам̣ баасаад̣̇игам̣ басаад̣̇анийяам̣ уд̇д̇амад̣̇амат̇асамат̇амануббад̇д̇ам̣ чаб̣б̣ан̣н̣аб̣уд̣̇д̇харасмияо виссаж̇ж̇знд̇ам̣. д̣̇исваа б̣уд̣̇д̇хаг̇ааравзна аагад̣дхияамаанахад̣̇аяаа ‘‘гим̣ ну ко бхаг̇аваа маад̣̇исаанамби д̇хаммам̣ д̣̇зсзд̇и, яамахам̣ суд̇ваа ид̇о д̣̇уж̇ж̇ийвид̇ад̇о мужжзяяа’’нд̇и жинд̇зси.
Athekadivasaṃ satthā paccūsasamaye mahākaruṇāsamāpattito vuṭṭhāya lokaṃ volokento rajjumālāya sotāpattiphalūpanissayaṃ, tassā ca brāhmaṇiyā saraṇesu sīlesu ca patiṭṭhānaṃ disvā araññaṃ pavisitvā aññatarasmiṃ rukkhamūle nisīdi chabbaṇṇā buddharasmiyo vissajjento. Rajjumālāpi kho divase divase tāya tathā viheṭhiyamānā ‘‘kiṃ me iminā dujjīvitenā’’ti nibbinnarūpā jīvite maritukāmā ghaṭaṃ gahetvā udakatitthaṃ gacchantī viya gehato nikkhantā anukkamena vanaṃ pavisitvā bhagavato nisinnarukkhassa avidūre aññatarassa rukkhassa sākhāya rajjuṃ bandhitvā pāsaṃ katvā ubbandhitukāmā ito cito ca olokentī addasa bhagavantaṃ tattha nisinnaṃ pāsādikaṃ pasādanīyaṃ uttamadamathasamathamanuppattaṃ chabbaṇṇabuddharasmiyo vissajjentaṃ. Disvā buddhagāravena ākaḍḍhiyamānahadayā ‘‘kiṃ nu kho bhagavā mādisānampi dhammaṃ deseti, yamahaṃ sutvā ito dujjīvitato mucceyya’’nti cintesi.
ат̇а бхаг̇аваа д̇ассаа жид̇д̇аажаарам̣ ологзд̇ваа ‘‘раж̇ж̇умаалз’’д̇и ааха. саа д̇ам̣ суд̇ваа амад̇зна вияа абхисид̇д̇аа бийд̇ияаа ниранд̇арам̣ пудтаа бхаг̇аванд̇ам̣ убасан̇гамид̇ваа ванд̣̇ид̇ваа згаманд̇ам̣ адтааси. д̇ассаа бхаг̇аваа анубуб̣б̣игат̇аанубуб̣б̣агам̣ жад̇усажжагат̇ам̣ гат̇зси, саа сод̇аабад̇д̇ипалз бад̇идтахи. сад̇т̇аа ‘‘ваддад̇и зд̇д̇аго раж̇ж̇умаалааяа ануг̇г̇ахо, ид̣̇аанзсаа гзнажи аббад̇хам̣сияаа ж̇аад̇аа’’д̇и аран̃н̃ад̇о нигкамид̇ваа г̇аамасса авид̣̇уурз ан̃н̃ад̇арасмим̣ ругкамуулз нисийд̣̇и. раж̇ж̇умаалааби ад̇д̇аанам̣ винибаад̇зд̇ум̣ абхаб̣б̣ад̇ааяа канд̇имзд̇д̇аануд̣̇д̣̇аяасамбаннад̇ааяа жа ‘‘б̣раахман̣ий мам̣ ханад̇у ваа вихзтзд̇у ваа яам̣ ваа д̇ам̣ ваа гарод̇уу’’д̇и гхадзна уд̣̇агам̣ г̇ахзд̇ваа г̇зхам̣ аг̇амааси. саамиго г̇зхад̣̇ваарз тид̇о д̇ам̣ д̣̇исваа ‘‘д̇вам̣ аж̇ж̇а уд̣̇агад̇ид̇т̇ам̣ г̇ад̇аа жирааяид̇ваа ааг̇ад̇аа, мукаван̣н̣о жа д̇з ад̇ивияа виббасанно, д̇ван̃жа ан̃н̃зна аагаарзна убадтааси, гим̣ зд̇а’’нд̇и бужчи. саа д̇асса д̇ам̣ бавад̇д̇им̣ аажигки.
Atha bhagavā tassā cittācāraṃ oloketvā ‘‘rajjumāle’’ti āha. Sā taṃ sutvā amatena viya abhisittā pītiyā nirantaraṃ phuṭṭhā bhagavantaṃ upasaṅkamitvā vanditvā ekamantaṃ aṭṭhāsi. Tassā bhagavā anupubbikathānupubbakaṃ catusaccakathaṃ kathesi, sā sotāpattiphale patiṭṭhahi. Satthā ‘‘vaṭṭati ettako rajjumālāya anuggaho, idānesā kenaci appadhaṃsiyā jātā’’ti araññato nikkhamitvā gāmassa avidūre aññatarasmiṃ rukkhamūle nisīdi. Rajjumālāpi attānaṃ vinipātetuṃ abhabbatāya khantimettānuddayasampannatāya ca ‘‘brāhmaṇī maṃ hanatu vā viheṭhetu vā yaṃ vā taṃ vā karotū’’ti ghaṭena udakaṃ gahetvā gehaṃ agamāsi. Sāmiko gehadvāre ṭhito taṃ disvā ‘‘tvaṃ ajja udakatitthaṃ gatā cirāyitvā āgatā, mukhavaṇṇo ca te ativiya vippasanno, tvañca aññena ākārena upaṭṭhāsi, kiṃ eta’’nti pucchi. Sā tassa taṃ pavattiṃ ācikkhi.
б̣раахман̣о д̇ассаа важанам̣ суд̇ваа д̇уссид̇ваа г̇зхам̣ г̇анд̇ваа раж̇ж̇умаалааяа убари ‘‘д̇аяаа на гин̃жи гаад̇аб̣б̣а’’нд̇и сун̣исааяа вад̇ваа д̇удтамаанасо сийгхад̇арам̣ сад̇т̇у санд̇игам̣ г̇анд̇ваа ванд̣̇ид̇ваа саад̣̇арзна гад̇абадисант̇ааро сад̇т̇аарам̣ ниманд̇зд̇ваа ад̇д̇ано г̇зхам̣ аанзд̇ваа бан̣ийд̇зна каад̣̇анийязна бхож̇анийязна баривисид̇ваа бхаг̇аванд̇ам̣ бхуд̇д̇аавим̣ онийд̇абад̇д̇абаан̣им̣ убасан̇гамид̇ваа згаманд̇ам̣ нисийд̣̇и, сун̣исаабисса убасан̇гамид̇ваа ванд̣̇ид̇ваа згаманд̇ам̣ нисийд̣̇и. г̇аяааг̇аамаваасиноби б̣раахман̣аг̇ахабад̇игаа д̇ам̣ бавад̇д̇им̣ суд̇ваа бхаг̇аванд̇ам̣ убасан̇гамид̇ваа аббзгажжз абхиваад̣̇зд̇ваа згаманд̇ам̣ нисийд̣̇им̣су, аббзгажжз саммод̣̇анийяам̣ гад̇ваа згаманд̇ам̣ нисийд̣̇им̣су.
Brāhmaṇo tassā vacanaṃ sutvā tussitvā gehaṃ gantvā rajjumālāya upari ‘‘tayā na kiñci kātabba’’nti suṇisāya vatvā tuṭṭhamānaso sīghataraṃ satthu santikaṃ gantvā vanditvā sādarena katapaṭisanthāro satthāraṃ nimantetvā attano gehaṃ ānetvā paṇītena khādanīyena bhojanīyena parivisitvā bhagavantaṃ bhuttāviṃ onītapattapāṇiṃ upasaṅkamitvā ekamantaṃ nisīdi, suṇisāpissa upasaṅkamitvā vanditvā ekamantaṃ nisīdi. Gayāgāmavāsinopi brāhmaṇagahapatikā taṃ pavattiṃ sutvā bhagavantaṃ upasaṅkamitvā appekacce abhivādetvā ekamantaṃ nisīdiṃsu, appekacce sammodanīyaṃ katvā ekamantaṃ nisīdiṃsu.
сад̇т̇аа раж̇ж̇умаалааяа д̇ассаа жа б̣раахман̣ияаа буримаж̇аад̇ийсу гад̇агаммам̣ вид̇т̇аарад̇о гат̇зд̇ваа самбад̇д̇абарисааяа ануруубам̣ д̇хаммам̣ д̣̇зсзси . д̇ам̣ суд̇ваа б̣раахман̣ий жа махааж̇ано жа д̇ад̇т̇а саннибад̇ид̇о саран̣зсу жа сийлзсу жа бад̇идтахи. сад̇т̇аа аасанаа удтахид̇ваа саавад̇т̇имзва аг̇амааси. б̣раахман̣о раж̇ж̇умаалам̣ д̇хийд̇удтаанз табзси. д̇асса сун̣исаа раж̇ж̇умаалам̣ бияажагкуухи ологзнд̇ий яааваж̇ийвам̣ манаабзнзва синзхзна барихари. раж̇ж̇умаалаа абарабхааг̇з гаалам̣ гад̇ваа д̇аавад̇им̣сзсу ниб̣б̣ад̇д̇и, ажчараасахассан̃жассаа баривааро ахоси. саа садтисагадабхаараббамаан̣зхи д̣̇иб̣б̣аабхаран̣зхи бадиман̣д̣ид̇ад̇д̇абхааваа ажчараасахассабаривуд̇д̇аа нанд̣̇анаванаад̣̇ийсу махад̇им̣ д̣̇иб̣б̣асамбад̇д̇им̣ анубхавамаанаа бамуд̣̇ид̇аманаа вижарад̇и. ат̇ааяасмаа махаамог̇г̇аллаано д̣̇зважааригам̣ г̇ад̇о д̇ам̣ маханд̇зна д̣̇иб̣б̣аанубхаавзна махад̇ияаа д̣̇звид̣̇д̇хияаа виж̇ж̇од̇амаанам̣ д̣̇исваа д̇ааяа гад̇агаммам̣ имаахи г̇аат̇аахи бужчи.
Satthā rajjumālāya tassā ca brāhmaṇiyā purimajātīsu katakammaṃ vitthārato kathetvā sampattaparisāya anurūpaṃ dhammaṃ desesi . Taṃ sutvā brāhmaṇī ca mahājano ca tattha sannipatito saraṇesu ca sīlesu ca patiṭṭhahi. Satthā āsanā uṭṭhahitvā sāvatthimeva agamāsi. Brāhmaṇo rajjumālaṃ dhītuṭṭhāne ṭhapesi. Tassa suṇisā rajjumālaṃ piyacakkhūhi olokentī yāvajīvaṃ manāpeneva sinehena parihari. Rajjumālā aparabhāge kālaṃ katvā tāvatiṃsesu nibbatti, accharāsahassañcassā parivāro ahosi. Sā saṭṭhisakaṭabhārappamāṇehi dibbābharaṇehi paṭimaṇḍitattabhāvā accharāsahassaparivuttā nandanavanādīsu mahatiṃ dibbasampattiṃ anubhavamānā pamuditamanā vicarati. Athāyasmā mahāmoggallāno devacārikaṃ gato taṃ mahantena dibbānubhāvena mahatiyā deviddhiyā vijjotamānaṃ disvā tāya katakammaṃ imāhi gāthāhi pucchi.
826.
826.
‘‘абхигганд̇зна ван̣н̣зна, яаа д̇вам̣ д̇идтаси д̣̇звад̇з;
‘‘Abhikkantena vaṇṇena, yā tvaṃ tiṭṭhasi devate;
хад̇т̇з баад̣̇з жа виг̇г̇аяха, нажжаси суббаваад̣̇ид̇з.
Hatthe pāde ca viggayha, naccasi suppavādite.
827.
827.
‘‘д̇ассаа д̇з нажжамаанааяа, ан̇г̇аман̇г̇зхи саб̣б̣асо;
‘‘Tassā te naccamānāya, aṅgamaṅgehi sabbaso;
д̣̇иб̣б̣аа сад̣̇д̣̇аа нижчаранд̇и, саванийяаа манорамаа.
Dibbā saddā niccharanti, savanīyā manoramā.
828.
828.
‘‘д̇ассаа д̇з нажжамаанааяа, ан̇г̇аман̇г̇зхи саб̣б̣асо;
‘‘Tassā te naccamānāya, aṅgamaṅgehi sabbaso;
д̣̇иб̣б̣аа г̇анд̇хаа бавааяанд̇и, сужиг̇анд̇хаа манорамаа.
Dibbā gandhā pavāyanti, sucigandhā manoramā.
829.
829.
‘‘вивад̇д̇амаанаа гааязна, яаа взн̣ийсу бил̣анд̇ханаа;
‘‘Vivattamānā kāyena, yā veṇīsu piḷandhanā;
д̇зсам̣ суяяад̇и ниг̇гхосо, д̇уурияз бан̃жан̇г̇игз яат̇аа.
Tesaṃ suyyati nigghoso, tūriye pañcaṅgike yathā.
830.
830.
‘‘вадам̣сагаа ваад̇ад̇худ̇аа, ваад̇зна самбагамбид̇аа;
‘‘Vaṭaṃsakā vātadhutā, vātena sampakampitā;
д̇зсам̣ суяяад̇и ниг̇гхосо, д̇уурияз бан̃жан̇г̇игз яат̇аа.
Tesaṃ suyyati nigghoso, tūriye pañcaṅgike yathā.
831.
831.
‘‘яааби д̇з сирасмим̣ маалаа, сужиг̇анд̇хаа манорамаа;
‘‘Yāpi te sirasmiṃ mālā, sucigandhā manoramā;
ваад̇и г̇анд̇хо д̣̇исаа саб̣б̣аа, ругко ман̃ж̇уусаго яат̇аа.
Vāti gandho disā sabbā, rukkho mañjūsako yathā.
832.
832.
‘‘гхааяасз д̇ам̣ сужиг̇анд̇хам̣, руубам̣ бассаси амаанусам̣;
‘‘Ghāyase taṃ sucigandhaṃ, rūpaṃ passasi amānusaṃ;
д̣̇звад̇з бужчид̇аажигка, гисса гаммассид̣̇ам̣ пала’’нд̇и.
Devate pucchitācikkha, kissa kammassidaṃ phala’’nti.
826. д̇ад̇т̇а хад̇т̇з баад̣̇з жа виг̇г̇аяхаад̇и хад̇т̇з жа баад̣̇з жа вивид̇хзхи аагаарзхи г̇ахзд̇ваа, бубпамудтибубпан̃ж̇алиаад̣̇ибхзд̣̇асса саакаабхинаяасса д̣̇ассанавасзна вивид̇хзхи аагаарзхи хад̇т̇з, жа, самабаад̣̇аад̣̇ийнамби таанависзсаанам̣ д̣̇ассанавасзна вивид̇хзхи аагаарзхи баад̣̇з жа убаад̣̇ияид̇ваад̇и ад̇т̇о. жа-сад̣̇д̣̇зна саакаабхинаяам̣ сан̇г̇ан̣хаад̇и. нажжасийд̇и надаси. яаа д̇ванд̇и яаа вуд̇д̇анаяавасзна нажжам̣ гаросийд̇и ад̇т̇о. суббаваад̣̇ид̇зд̇и сунд̣̇арз баваж̇ж̇анз сад̇и д̇ава нажжасса ануруубавасзна вийн̣аавам̣самуд̣̇ин̇г̇ад̇аал̣аад̣̇игз ваад̣̇ияамаанз, бан̃жан̇г̇игз д̇уурияз баг̇г̇аяхамаанзд̇и ад̇т̇о. сзсам̣ хздтаавимаанз вуд̇д̇анаяамзва.
826. Tattha hatthe pāde ca viggayhāti hatthe ca pāde ca vividhehi ākārehi gahetvā, pupphamuṭṭhipupphañjaliādibhedassa sākhābhinayassa dassanavasena vividhehi ākārehi hatthe, ca, samapādādīnampi ṭhānavisesānaṃ dassanavasena vividhehi ākārehi pāde ca upādiyitvāti attho. Ca-saddena sākhābhinayaṃ saṅgaṇhāti. Naccasīti naṭasi. Yā tvanti yā vuttanayavasena naccaṃ karosīti attho. Suppavāditeti sundare pavajjane sati tava naccassa anurūpavasena vīṇāvaṃsamudiṅgatāḷādike vādiyamāne, pañcaṅgike tūriye paggayhamāneti attho. Sesaṃ heṭṭhāvimāne vuttanayameva.
звам̣ т̇зрзна бужчид̇аа саа д̣̇звад̇аа ад̇д̇ано буримаж̇аад̇иаад̣̇им̣ имаахи г̇аат̇аахи б̣яаагааси –
Evaṃ therena pucchitā sā devatā attano purimajātiādiṃ imāhi gāthāhi byākāsi –
833.
833.
‘‘д̣̇аасий ахам̣ бурз аасим̣, г̇аяааяам̣ б̣раахман̣ассахам̣;
‘‘Dāsī ahaṃ pure āsiṃ, gayāyaṃ brāhmaṇassahaṃ;
аббабун̃н̃аа алагкигаа, раж̇ж̇умаалаад̇и мам̣ вид̣̇ум̣.
Appapuññā alakkhikā, rajjumālāti maṃ viduṃ.
834.
834.
‘‘аггосаанам̣ вад̇хаанан̃жа, д̇аж̇ж̇анааяа жа уг̇г̇ад̇аа;
‘‘Akkosānaṃ vadhānañca, tajjanāya ca uggatā;
гудам̣ г̇ахзд̇ваа нигкамма, аг̇ан̃чим̣ уд̣̇ахаарияаа.
Kuṭaṃ gahetvā nikkhamma, agañchiṃ udahāriyā.
835.
835.
‘‘вибат̇з гудам̣ нигкибид̇ваа, ванасан̣д̣ам̣ убааг̇амим̣;
‘‘Vipathe kuṭaṃ nikkhipitvā, vanasaṇḍaṃ upāgamiṃ;
‘ид̇хзваахам̣ мариссаами, го ад̇т̇о ж̇ийвид̇зна мз’.
‘Idhevāhaṃ marissāmi, ko attho jīvitena me’.
836.
836.
‘‘д̣̇ал̣хам̣ баасам̣ гарид̇ваана, аасумбхид̇ваана баад̣̇абз;
‘‘Daḷhaṃ pāsaṃ karitvāna, āsumbhitvāna pādape;
д̇ад̇о д̣̇исаа вилогзсим̣, ‘го ну ко ванамассид̇о’.
Tato disā vilokesiṃ, ‘ko nu kho vanamassito’.
837.
837.
‘‘д̇ад̇т̇ад̣̇д̣̇асаасим̣ самб̣уд̣̇д̇хам̣, саб̣б̣алогахид̇ам̣ муним̣;
‘‘Tatthaddasāsiṃ sambuddhaṃ, sabbalokahitaṃ muniṃ;
нисиннам̣ ругкамууласмим̣, жхааяанд̇ам̣ агуд̇обхаяам̣.
Nisinnaṃ rukkhamūlasmiṃ, jhāyantaṃ akutobhayaṃ.
838.
838.
‘‘д̇ассаа мз аху сам̣взг̇о, аб̣бхуд̇о ломахам̣сано;
‘‘Tassā me ahu saṃvego, abbhuto lomahaṃsano;
‘го ну ко ванамассид̇о, мануссо уд̣̇ааху д̣̇звад̇аа’.
‘Ko nu kho vanamassito, manusso udāhu devatā’.
839.
839.
‘‘баасаад̣̇игам̣ басаад̣̇анийяам̣, ванаа ниб̣б̣анамааг̇ад̇ам̣;
‘‘Pāsādikaṃ pasādanīyaṃ, vanā nibbanamāgataṃ;
д̣̇исваа мано мз басийд̣̇и, нааяам̣ яаад̣̇исагийд̣̇исо.
Disvā mano me pasīdi, nāyaṃ yādisakīdiso.
840.
840.
‘‘г̇уд̇д̇инд̣̇рияо жхаанарад̇о, аб̣ахиг̇г̇ад̇амаанасо;
‘‘Guttindriyo jhānarato, abahiggatamānaso;
хид̇о саб̣б̣асса логасса, б̣уд̣̇д̇хо аяам̣ бхависсад̇и.
Hito sabbassa lokassa, buddho ayaṃ bhavissati.
841.
841.
‘‘бхаяабхзраво д̣̇ураасад̣̇о, сийхова г̇ухамассид̇о;
‘‘Bhayabheravo durāsado, sīhova guhamassito;
д̣̇уллабхааяам̣ д̣̇ассанааяа, бубпам̣ од̣̇умб̣арам̣ яат̇аа.
Dullabhāyaṃ dassanāya, pupphaṃ odumbaraṃ yathā.
842.
842.
‘‘со мам̣ муд̣̇уухи ваажаахи, аалабид̇ваа д̇ат̇ааг̇ад̇о;
‘‘So maṃ mudūhi vācāhi, ālapitvā tathāgato;
раж̇ж̇умаалзд̇и мам̣вожа, саран̣ам̣ г̇ажча д̇ат̇ааг̇ад̇ам̣.
Rajjumāleti maṃvoca, saraṇaṃ gaccha tathāgataṃ.
843.
843.
‘‘д̇аахам̣ г̇ирам̣ сун̣ид̇ваана, нзлам̣ ад̇т̇авад̇им̣ сужим̣;
‘‘Tāhaṃ giraṃ suṇitvāna, nelaṃ atthavatiṃ suciṃ;
сан̣хам̣ муд̣̇ун̃жа ваг̇г̇ун̃жа, саб̣б̣асогаабанууд̣̇анам̣.
Saṇhaṃ muduñca vagguñca, sabbasokāpanūdanaṃ.
844.
844.
‘‘галлажид̇д̇ан̃жа мам̣ н̃ад̇ваа, басаннам̣ суд̣̇д̇хамаанасам̣;
‘‘Kallacittañca maṃ ñatvā, pasannaṃ suddhamānasaṃ;
хид̇о саб̣б̣асса логасса, анусааси д̇ат̇ааг̇ад̇о.
Hito sabbassa lokassa, anusāsi tathāgato.
845.
845.
‘‘ид̣̇ам̣ д̣̇угканд̇и мам̣вожа, аяам̣ д̣̇угкасса самбхаво;
‘‘Idaṃ dukkhanti maṃvoca, ayaṃ dukkhassa sambhavo;
д̣̇угканирод̇хо маг̇г̇о жа, ан̃ж̇асо амад̇ог̇ад̇хо.
Dukkhanirodho maggo ca, añjaso amatogadho.
846.
846.
‘‘анугамбагасса гусаласса, оваад̣̇амхи ахам̣ тид̇аа;
‘‘Anukampakassa kusalassa, ovādamhi ahaṃ ṭhitā;
аж̇жхаг̇аа амад̇ам̣ санд̇им̣, ниб̣б̣аанам̣ бад̣̇амажжуд̇ам̣.
Ajjhagā amataṃ santiṃ, nibbānaṃ padamaccutaṃ.
847.
847.
‘‘саахам̣ авадтид̇аабзмаа, д̣̇ассанз авигамбиний;
‘‘Sāhaṃ avaṭṭhitāpemā, dassane avikampinī;
муулаж̇аад̇ааяа сад̣̇д̇хааяа, д̇хийд̇аа б̣уд̣̇д̇хасса орасаа.
Mūlajātāya saddhāya, dhītā buddhassa orasā.
848.
848.
‘‘саахам̣ рамаами гийл̣аами, мод̣̇аами агуд̇обхаяаа;
‘‘Sāhaṃ ramāmi kīḷāmi, modāmi akutobhayā;
д̣̇иб̣б̣амаалам̣ д̇хаараяаами, биваами мад̇хумад̣̇д̣̇авам̣.
Dibbamālaṃ dhārayāmi, pivāmi madhumaddavaṃ.
849.
849.
‘‘садтид̇уурияасахассаани, бадиб̣од̇хам̣ гаронд̇и мз;
‘‘Saṭṭhitūriyasahassāni, paṭibodhaṃ karonti me;
аал̣амб̣о г̇аг̇г̇аро бхиймо, саад̇хуваад̣̇ий жа сам̣саяо.
Āḷambo gaggaro bhīmo, sādhuvādī ca saṃsayo.
850.
850.
‘‘богкаро жа супассо жа, вин̣аамогкаа жа наарияо;
‘‘Pokkharo ca suphasso ca, viṇāmokkhā ca nāriyo;
нанд̣̇аа жзва сунанд̣̇аа жа, сон̣ад̣̇иннаа сужимхид̇аа.
Nandā ceva sunandā ca, soṇadinnā sucimhitā.
851.
851.
‘‘аламб̣усаа миссагзсий жа, бун̣д̣арийгаад̇ид̣̇аарун̣ий;
‘‘Alambusā missakesī ca, puṇḍarīkātidāruṇī;
зн̣ийпассаа супассаа жа, субхад̣̇д̣̇аа муд̣̇уваад̣̇иний.
Eṇīphassā suphassā ca, subhaddā muduvādinī.
852.
852.
‘‘зд̇аа жан̃н̃аа жа сзяяаасз, ажчараанам̣ баб̣од̇хигаа;
‘‘Etā caññā ca seyyāse, accharānaṃ pabodhikā;
д̇аа мам̣ гаалзнубааг̇анд̇ваа, абхибхаасанд̇и д̣̇звад̇аа.
Tā maṃ kālenupāgantvā, abhibhāsanti devatā.
853.
853.
‘‘ханд̣̇а нажжаама г̇ааяаама, ханд̣̇а д̇ам̣ рамаяаамасз;
‘‘Handa naccāma gāyāma, handa taṃ ramayāmase;
наяид̣̇ам̣ агад̇абун̃н̃аанам̣, гад̇абун̃н̃аанамзвид̣̇ам̣.
Nayidaṃ akatapuññānaṃ, katapuññānamevidaṃ.
854.
854.
‘‘асогам̣ нанд̣̇анам̣ раммам̣, д̇ид̣̇асаанам̣ махааванам̣;
‘‘Asokaṃ nandanaṃ rammaṃ, tidasānaṃ mahāvanaṃ;
сукам̣ агад̇абун̃н̃аанам̣, ид̇ха над̇т̇и барад̇т̇а жа.
Sukhaṃ akatapuññānaṃ, idha natthi parattha ca.
855.
855.
‘‘сукан̃жа гад̇абун̃н̃аанам̣, ид̇ха жзва барад̇т̇а жа;
‘‘Sukhañca katapuññānaṃ, idha ceva parattha ca;
д̇зсам̣ сахаб̣яагаамаанам̣, гад̇д̇аб̣б̣ам̣ гусалам̣ б̣ахум̣;
Tesaṃ sahabyakāmānaṃ, kattabbaṃ kusalaṃ bahuṃ;
гад̇абун̃н̃аа хи мод̣̇анд̇и, саг̇г̇з бхог̇асаман̇г̇ино.
Katapuññā hi modanti, sagge bhogasamaṅgino.
856.
856.
‘‘б̣ахуунам̣ вад̇а ад̇т̇ааяа, уббаж̇ж̇анд̇и д̇ат̇ааг̇ад̇аа;
‘‘Bahūnaṃ vata atthāya, uppajjanti tathāgatā;
д̣̇агкин̣зяяаа мануссаанам̣, бун̃н̃агкзд̇д̇аанамаагараа;
Dakkhiṇeyyā manussānaṃ, puññakkhettānamākarā;
яад̇т̇а гаарам̣ гарид̇ваана, саг̇г̇з мод̣̇анд̇и д̣̇ааяагаа’’д̇и.
Yattha kāraṃ karitvāna, sagge modanti dāyakā’’ti.
833. д̇ад̇т̇а д̣̇аасий ахам̣ бурз аасинд̇и бурз буримаж̇аад̇ияам̣ ахам̣ анд̇ож̇аад̇аа д̣̇аасий ахосим̣. д̇ад̇т̇а гассаад̇и ааха ‘‘г̇аяааяам̣ б̣раахман̣ассаха’’нд̇и, г̇аяаанаамагз г̇аамз ан̃н̃ад̇арасса б̣раахман̣асса. ханд̇и нибаад̇амад̇д̇ам̣. аббабун̃н̃аад̇и манд̣̇абхааг̇яаа абун̃н̃аа. алагкигаад̇и ниссиригаа гаалаган̣н̣ий. раж̇ж̇умаалаад̇и мам̣ вид̣̇унд̇и, гзсз г̇ахзд̇ваа аагад̣дханабаригад̣дханад̣̇угкзна мун̣д̣агз гад̇з бунаби д̇ад̣̇ад̇т̇амзва сийсз д̣̇ал̣хам̣ б̣анд̇хид̇ваа табид̇араж̇ж̇угун̣д̣алагавасзна ‘‘раж̇ж̇умаалаа’’д̇и мам̣ мануссаа ж̇ааним̣су.
833. Tattha dāsī ahaṃ pure āsinti pure purimajātiyaṃ ahaṃ antojātā dāsī ahosiṃ. Tattha kassāti āha ‘‘gayāyaṃ brāhmaṇassaha’’nti, gayānāmake gāme aññatarassa brāhmaṇassa. Hanti nipātamattaṃ. Appapuññāti mandabhāgyā apuññā. Alakkhikāti nissirikā kālakaṇṇī. Rajjumālāti maṃ vidunti, kese gahetvā ākaḍḍhanaparikaḍḍhanadukkhena muṇḍake kate punapi tadatthameva sīse daḷhaṃ bandhitvā ṭhapitarajjukuṇḍalakavasena ‘‘rajjumālā’’ti maṃ manussā jāniṃsu.
834. вад̇хаананд̇и д̇аал̣анаанам̣. д̇аж̇ж̇анааяаад̇и бхаяасам̣д̇аж̇ж̇анзна. уг̇г̇ад̇аад̇и уг̇г̇ад̇ааяа д̣̇оманассуббад̇д̇ияаа. уд̣̇ахаарияаад̇и уд̣̇агахааригаа, уд̣̇агам̣ аахаранд̇ий вияа худ̇ваад̇и ад̇хиббааяо.
834.Vadhānanti tāḷanānaṃ. Tajjanāyāti bhayasaṃtajjanena. Uggatāti uggatāya domanassuppattiyā. Udahāriyāti udakahārikā, udakaṃ āharantī viya hutvāti adhippāyo.
835. вибат̇зд̇и абат̇з, маг̇г̇ад̇о абаггамид̇ваад̇и ад̇т̇о. гвад̇т̇од̇и го ад̇т̇о. соязва ваа баато.
835.Vipatheti apathe, maggato apakkamitvāti attho. Kvatthoti ko attho. Soyeva vā pāṭho.
836. д̣̇ал̣хам̣ баасам̣ гарид̇ваанаад̇и б̣анд̇ханабаасам̣ т̇ирам̣ ажчиж̇ж̇анагам̣ гад̇ваа. аасумбхид̇ваана баад̣̇абзд̇и видабз лаг̇г̇анавасзна баад̣̇абз ругкз кибид̇ваа. д̇ад̇о д̣̇исаа вилогзсим̣, го ну ко ванамассид̇од̇и имам̣ ванам̣ бависанавасзна ассид̇о ну ко гожи ад̇т̇и, яад̇о мз маран̣анд̇арааяо сияаад̇и ад̇хиббааяо.
836.Daḷhaṃ pāsaṃ karitvānāti bandhanapāsaṃ thiraṃ acchijjanakaṃ katvā. Āsumbhitvāna pādapeti viṭape lagganavasena pādape rukkhe khipitvā. Tato disā vilokesiṃ, ko nu kho vanamassitoti imaṃ vanaṃ pavisanavasena assito nu kho koci atthi, yato me maraṇantarāyo siyāti adhippāyo.
837. самб̣уд̣̇д̇ханд̇иаад̣̇и д̇ад̣̇аа д̇ассаа д̇аад̣̇исз нижчаяз асад̇иби сабхаававасзна вуд̇д̇ам̣. д̇ассад̇т̇о – саяамзва саммад̣̇зва жа саб̣б̣ассааби б̣уж̇жхид̇аб̣б̣асса б̣уд̣̇д̇хад̇д̇аа самб̣уд̣̇д̇хам̣, махаагарун̣ааяог̇зна хийнаад̣̇ибхзд̣̇абхиннасса саб̣б̣ассааби логасса зганд̇ахид̇ад̇д̇аа саб̣б̣алогахид̇ам̣, убхаяалогам̣ мунанад̇о муним̣, нисаж̇ж̇аавасзна гилзсаабхисан̇каарзхи таанаа жааванаабхаавзна жа нисиннам̣, аарамман̣уубаниж̇жхаанзна лагкан̣уубаниж̇жхаанзна жа жхааяанд̇ам̣, б̣од̇химуулзязва бхаяахзд̇уунам̣ самужчиннад̇д̇аа гуд̇ожиби бхаяаабхаавад̇о агуд̇обхаяанд̇и взд̣̇ид̇аб̣б̣ам̣.
837.Sambuddhantiādi tadā tassā tādise nicchaye asatipi sabhāvavasena vuttaṃ. Tassattho – sayameva sammadeva ca sabbassāpi bujjhitabbassa buddhattā sambuddhaṃ, mahākaruṇāyogena hīnādibhedabhinnassa sabbassāpi lokassa ekantahitattā sabbalokahitaṃ, ubhayalokaṃ munanato muniṃ, nisajjāvasena kilesābhisaṅkhārehi ṭhānā cāvanābhāvena ca nisinnaṃ, ārammaṇūpanijjhānena lakkhaṇūpanijjhānena ca jhāyantaṃ, bodhimūleyeva bhayahetūnaṃ samucchinnattā kutocipi bhayābhāvato akutobhayanti veditabbaṃ.
838. сам̣взг̇о наама саход̇д̇аббам̣ н̃аан̣ам̣, со д̇ассаа бхаг̇авад̇о д̣̇ассанзна уббаж̇ж̇и. д̇знааха ‘‘д̇ассаа мз аху сам̣взг̇о’’д̇и.
838.Saṃvego nāma sahottappaṃ ñāṇaṃ, so tassā bhagavato dassanena uppajji. Tenāha ‘‘tassā me ahu saṃvego’’ti.
839. баасаад̣̇иганд̇и басаад̣̇аавахам̣, д̣̇вад̇д̇им̣самахаабурисалагкан̣аасийд̇иануб̣яан̃ж̇анаб̣яаамаббабхаагзд̇умаалаалан̇гад̇ааяа саманд̇абаасаад̣̇игааяа ад̇д̇ано сарийрасобхаасамбад̇д̇ияаа руубагааяад̣̇ассанаб̣яаавадасса ж̇анасса саад̇хубхаавад̇о басаад̣̇асам̣вад̣дхананд̇и ад̇т̇о. басаад̣̇анийяанд̇и д̣̇асаб̣ала-жад̇увзсаараж̇ж̇ачаасаад̇хааран̣ан̃аан̣а-адтаарасаавзн̣ига-б̣уд̣̇д̇хад̇хаммабабхуд̇иабаримаан̣аг̇ун̣асаманнааг̇ад̇ааяа д̇хаммагааяасамбад̇д̇ияаа саригкагаж̇анасса басийд̣̇ид̇аб̣б̣аяуд̇д̇ам̣, баасаад̣̇иганд̇и ад̇т̇о. ванаад̇и гилзсаванад̇о абаггамид̇ваа. ниб̣б̣анамааг̇ад̇анд̇и нид̇д̇ан̣хабхаавам̣ ниб̣б̣аанамзва убаг̇ад̇ам̣ ад̇хиг̇ад̇ам̣. яаад̣̇исагийд̣̇исод̇и яо ваа со ваа, бажураж̇анод̇и ад̇т̇о.
839.Pāsādikanti pasādāvahaṃ, dvattiṃsamahāpurisalakkhaṇaasītianubyañjanabyāmappabhāketumālālaṅkatāya samantapāsādikāya attano sarīrasobhāsampattiyā rūpakāyadassanabyāvaṭassa janassa sādhubhāvato pasādasaṃvaḍḍhananti attho. Pasādanīyanti dasabala-catuvesārajjachaasādhāraṇañāṇa-aṭṭhārasāveṇika-buddhadhammapabhutiaparimāṇaguṇasamannāgatāya dhammakāyasampattiyā sarikkhakajanassa pasīditabbayuttaṃ, pāsādikanti attho. Vanāti kilesavanato apakkamitvā. Nibbanamāgatanti nittaṇhabhāvaṃ nibbānameva upagataṃ adhigataṃ. Yādisakīdisoti yo vā so vā, pacurajanoti attho.
840-41. манажчадтаанам̣ инд̣̇рияаанам̣ аг̇г̇амаг̇г̇аг̇обанааяа г̇обид̇ад̇д̇аа г̇уд̇д̇инд̣̇рияо. аг̇г̇апалаж̇жхаанаабхирад̇ияаа жхаанарад̇о. д̇ад̇о зва б̣ахибхууд̇зхи руубаад̣̇иаарамман̣зхи абаггамид̇ваа висаяаж̇жхад̇д̇з ниб̣б̣аанз жа ог̇аал̣хажид̇д̇ад̇ааяа аб̣ахиг̇г̇ад̇амаанасо. мижчааг̇аахаможанабхаязна вибаллаасаванд̇зхи мижчаад̣̇идтигзхи бхааяид̇аб̣б̣ад̇о д̇зсан̃жа бхаяаж̇ананад̇о бхаяабхзраво. баяог̇аасаяавибаннзхи анубаг̇аманийяад̇о жа гзнажиби анаасаад̣̇анийяад̇о жа д̣̇ураасад̣̇о. д̣̇уллабхааяанд̇и д̣̇уллабхо аяам̣. д̣̇ассанааяаад̇и д̣̇адтумби. бубпам̣ од̣̇умб̣арам̣ яат̇аад̇и яат̇аа наама уд̣̇умб̣арз бхавам̣ бубпам̣ д̣̇уллабхад̣̇ассанам̣, гад̣̇аажид̣̇зва бхавзяяа, на ваа бхавзяяа, звам̣ ийд̣̇исасса уд̇д̇амабуг̇г̇алассаад̇и ад̇т̇о.
840-41. Manacchaṭṭhānaṃ indriyānaṃ aggamaggagopanāya gopitattā guttindriyo. Aggaphalajjhānābhiratiyā jhānarato. Tato eva bahibhūtehi rūpādiārammaṇehi apakkamitvā visayajjhatte nibbāne ca ogāḷhacittatāya abahiggatamānaso. Micchāgāhamocanabhayena vipallāsavantehi micchādiṭṭhikehi bhāyitabbato tesañca bhayajananato bhayabheravo. Payogāsayavipannehi anupagamanīyato ca kenacipi anāsādanīyato ca durāsado. Dullabhāyanti dullabho ayaṃ. Dassanāyāti daṭṭhumpi. Pupphaṃ odumbaraṃ yathāti yathā nāma udumbare bhavaṃ pupphaṃ dullabhadassanaṃ, kadācideva bhaveyya, na vā bhaveyya, evaṃ īdisassa uttamapuggalassāti attho.
842. со д̇ат̇ааг̇ад̇о муд̣̇уухи ваажаахи сан̣хааяа ваажааяа ‘‘раж̇ж̇умаалз’’д̇и мам̣ аалабид̇ваа ааманд̇зд̇ваа саран̣ам̣ г̇ажча д̇ат̇ааг̇ад̇анд̇и ‘‘д̇ат̇аа ааг̇ад̇о’’д̇иаад̣̇инаа д̇ат̇ааг̇ад̇ам̣ саммаасамб̣уд̣̇д̇хам̣ саран̣ам̣ г̇ажчаад̇и мам̣ авожа абхаасийд̇и яож̇анаа.
842.Sotathāgato mudūhi vācāhi saṇhāya vācāya ‘‘rajjumāle’’timaṃ ālapitvā āmantetvā saraṇaṃ gaccha tathāgatanti ‘‘tathā āgato’’tiādinā tathāgataṃ sammāsambuddhaṃ saraṇaṃ gacchāti maṃ avoca abhāsīti yojanā.
843-4. д̇ааханд̇и д̇ам̣ ахам̣. г̇иранд̇и ваажам̣. нзланд̇и нид̣̇д̣̇осам̣. ад̇т̇авад̇инд̇и ад̇т̇аяуд̇д̇ам̣ саад̇т̇ам̣ , зганд̇ахид̇ам̣ ваа. важийсожзяяад̇ааяа сужим̣. агагкал̣ад̇ааяа сан̣хам̣. взнзяяаанам̣ муд̣̇убхаавагарад̇д̇аа муд̣̇у. саванийяабхаавзна ваг̇г̇ум̣. саб̣б̣асогаабанууд̣̇ананд̇и н̃аад̇иб̣яасанаад̣̇ивасзна уббаж̇ж̇анагасса саб̣б̣ассааби согасса винод̣̇анам̣ г̇ирам̣ суд̇ваана басаннажид̇д̇аа ахосинд̇и самб̣анд̇хо. саб̣б̣амзд̇ам̣ д̣̇аанагат̇ам̣ аад̣̇им̣ гад̇ваа уссаггид̇ваа нзгкаммз аанисам̣сам̣ вибхааванавасзна бавад̇д̇ид̇ам̣ бхаг̇авад̇о анубуб̣б̣игат̇ам̣ санд̇хааяа вад̣̇ад̇и. д̇знзвааха ‘‘галлажид̇д̇ан̃жа мам̣ н̃ад̇ваа’’д̇иаад̣̇и.
843-4.Tāhanti taṃ ahaṃ. Giranti vācaṃ. Nelanti niddosaṃ. Atthavatinti atthayuttaṃ sātthaṃ , ekantahitaṃ vā. Vacīsoceyyatāya suciṃ. Akakkhaḷatāya saṇhaṃ. Veneyyānaṃ mudubhāvakarattā mudu. Savanīyabhāvena vagguṃ. Sabbasokāpanūdananti ñātibyasanādivasena uppajjanakassa sabbassāpi sokassa vinodanaṃ giraṃ sutvāna pasannacittā ahosinti sambandho. Sabbametaṃ dānakathaṃ ādiṃ katvā ussakkitvā nekkhamme ānisaṃsaṃ vibhāvanavasena pavattitaṃ bhagavato anupubbikathaṃ sandhāya vadati. Tenevāha ‘‘kallacittañca maṃ ñatvā’’tiādi.
д̇ад̇т̇а галлажид̇д̇анд̇и гамманияажид̇д̇ам̣, хздтаа бавад̇д̇ид̇ад̣̇зсанааяа ассад̣̇д̇хияаад̣̇ийнам̣ жид̇д̇ад̣̇осаанам̣ виг̇ад̇ад̇д̇аа убарид̣̇зсанааяа бхааж̇анабхаавуубаг̇аманзна гаммагкамажид̇д̇ам̣, бхааванаагаммасса яог̇г̇ажид̇д̇анд̇и ад̇т̇о. д̇знзвааха ‘‘басаннам̣ суд̣̇д̇хамаанаса’’нд̇и. д̇ад̇т̇а ‘‘басанна’’нд̇и иминаа ассад̣̇д̇хияаабаг̇амамааха, ‘‘суд̣̇д̇хамаанаса’’нд̇и иминаа гаамажчанд̣̇аад̣̇иабаг̇аманзна муд̣̇ужид̇д̇ад̇ам̣ уд̣̇аг̇г̇ажид̇д̇ад̇ан̃жа д̣̇ассзд̇и. анусаасийд̇и овад̣̇и, саамуггам̣сигааяа д̇хаммад̣̇зсанааяа саха убааязна бавад̇д̇инивад̇д̇ияо убад̣̇исийд̇и ад̇т̇о. д̇знзвааха ‘‘ид̣̇ам̣ д̣̇угка’’нд̇иаад̣̇и. анусаасид̇аагаарад̣̇ассанан̃хзд̇ам̣.
Tattha kallacittanti kammaniyacittaṃ, heṭṭhā pavattitadesanāya assaddhiyādīnaṃ cittadosānaṃ vigatattā uparidesanāya bhājanabhāvūpagamanena kammakkhamacittaṃ, bhāvanākammassa yoggacittanti attho. Tenevāha ‘‘pasannaṃ suddhamānasa’’nti. Tattha ‘‘pasanna’’nti iminā assaddhiyāpagamamāha, ‘‘suddhamānasa’’nti iminā kāmacchandādiapagamanena muducittataṃ udaggacittatañca dasseti. Anusāsīti ovadi, sāmukkaṃsikāya dhammadesanāya saha upāyena pavattinivattiyo upadisīti attho. Tenevāha ‘‘idaṃ dukkha’’ntiādi. Anusāsitākāradassanañhetaṃ.
845. д̇ад̇т̇а ид̣̇ам̣ д̣̇угканд̇и мам̣вожаад̇и ид̣̇ам̣ д̇ан̣хааваж̇ж̇ам̣ д̇збхуумагам̣ д̇хаммаж̇аад̇ам̣ б̣аад̇хагасабхаавад̇д̇аа гужчигам̣ худ̇ваа д̇ужчасабхаавад̇д̇аа д̇ат̇ад̇д̇аа жа д̣̇угкам̣ арияасажжанд̇и маяхам̣ абхааси. аяам̣ д̣̇угкасса самбхавод̇и аяам̣ аамад̇ан̣хаад̣̇ибхзд̣̇аа д̇ан̣хаа яат̇аавуд̇д̇асса д̣̇угкасса самбхаво бабхаво уббад̇д̇и хзд̇у самуд̣̇аяо арияасажжанд̇и. д̣̇угканирод̇ход̇и д̣̇угкасса санд̇ибхааво асан̇кад̇ад̇хаад̇у нирод̇хо арияасажжанд̇и. анд̇ад̣̇ваяасса бариваж̇ж̇анад̇о ан̃ж̇асо ниб̣б̣аанаг̇ааминибадибад̣̇аабхаавад̇о амад̇ог̇ад̇хо маг̇г̇о арияасажжанд̇и мам̣ авожаад̇и самб̣анд̇хо.
845. Tattha idaṃ dukkhanti maṃvocāti idaṃ taṇhāvajjaṃ tebhūmakaṃ dhammajātaṃ bādhakasabhāvattā kucchikaṃ hutvā tucchasabhāvattā tathattā ca dukkhaṃ ariyasaccanti mayhaṃ abhāsi. Ayaṃ dukkhassa sambhavoti ayaṃ āmataṇhādibhedā taṇhā yathāvuttassa dukkhassa sambhavo pabhavo uppatti hetu samudayo ariyasaccanti. Dukkhanirodhoti dukkhassa santibhāvo asaṅkhatadhātu nirodho ariyasaccanti. Antadvayassa parivajjanato añjaso nibbānagāminipaṭipadābhāvato amatogadho maggo ariyasaccanti maṃ avocāti sambandho.
846. гусалассаад̇и оваад̣̇ад̣̇аанз взнзяяад̣̇аманз чзгасса, аббамаад̣̇абадибад̇д̇ияаа ваа мад̇т̇агаббад̇д̇ияаа анаваж̇ж̇асса. оваад̣̇амхи ахам̣ тид̇аад̇и яат̇аавуд̇д̇з оваад̣̇з анусидтияам̣ сигкаад̇д̇аяабаарибуурияаа сажжабадивзд̇хзна ахам̣ бад̇идтид̇аа. д̇знааха ‘‘аж̇жхаг̇аа амад̇ам̣ санд̇им̣, ниб̣б̣аанам̣ бад̣̇амажжуд̇а’’нд̇и, ид̣̇ам̣ оваад̣̇з бад̇идтаанасса гааран̣аважанам̣. яаа нижжад̇ааяа маран̣аабхаавад̇о амад̇ам̣, саб̣б̣ад̣̇угкавуубасамад̇ааяа санд̇им̣, ад̇хиг̇ад̇аанам̣ ажаванахзд̇уд̇ааяа ажжуд̇ам̣ ниб̣б̣аанам̣ бад̣̇ам̣ аж̇жхаг̇аа ад̇хиг̇ан̃чи, саа згам̣сзна сад̇т̇у оваад̣̇з бад̇идтид̇аа наамаад̇и.
846.Kusalassāti ovādadāne veneyyadamane chekassa, appamādapaṭipattiyā vā matthakappattiyā anavajjassa. Ovādamhi ahaṃ ṭhitāti yathāvutte ovāde anusiṭṭhiyaṃ sikkhāttayapāripūriyā saccapaṭivedhena ahaṃ patiṭṭhitā. Tenāha ‘‘ajjhagā amataṃ santiṃ, nibbānaṃ padamaccuta’’nti, idaṃ ovāde patiṭṭhānassa kāraṇavacanaṃ. Yā niccatāya maraṇābhāvato amataṃ, sabbadukkhavūpasamatāya santiṃ, adhigatānaṃ acavanahetutāya accutaṃ nibbānaṃ padaṃ ajjhagā adhigañchi, sā ekaṃsena satthu ovāde patiṭṭhitā nāmāti.
847. авадтид̇аабзмаад̇и д̣̇ал̣хабхад̇д̇ий рад̇анад̇д̇аяз нижжалабасаад̣̇асинзхаа. гасмаа? яасмаа д̣̇ассанз авигамбиний, ‘‘саммаасамб̣уд̣̇д̇хо бхаг̇аваа, сваагкаад̇о д̇хаммо, суббадибанно сан̇гхо’’д̇и зд̇асмим̣ саммаад̣̇ассанз ажалаа гзнажи ажааланийяаа. гзна банзд̇ам̣ авигамбананд̇и ааха ‘‘муулаж̇аад̇ааяа сад̣̇д̇хааяаа’’д̇и. аяам̣ ‘‘ид̇иби со бхаг̇аваа араха’’нд̇иаад̣̇инаа (ма. ни. 1.74; сам̣. ни. 5.997; а. ни. 9.27) саммаасамб̣уд̣̇д̇хз, ‘‘сваагкаад̇о бхаг̇авад̇аа д̇хаммаа’д̇иаад̣̇инаа д̇асса д̇хаммз, ‘‘суббадибанно бхаг̇авад̇о саавагасан̇гхо’’д̇иаад̣̇инаа д̇асса сан̇гхз жа сажжаабхисамаяасан̇каад̇зна муулзна ж̇аад̇амуулаа сад̣̇д̇хаа, д̇ааяа ахам̣ авигамбинийд̇и д̣̇ассзд̇и. д̇ад̇о зва д̇хийд̇аа б̣уд̣̇д̇хасса орасаад̇и саммаасамб̣уд̣̇д̇хасса урз вааяаамаж̇анид̇аабхиж̇аад̇ид̇ааяа орасабуд̇д̇ий.
847.Avaṭṭhitāpemāti daḷhabhattī ratanattaye niccalapasādasinehā. Kasmā? Yasmā dassane avikampinī, ‘‘sammāsambuddho bhagavā, svākkhāto dhammo, suppaṭipanno saṅgho’’ti etasmiṃ sammādassane acalā kenaci acālanīyā. Kena panetaṃ avikampananti āha ‘‘mūlajātāyasaddhāyā’’ti. Ayaṃ ‘‘itipi so bhagavā araha’’ntiādinā (ma. ni. 1.74; saṃ. ni. 5.997; a. ni. 9.27) sammāsambuddhe, ‘‘svākkhāto bhagavatā dhammā’tiādinā tassa dhamme, ‘‘suppaṭipanno bhagavato sāvakasaṅgho’’tiādinā tassa saṅghe ca saccābhisamayasaṅkhātena mūlena jātamūlā saddhā, tāya ahaṃ avikampinīti dasseti. Tato eva dhītā buddhassa orasāti sammāsambuddhassa ure vāyāmajanitābhijātitāya orasaputtī.
848. саахам̣ рамаамийд̇и саа ахам̣ д̇ад̣̇аа арияааяа ж̇аад̇ияаа ид̣̇аани д̣̇звуубабад̇д̇ияаа ааг̇ад̇аа маг̇г̇арад̇ияаа паларад̇ияаа жа рамаами, гаамаг̇ун̣арад̇ияаа гийл̣аами, убхаязнааби мод̣̇аами. ад̇д̇аануваад̣̇абхаяаад̣̇ийнам̣ абаг̇ад̇ад̇д̇аа агуд̇обхаяаа. мад̇хумад̣̇д̣̇аванд̇и мад̇хусан̇каад̇ам̣ мад̣̇д̣̇авагарам̣, нажжанаг̇ааяанагаалзсу сарийрасса сарасса жа муд̣̇убхааваавахам̣ г̇анд̇хабаанам̣ санд̇хааяа вад̣̇ад̇и.‘‘мад̇хумаад̣̇ава’’нд̇иби батанд̇и, аад̣̇авам̣ яаавад̣̇авам̣ яаавад̣̇зва д̣̇авад̇т̇ам̣ мад̇хурам̣ биваамийд̇и ад̇т̇о.
848.Sāhaṃ ramāmīti sā ahaṃ tadā ariyāya jātiyā idāni devūpapattiyā āgatā maggaratiyā phalaratiyā ca ramāmi, kāmaguṇaratiyā kīḷāmi, ubhayenāpi modāmi. Attānuvādabhayādīnaṃ apagatattā akutobhayā. Madhumaddavanti madhusaṅkhātaṃ maddavakaraṃ, naccanagāyanakālesu sarīrassa sarassa ca mudubhāvāvahaṃ gandhapānaṃ sandhāya vadati.‘‘Madhumādava’’ntipi paṭhanti, ādavaṃ yāvadavaṃ yāvadeva davatthaṃ madhuraṃ pivāmīti attho.
849. бун̃н̃агкзд̇д̇аанамаагараад̇и сад̣̇звагасса логасса бун̃н̃агкзд̇д̇абхууд̇аанам̣ арияаанам̣ маг̇г̇апаладтаанам̣ арияасан̇гхасса аагараа уббад̇д̇идтаанам̣ д̇ат̇ааг̇ад̇аа. яат̇аад̇и яасмим̣ бун̃н̃агкзд̇д̇з. сзсам̣ вуд̇д̇анаяамзва.
849.Puññakkhettānamākarāti sadevakassa lokassa puññakkhettabhūtānaṃ ariyānaṃ maggaphalaṭṭhānaṃ ariyasaṅghassa ākarā uppattiṭṭhānaṃ tathāgatā. Yathāti yasmiṃ puññakkhette. Sesaṃ vuttanayameva.
ат̇ааяасмаа махаамог̇г̇аллаано ад̇д̇анаа жа д̣̇звад̇ааяа жа бавад̇д̇ид̇ам̣ имам̣ гат̇аасаллаабам̣ мануссалогам̣ ааг̇анд̇ваа бхаг̇авад̇о аарожзси. бхаг̇аваа д̇амад̇т̇ам̣ адтуббад̇д̇им̣ гад̇ваа самбад̇д̇абарисааяа д̇хаммам̣ д̣̇зсзси. саа д̣̇зсанаа махааж̇анасса саад̇т̇игаа ахосийд̇и.
Athāyasmā mahāmoggallāno attanā ca devatāya ca pavattitaṃ imaṃ kathāsallāpaṃ manussalokaṃ āgantvā bhagavato ārocesi. Bhagavā tamatthaṃ aṭṭhuppattiṃ katvā sampattaparisāya dhammaṃ desesi. Sā desanā mahājanassa sātthikā ahosīti.
раж̇ж̇умаалаавимаанаван̣н̣анаа нидтид̇аа.
Rajjumālāvimānavaṇṇanā niṭṭhitā.
ид̇и барамад̇т̇ад̣̇ийбанияаа куд̣̇д̣̇ага-адтагат̇ааяа вимаанавад̇т̇усмим̣
Iti paramatthadīpaniyā khuddaka-aṭṭhakathāya vimānavatthusmiṃ
д̣̇ваад̣̇асавад̇т̇убадиман̣д̣ид̇асса жад̇уд̇т̇асса ман̃ж̇идтагаваг̇г̇асса
Dvādasavatthupaṭimaṇḍitassa catutthassa mañjiṭṭhakavaggassa
ад̇т̇аван̣н̣анаа нидтид̇аа.
Atthavaṇṇanā niṭṭhitā.
нидтид̇аа жа ид̇т̇ивимаанаван̣н̣анаа.
Niṭṭhitā ca itthivimānavaṇṇanā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 12. раж̇ж̇умаалаавимаанавад̇т̇у • 12. Rajjumālāvimānavatthu
