(து³தியோ பா⁴கோ³)

(Dutiyo bhāgo)

2. து³கனிபாதோ

2. Dukanipāto

1. த³ள்ஹவக்³கோ³

1. Daḷhavaggo

[151] 1. ராஜோவாத³ஜாதகவண்ணனா

[151] 1. Rājovādajātakavaṇṇanā

த³ள்ஹங் த³ள்ஹஸ்ஸ கி²பதீதி இத³ங் ஸத்தா² ஜேதவனே விஹரந்தோ ராஜோவாத³ங் ஆரப்³ப⁴ கதே²ஸி. ஸோ தேஸகுணஜாதகே (ஜா॰ 2.17.1 ஆத³யோ) ஆவி ப⁴விஸ்ஸதி. ஏகஸ்மிங் பன தி³வஸே கோஸலராஜா ஏகங் அக³திக³தங் து³ப்³பி³னிச்ச²யங் அட்³ட³ங் வினிச்சி²னித்வா பு⁴த்தபாதராஸோ அல்லஹத்தோ²வ அலங்கதரத²ங் அபி⁴ருய்ஹ ஸத்து² ஸந்திகங் க³ந்த்வா பு²ல்லபது³மஸஸ்ஸிரிகேஸு பாதே³ஸு நிபதித்வா ஸத்தா²ரங் வந்தி³த்வா ஏகமந்தங் நிஸீதி³. அத² நங் ஸத்தா² ஏதத³வோச – ‘‘ஹந்த³ குதோ நு த்வங், மஹாராஜ, ஆக³ச்ச²ஸி தி³வா தி³வஸ்ஸா’’தி. ‘‘ப⁴ந்தே, அஜ்ஜ ஏகங் அக³திக³தங் து³ப்³பி³னிச்ச²யங் அட்³ட³ங் வினிச்சி²னந்தோ ஓகாஸங் அலபி⁴த்வா இதா³னி தங் தீரெத்வா பு⁴ஞ்ஜித்வா அல்லஹத்தோ²வ தும்ஹாகங் உபட்டா²னங் ஆக³தொம்ஹீ’’தி. ஸத்தா² ‘‘மஹாராஜ, த⁴ம்மேன ஸமேன அட்³ட³வினிச்ச²யங் நாம குஸலங், ஸக்³க³மக்³கோ³ ஏஸ. அனச்ச²ரியங் கோ² பனேதங், யங் தும்ஹே மாதி³ஸஸ்ஸ ஸப்³ப³ஞ்ஞுபு³த்³த⁴ஸ்ஸ ஸந்திகா ஓவாத³ங் லப⁴மானா த⁴ம்மேன ஸமேன அட்³ட³ங் வினிச்சி²னெய்யாத². ஏததே³வ அச்ச²ரியங், யங் புப்³பே³ ராஜானோ அஸப்³ப³ஞ்ஞூனம்பி பண்டி³தானங் வசனங் ஸுத்வா த⁴ம்மேன ஸமேன அட்³ட³ங் வினிச்சி²னந்தா சத்தாரி அக³திக³மனானி வஜ்ஜெத்வா த³ஸ ராஜத⁴ம்மே அகோபெத்வா த⁴ம்மேன ரஜ்ஜங் காரெத்வா ஸக்³க³புரங் பூரயமானா அக³மிங்ஸூ’’தி வத்வா தேன யாசிதோ அதீதங் ஆஹரி.

Daḷhaṃdaḷhassa khipatīti idaṃ satthā jetavane viharanto rājovādaṃ ārabbha kathesi. So tesakuṇajātake (jā. 2.17.1 ādayo) āvi bhavissati. Ekasmiṃ pana divase kosalarājā ekaṃ agatigataṃ dubbinicchayaṃ aḍḍaṃ vinicchinitvā bhuttapātarāso allahatthova alaṅkatarathaṃ abhiruyha satthu santikaṃ gantvā phullapadumasassirikesu pādesu nipatitvā satthāraṃ vanditvā ekamantaṃ nisīdi. Atha naṃ satthā etadavoca – ‘‘handa kuto nu tvaṃ, mahārāja, āgacchasi divā divassā’’ti. ‘‘Bhante, ajja ekaṃ agatigataṃ dubbinicchayaṃ aḍḍaṃ vinicchinanto okāsaṃ alabhitvā idāni taṃ tīretvā bhuñjitvā allahatthova tumhākaṃ upaṭṭhānaṃ āgatomhī’’ti. Satthā ‘‘mahārāja, dhammena samena aḍḍavinicchayaṃ nāma kusalaṃ, saggamaggo esa. Anacchariyaṃ kho panetaṃ, yaṃ tumhe mādisassa sabbaññubuddhassa santikā ovādaṃ labhamānā dhammena samena aḍḍaṃ vinicchineyyātha. Etadeva acchariyaṃ, yaṃ pubbe rājāno asabbaññūnampi paṇḍitānaṃ vacanaṃ sutvā dhammena samena aḍḍaṃ vinicchinantā cattāri agatigamanāni vajjetvā dasa rājadhamme akopetvā dhammena rajjaṃ kāretvā saggapuraṃ pūrayamānā agamiṃsū’’ti vatvā tena yācito atītaṃ āhari.

அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ தஸ்ஸ அக்³க³மஹேஸியா குச்சி²ஸ்மிங் படிஸந்தி⁴ங் க³ஹெத்வா லத்³த⁴க³ப்³ப⁴பரிஹாரோ ஸொத்தி²னா மாதுகுச்சி²ம்ஹா நிக்க²மி. நாமக்³க³ஹணதி³வஸே பனஸ்ஸ ‘‘ப்³ரஹ்மத³த்தகுமாரோ’’த்வேவ நாமங் அகங்ஸு. ஸோ அனுபுப்³பே³ன வயப்பத்தோ ஸோளஸவஸ்ஸகாலே தக்கஸிலங் க³ந்த்வா ஸப்³ப³ஸிப்பேஸு நிப்ப²த்திங் பத்வா பிது அச்சயேன ரஜ்ஜே பதிட்டா²ய த⁴ம்மேன ஸமேன ரஜ்ஜங் காரேஸி, ச²ந்தா³தி³வஸேன அக³ந்த்வா வினிச்ச²யங் அனுஸாஸி. தஸ்மிங் ஏவங் த⁴ம்மேன ரஜ்ஜங் காரெந்தே அமச்சாபி த⁴ம்மேனேவ வோஹாரங் வினிச்சி²னிங்ஸு. வோஹாரேஸு த⁴ம்மேன வினிச்ச²யமானேஸு கூடட்³ட³காரகா நாம நாஹேஸுங், தேஸங் அபா⁴வா அட்³ட³த்தா²ய ராஜங்க³ணே உபரவோ பச்சி²ஜ்ஜி. அமச்சா தி³வஸம்பி வினிச்ச²யட்டா²னே நிஸீதி³த்வா கஞ்சி வினிச்ச²யத்தா²ய ஆக³ச்ச²ந்தங் அதி³ஸ்வா உட்டா²ய பக்கமந்தி, வினிச்ச²யட்டா²னங் ச²ட்³டே³தப்³ப³பா⁴வங் பாபுணி.

Atīte bārāṇasiyaṃ brahmadatte rajjaṃ kārente bodhisatto tassa aggamahesiyā kucchismiṃ paṭisandhiṃ gahetvā laddhagabbhaparihāro sotthinā mātukucchimhā nikkhami. Nāmaggahaṇadivase panassa ‘‘brahmadattakumāro’’tveva nāmaṃ akaṃsu. So anupubbena vayappatto soḷasavassakāle takkasilaṃ gantvā sabbasippesu nipphattiṃ patvā pitu accayena rajje patiṭṭhāya dhammena samena rajjaṃ kāresi, chandādivasena agantvā vinicchayaṃ anusāsi. Tasmiṃ evaṃ dhammena rajjaṃ kārente amaccāpi dhammeneva vohāraṃ vinicchiniṃsu. Vohāresu dhammena vinicchayamānesu kūṭaḍḍakārakā nāma nāhesuṃ, tesaṃ abhāvā aḍḍatthāya rājaṅgaṇe uparavo pacchijji. Amaccā divasampi vinicchayaṭṭhāne nisīditvā kañci vinicchayatthāya āgacchantaṃ adisvā uṭṭhāya pakkamanti, vinicchayaṭṭhānaṃ chaḍḍetabbabhāvaṃ pāpuṇi.

போ³தி⁴ஸத்தோ சிந்தேஸி – ‘‘மயி த⁴ம்மேன ரஜ்ஜங் காரெந்தே வினிச்ச²யட்டா²னங் ஆக³ச்ச²ந்தா நாம நத்தி², உபரவோ பச்சி²ஜ்ஜி, வினிச்ச²யட்டா²னங் ச²ட்³டே³தப்³ப³பா⁴வங் பத்தங், இதா³னி மயா அத்தனோ அகு³ணங் பரியேஸிதுங் வட்டதி ‘அயங் நாம மே அகு³ணோ’தி ஸுத்வா தங் பஹாய கு³ணேஸுயேவ வத்திஸ்ஸாமீ’’தி. ததோ பட்டா²ய ‘‘அத்தி² நு கோ² மே கோசி அகு³ணவாதீ³’’தி பரிக்³க³ண்ஹந்தோ அந்தோவளஞ்ஜகானங் அந்தரே கஞ்சி அகு³ணவாதி³ங் அதி³ஸ்வா அத்தனோ கு³ணகத²மேவ ஸுத்வா ‘‘ஏதே மய்ஹங் ப⁴யேனாபி அகு³ணங் அவத்வா கு³ணமேவ வதெ³ய்யு’’ந்தி ப³ஹிவளஞ்ஜனகே பரிக்³க³ண்ஹந்தோ தத்தா²பி அதி³ஸ்வா அந்தோனக³ரே பரிக்³க³ண்ஹி. ப³ஹினக³ரே சதூஸு த்³வாரேஸு சதுகா³மகே பரிக்³க³ண்ஹி. தத்தா²பி கஞ்சி அகு³ணவாதி³ங் அதி³ஸ்வா அத்தனோ கு³ணகத²மேவ ஸுத்வா ‘‘ஜனபத³ங் பரிக்³க³ண்ஹிஸ்ஸாமீ’’தி அமச்சே ரஜ்ஜங் படிச்சா²பெத்வா ரத²ங் ஆருய்ஹ ஸாரதி²மேவ க³ஹெத்வா அஞ்ஞாதகவேஸேன நக³ரா நிக்க²மித்வா ஜனபத³ங் பரிக்³க³ண்ஹமானோ யாவ பச்சந்தபூ⁴மிங் க³ந்த்வா கஞ்சி அகு³ணவாதி³ங் அதி³ஸ்வா அத்தனோ கு³ணகத²மேவ ஸுத்வா பச்சந்தஸீமதோ மஹாமக்³கே³ன நக³ராபி⁴முகோ²யேவ நிவத்தி.

Bodhisatto cintesi – ‘‘mayi dhammena rajjaṃ kārente vinicchayaṭṭhānaṃ āgacchantā nāma natthi, uparavo pacchijji, vinicchayaṭṭhānaṃ chaḍḍetabbabhāvaṃ pattaṃ, idāni mayā attano aguṇaṃ pariyesituṃ vaṭṭati ‘ayaṃ nāma me aguṇo’ti sutvā taṃ pahāya guṇesuyeva vattissāmī’’ti. Tato paṭṭhāya ‘‘atthi nu kho me koci aguṇavādī’’ti pariggaṇhanto antovaḷañjakānaṃ antare kañci aguṇavādiṃ adisvā attano guṇakathameva sutvā ‘‘ete mayhaṃ bhayenāpi aguṇaṃ avatvā guṇameva vadeyyu’’nti bahivaḷañjanake pariggaṇhanto tatthāpi adisvā antonagare pariggaṇhi. Bahinagare catūsu dvāresu catugāmake pariggaṇhi. Tatthāpi kañci aguṇavādiṃ adisvā attano guṇakathameva sutvā ‘‘janapadaṃ pariggaṇhissāmī’’ti amacce rajjaṃ paṭicchāpetvā rathaṃ āruyha sārathimeva gahetvā aññātakavesena nagarā nikkhamitvā janapadaṃ pariggaṇhamāno yāva paccantabhūmiṃ gantvā kañci aguṇavādiṃ adisvā attano guṇakathameva sutvā paccantasīmato mahāmaggena nagarābhimukhoyeva nivatti.

தஸ்மிங் பன காலே ப³ல்லிகோ நாம கோஸலராஜாபி த⁴ம்மேன ரஜ்ஜங் காரெந்தோ அகு³ணகத²ங் க³வேஸந்தோ ஹுத்வா அந்தோவளஞ்ஜகாதீ³ஸு அகு³ணவாதி³ங் அதி³ஸ்வா அத்தனோ கு³ணகத²மேவ ஸுத்வா ஜனபத³ங் பரிக்³க³ண்ஹந்தோ தங் பதே³ஸங் அக³மாஸி. தே உபோ⁴பி ஏகஸ்மிங் நின்னட்டா²னே ஸகடமக்³கே³ அபி⁴முகா² அஹேஸுங், ரத²ஸ்ஸ உக்கமனட்டா²னங் நத்தி². அத² ப³ல்லிகரஞ்ஞோ ஸாரதி² பா³ராணஸிரஞ்ஞோ ஸாரதி²ங் ‘‘தவ ரத²ங் உக்கமாபேஹீ’’தி ஆஹ. ஸோபி ‘‘அம்போ⁴ ஸாரதி², தவ ரத²ங் உக்கமாபேஹி, இமஸ்மிங் ரதே² பா³ராணஸிரஜ்ஜஸாமிகோ ப்³ரஹ்மத³த்தமஹாராஜா நிஸின்னோ’’தி ஆஹ. இதரோபி நங் ‘‘அம்போ⁴ ஸாரதி², இமஸ்மிங் ரதே² கோஸலரஜ்ஜஸாமிகோ ப³ல்லிகமஹாராஜா நிஸின்னோ, தவ ரத²ங் உக்கமாபெத்வா அம்ஹாகங் ரஞ்ஞோ ரத²ஸ்ஸ ஓகாஸங் தே³ஹீ’’தி ஆஹ. பா³ராணஸிரஞ்ஞோ ஸாரதி² ‘‘அயம்பி கிர ராஜாயேவ, கிங் நு கோ² காதப்³ப³’’ந்தி சிந்தெந்தோ ‘‘அத்தே²ஸோ உபாயோ’’தி வயங் புச்சி²த்வா ‘‘த³ஹரஸ்ஸ ரத²ங் உக்கமாபெத்வா மஹல்லகஸ்ஸ ஓகாஸங் தா³பெஸ்ஸாமீ’’தி ஸன்னிட்டா²னங் கத்வா தங் ஸாரதி²ங் கோஸலரஞ்ஞோ வயங் புச்சி²த்வா பரிக்³க³ண்ஹந்தோ உபி⁴ன்னம்பி ஸமானவயபா⁴வங் ஞத்வா ரஜ்ஜபரிமாணங் ப³லங் த⁴னங் யஸங் ஜாதிங் கொ³த்தங் குலபதே³ஸந்தி ஸப்³ப³ங் புச்சி²த்வா ‘‘உபோ⁴பி தியோஜனஸதிகஸ்ஸ ரஜ்ஜஸ்ஸ ஸாமினோ ஸமானப³லத⁴னயஸஜாதிகொ³த்தகுலபதே³ஸா’’தி ஞத்வா ‘‘ஸீலவந்தஸ்ஸ ஓகாஸங் த³ஸ்ஸாமீ’’தி சிந்தெத்வா ‘‘போ⁴ ஸாரதி², தும்ஹாகங் ரஞ்ஞோ ஸீலாசாரோ கீதி³ஸோ’’தி புச்சி². ஸோ ‘‘அயஞ்ச அயஞ்ச அம்ஹாகங் ரஞ்ஞோ ஸீலாசாரோ’’தி அத்தனோ ரஞ்ஞோ அகு³ணமேவ கு³ணதோ பகாஸெந்தோ பட²மங் கா³த²மாஹ –

Tasmiṃ pana kāle balliko nāma kosalarājāpi dhammena rajjaṃ kārento aguṇakathaṃ gavesanto hutvā antovaḷañjakādīsu aguṇavādiṃ adisvā attano guṇakathameva sutvā janapadaṃ pariggaṇhanto taṃ padesaṃ agamāsi. Te ubhopi ekasmiṃ ninnaṭṭhāne sakaṭamagge abhimukhā ahesuṃ, rathassa ukkamanaṭṭhānaṃ natthi. Atha ballikarañño sārathi bārāṇasirañño sārathiṃ ‘‘tava rathaṃ ukkamāpehī’’ti āha. Sopi ‘‘ambho sārathi, tava rathaṃ ukkamāpehi, imasmiṃ rathe bārāṇasirajjasāmiko brahmadattamahārājā nisinno’’ti āha. Itaropi naṃ ‘‘ambho sārathi, imasmiṃ rathe kosalarajjasāmiko ballikamahārājā nisinno, tava rathaṃ ukkamāpetvā amhākaṃ rañño rathassa okāsaṃ dehī’’ti āha. Bārāṇasirañño sārathi ‘‘ayampi kira rājāyeva, kiṃ nu kho kātabba’’nti cintento ‘‘attheso upāyo’’ti vayaṃ pucchitvā ‘‘daharassa rathaṃ ukkamāpetvā mahallakassa okāsaṃ dāpessāmī’’ti sanniṭṭhānaṃ katvā taṃ sārathiṃ kosalarañño vayaṃ pucchitvā pariggaṇhanto ubhinnampi samānavayabhāvaṃ ñatvā rajjaparimāṇaṃ balaṃ dhanaṃ yasaṃ jātiṃ gottaṃ kulapadesanti sabbaṃ pucchitvā ‘‘ubhopi tiyojanasatikassa rajjassa sāmino samānabaladhanayasajātigottakulapadesā’’ti ñatvā ‘‘sīlavantassa okāsaṃ dassāmī’’ti cintetvā ‘‘bho sārathi, tumhākaṃ rañño sīlācāro kīdiso’’ti pucchi. So ‘‘ayañca ayañca amhākaṃ rañño sīlācāro’’ti attano rañño aguṇameva guṇato pakāsento paṭhamaṃ gāthamāha –

‘‘த³ள்ஹங் த³ள்ஹஸ்ஸ கி²பதி, ப³ல்லிகோ முது³னா முது³ங்;

‘‘Daḷhaṃ daḷhassa khipati, balliko mudunā muduṃ;

ஸாது⁴ம்பி ஸாது⁴னா ஜேதி, அஸாது⁴ம்பி அஸாது⁴னா;

Sādhumpi sādhunā jeti, asādhumpi asādhunā;

ஏதாதி³ஸோ அயங் ராஜா, மக்³கா³ உய்யாஹி ஸாரதீ²’’தி.

Etādiso ayaṃ rājā, maggā uyyāhi sārathī’’ti.

தத்த² த³ள்ஹங் த³ள்ஹஸ்ஸ கி²பதீதி யோ த³ள்ஹோ ஹோதி ப³லவத³ள்ஹேன பஹாரேன வா வசனேன வா ஜினிதப்³போ³, தஸ்ஸ த³ள்ஹமேவ பஹாரங் வா வசனங் வா கி²பதி. ஏவங் த³ள்ஹோவ ஹுத்வா தங் ஜினாதீதி த³ஸ்ஸேதி. ப³ல்லிகோதி தஸ்ஸ ரஞ்ஞோ நாமங். முது³னா முது³ந்தி முது³புக்³க³லங் ஸயம்பி முது³ ஹுத்வா முது³னாவ உபாயேன ஜினாதி. ஸாது⁴ம்பி ஸாது⁴னா ஜேதீதி யே ஸாதூ⁴ ஸப்புரிஸா, தே ஸயம்பி ஸாது⁴ ஹுத்வா ஸாது⁴னாவ உபாயேன ஜினாதி. அஸாது⁴ம்பி அஸாது⁴னாதி யே பன அஸாதூ⁴, தே ஸயம்பி அஸாது⁴ ஹுத்வா அஸாது⁴னாவ உபாயேன ஜினாதீதி த³ஸ்ஸேதி. ஏதாதி³ஸோ அயங் ராஜாதி அயங் அம்ஹாகங் கோஸலராஜா ஸீலாசாரேன ஏவரூபோ. மக்³கா³ உய்யாஹி ஸாரதீ²தி அத்தனோ ரத²ங் மக்³கா³ உக்கமாபெத்வா உய்யாஹி, உப்பதே²ன யாஹி, அம்ஹாகங் ரஞ்ஞோ மக்³க³ங் தே³ஹீதி வத³தி.

Tattha daḷhaṃ daḷhassa khipatīti yo daḷho hoti balavadaḷhena pahārena vā vacanena vā jinitabbo, tassa daḷhameva pahāraṃ vā vacanaṃ vā khipati. Evaṃ daḷhova hutvā taṃ jinātīti dasseti. Ballikoti tassa rañño nāmaṃ. Mudunā mudunti mudupuggalaṃ sayampi mudu hutvā mudunāva upāyena jināti. Sādhumpi sādhunā jetīti ye sādhū sappurisā, te sayampi sādhu hutvā sādhunāva upāyena jināti. Asādhumpi asādhunāti ye pana asādhū, te sayampi asādhu hutvā asādhunāva upāyena jinātīti dasseti. Etādiso ayaṃ rājāti ayaṃ amhākaṃ kosalarājā sīlācārena evarūpo. Maggā uyyāhi sārathīti attano rathaṃ maggā ukkamāpetvā uyyāhi, uppathena yāhi, amhākaṃ rañño maggaṃ dehīti vadati.

அத² நங் பா³ராணஸிரஞ்ஞோ ஸாரதி² ‘‘அம்போ⁴, கிங் பன தயா அத்தனோ ரஞ்ஞோ கு³ணகதா² கதி²தா’’தி வத்வா ‘‘ஆமா’’தி வுத்தே ‘‘யதி³ பன ஏதே கு³ணாதி வத³ஸி, அகு³ணா பன கீதி³ஸீ’’தி வத்வா ‘‘ஏதே தாவ அகு³ணா ஹொந்து, தும்ஹாகங் பன ரஞ்ஞோ கீதி³ஸோ கு³ணோ’’தி வுத்தே ‘‘தேன ஹி ஸுணாஹீ’’தி து³தியங் கா³த²மாஹ –

Atha naṃ bārāṇasirañño sārathi ‘‘ambho, kiṃ pana tayā attano rañño guṇakathā kathitā’’ti vatvā ‘‘āmā’’ti vutte ‘‘yadi pana ete guṇāti vadasi, aguṇā pana kīdisī’’ti vatvā ‘‘ete tāva aguṇā hontu, tumhākaṃ pana rañño kīdiso guṇo’’ti vutte ‘‘tena hi suṇāhī’’ti dutiyaṃ gāthamāha –

‘‘அக்கோதே⁴ன ஜினே கோத⁴ங், அஸாது⁴ங் ஸாது⁴னா ஜினே;

‘‘Akkodhena jine kodhaṃ, asādhuṃ sādhunā jine;

ஜினே கத³ரியங் தா³னேன, ஸச்சேனாலிகவாதி³னங்;

Jine kadariyaṃ dānena, saccenālikavādinaṃ;

ஏதாதி³ஸோ அயங் ராஜா, மக்³கா³ உய்யாஹி ஸாரதீ²’’தி.

Etādiso ayaṃ rājā, maggā uyyāhi sārathī’’ti.

தத்த² ஏதாதி³ஸோதி ஏதேஹி ‘‘அக்கோதே⁴ன ஜினே கோத⁴’’ந்திஆதி³வஸேன வுத்தேஹி கு³ணேஹி ஸமன்னாக³தோ. அயஞ்ஹி குத்³த⁴ங் புக்³க³லங் ஸயங் அக்கோதோ⁴ ஹுத்வா அக்கோதே⁴ன ஜினாதி, அஸாது⁴ங் பன ஸயங் ஸாது⁴ ஹுத்வா ஸாது⁴னாவ உபாயேன ஜினாதி, கத³ரியங் த²த்³த⁴மச்ச²ரிங் ஸயங் தா³யகோ ஹுத்வா தா³னேன ஜினாதி. ஸச்சேனாலிகவாதி³னந்தி முஸாவாதி³ங் ஸயங் ஸச்சவாதீ³ ஹுத்வா ஸச்சேன ஜினாதி. மக்³கா³ உய்யாஹி ஸாரதீ²தி, ஸம்ம ஸாரதி², மக்³க³தோ அபக³ச்ச². ஏவங்வித⁴ஸீலாசாரகு³ணயுத்தஸ்ஸ அம்ஹாகங் ரஞ்ஞோ மக்³க³ங் தே³ஹி, அம்ஹாகங் ராஜா மக்³க³ஸ்ஸ அனுச்ச²விகோதி.

Tattha etādisoti etehi ‘‘akkodhena jine kodha’’ntiādivasena vuttehi guṇehi samannāgato. Ayañhi kuddhaṃ puggalaṃ sayaṃ akkodho hutvā akkodhena jināti, asādhuṃ pana sayaṃ sādhu hutvā sādhunāva upāyena jināti, kadariyaṃ thaddhamacchariṃ sayaṃ dāyako hutvā dānena jināti. Saccenālikavādinanti musāvādiṃ sayaṃ saccavādī hutvā saccena jināti. Maggā uyyāhi sārathīti, samma sārathi, maggato apagaccha. Evaṃvidhasīlācāraguṇayuttassa amhākaṃ rañño maggaṃ dehi, amhākaṃ rājā maggassa anucchavikoti.

ஏவங் வுத்தே ப³ல்லிகராஜா ச ஸாரதி² ச உபோ⁴பி ரதா² ஓதரித்வா அஸ்ஸே மோசெத்வா ரத²ங் அபனெத்வா பா³ராணஸிரஞ்ஞோ மக்³க³ங் அத³ங்ஸு. பா³ராணஸிராஜா ப³ல்லிகரஞ்ஞோ ‘‘ரஞ்ஞா நாம இத³ஞ்சித³ஞ்ச காதுங் வட்டதீ’’தி ஓவாத³ங் த³த்வா பா³ராணஸிங் க³ந்த்வா தா³னாதீ³னி புஞ்ஞானி கத்வா ஜீவிதபரியோஸானே ஸக்³க³புரங் பூரேஸி. ப³ல்லிகராஜாபி தஸ்ஸ ஓவாத³ங் க³ஹெத்வா ஜனபத³ங் பரிக்³க³ஹெத்வா அத்தனோ அகு³ணவாதி³ங் அதி³ஸ்வாவ ஸகனக³ரங் க³ந்த்வா தா³னாதீ³னி புஞ்ஞானி கத்வா ஜீவிதபரியோஸானே ஸக்³க³புரமேவ பூரேஸி.

Evaṃ vutte ballikarājā ca sārathi ca ubhopi rathā otaritvā asse mocetvā rathaṃ apanetvā bārāṇasirañño maggaṃ adaṃsu. Bārāṇasirājā ballikarañño ‘‘raññā nāma idañcidañca kātuṃ vaṭṭatī’’ti ovādaṃ datvā bārāṇasiṃ gantvā dānādīni puññāni katvā jīvitapariyosāne saggapuraṃ pūresi. Ballikarājāpi tassa ovādaṃ gahetvā janapadaṃ pariggahetvā attano aguṇavādiṃ adisvāva sakanagaraṃ gantvā dānādīni puññāni katvā jīvitapariyosāne saggapurameva pūresi.

ஸத்தா² கோஸலராஜஸ்ஸ ஓவாத³த்தா²ய இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ ப³ல்லிகரஞ்ஞோ ஸாரதி² மொக்³க³ல்லானோ அஹோஸி, ப³ல்லிகராஜா ஆனந்தோ³, பா³ராணஸிரஞ்ஞோ ஸாரதி² ஸாரிபுத்தோ, பா³ராணஸிராஜா பன அஹமேவ அஹோஸி’’ந்தி.

Satthā kosalarājassa ovādatthāya imaṃ dhammadesanaṃ āharitvā jātakaṃ samodhānesi – ‘‘tadā ballikarañño sārathi moggallāno ahosi, ballikarājā ānando, bārāṇasirañño sārathi sāriputto, bārāṇasirājā pana ahameva ahosi’’nti.

ராஜோவாத³ஜாதகவண்ணனா பட²மா.

Rājovādajātakavaṇṇanā paṭhamā.

Next: [152] 2. ஸிங்கா³லஜாதகவண்ணனா • [152] 2. Siṅgālajātakavaṇṇanā

Related texts:

திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 151. ராஜோவாத³ஜாதகங் • 151. Rājovādajātakaṃ

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact