| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৯. রক্খিতত্থেরগাথাৰণ্ণনা
9. Rakkhitattheragāthāvaṇṇanā
সব্বো রাগো পহীনো মেতি আযস্মতো রক্খিতত্থেরস্স গাথা। কা উপ্পত্তি? অযং কির পদুমুত্তরস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থু ধম্মদেসনং সুত্ৰা পসন্নমানসো দেসনাঞাণং আরব্ভ থোমনং অকাসি। সত্থা তস্স চিত্তপ্পসাদং ওলোকেত্ৰা ‘‘অযং ইতো সতসহস্সকপ্পমত্থকে গোতমস্স নাম সম্মাসম্বুদ্ধস্স রক্খিতো নাম সাৰকো ভৰিস্সতী’’তি ব্যাকাসি । সো তং সুত্ৰা ভিয্যোসোমত্তায পসন্নমানসো অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে দেৰদহনিগমে সাকিযরাজকুলে নিব্বত্তি, রক্খিতোতিস্স নামং অহোসি। সো যে সাকিযকোলিযরাজূহি ভগৰতো পরিৰারত্থায দিন্না পঞ্চসতরাজকুমারা পব্বজিতা, তেসং অঞ্ঞতরো। তে পন রাজকুমারা ন সংৰেগেন পব্বজিতত্তা উক্কণ্ঠাভিভূতা যদা সত্থারা কুণালদহতীরং নেত্ৰা কুণালজাতকদেসনায (জা॰ ২.২১.কুণালজাতক) ইত্থীনং দোসৰিভাৰনেন কামেসু আদীনৰং পকাসেত্ৰা কম্মট্ঠানে নিযোজিতা, তদা অযম্পি কম্মট্ঠানং অনুযুঞ্জন্তো ৰিপস্সনং ৰড্ঢেত্ৰা অরহত্তং পাপুণি। তেন ৰুত্তং অপদানে (অপ॰ থের ১.১৪.১-৯) –
Sabborāgo pahīno meti āyasmato rakkhitattherassa gāthā. Kā uppatti? Ayaṃ kira padumuttarassa bhagavato kāle kulagehe nibbattitvā viññutaṃ patto ekadivasaṃ satthu dhammadesanaṃ sutvā pasannamānaso desanāñāṇaṃ ārabbha thomanaṃ akāsi. Satthā tassa cittappasādaṃ oloketvā ‘‘ayaṃ ito satasahassakappamatthake gotamassa nāma sammāsambuddhassa rakkhito nāma sāvako bhavissatī’’ti byākāsi . So taṃ sutvā bhiyyosomattāya pasannamānaso aparāparaṃ puññāni katvā devamanussesu saṃsaranto imasmiṃ buddhuppāde devadahanigame sākiyarājakule nibbatti, rakkhitotissa nāmaṃ ahosi. So ye sākiyakoliyarājūhi bhagavato parivāratthāya dinnā pañcasatarājakumārā pabbajitā, tesaṃ aññataro. Te pana rājakumārā na saṃvegena pabbajitattā ukkaṇṭhābhibhūtā yadā satthārā kuṇāladahatīraṃ netvā kuṇālajātakadesanāya (jā. 2.21.kuṇālajātaka) itthīnaṃ dosavibhāvanena kāmesu ādīnavaṃ pakāsetvā kammaṭṭhāne niyojitā, tadā ayampi kammaṭṭhānaṃ anuyuñjanto vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 1.14.1-9) –
‘‘পদুমুত্তরো নাম জিনো, লোকজেট্ঠো নরাসভো।
‘‘Padumuttaro nāma jino, lokajeṭṭho narāsabho;
মহতো জনকাযস্স, দেসেতি অমতং পদং॥
Mahato janakāyassa, deseti amataṃ padaṃ.
‘‘তস্সাহং ৰচনং সুত্ৰা, ৰাচাসভিমুদীরিতং।
‘‘Tassāhaṃ vacanaṃ sutvā, vācāsabhimudīritaṃ;
অঞ্জলিং পগ্গহেত্ৰান, একগ্গো আসহং তদা॥
Añjaliṃ paggahetvāna, ekaggo āsahaṃ tadā.
‘‘যথা সমুদ্দো উদধীনমগ্গো, নেরূ নগানং পৰরো সিলুচ্চযো।
‘‘Yathā samuddo udadhīnamaggo, nerū nagānaṃ pavaro siluccayo;
তথেৰ যে চিত্তৰসেন ৰত্তরে, ন বুদ্ধঞাণস্স কলং উপেন্তি তে॥
Tatheva ye cittavasena vattare, na buddhañāṇassa kalaṃ upenti te.
‘‘ধম্মৰিধিং ঠপেত্ৰান, বুদ্ধো কারুণিকো ইসি।
‘‘Dhammavidhiṃ ṭhapetvāna, buddho kāruṇiko isi;
ভিক্খুসঙ্ঘে নিসীদিত্ৰা, ইমা গাথা অভাসথ॥
Bhikkhusaṅghe nisīditvā, imā gāthā abhāsatha.
‘‘যো সো ঞাণং পকিত্তেসি, বুদ্ধম্হি লোকনাযকে।
‘‘Yo so ñāṇaṃ pakittesi, buddhamhi lokanāyake;
কপ্পানং সতসহস্সং, দুগ্গতিং ন গমিস্সতি॥
Kappānaṃ satasahassaṃ, duggatiṃ na gamissati.
‘‘কিলেসে ঝাপযিত্ৰান, একগ্গো সুসমাহিতো।
‘‘Kilese jhāpayitvāna, ekaggo susamāhito;
সোভিতো নাম নামেন, হেস্সতি সত্থু সাৰকো॥
Sobhito nāma nāmena, hessati satthu sāvako.
‘‘পঞ্ঞাসে কপ্পসহস্সে, সত্তেৰাসুং যসুগ্গতা।
‘‘Paññāse kappasahasse, sattevāsuṃ yasuggatā;
সত্তরতনসম্পন্না, চক্কৰত্তী মহব্বলা॥
Sattaratanasampannā, cakkavattī mahabbalā.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা অত্তনো পহীনকিলেসে পচ্চৰেক্খন্তো ‘‘সব্বো রাগো’’তি গাথং অভাসি।
Arahattaṃ pana patvā attano pahīnakilese paccavekkhanto ‘‘sabbo rāgo’’ti gāthaṃ abhāsi.
৭৯. তত্থ ‘‘সব্বো রাগো’’তি কামরাগাদিপ্পভেদো সব্বোপি রাগো। পহীনোতি অরিযমগ্গভাৰনায সমুচ্ছেদপ্পহানৰসেন পহীনো। সব্বো দোসোতি আঘাতৰত্থুকাদিভাৰেন অনেকভেদভিন্নো সব্বোপি ব্যাপাদো। সমূহতোতি মগ্গেন সমুগ্ঘাটিতো। সব্বো মে ৰিগতো মোহোতি ‘‘দুক্খে অঞ্ঞাণ’’ন্তিআদিনা (ধ॰ স॰ ১০৬৭; ৰিভ॰ ৯০৯) ৰত্থুভেদেন অট্ঠভেদো, সংকিলেসৰত্থুৰিভাগেন অনেকৰিভাগো সব্বোপি মোহো মগ্গেন ৰিদ্ধংসিতত্তা ময্হং ৰিগতো। সীতিভূতোস্মি নিব্বুতোতি এৰং মূলকিলেসপ্পহানেন তদেকট্ঠতায সংকিলেসানং সম্মদেৰ পটিপ্পস্সদ্ধত্তা অনৰসেসকিলেসদরথপরিল়াহাভাৰতো সীতিভাৰং পত্তো, ততো এৰ সব্বসো কিলেসপরিনিব্বানেন পরিনিব্বুতো অহং অস্মি ভৰামীতি অঞ্ঞং ব্যাকাসি।
79. Tattha ‘‘sabbo rāgo’’ti kāmarāgādippabhedo sabbopi rāgo. Pahīnoti ariyamaggabhāvanāya samucchedappahānavasena pahīno. Sabbo dosoti āghātavatthukādibhāvena anekabhedabhinno sabbopi byāpādo. Samūhatoti maggena samugghāṭito. Sabbo me vigato mohoti ‘‘dukkhe aññāṇa’’ntiādinā (dha. sa. 1067; vibha. 909) vatthubhedena aṭṭhabhedo, saṃkilesavatthuvibhāgena anekavibhāgo sabbopi moho maggena viddhaṃsitattā mayhaṃ vigato. Sītibhūtosmi nibbutoti evaṃ mūlakilesappahānena tadekaṭṭhatāya saṃkilesānaṃ sammadeva paṭippassaddhattā anavasesakilesadarathapariḷāhābhāvato sītibhāvaṃ patto, tato eva sabbaso kilesaparinibbānena parinibbuto ahaṃ asmi bhavāmīti aññaṃ byākāsi.
রক্খিতত্থেরগাথাৰণ্ণনা নিট্ঠিতা।
Rakkhitattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৯. রক্খিতত্থেরগাথা • 9. Rakkhitattheragāthā
