| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৯. রামণেয্যকত্থেরগাথাৰণ্ণনা
9. Rāmaṇeyyakattheragāthāvaṇṇanā
চিহচিহাভিনদিতেতি আযস্মতো রামণেয্যকত্থেরস্স গাথা। কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সিখিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো ভগৰন্তং দিস্ৰা পসন্নমানসো পুপ্ফেহি পূজং অকাসি। সো তেন পুঞ্ঞকম্মেন দেৰলোকে নিব্বত্তো অপরাপরং পুঞ্ঞানি কত্ৰা সুগতীসু এৰ পরিৰত্তেন্তো ইমস্মিং বুদ্ধুপ্পাদে সাৰত্থিযং ইব্ভকুলে নিব্বত্তিত্ৰা ৰযপ্পত্তো জেতৰনপটিগ্গহণে সঞ্জাতপ্পসাদো পব্বজিত্ৰা চরিযানুকূলং কম্মট্ঠানং গহেত্ৰা অরঞ্ঞে ৰিহরতি। তস্স অত্তনো সম্পত্তিযা পব্বজিতসারুপ্পায চ পটিপত্তিযা পাসাদিকভাৰতো রামণেয্যকোত্ৰেৰ সমঞ্ঞা অহোসি । অথেকদিৰসং মারো থেরং ভিংসাপেতুকামো ভেরৰসদ্দং অকাসি। তং সুত্ৰা থেরো থিরপকতিতায তেন অসন্তসন্তো ‘‘মারো অয’’ন্তি ঞত্ৰা তত্থ অনাদরং দস্সেন্তো ‘‘চিহচিহাভিনদিতে’’তি গাথং অভাসি।
Cihacihābhinaditeti āyasmato rāmaṇeyyakattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinanto sikhissa bhagavato kāle kulagehe nibbattitvā viññutaṃ patto bhagavantaṃ disvā pasannamānaso pupphehi pūjaṃ akāsi. So tena puññakammena devaloke nibbatto aparāparaṃ puññāni katvā sugatīsu eva parivattento imasmiṃ buddhuppāde sāvatthiyaṃ ibbhakule nibbattitvā vayappatto jetavanapaṭiggahaṇe sañjātappasādo pabbajitvā cariyānukūlaṃ kammaṭṭhānaṃ gahetvā araññe viharati. Tassa attano sampattiyā pabbajitasāruppāya ca paṭipattiyā pāsādikabhāvato rāmaṇeyyakotveva samaññā ahosi . Athekadivasaṃ māro theraṃ bhiṃsāpetukāmo bheravasaddaṃ akāsi. Taṃ sutvā thero thirapakatitāya tena asantasanto ‘‘māro aya’’nti ñatvā tattha anādaraṃ dassento ‘‘cihacihābhinadite’’ti gāthaṃ abhāsi.
৪৯. তত্থ চিহচিহাভিনদিতেতি চিহচিহাতি অভিণ্হং পৰত্তসদ্দতায ‘‘চিহচিহা’’তি লদ্ধনামানং ৰট্টকানং অভিনাদনিমিত্তং, ৰিরৰহেতূতি অত্থো। সিপ্পিকাভিরুতেহি চাতি সিপ্পিকা ৰুচ্চন্তি দেৰকা পরনামকা গেলঞ্ঞেন ছাতকিসদারকাকারা সাখামিগা। ‘‘মহাকলন্দকা’’তি কেচি, সিপ্পিকানং অভিরুতেহি মহাৰিরৰেহি, হেতুম্হি চেতং করণৰচনং, তং হেতূতি অত্থো। ন মে তং ফন্দতি চিত্তন্তি মম চিত্তং ন ফন্দতি ন চৰতি। ইদং ৰুত্তং হোতি – ইমস্মিং অরঞ্ঞে ৰিরৰহেতু সিপ্পিকাভিরুতহেতু ৰিয, পাপিম, তৰ ৰিস্সরকরণহেতু মম চিত্তং কম্মট্ঠানতো ন পরিপততীতি। তত্থ কারণমাহ ‘‘একত্তনিরতঞ্হি মে’’তি। হি-সদ্দো হেতু অত্থো, যস্মা মম চিত্তং গণসঙ্গণিকং পহায একত্তে একীভাৰে, বহিদ্ধা ৰা ৰিক্খেপং পহায একত্তে একগ্গতায, একত্তে একসভাৰে ৰা নিব্বানে নিরতং অভিরতং, তস্মা কম্মট্ঠানতো ন ফন্দতি ন চৰতীতি, ইমং কির গাথং ৰদন্তো এৰ থেরো ৰিপস্সনং ৰড্ঢেত্ৰা অরহত্তং পাপুণি। তেন ৰুত্তং অপদানে (অপ॰ থের ১.২১.৫-৯) –
49. Tattha cihacihābhinaditeti cihacihāti abhiṇhaṃ pavattasaddatāya ‘‘cihacihā’’ti laddhanāmānaṃ vaṭṭakānaṃ abhinādanimittaṃ, viravahetūti attho. Sippikābhirutehi cāti sippikā vuccanti devakā paranāmakā gelaññena chātakisadārakākārā sākhāmigā. ‘‘Mahākalandakā’’ti keci, sippikānaṃ abhirutehi mahāviravehi, hetumhi cetaṃ karaṇavacanaṃ, taṃ hetūti attho. Na me taṃ phandati cittanti mama cittaṃ na phandati na cavati. Idaṃ vuttaṃ hoti – imasmiṃ araññe viravahetu sippikābhirutahetu viya, pāpima, tava vissarakaraṇahetu mama cittaṃ kammaṭṭhānato na paripatatīti. Tattha kāraṇamāha ‘‘ekattaniratañhi me’’ti. Hi-saddo hetu attho, yasmā mama cittaṃ gaṇasaṅgaṇikaṃ pahāya ekatte ekībhāve, bahiddhā vā vikkhepaṃ pahāya ekatte ekaggatāya, ekatte ekasabhāve vā nibbāne nirataṃ abhirataṃ, tasmā kammaṭṭhānato na phandati na cavatīti, imaṃ kira gāthaṃ vadanto eva thero vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 1.21.5-9) –
‘‘সুৰণ্ণৰণ্ণো ভগৰা, সতরংসী পতাপৰা।
‘‘Suvaṇṇavaṇṇo bhagavā, sataraṃsī patāpavā;
চঙ্কমনং সমারূল়্হো, মেত্তচিত্তো সিখীসভো॥
Caṅkamanaṃ samārūḷho, mettacitto sikhīsabho.
‘‘পসন্নচিত্তো সুমনো, ৰন্দিত্ৰা ঞাণমুত্তমং।
‘‘Pasannacitto sumano, vanditvā ñāṇamuttamaṃ;
মিনেলপুপ্ফং পগ্গয্হ, বুদ্ধস্স অভিরোপযিং॥
Minelapupphaṃ paggayha, buddhassa abhiropayiṃ.
‘‘একতিংসে ইতো কপ্পে, যং পুপ্ফমভিপূজযিং।
‘‘Ekatiṃse ito kappe, yaṃ pupphamabhipūjayiṃ;
দুগ্গতিং নাভিজানামি, বুদ্ধপূজাযিদং ফলং॥
Duggatiṃ nābhijānāmi, buddhapūjāyidaṃ phalaṃ.
‘‘একূনতিংসকপ্পম্হি, সুমেঘঘননামকো।
‘‘Ekūnatiṃsakappamhi, sumeghaghananāmako;
সত্তরতনসম্পন্নো, চক্কৰত্তী মহব্বলো॥
Sattaratanasampanno, cakkavattī mahabbalo.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অযমেৰ চ থেরস্স অঞ্ঞাব্যাকরণগাথা অহোসি।
Ayameva ca therassa aññābyākaraṇagāthā ahosi.
রামণেয্যকত্থেরগাথাৰণ্ণনা নিট্ঠিতা।
Rāmaṇeyyakattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৯. রামণেয্যকত্থেরগাথা • 9. Rāmaṇeyyakattheragāthā
