| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. ரங்ஸிஸஞ்ஞகத்தே²ரஅபதா³னவண்ணனா
5. Raṃsisaññakattheraapadānavaṇṇanā
பப்³ப³தே ஹிமவந்தம்ஹீதிஆதி³கங் ஆயஸ்மதோ ரங்ஸிஸஞ்ஞகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தேஸு தேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴மன்வாய க⁴ராவாஸங் ஸண்ட²பெத்வா காமேஸு ஆதீ³னவங் தி³ஸ்வா க⁴ராவாஸங் பஹாய தாபஸபப்³ப³ஜ்ஜங் பப்³ப³ஜித்வா அஜினசம்மத⁴ரோ ஹிமவந்தம்ஹி வாஸங் கப்பேஸி. தஸ்மிங் ஸமயே விபஸ்ஸீ ப⁴க³வா ஹிமவந்தமக³மாஸி. அத² ஸோ தாபஸோ தமுபக³தங் ப⁴க³வந்தங் தி³ஸ்வா தஸ்ஸ ப⁴க³வதோ ஸரீரதோ நிக்க²ந்தச²ப்³ப³ண்ணபு³த்³த⁴ரங்ஸீஸு பஸீதி³த்வா அஞ்ஜலிங் பக்³க³ய்ஹ பஞ்சங்கே³ன நமக்காரமகாஸி. ஸோ தேனேவ புஞ்ஞேன இதோ சுதோ துஸிதாதீ³ஸு தி³ப்³ப³ஸம்பத்தியோ அனுப⁴வித்வா அபரபா⁴கே³ மனுஸ்ஸஸம்பத்தியோ ச அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴மன்வாய க⁴ராவாஸங் ஸண்ட²பெத்வா தத்தா²தீ³னவங் தி³ஸ்வா கே³ஹங் பஹாய பப்³ப³ஜித்வா நசிரஸ்ஸேவ அரஹா அஹோஸி.
Pabbate himavantamhītiādikaṃ āyasmato raṃsisaññakattherassa apadānaṃ. Ayampi purimabuddhesu katādhikāro tesu tesu bhavesu vivaṭṭūpanissayāni puññāni upacinanto vipassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā kāmesu ādīnavaṃ disvā gharāvāsaṃ pahāya tāpasapabbajjaṃ pabbajitvā ajinacammadharo himavantamhi vāsaṃ kappesi. Tasmiṃ samaye vipassī bhagavā himavantamagamāsi. Atha so tāpaso tamupagataṃ bhagavantaṃ disvā tassa bhagavato sarīrato nikkhantachabbaṇṇabuddharaṃsīsu pasīditvā añjaliṃ paggayha pañcaṅgena namakkāramakāsi. So teneva puññena ito cuto tusitādīsu dibbasampattiyo anubhavitvā aparabhāge manussasampattiyo ca anubhavitvā imasmiṃ buddhuppāde kulagehe nibbatto vuddhimanvāya gharāvāsaṃ saṇṭhapetvā tatthādīnavaṃ disvā gehaṃ pahāya pabbajitvā nacirasseva arahā ahosi.
30. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பப்³ப³தே ஹிமவந்தம்ஹீதிஆதி³மாஹ. தத்த² பப்³ப³தேதி பகாரேன ப்³ரூஹதி வட்³டே⁴தீதி பப்³ப³தோ, ஹிமோ அஸ்ஸ அத்தீ²தி ஹிமவந்தோ, ஹிமவந்தோ ச ஸோ பப்³ப³தோ சாதி ஹிமவந்தபப்³ப³தோ. ஹிமவந்தபப்³ப³தேதி வத்தப்³பே³ கா³தா²வசனஸுக²த்த²ங் ‘‘பப்³ப³தே ஹிமவந்தம்ஹீ’’தி வுத்தங். தஸ்மிங் ஹிமவந்தம்ஹி பப்³ப³தே வாஸங் கப்பேஸிங் புரே அஹந்தி ஸம்ப³ந்தோ⁴. ஸேஸங் ஸப்³ப³த்த² நயானுஸாரேன உத்தானமேவாதி.
30. So aparabhāge attano pubbakammaṃ saritvā somanassajāto pubbacaritāpadānaṃ pakāsento pabbate himavantamhītiādimāha. Tattha pabbateti pakārena brūhati vaḍḍhetīti pabbato, himo assa atthīti himavanto, himavanto ca so pabbato cāti himavantapabbato. Himavantapabbateti vattabbe gāthāvacanasukhatthaṃ ‘‘pabbate himavantamhī’’ti vuttaṃ. Tasmiṃ himavantamhi pabbate vāsaṃ kappesiṃ pure ahanti sambandho. Sesaṃ sabbattha nayānusārena uttānamevāti.
ரங்ஸிஸஞ்ஞகத்தே²ரஅபதா³னவண்ணனா ஸமத்தா.
Raṃsisaññakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 5. ரங்ஸிஸஞ்ஞகத்தே²ரஅபதா³னங் • 5. Raṃsisaññakattheraapadānaṃ
