| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
12. රාසියසුත්‌තං
12. Rāsiyasuttaṃ
364. අථ ඛො රාසියො ගාමණි යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො රාසියො ගාමණි භගවන්‌තං එතදවොච – ‘‘සුතං මෙතං, භන්‌තෙ, ‘සමණො ගොතමො සබ්‌බං තපං ගරහති, සබ්‌බං තපස්‌සිං ලූඛජීවිං එකංසෙන උපවදති උපක්‌කොසතී’ති 1. යෙ තෙ, භන්‌තෙ, එවමාහංසු – ‘සමණො ගොතමො සබ්‌බං තපං ගරහති, සබ්‌බං තපස්‌සිං ලූඛජීවිං එකංසෙන උපවදති උපක්‌කොසතී’ති, කච්‌චි තෙ, භන්‌තෙ, භගවතො වුත්‌තවාදිනො, න ච භගවන්‌තං අභූතෙන අබ්‌භාචික්‌ඛන්‌ති, ධම්‌මස්‌ස චානුධම්‌මං බ්‍යාකරොන්‌ති, න ච කොචි සහධම්‌මිකො වාදානුවාදො ගාරය්‌හං ඨානං ආගච්‌ඡතී’’ති? ‘‘යෙ තෙ, ගාමණි, එවමාහංසු – ‘සමණො ගොතමො සබ්‌බං තපං ගරහති, සබ්‌බං තපස්‌සිං ලූඛජීවිං එකංසෙන උපවදති උපක්‌කොසතී’ති, න මෙ තෙ වුත්‌තවාදිනො, අබ්‌භාචික්‌ඛන්‌ති ච පන මං තෙ අසතා තුච්‌ඡා අභූතෙන’’.
364. Atha kho rāsiyo gāmaṇi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rāsiyo gāmaṇi bhagavantaṃ etadavoca – ‘‘sutaṃ metaṃ, bhante, ‘samaṇo gotamo sabbaṃ tapaṃ garahati, sabbaṃ tapassiṃ lūkhajīviṃ ekaṃsena upavadati upakkosatī’ti 2. Ye te, bhante, evamāhaṃsu – ‘samaṇo gotamo sabbaṃ tapaṃ garahati, sabbaṃ tapassiṃ lūkhajīviṃ ekaṃsena upavadati upakkosatī’ti, kacci te, bhante, bhagavato vuttavādino, na ca bhagavantaṃ abhūtena abbhācikkhanti, dhammassa cānudhammaṃ byākaronti, na ca koci sahadhammiko vādānuvādo gārayhaṃ ṭhānaṃ āgacchatī’’ti? ‘‘Ye te, gāmaṇi, evamāhaṃsu – ‘samaṇo gotamo sabbaṃ tapaṃ garahati, sabbaṃ tapassiṃ lūkhajīviṃ ekaṃsena upavadati upakkosatī’ti, na me te vuttavādino, abbhācikkhanti ca pana maṃ te asatā tucchā abhūtena’’.
‘‘ද්‌වෙමෙ, ගාමණි, අන්‌තා පබ්‌බජිතෙන න සෙවිතබ්‌බා – යො චායං කාමෙසු කාමසුඛල්‌ලිකානුයොගො හීනො ගම්‌මො පොථුජ්‌ජනිකො අනරියො අනත්‌ථසංහිතො, යො චායං අත්‌තකිලමථානුයොගො දුක්‌ඛො අනරියො අනත්‌ථසංහිතො. එතෙ තෙ, ගාමණි, උභො අන්‌තෙ අනුපගම්‌ම මජ්‌ඣිමා පටිපදා තථාගතෙන අභිසම්‌බුද්‌ධා – චක්‌ඛුකරණී ඤාණකරණී උපසමාය අභිඤ්‌ඤාය සම්‌බොධාය නිබ්‌බානාය සංවත්‌තති. කතමා ච සා, ගාමණි, මජ්‌ඣිමා පටිපදා තථාගතෙන අභිසම්‌බුද්‌ධා – චක්‌ඛුකරණී ඤාණකරණී උපසමාය අභිඤ්‌ඤාය සම්‌බොධාය නිබ්‌බානාය සංවත්‌තති? අයමෙව අරියො අට්‌ඨඞ්‌ගිකො මග්‌ගො, සෙය්‍යථිදං – සම්‌මාදිට්‌ඨි…පෙ.… සම්‌මාසමාධි. අයං ඛො සා, ගාමණි, මජ්‌ඣිමා පටිපදා තථාගතෙන අභිසම්‌බුද්‌ධා – චක්‌ඛුකරණී ඤාණකරණී උපසමාය අභිඤ්‌ඤාය සම්‌බොධාය නිබ්‌බානාය සංවත්‌තති.
‘‘Dveme, gāmaṇi, antā pabbajitena na sevitabbā – yo cāyaṃ kāmesu kāmasukhallikānuyogo hīno gammo pothujjaniko anariyo anatthasaṃhito, yo cāyaṃ attakilamathānuyogo dukkho anariyo anatthasaṃhito. Ete te, gāmaṇi, ubho ante anupagamma majjhimā paṭipadā tathāgatena abhisambuddhā – cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati. Katamā ca sā, gāmaṇi, majjhimā paṭipadā tathāgatena abhisambuddhā – cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati? Ayameva ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhi. Ayaṃ kho sā, gāmaṇi, majjhimā paṭipadā tathāgatena abhisambuddhā – cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati.
‘‘තයො ඛො මෙ, ගාමණි, කාමභොගිනො සන්‌තො සංවිජ්‌ජමානා ලොකස්‌මිං. කතමෙ තයො? ඉධ, ගාමණි, එකච්‌චො කාමභොගී අධම්‌මෙන භොගෙ පරියෙසති, සාහසෙන අධම්‌මෙන භොගෙ පරියෙසිත්‌වා සාහසෙන න අත්‌තානං සුඛෙති න පීණෙති න සංවිභජති න පුඤ්‌ඤානි කරොති. ඉධ පන, ගාමණි, එකච්‌චො කාමභොගී අධම්‌මෙන භොගෙ පරියෙසති සාහසෙන. අධම්‌මෙන භොගෙ පරියෙසිත්‌වා සාහසෙන අත්‌තානං සුඛෙති පීණෙති, න සංවිභජති න පුඤ්‌ඤානි කරොති. ඉධ පන, ගාමණි, එකච්‌චො කාමභොගී අධම්‌මෙන භොගෙ පරියෙසති සාහසෙන. අධම්‌මෙන භොගෙ පරියෙසිත්‌වා සාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති.
‘‘Tayo kho me, gāmaṇi, kāmabhogino santo saṃvijjamānā lokasmiṃ. Katame tayo? Idha, gāmaṇi, ekacco kāmabhogī adhammena bhoge pariyesati, sāhasena adhammena bhoge pariyesitvā sāhasena na attānaṃ sukheti na pīṇeti na saṃvibhajati na puññāni karoti. Idha pana, gāmaṇi, ekacco kāmabhogī adhammena bhoge pariyesati sāhasena. Adhammena bhoge pariyesitvā sāhasena attānaṃ sukheti pīṇeti, na saṃvibhajati na puññāni karoti. Idha pana, gāmaṇi, ekacco kāmabhogī adhammena bhoge pariyesati sāhasena. Adhammena bhoge pariyesitvā sāhasena attānaṃ sukheti pīṇeti saṃvibhajati puññāni karoti.
‘‘ඉධ පන, ගාමණි, එකච්‌චො කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි. ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි න අත්‌තානං සුඛෙති, න පීණෙති, න සංවිභජති, න පුඤ්‌ඤානි කරොති. ඉධ පන, ගාමණි, එකච්‌චො කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි. ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි අත්‌තානං සුඛෙති පීණෙති, න සංවිභජති, න පුඤ්‌ඤානි කරොති. ඉධ පන, ගාමණි, එකච්‌චො කාමභොගී ධම්‌මාධම්‌මෙන භොගෙ පරියෙසති, සාහසෙනපි අසාහසෙනපි . ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි අත්‌තානං සුඛෙති පීණෙති සංවිභජති පුඤ්‌ඤානි කරොති.
‘‘Idha pana, gāmaṇi, ekacco kāmabhogī dhammādhammena bhoge pariyesati sāhasenapi asāhasenapi. Dhammādhammena bhoge pariyesitvā sāhasenapi asāhasenapi na attānaṃ sukheti, na pīṇeti, na saṃvibhajati, na puññāni karoti. Idha pana, gāmaṇi, ekacco kāmabhogī dhammādhammena bhoge pariyesati sāhasenapi asāhasenapi. Dhammādhammena bhoge pariyesitvā sāhasenapi asāhasenapi attānaṃ sukheti pīṇeti, na saṃvibhajati, na puññāni karoti. Idha pana, gāmaṇi, ekacco kāmabhogī dhammādhammena bhoge pariyesati, sāhasenapi asāhasenapi . Dhammādhammena bhoge pariyesitvā sāhasenapi asāhasenapi attānaṃ sukheti pīṇeti saṃvibhajati puññāni karoti.
‘‘ඉධ පන, ගාමණි, එකච්‌චො කාමභොගී ධම්‌මෙන භොගෙ පරියෙසති අසාහසෙන. ධම්‌මෙන භොගෙ පරියෙසිත්‌වා අසාහසෙන න අත්‌තානං සුඛෙති, න පීණෙති, න සංවිභජති, න පුඤ්‌ඤානි කරොති. ඉධ පන, ගාමණි, එකච්‌චො කාමභොගී ධම්‌මෙන භොගෙ පරියෙසති අසාහසෙන. ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති, න සංවිභජති, න පුඤ්‌ඤානි කරොති. ඉධ පන, ගාමණි, එකච්‌චො කාමභොගී ධම්‌මෙන භොගෙ පරියෙසති අසාහසෙන. ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති. තෙ ච භොගෙ ගධිතො 3 මුච්‌ඡිතො අජ්‌ඣොපන්‌නො අනාදීනවදස්‌සාවී අනිස්‌සරණපඤ්‌ඤො පරිභුඤ්‌ජති. ඉධ පන, ගාමණි, එකච්‌චො කාමභොගී ධම්‌මෙන භොගෙ පරියෙසති අසාහසෙන. ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති. තෙ ච භොගෙ අගධිතො අමුච්‌ඡිතො අනජ්‌ඣොපන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජති.
‘‘Idha pana, gāmaṇi, ekacco kāmabhogī dhammena bhoge pariyesati asāhasena. Dhammena bhoge pariyesitvā asāhasena na attānaṃ sukheti, na pīṇeti, na saṃvibhajati, na puññāni karoti. Idha pana, gāmaṇi, ekacco kāmabhogī dhammena bhoge pariyesati asāhasena. Dhammena bhoge pariyesitvā asāhasena attānaṃ sukheti pīṇeti, na saṃvibhajati, na puññāni karoti. Idha pana, gāmaṇi, ekacco kāmabhogī dhammena bhoge pariyesati asāhasena. Dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti. Te ca bhoge gadhito 4 mucchito ajjhopanno anādīnavadassāvī anissaraṇapañño paribhuñjati. Idha pana, gāmaṇi, ekacco kāmabhogī dhammena bhoge pariyesati asāhasena. Dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti. Te ca bhoge agadhito amucchito anajjhopanno ādīnavadassāvī nissaraṇapañño paribhuñjati.
‘‘තත්‍ර , ගාමණි, ය්‌වායං කාමභොගී අධම්‌මෙන භොගෙ පරියෙසති සාහසෙන, අධම්‌මෙන භොගෙ පරියෙසිත්‌වා සාහසෙන න අත්‌තානං සුඛෙති, න පීණෙති, න සංවිභජති, න පුඤ්‌ඤානි කරොති. අයං, ගාමණි, කාමභොගී තීහි ඨානෙහි ගාරය්‌හො. කතමෙහි තීහි ඨානෙහි ගාරය්‌හො? අධම්‌මෙන භොගෙ පරියෙසති සාහසෙනාති, ඉමිනා පඨමෙන ඨානෙන ගාරය්‌හො. න අත්‌තානං සුඛෙති න පීණෙතීති, ඉමිනා දුතියෙන ඨානෙන ගාරය්‌හො. න සංවිභජති, න පුඤ්‌ඤානි කරොතීති, ඉමිනා තතියෙන ඨානෙන ගාරය්‌හො. අයං, ගාමණි, කාමභොගී ඉමෙහි තීහි ඨානෙහි ගාරය්‌හො.
‘‘Tatra , gāmaṇi, yvāyaṃ kāmabhogī adhammena bhoge pariyesati sāhasena, adhammena bhoge pariyesitvā sāhasena na attānaṃ sukheti, na pīṇeti, na saṃvibhajati, na puññāni karoti. Ayaṃ, gāmaṇi, kāmabhogī tīhi ṭhānehi gārayho. Katamehi tīhi ṭhānehi gārayho? Adhammena bhoge pariyesati sāhasenāti, iminā paṭhamena ṭhānena gārayho. Na attānaṃ sukheti na pīṇetīti, iminā dutiyena ṭhānena gārayho. Na saṃvibhajati, na puññāni karotīti, iminā tatiyena ṭhānena gārayho. Ayaṃ, gāmaṇi, kāmabhogī imehi tīhi ṭhānehi gārayho.
‘‘තත්‍ර, ගාමණි, ය්‌වායං කාමභොගී අධම්‌මෙන භොගෙ පරියෙසති සාහසෙන, අධම්‌මෙන භොගෙ පරියෙසිත්‌වා සාහසෙන අත්‌තානං සුඛෙති පීණෙති, න සංවිභජති, න පුඤ්‌ඤානි කරොති. අයං, ගාමණි, කාමභොගී ද්‌වීහි ඨානෙහි ගාරය්‌හො, එකෙන ඨානෙන පාසංසො. කතමෙහි ද්‌වීහි ඨානෙහි ගාරය්‌හො? අධම්‌මෙන භොගෙ පරියෙසති සාහසෙනාති, ඉමිනා පඨමෙන ඨානෙන ගාරය්‌හො. න සංවිභජති, න පුඤ්‌ඤානි කරොතීති, ඉමිනා දුතියෙන ඨානෙන ගාරය්‌හො. කතමෙන එකෙන ඨානෙන පාසංසො? අත්‌තානං සුඛෙති පීණෙතීති, ඉමිනා එකෙන ඨානෙන පාසංසො. අයං, ගාමණි, කාමභොගී ඉමෙහි ද්‌වීහි ඨානෙහි ගාරය්‌හො, ඉමිනා එකෙන ඨානෙන පාසංසො.
‘‘Tatra, gāmaṇi, yvāyaṃ kāmabhogī adhammena bhoge pariyesati sāhasena, adhammena bhoge pariyesitvā sāhasena attānaṃ sukheti pīṇeti, na saṃvibhajati, na puññāni karoti. Ayaṃ, gāmaṇi, kāmabhogī dvīhi ṭhānehi gārayho, ekena ṭhānena pāsaṃso. Katamehi dvīhi ṭhānehi gārayho? Adhammena bhoge pariyesati sāhasenāti, iminā paṭhamena ṭhānena gārayho. Na saṃvibhajati, na puññāni karotīti, iminā dutiyena ṭhānena gārayho. Katamena ekena ṭhānena pāsaṃso? Attānaṃ sukheti pīṇetīti, iminā ekena ṭhānena pāsaṃso. Ayaṃ, gāmaṇi, kāmabhogī imehi dvīhi ṭhānehi gārayho, iminā ekena ṭhānena pāsaṃso.
‘‘තත්‍ර, ගාමණි, ය්‌වායං කාමභොගී අධම්‌මෙන භොගෙ පරියෙසති සාහසෙන, අධම්‌මෙන භොගෙ පරියෙසිත්‌වා සාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති. අයං, ගාමණි, කාමභොගී එකෙන ඨානෙන ගාරය්‌හො, ද්‌වීහි ඨානෙහි පාසංසො. කතමෙන එකෙන ඨානෙන ගාරය්‌හො? අධම්‌මෙන භොගෙ පරියෙසති සාහසෙනාති, ඉමිනා එකෙන ඨානෙන ගාරය්‌හො. කතමෙහි ද්‌වීහි ඨානෙහි පාසංසො? අත්‌තානං සුඛෙති පීණෙතීති, ඉමිනා පඨමෙන ඨානෙන පාසංසො. සංවිභජති පුඤ්‌ඤානි කරොතීති, ඉමිනා දුතියෙන ඨානෙන පාසංසො. අයං, ගාමණි, කාමභොගී, ඉමිනා එකෙන ඨානෙන ගාරය්‌හො, ඉමෙහි ද්‌වීහි ඨානෙහි පාසංසො.
‘‘Tatra, gāmaṇi, yvāyaṃ kāmabhogī adhammena bhoge pariyesati sāhasena, adhammena bhoge pariyesitvā sāhasena attānaṃ sukheti pīṇeti saṃvibhajati puññāni karoti. Ayaṃ, gāmaṇi, kāmabhogī ekena ṭhānena gārayho, dvīhi ṭhānehi pāsaṃso. Katamena ekena ṭhānena gārayho? Adhammena bhoge pariyesati sāhasenāti, iminā ekena ṭhānena gārayho. Katamehi dvīhi ṭhānehi pāsaṃso? Attānaṃ sukheti pīṇetīti, iminā paṭhamena ṭhānena pāsaṃso. Saṃvibhajati puññāni karotīti, iminā dutiyena ṭhānena pāsaṃso. Ayaṃ, gāmaṇi, kāmabhogī, iminā ekena ṭhānena gārayho, imehi dvīhi ṭhānehi pāsaṃso.
‘‘තත්‍ර, ගාමණි, ය්‌වායං කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි, ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි න අත්‌තානං සුඛෙති, න පීණෙති, න සංවිභජති, න පුඤ්‌ඤානි කරොති. අයං, ගාමණි, කාමභොගී එකෙන ඨානෙන පාසංසො, තීහි ඨානෙහි ගාරය්‌හො. කතමෙන එකෙන ඨානෙන පාසංසො? ධම්‌මෙන භොගෙ පරියෙසති අසාහසෙනාති, ඉමිනා එකෙන ඨානෙන පාසංසො. කතමෙහි තීහි ඨානෙහි ගාරය්‌හො? අධම්‌මෙන භොගෙ පරියෙසති සාහසෙනාති, ඉමිනා පඨමෙන ඨානෙන ගාරය්‌හො. න අත්‌තානං සුඛෙති, න පීණෙතීති, ඉමිනා දුතියෙන ඨානෙන ගාරය්‌හො. න සංවිභජති, න පුඤ්‌ඤානි කරොතීති, ඉමිනා තතියෙන ඨානෙන ගාරය්‌හො. අයං, ගාමණි, කාමභොගී ඉමිනා එකෙන ඨානෙන පාසංසො, ඉමෙහි තීහි ඨානෙහි ගාරය්‌හො.
‘‘Tatra, gāmaṇi, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi na attānaṃ sukheti, na pīṇeti, na saṃvibhajati, na puññāni karoti. Ayaṃ, gāmaṇi, kāmabhogī ekena ṭhānena pāsaṃso, tīhi ṭhānehi gārayho. Katamena ekena ṭhānena pāsaṃso? Dhammena bhoge pariyesati asāhasenāti, iminā ekena ṭhānena pāsaṃso. Katamehi tīhi ṭhānehi gārayho? Adhammena bhoge pariyesati sāhasenāti, iminā paṭhamena ṭhānena gārayho. Na attānaṃ sukheti, na pīṇetīti, iminā dutiyena ṭhānena gārayho. Na saṃvibhajati, na puññāni karotīti, iminā tatiyena ṭhānena gārayho. Ayaṃ, gāmaṇi, kāmabhogī iminā ekena ṭhānena pāsaṃso, imehi tīhi ṭhānehi gārayho.
‘‘තත්‍ර, ගාමණි, ය්‌වායං කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි, ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි අත්‌තානං සුඛෙති පීණෙති, න සංවිභජති, න පුඤ්‌ඤානි කරොති. අයං, ගාමණි, කාමභොගී ද්‌වීහි ඨානෙහි පාසංසො, ද්‌වීහි ඨානෙහි ගාරය්‌හො. කතමෙහි ද්‌වීහි ඨානෙහි පාසංසො? ධම්‌මෙන භොගෙ පරියෙසති අසාහසෙනාති, ඉමිනා පඨමෙන ඨානෙන පාසංසො. අත්‌තානං සුඛෙති පීණෙතීති, ඉමිනා දුතියෙන ඨානෙන පාසංසො . කතමෙහි ද්‌වීහි ඨානෙහි ගාරය්‌හො? අධම්‌මෙන භොගෙ පරියෙසති සාහසෙනාති, ඉමිනා පඨමෙන ඨානෙන ගාරය්‌හො. න සංවිභජති, න පුඤ්‌ඤානි කරොතීති, ඉමිනා දුතියෙන ඨානෙන ගාරය්‌හො. අයං, ගාමණි, කාමභොගී ඉමෙහි ද්‌වීහි ඨානෙහි පාසංසො, ඉමෙහි ද්‌වීහි ඨානෙහි ගාරය්‌හො.
‘‘Tatra, gāmaṇi, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṃ sukheti pīṇeti, na saṃvibhajati, na puññāni karoti. Ayaṃ, gāmaṇi, kāmabhogī dvīhi ṭhānehi pāsaṃso, dvīhi ṭhānehi gārayho. Katamehi dvīhi ṭhānehi pāsaṃso? Dhammena bhoge pariyesati asāhasenāti, iminā paṭhamena ṭhānena pāsaṃso. Attānaṃ sukheti pīṇetīti, iminā dutiyena ṭhānena pāsaṃso . Katamehi dvīhi ṭhānehi gārayho? Adhammena bhoge pariyesati sāhasenāti, iminā paṭhamena ṭhānena gārayho. Na saṃvibhajati, na puññāni karotīti, iminā dutiyena ṭhānena gārayho. Ayaṃ, gāmaṇi, kāmabhogī imehi dvīhi ṭhānehi pāsaṃso, imehi dvīhi ṭhānehi gārayho.
‘‘තත්‍ර, ගාමණි, ය්‌වායං කාමභොගී ධම්‌මාධම්‌මෙන භොගෙ පරියෙසති සාහසෙනපි අසාහසෙනපි, ධම්‌මාධම්‌මෙන භොගෙ පරියෙසිත්‌වා සාහසෙනපි අසාහසෙනපි අත්‌තානං සුඛෙති පීණෙති සංවිභජති පුඤ්‌ඤානි කරොති. අයං, ගාමණි, කාමභොගී තීහි ඨානෙහි පාසංසො, එකෙන ඨානෙන ගාරය්‌හො. කතමෙහි තීහි ඨානෙහි පාසංසො? ධම්‌මෙන භොගෙ පරියෙසති අසාහසෙනාති, ඉමිනා පඨමෙන ඨානෙන පාසංසො. අත්‌තානං සුඛෙති පීණෙතීති, ඉමිනා දුතියෙන ඨානෙන පාසංසො. සංවිභජති පුඤ්‌ඤානි කරොතීති, ඉමිනා තතියෙන ඨානෙන පාසංසො. කතමෙන එකෙන ඨානෙන ගාරය්‌හො? අධම්‌මෙන භොගෙ පරියෙසති සාහසෙනාති , ඉමිනා එකෙන ඨානෙන ගාරය්‌හො. අයං, ගාමණි, කාමභොගී ඉමෙහි තීහි ඨානෙහි පාසංසො, ඉමිනා එකෙන ඨානෙන ගාරය්‌හො.
‘‘Tatra, gāmaṇi, yvāyaṃ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṃ sukheti pīṇeti saṃvibhajati puññāni karoti. Ayaṃ, gāmaṇi, kāmabhogī tīhi ṭhānehi pāsaṃso, ekena ṭhānena gārayho. Katamehi tīhi ṭhānehi pāsaṃso? Dhammena bhoge pariyesati asāhasenāti, iminā paṭhamena ṭhānena pāsaṃso. Attānaṃ sukheti pīṇetīti, iminā dutiyena ṭhānena pāsaṃso. Saṃvibhajati puññāni karotīti, iminā tatiyena ṭhānena pāsaṃso. Katamena ekena ṭhānena gārayho? Adhammena bhoge pariyesati sāhasenāti , iminā ekena ṭhānena gārayho. Ayaṃ, gāmaṇi, kāmabhogī imehi tīhi ṭhānehi pāsaṃso, iminā ekena ṭhānena gārayho.
‘‘තත්‍ර, ගාමණි, ය්‌වායං කාමභොගී ධම්‌මෙන භොගෙ පරියෙසති අසාහසෙන , ධම්‌මෙන භොගෙ පරියෙසිත්‌වා අසාහසෙන, න අත්‌තානං සුඛෙති, න පීණෙති, න සංවිභජති, න පුඤ්‌ඤානි කරොති. අයං, ගාමණි, කාමභොගී එකෙන ඨානෙන පාසංසො, ද්‌වීහි ඨානෙහි ගාරය්‌හො. කතමෙන එකෙන ඨානෙන පාසංසො? ධම්‌මෙන භොගෙ පරියෙසති අසාහසෙනාති, ඉමිනා එකෙන ඨානෙන පාසංසො. කතමෙහි ද්‌වීහි ඨානෙහි ගාරය්‌හො? න අත්‌තානං සුඛෙති, න පීණෙතීති, ඉමිනා පඨමෙන ඨානෙන ගාරය්‌හො. න සංවිභජති, න පුඤ්‌ඤානි කරොතීති, ඉමිනා දුතියෙන ඨානෙන ගාරය්‌හො. අයං, ගාමණි, කාමභොගී ඉමිනා එකෙන ඨානෙන පාසංසො, ඉමෙහි ද්‌වීහි ඨානෙහි ගාරය්‌හො.
‘‘Tatra, gāmaṇi, yvāyaṃ kāmabhogī dhammena bhoge pariyesati asāhasena , dhammena bhoge pariyesitvā asāhasena, na attānaṃ sukheti, na pīṇeti, na saṃvibhajati, na puññāni karoti. Ayaṃ, gāmaṇi, kāmabhogī ekena ṭhānena pāsaṃso, dvīhi ṭhānehi gārayho. Katamena ekena ṭhānena pāsaṃso? Dhammena bhoge pariyesati asāhasenāti, iminā ekena ṭhānena pāsaṃso. Katamehi dvīhi ṭhānehi gārayho? Na attānaṃ sukheti, na pīṇetīti, iminā paṭhamena ṭhānena gārayho. Na saṃvibhajati, na puññāni karotīti, iminā dutiyena ṭhānena gārayho. Ayaṃ, gāmaṇi, kāmabhogī iminā ekena ṭhānena pāsaṃso, imehi dvīhi ṭhānehi gārayho.
‘‘තත්‍ර , ගාමණි, ය්‌වායං කාමභොගී ධම්‌මෙන භොගෙ පරියෙසති අසාහසෙන, ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති, න සංවිභජති, න පුඤ්‌ඤානි කරොති. අයං, ගාමණි, කාමභොගී ද්‌වීහි ඨානෙහි පාසංසො, එකෙන ඨානෙන ගාරය්‌හො. කතමෙහි ද්‌වීහි ඨානෙහි පාසංසො? ධම්‌මෙන භොගෙ පරියෙසති අසාහසෙනාති, ඉමිනා පඨමෙන ඨානෙන පාසංසො. අත්‌තානං සුඛෙති පීණෙතීති, ඉමිනා දුතියෙන ඨානෙන පාසංසො. කතමෙන එකෙන ඨානෙන ගාරය්‌හො ? න සංවිභජති, න පුඤ්‌ඤානි කරොතීති, ඉමිනා එකෙන ඨානෙන ගාරය්‌හො. අයං, ගාමණි, කාමභොගී ඉමෙහි ද්‌වීහි ඨානෙහි පාසංසො, ඉමිනා එකෙන ඨානෙන ගාරය්‌හො.
‘‘Tatra , gāmaṇi, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti, na saṃvibhajati, na puññāni karoti. Ayaṃ, gāmaṇi, kāmabhogī dvīhi ṭhānehi pāsaṃso, ekena ṭhānena gārayho. Katamehi dvīhi ṭhānehi pāsaṃso? Dhammena bhoge pariyesati asāhasenāti, iminā paṭhamena ṭhānena pāsaṃso. Attānaṃ sukheti pīṇetīti, iminā dutiyena ṭhānena pāsaṃso. Katamena ekena ṭhānena gārayho ? Na saṃvibhajati, na puññāni karotīti, iminā ekena ṭhānena gārayho. Ayaṃ, gāmaṇi, kāmabhogī imehi dvīhi ṭhānehi pāsaṃso, iminā ekena ṭhānena gārayho.
‘‘තත්‍ර, ගාමණි, ය්‌වායං කාමභොගී ධම්‌මෙන භොගෙ පරියෙසති අසාහසෙන , ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති, තෙ ච භොගෙ ගධිතො මුච්‌ඡිතො අජ්‌ඣොපන්‌නො අනාදීනවදස්‌සාවී අනිස්‌සරණපඤ්‌ඤො පරිභුඤ්‌ජති. අයං, ගාමණි, කාමභොගී තීහි ඨානෙහි පාසංසො, එකෙන ඨානෙන ගාරය්‌හො. කතමෙහි තීහි ඨානෙහි පාසංසො? ධම්‌මෙන භොගෙ පරියෙසති අසාහසෙනාති, ඉමිනා පඨමෙන ඨානෙන පාසංසො. අත්‌තානං සුඛෙති පීණෙතීති, ඉමිනා දුතියෙන ඨානෙන පාසංසො. සංවිභජති පුඤ්‌ඤානි කරොතීති, ඉමිනා තතියෙන ඨානෙන පාසංසො . කතමෙන එකෙන ඨානෙන ගාරය්‌හො? තෙ ච භොගෙ ගධිතො මුච්‌ඡිතො අජ්‌ඣොපන්‌නො අනාදීනවදස්‌සාවී අනිස්‌සරණපඤ්‌ඤො පරිභුඤ්‌ජතීති, ඉමිනා එකෙන ඨානෙන ගාරය්‌හො. අයං, ගාමණි, කාමභොගී ඉමෙහි තීහි ඨානෙහි පාසංසො, ඉමිනා එකෙන ඨානෙන ගාරය්‌හො.
‘‘Tatra, gāmaṇi, yvāyaṃ kāmabhogī dhammena bhoge pariyesati asāhasena , dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti, te ca bhoge gadhito mucchito ajjhopanno anādīnavadassāvī anissaraṇapañño paribhuñjati. Ayaṃ, gāmaṇi, kāmabhogī tīhi ṭhānehi pāsaṃso, ekena ṭhānena gārayho. Katamehi tīhi ṭhānehi pāsaṃso? Dhammena bhoge pariyesati asāhasenāti, iminā paṭhamena ṭhānena pāsaṃso. Attānaṃ sukheti pīṇetīti, iminā dutiyena ṭhānena pāsaṃso. Saṃvibhajati puññāni karotīti, iminā tatiyena ṭhānena pāsaṃso . Katamena ekena ṭhānena gārayho? Te ca bhoge gadhito mucchito ajjhopanno anādīnavadassāvī anissaraṇapañño paribhuñjatīti, iminā ekena ṭhānena gārayho. Ayaṃ, gāmaṇi, kāmabhogī imehi tīhi ṭhānehi pāsaṃso, iminā ekena ṭhānena gārayho.
‘‘තත්‍ර, ගාමණි, ය්‌වායං කාමභොගී ධම්‌මෙන භොගෙ පරියෙසති අසාහසෙන, ධම්‌මෙන භොගෙ පරියෙසිත්‌වා අසාහසෙන අත්‌තානං සුඛෙති පීණෙති සංවිභජති පුඤ්‌ඤානි කරොති. තෙ ච භොගෙ අගධිතො අමුච්‌ඡිතො අනජ්‌ඣොපන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජති. අයං, ගාමණි, කාමභොගී චතූහි ඨානෙහි පාසංසො. කතමෙහි චතූහි ඨානෙහි පාසංසො? ධම්‌මෙන භොගෙ පරියෙසති අසාහසෙනාති, ඉමිනා පඨමෙන ඨානෙන පාසංසො. අත්‌තානං සුඛෙති පීණෙතීති, ඉමිනා දුතියෙන ඨානෙන පාසංසො. සංවිභජති පුඤ්‌ඤානි කරොතීති, ඉමිනා තතියෙන ඨානෙන පාසංසො. තෙ ච භොගෙ අගධිතො අමුච්‌ඡිතො අනජ්‌ඣොපන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජතීති, ඉමිනා චතුත්‌ථෙන ඨානෙන පාසංසො. අයං, ගාමණි, කාමභොගී ඉමෙහි චතූහි ඨානෙහි පාසංසො.
‘‘Tatra, gāmaṇi, yvāyaṃ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṃ sukheti pīṇeti saṃvibhajati puññāni karoti. Te ca bhoge agadhito amucchito anajjhopanno ādīnavadassāvī nissaraṇapañño paribhuñjati. Ayaṃ, gāmaṇi, kāmabhogī catūhi ṭhānehi pāsaṃso. Katamehi catūhi ṭhānehi pāsaṃso? Dhammena bhoge pariyesati asāhasenāti, iminā paṭhamena ṭhānena pāsaṃso. Attānaṃ sukheti pīṇetīti, iminā dutiyena ṭhānena pāsaṃso. Saṃvibhajati puññāni karotīti, iminā tatiyena ṭhānena pāsaṃso. Te ca bhoge agadhito amucchito anajjhopanno ādīnavadassāvī nissaraṇapañño paribhuñjatīti, iminā catutthena ṭhānena pāsaṃso. Ayaṃ, gāmaṇi, kāmabhogī imehi catūhi ṭhānehi pāsaṃso.
‘‘තයොමෙ, ගාමණි, තපස්‌සිනො ලූඛජීවිනො සන්‌තො සංවිජ්‌ජමානා ලොකස්‌මිං. කතමෙ තයො? ඉධ, ගාමණි, එකච්‌චො තපස්‌සී ලූඛජීවී සද්‌ධා අගාරස්‌මා අනගාරියං පබ්‌බජිතො හොති – ‘අප්‌පෙව නාම කුසලං ධම්‌මං අධිගච්‌ඡෙය්‍යං, අප්‌පෙව නාම උත්‌තරිමනුස්‌සධම්‌මා අලමරියඤාණදස්‌සනවිසෙසං සච්‌ඡිකරෙය්‍ය’න්‌ති. සො අත්‌තානං ආතාපෙති පරිතාපෙති, කුසලඤ්‌ච ධම්‌මං නාධිගච්‌ඡති, උත්‌තරි ච මනුස්‌සධම්‌මා අලමරියඤාණදස්‌සනවිසෙසං න සච්‌ඡිකරොති.
‘‘Tayome, gāmaṇi, tapassino lūkhajīvino santo saṃvijjamānā lokasmiṃ. Katame tayo? Idha, gāmaṇi, ekacco tapassī lūkhajīvī saddhā agārasmā anagāriyaṃ pabbajito hoti – ‘appeva nāma kusalaṃ dhammaṃ adhigaccheyyaṃ, appeva nāma uttarimanussadhammā alamariyañāṇadassanavisesaṃ sacchikareyya’nti. So attānaṃ ātāpeti paritāpeti, kusalañca dhammaṃ nādhigacchati, uttari ca manussadhammā alamariyañāṇadassanavisesaṃ na sacchikaroti.
‘‘ඉධ පන, ගාමණි, එකච්‌චො තපස්‌සී ලූඛජීවී සද්‌ධා අගාරස්‌මා අනගාරියං පබ්‌බජිතො හොති – ‘අප්‌පෙව නාම කුසලං ධම්‌මං අධිගච්‌ඡෙය්‍යං, අප්‌පෙව නාම උත්‌තරිමනුස්‌සධම්‌මා අලමරියඤාණදස්‌සනවිසෙසං සච්‌ඡිකරෙය්‍ය’න්‌ති. සො අත්‌තානං ආතාපෙති පරිතාපෙති, කුසලඤ්‌හි ඛො ධම්‌මං අධිගච්‌ඡති, උත්‌තරිමනුස්‌සධම්‌මා අලමරියඤාණදස්‌සනවිසෙසං න සච්‌ඡිකරොති.
‘‘Idha pana, gāmaṇi, ekacco tapassī lūkhajīvī saddhā agārasmā anagāriyaṃ pabbajito hoti – ‘appeva nāma kusalaṃ dhammaṃ adhigaccheyyaṃ, appeva nāma uttarimanussadhammā alamariyañāṇadassanavisesaṃ sacchikareyya’nti. So attānaṃ ātāpeti paritāpeti, kusalañhi kho dhammaṃ adhigacchati, uttarimanussadhammā alamariyañāṇadassanavisesaṃ na sacchikaroti.
‘‘ඉධ පන, ගාමණි, එකච්‌චො තපස්‌සී ලූඛජීවී සද්‌ධා අගාරස්‌මා අනගාරියං පබ්‌බජිතො හොති – ‘අප්‌පෙව නාම කුසලං ධම්‌මං අධිගච්‌ඡෙය්‍යං, අප්‌පෙව නාම උත්‌තරිමනුස්‌සධම්‌මා අලමරියඤාණදස්‌සනවිසෙසං සච්‌ඡිකරෙය්‍ය’න්‌ති. සො අත්‌තානං ආතාපෙති පරිතාපෙති , කුසලඤ්‌ච ධම්‌මං අධිගච්‌ඡති, උත්‌තරි ච මනුස්‌සධම්‌මා අලමරියඤාණදස්‌සනවිසෙසං සච්‌ඡිකරොති.
‘‘Idha pana, gāmaṇi, ekacco tapassī lūkhajīvī saddhā agārasmā anagāriyaṃ pabbajito hoti – ‘appeva nāma kusalaṃ dhammaṃ adhigaccheyyaṃ, appeva nāma uttarimanussadhammā alamariyañāṇadassanavisesaṃ sacchikareyya’nti. So attānaṃ ātāpeti paritāpeti , kusalañca dhammaṃ adhigacchati, uttari ca manussadhammā alamariyañāṇadassanavisesaṃ sacchikaroti.
‘‘තත්‍ර, ගාමණි, ය්‌වායං තපස්‌සී ලූඛජීවී අත්‌තානං ආතාපෙති පරිතාපෙති, කුසලඤ්‌ච ධම්‌මං නාධිගච්‌ඡති, උත්‌තරි ච මනුස්‌සධම්‌මා අලමරියඤාණදස්‌සනවිසෙසං න සච්‌ඡිකරොති. අයං, ගාමණි, තපස්‌සී ලූඛජීවී තීහි ඨානෙහි ගාරය්‌හො. කතමෙහි තීහි ඨානෙහි ගාරය්‌හො? අත්‌තානං ආතාපෙති පරිතාපෙතීති, ඉමිනා පඨමෙන ඨානෙන ගාරය්‌හො. කුසලඤ්‌ච ධම්‌මං නාධිගච්‌ඡතීති, ඉමිනා දුතියෙන ඨානෙන ගාරය්‌හො. උත්‌තරි ච මනුස්‌සධම්‌මා අලමරියඤාණදස්‌සනවිසෙසං න සච්‌ඡිකරොතීති, ඉමිනා තතියෙන ඨානෙන ගාරය්‌හො. අයං, ගාමණි, තපස්‌සී ලූඛජීවී, ඉමෙහි තීහි ඨානෙහි ගාරය්‌හො.
‘‘Tatra, gāmaṇi, yvāyaṃ tapassī lūkhajīvī attānaṃ ātāpeti paritāpeti, kusalañca dhammaṃ nādhigacchati, uttari ca manussadhammā alamariyañāṇadassanavisesaṃ na sacchikaroti. Ayaṃ, gāmaṇi, tapassī lūkhajīvī tīhi ṭhānehi gārayho. Katamehi tīhi ṭhānehi gārayho? Attānaṃ ātāpeti paritāpetīti, iminā paṭhamena ṭhānena gārayho. Kusalañca dhammaṃ nādhigacchatīti, iminā dutiyena ṭhānena gārayho. Uttari ca manussadhammā alamariyañāṇadassanavisesaṃ na sacchikarotīti, iminā tatiyena ṭhānena gārayho. Ayaṃ, gāmaṇi, tapassī lūkhajīvī, imehi tīhi ṭhānehi gārayho.
‘‘තත්‍ර, ගාමණි, ය්‌වායං තපස්‌සී ලූඛජීවී අත්‌තානං ආතාපෙති පරිතාපෙති, කුසලඤ්‌හි ඛො ධම්‌මං අධිගච්‌ඡති, උත්‌තරි ච මනුස්‌සධම්‌මා අලමරියඤාණදස්‌සනවිසෙසං න සච්‌ඡිකරොති. අයං, ගාමණි, තපස්‌සී ලූඛජීවී ද්‌වීහි ඨානෙහි ගාරය්‌හො, එකෙන ඨානෙන පාසංසො. කතමෙහි ද්‌වීහි ඨානෙහි ගාරය්‌හො? අත්‌තානං ආතාපෙති පරිතාපෙතීති, ඉමිනා පඨමෙන ඨානෙන ගාරය්‌හො. උත්‌තරි ච මනුස්‌සධම්‌මා අලමරියඤාණදස්‌සනවිසෙසං න සච්‌ඡිකරොතීති, ඉමිනා දුතියෙන ඨානෙන ගාරය්‌හො. කතමෙන එකෙන ඨානෙන පාසංසො? කුසලඤ්‌හි ඛො ධම්‌මං අධිගච්‌ඡතීති, ඉමිනා එකෙන ඨානෙන පාසංසො. අයං, ගාමණි, තපස්‌සී ලූඛජීවී ඉමෙහි ද්‌වීහි ඨානෙහි ගාරය්‌හො, ඉමිනා එකෙන ඨානෙන පාසංසො.
‘‘Tatra, gāmaṇi, yvāyaṃ tapassī lūkhajīvī attānaṃ ātāpeti paritāpeti, kusalañhi kho dhammaṃ adhigacchati, uttari ca manussadhammā alamariyañāṇadassanavisesaṃ na sacchikaroti. Ayaṃ, gāmaṇi, tapassī lūkhajīvī dvīhi ṭhānehi gārayho, ekena ṭhānena pāsaṃso. Katamehi dvīhi ṭhānehi gārayho? Attānaṃ ātāpeti paritāpetīti, iminā paṭhamena ṭhānena gārayho. Uttari ca manussadhammā alamariyañāṇadassanavisesaṃ na sacchikarotīti, iminā dutiyena ṭhānena gārayho. Katamena ekena ṭhānena pāsaṃso? Kusalañhi kho dhammaṃ adhigacchatīti, iminā ekena ṭhānena pāsaṃso. Ayaṃ, gāmaṇi, tapassī lūkhajīvī imehi dvīhi ṭhānehi gārayho, iminā ekena ṭhānena pāsaṃso.
‘‘තත්‍ර , ගාමණි, ය්‌වායං තපස්‌සී ලූඛජීවී අත්‌තානං ආතාපෙති පරිතාපෙති, කුසලඤ්‌ච ධම්‌මං අධිගච්‌ඡති, උත්‌තරි ච මනුස්‌සධම්‌මා අලමරියඤාණදස්‌සනවිසෙසං සච්‌ඡිකරොති. අයං, ගාමණි, තපස්‌සී ලූඛජීවී එකෙන ඨානෙන ගාරය්‌හො, ද්‌වීහි ඨානෙහි පාසංසො. කතමෙන එකෙන ඨානෙන ගාරය්‌හො? අත්‌තානං ආතාපෙති පරිතාපෙතීති, ඉමිනා එකෙන ඨානෙන ගාරය්‌හො. කතමෙහි ද්‌වීහි ඨානෙහි පාසංසො? කුසලඤ්‌ච ධම්‌මං අධිගච්‌ඡතීති, ඉමිනා පඨමෙන ඨානෙන පාසංසො. උත්‌තරි ච මනුස්‌සධම්‌මා අලමරියඤාණදස්‌සනවිසෙසං සච්‌ඡිකරොතීති, ඉමිනා දුතියෙන ඨානෙන පාසංසො . අයං, ගාමණි, තපස්‌සී ලූඛජීවී ඉමිනා එකෙන ඨානෙන ගාරය්‌හො, ඉමෙහි ද්‌වීහි ඨානෙහි පාසංසො.
‘‘Tatra , gāmaṇi, yvāyaṃ tapassī lūkhajīvī attānaṃ ātāpeti paritāpeti, kusalañca dhammaṃ adhigacchati, uttari ca manussadhammā alamariyañāṇadassanavisesaṃ sacchikaroti. Ayaṃ, gāmaṇi, tapassī lūkhajīvī ekena ṭhānena gārayho, dvīhi ṭhānehi pāsaṃso. Katamena ekena ṭhānena gārayho? Attānaṃ ātāpeti paritāpetīti, iminā ekena ṭhānena gārayho. Katamehi dvīhi ṭhānehi pāsaṃso? Kusalañca dhammaṃ adhigacchatīti, iminā paṭhamena ṭhānena pāsaṃso. Uttari ca manussadhammā alamariyañāṇadassanavisesaṃ sacchikarotīti, iminā dutiyena ṭhānena pāsaṃso . Ayaṃ, gāmaṇi, tapassī lūkhajīvī iminā ekena ṭhānena gārayho, imehi dvīhi ṭhānehi pāsaṃso.
‘‘තිස්‌සො ඉමා, ගාමණි, සන්‌දිට්‌ඨිකා නිජ්‌ජරා අකාලිකා එහිපස්‌සිකා ඔපනෙය්‍යිකා පච්‌චත්‌තං වෙදිතබ්‌බා විඤ්‌ඤූහි. කතමා තිස්‌සො? යං රත්‌තො රාගාධිකරණං අත්‌තබ්‍යාබාධායපි චෙතෙති, පරබ්‍යාබාධායපි චෙතෙති, උභයබ්‍යාබාධායපි චෙතෙති. රාගෙ පහීනෙ නෙවත්‌තබ්‍යාබාධාය චෙතෙති, න පරබ්‍යාබාධාය චෙතෙති, න උභයබ්‍යාබාධාය චෙතෙති. සන්‌දිට්‌ඨිකා නිජ්‌ජරා අකාලිකා එහිපස්‌සිකා ඔපනෙය්‍යිකා පච්‌චත්‌තං වෙදිතබ්‌බා විඤ්‌ඤූහි. යං දුට්‌ඨො දොසාධිකරණං අත්‌තබ්‍යාබාධායපි චෙතෙති, පරබ්‍යාබාධායපි චෙතෙති, උභයබ්‍යාබාධායපි චෙතෙති. දොසෙ පහීනෙ නෙවත්‌තබ්‍යාබාධාය චෙතෙති, න පරබ්‍යාබාධාය චෙතෙති, න උභයබ්‍යාබාධාය චෙතෙති. සන්‌දිට්‌ඨිකා නිජ්‌ජරා අකාලිකා එහිපස්‌සිකා ඔපනෙය්‍යිකා පච්‌චත්‌තං වෙදිතබ්‌බා විඤ්‌ඤූහි. යං මූළ්‌හො මොහාධිකරණං අත්‌තබ්‍යාබාධායපි චෙතෙති, පරබ්‍යාබාධායපි චෙතෙති, උභයබ්‍යාබාධායපි චෙතෙති. මොහෙ පහීනෙ නෙවත්‌තබ්‍යාබාධාය චෙතෙති, න පරබ්‍යාබාධාය චෙතෙති, න උභයබ්‍යාබාධාය චෙතෙති. සන්‌දිට්‌ඨිකා නිජ්‌ජරා අකාලිකා එහිපස්‌සිකා ඔපනෙය්‍යිකා පච්‌චත්‌තං වෙදිතබ්‌බා විඤ්‌ඤූහි. ඉමා ඛො, ගාමණි, තිස්‌සො සන්‌දිට්‌ඨිකා නිජ්‌ජරා අකාලිකා එහිපස්‌සිකා ඔපනෙය්‍යිකා පච්‌චත්‌තං වෙදිතබ්‌බා විඤ්‌ඤූහී’’ති.
‘‘Tisso imā, gāmaṇi, sandiṭṭhikā nijjarā akālikā ehipassikā opaneyyikā paccattaṃ veditabbā viññūhi. Katamā tisso? Yaṃ ratto rāgādhikaraṇaṃ attabyābādhāyapi ceteti, parabyābādhāyapi ceteti, ubhayabyābādhāyapi ceteti. Rāge pahīne nevattabyābādhāya ceteti, na parabyābādhāya ceteti, na ubhayabyābādhāya ceteti. Sandiṭṭhikā nijjarā akālikā ehipassikā opaneyyikā paccattaṃ veditabbā viññūhi. Yaṃ duṭṭho dosādhikaraṇaṃ attabyābādhāyapi ceteti, parabyābādhāyapi ceteti, ubhayabyābādhāyapi ceteti. Dose pahīne nevattabyābādhāya ceteti, na parabyābādhāya ceteti, na ubhayabyābādhāya ceteti. Sandiṭṭhikā nijjarā akālikā ehipassikā opaneyyikā paccattaṃ veditabbā viññūhi. Yaṃ mūḷho mohādhikaraṇaṃ attabyābādhāyapi ceteti, parabyābādhāyapi ceteti, ubhayabyābādhāyapi ceteti. Mohe pahīne nevattabyābādhāya ceteti, na parabyābādhāya ceteti, na ubhayabyābādhāya ceteti. Sandiṭṭhikā nijjarā akālikā ehipassikā opaneyyikā paccattaṃ veditabbā viññūhi. Imā kho, gāmaṇi, tisso sandiṭṭhikā nijjarā akālikā ehipassikā opaneyyikā paccattaṃ veditabbā viññūhī’’ti.
එවං වුත්‌තෙ, රාසියො ගාමණි භගවන්‌තං එතදවොච – ‘‘අභික්‌කන්‌තං, භන්‌තෙ…පෙ.… උපාසකං මං භගවා ධාරෙතු අජ්‌ජතග්‌ගෙ පාණුපෙතං සරණං ගත’’න්‌ති. ද්‌වාදසමං.
Evaṃ vutte, rāsiyo gāmaṇi bhagavantaṃ etadavoca – ‘‘abhikkantaṃ, bhante…pe… upāsakaṃ maṃ bhagavā dhāretu ajjatagge pāṇupetaṃ saraṇaṃ gata’’nti. Dvādasamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 12. රාසියසුත්‌තවණ්‌ණනා • 12. Rāsiyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 12. රාසියසුත්‌තවණ්‌ණනා • 12. Rāsiyasuttavaṇṇanā
