| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
12. ராஸியஸுத்தவண்ணனா
12. Rāsiyasuttavaṇṇanā
364. த்³வாத³ஸமே ராஸியோதி ராஸிங் கத்வா பஞ்ஹஸ்ஸ புச்சி²தத்தா ராஸியோதி ஏவங் த⁴ம்மஸங்கா³ஹகத்தே²ரேஹி க³ஹிதனாமோ. தபஸ்ஸிந்தி தபனிஸ்ஸிதகங். லூக²ஜீவிந்தி லூக²ஜீவிகங். அந்தாதி கொட்டா²ஸா. கா³மோதி கா³ம்மோ. க³ம்மோதிபி பாடோ², கா³மவாஸீனங் த⁴ம்மோதி அத்தோ². அத்தகிலமதா²னுயோகோ³தி அத்தனோ கிலமதா²னுயோகோ³, ஸரீரது³க்க²கரணந்தி அத்தோ².
364. Dvādasame rāsiyoti rāsiṃ katvā pañhassa pucchitattā rāsiyoti evaṃ dhammasaṅgāhakattherehi gahitanāmo. Tapassinti tapanissitakaṃ. Lūkhajīvinti lūkhajīvikaṃ. Antāti koṭṭhāsā. Gāmoti gāmmo. Gammotipi pāṭho, gāmavāsīnaṃ dhammoti attho. Attakilamathānuyogoti attano kilamathānuyogo, sarīradukkhakaraṇanti attho.
கஸ்மா பனெத்த² காமஸுக²ல்லிகானுயோகோ³ க³ஹிதோ, கஸ்மா அத்தகிலமதா²னுயோகோ³, கஸ்மா மஜ்ஜி²மா படிபதா³தி? காமஸுக²ல்லிகானுயோகோ³ தாவ காமபோ⁴கீ³னங் த³ஸ்ஸனத்த²ங் க³ஹிதோ, அத்தகிலமதா²னுயோகோ³ தபனிஸ்ஸிதகானங், மஜ்ஜி²மா படிபதா³ திண்ணங் நிஜ்ஜரவத்தூ²னங் த³ஸ்ஸனத்த²ங் க³ஹிதா. கிங் ஏதேஸங் த³ஸ்ஸனே பயோஜனந்தி? இமே த்³வே அந்தே பஹாய ததா²க³தோ மஜ்ஜி²மாய படிபதா³ய ஸம்மாஸம்போ³தி⁴ங் பத்தோ. ஸோ காமபோ⁴கி³னோபி ந ஸப்³பே³ க³ரஹதி ந பஸங்ஸதி, தபனிஸ்ஸிதகேபி ந ஸப்³பே³ க³ரஹதி ந பஸங்ஸதி, க³ரஹிதப்³ப³யுத்தகேயேவ க³ரஹதி, பஸங்ஸிதப்³ப³யுத்தகே பஸங்ஸதீதி இமஸ்ஸத்த²ஸ்ஸ பகாஸனங் ஏதேஸங் த³ஸ்ஸனே பயோஜனந்தி வேதி³தப்³ப³ங்.
Kasmā panettha kāmasukhallikānuyogo gahito, kasmā attakilamathānuyogo, kasmā majjhimā paṭipadāti? Kāmasukhallikānuyogo tāva kāmabhogīnaṃ dassanatthaṃ gahito, attakilamathānuyogo tapanissitakānaṃ, majjhimā paṭipadā tiṇṇaṃ nijjaravatthūnaṃ dassanatthaṃ gahitā. Kiṃ etesaṃ dassane payojananti? Ime dve ante pahāya tathāgato majjhimāya paṭipadāya sammāsambodhiṃ patto. So kāmabhoginopi na sabbe garahati na pasaṃsati, tapanissitakepi na sabbe garahati na pasaṃsati, garahitabbayuttakeyeva garahati, pasaṃsitabbayuttake pasaṃsatīti imassatthassa pakāsanaṃ etesaṃ dassane payojananti veditabbaṃ.
இதா³னி தமத்த²ங் பகாஸெந்தோ தயோ கோ²மே, கா³மணி, காமபோ⁴கி³னோதிஆதி³மாஹ. தத்த² ஸாஹஸேனாதி ஸாஹஸிககம்மேன. ந ஸங்விப⁴ஜதீதி மித்தஸஹாயஸந்தி³ட்ட²ஸம்ப⁴த்தானங் ஸங்விபா⁴க³ங் ந கரோதி. ந புஞ்ஞானி கரோதீதி அனாக³தப⁴வஸ்ஸ பச்சயபூ⁴தானி புஞ்ஞானி ந கரோதி. த⁴ம்மாத⁴ம்மேனாதி த⁴ம்மேன ச அத⁴ம்மேன ச. டா²னேஹீதி காரணேஹி. ஸச்சி²கரோதீதி கத²ங் அத்தானங் ஆதாபெந்தோ பரிதாபெந்தோ ஸச்சி²கரோதி? சதுரங்க³வீரியவஸேன ச து⁴தங்க³வஸேன ச. திஸ்ஸோ ஸந்தி³ட்டி²கா நிஜ்ஜராதி எத்த² ஏகோபி மக்³கோ³ திண்ணங் கிலேஸானங் நிஜ்ஜரணதாய திஸ்ஸோ நிஜ்ஜராதி வுத்தோதி.
Idāni tamatthaṃ pakāsento tayo khome, gāmaṇi, kāmabhoginotiādimāha. Tattha sāhasenāti sāhasikakammena. Na saṃvibhajatīti mittasahāyasandiṭṭhasambhattānaṃ saṃvibhāgaṃ na karoti. Na puññāni karotīti anāgatabhavassa paccayabhūtāni puññāni na karoti. Dhammādhammenāti dhammena ca adhammena ca. Ṭhānehīti kāraṇehi. Sacchikarotīti kathaṃ attānaṃ ātāpento paritāpento sacchikaroti? Caturaṅgavīriyavasena ca dhutaṅgavasena ca. Tisso sandiṭṭhikā nijjarāti ettha ekopi maggo tiṇṇaṃ kilesānaṃ nijjaraṇatāya tisso nijjarāti vuttoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 12. ராஸியஸுத்தங் • 12. Rāsiyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 12. ராஸியஸுத்தவண்ணனா • 12. Rāsiyasuttavaṇṇanā
