| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
12. රාසියසුත්‌තවණ්‌ණනා
12. Rāsiyasuttavaṇṇanā
364. ද්‌වාදසමෙ රාසියොති රාසිං කත්‌වා පඤ්‌හස්‌ස පුච්‌ඡිතත්‌තා රාසියොති එවං ධම්‌මසඞ්‌ගාහකත්‌ථෙරෙහි ගහිතනාමො. තපස්‌සින්‌ති තපනිස්‌සිතකං. ලූඛජීවින්‌ති ලූඛජීවිකං. අන්‌තාති කොට්‌ඨාසා. ගාමොති ගාම්‌මො. ගම්‌මොතිපි පාඨො, ගාමවාසීනං ධම්‌මොති අත්‌ථො. අත්‌තකිලමථානුයොගොති අත්‌තනො කිලමථානුයොගො, සරීරදුක්‌ඛකරණන්‌ති අත්‌ථො.
364. Dvādasame rāsiyoti rāsiṃ katvā pañhassa pucchitattā rāsiyoti evaṃ dhammasaṅgāhakattherehi gahitanāmo. Tapassinti tapanissitakaṃ. Lūkhajīvinti lūkhajīvikaṃ. Antāti koṭṭhāsā. Gāmoti gāmmo. Gammotipi pāṭho, gāmavāsīnaṃ dhammoti attho. Attakilamathānuyogoti attano kilamathānuyogo, sarīradukkhakaraṇanti attho.
කස්‌මා පනෙත්‌ථ කාමසුඛල්‌ලිකානුයොගො ගහිතො, කස්‌මා අත්‌තකිලමථානුයොගො, කස්‌මා මජ්‌ඣිමා පටිපදාති? කාමසුඛල්‌ලිකානුයොගො තාව කාමභොගීනං දස්‌සනත්‌ථං ගහිතො, අත්‌තකිලමථානුයොගො තපනිස්‌සිතකානං, මජ්‌ඣිමා පටිපදා තිණ්‌ණං නිජ්‌ජරවත්‌ථූනං දස්‌සනත්‌ථං ගහිතා. කිං එතෙසං දස්‌සනෙ පයොජනන්‌ති? ඉමෙ ද්‌වෙ අන්‌තෙ පහාය තථාගතො මජ්‌ඣිමාය පටිපදාය සම්‌මාසම්‌බොධිං පත්‌තො. සො කාමභොගිනොපි න සබ්‌බෙ ගරහති න පසංසති, තපනිස්‌සිතකෙපි න සබ්‌බෙ ගරහති න පසංසති, ගරහිතබ්‌බයුත්‌තකෙයෙව ගරහති, පසංසිතබ්‌බයුත්‌තකෙ පසංසතීති ඉමස්‌සත්‌ථස්‌ස පකාසනං එතෙසං දස්‌සනෙ පයොජනන්‌ති වෙදිතබ්‌බං.
Kasmā panettha kāmasukhallikānuyogo gahito, kasmā attakilamathānuyogo, kasmā majjhimā paṭipadāti? Kāmasukhallikānuyogo tāva kāmabhogīnaṃ dassanatthaṃ gahito, attakilamathānuyogo tapanissitakānaṃ, majjhimā paṭipadā tiṇṇaṃ nijjaravatthūnaṃ dassanatthaṃ gahitā. Kiṃ etesaṃ dassane payojananti? Ime dve ante pahāya tathāgato majjhimāya paṭipadāya sammāsambodhiṃ patto. So kāmabhoginopi na sabbe garahati na pasaṃsati, tapanissitakepi na sabbe garahati na pasaṃsati, garahitabbayuttakeyeva garahati, pasaṃsitabbayuttake pasaṃsatīti imassatthassa pakāsanaṃ etesaṃ dassane payojananti veditabbaṃ.
ඉදානි තමත්‌ථං පකාසෙන්‌තො තයො ඛොමෙ, ගාමණි, කාමභොගිනොතිආදිමාහ. තත්‌ථ සාහසෙනාති සාහසිකකම්‌මෙන. න සංවිභජතීති මිත්‌තසහායසන්‌දිට්‌ඨසම්‌භත්‌තානං සංවිභාගං න කරොති. න පුඤ්‌ඤානි කරොතීති අනාගතභවස්‌ස පච්‌චයභූතානි පුඤ්‌ඤානි න කරොති. ධම්‌මාධම්‌මෙනාති ධම්‌මෙන ච අධම්‌මෙන ච. ඨානෙහීති කාරණෙහි. සච්‌ඡිකරොතීති කථං අත්‌තානං ආතාපෙන්‌තො පරිතාපෙන්‌තො සච්‌ඡිකරොති? චතුරඞ්‌ගවීරියවසෙන ච ධුතඞ්‌ගවසෙන ච. තිස්‌සො සන්‌දිට්‌ඨිකා නිජ්‌ජරාති එත්‌ථ එකොපි මග්‌ගො තිණ්‌ණං කිලෙසානං නිජ්‌ජරණතාය තිස්‌සො නිජ්‌ජරාති වුත්‌තොති.
Idāni tamatthaṃ pakāsento tayo khome, gāmaṇi, kāmabhoginotiādimāha. Tattha sāhasenāti sāhasikakammena. Na saṃvibhajatīti mittasahāyasandiṭṭhasambhattānaṃ saṃvibhāgaṃ na karoti. Na puññāni karotīti anāgatabhavassa paccayabhūtāni puññāni na karoti. Dhammādhammenāti dhammena ca adhammena ca. Ṭhānehīti kāraṇehi. Sacchikarotīti kathaṃ attānaṃ ātāpento paritāpento sacchikaroti? Caturaṅgavīriyavasena ca dhutaṅgavasena ca. Tisso sandiṭṭhikā nijjarāti ettha ekopi maggo tiṇṇaṃ kilesānaṃ nijjaraṇatāya tisso nijjarāti vuttoti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 12. රාසියසුත්‌තං • 12. Rāsiyasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 12. රාසියසුත්‌තවණ්‌ණනා • 12. Rāsiyasuttavaṇṇanā
