| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
2. ரதனஸிக்கா²பத³ங்
2. Ratanasikkhāpadaṃ
502. து³தியே பமுஸ்ஸித்வாதி ஸதிவிப்பவாஸேன பமுஸ்ஸித்வா. புண்ணபத்தந்தி துட்டி²தா³யங். தஞ்ஹி மனோரத²புண்ணேன பத்தப்³ப³பா⁴க³த்தா ‘‘புண்ணபத்த’’ந்தி வுச்சதி. தஸ்ஸ ஸரூபங் த³ஸ்ஸேதுங் வுத்தங் ‘‘ஸததோ பஞ்ச கஹாபணா’’தி. இத⁴ பன கஹாபணானங் பஞ்சஸதத்தா பஞ்சவீஸகஹாபணா அதி⁴ப்பேதா. ஆப⁴ரணஸத்³த³ஸ்ஸ அலங்காரஸத்³தே³ன பரியாயபா⁴வங் த³ஸ்ஸேதுங் வுத்தங் ‘‘அலங்கார’’ந்தி. ‘‘மஹாலதங் நாமா’’தி இமினா ந யோ வா ஸோ வா அலங்காரோ, அத² கோ² விஸேஸாலங்காரோதி த³ஸ்ஸேதி. மஹந்தானி மாலாகம்மலதாகம்மானி எத்தா²தி மஹாலதா. லதாக³ஹணேன ஹி மாலாபி க³ஹிதா. நவஹி கோடீஹி அக்³க⁴ங் இமஸ்ஸாதி நவகோடிஅக்³க⁴னகங், நவகோடிஸங்கா²தங் அக்³க⁴ங் அரஹதீதி வா நவகோடிஅக்³க⁴னகங்.
502. Dutiye pamussitvāti sativippavāsena pamussitvā. Puṇṇapattanti tuṭṭhidāyaṃ. Tañhi manorathapuṇṇena pattabbabhāgattā ‘‘puṇṇapatta’’nti vuccati. Tassa sarūpaṃ dassetuṃ vuttaṃ ‘‘satato pañca kahāpaṇā’’ti. Idha pana kahāpaṇānaṃ pañcasatattā pañcavīsakahāpaṇā adhippetā. Ābharaṇasaddassa alaṅkārasaddena pariyāyabhāvaṃ dassetuṃ vuttaṃ ‘‘alaṅkāra’’nti. ‘‘Mahālataṃ nāmā’’ti iminā na yo vā so vā alaṅkāro, atha kho visesālaṅkāroti dasseti. Mahantāni mālākammalatākammāni etthāti mahālatā. Latāgahaṇena hi mālāpi gahitā. Navahi koṭīhi agghaṃ imassāti navakoṭiagghanakaṃ, navakoṭisaṅkhātaṃ agghaṃ arahatīti vā navakoṭiagghanakaṃ.
504. அந்தே ஸமீபே வஸனஸீலத்தா பரிசாரிகோ ‘‘அந்தேவாஸீ’’தி வுச்சதீதி ஆஹ ‘‘பரிசாரிகோ’’தி.
504. Ante samīpe vasanasīlattā paricāriko ‘‘antevāsī’’ti vuccatīti āha ‘‘paricāriko’’ti.
506. த்³வே லெட்³டு³பாதாதி தா²மமஜ்ஜி²மஸ்ஸ புரிஸஸ்ஸ த்³வே லெட்³டு³பாதா. ஸங்க⁴…பே॰… நவகம்மானங் அத்தா²ய உக்³க³ண்ஹந்தஸ்ஸ வா உக்³க³ண்ஹாபெந்தஸ்ஸ வா து³க்கடந்தி யோஜனா. அவஸேஸந்தி ஜாதரூபரஜததோ அவஸேஸங். மாதுகண்ணபிளந்த⁴னதாலபண்ணம்பீதி மாதுயா கண்ணே பிளந்தி⁴ததாலபண்ணம்பி, படிஸாமெந்தஸ்ஸாதி ஸம்ப³ந்தோ⁴.
506.Dve leḍḍupātāti thāmamajjhimassa purisassa dve leḍḍupātā. Saṅgha…pe… navakammānaṃ atthāya uggaṇhantassa vā uggaṇhāpentassa vā dukkaṭanti yojanā. Avasesanti jātarūparajatato avasesaṃ. Mātukaṇṇapiḷandhanatālapaṇṇampīti mātuyā kaṇṇe piḷandhitatālapaṇṇampi, paṭisāmentassāti sambandho.
‘‘கப்பியப⁴ண்ட³ங் ஹோதீ’’தி இமினா அகப்பியப⁴ண்ட³ங் ந வட்டதீதி த³ஸ்ஸேதி. இத³ந்தி ப⁴ண்ட³ங். பலிபோ³தோ⁴ நாமாதி அத்தனோ பலிபோ³தோ⁴ நாம. ச²ந்தே³னபீதி வட்³ட⁴கீஆதீ³னங் ச²ந்த³ஹேதுனாபி. ப⁴யேனபீதி ராஜவல்லபா⁴னங் ப⁴யஹேதுனாபி. ப³லக்காரேனாதி கரணங் காரோ, ப³லேன காரோ ப³லக்காரோ, தேன, ப³லக்காரோ ஹுத்வா பாதெத்வாதி அத்தோ².
‘‘Kappiyabhaṇḍaṃ hotī’’ti iminā akappiyabhaṇḍaṃ na vaṭṭatīti dasseti. Idanti bhaṇḍaṃ. Palibodhonāmāti attano palibodho nāma. Chandenapīti vaḍḍhakīādīnaṃ chandahetunāpi. Bhayenapīti rājavallabhānaṃ bhayahetunāpi. Balakkārenāti karaṇaṃ kāro, balena kāro balakkāro, tena, balakkāro hutvā pātetvāti attho.
தத்தா²தி மஹாராமே. யத்தா²தி யஸ்மிங் டா²னே, ஸங்கா உப்பஜ்ஜதீதி ஸம்ப³ந்தோ⁴. மஹாஜனஸஞ்சரணட்டா²னேஸூதி ப³ஹூனங் ஜனானங் ஸஞ்சரணஸங்கா²தேஸு டா²னேஸு. நக³ஹேதப்³ப³ஸ்ஸ ஹேதுங் த³ஸ்ஸேதுங் வுத்தங் ‘‘பலிபோ³தோ⁴ ந ஹோதீ’’தி. யஸ்மா பலிபோ³தோ⁴ ந ஹோதி, தஸ்மா ந க³ஹேதப்³ப³ந்தி அதி⁴ப்பாயோ. ஏகோதி ஏகோ பி⁴க்கு² பஸ்ஸதீதி ஸம்ப³ந்தோ⁴. ஓக்கம்மாதி ஓக்கமித்வா.
Tatthāti mahārāme. Yatthāti yasmiṃ ṭhāne, saṅkā uppajjatīti sambandho. Mahājanasañcaraṇaṭṭhānesūti bahūnaṃ janānaṃ sañcaraṇasaṅkhātesu ṭhānesu. Nagahetabbassa hetuṃ dassetuṃ vuttaṃ ‘‘palibodho na hotī’’ti. Yasmā palibodho na hoti, tasmā na gahetabbanti adhippāyo. Ekoti eko bhikkhu passatīti sambandho. Okkammāti okkamitvā.
ரூபஸத்³தோ³ ப⁴ண்ட³பரியாயோதி ஆஹ ‘‘ப⁴ண்ட³’’ந்தி. ப⁴ண்ட³ங் ரூபங் நாமாதி யோஜனா. ப⁴ண்டி³கந்தி ப⁴ண்டே³ன நியுத்தங் புடகங். க³ணெத்வாதி க³ணனங் கத்வா. நிமித்தந்தீதி எத்த² இதிஸத்³தோ³ நாமபரியாயோ. லஞ்ச²னாதி³ நிமித்தங் நாமாதி ஹி யோஜனா. லஞ்ச²னாதீ³தி ஆதி³ஸத்³தே³ன நீலபிலோதிகாத³யோ ஸங்க³ண்ஹாதி. லாகா²யாதி ஜதுனா.
Rūpasaddo bhaṇḍapariyāyoti āha ‘‘bhaṇḍa’’nti. Bhaṇḍaṃ rūpaṃ nāmāti yojanā. Bhaṇḍikanti bhaṇḍena niyuttaṃ puṭakaṃ. Gaṇetvāti gaṇanaṃ katvā. Nimittantīti ettha itisaddo nāmapariyāyo. Lañchanādi nimittaṃ nāmāti hi yojanā. Lañchanādīti ādisaddena nīlapilotikādayo saṅgaṇhāti. Lākhāyāti jatunā.
பதிரூபா நாம இத⁴ லஜ்ஜிகுக்குச்சகாதி ஆஹ ‘‘லஜ்ஜினோ குக்குச்சகா’’தி. தா²வரந்தி ஜங்க³மா அஞ்ஞங் தா²வரங். அத்³து⁴னோதி காலஸ்ஸ. ஸமாத³பெத்வாதி அஞ்ஞே ஸமாத³பெத்வா. உத்³தி³ஸ்ஸ அரியா திட்ட²ந்தி, ஏஸா அரியான யாசனா’’தி (ஜா॰ 1.7.59) வுத்தனயேன யாசித்வாதி அத்தோ².
Patirūpā nāma idha lajjikukkuccakāti āha ‘‘lajjino kukkuccakā’’ti. Thāvaranti jaṅgamā aññaṃ thāvaraṃ. Addhunoti kālassa. Samādapetvāti aññe samādapetvā. Uddissa ariyā tiṭṭhanti, esā ariyāna yācanā’’ti (jā. 1.7.59) vuttanayena yācitvāti attho.
507. ரதனஸம்மதந்தி மனுஸ்ஸானங் உபபோ⁴க³பரிபோ⁴க³ந்தி. து³தியங்.
507.Ratanasammatanti manussānaṃ upabhogaparibhoganti. Dutiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ரதனவக்³கோ³ • 9. Ratanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
