| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২. রতনসিক্খাপদং
2. Ratanasikkhāpadaṃ
৫০২. দুতিযে পমুস্সিত্ৰাতি সতিৰিপ্পৰাসেন পমুস্সিত্ৰা। পুণ্ণপত্তন্তি তুট্ঠিদাযং। তঞ্হি মনোরথপুণ্ণেন পত্তব্বভাগত্তা ‘‘পুণ্ণপত্ত’’ন্তি ৰুচ্চতি। তস্স সরূপং দস্সেতুং ৰুত্তং ‘‘সততো পঞ্চ কহাপণা’’তি। ইধ পন কহাপণানং পঞ্চসতত্তা পঞ্চৰীসকহাপণা অধিপ্পেতা। আভরণসদ্দস্স অলঙ্কারসদ্দেন পরিযাযভাৰং দস্সেতুং ৰুত্তং ‘‘অলঙ্কার’’ন্তি। ‘‘মহালতং নামা’’তি ইমিনা ন যো ৰা সো ৰা অলঙ্কারো, অথ খো ৰিসেসালঙ্কারোতি দস্সেতি। মহন্তানি মালাকম্মলতাকম্মানি এত্থাতি মহালতা। লতাগহণেন হি মালাপি গহিতা। নৰহি কোটীহি অগ্ঘং ইমস্সাতি নৰকোটিঅগ্ঘনকং, নৰকোটিসঙ্খাতং অগ্ঘং অরহতীতি ৰা নৰকোটিঅগ্ঘনকং।
502. Dutiye pamussitvāti sativippavāsena pamussitvā. Puṇṇapattanti tuṭṭhidāyaṃ. Tañhi manorathapuṇṇena pattabbabhāgattā ‘‘puṇṇapatta’’nti vuccati. Tassa sarūpaṃ dassetuṃ vuttaṃ ‘‘satato pañca kahāpaṇā’’ti. Idha pana kahāpaṇānaṃ pañcasatattā pañcavīsakahāpaṇā adhippetā. Ābharaṇasaddassa alaṅkārasaddena pariyāyabhāvaṃ dassetuṃ vuttaṃ ‘‘alaṅkāra’’nti. ‘‘Mahālataṃ nāmā’’ti iminā na yo vā so vā alaṅkāro, atha kho visesālaṅkāroti dasseti. Mahantāni mālākammalatākammāni etthāti mahālatā. Latāgahaṇena hi mālāpi gahitā. Navahi koṭīhi agghaṃ imassāti navakoṭiagghanakaṃ, navakoṭisaṅkhātaṃ agghaṃ arahatīti vā navakoṭiagghanakaṃ.
৫০৪. অন্তে সমীপে ৰসনসীলত্তা পরিচারিকো ‘‘অন্তেৰাসী’’তি ৰুচ্চতীতি আহ ‘‘পরিচারিকো’’তি।
504. Ante samīpe vasanasīlattā paricāriko ‘‘antevāsī’’ti vuccatīti āha ‘‘paricāriko’’ti.
৫০৬. দ্ৰে লেড্ডুপাতাতি থামমজ্ঝিমস্স পুরিসস্স দ্ৰে লেড্ডুপাতা। সঙ্ঘ…পে॰… নৰকম্মানং অত্থায উগ্গণ্হন্তস্স ৰা উগ্গণ্হাপেন্তস্স ৰা দুক্কটন্তি যোজনা। অৰসেসন্তি জাতরূপরজততো অৰসেসং। মাতুকণ্ণপিল়ন্ধনতালপণ্ণম্পীতি মাতুযা কণ্ণে পিল়ন্ধিততালপণ্ণম্পি, পটিসামেন্তস্সাতি সম্বন্ধো।
506.Dve leḍḍupātāti thāmamajjhimassa purisassa dve leḍḍupātā. Saṅgha…pe… navakammānaṃ atthāya uggaṇhantassa vā uggaṇhāpentassa vā dukkaṭanti yojanā. Avasesanti jātarūparajatato avasesaṃ. Mātukaṇṇapiḷandhanatālapaṇṇampīti mātuyā kaṇṇe piḷandhitatālapaṇṇampi, paṭisāmentassāti sambandho.
‘‘কপ্পিযভণ্ডং হোতী’’তি ইমিনা অকপ্পিযভণ্ডং ন ৰট্টতীতি দস্সেতি। ইদন্তি ভণ্ডং। পলিবোধো নামাতি অত্তনো পলিবোধো নাম। ছন্দেনপীতি ৰড্ঢকীআদীনং ছন্দহেতুনাপি। ভযেনপীতি রাজৰল্লভানং ভযহেতুনাপি। বলক্কারেনাতি করণং কারো, বলেন কারো বলক্কারো, তেন, বলক্কারো হুত্ৰা পাতেত্ৰাতি অত্থো।
‘‘Kappiyabhaṇḍaṃ hotī’’ti iminā akappiyabhaṇḍaṃ na vaṭṭatīti dasseti. Idanti bhaṇḍaṃ. Palibodhonāmāti attano palibodho nāma. Chandenapīti vaḍḍhakīādīnaṃ chandahetunāpi. Bhayenapīti rājavallabhānaṃ bhayahetunāpi. Balakkārenāti karaṇaṃ kāro, balena kāro balakkāro, tena, balakkāro hutvā pātetvāti attho.
তত্থাতি মহারামে। যত্থাতি যস্মিং ঠানে, সঙ্কা উপ্পজ্জতীতি সম্বন্ধো। মহাজনসঞ্চরণট্ঠানেসূতি বহূনং জনানং সঞ্চরণসঙ্খাতেসু ঠানেসু। নগহেতব্বস্স হেতুং দস্সেতুং ৰুত্তং ‘‘পলিবোধো ন হোতী’’তি। যস্মা পলিবোধো ন হোতি, তস্মা ন গহেতব্বন্তি অধিপ্পাযো। একোতি একো ভিক্খু পস্সতীতি সম্বন্ধো। ওক্কম্মাতি ওক্কমিত্ৰা।
Tatthāti mahārāme. Yatthāti yasmiṃ ṭhāne, saṅkā uppajjatīti sambandho. Mahājanasañcaraṇaṭṭhānesūti bahūnaṃ janānaṃ sañcaraṇasaṅkhātesu ṭhānesu. Nagahetabbassa hetuṃ dassetuṃ vuttaṃ ‘‘palibodho na hotī’’ti. Yasmā palibodho na hoti, tasmā na gahetabbanti adhippāyo. Ekoti eko bhikkhu passatīti sambandho. Okkammāti okkamitvā.
রূপসদ্দো ভণ্ডপরিযাযোতি আহ ‘‘ভণ্ড’’ন্তি। ভণ্ডং রূপং নামাতি যোজনা। ভণ্ডিকন্তি ভণ্ডেন নিযুত্তং পুটকং। গণেত্ৰাতি গণনং কত্ৰা। নিমিত্তন্তীতি এত্থ ইতিসদ্দো নামপরিযাযো। লঞ্ছনাদি নিমিত্তং নামাতি হি যোজনা। লঞ্ছনাদীতি আদিসদ্দেন নীলপিলোতিকাদযো সঙ্গণ্হাতি। লাখাযাতি জতুনা।
Rūpasaddo bhaṇḍapariyāyoti āha ‘‘bhaṇḍa’’nti. Bhaṇḍaṃ rūpaṃ nāmāti yojanā. Bhaṇḍikanti bhaṇḍena niyuttaṃ puṭakaṃ. Gaṇetvāti gaṇanaṃ katvā. Nimittantīti ettha itisaddo nāmapariyāyo. Lañchanādi nimittaṃ nāmāti hi yojanā. Lañchanādīti ādisaddena nīlapilotikādayo saṅgaṇhāti. Lākhāyāti jatunā.
পতিরূপা নাম ইধ লজ্জিকুক্কুচ্চকাতি আহ ‘‘লজ্জিনো কুক্কুচ্চকা’’তি। থাৰরন্তি জঙ্গমা অঞ্ঞং থাৰরং। অদ্ধুনোতি কালস্স। সমাদপেত্ৰাতি অঞ্ঞে সমাদপেত্ৰা। উদ্দিস্স অরিযা তিট্ঠন্তি, এসা অরিযান যাচনা’’তি (জা॰ ১.৭.৫৯) ৰুত্তনযেন যাচিত্ৰাতি অত্থো।
Patirūpā nāma idha lajjikukkuccakāti āha ‘‘lajjino kukkuccakā’’ti. Thāvaranti jaṅgamā aññaṃ thāvaraṃ. Addhunoti kālassa. Samādapetvāti aññe samādapetvā. Uddissa ariyā tiṭṭhanti, esā ariyāna yācanā’’ti (jā. 1.7.59) vuttanayena yācitvāti attho.
৫০৭. রতনসম্মতন্তি মনুস্সানং উপভোগপরিভোগন্তি। দুতিযং।
507.Ratanasammatanti manussānaṃ upabhogaparibhoganti. Dutiyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৯. রতনৰগ্গো • 9. Ratanavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. রতনসিক্খাপদৰণ্ণনা • 2. Ratanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. রতনসিক্খাপদৰণ্ণনা • 2. Ratanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. রতনসিক্খাপদৰণ্ণনা • 2. Ratanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. রতনসিক্খাপদৰণ্ণনা • 2. Ratanasikkhāpadavaṇṇanā
