| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
2. ரதனஸிக்கா²பத³வண்ணனா
2. Ratanasikkhāpadavaṇṇanā
502-3. து³தியே – விஸ்ஸரித்வாதி பமுஸ்ஸித்வா. புண்ணபத்தங் நாம ஸததோ பஞ்ச கஹாபணா. க்யாஹங் கரிஸ்ஸாமீதி கிங் அஹங் கரிஸ்ஸாமி. ஆப⁴ரணங் ஓமுஞ்சித்வாதி மஹாலதங் நாம நவகோடிஅக்³க⁴னகங் அலங்காரங் அபனெத்வா.
502-3. Dutiye – vissaritvāti pamussitvā. Puṇṇapattaṃ nāma satato pañca kahāpaṇā. Kyāhaṃ karissāmīti kiṃ ahaṃ karissāmi. Ābharaṇaṃ omuñcitvāti mahālataṃ nāma navakoṭiagghanakaṃ alaṅkāraṃ apanetvā.
504. அந்தேவாஸீதி பரிசாரகோ.
504.Antevāsīti paricārako.
506. அபரிக்கி²த்தஸ்ஸ உபசாரோதி எத்த² உபசாரோ நாம ஆராமஸ்ஸ த்³வே லெட்³டு³பாதா – ‘‘ஆவஸத²ஸ்ஸ பன ஸுப்பபாதோ வா முஸலபாதோ வா’’தி மஹாபச்சரியங் வுத்தங். உக்³க³ண்ஹாதி ஆபத்தி பாசித்தியஸ்ஸாதி எத்த² ஜாதரூபரஜதங் அத்தனோ அத்தா²ய உக்³க³ண்ஹந்தஸ்ஸ வா உக்³க³ண்ஹாபெந்தஸ்ஸ வா நிஸ்ஸக்³கி³யங் பாசித்தியங், ஸங்க⁴க³ணபுக்³க³லசேதியனவகம்மானங் அத்தா²ய து³க்கடங், அவஸேஸங் முத்தாதி³ரதனங் அத்தனோ வா ஸங்கா⁴தீ³னங் வா அத்தா²ய உக்³க³ண்ஹந்தஸ்ஸ வா உக்³க³ண்ஹாபெந்தஸ்ஸ வா து³க்கடங். கப்பியவத்து² வா அகப்பியவத்து² வா ஹோது, அந்தமஸோ மாது கண்ணபிளந்த⁴னதாளபண்ணம்பி கி³ஹிஸந்தகங் ப⁴ண்டா³கா³ரிகஸீஸேன படிஸாமெந்தஸ்ஸ பாசித்தியமேவ.
506.Aparikkhittassa upacāroti ettha upacāro nāma ārāmassa dve leḍḍupātā – ‘‘āvasathassa pana suppapāto vā musalapāto vā’’ti mahāpaccariyaṃ vuttaṃ. Uggaṇhāti āpatti pācittiyassāti ettha jātarūparajataṃ attano atthāya uggaṇhantassa vā uggaṇhāpentassa vā nissaggiyaṃ pācittiyaṃ, saṅghagaṇapuggalacetiyanavakammānaṃ atthāya dukkaṭaṃ, avasesaṃ muttādiratanaṃ attano vā saṅghādīnaṃ vā atthāya uggaṇhantassa vā uggaṇhāpentassa vā dukkaṭaṃ. Kappiyavatthu vā akappiyavatthu vā hotu, antamaso mātu kaṇṇapiḷandhanatāḷapaṇṇampi gihisantakaṃ bhaṇḍāgārikasīsena paṭisāmentassa pācittiyameva.
ஸசே பன மாதாபிதூனங் ஸந்தகங் அவஸ்ஸங் படிஸாமேதப்³ப³ங் கப்பியப⁴ண்ட³ங் ஹோதி, அத்தனோ அத்தா²ய க³ஹெத்வா படிஸாமேதப்³ப³ங். ‘‘இத³ங் படிஸாமெத்வா தே³ஹீ’’தி வுத்தே பன ‘‘ந வட்டதீ’’தி படிக்கி²பிதப்³ப³ங். ஸசே ‘‘படிஸாமேஹீ’’தி பாதெத்வா க³ச்ச²ந்தி, பலிபோ³தோ⁴ நாம ஹோதி, படிஸாமேதுங் வட்டதி. விஹாரே கம்மங் கரொந்தா வட்³ட⁴கீஆத³யோ வா ராஜவல்லபா⁴ வா அத்தனோ உபகரணப⁴ண்ட³ங் வா ஸயனப⁴ண்ட³ங் வா ‘‘படிஸாமெத்வா தே³தா²’’தி வத³ந்தி, ச²ந்தே³னபி ப⁴யேனபி ந காதப்³ப³மேவ, கு³த்தட்டா²னங் பன த³ஸ்ஸேதுங் வட்டதி. ப³லக்காரேன பாதெத்வா க³தேஸு ச படிஸாமேதுங் வட்டதி.
Sace pana mātāpitūnaṃ santakaṃ avassaṃ paṭisāmetabbaṃ kappiyabhaṇḍaṃ hoti, attano atthāya gahetvā paṭisāmetabbaṃ. ‘‘Idaṃ paṭisāmetvā dehī’’ti vutte pana ‘‘na vaṭṭatī’’ti paṭikkhipitabbaṃ. Sace ‘‘paṭisāmehī’’ti pātetvā gacchanti, palibodho nāma hoti, paṭisāmetuṃ vaṭṭati. Vihāre kammaṃ karontā vaḍḍhakīādayo vā rājavallabhā vā attano upakaraṇabhaṇḍaṃ vā sayanabhaṇḍaṃ vā ‘‘paṭisāmetvā dethā’’ti vadanti, chandenapi bhayenapi na kātabbameva, guttaṭṭhānaṃ pana dassetuṃ vaṭṭati. Balakkārena pātetvā gatesu ca paṭisāmetuṃ vaṭṭati.
அஜ்ஜா²ராமே வா அஜ்ஜா²வஸதே² வாதி எத்த² ஸசே மஹாவிஹாரஸதி³ஸோ மஹாராமோ ஹோதி, தத்த² பாகாரபரிக்கி²த்தே பரிவேணே யத்த² பி⁴க்கூ²ஹி வா ஸாமணேரேஹி வா க³ஹிதங் ப⁴விஸ்ஸதீதி ஸங்கா உப்பஜ்ஜதி, தாதி³ஸே ஏவ டா²னே உக்³க³ண்ஹித்வா வா உக்³க³ண்ஹாபெத்வா வா ட²பேதப்³ப³ங். மஹாபோ³தி⁴த்³வாரகொட்ட²கஅம்ப³ங்க³ணஸதி³ஸேஸு பன மஹாஜனஸஞ்சரணட்டா²னேஸு ந க³ஹேதப்³ப³ங், பலிபோ³தோ⁴ ந ஹோதி. குருந்தி³யங் பன வுத்தங் ‘‘ஏகோ மக்³க³ங் க³ச்ச²ந்தோ நிமனுஸ்ஸட்டா²னே கிஞ்சி ப⁴ண்ட³ங் பஸ்ஸதி, ஆகிண்ணமனுஸ்ஸேபி ஜாதே மனுஸ்ஸா தமேவ பி⁴க்கு²ங் ஆஸங்கந்தி, தஸ்மா மக்³கா³ ஓக்கம்ம நிஸீதி³தப்³ப³ங். ஸாமிகேஸு ஆக³தேஸு தங் ஆசிக்கி²தப்³ப³ங். ஸசே ஸாமிகே ந பஸ்ஸதி பதிரூபங் கரிஸ்ஸதீ’’தி.
Ajjhārāme vā ajjhāvasathe vāti ettha sace mahāvihārasadiso mahārāmo hoti, tattha pākāraparikkhitte pariveṇe yattha bhikkhūhi vā sāmaṇerehi vā gahitaṃ bhavissatīti saṅkā uppajjati, tādise eva ṭhāne uggaṇhitvā vā uggaṇhāpetvā vā ṭhapetabbaṃ. Mahābodhidvārakoṭṭhakaambaṅgaṇasadisesu pana mahājanasañcaraṇaṭṭhānesu na gahetabbaṃ, palibodho na hoti. Kurundiyaṃ pana vuttaṃ ‘‘eko maggaṃ gacchanto nimanussaṭṭhāne kiñci bhaṇḍaṃ passati, ākiṇṇamanussepi jāte manussā tameva bhikkhuṃ āsaṅkanti, tasmā maggā okkamma nisīditabbaṃ. Sāmikesu āgatesu taṃ ācikkhitabbaṃ. Sace sāmike na passati patirūpaṃ karissatī’’ti.
ரூபேன வா நிமித்தேன வா ஸஞ்ஞாணங் கத்வாதி எத்த² ரூபங் நாம அந்தோப⁴ண்டி³காய ப⁴ண்ட³ங்; தஸ்மா ப⁴ண்டி³கங் முஞ்சித்வா க³ணெத்வா எத்தகா கஹாபணா வா ஜாதரூபரஜதங் வாதி ஸல்லக்கே²தப்³ப³ங். நிமித்தந்தி லஞ்ச²னாதி³; தஸ்மா லஞ்சி²தாய ப⁴ண்டி³காய மத்திகாலஞ்ச²னந்தி வா லாகா²லஞ்ச²னந்தி வா நீலபிலோதிகாய ப⁴ண்டி³கா கதாதி வா ஸேதபிலோதிகாய கதாதி வா ஏவமாதி³ ஸப்³ப³ங் ஸல்லக்கே²தப்³ப³ங்.
Rūpena vā nimittena vā saññāṇaṃ katvāti ettha rūpaṃ nāma antobhaṇḍikāya bhaṇḍaṃ; tasmā bhaṇḍikaṃ muñcitvā gaṇetvā ettakā kahāpaṇā vā jātarūparajataṃ vāti sallakkhetabbaṃ. Nimittanti lañchanādi; tasmā lañchitāya bhaṇḍikāya mattikālañchananti vā lākhālañchananti vā nīlapilotikāya bhaṇḍikā katāti vā setapilotikāya katāti vā evamādi sabbaṃ sallakkhetabbaṃ.
பி⁴க்கூ² பதிரூபாதி லஜ்ஜினோ குக்குச்சகா. லோலஜாதிகானஞ்ஹி ஹத்தே² ட²பேதுங் ந லப⁴தி. யோ பன நேவ தம்ஹா ஆவாஸா பக்கமதி, ந ஸாமிகே பஸ்ஸதி, தேனாபி அத்தனோ சீவராதி³மூலங் ந காதப்³ப³ங்; தா²வரங் பன ஸேனாஸனங் வா சேதியங் வா பொக்க²ரணீ வா காரேதப்³பா³. ஸசே தீ³க⁴ஸ்ஸ அத்³து⁴னோ அச்சயேன ஸாமிகோ ஆக³ச்ச²தி, ‘‘உபாஸக தவ ஸந்தகேன இத³ங் நாம கதங், அனுமோதா³ஹீ’’தி வத்தப்³போ³. ஸசே அனுமோத³தி, இச்சேதங் குஸலங்; நோ சே அனுமோத³தி, ‘‘மம த⁴னங் தே³தா²’’தி சோதே³தியேவ, அஞ்ஞங் ஸமாத³பெத்வா தா³தப்³ப³ங்.
Bhikkhū patirūpāti lajjino kukkuccakā. Lolajātikānañhi hatthe ṭhapetuṃ na labhati. Yo pana neva tamhā āvāsā pakkamati, na sāmike passati, tenāpi attano cīvarādimūlaṃ na kātabbaṃ; thāvaraṃ pana senāsanaṃ vā cetiyaṃ vā pokkharaṇī vā kāretabbā. Sace dīghassa addhuno accayena sāmiko āgacchati, ‘‘upāsaka tava santakena idaṃ nāma kataṃ, anumodāhī’’ti vattabbo. Sace anumodati, iccetaṃ kusalaṃ; no ce anumodati, ‘‘mama dhanaṃ dethā’’ti codetiyeva, aññaṃ samādapetvā dātabbaṃ.
507. ரதனஸம்மதங் விஸ்ஸாஸங் க³ண்ஹாதீதிஆதீ³ஸு ஆமாஸமேவ ஸந்தா⁴ய வுத்தங். அனாமாஸங் ந வட்டதியேவ. ஸேஸமெத்த² உத்தானமேவ. ச²ஸமுட்டா²னங் – கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
507.Ratanasammataṃvissāsaṃ gaṇhātītiādīsu āmāsameva sandhāya vuttaṃ. Anāmāsaṃ na vaṭṭatiyeva. Sesamettha uttānameva. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ரதனஸிக்கா²பத³ங் து³தியங்.
Ratanasikkhāpadaṃ dutiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ரதனவக்³கோ³ • 9. Ratanavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. ரதனஸிக்கா²பத³ங் • 2. Ratanasikkhāpadaṃ
