| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. ரதனஸிக்கா²பத³வண்ணனா
2. Ratanasikkhāpadavaṇṇanā
முத்தாதி³த³ஸவித⁴ந்தி ‘‘முத்தா மணி வேளுரியோ ஸங்கோ² ஸிலா பவாளங் ரஜதங் ஜாதரூபங் லோஹிதங்கோ மஸாரக³ல்ல’’ந்தி (பாசி॰ 506) த³ஸவித⁴ங் ரதனங். அஜ்ஜா²வஸதே²தி கே³ஹே. தேனாஹ ‘‘பரிக்கி²த்தஸ்ஸா’’திஆதி³, பரிக்கி²த்தஸ்ஸ ஆவஸத²ஸ்ஸாதி அத்தோ². ஆவஸதோ²தி செத்த² அந்தோகா³மே நிவிட்ட²கே³ஹங் அதி⁴ப்பேதங். ஆராமே நிவிட்ட²கே³ஹங் பன அஜ்ஜா²ராமக்³க³ஹணேனேவ க³ஹிதங். ‘‘ஆவஸதோ²தி செத்த² அந்தோஆராமே வா ஹோது, அஞ்ஞத்த² வா, அத்தனோ வஸனட்டா²னங் வுச்சதீ’’தி (ஸாரத்த²॰ டீ॰ பாசித்திய 3.506) கேசி. ஸப்³பே³ஸம்பி அத்தா²ய து³க்கடமேவாதி அத்தனோ வா தேஸங் ஸங்கா⁴தீ³னங் வா அத்தா²ய உக்³க³ண்ஹந்தஸ்ஸ வா உக்³க³ண்ஹாபெந்தஸ்ஸ வா து³க்கடமேவ. ஸசே பன மாதாபிதூனங் ஸந்தகங் அவஸ்ஸங் படிஸாமேதப்³ப³ங் கப்பியப⁴ண்ட³ங் ஹோதி, அத்தனோ அத்தா²ய க³ஹெத்வா படிஸாமேதப்³ப³ந்தி ஆஹ ‘‘தாதி³ஸங் பனா’’திஆதி³. தாதி³ஸந்தி யங் மாதாபிதூனங் ஸந்தகங் அவஸ்ஸங் படிஸாமேதப்³ப³ங் கப்பியப⁴ண்ட³ங், தாதி³ஸங். ச²ந்தே³னபி ப⁴யேனபீதி வட்³ட⁴கிஆதீ³ஸு ச²ந்தே³னபி, ராஜவல்லபே⁴ஸு ப⁴யேனபி.
Muttādidasavidhanti ‘‘muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅko masāragalla’’nti (pāci. 506) dasavidhaṃ ratanaṃ. Ajjhāvasatheti gehe. Tenāha ‘‘parikkhittassā’’tiādi, parikkhittassa āvasathassāti attho. Āvasathoti cettha antogāme niviṭṭhagehaṃ adhippetaṃ. Ārāme niviṭṭhagehaṃ pana ajjhārāmaggahaṇeneva gahitaṃ. ‘‘Āvasathoti cettha antoārāme vā hotu, aññattha vā, attano vasanaṭṭhānaṃ vuccatī’’ti (sārattha. ṭī. pācittiya 3.506) keci. Sabbesampi atthāya dukkaṭamevāti attano vā tesaṃ saṅghādīnaṃ vā atthāya uggaṇhantassa vā uggaṇhāpentassa vā dukkaṭameva. Sace pana mātāpitūnaṃ santakaṃ avassaṃ paṭisāmetabbaṃ kappiyabhaṇḍaṃ hoti, attano atthāya gahetvā paṭisāmetabbanti āha ‘‘tādisaṃ panā’’tiādi. Tādisanti yaṃ mātāpitūnaṃ santakaṃ avassaṃ paṭisāmetabbaṃ kappiyabhaṇḍaṃ, tādisaṃ. Chandenapi bhayenapīti vaḍḍhakiādīsu chandenapi, rājavallabhesu bhayenapi.
தாதி³ஸே டா²னேதி மஹாவிஹாரஸதி³ஸஸ்ஸ மஹாராமஸ்ஸ பாகாரபரிக்கி²த்தே பரிவேணே. ஸஞ்ஞாணங் கத்வாதி ‘‘எத்தகா கஹாபணா’’திஆதி³னா ரூபேன வா லஞ்ச²னாதி³னிமித்தேன வா ஸஞ்ஞாணங் கத்வா, ஸல்லக்கெ²த்வாதி அத்தோ². பதிரூபானங் பி⁴க்கூ²னங் ஹத்தே²தி லஜ்ஜீனங் குக்குச்சகானங் பி⁴க்கூ²னங் ஹத்தே². லோலஜாதிகானஞ்ஹி ஹத்தே² ட²பேதுங் ந லப்³ப⁴தி. நேவ பக்கமதீதி நேவ தம்ஹா ஆவாஸா பக்கமதி. ‘‘தா²வரங் ஸேனாஸனங் வா’’திஆதி³னா அத்தனோ சீவராதி³மூலங் ந காதப்³ப³ந்தி (பாசி॰ அட்ட²॰ 506) த³ஸ்ஸேதி. தங் த³ஸ்ஸெத்வாதி யங் தா²வரஸேனாஸனாதி³ கதங், தங் உபாஸக தவ ஸந்தகேன இத³ங் நாம கதந்தி ஏவங் த³ஸ்ஸெத்வா. ஸமாத³பெத்வாதி அஞ்ஞங் ஸமாத³பெத்வா, ‘‘உத்³தி³ஸ்ஸ அரியா திட்ட²ந்தி, ஏஸா அரியான யாசனா’’தி வுத்தனயேன யாசித்வாதி அத்தோ².
Tādise ṭhāneti mahāvihārasadisassa mahārāmassa pākāraparikkhitte pariveṇe. Saññāṇaṃ katvāti ‘‘ettakā kahāpaṇā’’tiādinā rūpena vā lañchanādinimittena vā saññāṇaṃ katvā, sallakkhetvāti attho. Patirūpānaṃ bhikkhūnaṃ hattheti lajjīnaṃ kukkuccakānaṃ bhikkhūnaṃ hatthe. Lolajātikānañhi hatthe ṭhapetuṃ na labbhati. Neva pakkamatīti neva tamhā āvāsā pakkamati. ‘‘Thāvaraṃ senāsanaṃ vā’’tiādinā attano cīvarādimūlaṃ na kātabbanti (pāci. aṭṭha. 506) dasseti. Taṃ dassetvāti yaṃ thāvarasenāsanādi kataṃ, taṃ upāsaka tava santakena idaṃ nāma katanti evaṃ dassetvā. Samādapetvāti aññaṃ samādapetvā, ‘‘uddissa ariyā tiṭṭhanti, esā ariyāna yācanā’’ti vuttanayena yācitvāti attho.
அனுஞ்ஞாதட்டா²னேதி அஜ்ஜா²ராமஅஜ்ஜா²வஸதே². ஆமாஸந்தி ஆமஸிதப்³ப³ஞ்சேவ படிஸாமேதப்³ப³ஞ்ச வத்தா²தி³.
Anuññātaṭṭhāneti ajjhārāmaajjhāvasathe. Āmāsanti āmasitabbañceva paṭisāmetabbañca vatthādi.
ரதனஸிக்கா²பத³வண்ணனா நிட்டி²தா.
Ratanasikkhāpadavaṇṇanā niṭṭhitā.
