| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
2. ரதனஸிக்கா²பத³வண்ணனா
2. Ratanasikkhāpadavaṇṇanā
502. து³தியே மஹாலதங் நாமாதி பதிகுலங் க³ச்ச²ந்தியா கிர தஸ்ஸா பிதா மஹாலதாபிளந்த⁴னங் நாம காராபேஸி. தஸ்மிங் பிளந்த⁴னே சதஸ்ஸோ வஜிரனாளியோ தத்த² தத்த² அப்பேதப்³ப³ட்டா²னே அப்பனவஸேன வினியோக³ங் அக³மங்ஸு, முத்தானங் ஏகாத³ஸ நாளியோ, பவாளஸ்ஸ த்³வாவீஸதி நாளியோ, மணீனங் தெத்திங்ஸ நாளியோ. இதி ஏதேஹி ச அஞ்ஞேஹி ச வேளுரியலோஹிதங்கமஸாரக³ல்லாதீ³ஹி ஸத்தவண்ணேஹி ச ரதனேஹி நிட்டா²னங் அக³மாஸி . தங் ஸீஸே படிமுக்கங் யாவ பாத³பிட்டி²யா ப⁴ஸ்ஸதி, பஞ்சன்னங் ஹத்தீ²னங் ப³லங் தா⁴ரயமானாவ இத்தீ² நங் தா⁴ரேதுங் ஸக்கோதி. தங் ஸந்தா⁴யேதங் வுத்தங்.
502. Dutiye mahālataṃ nāmāti patikulaṃ gacchantiyā kira tassā pitā mahālatāpiḷandhanaṃ nāma kārāpesi. Tasmiṃ piḷandhane catasso vajiranāḷiyo tattha tattha appetabbaṭṭhāne appanavasena viniyogaṃ agamaṃsu, muttānaṃ ekādasa nāḷiyo, pavāḷassa dvāvīsati nāḷiyo, maṇīnaṃ tettiṃsa nāḷiyo. Iti etehi ca aññehi ca veḷuriyalohitaṅkamasāragallādīhi sattavaṇṇehi ca ratanehi niṭṭhānaṃ agamāsi . Taṃ sīse paṭimukkaṃ yāva pādapiṭṭhiyā bhassati, pañcannaṃ hatthīnaṃ balaṃ dhārayamānāva itthī naṃ dhāretuṃ sakkoti. Taṃ sandhāyetaṃ vuttaṃ.
506. ஆவஸத²ஸ்ஸ பன ஸுப்பபாதோ வா முஸலபாதோ வா உபசாரோ நாமாதி யோஜேதப்³ப³ங். ஆவஸதோ²தி செத்த² அந்தோஆராமே வா ஹோது அஞ்ஞத்த² வா, அத்தனோ வஸனட்டா²னங் வுச்சதி. ச²ந்தே³னபி ப⁴யேனபீதி வட்³ட⁴கீஆதீ³ஸு ச²ந்தே³ன, ராஜவல்லபே⁴ஸு ப⁴யேன. தமேவ பி⁴க்கு²ங் ஆஸங்கந்தீதி விஸ்ஸரித்வா க³மனகாலே அத்தனோ பச்ச²தோ அஞ்ஞஸ்ஸாபா⁴வா ஆஸங்கந்தி. பதிரூபங் நாம ரதனஸம்மதே பங்ஸுகூலக்³க³ஹணங் வா ரதனே நிருஸ்ஸுக்கக³மனங் வா. யதி³ ஹி தங் ரதனஸம்மதங் ஆமாஸங் சே, ‘‘நத்தி² ஏதஸ்ஸ ஸாமீ’’தி பங்ஸுகூலங் க³ஹெஸ்ஸதி. அனாமாஸங் சே, ‘‘நத்தி² ஏதஸ்ஸ ஸாமீ’’தி பங்ஸுகூலசி²ன்னபலிபோ³தோ⁴ நிரபெக்கோ² க³மிஸ்ஸதி. ஸமாத³பெத்வாதி அஞ்ஞங் ஸமாத³பெத்வா, ‘‘உத்³தி³ஸ்ஸ அரியா திட்ட²ந்தி, ஏஸா அரியானயாசனா’’தி (ஜா॰ 1.7.59) வுத்தனயேன யாசித்வாதி அத்தோ². ஸேஸமெத்த² உத்தானமேவ. அனநுஞ்ஞாதகரணங், பரஸந்தகதா, விஸ்ஸாஸக்³கா³ஹபங்ஸுகூலஸஞ்ஞானங் அபா⁴வோ, உக்³க³ஹணங் வா உக்³க³ஹாபனங் வாதி இமானி பனெத்த² சத்தாரி அங்கா³னி.
506. Āvasathassa pana suppapāto vā musalapāto vā upacāro nāmāti yojetabbaṃ. Āvasathoti cettha antoārāme vā hotu aññattha vā, attano vasanaṭṭhānaṃ vuccati. Chandenapi bhayenapīti vaḍḍhakīādīsu chandena, rājavallabhesu bhayena. Tameva bhikkhuṃ āsaṅkantīti vissaritvā gamanakāle attano pacchato aññassābhāvā āsaṅkanti. Patirūpaṃ nāma ratanasammate paṃsukūlaggahaṇaṃ vā ratane nirussukkagamanaṃ vā. Yadi hi taṃ ratanasammataṃ āmāsaṃ ce, ‘‘natthi etassa sāmī’’ti paṃsukūlaṃ gahessati. Anāmāsaṃ ce, ‘‘natthi etassa sāmī’’ti paṃsukūlachinnapalibodho nirapekkho gamissati. Samādapetvāti aññaṃ samādapetvā, ‘‘uddissa ariyā tiṭṭhanti, esā ariyānayācanā’’ti (jā. 1.7.59) vuttanayena yācitvāti attho. Sesamettha uttānameva. Ananuññātakaraṇaṃ, parasantakatā, vissāsaggāhapaṃsukūlasaññānaṃ abhāvo, uggahaṇaṃ vā uggahāpanaṃ vāti imāni panettha cattāri aṅgāni.
ரதனஸிக்கா²பத³வண்ணனா நிட்டி²தா.
Ratanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ரதனவக்³கோ³ • 9. Ratanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. ரதனஸிக்கா²பத³வண்ணனா • 2. Ratanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. ரதனஸிக்கா²பத³ங் • 2. Ratanasikkhāpadaṃ
