| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
২. রতনসিক্খাপদৰণ্ণনা
2. Ratanasikkhāpadavaṇṇanā
৫০২-৩. দুতিযে – ৰিস্সরিত্ৰাতি পমুস্সিত্ৰা। পুণ্ণপত্তং নাম সততো পঞ্চ কহাপণা। ক্যাহং করিস্সামীতি কিং অহং করিস্সামি। আভরণং ওমুঞ্চিত্ৰাতি মহালতং নাম নৰকোটিঅগ্ঘনকং অলঙ্কারং অপনেত্ৰা।
502-3. Dutiye – vissaritvāti pamussitvā. Puṇṇapattaṃ nāma satato pañca kahāpaṇā. Kyāhaṃ karissāmīti kiṃ ahaṃ karissāmi. Ābharaṇaṃ omuñcitvāti mahālataṃ nāma navakoṭiagghanakaṃ alaṅkāraṃ apanetvā.
৫০৪. অন্তেৰাসীতি পরিচারকো।
504.Antevāsīti paricārako.
৫০৬. অপরিক্খিত্তস্স উপচারোতি এত্থ উপচারো নাম আরামস্স দ্ৰে লেড্ডুপাতা – ‘‘আৰসথস্স পন সুপ্পপাতো ৰা মুসলপাতো ৰা’’তি মহাপচ্চরিযং ৰুত্তং। উগ্গণ্হাতি আপত্তি পাচিত্তিযস্সাতি এত্থ জাতরূপরজতং অত্তনো অত্থায উগ্গণ্হন্তস্স ৰা উগ্গণ্হাপেন্তস্স ৰা নিস্সগ্গিযং পাচিত্তিযং, সঙ্ঘগণপুগ্গলচেতিযনৰকম্মানং অত্থায দুক্কটং, অৰসেসং মুত্তাদিরতনং অত্তনো ৰা সঙ্ঘাদীনং ৰা অত্থায উগ্গণ্হন্তস্স ৰা উগ্গণ্হাপেন্তস্স ৰা দুক্কটং। কপ্পিযৰত্থু ৰা অকপ্পিযৰত্থু ৰা হোতু, অন্তমসো মাতু কণ্ণপিল়ন্ধনতাল়পণ্ণম্পি গিহিসন্তকং ভণ্ডাগারিকসীসেন পটিসামেন্তস্স পাচিত্তিযমেৰ।
506.Aparikkhittassa upacāroti ettha upacāro nāma ārāmassa dve leḍḍupātā – ‘‘āvasathassa pana suppapāto vā musalapāto vā’’ti mahāpaccariyaṃ vuttaṃ. Uggaṇhāti āpatti pācittiyassāti ettha jātarūparajataṃ attano atthāya uggaṇhantassa vā uggaṇhāpentassa vā nissaggiyaṃ pācittiyaṃ, saṅghagaṇapuggalacetiyanavakammānaṃ atthāya dukkaṭaṃ, avasesaṃ muttādiratanaṃ attano vā saṅghādīnaṃ vā atthāya uggaṇhantassa vā uggaṇhāpentassa vā dukkaṭaṃ. Kappiyavatthu vā akappiyavatthu vā hotu, antamaso mātu kaṇṇapiḷandhanatāḷapaṇṇampi gihisantakaṃ bhaṇḍāgārikasīsena paṭisāmentassa pācittiyameva.
সচে পন মাতাপিতূনং সন্তকং অৰস্সং পটিসামেতব্বং কপ্পিযভণ্ডং হোতি, অত্তনো অত্থায গহেত্ৰা পটিসামেতব্বং। ‘‘ইদং পটিসামেত্ৰা দেহী’’তি ৰুত্তে পন ‘‘ন ৰট্টতী’’তি পটিক্খিপিতব্বং। সচে ‘‘পটিসামেহী’’তি পাতেত্ৰা গচ্ছন্তি, পলিবোধো নাম হোতি, পটিসামেতুং ৰট্টতি। ৰিহারে কম্মং করোন্তা ৰড্ঢকীআদযো ৰা রাজৰল্লভা ৰা অত্তনো উপকরণভণ্ডং ৰা সযনভণ্ডং ৰা ‘‘পটিসামেত্ৰা দেথা’’তি ৰদন্তি, ছন্দেনপি ভযেনপি ন কাতব্বমেৰ, গুত্তট্ঠানং পন দস্সেতুং ৰট্টতি। বলক্কারেন পাতেত্ৰা গতেসু চ পটিসামেতুং ৰট্টতি।
Sace pana mātāpitūnaṃ santakaṃ avassaṃ paṭisāmetabbaṃ kappiyabhaṇḍaṃ hoti, attano atthāya gahetvā paṭisāmetabbaṃ. ‘‘Idaṃ paṭisāmetvā dehī’’ti vutte pana ‘‘na vaṭṭatī’’ti paṭikkhipitabbaṃ. Sace ‘‘paṭisāmehī’’ti pātetvā gacchanti, palibodho nāma hoti, paṭisāmetuṃ vaṭṭati. Vihāre kammaṃ karontā vaḍḍhakīādayo vā rājavallabhā vā attano upakaraṇabhaṇḍaṃ vā sayanabhaṇḍaṃ vā ‘‘paṭisāmetvā dethā’’ti vadanti, chandenapi bhayenapi na kātabbameva, guttaṭṭhānaṃ pana dassetuṃ vaṭṭati. Balakkārena pātetvā gatesu ca paṭisāmetuṃ vaṭṭati.
অজ্ঝারামে ৰা অজ্ঝাৰসথে ৰাতি এত্থ সচে মহাৰিহারসদিসো মহারামো হোতি, তত্থ পাকারপরিক্খিত্তে পরিৰেণে যত্থ ভিক্খূহি ৰা সামণেরেহি ৰা গহিতং ভৰিস্সতীতি সঙ্কা উপ্পজ্জতি, তাদিসে এৰ ঠানে উগ্গণ্হিত্ৰা ৰা উগ্গণ্হাপেত্ৰা ৰা ঠপেতব্বং। মহাবোধিদ্ৰারকোট্ঠকঅম্বঙ্গণসদিসেসু পন মহাজনসঞ্চরণট্ঠানেসু ন গহেতব্বং, পলিবোধো ন হোতি। কুরুন্দিযং পন ৰুত্তং ‘‘একো মগ্গং গচ্ছন্তো নিমনুস্সট্ঠানে কিঞ্চি ভণ্ডং পস্সতি, আকিণ্ণমনুস্সেপি জাতে মনুস্সা তমেৰ ভিক্খুং আসঙ্কন্তি, তস্মা মগ্গা ওক্কম্ম নিসীদিতব্বং। সামিকেসু আগতেসু তং আচিক্খিতব্বং। সচে সামিকে ন পস্সতি পতিরূপং করিস্সতী’’তি।
Ajjhārāme vā ajjhāvasathe vāti ettha sace mahāvihārasadiso mahārāmo hoti, tattha pākāraparikkhitte pariveṇe yattha bhikkhūhi vā sāmaṇerehi vā gahitaṃ bhavissatīti saṅkā uppajjati, tādise eva ṭhāne uggaṇhitvā vā uggaṇhāpetvā vā ṭhapetabbaṃ. Mahābodhidvārakoṭṭhakaambaṅgaṇasadisesu pana mahājanasañcaraṇaṭṭhānesu na gahetabbaṃ, palibodho na hoti. Kurundiyaṃ pana vuttaṃ ‘‘eko maggaṃ gacchanto nimanussaṭṭhāne kiñci bhaṇḍaṃ passati, ākiṇṇamanussepi jāte manussā tameva bhikkhuṃ āsaṅkanti, tasmā maggā okkamma nisīditabbaṃ. Sāmikesu āgatesu taṃ ācikkhitabbaṃ. Sace sāmike na passati patirūpaṃ karissatī’’ti.
রূপেন ৰা নিমিত্তেন ৰা সঞ্ঞাণং কত্ৰাতি এত্থ রূপং নাম অন্তোভণ্ডিকায ভণ্ডং; তস্মা ভণ্ডিকং মুঞ্চিত্ৰা গণেত্ৰা এত্তকা কহাপণা ৰা জাতরূপরজতং ৰাতি সল্লক্খেতব্বং। নিমিত্তন্তি লঞ্ছনাদি; তস্মা লঞ্ছিতায ভণ্ডিকায মত্তিকালঞ্ছনন্তি ৰা লাখালঞ্ছনন্তি ৰা নীলপিলোতিকায ভণ্ডিকা কতাতি ৰা সেতপিলোতিকায কতাতি ৰা এৰমাদি সব্বং সল্লক্খেতব্বং।
Rūpena vā nimittena vā saññāṇaṃ katvāti ettha rūpaṃ nāma antobhaṇḍikāya bhaṇḍaṃ; tasmā bhaṇḍikaṃ muñcitvā gaṇetvā ettakā kahāpaṇā vā jātarūparajataṃ vāti sallakkhetabbaṃ. Nimittanti lañchanādi; tasmā lañchitāya bhaṇḍikāya mattikālañchananti vā lākhālañchananti vā nīlapilotikāya bhaṇḍikā katāti vā setapilotikāya katāti vā evamādi sabbaṃ sallakkhetabbaṃ.
ভিক্খূ পতিরূপাতি লজ্জিনো কুক্কুচ্চকা। লোলজাতিকানঞ্হি হত্থে ঠপেতুং ন লভতি। যো পন নেৰ তম্হা আৰাসা পক্কমতি, ন সামিকে পস্সতি, তেনাপি অত্তনো চীৰরাদিমূলং ন কাতব্বং; থাৰরং পন সেনাসনং ৰা চেতিযং ৰা পোক্খরণী ৰা কারেতব্বা। সচে দীঘস্স অদ্ধুনো অচ্চযেন সামিকো আগচ্ছতি, ‘‘উপাসক তৰ সন্তকেন ইদং নাম কতং, অনুমোদাহী’’তি ৰত্তব্বো। সচে অনুমোদতি, ইচ্চেতং কুসলং; নো চে অনুমোদতি, ‘‘মম ধনং দেথা’’তি চোদেতিযেৰ, অঞ্ঞং সমাদপেত্ৰা দাতব্বং।
Bhikkhū patirūpāti lajjino kukkuccakā. Lolajātikānañhi hatthe ṭhapetuṃ na labhati. Yo pana neva tamhā āvāsā pakkamati, na sāmike passati, tenāpi attano cīvarādimūlaṃ na kātabbaṃ; thāvaraṃ pana senāsanaṃ vā cetiyaṃ vā pokkharaṇī vā kāretabbā. Sace dīghassa addhuno accayena sāmiko āgacchati, ‘‘upāsaka tava santakena idaṃ nāma kataṃ, anumodāhī’’ti vattabbo. Sace anumodati, iccetaṃ kusalaṃ; no ce anumodati, ‘‘mama dhanaṃ dethā’’ti codetiyeva, aññaṃ samādapetvā dātabbaṃ.
৫০৭. রতনসম্মতং ৰিস্সাসং গণ্হাতীতিআদীসু আমাসমেৰ সন্ধায ৰুত্তং। অনামাসং ন ৰট্টতিযেৰ। সেসমেত্থ উত্তানমেৰ। ছসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি।
507.Ratanasammataṃvissāsaṃ gaṇhātītiādīsu āmāsameva sandhāya vuttaṃ. Anāmāsaṃ na vaṭṭatiyeva. Sesamettha uttānameva. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
রতনসিক্খাপদং দুতিযং।
Ratanasikkhāpadaṃ dutiyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৯. রতনৰগ্গো • 9. Ratanavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. রতনসিক্খাপদৰণ্ণনা • 2. Ratanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. রতনসিক্খাপদৰণ্ণনা • 2. Ratanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. রতনসিক্খাপদৰণ্ণনা • 2. Ratanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২. রতনসিক্খাপদং • 2. Ratanasikkhāpadaṃ
