| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
২. রতনসিক্খাপদৰণ্ণনা
2. Ratanasikkhāpadavaṇṇanā
মুত্তাদিদসৰিধন্তি ‘‘মুত্তা মণি ৰেল়ুরিযো সঙ্খো সিলা পৰাল়ং রজতং জাতরূপং লোহিতঙ্কো মসারগল্ল’’ন্তি (পাচি॰ ৫০৬) দসৰিধং রতনং। অজ্ঝাৰসথেতি গেহে। তেনাহ ‘‘পরিক্খিত্তস্সা’’তিআদি, পরিক্খিত্তস্স আৰসথস্সাতি অত্থো। আৰসথোতি চেত্থ অন্তোগামে নিৰিট্ঠগেহং অধিপ্পেতং। আরামে নিৰিট্ঠগেহং পন অজ্ঝারামগ্গহণেনেৰ গহিতং। ‘‘আৰসথোতি চেত্থ অন্তোআরামে ৰা হোতু, অঞ্ঞত্থ ৰা, অত্তনো ৰসনট্ঠানং ৰুচ্চতী’’তি (সারত্থ॰ টী॰ পাচিত্তিয ৩.৫০৬) কেচি। সব্বেসম্পি অত্থায দুক্কটমেৰাতি অত্তনো ৰা তেসং সঙ্ঘাদীনং ৰা অত্থায উগ্গণ্হন্তস্স ৰা উগ্গণ্হাপেন্তস্স ৰা দুক্কটমেৰ। সচে পন মাতাপিতূনং সন্তকং অৰস্সং পটিসামেতব্বং কপ্পিযভণ্ডং হোতি, অত্তনো অত্থায গহেত্ৰা পটিসামেতব্বন্তি আহ ‘‘তাদিসং পনা’’তিআদি। তাদিসন্তি যং মাতাপিতূনং সন্তকং অৰস্সং পটিসামেতব্বং কপ্পিযভণ্ডং, তাদিসং। ছন্দেনপি ভযেনপীতি ৰড্ঢকিআদীসু ছন্দেনপি, রাজৰল্লভেসু ভযেনপি।
Muttādidasavidhanti ‘‘muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅko masāragalla’’nti (pāci. 506) dasavidhaṃ ratanaṃ. Ajjhāvasatheti gehe. Tenāha ‘‘parikkhittassā’’tiādi, parikkhittassa āvasathassāti attho. Āvasathoti cettha antogāme niviṭṭhagehaṃ adhippetaṃ. Ārāme niviṭṭhagehaṃ pana ajjhārāmaggahaṇeneva gahitaṃ. ‘‘Āvasathoti cettha antoārāme vā hotu, aññattha vā, attano vasanaṭṭhānaṃ vuccatī’’ti (sārattha. ṭī. pācittiya 3.506) keci. Sabbesampi atthāya dukkaṭamevāti attano vā tesaṃ saṅghādīnaṃ vā atthāya uggaṇhantassa vā uggaṇhāpentassa vā dukkaṭameva. Sace pana mātāpitūnaṃ santakaṃ avassaṃ paṭisāmetabbaṃ kappiyabhaṇḍaṃ hoti, attano atthāya gahetvā paṭisāmetabbanti āha ‘‘tādisaṃ panā’’tiādi. Tādisanti yaṃ mātāpitūnaṃ santakaṃ avassaṃ paṭisāmetabbaṃ kappiyabhaṇḍaṃ, tādisaṃ. Chandenapi bhayenapīti vaḍḍhakiādīsu chandenapi, rājavallabhesu bhayenapi.
তাদিসে ঠানেতি মহাৰিহারসদিসস্স মহারামস্স পাকারপরিক্খিত্তে পরিৰেণে। সঞ্ঞাণং কত্ৰাতি ‘‘এত্তকা কহাপণা’’তিআদিনা রূপেন ৰা লঞ্ছনাদিনিমিত্তেন ৰা সঞ্ঞাণং কত্ৰা, সল্লক্খেত্ৰাতি অত্থো। পতিরূপানং ভিক্খূনং হত্থেতি লজ্জীনং কুক্কুচ্চকানং ভিক্খূনং হত্থে। লোলজাতিকানঞ্হি হত্থে ঠপেতুং ন লব্ভতি। নেৰ পক্কমতীতি নেৰ তম্হা আৰাসা পক্কমতি। ‘‘থাৰরং সেনাসনং ৰা’’তিআদিনা অত্তনো চীৰরাদিমূলং ন কাতব্বন্তি (পাচি॰ অট্ঠ॰ ৫০৬) দস্সেতি। তং দস্সেত্ৰাতি যং থাৰরসেনাসনাদি কতং, তং উপাসক তৰ সন্তকেন ইদং নাম কতন্তি এৰং দস্সেত্ৰা। সমাদপেত্ৰাতি অঞ্ঞং সমাদপেত্ৰা, ‘‘উদ্দিস্স অরিযা তিট্ঠন্তি, এসা অরিযান যাচনা’’তি ৰুত্তনযেন যাচিত্ৰাতি অত্থো।
Tādise ṭhāneti mahāvihārasadisassa mahārāmassa pākāraparikkhitte pariveṇe. Saññāṇaṃ katvāti ‘‘ettakā kahāpaṇā’’tiādinā rūpena vā lañchanādinimittena vā saññāṇaṃ katvā, sallakkhetvāti attho. Patirūpānaṃ bhikkhūnaṃ hattheti lajjīnaṃ kukkuccakānaṃ bhikkhūnaṃ hatthe. Lolajātikānañhi hatthe ṭhapetuṃ na labbhati. Neva pakkamatīti neva tamhā āvāsā pakkamati. ‘‘Thāvaraṃ senāsanaṃ vā’’tiādinā attano cīvarādimūlaṃ na kātabbanti (pāci. aṭṭha. 506) dasseti. Taṃ dassetvāti yaṃ thāvarasenāsanādi kataṃ, taṃ upāsaka tava santakena idaṃ nāma katanti evaṃ dassetvā. Samādapetvāti aññaṃ samādapetvā, ‘‘uddissa ariyā tiṭṭhanti, esā ariyāna yācanā’’ti vuttanayena yācitvāti attho.
অনুঞ্ঞাতট্ঠানেতি অজ্ঝারামঅজ্ঝাৰসথে। আমাসন্তি আমসিতব্বঞ্চেৰ পটিসামেতব্বঞ্চ ৰত্থাদি।
Anuññātaṭṭhāneti ajjhārāmaajjhāvasathe. Āmāsanti āmasitabbañceva paṭisāmetabbañca vatthādi.
রতনসিক্খাপদৰণ্ণনা নিট্ঠিতা।
Ratanasikkhāpadavaṇṇanā niṭṭhitā.
