| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
9. ரதனவக்³கோ³
9. Ratanavaggo
1. அந்தேபுரஸிக்கா²பத³வண்ணனா
1. Antepurasikkhāpadavaṇṇanā
ரதனவக்³க³ஸ்ஸ பட²மே க²த்தியஸ்ஸாதி க²த்தியஜாதிகஸ்ஸ, முத்³தா⁴பி⁴ஸித்தஸ்ஸாதி க²த்தியாபி⁴ஸேகேன முத்³த⁴னி அபி⁴ஸித்தஸ்ஸ. அனிக்க²ந்தோ ராஜா இதோதி அனிக்க²ந்தராஜகங், தஸ்மிங் அனிக்க²ந்தராஜகே, ஸயனிக⁴ரேதி அத்தோ². ரதனங் வுச்சதி மஹேஸீ, நிக்³க³தந்தி நிக்க²ந்தங், அனிக்³க³தங் ரதனங் இதோதி அனிக்³க³தரதனகங், தஸ்மிங் அனிக்³க³தரதனகே, ஸயனிக⁴ரேதி அத்தோ². இந்த³கீ²லங் அதிக்கமெய்யாதி எத்த² அத்தனோ ஆக³தபா⁴வங் அஜானாபெத்வா ஸயனிக⁴ரஸ்ஸ உம்மாரங் பட²மங் பாத³ங் அதிக்காமெந்தஸ்ஸ து³க்கடங், து³தியங் பாசித்தியங்.
Ratanavaggassa paṭhame khattiyassāti khattiyajātikassa, muddhābhisittassāti khattiyābhisekena muddhani abhisittassa. Anikkhanto rājā itoti anikkhantarājakaṃ, tasmiṃ anikkhantarājake, sayanighareti attho. Ratanaṃ vuccati mahesī, niggatanti nikkhantaṃ, aniggataṃ ratanaṃ itoti aniggataratanakaṃ, tasmiṃ aniggataratanake, sayanighareti attho. Indakhīlaṃatikkameyyāti ettha attano āgatabhāvaṃ ajānāpetvā sayanigharassa ummāraṃ paṭhamaṃ pādaṃ atikkāmentassa dukkaṭaṃ, dutiyaṃ pācittiyaṃ.
ஸாவத்தி²யங் ஆயஸ்மந்தங் ஆனந்த³ங் ஆரப்³ப⁴ ரஞ்ஞோ அந்தேபுரப்பவிஸனவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, அனாணத்திகங், திகபாசித்தியங், படிஸங்விதி³தே அப்படிஸங்விதி³தஸஞ்ஞினோ, வேமதிகஸ்ஸ ச து³க்கடங். படிஸங்விதி³தஸஞ்ஞிஸ்ஸ, ந க²த்தியஸ்ஸ வா, ந க²த்தியாபி⁴ஸேகேன அபி⁴ஸித்தஸ்ஸ வா, உபோ⁴ஸு வா, உபி⁴ன்னங் வா அஞ்ஞதரஸ்மிங் நிக்க²ந்தே ஸயனிக⁴ரங் பவிஸந்தஸ்ஸ, அஸயனிக⁴ரே, உம்மத்தகாதீ³னஞ்ச அனாபத்தி. க²த்தியதா, அபி⁴ஸித்ததா, உபி⁴ன்னம்பி ஸயனிக⁴ரதோ அனிக்க²ந்ததா, அப்படிஸங்விதி³ததா, இந்த³கீ²லாதிக்கமோதி இமானெத்த² பஞ்ச அங்கா³னி. ஸமுட்டா²னாதீ³னி பட²மகதி²னஸதி³ஸானி, இத³ங் பன கிரியாகிரியந்தி.
Sāvatthiyaṃ āyasmantaṃ ānandaṃ ārabbha rañño antepurappavisanavatthusmiṃ paññattaṃ, asādhāraṇapaññatti, anāṇattikaṃ, tikapācittiyaṃ, paṭisaṃvidite appaṭisaṃviditasaññino, vematikassa ca dukkaṭaṃ. Paṭisaṃviditasaññissa, na khattiyassa vā, na khattiyābhisekena abhisittassa vā, ubhosu vā, ubhinnaṃ vā aññatarasmiṃ nikkhante sayanigharaṃ pavisantassa, asayanighare, ummattakādīnañca anāpatti. Khattiyatā, abhisittatā, ubhinnampi sayanigharato anikkhantatā, appaṭisaṃviditatā, indakhīlātikkamoti imānettha pañca aṅgāni. Samuṭṭhānādīni paṭhamakathinasadisāni, idaṃ pana kiriyākiriyanti.
அந்தேபுரஸிக்கா²பத³வண்ணனா நிட்டி²தா.
Antepurasikkhāpadavaṇṇanā niṭṭhitā.
2. ரதனஸிக்கா²பத³வண்ணனா
2. Ratanasikkhāpadavaṇṇanā
து³தியே ரதனந்தி முத்தாதி³த³ஸவித⁴ங். ரதனஸம்மதந்தி யங்கிஞ்சி மனுஸ்ஸானங் உபபோ⁴க³பரிபோ⁴க³ங். அஜ்ஜா²ராமே வாதி பரிக்கி²த்தஸ்ஸ அந்தோபடிக்கே²பே அபரிக்கி²த்தஸ்ஸ த்³வின்னங் லெட்³டு³பாதானங் அந்தோ. அஜ்ஜா²வஸதே²தி பரிக்கி²த்தஸ்ஸ அந்தோபடிக்கே²பே, அபரிக்கி²த்தஸ்ஸ முஸலபாதப்³ப⁴ந்தரே. அயங் பனெத்த² வினிச்ச²யோ – ஜாதரூபரஜதங் அத்தனோ அத்தா²ய உக்³க³ண்ஹந்தஸ்ஸ வா உக்³க³ண்ஹாபெந்தஸ்ஸ வா நிஸ்ஸக்³கி³யங் பாசித்தியங் . ஸங்க⁴க³ணபுக்³க³லசேதியனவகம்மானங் அத்தா²ய து³க்கடங், அவஸேஸே முத்தாதி³ரதனே ஸப்³பே³ஸம்பி அத்தா²ய து³க்கடமேவ. கப்பியவத்து²ங் வா அகப்பியவத்து²ங் வா அந்தமஸோ மாதுஸந்தகம்பி ப⁴ண்டா³கா³ரிகஸீஸேன படிஸாமெந்தஸ்ஸ பாசித்தியங், தாதி³ஸங் பன அத்தனோ ஸந்தகங் கத்வா படிஸாமேதுங் வட்டதி. ‘‘இத³ங் படிஸாமேதா²’’தி வுத்தே பன ‘‘ந வட்டதீ’’தி படிக்கி²பிதப்³ப³ங். ஸசே குபிதா பாதெத்வா க³ச்ச²ந்தி, பலிபோ³தோ⁴ நாம ஹோதி, படிஸாமேதப்³ப³ங். விஹாரே கம்மங் கரொந்தா வட்³ட⁴கீஆத³யோ வா ராஜவல்லபா⁴ வா ‘‘யங்கிஞ்சி உபகரணங் வா ஸயனப⁴ண்ட³ங் வா படிஸாமெத்வா தே³தா²’’தி வத³ந்தி, ச²ந்தே³னபி ப⁴யேனபி ந காதப்³ப³மேவ, கு³த்தட்டா²னங் பன த³ஸ்ஸேதுங் வட்டதி.
Dutiye ratananti muttādidasavidhaṃ. Ratanasammatanti yaṃkiñci manussānaṃ upabhogaparibhogaṃ. Ajjhārāme vāti parikkhittassa antopaṭikkhepe aparikkhittassa dvinnaṃ leḍḍupātānaṃ anto. Ajjhāvasatheti parikkhittassa antopaṭikkhepe, aparikkhittassa musalapātabbhantare. Ayaṃ panettha vinicchayo – jātarūparajataṃ attano atthāya uggaṇhantassa vā uggaṇhāpentassa vā nissaggiyaṃ pācittiyaṃ . Saṅghagaṇapuggalacetiyanavakammānaṃ atthāya dukkaṭaṃ, avasese muttādiratane sabbesampi atthāya dukkaṭameva. Kappiyavatthuṃ vā akappiyavatthuṃ vā antamaso mātusantakampi bhaṇḍāgārikasīsena paṭisāmentassa pācittiyaṃ, tādisaṃ pana attano santakaṃ katvā paṭisāmetuṃ vaṭṭati. ‘‘Idaṃ paṭisāmethā’’ti vutte pana ‘‘na vaṭṭatī’’ti paṭikkhipitabbaṃ. Sace kupitā pātetvā gacchanti, palibodho nāma hoti, paṭisāmetabbaṃ. Vihāre kammaṃ karontā vaḍḍhakīādayo vā rājavallabhā vā ‘‘yaṃkiñci upakaraṇaṃ vā sayanabhaṇḍaṃ vā paṭisāmetvā dethā’’ti vadanti, chandenapi bhayenapi na kātabbameva, guttaṭṭhānaṃ pana dassetuṃ vaṭṭati.
அஜ்ஜா²ராமஅஜ்ஜா²வஸதே²ஸுபி யாதி³ஸே டா²னே ‘‘பி⁴க்கூ²ஹி வா ஸாமணேரேஹி வா க³ஹிதங் ப⁴விஸ்ஸதீ’’தி ஆஸங்கா உப்பஜ்ஜதி, தாதி³ஸேயேவ டா²னே உக்³க³ஹெத்வா வா உக்³க³ஹாபெத்வா வா ஸஞ்ஞாணங் கத்வா நிக்கி²பிதப்³ப³ங், ‘‘யஸ்ஸ ப⁴ண்ட³ங் நட்ட²ங், ஸோ ஆக³ச்ச²தூ’’தி ச ஆசிக்கி²தப்³ப³ங். அத² யோ ஆக³ச்ச²தி, ஸோ ‘‘கீதி³ஸங் தே ப⁴ண்ட³ங் நட்ட²’’ந்தி புச்சி²தப்³போ³, ஸசே ஸஞ்ஞாணேன ஸம்பாதே³தி, தா³தப்³ப³ங். நோ சே, ‘விசினாஹீ’தி வத்தப்³போ³. தம்ஹா ஆவாஸா பக்கமந்தேன பதிரூபானங் பி⁴க்கூ²னங் ஹத்தே², தேஸு அஸதி பதிரூபானங் க³ஹபதிகானங் ஹத்தே² நிக்கி²பித்வா பக்கமிதப்³ப³ங். யோ பன நேவ பக்கமதி, ந ஸாமிகங் பஸ்ஸதி, தேன தா²வரங் ஸேனாஸனங் வா சேதியங் வா பொக்க²ரணிங் வா காரேதப்³போ³. ஸசே தீ³க⁴ஸ்ஸ அத்³து⁴னோ அச்சயேன ஸாமிகோ ஆக³ச்ச²தி, தங் த³ஸ்ஸெத்வா ‘அனுமோதா³ஹீ’தி வத்தப்³போ³. ஸசே நானுமோத³தி, ‘‘தே³ஹி மே த⁴ன’’ந்தி சோதே³தி, ஸமாத³பெத்வா தா³தப்³ப³ங்.
Ajjhārāmaajjhāvasathesupi yādise ṭhāne ‘‘bhikkhūhi vā sāmaṇerehi vā gahitaṃ bhavissatī’’ti āsaṅkā uppajjati, tādiseyeva ṭhāne uggahetvā vā uggahāpetvā vā saññāṇaṃ katvā nikkhipitabbaṃ, ‘‘yassa bhaṇḍaṃ naṭṭhaṃ, so āgacchatū’’ti ca ācikkhitabbaṃ. Atha yo āgacchati, so ‘‘kīdisaṃ te bhaṇḍaṃ naṭṭha’’nti pucchitabbo, sace saññāṇena sampādeti, dātabbaṃ. No ce, ‘vicināhī’ti vattabbo. Tamhā āvāsā pakkamantena patirūpānaṃ bhikkhūnaṃ hatthe, tesu asati patirūpānaṃ gahapatikānaṃ hatthe nikkhipitvā pakkamitabbaṃ. Yo pana neva pakkamati, na sāmikaṃ passati, tena thāvaraṃ senāsanaṃ vā cetiyaṃ vā pokkharaṇiṃ vā kāretabbo. Sace dīghassa addhuno accayena sāmiko āgacchati, taṃ dassetvā ‘anumodāhī’ti vattabbo. Sace nānumodati, ‘‘dehi me dhana’’nti codeti, samādapetvā dātabbaṃ.
ஸாவத்தி²யங் அஞ்ஞதரங் பி⁴க்கு²ங் ஆரப்³ப⁴ ரதனஉக்³க³ண்ஹனவத்து²ஸ்மிங் பஞ்ஞத்தங், ‘‘அஞ்ஞத்ர அஜ்ஜா²ராமா வா, அஜ்ஜா²வஸதா² வா’’தி அயமெத்த² து³விதா⁴ அனுபஞ்ஞத்தி, ஸாதா⁴ரணபஞ்ஞத்தி, ஸாணத்திகங், அனுஞ்ஞாதட்டா²னே அனாத³ரியேன உக்³க³ஹெத்வா அனிக்கி²பந்தஸ்ஸ து³க்கடங். அனுஞ்ஞாதட்டா²னே க³ஹெத்வா நிக்கி²பந்தஸ்ஸ, யங் ஹோதி ஆமாஸங் ரதனஸம்மதங், தங் விஸ்ஸாஸங் வா தாவகாலிகங் வா உக்³க³ண்ஹந்தஸ்ஸ, பங்ஸுகூலஸஞ்ஞாய க³ண்ஹதோ, உம்மத்தகாதீ³னஞ்ச அனாபத்தி. அனநுஞ்ஞாதகரணங், பரஸந்தகதா, விஸ்ஸாஸக்³கா³ஹபங்ஸுகூலஸஞ்ஞானங் அபா⁴வோ, உக்³க³ஹணங் வா உக்³க³ஹாபனங் வாதி இமானெத்த² சத்தாரி அங்கா³னி. ஸமுட்டா²னாதீ³னி ஸஞ்சரித்தஸதி³ஸானீதி.
Sāvatthiyaṃ aññataraṃ bhikkhuṃ ārabbha ratanauggaṇhanavatthusmiṃ paññattaṃ, ‘‘aññatra ajjhārāmā vā, ajjhāvasathā vā’’ti ayamettha duvidhā anupaññatti, sādhāraṇapaññatti, sāṇattikaṃ, anuññātaṭṭhāne anādariyena uggahetvā anikkhipantassa dukkaṭaṃ. Anuññātaṭṭhāne gahetvā nikkhipantassa, yaṃ hoti āmāsaṃ ratanasammataṃ, taṃ vissāsaṃ vā tāvakālikaṃ vā uggaṇhantassa, paṃsukūlasaññāya gaṇhato, ummattakādīnañca anāpatti. Ananuññātakaraṇaṃ, parasantakatā, vissāsaggāhapaṃsukūlasaññānaṃ abhāvo, uggahaṇaṃ vā uggahāpanaṃ vāti imānettha cattāri aṅgāni. Samuṭṭhānādīni sañcarittasadisānīti.
ரதனஸிக்கா²பத³வண்ணனா நிட்டி²தா.
Ratanasikkhāpadavaṇṇanā niṭṭhitā.
3. விகாலகா³மப்பவேஸனஸிக்கா²பத³வண்ணனா
3. Vikālagāmappavesanasikkhāpadavaṇṇanā
ததியே ஸந்தங் பி⁴க்கு²ங் அனாபுச்சா²தி இத³ங் சாரித்தே வுத்தனயமேவ. விகாலேதி மஜ்ஜ²ன்ஹிகாதிக்கமதோ பட்டா²ய அந்தோஅருணே, ஏதஸ்மிங் அந்தரே ‘‘விகாலே கா³மப்பவேஸனங் ஆபுச்சா²மீ’’தி வா, ‘‘கா³மங் பவிஸிஸ்ஸாமீ’’தி வா அனாபுச்சி²த்வா அஸதி ததா²ரூபே அச்சாயிகே கரணீயே பரிக்கி²த்தஸ்ஸ கா³மஸ்ஸ பரிக்கே²பங் அதிக்கமந்தஸ்ஸ, அபரிக்கி²த்தஸ்ஸ உபசாரங் ஓக்கமந்தஸ்ஸ பட²மபாதே³ து³க்கடங், து³தியபாதே³ பாசித்தியங். ஸசேபி ஸம்ப³ஹுலா கேனசி கம்மேன கா³மங் பவிஸந்தி, ஸப்³பே³ஹி அஞ்ஞமஞ்ஞங் ஆபுச்சி²தப்³ப³ங். ‘‘தஸ்மிங் கா³மே தங் கம்மங் ந ஸம்பஜ்ஜதீ’’தி அஞ்ஞங் கா³மங் க³ச்ச²ந்தானங் புன ஆபுச்ச²னகிச்சங் நத்தி². ஸசே பன உஸ்ஸாஹங் படிப்பஸ்ஸம்பெ⁴த்வா விஹாரங் க³ச்ச²ந்தா அந்தரா அஞ்ஞங் கா³மங் பவிஸிதுகாமா ஹொந்தி, ஆபுச்சி²தப்³ப³மேவ. குலக⁴ரே வா ஆஸனஸாலாயங் வா ப⁴த்தகிச்சங் கத்வா தேலபி⁴க்கா²ய வா ஸப்பிபி⁴க்கா²ய வா சரிதுகாமேன ஸசே பஸ்ஸே பி⁴க்கு² அத்தி², ஆபுச்சி²தப்³போ³, அஸந்தே ‘நத்தீ²’தி க³ந்தப்³ப³ங். வீதி²ங் ஓதரித்வா பன பி⁴க்கு²ங் தி³ஸ்வாபி ஆபுச்ச²னகிச்சங் நத்தி². யோ பன கா³மமஜ்ஜே²ன மக்³கோ³ ஹோதி, ஸசே தேன க³ச்ச²ந்தஸ்ஸ ‘‘தேலாதீ³னங் அத்தா²ய சரிஸ்ஸாமீ’’தி சித்தங் உப்பஜ்ஜதி, பஸ்ஸே பி⁴க்கு²ங் தி³ஸ்வா ஆபுச்சி²தப்³ப³ங். மக்³கா³ அனோக்கம்ம சரந்தஸ்ஸ பன ஆபுச்ச²னகிச்சங் நத்தி², ஓக்கமந்தஸ்ஸ வுத்தனயேனேவ பாசித்தியங்.
Tatiye santaṃ bhikkhuṃ anāpucchāti idaṃ cāritte vuttanayameva. Vikāleti majjhanhikātikkamato paṭṭhāya antoaruṇe, etasmiṃ antare ‘‘vikāle gāmappavesanaṃ āpucchāmī’’ti vā, ‘‘gāmaṃ pavisissāmī’’ti vā anāpucchitvā asati tathārūpe accāyike karaṇīye parikkhittassa gāmassa parikkhepaṃ atikkamantassa, aparikkhittassa upacāraṃ okkamantassa paṭhamapāde dukkaṭaṃ, dutiyapāde pācittiyaṃ. Sacepi sambahulā kenaci kammena gāmaṃ pavisanti, sabbehi aññamaññaṃ āpucchitabbaṃ. ‘‘Tasmiṃ gāme taṃ kammaṃ na sampajjatī’’ti aññaṃ gāmaṃ gacchantānaṃ puna āpucchanakiccaṃ natthi. Sace pana ussāhaṃ paṭippassambhetvā vihāraṃ gacchantā antarā aññaṃ gāmaṃ pavisitukāmā honti, āpucchitabbameva. Kulaghare vā āsanasālāyaṃ vā bhattakiccaṃ katvā telabhikkhāya vā sappibhikkhāya vā caritukāmena sace passe bhikkhu atthi, āpucchitabbo, asante ‘natthī’ti gantabbaṃ. Vīthiṃ otaritvā pana bhikkhuṃ disvāpi āpucchanakiccaṃ natthi. Yo pana gāmamajjhena maggo hoti, sace tena gacchantassa ‘‘telādīnaṃ atthāya carissāmī’’ti cittaṃ uppajjati, passe bhikkhuṃ disvā āpucchitabbaṃ. Maggā anokkamma carantassa pana āpucchanakiccaṃ natthi, okkamantassa vuttanayeneva pācittiyaṃ.
ஸாவத்தி²யங் ச²ப்³ப³க்³கி³யே ஆரப்³ப⁴ விகாலே கா³மப்பவேஸனவத்து²ஸ்மிங் பஞ்ஞத்தங், ‘‘ஸந்தங் பி⁴க்கு²’’ந்தி ச ‘‘அனாபுச்சா²’’தி ச ‘‘அஞ்ஞத்ர ததா²ரூபா அச்சாயிகா கரணீயா’’தி ச இமா பனெத்த² திஸ்ஸோ அனுபஞ்ஞத்தியோ, அஸாதா⁴ரணபஞ்ஞத்தி, அனாணத்திகங், திகபாசித்தியங், காலே விகாலஸஞ்ஞினோ, வேமதிகஸ்ஸ ச து³க்கடங். காலஸஞ்ஞினோ பன, யோ ச அச்சாயிகே வா கரணீயே, ஸந்தங் வா ஆபுச்சி²த்வா, அஸந்தங் வா அனாபுச்சி²த்வா பவிஸதி, அந்தராராமபி⁴க்கு²னுபஸ்ஸயதித்தி²யஸெய்யபடிக்கமனேஸு வா அஞ்ஞதரங் க³ச்ச²தி, தஸ்ஸ, கா³மேன மக்³கோ³ ஹோதி, தேன க³ச்ச²தோ, ஆபதா³ஸு, உம்மத்தகாதீ³னஞ்ச அனாபத்தி. ஸந்தங் பி⁴க்கு²ங் அனாபுச்ச²தா, அனுஞ்ஞாதகாரணாபா⁴வோ, விகாலே கா³மப்பவிஸனந்தி இமானெத்த² தீணி அங்கா³னி. ஸமுட்டா²னாதீ³னி கதி²னஸதி³ஸானேவ, இத³ங் பன கிரியாகிரியந்தி.
Sāvatthiyaṃ chabbaggiye ārabbha vikāle gāmappavesanavatthusmiṃ paññattaṃ, ‘‘santaṃ bhikkhu’’nti ca ‘‘anāpucchā’’ti ca ‘‘aññatra tathārūpā accāyikā karaṇīyā’’ti ca imā panettha tisso anupaññattiyo, asādhāraṇapaññatti, anāṇattikaṃ, tikapācittiyaṃ, kāle vikālasaññino, vematikassa ca dukkaṭaṃ. Kālasaññino pana, yo ca accāyike vā karaṇīye, santaṃ vā āpucchitvā, asantaṃ vā anāpucchitvā pavisati, antarārāmabhikkhunupassayatitthiyaseyyapaṭikkamanesu vā aññataraṃ gacchati, tassa, gāmena maggo hoti, tena gacchato, āpadāsu, ummattakādīnañca anāpatti. Santaṃ bhikkhuṃ anāpucchatā, anuññātakāraṇābhāvo, vikāle gāmappavisananti imānettha tīṇi aṅgāni. Samuṭṭhānādīni kathinasadisāneva, idaṃ pana kiriyākiriyanti.
விகாலகா³மப்பவேஸனஸிக்கா²பத³வண்ணனா நிட்டி²தா.
Vikālagāmappavesanasikkhāpadavaṇṇanā niṭṭhitā.
4. ஸூசிக⁴ரஸிக்கா²பத³வண்ணனா
4. Sūcigharasikkhāpadavaṇṇanā
சதுத்தே² பே⁴த³னமேவ பே⁴த³னகங், தங் அஸ்ஸ அத்தீ²தி பே⁴த³னகங். தஸ்மா ஏவரூபே ஸூசிக⁴ரே கரணகாராபனேஸு து³க்கடங், படிலாபே⁴ன பன தங் பி⁴ந்தி³த்வா பாசித்தியங் தே³ஸேதப்³ப³ங்.
Catutthe bhedanameva bhedanakaṃ, taṃ assa atthīti bhedanakaṃ. Tasmā evarūpe sūcighare karaṇakārāpanesu dukkaṭaṃ, paṭilābhena pana taṃ bhinditvā pācittiyaṃ desetabbaṃ.
ஸக்கேஸு ஸம்ப³ஹுலே பி⁴க்கூ² ஆரப்³ப⁴ ப³ஹுஸூசிக⁴ரவிஞ்ஞாபனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, ஸாணத்திகங், அத்தனா விப்பகதங் அத்தனா வா, பரேஹி வா, பரேஹி விப்பகதம்பி அத்தனா வா, பரேஹி வா பரியோஸாபெத்வா லப⁴ந்தஸ்ஸ சதுக்கபாசித்தியங். அஞ்ஞஸ்ஸத்தா²ய கரணகாராபனேஸு, அஞ்ஞேன கதங் படிலபி⁴த்வா பரிபு⁴ஞ்ஜனே து³க்கடங். க³ண்டி²கே அரணிகே விதே⁴ அஞ்ஜனியா அஞ்ஜனிஸலாகாய வாஸிஜடே உத³கபுஞ்ச²னியாதி ஏதேஸு யங்கிஞ்சி அட்டி²ஆதீ³ஹி கரொந்தஸ்ஸ, உம்மத்தகாதீ³னஞ்ச அனாபத்தி. ஸூசிக⁴ரதா, அட்டி²மயாதி³தா, அத்தனோ அத்தா²ய கரணங் வா காராபெத்வா வா படிலாபோ⁴தி இமானெத்த² தீணி அங்கா³னி. ஸமுட்டா²னாதீ³னி ஸஞ்சரித்தஸதி³ஸானீதி.
Sakkesu sambahule bhikkhū ārabbha bahusūcigharaviññāpanavatthusmiṃ paññattaṃ, sādhāraṇapaññatti, sāṇattikaṃ, attanā vippakataṃ attanā vā, parehi vā, parehi vippakatampi attanā vā, parehi vā pariyosāpetvā labhantassa catukkapācittiyaṃ. Aññassatthāya karaṇakārāpanesu, aññena kataṃ paṭilabhitvā paribhuñjane dukkaṭaṃ. Gaṇṭhike araṇike vidhe añjaniyā añjanisalākāya vāsijaṭe udakapuñchaniyāti etesu yaṃkiñci aṭṭhiādīhi karontassa, ummattakādīnañca anāpatti. Sūcigharatā, aṭṭhimayāditā, attano atthāya karaṇaṃ vā kārāpetvā vā paṭilābhoti imānettha tīṇi aṅgāni. Samuṭṭhānādīni sañcarittasadisānīti.
ஸூசிக⁴ரஸிக்கா²பத³வண்ணனா நிட்டி²தா.
Sūcigharasikkhāpadavaṇṇanā niṭṭhitā.
5. மஞ்சபீட²ஸிக்கா²பத³வண்ணனா
5. Mañcapīṭhasikkhāpadavaṇṇanā
பஞ்சமே மஞ்சந்தி மஸாரகாதீ³ஸு அஞ்ஞதரங். பீட²ம்பி தாதி³ஸமேவ, தங் பன மஞ்சோ விய அதிதீ³க⁴ங், ஆஸந்தி³கோ விய ச ஸமங் சதுரஸ்ஸங் ந ஹோதி. சே²த³னகங் பே⁴த³னகஸதி³ஸமேவ.
Pañcame mañcanti masārakādīsu aññataraṃ. Pīṭhampi tādisameva, taṃ pana mañco viya atidīghaṃ, āsandiko viya ca samaṃ caturassaṃ na hoti. Chedanakaṃ bhedanakasadisameva.
ஸாவத்தி²யங் உபனந்த³ங் ஆரப்³ப⁴ உச்சே மஞ்சே ஸயனவத்து²ஸ்மிங் பஞ்ஞத்தங், பமாணிகங் கரொந்தஸ்ஸ, பமாணாதிக்கந்தங் லபி⁴த்வா சி²ந்தி³த்வா யதா² பமாணமேவ உபரி தி³ஸ்ஸதி, ஏவங் நிக²ணித்வா வா, உத்தானங் வா கத்வா, அட்டகங் வா ப³ந்தி⁴த்வா பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. பமாணாதிக்கந்தமஞ்சபீட²தா, அத்தனோ அத்தா²ய கரணங் வா காராபெத்வா வா படிலாபோ⁴தி இமானெத்த² த்³வே அங்கா³னி. ஸேஸங் ஸப்³ப³ங் ஸூசிக⁴ரஸிக்கா²பத³ஸதி³ஸமேவாதி.
Sāvatthiyaṃ upanandaṃ ārabbha ucce mañce sayanavatthusmiṃ paññattaṃ, pamāṇikaṃ karontassa, pamāṇātikkantaṃ labhitvā chinditvā yathā pamāṇameva upari dissati, evaṃ nikhaṇitvā vā, uttānaṃ vā katvā, aṭṭakaṃ vā bandhitvā paribhuñjantassa, ummattakādīnañca anāpatti. Pamāṇātikkantamañcapīṭhatā, attano atthāya karaṇaṃ vā kārāpetvā vā paṭilābhoti imānettha dve aṅgāni. Sesaṃ sabbaṃ sūcigharasikkhāpadasadisamevāti.
மஞ்சபீட²ஸிக்கா²பத³வண்ணனா நிட்டி²தா.
Mañcapīṭhasikkhāpadavaṇṇanā niṭṭhitā.
6. தூலோனத்³த⁴ஸிக்கா²பத³வண்ணனா
6. Tūlonaddhasikkhāpadavaṇṇanā
ச²ட்டே² தூலங் ஓனத்³த⁴மெத்தா²தி தூலோனத்³த⁴ங், சிமிலிகங் பத்த²ரித்வா தூலங் பக்கி²பித்வா உபரி சிமிலிகாய ஓனத்³த⁴ந்தி வுத்தங் ஹோதி. உத்³தா³லனகங் பே⁴த³னகஸதி³ஸமேவ.
Chaṭṭhe tūlaṃ onaddhametthāti tūlonaddhaṃ, cimilikaṃ pattharitvā tūlaṃ pakkhipitvā upari cimilikāya onaddhanti vuttaṃ hoti. Uddālanakaṃ bhedanakasadisameva.
ஸாவத்தி²யங் ச²ப்³ப³க்³கி³யே ஆரப்³ப⁴ தூலோனத்³த⁴காராபனவத்து²ஸ்மிங் பஞ்ஞத்தங், ஆயோகே³ காயப³ந்த⁴னே அங்ஸப³த்³த⁴கே பத்தத்த²விகாய பரிஸ்ஸாவனே பி³ம்போ³ஹனே, அஞ்ஞேன கதங் தூலோனத்³த⁴ங் படிலபி⁴த்வா உத்³தா³லெத்வா பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. பி³ம்போ³ஹனஞ்செத்த² ஸீஸப்பமாணமேவ வட்டதி, ஸீஸப்பமாணங் நாம யஸ்ஸ வித்தா²ரதோ தீஸு கோணேஸு த்³வின்னங் அந்தரங் வித³த்தி²சதுரங்கு³லங் ஹோதி, மஜ்ஜே² முட்டி²ரதனங், தீ³க⁴தோ தி³யட்³ட⁴ரதனங் வா த்³விரதனங் வா. தூலோனத்³த⁴மஞ்சபீட²தா, அத்தனோ அத்தா²ய கரணங் வா காராபெத்வா வா படிலாபோ⁴தி இமானெத்த² த்³வே அங்கா³னி. ஸேஸங் வுத்தனயேனேவ வேதி³தப்³ப³ந்தி.
Sāvatthiyaṃ chabbaggiye ārabbha tūlonaddhakārāpanavatthusmiṃ paññattaṃ, āyoge kāyabandhane aṃsabaddhake pattatthavikāya parissāvane bimbohane, aññena kataṃ tūlonaddhaṃ paṭilabhitvā uddāletvā paribhuñjantassa, ummattakādīnañca anāpatti. Bimbohanañcettha sīsappamāṇameva vaṭṭati, sīsappamāṇaṃ nāma yassa vitthārato tīsu koṇesu dvinnaṃ antaraṃ vidatthicaturaṅgulaṃ hoti, majjhe muṭṭhiratanaṃ, dīghato diyaḍḍharatanaṃ vā dviratanaṃ vā. Tūlonaddhamañcapīṭhatā, attano atthāya karaṇaṃ vā kārāpetvā vā paṭilābhoti imānettha dve aṅgāni. Sesaṃ vuttanayeneva veditabbanti.
தூலோனத்³த⁴ஸிக்கா²பத³வண்ணனா நிட்டி²தா.
Tūlonaddhasikkhāpadavaṇṇanā niṭṭhitā.
7. நிஸீத³னஸிக்கா²பத³வண்ணனா
7. Nisīdanasikkhāpadavaṇṇanā
ஸத்தமே நிஸீத³னந்தி ஸந்த²தஸதி³ஸங் ஸந்த²ரித்வா ஏகஸ்மிங் அந்தே ஸுக³தவித³த்தி²ப்பமாணங் த்³வீஸு டா²னேஸு பா²லெத்வா கதாஹி தீஹி த³ஸாஹி யுத்தஸ்ஸ பரிக்கா²ரஸ்ஸேதங் நாமங்.
Sattame nisīdananti santhatasadisaṃ santharitvā ekasmiṃ ante sugatavidatthippamāṇaṃ dvīsu ṭhānesu phāletvā katāhi tīhi dasāhi yuttassa parikkhārassetaṃ nāmaṃ.
ஸாவத்தி²யங் ச²ப்³ப³க்³கி³யே ஆரப்³ப⁴ அப்பமாணிகானி நிஸீத³னானி தா⁴ரணவத்து²ஸ்மிங் பஞ்ஞத்தங், ‘‘த³ஸா வித³த்தீ²’’தி அயமெத்த² அனுபஞ்ஞத்தி, அஸாதா⁴ரணபஞ்ஞத்தி, பமாணிகங் வா ஊனகங் வா கரொந்தஸ்ஸ, அஞ்ஞேன கதங் பமாணாதிக்கந்தங் படிலபி⁴த்வா சி²ந்தி³த்வா பரிபு⁴ஞ்ஜந்தஸ்ஸ, விதானாதீ³ஸு யங்கிஞ்சி கரொந்தஸ்ஸ, உம்மத்தகாதீ³னஞ்ச அனாபத்தி. நிஸீத³னஸ்ஸ பமாணாதிக்கந்ததா, அத்தனோ அத்தா²ய கரணங் வா காராபெத்வா வா படிலாபோ⁴தி இமானெத்த² த்³வே அங்கா³னி. ஸேஸங் வுத்தனயேனேவ வேதி³தப்³ப³ந்தி.
Sāvatthiyaṃ chabbaggiye ārabbha appamāṇikāni nisīdanāni dhāraṇavatthusmiṃ paññattaṃ, ‘‘dasā vidatthī’’ti ayamettha anupaññatti, asādhāraṇapaññatti, pamāṇikaṃ vā ūnakaṃ vā karontassa, aññena kataṃ pamāṇātikkantaṃ paṭilabhitvā chinditvā paribhuñjantassa, vitānādīsu yaṃkiñci karontassa, ummattakādīnañca anāpatti. Nisīdanassa pamāṇātikkantatā, attano atthāya karaṇaṃ vā kārāpetvā vā paṭilābhoti imānettha dve aṅgāni. Sesaṃ vuttanayeneva veditabbanti.
நிஸீத³னஸிக்கா²பத³வண்ணனா நிட்டி²தா.
Nisīdanasikkhāpadavaṇṇanā niṭṭhitā.
8. கண்டு³ப்படிச்சா²தி³ஸிக்கா²பத³வண்ணனா
8. Kaṇḍuppaṭicchādisikkhāpadavaṇṇanā
அட்ட²மே கண்டு³ப்படிச்சா²தி³ந்தி அதோ⁴னாபி⁴உப்³ப⁴ஜாணுமண்ட³லங் கண்டு³பீளகஅஸ்ஸாவது²ல்லகச்சா²பா³தா⁴னங் படிச்சா²த³னத்த²ங் அனுஞ்ஞாதங் சீவரங்.
Aṭṭhame kaṇḍuppaṭicchādinti adhonābhiubbhajāṇumaṇḍalaṃ kaṇḍupīḷakaassāvathullakacchābādhānaṃ paṭicchādanatthaṃ anuññātaṃ cīvaraṃ.
ஸாவத்தி²யங் ச²ப்³ப³க்³கி³யே ஆரப்³ப⁴ அப்பமாணிகாயோ கண்டு³ப்படிச்சா²தி³காயோ தா⁴ரணவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, ஸேஸங் நிஸீத³னே வுத்தனயேனேவ வேதி³தப்³ப³ந்தி.
Sāvatthiyaṃ chabbaggiye ārabbha appamāṇikāyo kaṇḍuppaṭicchādikāyo dhāraṇavatthusmiṃ paññattaṃ, sādhāraṇapaññatti, sesaṃ nisīdane vuttanayeneva veditabbanti.
கண்டு³ப்படிச்சா²தி³ஸிக்கா²பத³வண்ணனா நிட்டி²தா.
Kaṇḍuppaṭicchādisikkhāpadavaṇṇanā niṭṭhitā.
9. வஸ்ஸிகஸாடிகஸிக்கா²பத³வண்ணனா
9. Vassikasāṭikasikkhāpadavaṇṇanā
நவமே ஸாவத்தி²யங் ச²ப்³ப³க்³கி³யே ஆரப்³ப⁴ அப்பமாணிகாயோ வஸ்ஸிகஸாடிகாயோ தா⁴ரணவத்து²ஸ்மிங் பஞ்ஞத்தங், ஸேஸமெத்த² யங் வத்தப்³ப³ங், தங் நிஸீத³னே வுத்தனயமேவாதி.
Navame sāvatthiyaṃ chabbaggiye ārabbha appamāṇikāyo vassikasāṭikāyo dhāraṇavatthusmiṃ paññattaṃ, sesamettha yaṃ vattabbaṃ, taṃ nisīdane vuttanayamevāti.
வஸ்ஸிகஸாடிகஸிக்கா²பத³வண்ணனா நிட்டி²தா.
Vassikasāṭikasikkhāpadavaṇṇanā niṭṭhitā.
10. நந்த³ஸிக்கா²பத³வண்ணனா
10. Nandasikkhāpadavaṇṇanā
த³ஸமே ஸாவத்தி²யங் ஆயஸ்மந்தங் நந்த³ங் ஆரப்³ப⁴ ஸுக³தசீவரப்பமாணங் சீவரங் தா⁴ரணவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, ஸேஸங் நிஸீத³னே வுத்தனயமேவாதி.
Dasame sāvatthiyaṃ āyasmantaṃ nandaṃ ārabbha sugatacīvarappamāṇaṃ cīvaraṃ dhāraṇavatthusmiṃ paññattaṃ, sādhāraṇapaññatti, sesaṃ nisīdane vuttanayamevāti.
நந்த³ஸிக்கா²பத³வண்ணனா நிட்டி²தா.
Nandasikkhāpadavaṇṇanā niṭṭhitā.
ரதனவக்³கோ³ நவமோ.
Ratanavaggo navamo.
கங்கா²விதரணியா பாதிமொக்க²வண்ணனாய
Kaṅkhāvitaraṇiyā pātimokkhavaṇṇanāya
ஸுத்³த⁴பாசித்தியவண்ணனா நிட்டி²தா.
Suddhapācittiyavaṇṇanā niṭṭhitā.
