| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৯. রতনৰগ্গো
9. Ratanavaggo
১. অন্তেপুরসিক্খাপদং
1. Antepurasikkhāpadaṃ
৪৯৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন রাজা পসেনদি কোসলো উয্যানপালং আণাপেসি – ‘‘গচ্ছ, ভণে, উয্যানং সোধেহি। উয্যানং গমিস্সামা’’তি। ‘‘এৰং, দেৰা’’তি খো সো উয্যানপালো রঞ্ঞো পসেনদিস্স কোসলস্স পটিস্সুত্ৰা উয্যানং সোধেন্তো অদ্দস ভগৰন্তং অঞ্ঞতরস্মিং রুক্খমূলে নিসিন্নং। দিস্ৰান যেন রাজা পসেনদি কোসলো তেনুপসঙ্কমি; উপসঙ্কমিত্ৰা রাজানং পসেনদিং কোসলং এতদৰোচ – ‘‘সুদ্ধং, দেৰ, উয্যানং। অপিচ, ভগৰা তত্থ নিসিন্নো’’তি। ‘‘হোতু, ভণে! মযং ভগৰন্তং পযিরুপাসিস্সামা’’তি। অথ খো রাজা পসেনদি কোসলো উয্যানং গন্ত্ৰা যেন ভগৰা তেনুপসঙ্কমি। তেন খো পন সমযেন অঞ্ঞতরো উপাসকো ভগৰন্তং পযিরুপাসন্তো নিসিন্নো হোতি। অদ্দসা খো রাজা পসেনদি কোসলো তং উপাসকং ভগৰন্তং পযিরুপাসন্তং নিসিন্নং। দিস্ৰান ভীতো অট্ঠাসি। অথ খো রঞ্ঞো পসেনদিস্স কোসলস্স এতদহোসি – ‘‘নারহতাযং পুরিসো পাপো হোতুং , যথা ভগৰন্তং পযিরুপাসতী’’তি। যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। অথ খো সো উপাসকো ভগৰতো গারৰেন রাজানং পসেনদিং কোসলং নেৰ অভিৰাদেসি ন পচ্চুট্ঠাসি। অথ খো রাজা পসেনদি কোসলো অনত্তমনো অহোসি – ‘‘কথঞ্হি নামাযং পুরিসো মযি আগতে নেৰ অভিৰাদেস্সতি ন পচ্চুট্ঠেস্সতী’’তি! অথ খো ভগৰা রাজানং পসেনদিং কোসলং অনত্তমনং ৰিদিত্ৰা রাজানং পসেনদিং কোসলং এতদৰোচ – ‘‘এসো খো, মহারাজ, উপাসকো বহুস্সুতো আগতাগমো কামেসু ৰীতরাগো’’তি। অথ খো রঞ্ঞো পসেনদিস্স কোসলস্স এতদহোসি – ‘‘নারহতাযং উপাসকো ওরকো হোতুং, ভগৰাপি ইমস্স ৰণ্ণং ভাসতী’’তি। তং উপাসকং এতদৰোচ – ‘‘ৰদেয্যাসি, উপাসক, যেন অত্থো’’তি। ‘‘সুট্ঠু, দেৰা’’তি। অথ খো ভগৰা রাজানং পসেনদিং কোসলং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো রাজা পসেনদি কোসলো ভগৰতা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি।
494. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena rājā pasenadi kosalo uyyānapālaṃ āṇāpesi – ‘‘gaccha, bhaṇe, uyyānaṃ sodhehi. Uyyānaṃ gamissāmā’’ti. ‘‘Evaṃ, devā’’ti kho so uyyānapālo rañño pasenadissa kosalassa paṭissutvā uyyānaṃ sodhento addasa bhagavantaṃ aññatarasmiṃ rukkhamūle nisinnaṃ. Disvāna yena rājā pasenadi kosalo tenupasaṅkami; upasaṅkamitvā rājānaṃ pasenadiṃ kosalaṃ etadavoca – ‘‘suddhaṃ, deva, uyyānaṃ. Apica, bhagavā tattha nisinno’’ti. ‘‘Hotu, bhaṇe! Mayaṃ bhagavantaṃ payirupāsissāmā’’ti. Atha kho rājā pasenadi kosalo uyyānaṃ gantvā yena bhagavā tenupasaṅkami. Tena kho pana samayena aññataro upāsako bhagavantaṃ payirupāsanto nisinno hoti. Addasā kho rājā pasenadi kosalo taṃ upāsakaṃ bhagavantaṃ payirupāsantaṃ nisinnaṃ. Disvāna bhīto aṭṭhāsi. Atha kho rañño pasenadissa kosalassa etadahosi – ‘‘nārahatāyaṃ puriso pāpo hotuṃ , yathā bhagavantaṃ payirupāsatī’’ti. Yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Atha kho so upāsako bhagavato gāravena rājānaṃ pasenadiṃ kosalaṃ neva abhivādesi na paccuṭṭhāsi. Atha kho rājā pasenadi kosalo anattamano ahosi – ‘‘kathañhi nāmāyaṃ puriso mayi āgate neva abhivādessati na paccuṭṭhessatī’’ti! Atha kho bhagavā rājānaṃ pasenadiṃ kosalaṃ anattamanaṃ viditvā rājānaṃ pasenadiṃ kosalaṃ etadavoca – ‘‘eso kho, mahārāja, upāsako bahussuto āgatāgamo kāmesu vītarāgo’’ti. Atha kho rañño pasenadissa kosalassa etadahosi – ‘‘nārahatāyaṃ upāsako orako hotuṃ, bhagavāpi imassa vaṇṇaṃ bhāsatī’’ti. Taṃ upāsakaṃ etadavoca – ‘‘vadeyyāsi, upāsaka, yena attho’’ti. ‘‘Suṭṭhu, devā’’ti. Atha kho bhagavā rājānaṃ pasenadiṃ kosalaṃ dhammiyā kathāya sandassesi samādapesi samuttejesi sampahaṃsesi. Atha kho rājā pasenadi kosalo bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
৪৯৫. তেন খো পন সমযেন রাজা পসেনদি কোসলো উপরিপাসাদৰরগতো হোতি। অদ্দসা খো রাজা পসেনদি কোসলো তং উপাসকং রথিকায 1 ছত্তপাণিং গচ্ছন্তং। দিস্ৰান পক্কোসাপেত্ৰা এতদৰোচ – ‘‘ত্ৰং কির, উপাসক, বহুস্সুতো আগতাগমো। সাধু, উপাসক, অম্হাকং ইত্থাগারং ধম্মং ৰাচেহী’’তি। ‘‘যমহং 2, দেৰ, জানামি অয্যানং ৰাহসা, অয্যাৰ দেৰস্স ইত্থাগারং ধম্মং ৰাচেস্সন্তী’’তি। অথ খো রাজা পসেনদি কোসলো – ‘‘সচ্চং খো উপাসকো আহা’’তি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘সাধু, ভন্তে, ভগৰা একং ভিক্খুং আণাপেতু যো অম্হাকং ইত্থাগারং ধম্মং ৰাচেস্সতী’’তি। অথ খো ভগৰা রাজানং পসেনদিং কোসলং ধম্মিযা কথায সন্দস্সেসি…পে॰… পদক্খিণং কত্ৰা পক্কামি। অথ খো ভগৰা আযস্মন্তং আনন্দং আমন্তেসি – ‘‘তেনহানন্দ, রঞ্ঞো ইত্থাগারং ধম্মং ৰাচেহী’’তি। ‘‘এৰং, ভন্তে’’তি খো আযস্মা আনন্দো ভগৰতো পটিস্সুত্ৰা কালেন কালং পৰিসিত্ৰা রঞ্ঞো ইত্থাগারং ধম্মং ৰাচেতি। অথ খো আযস্মা আনন্দো পুব্বণ্হসমযং নিৰাসেত্ৰা পত্তচীৰরমাদায যেন রঞ্ঞো পসেনদিস্স কোসলস্স নিৰেসনং তেনুপসঙ্কমি।
495. Tena kho pana samayena rājā pasenadi kosalo uparipāsādavaragato hoti. Addasā kho rājā pasenadi kosalo taṃ upāsakaṃ rathikāya 3 chattapāṇiṃ gacchantaṃ. Disvāna pakkosāpetvā etadavoca – ‘‘tvaṃ kira, upāsaka, bahussuto āgatāgamo. Sādhu, upāsaka, amhākaṃ itthāgāraṃ dhammaṃ vācehī’’ti. ‘‘Yamahaṃ 4, deva, jānāmi ayyānaṃ vāhasā, ayyāva devassa itthāgāraṃ dhammaṃ vācessantī’’ti. Atha kho rājā pasenadi kosalo – ‘‘saccaṃ kho upāsako āhā’’ti yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā pasenadi kosalo bhagavantaṃ etadavoca – ‘‘sādhu, bhante, bhagavā ekaṃ bhikkhuṃ āṇāpetu yo amhākaṃ itthāgāraṃ dhammaṃ vācessatī’’ti. Atha kho bhagavā rājānaṃ pasenadiṃ kosalaṃ dhammiyā kathāya sandassesi…pe… padakkhiṇaṃ katvā pakkāmi. Atha kho bhagavā āyasmantaṃ ānandaṃ āmantesi – ‘‘tenahānanda, rañño itthāgāraṃ dhammaṃ vācehī’’ti. ‘‘Evaṃ, bhante’’ti kho āyasmā ānando bhagavato paṭissutvā kālena kālaṃ pavisitvā rañño itthāgāraṃ dhammaṃ vāceti. Atha kho āyasmā ānando pubbaṇhasamayaṃ nivāsetvā pattacīvaramādāya yena rañño pasenadissa kosalassa nivesanaṃ tenupasaṅkami.
৪৯৬. তেন খো পন সমযেন রাজা পসেনদি কোসলো মল্লিকায দেৰিযা সদ্ধিং সযনগতো হোতি। অদ্দসা খো মল্লিকা দেৰী আযস্মন্তং আনন্দং দূরতোৰ আগচ্ছন্তং। দিস্ৰান সহসা ৰুট্ঠাসি; পীতকমট্ঠং দুস্সং পভস্সিত্থ। অথ খো আযস্মা আনন্দো ততোৰ পটিনিৰত্তিত্ৰা আরামং গন্ত্ৰা ভিক্খূনং এতমত্থং আরোচেসি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা আনন্দো পুব্বে অপ্পটিসংৰিদিতো রঞ্ঞো অন্তেপুরং পৰিসিস্সতী’’তি…পে॰… সচ্চং কির ত্ৰং, আনন্দ, পুব্বে অপ্পটিসংৰিদিতো রঞ্ঞো অন্তেপুরং পৰিসসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, আনন্দ, পুব্বে অপ্পটিসংৰিদিতো রঞ্ঞো অন্তেপুরং পৰিসিস্সসি! নেতং, আনন্দ, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি –
496. Tena kho pana samayena rājā pasenadi kosalo mallikāya deviyā saddhiṃ sayanagato hoti. Addasā kho mallikā devī āyasmantaṃ ānandaṃ dūratova āgacchantaṃ. Disvāna sahasā vuṭṭhāsi; pītakamaṭṭhaṃ dussaṃ pabhassittha. Atha kho āyasmā ānando tatova paṭinivattitvā ārāmaṃ gantvā bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā ānando pubbe appaṭisaṃvidito rañño antepuraṃ pavisissatī’’ti…pe… saccaṃ kira tvaṃ, ānanda, pubbe appaṭisaṃvidito rañño antepuraṃ pavisasīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, ānanda, pubbe appaṭisaṃvidito rañño antepuraṃ pavisissasi! Netaṃ, ānanda, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi –
৪৯৭. 5 ‘‘দসযিমে, ভিক্খৰে, আদীনৰা রাজন্তেপুরপ্পৰেসনে। কতমে দস? ইধ, ভিক্খৰে, রাজা মহেসিযা সদ্ধিং নিসিন্নো হোতি, তত্থ ভিক্খু পৰিসতি। মহেসী ৰা ভিক্খুং দিস্ৰা সিতং পাতুকরোতি। ভিক্খু ৰা মহেসিং দিস্ৰা সিতং পাতুকরোতি। তত্থ রঞ্ঞো এৰং হোতি – ‘‘অদ্ধা ইমেসং কতং ৰা করিস্সন্তি ৰা’’তি। অযং, ভিক্খৰে, পঠমো আদীনৰো রাজন্তেপুরপ্পৰেসনে।
497.6 ‘‘Dasayime, bhikkhave, ādīnavā rājantepurappavesane. Katame dasa? Idha, bhikkhave, rājā mahesiyā saddhiṃ nisinno hoti, tattha bhikkhu pavisati. Mahesī vā bhikkhuṃ disvā sitaṃ pātukaroti. Bhikkhu vā mahesiṃ disvā sitaṃ pātukaroti. Tattha rañño evaṃ hoti – ‘‘addhā imesaṃ kataṃ vā karissanti vā’’ti. Ayaṃ, bhikkhave, paṭhamo ādīnavo rājantepurappavesane.
‘‘পুন চপরং, ভিক্খৰে, রাজা বহুকিচ্চো বহুকরণীযো। অঞ্ঞতরং ইত্থিং গন্ত্ৰা নস্সরতি। সা তেন গব্ভং গণ্হি। তত্থ রঞ্ঞো এৰং হোতি – ‘‘ন খো ইধ অঞ্ঞো কোচি পৰিসতি অঞ্ঞত্র পব্বজিতেন। সিযা নু খো পব্বজিতস্স কম্ম’’ন্তি। অযং, ভিক্খৰে, দুতিযো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rājā bahukicco bahukaraṇīyo. Aññataraṃ itthiṃ gantvā nassarati. Sā tena gabbhaṃ gaṇhi. Tattha rañño evaṃ hoti – ‘‘na kho idha añño koci pavisati aññatra pabbajitena. Siyā nu kho pabbajitassa kamma’’nti. Ayaṃ, bhikkhave, dutiyo ādīnavo rājantepurappavesane.
‘‘পুন চপরং, ভিক্খৰে, রঞ্ঞো অন্তেপুরে অঞ্ঞতরং রতনং নস্সতি। তত্থ রঞ্ঞো এৰং হোতি – ‘‘ন খো ইধ অঞ্ঞো কোচি পৰিসতি অঞ্ঞত্র পব্বজিতেন। সিযা নু খো পব্বজিতস্স কম্ম’’ন্তি। অযং, ভিক্খৰে, ততিযো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rañño antepure aññataraṃ ratanaṃ nassati. Tattha rañño evaṃ hoti – ‘‘na kho idha añño koci pavisati aññatra pabbajitena. Siyā nu kho pabbajitassa kamma’’nti. Ayaṃ, bhikkhave, tatiyo ādīnavo rājantepurappavesane.
‘‘পুন চপরং, ভিক্খৰে, রঞ্ঞো অন্তেপুরে অব্ভন্তরা গুয্হমন্তা বহিদ্ধা সম্ভেদং গচ্ছন্তি। তত্থ রঞ্ঞো এৰং হোতি – ‘‘ন খো ইধ অঞ্ঞো কোচি পৰিসতি অঞ্ঞত্র পব্বজিতেন। সিযা নু খো পব্বজিতস্স কম্ম’’ন্তি। অযং, ভিক্খৰে, চতুত্থো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rañño antepure abbhantarā guyhamantā bahiddhā sambhedaṃ gacchanti. Tattha rañño evaṃ hoti – ‘‘na kho idha añño koci pavisati aññatra pabbajitena. Siyā nu kho pabbajitassa kamma’’nti. Ayaṃ, bhikkhave, catuttho ādīnavo rājantepurappavesane.
‘‘পুন চপরং, ভিক্খৰে, রঞ্ঞো অন্তেপুরে পুত্তো ৰা পিতরং পত্থেতি পিতা ৰা পুত্তং পত্থেতি। তেসং এৰং হোতি – ‘‘ন খো ইধ অঞ্ঞো কোচি পৰিসতি অঞ্ঞত্র পব্বজিতেন। সিযা নু খো পব্বজিতস্স কম্ম’’ন্তি। অযং, ভিক্খৰে, পঞ্চমো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rañño antepure putto vā pitaraṃ pattheti pitā vā puttaṃ pattheti. Tesaṃ evaṃ hoti – ‘‘na kho idha añño koci pavisati aññatra pabbajitena. Siyā nu kho pabbajitassa kamma’’nti. Ayaṃ, bhikkhave, pañcamo ādīnavo rājantepurappavesane.
‘‘পুন চপরং, ভিক্খৰে, রাজা নীচট্ঠানিযং উচ্চে ঠানে ঠপেতি। যেসং তং অমনাপং তেসং এৰং হোতি – ‘‘রাজা খো পব্বজিতেন সংসট্ঠো। সিযা নু খো পব্বজিতস্স কম্ম’’ন্তি। অযং, ভিক্খৰে, ছট্ঠো আদীনৰো, রাজন্তেপুরপ্পৰেসনে।
‘‘Puna caparaṃ, bhikkhave, rājā nīcaṭṭhāniyaṃ ucce ṭhāne ṭhapeti. Yesaṃ taṃ amanāpaṃ tesaṃ evaṃ hoti – ‘‘rājā kho pabbajitena saṃsaṭṭho. Siyā nu kho pabbajitassa kamma’’nti. Ayaṃ, bhikkhave, chaṭṭho ādīnavo, rājantepurappavesane.
‘‘পুন চপরং, ভিক্খৰে, রাজা উচ্চট্ঠানিযং নীচে ঠানে ঠপেতি। যেসং তং অমনাপং তেসং এৰং হোতি – ‘‘রাজা খো পব্বজিতেন সংসট্ঠো। সিযা নু খো পব্বজিতস্স কম্ম’’ন্তি। অযং , ভিক্খৰে, সত্তমো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rājā uccaṭṭhāniyaṃ nīce ṭhāne ṭhapeti. Yesaṃ taṃ amanāpaṃ tesaṃ evaṃ hoti – ‘‘rājā kho pabbajitena saṃsaṭṭho. Siyā nu kho pabbajitassa kamma’’nti. Ayaṃ , bhikkhave, sattamo ādīnavo rājantepurappavesane.
‘‘পুন চপরং, ভিক্খৰে, রাজা অকালে সেনং উয্যোজেতি। যেসং তং অমনাপং তেসং এৰং হোতি – ‘‘রাজা খো পব্বজিতেন সংসট্ঠো। সিযা নু খো পব্বজিতস্স কম্ম’’ন্তি। অযং, ভিক্খৰে, অট্ঠমো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rājā akāle senaṃ uyyojeti. Yesaṃ taṃ amanāpaṃ tesaṃ evaṃ hoti – ‘‘rājā kho pabbajitena saṃsaṭṭho. Siyā nu kho pabbajitassa kamma’’nti. Ayaṃ, bhikkhave, aṭṭhamo ādīnavo rājantepurappavesane.
‘‘পুন চপরং, ভিক্খৰে, রাজা কালে সেনং উয্যোজেত্ৰা অন্তরামগ্গতো নিৰত্তাপেতি। যেসং তং অমনাপং তেসং এৰং হোতি – ‘‘‘রাজা খো পব্বজিতেন সংসট্ঠো। সিযা নু খো পব্বজিতস্স কম্ম’’ন্তি। অযং, ভিক্খৰে, নৰমো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rājā kāle senaṃ uyyojetvā antarāmaggato nivattāpeti. Yesaṃ taṃ amanāpaṃ tesaṃ evaṃ hoti – ‘‘‘rājā kho pabbajitena saṃsaṭṭho. Siyā nu kho pabbajitassa kamma’’nti. Ayaṃ, bhikkhave, navamo ādīnavo rājantepurappavesane.
‘‘পুন চপরং, ভিক্খৰে, রঞ্ঞো রাজন্তেপুরং হত্থিসম্মদ্দং অস্সসম্মদ্দং রথসম্মদ্দং রজ্জনীযানি 7 রূপসদ্দগন্ধরসফোট্ঠব্বানি, যানি ন পব্বজিতস্স সারুপ্পানি। অযং, ভিক্খৰে, দসমো আদীনৰো রাজন্তেপুরপ্পৰেসনে। ইমে খো, ভিক্খৰে, দস আদীনৰা রাজন্তেপুরপ্পৰেসনে’’তি। অথ খো ভগৰা আযস্মন্তং আনন্দং অনেকপরিযাযেন ৰিগরহিত্ৰা দুব্ভরতায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
‘‘Puna caparaṃ, bhikkhave, rañño rājantepuraṃ hatthisammaddaṃ assasammaddaṃ rathasammaddaṃ rajjanīyāni 8 rūpasaddagandharasaphoṭṭhabbāni, yāni na pabbajitassa sāruppāni. Ayaṃ, bhikkhave, dasamo ādīnavo rājantepurappavesane. Ime kho, bhikkhave, dasa ādīnavā rājantepurappavesane’’ti. Atha kho bhagavā āyasmantaṃ ānandaṃ anekapariyāyena vigarahitvā dubbharatāya…pe… evañca pana, bhikkhave, imaṃ sikkhāpadaṃ uddiseyyātha –
৪৯৮. ‘‘যো পন ভিক্খু রঞ্ঞো খত্তিযস্স মুদ্ধাৰসিত্তস্স 9 অনিক্খন্তরাজকে অনিগ্গতরতনকে পুব্বে অপ্পটিসংৰিদিতো ইন্দখীলং অতিক্কামেয্য, পাচিত্তিয’’ন্তি।
498.‘‘Yo pana bhikkhu rañño khattiyassa muddhāvasittassa 10 anikkhantarājake aniggataratanake pubbe appaṭisaṃvidito indakhīlaṃ atikkāmeyya, pācittiya’’nti.
৪৯৯. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
499.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
খত্তিযো নাম উভতো সুজাতো হোতি, মাতিতো চ পিতিতো চ সংসুদ্ধগহণিকো, যাৰ সত্তমা পিতামহযুগা অক্খিত্তো অনুপকুট্ঠো জাতিৰাদেন।
Khattiyo nāma ubhato sujāto hoti, mātito ca pitito ca saṃsuddhagahaṇiko, yāva sattamā pitāmahayugā akkhitto anupakuṭṭho jātivādena.
মুদ্ধাৰসিত্তো নাম খত্তিযাভিসেকেন অভিসিত্তো হোতি।
Muddhāvasitto nāma khattiyābhisekena abhisitto hoti.
অনিক্খন্তরাজকেতি রাজা সযনিঘরা অনিক্খন্তো হোতি।
Anikkhantarājaketi rājā sayanigharā anikkhanto hoti.
অনিগ্গতরতনকেতি মহেসী সযনিঘরা অনিক্খন্তা হোতি, উভো ৰা অনিক্খন্তা হোন্তি।
Aniggataratanaketi mahesī sayanigharā anikkhantā hoti, ubho vā anikkhantā honti.
পুব্বে অপ্পটিসংৰিদিতোতি পুব্বে অনামন্তেত্ৰা।
Pubbe appaṭisaṃviditoti pubbe anāmantetvā.
ইন্দখীলো নাম সযনিঘরস্স উম্মারো ৰুচ্চতি।
Indakhīlo nāma sayanigharassa ummāro vuccati.
সযনিঘরং নাম যত্থ কত্থচি রঞ্ঞো সযনং পঞ্ঞত্তং হোতি, অন্তমসো সাণিপাকারপরিক্খিত্তম্পি।
Sayanigharaṃ nāma yattha katthaci rañño sayanaṃ paññattaṃ hoti, antamaso sāṇipākāraparikkhittampi.
ইন্দখীলং অতিক্কামেয্যাতি পঠমং পাদং উম্মারং অতিক্কামেতি, আপত্তি দুক্কটস্স। দুতিযং পাদং অতিক্কামেতি, আপত্তি পাচিত্তিযস্স।
Indakhīlaṃ atikkāmeyyāti paṭhamaṃ pādaṃ ummāraṃ atikkāmeti, āpatti dukkaṭassa. Dutiyaṃ pādaṃ atikkāmeti, āpatti pācittiyassa.
৫০০. অপ্পটিসংৰিদিতে অপ্পটিসংৰিদিতসঞ্ঞী ইন্দখীলং অতিক্কামেতি, আপত্তি পাচিত্তিযস্স। অপ্পটিসংৰিদিতে ৰেমতিকো ইন্দখীলং অতিক্কামেতি, আপত্তি পাচিত্তিযস্স। অপ্পটিসংৰিদিতে পটিসংৰিদিতসঞ্ঞী ইন্দখীলং অতিক্কামেতি, আপত্তি পাচিত্তিযস্স।
500. Appaṭisaṃvidite appaṭisaṃviditasaññī indakhīlaṃ atikkāmeti, āpatti pācittiyassa. Appaṭisaṃvidite vematiko indakhīlaṃ atikkāmeti, āpatti pācittiyassa. Appaṭisaṃvidite paṭisaṃviditasaññī indakhīlaṃ atikkāmeti, āpatti pācittiyassa.
পটিসংৰিদিতে অপ্পটিসংৰিদিতসঞ্ঞী, আপত্তি দুক্কটস্স। পটিসংৰিদিতে ৰেমতিকো, আপত্তি দুক্কটস্স। পটিসংৰিদিতে পটিসংৰিদিতসঞ্ঞী, অনাপত্তি।
Paṭisaṃvidite appaṭisaṃviditasaññī, āpatti dukkaṭassa. Paṭisaṃvidite vematiko, āpatti dukkaṭassa. Paṭisaṃvidite paṭisaṃviditasaññī, anāpatti.
৫০১. অনাপত্তি পটিসংৰিদিতে, ন খত্তিযো হোতি, ন খত্তিযাভিসেকেন অভিসিত্তো হোতি, রাজা সযনিঘরা নিক্খন্তো হোতি, মহেসী সযনিঘরা নিক্খন্তা হোতি, উভো ৰা নিক্খন্তা হোন্তি, ন সযনিঘরে, উম্মত্তকস্স, আদিকম্মিকস্সাতি।
501. Anāpatti paṭisaṃvidite, na khattiyo hoti, na khattiyābhisekena abhisitto hoti, rājā sayanigharā nikkhanto hoti, mahesī sayanigharā nikkhantā hoti, ubho vā nikkhantā honti, na sayanighare, ummattakassa, ādikammikassāti.
অন্তেপুরসিক্খাপদং নিট্ঠিতং পঠমং।
Antepurasikkhāpadaṃ niṭṭhitaṃ paṭhamaṃ.
২. রতনসিক্খাপদং
2. Ratanasikkhāpadaṃ
৫০২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরো ভিক্খু অচিরৰতিযা নদিযা নহাযতি। অঞ্ঞতরোপি ব্রাহ্মণো পঞ্চসতানং থৰিকং থলে নিক্খিপিত্ৰা অচিরৰতিযা নদিযা নহাযন্তো ৰিস্সরিত্ৰা অগমাসি। অথ খো সো ভিক্খু – ‘‘তস্সাযং ব্রাহ্মণস্স থৰিকা, মা ইধ নস্সী’’তি অগ্গহেসি। অথ খো সো ব্রাহ্মণো সরিত্ৰা তুরিতো আধাৰিত্ৰা তং ভিক্খুং এতদৰোচ – ‘‘অপি মে, ভো, থৰিকং পস্সেয্যাসী’’তি? ‘‘হন্দ, ব্রাহ্মণা’’তি অদাসি। অথ খো তস্স ব্রাহ্মণস্স এতদহোসি – ‘‘কেন নু খো অহং উপাযেন ইমস্স ভিক্খুনো পুণ্ণপত্তং ন দদেয্য’’ন্তি! ‘‘ন মে, ভো, পঞ্চসতানি, সহস্সং মে’’তি পলিবুন্ধেত্ৰা মুঞ্চি। অথ খো সো ভিক্খু আরামং গন্ত্ৰা ভিক্খূনং এতমত্থং আরোচেসি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু রতনং উগ্গহেস্সতী’’তি…পে॰… সচ্চং কির ত্ৰং, ভিক্খু, রতনং উগ্গহেসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, রতনং উগ্গহেস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
502. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro bhikkhu aciravatiyā nadiyā nahāyati. Aññataropi brāhmaṇo pañcasatānaṃ thavikaṃ thale nikkhipitvā aciravatiyā nadiyā nahāyanto vissaritvā agamāsi. Atha kho so bhikkhu – ‘‘tassāyaṃ brāhmaṇassa thavikā, mā idha nassī’’ti aggahesi. Atha kho so brāhmaṇo saritvā turito ādhāvitvā taṃ bhikkhuṃ etadavoca – ‘‘api me, bho, thavikaṃ passeyyāsī’’ti? ‘‘Handa, brāhmaṇā’’ti adāsi. Atha kho tassa brāhmaṇassa etadahosi – ‘‘kena nu kho ahaṃ upāyena imassa bhikkhuno puṇṇapattaṃ na dadeyya’’nti! ‘‘Na me, bho, pañcasatāni, sahassaṃ me’’ti palibundhetvā muñci. Atha kho so bhikkhu ārāmaṃ gantvā bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhu ratanaṃ uggahessatī’’ti…pe… saccaṃ kira tvaṃ, bhikkhu, ratanaṃ uggahesīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, ratanaṃ uggahessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু রতনং ৰা রতনসম্মতং ৰা উগ্গণ্হেয্য ৰা উগ্গণ্হাপেয্য ৰা, পাচিত্তিয’’ন্তি।
‘‘Yo pana bhikkhu ratanaṃ vā ratanasammataṃ vā uggaṇheyya vā uggaṇhāpeyya vā, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৫০৩. তেন খো পন সমযেন সাৰত্থিযা উস্সৰো হোতি। মনুস্সা অলঙ্কতপ্পটিযত্তা উয্যানং গচ্ছন্তি। ৰিসাখাপি মিগারমাতা অলঙ্কতপ্পটিযত্তা ‘‘উয্যানং গমিস্সামী’’তি গামতো নিক্খমিত্ৰা – ‘‘ক্যাহং করিস্সামি উয্যানং গন্ত্ৰা, যংনূনাহং ভগৰন্তং পযিরুপাসেয্য’’ন্তি আভরণং ওমুঞ্চিত্ৰা উত্তরাসঙ্গেন ভণ্ডিকং বন্ধিত্ৰা দাসিযা অদাসি – ‘‘হন্দ, জে, ইমং ভণ্ডিকং গণ্হাহী’’তি। অথ খো ৰিসাখা মিগারমাতা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো ৰিসাখং মিগারমাতরং ভগৰা ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো ৰিসাখা মিগারমাতা ভগৰতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি। অথ খো সা দাসী তং ভণ্ডিকং ৰিস্সরিত্ৰা অগমাসি। ভিক্খূ পস্সিত্ৰা ভগৰতো এতমত্থং আরোচেসুং। ‘‘তেন হি, ভিক্খৰে, উগ্গহেত্ৰা নিক্খিপথা’’তি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, রতনং ৰা রতনসম্মতং ৰা অজ্ঝারামে উগ্গহেত্ৰা ৰা উগ্গহাপেত্ৰা ৰা নিক্খিপিতুং – ‘‘যস্স ভৰিস্সতি সো হরিস্সতী’’তি। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
503. Tena kho pana samayena sāvatthiyā ussavo hoti. Manussā alaṅkatappaṭiyattā uyyānaṃ gacchanti. Visākhāpi migāramātā alaṅkatappaṭiyattā ‘‘uyyānaṃ gamissāmī’’ti gāmato nikkhamitvā – ‘‘kyāhaṃ karissāmi uyyānaṃ gantvā, yaṃnūnāhaṃ bhagavantaṃ payirupāseyya’’nti ābharaṇaṃ omuñcitvā uttarāsaṅgena bhaṇḍikaṃ bandhitvā dāsiyā adāsi – ‘‘handa, je, imaṃ bhaṇḍikaṃ gaṇhāhī’’ti. Atha kho visākhā migāramātā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho visākhaṃ migāramātaraṃ bhagavā dhammiyā kathāya sandassesi samādapesi samuttejesi sampahaṃsesi. Atha kho visākhā migāramātā bhagavatā dhammiyā kathāya sandassitā samādapitā samuttejitā sampahaṃsitā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho sā dāsī taṃ bhaṇḍikaṃ vissaritvā agamāsi. Bhikkhū passitvā bhagavato etamatthaṃ ārocesuṃ. ‘‘Tena hi, bhikkhave, uggahetvā nikkhipathā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, ratanaṃ vā ratanasammataṃ vā ajjhārāme uggahetvā vā uggahāpetvā vā nikkhipituṃ – ‘‘yassa bhavissati so harissatī’’ti. Evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু রতনং ৰা রতনসম্মতং ৰা, অঞ্ঞত্র অজ্ঝারামা, উগ্গণ্হেয্য ৰা উগ্গণ্হাপেয্য ৰা, পাচিত্তিয’’ন্তি।
‘‘Yo pana bhikkhu ratanaṃ vā ratanasammataṃ vā, aññatra ajjhārāmā, uggaṇheyya vā uggaṇhāpeyya vā, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৫০৪. তেন খো পন সমযেন কাসীসু জনপদে অনাথপিণ্ডিকস্স গহপতিস্স কম্মন্তগামো হোতি। তেন চ গহপতিনা অন্তেৰাসী আণত্তো হোতি – ‘‘সচে ভদন্তা আগচ্ছন্তি ভত্তং করেয্যাসী’’তি। তেন খো পন সমযেন সম্বহুলা ভিক্খূ কাসীসু জনপদে চারিকং চরমানা যেন অনাথপিণ্ডিকস্স গহপতিস্স কম্মন্তগামো তেনুপসঙ্কমিংসু। অদ্দসা খো সো পুরিসো তে ভিক্খূ দূরতোৰ আগচ্ছন্তে। দিস্ৰান যেন তে ভিক্খূ তেনুপসঙ্কমি; উপসঙ্কমিত্ৰা তে ভিক্খূ অভিৰাদেত্ৰা এতদৰোচ – ‘‘অধিৰাসেন্তু, ভন্তে, অয্যা স্ৰাতনায গহপতিনো ভত্ত’’ন্তি। অধিৰাসেসুং খো তে ভিক্খূ তুণ্হীভাৰেন। অথ খো সো পুরিসো তস্সা রত্তিযা অচ্চযেন পণীতং খাদনীযং ভোজনীযং পটিযাদাপেত্ৰা কালং আরোচাপেত্ৰা অঙ্গুলিমুদ্দিকং ওমুঞ্চিত্ৰা তে ভিক্খূ ভত্তেন পরিৰিসিত্ৰা – ‘‘অয্যা ভুঞ্জিত্ৰা গচ্ছন্তু, অহম্পি কম্মন্তং গমিস্সামী’’তি অঙ্গুলিমুদ্দিকং ৰিস্সরিত্ৰা অগমাসি। ভিক্খূ পস্সিত্ৰা – ‘‘সচে মযং গমিস্সাম নস্সিস্সতাযং অঙ্গুলিমুদ্দিকা’’তি তত্থেৰ অচ্ছিংসু। অথ খো সো পুরিসো কম্মন্তা আগচ্ছন্তো তে ভিক্খূ পস্সিত্ৰা এতদৰোচ – ‘‘কিস্স, ভন্তে, অয্যা ইধেৰ অচ্ছন্তী’’তি? অথ খো তে ভিক্খূ তস্স পুরিসস্স এতমত্থং আরোচেত্ৰা সাৰত্থিং গন্ত্ৰা ভিক্খূনং এতমত্থং আরোচেসুং। ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, রতনং ৰা রতনসম্মতং ৰা অজ্ঝারামে ৰা অজ্ঝাৰসথে ৰা উগ্গহেত্ৰা ৰা উগ্গহাপেত্ৰা ৰা নিক্খিপিতুং – যস্স ভৰিস্সতি সো হরিস্সতী’’তি। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
504. Tena kho pana samayena kāsīsu janapade anāthapiṇḍikassa gahapatissa kammantagāmo hoti. Tena ca gahapatinā antevāsī āṇatto hoti – ‘‘sace bhadantā āgacchanti bhattaṃ kareyyāsī’’ti. Tena kho pana samayena sambahulā bhikkhū kāsīsu janapade cārikaṃ caramānā yena anāthapiṇḍikassa gahapatissa kammantagāmo tenupasaṅkamiṃsu. Addasā kho so puriso te bhikkhū dūratova āgacchante. Disvāna yena te bhikkhū tenupasaṅkami; upasaṅkamitvā te bhikkhū abhivādetvā etadavoca – ‘‘adhivāsentu, bhante, ayyā svātanāya gahapatino bhatta’’nti. Adhivāsesuṃ kho te bhikkhū tuṇhībhāvena. Atha kho so puriso tassā rattiyā accayena paṇītaṃ khādanīyaṃ bhojanīyaṃ paṭiyādāpetvā kālaṃ ārocāpetvā aṅgulimuddikaṃ omuñcitvā te bhikkhū bhattena parivisitvā – ‘‘ayyā bhuñjitvā gacchantu, ahampi kammantaṃ gamissāmī’’ti aṅgulimuddikaṃ vissaritvā agamāsi. Bhikkhū passitvā – ‘‘sace mayaṃ gamissāma nassissatāyaṃ aṅgulimuddikā’’ti tattheva acchiṃsu. Atha kho so puriso kammantā āgacchanto te bhikkhū passitvā etadavoca – ‘‘kissa, bhante, ayyā idheva acchantī’’ti? Atha kho te bhikkhū tassa purisassa etamatthaṃ ārocetvā sāvatthiṃ gantvā bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, ratanaṃ vā ratanasammataṃ vā ajjhārāme vā ajjhāvasathe vā uggahetvā vā uggahāpetvā vā nikkhipituṃ – yassa bhavissati so harissatī’’ti. Evañca pana, bhikkhave, imaṃ sikkhāpadaṃ uddiseyyātha –
৫০৫. ‘‘যো পন ভিক্খু রতনং ৰা রতনসম্মতং ৰা, অঞ্ঞত্র অজ্ঝারামা ৰা অজ্ঝাৰসথা ৰা, উগ্গণ্হেয্য ৰা উগ্গণ্হাপেয্য ৰা, পাচিত্তিযং। রতনং ৰা পন ভিক্খুনা রতনসম্মতং ৰা অজ্ঝারামে ৰা অজ্ঝাৰসথে ৰা উগ্গহেত্ৰা ৰা উগ্গহাপেত্ৰা ৰা নিক্খিপিতব্বং – ‘যস্স ভৰিস্সতি সো হরিস্সতী’তি। অযং তত্থ সামীচী’’তি।
505.‘‘Yo pana bhikkhu ratanaṃ vā ratanasammataṃ vā, aññatra ajjhārāmā vā ajjhāvasathā vā, uggaṇheyya vā uggaṇhāpeyya vā, pācittiyaṃ. Ratanaṃ vā pana bhikkhunā ratanasammataṃ vā ajjhārāme vā ajjhāvasathe vā uggahetvā vā uggahāpetvā vā nikkhipitabbaṃ – ‘yassa bhavissati so harissatī’ti. Ayaṃ tattha sāmīcī’’ti.
৫০৬. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
506.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
রতনং নাম মুত্তা মণি ৰেল়ুরিযো সঙ্খো সিলা পৰালং রজতং জাতরূপং লোহিতঙ্কো 11 মসারগল্লং।
Ratanaṃ nāma muttā maṇi veḷuriyo saṅkho silā pavālaṃ rajataṃ jātarūpaṃ lohitaṅko 12 masāragallaṃ.
রতনসম্মতং নাম যং মনুস্সানং উপভোগপরিভোগং, এতং রতনসম্মতং নাম।
Ratanasammataṃ nāma yaṃ manussānaṃ upabhogaparibhogaṃ, etaṃ ratanasammataṃ nāma.
অঞ্ঞত্র অজ্ঝারামা ৰা অজ্ঝাৰসথা ৰাতি ঠপেত্ৰা অজ্ঝারামং অজ্ঝাৰসথং।
Aññatra ajjhārāmā vā ajjhāvasathā vāti ṭhapetvā ajjhārāmaṃ ajjhāvasathaṃ.
অজ্ঝারামো নাম পরিক্খিত্তস্স আরামস্স অন্তো আরামো, অপরিক্খিত্তস্স উপচারো।
Ajjhārāmo nāma parikkhittassa ārāmassa anto ārāmo, aparikkhittassa upacāro.
অজ্ঝাৰসথো নাম পরিক্খিত্তস্স আৰসথস্স অন্তো আৰসথো, অপরিক্খিত্তস্স উপচারো।
Ajjhāvasatho nāma parikkhittassa āvasathassa anto āvasatho, aparikkhittassa upacāro.
উগ্গণ্হেয্যাতি সযং গণ্হাতি, আপত্তি পাচিত্তিযস্স।
Uggaṇheyyāti sayaṃ gaṇhāti, āpatti pācittiyassa.
উগ্গণ্হাপেয্যাতি অঞ্ঞং গাহাপেতি, আপত্তি পাচিত্তিযস্স।
Uggaṇhāpeyyāti aññaṃ gāhāpeti, āpatti pācittiyassa.
রতনং ৰা পন ভিক্খুনা রতনসম্মতং ৰা অজ্ঝারামে ৰা অজ্ঝাৰসথে ৰা উগ্গহেত্ৰা ৰা উগ্গহাপেত্ৰা ৰা নিক্খিপিতব্বন্তি রূপেন ৰা নিমিত্তেন ৰা সঞ্ঞাণং কত্ৰা নিক্খিপিত্ৰা আচিক্খিতব্বং – ‘‘যস্স ভণ্ডং নট্ঠং সো আগচ্ছতূ’’তি। সচে তত্থ আগচ্ছতি সো ৰত্তব্বো – ‘‘আৰুসো, কীদিসং তে ভণ্ড’’ন্তি? সচে রূপেন ৰা নিমিত্তেন ৰা সম্পাদেতি দাতব্বং, নো চে সম্পাদেতি ‘‘ৰিচিনাহি আৰুসো’’তি ৰত্তব্বো। তম্হা আৰাসা পক্কমন্তেন যে তত্থ হোন্তি ভিক্খূ পতিরূপা, তেসং হত্থে নিক্খিপিত্ৰা পক্কমিতব্বং। নো চে হোন্তি ভিক্খূ পতিরূপা, যে তত্থ হোন্তি গহপতিকা পতিরূপা, তেসং হত্থে নিক্খিপিত্ৰা পক্কমিতব্বং।
Ratanaṃ vā pana bhikkhunā ratanasammataṃ vā ajjhārāme vā ajjhāvasathe vā uggahetvā vā uggahāpetvā vā nikkhipitabbanti rūpena vā nimittena vā saññāṇaṃ katvā nikkhipitvā ācikkhitabbaṃ – ‘‘yassa bhaṇḍaṃ naṭṭhaṃ so āgacchatū’’ti. Sace tattha āgacchati so vattabbo – ‘‘āvuso, kīdisaṃ te bhaṇḍa’’nti? Sace rūpena vā nimittena vā sampādeti dātabbaṃ, no ce sampādeti ‘‘vicināhi āvuso’’ti vattabbo. Tamhā āvāsā pakkamantena ye tattha honti bhikkhū patirūpā, tesaṃ hatthe nikkhipitvā pakkamitabbaṃ. No ce honti bhikkhū patirūpā, ye tattha honti gahapatikā patirūpā, tesaṃ hatthe nikkhipitvā pakkamitabbaṃ.
অযং তত্থ সামীচীতি অযং তত্থ অনুধম্মতা।
Ayaṃ tattha sāmīcīti ayaṃ tattha anudhammatā.
৫০৭. অনাপত্তি রতনং ৰা রতনসম্মতং ৰা অজ্ঝারামে ৰা অজ্ঝাৰসথে ৰা উগ্গহেত্ৰা ৰা উগ্গহাপেত্ৰা ৰা নিক্খিপতি – ‘‘যস্স ভৰিস্সতি সো হরিস্সতী’’তি, রতনসম্মতং ৰিস্সাসং গণ্হাতি, তাৰকালিকং গণ্হাতি, পংসুকূলসঞ্ঞিস্স, উম্মত্তকস্স, আদিকম্মিকস্সাতি।
507. Anāpatti ratanaṃ vā ratanasammataṃ vā ajjhārāme vā ajjhāvasathe vā uggahetvā vā uggahāpetvā vā nikkhipati – ‘‘yassa bhavissati so harissatī’’ti, ratanasammataṃ vissāsaṃ gaṇhāti, tāvakālikaṃ gaṇhāti, paṃsukūlasaññissa, ummattakassa, ādikammikassāti.
রতনসিক্খাপদং নিট্ঠিতং দুতিযং।
Ratanasikkhāpadaṃ niṭṭhitaṃ dutiyaṃ.
৩. ৰিকালগামপ্পৰিসনসিক্খাপদং
3. Vikālagāmappavisanasikkhāpadaṃ
৫০৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ ৰিকালে গামং পৰিসিত্ৰা সভাযং নিসীদিত্ৰা অনেকৰিহিতং তিরচ্ছানকথং কথেন্তি, সেয্যথিদং – 13 রাজকথং চোরকথং মহামত্তকথং সেনাকথং ভযকথং যুদ্ধকথং অন্নকথং পানকথং ৰত্থকথং সযনকথং মালাকথং গন্ধকথং ঞাতিকথং যানকথং গামকথং নিগমকথং নগরকথং জনপদকথং ইত্থিকথং 14 সূরকথং ৰিসিখাকথং কুম্ভট্ঠানকথং পুব্বপেতকথং নানত্তকথং লোকক্খাযিকং সমুদ্দক্খাযিকং ইতিভৰাভৰকথং ইতি ৰা। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা ৰিকালে গামং পৰিসিত্ৰা সভাযং নিসীদিত্ৰা অনেকৰিহিতং তিরচ্ছানকথং কথেস্সন্তি, সেয্যথিদং – রাজকথং চোরকথং…পে॰… ইতিভৰাভৰকথং ইতি ৰা, সেয্যথাপি গিহী কামভোগিনো’’তি!
508. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū vikāle gāmaṃ pavisitvā sabhāyaṃ nisīditvā anekavihitaṃ tiracchānakathaṃ kathenti, seyyathidaṃ – 15 rājakathaṃ corakathaṃ mahāmattakathaṃ senākathaṃ bhayakathaṃ yuddhakathaṃ annakathaṃ pānakathaṃ vatthakathaṃ sayanakathaṃ mālākathaṃ gandhakathaṃ ñātikathaṃ yānakathaṃ gāmakathaṃ nigamakathaṃ nagarakathaṃ janapadakathaṃ itthikathaṃ 16 sūrakathaṃ visikhākathaṃ kumbhaṭṭhānakathaṃ pubbapetakathaṃ nānattakathaṃ lokakkhāyikaṃ samuddakkhāyikaṃ itibhavābhavakathaṃ iti vā. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā vikāle gāmaṃ pavisitvā sabhāyaṃ nisīditvā anekavihitaṃ tiracchānakathaṃ kathessanti, seyyathidaṃ – rājakathaṃ corakathaṃ…pe… itibhavābhavakathaṃ iti vā, seyyathāpi gihī kāmabhogino’’ti!
অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ৰিকালে গামং পৰিসিত্ৰা সভাযং নিসীদিত্ৰা অনেকৰিহিতং তিরচ্ছানকথং কথেস্সন্তি, সেয্যথিদং – রাজকথং চোরকথং…পে॰… ইতিভৰাভৰকথং ইতি ৰা’’তি…পে॰… সচ্চং কির তুম্হে, ভিক্খৰে, ৰিকালে গামং পৰিসিত্ৰা সভাযং নিসীদিত্ৰা অনেকৰিহিতং তিরচ্ছানকথং কথেথ, সেয্যথিদং – রাজকথং চোরকথং…পে॰… ইতিভৰাভৰকথং ইতি ৰাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, ৰিকালে গামং পৰিসিত্ৰা সভাযং নিসীদিত্ৰা অনেকৰিহিতং তিরচ্ছানকথং কথেস্সথ, সেয্যথিদং – রাজকথং চোরকথং…পে॰… ইতিভৰাভৰকথং ইতি ৰা! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū vikāle gāmaṃ pavisitvā sabhāyaṃ nisīditvā anekavihitaṃ tiracchānakathaṃ kathessanti, seyyathidaṃ – rājakathaṃ corakathaṃ…pe… itibhavābhavakathaṃ iti vā’’ti…pe… saccaṃ kira tumhe, bhikkhave, vikāle gāmaṃ pavisitvā sabhāyaṃ nisīditvā anekavihitaṃ tiracchānakathaṃ kathetha, seyyathidaṃ – rājakathaṃ corakathaṃ…pe… itibhavābhavakathaṃ iti vāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, vikāle gāmaṃ pavisitvā sabhāyaṃ nisīditvā anekavihitaṃ tiracchānakathaṃ kathessatha, seyyathidaṃ – rājakathaṃ corakathaṃ…pe… itibhavābhavakathaṃ iti vā! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু ৰিকালে গামং পৰিসেয্য, পাচিত্তিয’’ন্তি।
‘‘Yopana bhikkhu vikāle gāmaṃ paviseyya, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৫০৯. তেন খো পন সমযেন সম্বহুলা ভিক্খূ কোসলেসু জনপদে সাৰত্থিং গচ্ছন্তা সাযং অঞ্ঞতরং গামং উপগচ্ছিংসু। মনুস্সা তে ভিক্খূ পস্সিত্ৰা এতদৰোচুং – ‘‘পৰিসথ, ভন্তে’’তি । অথ খো তে ভিক্খূ – ‘‘ভগৰতা পটিক্খিত্তং ৰিকালে গামং পৰিসিতু’’ন্তি কুক্কুচ্চাযন্তা ন পৰিসিংসু। চোরা তে ভিক্খূ অচ্ছিন্দিংসু। অথ খো তে ভিক্খূ সাৰত্থিং গন্ত্ৰা ভিক্খূনং এতমত্থং আরোচেসুং। ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, আপুচ্ছা ৰিকালে গামং পৰিসিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
509. Tena kho pana samayena sambahulā bhikkhū kosalesu janapade sāvatthiṃ gacchantā sāyaṃ aññataraṃ gāmaṃ upagacchiṃsu. Manussā te bhikkhū passitvā etadavocuṃ – ‘‘pavisatha, bhante’’ti . Atha kho te bhikkhū – ‘‘bhagavatā paṭikkhittaṃ vikāle gāmaṃ pavisitu’’nti kukkuccāyantā na pavisiṃsu. Corā te bhikkhū acchindiṃsu. Atha kho te bhikkhū sāvatthiṃ gantvā bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, āpucchā vikāle gāmaṃ pavisituṃ. Evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু অনাপুচ্ছা ৰিকালে গামং পৰিসেয্য, পাচিত্তিয’’ন্তি।
‘‘Yopana bhikkhu anāpucchā vikāle gāmaṃ paviseyya, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৫১০. তেন খো পন সমযেন অঞ্ঞতরো ভিক্খু কোসলেসু জনপদে সাৰত্থিং গচ্ছন্তো সাযং অঞ্ঞতরং গামং উপগচ্ছি। মনুস্সা তং ভিক্খুং পস্সিত্ৰা এতদৰোচুং – ‘‘পৰিসথ, ভন্তে’’তি। অথ খো সো ভিক্খু – ‘‘ভগৰতা পটিক্খিত্তং অনাপুচ্ছা ৰিকালে গামং পৰিসিতু’’ন্তি কুক্কুচ্চাযন্তো ন পাৰিসি। চোরা তং ভিক্খুং অচ্ছিন্দিংসু। অথ খো সো ভিক্খু সাৰত্থিং গন্ত্ৰা ভিক্খূনং এতমত্থং আরোচেসি। ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, সন্তং ভিক্খুং আপুচ্ছা ৰিকালে গামং পৰিসিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
510. Tena kho pana samayena aññataro bhikkhu kosalesu janapade sāvatthiṃ gacchanto sāyaṃ aññataraṃ gāmaṃ upagacchi. Manussā taṃ bhikkhuṃ passitvā etadavocuṃ – ‘‘pavisatha, bhante’’ti. Atha kho so bhikkhu – ‘‘bhagavatā paṭikkhittaṃ anāpucchā vikāle gāmaṃ pavisitu’’nti kukkuccāyanto na pāvisi. Corā taṃ bhikkhuṃ acchindiṃsu. Atha kho so bhikkhu sāvatthiṃ gantvā bhikkhūnaṃ etamatthaṃ ārocesi. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, santaṃ bhikkhuṃ āpucchā vikāle gāmaṃ pavisituṃ. Evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু সন্তং ভিক্খুং অনাপুচ্ছা ৰিকালে গামং পৰিসেয্য, পাচিত্তিয’’ন্তি।
‘‘Yo pana bhikkhu santaṃ bhikkhuṃ anāpucchā vikāle gāmaṃ paviseyya, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৫১১. তেন খো পন সমযেন অঞ্ঞতরো ভিক্খু অহিনা দট্ঠো হোতি। অঞ্ঞতরো ভিক্খু ‘‘অগ্গিং আহরিস্সামী’’তি গামং গচ্ছতি। অথ খো সো ভিক্খু – ‘‘ভগৰতা পটিক্খিত্তং সন্তং ভিক্খুং অনাপুচ্ছা ৰিকালে গামং পৰিসিতু’’ন্তি কুক্কুচ্চাযন্তো ন পাৰিসি…পে॰… ভগৰতো এতমত্থং আরোচেসুং । অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, তথারূপে অচ্চাযিকে করণীযে সন্তং ভিক্খুং অনাপুচ্ছা ৰিকালে গামং পৰিসিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
511. Tena kho pana samayena aññataro bhikkhu ahinā daṭṭho hoti. Aññataro bhikkhu ‘‘aggiṃ āharissāmī’’ti gāmaṃ gacchati. Atha kho so bhikkhu – ‘‘bhagavatā paṭikkhittaṃ santaṃ bhikkhuṃ anāpucchā vikāle gāmaṃ pavisitu’’nti kukkuccāyanto na pāvisi…pe… bhagavato etamatthaṃ ārocesuṃ . Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, tathārūpe accāyike karaṇīye santaṃ bhikkhuṃ anāpucchā vikāle gāmaṃ pavisituṃ. Evañca pana, bhikkhave, imaṃ sikkhāpadaṃ uddiseyyātha –
৫১২. ‘‘যো পন ভিক্খু সন্তং ভিক্খুং অনাপুচ্ছা ৰিকালে গামং পৰিসেয্য, অঞ্ঞত্র তথারূপা অচ্চাযিকা করণীযা, পাচিত্তিয’’ন্তি।
512.‘‘Yo pana bhikkhu santaṃ bhikkhuṃ anāpucchā vikāle gāmaṃ paviseyya, aññatra tathārūpā accāyikā karaṇīyā, pācittiya’’nti.
৫১৩. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
513.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
সন্তো নাম ভিক্খু সক্কা হোতি আপুচ্ছা পৰিসিতুং।
Santo nāma bhikkhu sakkā hoti āpucchā pavisituṃ.
অসন্তো নাম ভিক্খু ন সক্কা হোতি আপুচ্ছা পৰিসিতুং।
Asanto nāma bhikkhu na sakkā hoti āpucchā pavisituṃ.
ৰিকালো নাম মজ্ঝন্হিকে ৰীতিৰত্তে যাৰ অরুণুগ্গমনা।
Vikālo nāma majjhanhike vītivatte yāva aruṇuggamanā.
গামং পৰিসেয্যাতি পরিক্খিত্তস্স গামস্স পরিক্খেপং অতিক্কমন্তস্স আপত্তি পাচিত্তিযস্স। অপরিক্খিত্তস্স গামস্স উপচারং ওক্কমন্তস্স আপত্তি পাচিত্তিযস্স।
Gāmaṃ paviseyyāti parikkhittassa gāmassa parikkhepaṃ atikkamantassa āpatti pācittiyassa. Aparikkhittassa gāmassa upacāraṃ okkamantassa āpatti pācittiyassa.
অঞ্ঞত্র তথারূপা অচ্চাযিকা করণীযাতি ঠপেত্ৰা তথারূপং অচ্চাযিকং করণীযং।
Aññatra tathārūpā accāyikā karaṇīyāti ṭhapetvā tathārūpaṃ accāyikaṃ karaṇīyaṃ.
৫১৪. ৰিকালে ৰিকালসঞ্ঞী সন্তং ভিক্খুং অনাপুচ্ছা গামং পৰিসতি, অঞ্ঞত্র তথারূপা অচ্চাযিকা করণীযা, আপত্তি পাচিত্তিযস্স। ৰিকালে ৰেমতিকো সন্তং ভিক্খুং অনাপুচ্ছা গামং পৰিসতি, অঞ্ঞত্র তথারূপা অচ্চাযিকা করণীযা, আপত্তি পাচিত্তিযস্স। ৰিকালে কালসঞ্ঞী সন্তং ভিক্খুং অনাপুচ্ছা গামং পৰিসতি, অঞ্ঞত্র তথারূপা অচ্চাযিকা করণীযা, আপত্তি পাচিত্তিযস্স।
514. Vikāle vikālasaññī santaṃ bhikkhuṃ anāpucchā gāmaṃ pavisati, aññatra tathārūpā accāyikā karaṇīyā, āpatti pācittiyassa. Vikāle vematiko santaṃ bhikkhuṃ anāpucchā gāmaṃ pavisati, aññatra tathārūpā accāyikā karaṇīyā, āpatti pācittiyassa. Vikāle kālasaññī santaṃ bhikkhuṃ anāpucchā gāmaṃ pavisati, aññatra tathārūpā accāyikā karaṇīyā, āpatti pācittiyassa.
কালে ৰিকালসঞ্ঞী , আপত্তি দুক্কটস্স। কালে ৰেমতিকো, আপত্তি দুক্কটস্স। কালে কালসঞ্ঞী, অনাপত্তি।
Kāle vikālasaññī , āpatti dukkaṭassa. Kāle vematiko, āpatti dukkaṭassa. Kāle kālasaññī, anāpatti.
৫১৫. অনাপত্তি তথারূপে অচ্চাযিকে করণীযে, সন্তং ভিক্খুং আপুচ্ছা পৰিসতি, অসন্তং ভিক্খুং অনাপুচ্ছা পৰিসতি, অন্তরারামং গচ্ছতি, ভিক্খুনুপস্সযং গচ্ছতি, তিত্থিযসেয্যং গচ্ছতি, পটিক্কমনং গচ্ছতি, গামেন মগ্গো হোতি, আপদাসু, উম্মত্তকস্স, আদিকম্মিকস্সাতি।
515. Anāpatti tathārūpe accāyike karaṇīye, santaṃ bhikkhuṃ āpucchā pavisati, asantaṃ bhikkhuṃ anāpucchā pavisati, antarārāmaṃ gacchati, bhikkhunupassayaṃ gacchati, titthiyaseyyaṃ gacchati, paṭikkamanaṃ gacchati, gāmena maggo hoti, āpadāsu, ummattakassa, ādikammikassāti.
ৰিকালগামপ্পৰিসনসিক্খাপদং নিট্ঠিতং ততিযং।
Vikālagāmappavisanasikkhāpadaṃ niṭṭhitaṃ tatiyaṃ.
৪. সূচিঘরসিক্খাপদং
4. Sūcigharasikkhāpadaṃ
৫১৬. তেন সমযেন বুদ্ধো ভগৰা সক্কেসু ৰিহরতি কপিলৰত্থুস্মিং নিগ্রোধারামে। তেন খো পন সমযেন অঞ্ঞতরেন দন্তকারেন ভিক্খূ পৰারিতা হোন্তি – ‘‘যেসং অয্যানং সূচিঘরেন অত্থো অহং সূচিঘরেনা’’তি। তেন খো পন সমযেন ভিক্খূ বহূ সূচিঘরে ৰিঞ্ঞাপেন্তি। যেসং খুদ্দকা সূচিঘরা তে মহন্তে সূচিঘরে ৰিঞ্ঞাপেন্তি। যেসং মহন্তা সূচিঘরা তে খুদ্দকে সূচিঘরে ৰিঞ্ঞাপেন্তি। অথ খো সো দন্তকারো ভিক্খূনং বহূ সূচিঘরে করোন্তো ন সক্কোতি অঞ্ঞং ৰিক্কাযিকং ভণ্ডং কাতুং, অত্তনাপি ন যাপেতি, পুত্তদারোপিস্স কিলমতি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা ন মত্তং জানিত্ৰা বহূ সূচিঘরে ৰিঞ্ঞাপেস্সন্তি! অযং ইমেসং বহূ সূচিঘরে করোন্তো ন সক্কোতি অঞ্ঞং ৰিক্কাযিকং ভণ্ডং কাতুং, অত্তনাপি ন যাপেতি, পুত্তদারোপিস্স কিলমতী’’তি। অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ ন মত্তং জানিত্ৰা বহূ সূচিঘরে ৰিঞ্ঞাপেস্সন্তী’’তি…পে॰… সচ্চং কির, ভিক্খৰে, ভিক্খূ ন মত্তং জানিত্ৰা বহূ সূচিঘরে ৰিঞ্ঞাপেন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তে, ভিক্খৰে, মোঘপুরিসা ন মত্তং জানিত্ৰা বহূ সূচিঘরে ৰিঞ্ঞাপেস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
516. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena aññatarena dantakārena bhikkhū pavāritā honti – ‘‘yesaṃ ayyānaṃ sūcigharena attho ahaṃ sūcigharenā’’ti. Tena kho pana samayena bhikkhū bahū sūcighare viññāpenti. Yesaṃ khuddakā sūcigharā te mahante sūcighare viññāpenti. Yesaṃ mahantā sūcigharā te khuddake sūcighare viññāpenti. Atha kho so dantakāro bhikkhūnaṃ bahū sūcighare karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadāropissa kilamati. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū sūcighare viññāpessanti! Ayaṃ imesaṃ bahū sūcighare karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadāropissa kilamatī’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū na mattaṃ jānitvā bahū sūcighare viññāpessantī’’ti…pe… saccaṃ kira, bhikkhave, bhikkhū na mattaṃ jānitvā bahū sūcighare viññāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā na mattaṃ jānitvā bahū sūcighare viññāpessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৫১৭. ‘‘যো পন ভিক্খু অট্ঠিমযং ৰা দন্তমযং ৰা ৰিসাণমযং ৰা সূচিঘরং কারাপেয্য ভেদনকং, পাচিত্তিয’’ন্তি।
517.‘‘Yo pana bhikkhu aṭṭhimayaṃ vā dantamayaṃ vā visāṇamayaṃ vā sūcigharaṃ kārāpeyya bhedanakaṃ, pācittiya’’nti.
৫১৮. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
518.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
অট্ঠি নাম যং কিঞ্চি অট্ঠি।
Aṭṭhi nāma yaṃ kiñci aṭṭhi.
দন্তো নাম হত্থিদন্তো ৰুচ্চতি।
Danto nāma hatthidanto vuccati.
ৰিসাণং নাম যং কিঞ্চি ৰিসাণং।
Visāṇaṃ nāma yaṃ kiñci visāṇaṃ.
কারাপেয্যাতি করোতি ৰা কারাপেতি ৰা, পযোগে দুক্কটং। পটিলাভেন ভিন্দিত্ৰা পাচিত্তিযং দেসেতব্বং।
Kārāpeyyāti karoti vā kārāpeti vā, payoge dukkaṭaṃ. Paṭilābhena bhinditvā pācittiyaṃ desetabbaṃ.
অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স। অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স।
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
সূচিঘরসিক্খাপদং নিট্ঠিতং চতুত্থং।
Sūcigharasikkhāpadaṃ niṭṭhitaṃ catutthaṃ.
৫. মঞ্চপীঠসিক্খাপদং
5. Mañcapīṭhasikkhāpadaṃ
৫২১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উপনন্দো সক্যপুত্তো উচ্চে মঞ্চে সযতি। অথ খো ভগৰা সম্বহুলেহি ভিক্খূহি সদ্ধিং সেনাসনচারিকং আহিণ্ডন্তো যেনাযস্মতো উপনন্দস্স সক্যপুত্তস্স ৰিহারো তেনুপসঙ্কমি। অদ্দসা খো আযস্মা উপনন্দো সক্যপুত্তো ভগৰন্তং দূরতোৰ আগচ্ছন্তং। দিস্ৰান ভগৰন্তং এতদৰোচ – ‘‘আগচ্ছতু মে, ভন্তে, ভগৰা সযনং পস্সতূ’’তি। অথ খো ভগৰা ততোৰ পটিনিৰত্তিত্ৰা ভিক্খূ আমন্তেসি – ‘‘আসযতো, ভিক্খৰে, মোঘপুরিসো ৰেদিতব্বো’’তি। অথ খো ভগৰা আযস্মন্তং উপনন্দং সক্যপুত্তং অনেকপরিযাযেন ৰিগরহিত্ৰা দুব্ভরতায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
521. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā upanando sakyaputto ucce mañce sayati. Atha kho bhagavā sambahulehi bhikkhūhi saddhiṃ senāsanacārikaṃ āhiṇḍanto yenāyasmato upanandassa sakyaputtassa vihāro tenupasaṅkami. Addasā kho āyasmā upanando sakyaputto bhagavantaṃ dūratova āgacchantaṃ. Disvāna bhagavantaṃ etadavoca – ‘‘āgacchatu me, bhante, bhagavā sayanaṃ passatū’’ti. Atha kho bhagavā tatova paṭinivattitvā bhikkhū āmantesi – ‘‘āsayato, bhikkhave, moghapuriso veditabbo’’ti. Atha kho bhagavā āyasmantaṃ upanandaṃ sakyaputtaṃ anekapariyāyena vigarahitvā dubbharatāya…pe… evañca pana, bhikkhave, imaṃ sikkhāpadaṃ uddiseyyātha –
৫২২. ‘‘নৰং পন ভিক্খুনা মঞ্চং ৰা পীঠং ৰা কারযমানেন অট্ঠঙ্গুলপাদকং কারেতব্বং সুগতঙ্গুলেন, অঞ্ঞত্র হেট্ঠিমায অটনিযা; তং অতিক্কামযতো ছেদনকং পাচিত্তিয’’ন্তি।
522.‘‘Navaṃ pana bhikkhunā mañcaṃ vā pīṭhaṃ vā kārayamānena aṭṭhaṅgulapādakaṃ kāretabbaṃ sugataṅgulena, aññatra heṭṭhimāya aṭaniyā; taṃ atikkāmayato chedanakaṃ pācittiya’’nti.
৫২৩. নৰং নাম করণং উপাদায ৰুচ্চতি।
523.Navaṃ nāma karaṇaṃ upādāya vuccati.
মঞ্চো নাম চত্তারো মঞ্চা – মসারকো, বুন্দিকাবদ্ধো, কুল়ীরপাদকো, আহচ্চপাদকো।
Mañco nāma cattāro mañcā – masārako, bundikābaddho, kuḷīrapādako, āhaccapādako.
পীঠং নাম চত্তারি পীঠানি – মসারকং, বুন্দিকাবদ্ধং, কুল়ীরপাদকং, আহচ্চপাদকং।
Pīṭhaṃ nāma cattāri pīṭhāni – masārakaṃ, bundikābaddhaṃ, kuḷīrapādakaṃ, āhaccapādakaṃ.
কারযমানেনাতি করোন্তো ৰা কারাপেন্তো ৰা।
Kārayamānenāti karonto vā kārāpento vā.
অট্ঠঙ্গুলপাদকং কারেতব্বং সুগতঙ্গুলেন, অঞ্ঞত্র হেট্ঠিমায অটনিযাতি ঠপেত্ৰা হেট্ঠিমং অটনিং; তং অতিক্কামেত্ৰা করোতি ৰা কারাপেতি ৰা, পযোগে দুক্কটং, পটিলাভেন ছিন্দিত্ৰা পাচিত্তিযং দেসেতব্বং।
Aṭṭhaṅgulapādakaṃkāretabbaṃ sugataṅgulena, aññatra heṭṭhimāyaaṭaniyāti ṭhapetvā heṭṭhimaṃ aṭaniṃ; taṃ atikkāmetvā karoti vā kārāpeti vā, payoge dukkaṭaṃ, paṭilābhena chinditvā pācittiyaṃ desetabbaṃ.
৫২৪. অত্তনা ৰিপ্পকতং অত্তনা পরিযোসাপেতি, আপত্তি পাচিত্তিযস্স। অত্তনা ৰিপ্পকতং পরেহি পরিযোসাপেতি, আপত্তি পাচিত্তিযস্স। পরেহি ৰিপ্পকতং অত্তনা পরিযোসাপেতি, আপত্তি পাচিত্তিযস্স। পরেহি ৰিপ্পকতং পরেহি পরিযোসাপেতি, আপত্তি পাচিত্তিযস্স।
524. Attanā vippakataṃ attanā pariyosāpeti, āpatti pācittiyassa. Attanā vippakataṃ parehi pariyosāpeti, āpatti pācittiyassa. Parehi vippakataṃ attanā pariyosāpeti, āpatti pācittiyassa. Parehi vippakataṃ parehi pariyosāpeti, āpatti pācittiyassa.
অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স। অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স।
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
৫২৫. অনাপত্তি পমাণিকং করোতি, ঊনকং করোতি, অঞ্ঞেন কতং পমাণাতিক্কন্তং পটিলভিত্ৰা ছিন্দিত্ৰা পরিভুঞ্জতি, উম্মত্তকস্স, আদিকম্মিকস্সাতি।
525. Anāpatti pamāṇikaṃ karoti, ūnakaṃ karoti, aññena kataṃ pamāṇātikkantaṃ paṭilabhitvā chinditvā paribhuñjati, ummattakassa, ādikammikassāti.
মঞ্চপীঠসিক্খাপদং নিট্ঠিতং পঞ্চমং।
Mañcapīṭhasikkhāpadaṃ niṭṭhitaṃ pañcamaṃ.
৬. তূলোনদ্ধসিক্খাপদং
6. Tūlonaddhasikkhāpadaṃ
৫২৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ মঞ্চম্পি পীঠম্পি তূলোনদ্ধং কারাপেন্তি। মনুস্সা ৰিহারচারিকং আহিণ্ডন্তা পস্সিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা মঞ্চম্পি পীঠম্পি তূলোনদ্ধং কারাপেস্সন্তি, সেয্যথাপি গিহী কামভোগিনো’’তি ! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ মঞ্চম্পি পীঠম্পি তূলোনদ্ধং কারাপেস্সন্তী’’তি…পে॰… সচ্চং কির তুম্হে, ভিক্খৰে, মঞ্চম্পি পীঠম্পি তূলোনদ্ধং কারাপেথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, মঞ্চম্পি পীঠম্পি তূলোনদ্ধং কারাপেস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
526. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū mañcampi pīṭhampi tūlonaddhaṃ kārāpenti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma samaṇā sakyaputtiyā mañcampi pīṭhampi tūlonaddhaṃ kārāpessanti, seyyathāpi gihī kāmabhogino’’ti ! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū mañcampi pīṭhampi tūlonaddhaṃ kārāpessantī’’ti…pe… saccaṃ kira tumhe, bhikkhave, mañcampi pīṭhampi tūlonaddhaṃ kārāpethāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, mañcampi pīṭhampi tūlonaddhaṃ kārāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৫২৭. ‘‘যো পন ভিক্খু মঞ্চং ৰা পীঠং ৰা তূলোনদ্ধং কারাপেয্য, উদ্দালনকং পাচিত্তিয’’ন্তি।
527.‘‘Yo pana bhikkhu mañcaṃ vā pīṭhaṃ vā tūlonaddhaṃ kārāpeyya, uddālanakaṃ pācittiya’’nti.
৫২৮. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
528.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
মঞ্চো নাম চত্তারো মঞ্চা – মসারকো, বুন্দিকাবদ্ধো, কুল়ীরপাদকো, আহচ্চপাদকো।
Mañco nāma cattāro mañcā – masārako, bundikābaddho, kuḷīrapādako, āhaccapādako.
পীঠং নাম চত্তারি পীঠানি – মসারকং, বুন্দিকাবদ্ধং, কুল়ীরপাদকং, আহচ্চপাদকং।
Pīṭhaṃ nāma cattāri pīṭhāni – masārakaṃ, bundikābaddhaṃ, kuḷīrapādakaṃ, āhaccapādakaṃ.
তূলং নাম তীণি তূলানি – রুক্খতূলং, লতাতূলং, পোটকিতূলং।
Tūlaṃ nāma tīṇi tūlāni – rukkhatūlaṃ, latātūlaṃ, poṭakitūlaṃ.
কারাপেয্যাতি করোতি ৰা কারাপেতি ৰা, পযোগে দুক্কটং। পটিলাভেন উদ্দালেত্ৰা পাচিত্তিযং দেসেতব্বং।
Kārāpeyyāti karoti vā kārāpeti vā, payoge dukkaṭaṃ. Paṭilābhena uddāletvā pācittiyaṃ desetabbaṃ.
৫২৯. অত্তনা ৰিপ্পকতং অত্তনা পরিযোসাপেতি, আপত্তি পাচিত্তিযস্স। অত্তনা ৰিপ্পকতং পরেহি পরিযোসাপেতি, আপত্তি পাচিত্তিযস্স। পরেহি ৰিপ্পকতং অত্তনা পরিযোসাপেতি, আপত্তি পাচিত্তিযস্স। পরেহি ৰিপ্পকতং পরেহি পরিযোসাপেতি, আপত্তি পাচিত্তিযস্স।
529. Attanā vippakataṃ attanā pariyosāpeti, āpatti pācittiyassa. Attanā vippakataṃ parehi pariyosāpeti, āpatti pācittiyassa. Parehi vippakataṃ attanā pariyosāpeti, āpatti pācittiyassa. Parehi vippakataṃ parehi pariyosāpeti, āpatti pācittiyassa.
অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স। অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স।
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
৫৩০. অনাপত্তি আযোগে, কাযবন্ধনে, অংসবদ্ধকে, পত্তথৰিকায, পরিস্সাৰনে, বিব্বোহনং করোতি, অঞ্ঞেন কতং পটিলভিত্ৰা উদ্দালেত্ৰা পরিভুঞ্জতি, উম্মত্তকস্স, আদিকম্মিকস্সাতি।
530. Anāpatti āyoge, kāyabandhane, aṃsabaddhake, pattathavikāya, parissāvane, bibbohanaṃ karoti, aññena kataṃ paṭilabhitvā uddāletvā paribhuñjati, ummattakassa, ādikammikassāti.
তূলোনদ্ধসিক্খাপদং নিট্ঠিতং ছট্ঠং।
Tūlonaddhasikkhāpadaṃ niṭṭhitaṃ chaṭṭhaṃ.
৭. নিসীদনসিক্খাপদং
7. Nisīdanasikkhāpadaṃ
৫৩১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ভগৰতা ভিক্খূনং নিসীদনং অনুঞ্ঞাতং হোতি। ছব্বগ্গিযা ভিক্খূ – ‘‘ভগৰতা নিসীদনং অনুঞ্ঞাত’’ন্তি অপ্পমাণিকানি নিসীদনানি ধারেন্তি। মঞ্চস্সপি পীঠস্সপি পুরতোপি পচ্ছতোপি ওলম্বেন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ অপ্পমাণিকানি নিসীদনানি ধারেস্সন্তী’’তি…পে॰… সচ্চং কির তুম্হে, ভিক্খৰে, অপ্পমাণিকানি নিসীদনানি ধারেথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, অপ্পমাণিকানি নিসীদনানি ধারেস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
531. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavatā bhikkhūnaṃ nisīdanaṃ anuññātaṃ hoti. Chabbaggiyā bhikkhū – ‘‘bhagavatā nisīdanaṃ anuññāta’’nti appamāṇikāni nisīdanāni dhārenti. Mañcassapi pīṭhassapi puratopi pacchatopi olambenti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appamāṇikāni nisīdanāni dhāressantī’’ti…pe… saccaṃ kira tumhe, bhikkhave, appamāṇikāni nisīdanāni dhārethāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, appamāṇikāni nisīdanāni dhāressatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘নিসীদনং পন ভিক্খুনা কারযমানেন পমাণিকং কারেতব্বং। তত্রিদং পমাণং – দীঘসো দ্ৰে ৰিদত্থিযো, সুগতৰিদত্থিযা; তিরিযং দিযড্ঢং। তং অতিক্কামযতো ছেদনকং পাচিত্তিয’’ন্তি।
‘‘Nisīdanaṃ pana bhikkhunā kārayamānena pamāṇikaṃ kāretabbaṃ. Tatridaṃ pamāṇaṃ – dīghaso dve vidatthiyo, sugatavidatthiyā; tiriyaṃ diyaḍḍhaṃ. Taṃ atikkāmayato chedanakaṃ pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৫৩২. তেন খো পন সমযেন আযস্মা উদাযী মহাকাযো হোতি। সো ভগৰতো পুরতো নিসীদনং পঞ্ঞপেত্ৰা সমন্ততো সমঞ্ছমানো নিসীদতি। অথ খো ভগৰা আযস্মন্তং উদাযিং এতদৰোচ – ‘‘কিস্স ত্ৰং, উদাযি, নিসীদনং সমন্ততো সমঞ্ছসি; সেয্যথাপি পুরাণাসিকোট্ঠো’’তি? ‘‘তথা হি পন, ভন্তে, ভগৰতা ভিক্খূনং অতিখুদ্দকং নিসীদনং অনুঞ্ঞাত’’ন্তি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, নিসীদনস্স দসং ৰিদত্থিং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
532. Tena kho pana samayena āyasmā udāyī mahākāyo hoti. So bhagavato purato nisīdanaṃ paññapetvā samantato samañchamāno nisīdati. Atha kho bhagavā āyasmantaṃ udāyiṃ etadavoca – ‘‘kissa tvaṃ, udāyi, nisīdanaṃ samantato samañchasi; seyyathāpi purāṇāsikoṭṭho’’ti? ‘‘Tathā hi pana, bhante, bhagavatā bhikkhūnaṃ atikhuddakaṃ nisīdanaṃ anuññāta’’nti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, nisīdanassa dasaṃ vidatthiṃ. Evañca pana, bhikkhave, imaṃ sikkhāpadaṃ uddiseyyātha –
৫৩৩. ‘‘নিসীদনং পন ভিক্খুনা কারযমানেন পমাণিকং কারেতব্বং। তত্রিদং পমাণং – দীঘসো দ্ৰে ৰিদত্থিযো, সুগতৰিদত্থিযা; তিরিযং দিযড্ঢং। দসা ৰিদত্থি। তং অতিক্কামযতো ছেদনকং পাচিত্তিয’’ন্তি।
533.‘‘Nisīdanaṃ pana bhikkhunā kārayamānena pamāṇikaṃ kāretabbaṃ. Tatridaṃ pamāṇaṃ – dīghaso dve vidatthiyo, sugatavidatthiyā; tiriyaṃ diyaḍḍhaṃ. Dasā vidatthi. Taṃ atikkāmayato chedanakaṃ pācittiya’’nti.
৫৩৪. নিসীদনং নাম সদসং ৰুচ্চতি।
534.Nisīdanaṃ nāma sadasaṃ vuccati.
কারযমানেনাতি করোন্তো ৰা কারাপেন্তো ৰা পমাণিকং কারেতব্বং। তত্রিদং পমাণং – দীঘসো দ্ৰে ৰিদত্থিযো, সুগতৰিদত্থিযা; তিরিযং দিযড্ঢং। দসা ৰিদত্থি। তং অতিক্কামেত্ৰা করোতি ৰা কারাপেতি ৰা, পযোগে দুক্কটং। পটিলাভেন ছিন্দিত্ৰা পাচিত্তিযং দেসেতব্বং।
Kārayamānenāti karonto vā kārāpento vā pamāṇikaṃ kāretabbaṃ. Tatridaṃ pamāṇaṃ – dīghaso dve vidatthiyo, sugatavidatthiyā; tiriyaṃ diyaḍḍhaṃ. Dasā vidatthi. Taṃ atikkāmetvā karoti vā kārāpeti vā, payoge dukkaṭaṃ. Paṭilābhena chinditvā pācittiyaṃ desetabbaṃ.
৫৩৫. অত্তনা ৰিপ্পকতং অত্তনা পরিযোসাপেতি, আপত্তি পাচিত্তিযস্স। অত্তনা ৰিপ্পকতং পরেহি পরিযোসাপেতি, আপত্তি পাচিত্তিযস্স। পরেহি ৰিপ্পকতং অত্তনা পরিযোসাপেতি, আপত্তি পাচিত্তিযস্স। পরেহি ৰিপ্পকতং পরেহি পরিযোসাপেতি, আপত্তি পাচিত্তিযস্স।
535. Attanā vippakataṃ attanā pariyosāpeti, āpatti pācittiyassa. Attanā vippakataṃ parehi pariyosāpeti, āpatti pācittiyassa. Parehi vippakataṃ attanā pariyosāpeti, āpatti pācittiyassa. Parehi vippakataṃ parehi pariyosāpeti, āpatti pācittiyassa.
অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স। অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স।
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
৫৩৬. অনাপত্তি পমাণিকং করোতি, ঊনকং করোতি, অঞ্ঞেন কতং পমাণাতিক্কন্তং পটিলভিত্ৰা ছিন্দিত্ৰা পরিভুঞ্জতি, ৰিতানং ৰা ভূমত্থরণং ৰা সাণিপাকারং ৰা ভিসিং ৰা বিব্বোহনং ৰা করোতি, উম্মত্তকস্স, আদিকম্মিকস্সাতি।
536. Anāpatti pamāṇikaṃ karoti, ūnakaṃ karoti, aññena kataṃ pamāṇātikkantaṃ paṭilabhitvā chinditvā paribhuñjati, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattakassa, ādikammikassāti.
নিসীদনসিক্খাপদং নিট্ঠিতং সত্তমং।
Nisīdanasikkhāpadaṃ niṭṭhitaṃ sattamaṃ.
৮. কণ্ডুপ্পটিচ্ছাদিসিক্খাপদং
8. Kaṇḍuppaṭicchādisikkhāpadaṃ
৫৩৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ভগৰতা ভিক্খূনং কণ্ডুপ্পটিচ্ছাদি অনুঞ্ঞাতা হোতি । ছব্বগ্গিযা ভিক্খূ – ‘‘ভগৰতা কণ্ডুপ্পটিচ্ছাদি অনুঞ্ঞাতা’’তি অপ্পমাণিকাযো কণ্ডুপ্পটিচ্ছাদিযো ধারেন্তি; পুরতোপি পচ্ছতোপি আকড্ঢন্তা আহিণ্ডন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ অপ্পমাণিকাযো কণ্ডুপ্পটিচ্ছাদিযো ধারেস্সন্তী’’তি…পে॰… সচ্চং কির তুম্হে, ভিক্খৰে, অপ্পমাণিকাযো কণ্ডুপ্পটিচ্ছাদিযো ধারেথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, অপ্পমাণিকাযো কণ্ডুপ্পটিচ্ছাদিযো ধারেস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
537. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavatā bhikkhūnaṃ kaṇḍuppaṭicchādi anuññātā hoti . Chabbaggiyā bhikkhū – ‘‘bhagavatā kaṇḍuppaṭicchādi anuññātā’’ti appamāṇikāyo kaṇḍuppaṭicchādiyo dhārenti; puratopi pacchatopi ākaḍḍhantā āhiṇḍanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appamāṇikāyo kaṇḍuppaṭicchādiyo dhāressantī’’ti…pe… saccaṃ kira tumhe, bhikkhave, appamāṇikāyo kaṇḍuppaṭicchādiyo dhārethāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, appamāṇikāyo kaṇḍuppaṭicchādiyo dhāressatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৫৩৮. ‘‘কণ্ডুপ্পটিচ্ছাদিং পন ভিক্খুনা কারযমানেন পমাণিকা কারেতব্বা। তত্রিদং পমাণং – দীঘসো চতস্সো ৰিদত্থিযো, সুগতৰিদত্থিযা; তিরিযং দ্ৰে ৰিদত্থিযো। তং অতিক্কামযতো ছেদনকং পাচিত্তিয’’ন্তি।
538.‘‘Kaṇḍuppaṭicchādiṃ pana bhikkhunā kārayamānena pamāṇikā kāretabbā. Tatridaṃ pamāṇaṃ – dīghaso catasso vidatthiyo, sugatavidatthiyā; tiriyaṃ dve vidatthiyo. Taṃ atikkāmayato chedanakaṃ pācittiya’’nti.
৫৩৯. কণ্ডুপ্পটিচ্ছাদি নাম যস্স অধোনাভি উব্ভজাণুমণ্ডলং কণ্ডু ৰা পীল়কা ৰা অস্সাৰো ৰা থুল্লকচ্ছু ৰা আবাধো, তস্স পটিচ্ছাদনত্থায।
539.Kaṇḍuppaṭicchādi nāma yassa adhonābhi ubbhajāṇumaṇḍalaṃ kaṇḍu vā pīḷakā vā assāvo vā thullakacchu vā ābādho, tassa paṭicchādanatthāya.
কারযমানেনাতি করোন্তো ৰা কারাপেন্তো ৰা । পমাণিকা কারেতব্বা। তত্রিদং পমাণং – দীঘসো চতস্সো ৰিদত্থিযো, সুগতৰিদত্থিযা; তিরিযং দ্ৰে ৰিদত্থিযো। তং অতিক্কামেত্ৰা করোতি ৰা কারাপেতি ৰা, পযোগে দুক্কটং। পটিলাভেন ছিন্দিত্ৰা পাচিত্তিযং দেসেতব্বং।
Kārayamānenāti karonto vā kārāpento vā . Pamāṇikā kāretabbā. Tatridaṃ pamāṇaṃ – dīghaso catasso vidatthiyo, sugatavidatthiyā; tiriyaṃ dve vidatthiyo. Taṃ atikkāmetvā karoti vā kārāpeti vā, payoge dukkaṭaṃ. Paṭilābhena chinditvā pācittiyaṃ desetabbaṃ.
৫৪০. অত্তনা ৰিপ্পকতং অত্তনা পরিযোসাপেতি, আপত্তি পাচিত্তিযস্স। অত্তনা ৰিপ্পকতং পরেহি পরিযোসাপেতি, আপত্তি পাচিত্তিযস্স। পরেহি ৰিপ্পকতং অত্তনা পরিযোসাপেতি, আপত্তি পাচিত্তিযস্স। পরেহি ৰিপ্পকতং পরেহি পরিযোসাপেতি, আপত্তি পাচিত্তিযস্স।
540. Attanā vippakataṃ attanā pariyosāpeti, āpatti pācittiyassa. Attanā vippakataṃ parehi pariyosāpeti, āpatti pācittiyassa. Parehi vippakataṃ attanā pariyosāpeti, āpatti pācittiyassa. Parehi vippakataṃ parehi pariyosāpeti, āpatti pācittiyassa.
অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স। অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স।
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
৫৪১. অনাপত্তি পমাণিকং করোতি, ঊনকং করোতি, অঞ্ঞেন কতং পমাণাতিক্কন্তং পটিলভিত্ৰা ছিন্দিত্ৰা পরিভুঞ্জতি, ৰিতানং ৰা ভূমত্থরণং ৰা সাণিপাকারং ৰা ভিসিং ৰা বিব্বোহনং ৰা করোতি, উম্মত্তকস্স, আদিকম্মিকস্সাতি।
541. Anāpatti pamāṇikaṃ karoti, ūnakaṃ karoti, aññena kataṃ pamāṇātikkantaṃ paṭilabhitvā chinditvā paribhuñjati, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattakassa, ādikammikassāti.
কণ্ডুপ্পটিচ্ছাদিসিক্খাপদং নিট্ঠিতং অট্ঠমং।
Kaṇḍuppaṭicchādisikkhāpadaṃ niṭṭhitaṃ aṭṭhamaṃ.
৯. ৰস্সিকসাটিকাসিক্খাপদং
9. Vassikasāṭikāsikkhāpadaṃ
৫৪২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ভগৰতা ভিক্খূনং ৰস্সিকসাটিকা অনুঞ্ঞাতা হোতি। ছব্বগ্গিযা ভিক্খূ – ‘‘ভগৰতা ৰস্সিকসাটিকা অনুঞ্ঞাতা’’তি অপ্পমাণিকাযো ৰস্সিকসাটিকাযো ধারেন্তি। পুরতোপি পচ্ছতোপি আকড্ঢন্তা আহিণ্ডন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ অপ্পমাণিকাযো ৰস্সিকসাটিকাযো ধারেস্সন্তী’’তি…পে॰… সচ্চং কির তুম্হে, ভিক্খৰে, অপ্পমাণিকাযো ৰস্সিকসাটিকাযো ধারেথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, অপ্পমাণিকাযো ৰস্সিকসাটিকাযো ধারেস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
542. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavatā bhikkhūnaṃ vassikasāṭikā anuññātā hoti. Chabbaggiyā bhikkhū – ‘‘bhagavatā vassikasāṭikā anuññātā’’ti appamāṇikāyo vassikasāṭikāyo dhārenti. Puratopi pacchatopi ākaḍḍhantā āhiṇḍanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appamāṇikāyo vassikasāṭikāyo dhāressantī’’ti…pe… saccaṃ kira tumhe, bhikkhave, appamāṇikāyo vassikasāṭikāyo dhārethāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, appamāṇikāyo vassikasāṭikāyo dhāressatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৫৪৩. ‘‘ৰস্সিকসাটিকং পন ভিক্খুনা কারযমানেন পমাণিকা কারেতব্বা। তত্রিদং পমাণং – দীঘসো ছ ৰিদত্থিযো, সুগতৰিদত্থিযা; তিরিযং অড্ঢতেয্যা। তং অতিক্কামযতো ছেদনকং পাচিত্তিয’’ন্তি।
543.‘‘Vassikasāṭikaṃ pana bhikkhunā kārayamānena pamāṇikā kāretabbā. Tatridaṃ pamāṇaṃ – dīghaso cha vidatthiyo, sugatavidatthiyā; tiriyaṃ aḍḍhateyyā. Taṃ atikkāmayato chedanakaṃ pācittiya’’nti.
৫৪৪. ৰস্সিকসাটিকা নাম ৰস্সানস্স চতুমাসত্থায।
544.Vassikasāṭikā nāma vassānassa catumāsatthāya.
কারযমানেনাতি করোন্তো ৰা কারাপেন্তো ৰা। পমাণিকা কারেতব্বা । তত্রিদং পমাণং – দীঘসো ছ ৰিদত্থিযো, সুগতৰিদত্থিযা; তিরিযং অড্ঢতেয্যা। তং অতিক্কামেত্ৰা করোতি ৰা কারাপেতি ৰা, পযোগে দুক্কটং। পটিলাভেন ছিন্দিত্ৰা পাচিত্তিযং দেসেতব্বং।
Kārayamānenāti karonto vā kārāpento vā. Pamāṇikā kāretabbā . Tatridaṃ pamāṇaṃ – dīghaso cha vidatthiyo, sugatavidatthiyā; tiriyaṃ aḍḍhateyyā. Taṃ atikkāmetvā karoti vā kārāpeti vā, payoge dukkaṭaṃ. Paṭilābhena chinditvā pācittiyaṃ desetabbaṃ.
৫৪৫. অত্তনা ৰিপ্পকতং অত্তনা পরিযোসাপেতি, আপত্তি পাচিত্তিযস্স। অত্তনা ৰিপ্পকতং পরেহি পরিযোসাপেতি, আপত্তি পাচিত্তিযস্স। পরেহি ৰিপ্পকতং অত্তনা পরিযোসাপেতি, আপত্তি পাচিত্তিযস্স। পরেহি ৰিপ্পকতং পরেহি পরিযোসাপেতি, আপত্তি পাচিত্তিযস্স।
545. Attanā vippakataṃ attanā pariyosāpeti, āpatti pācittiyassa. Attanā vippakataṃ parehi pariyosāpeti, āpatti pācittiyassa. Parehi vippakataṃ attanā pariyosāpeti, āpatti pācittiyassa. Parehi vippakataṃ parehi pariyosāpeti, āpatti pācittiyassa.
অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স। অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স।
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
৫৪৬. অনাপত্তি পমাণিকং করোতি, ঊনকং করোতি, অঞ্ঞেন কতং পমাণাতিক্কন্তং পটিলভিত্ৰা ছিন্দিত্ৰা পরিভুঞ্জতি, ৰিতানং ৰা ভূমত্থরণং ৰা সাণিপাকারং ৰা ভিসিং ৰা বিব্বোহনং ৰা করোতি, উম্মত্তকস্স, আদিকম্মিকস্সাতি।
546. Anāpatti pamāṇikaṃ karoti, ūnakaṃ karoti, aññena kataṃ pamāṇātikkantaṃ paṭilabhitvā chinditvā paribhuñjati, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattakassa, ādikammikassāti.
ৰস্সিকসাটিকাসিক্খাপদং নিট্ঠিতং নৰমং।
Vassikasāṭikāsikkhāpadaṃ niṭṭhitaṃ navamaṃ.
১০. নন্দসিক্খাপদং
10. Nandasikkhāpadaṃ
৫৪৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা নন্দো ভগৰতো মাতুচ্ছাপুত্তো অভিরূপো হোতি দস্সনীযো পাসাদিকো চতুরঙ্গুলোমকো ভগৰতা 25। সো সুগতচীৰরপ্পমাণং চীৰরং ধারেতি। অদ্দসংসু খো থেরা ভিক্খূ আযস্মন্তং নন্দং দূরতোৰ আগচ্ছন্তং। দিস্ৰান – ‘‘ভগৰা আগচ্ছতী’’তি আসনা ৰুট্ঠহন্তি। তে উপগতে জানিত্ৰা 26 উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা নন্দো সুগতচীৰরপ্পমাণং চীৰরং ধারেস্সতী’’তি…পে॰… সচ্চং কির ত্ৰং, নন্দ, সুগতচীৰরপ্পমাণং চীৰরং ধারেসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, নন্দ, সুগতচীৰরপ্পমাণং চীৰরং ধারেস্সসি! নেতং, নন্দ, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
547. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā nando bhagavato mātucchāputto abhirūpo hoti dassanīyo pāsādiko caturaṅgulomako bhagavatā 27. So sugatacīvarappamāṇaṃ cīvaraṃ dhāreti. Addasaṃsu kho therā bhikkhū āyasmantaṃ nandaṃ dūratova āgacchantaṃ. Disvāna – ‘‘bhagavā āgacchatī’’ti āsanā vuṭṭhahanti. Te upagate jānitvā 28 ujjhāyanti khiyyanti vipācenti – ‘‘kathañhi nāma āyasmā nando sugatacīvarappamāṇaṃ cīvaraṃ dhāressatī’’ti…pe… saccaṃ kira tvaṃ, nanda, sugatacīvarappamāṇaṃ cīvaraṃ dhāresīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, nanda, sugatacīvarappamāṇaṃ cīvaraṃ dhāressasi! Netaṃ, nanda, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৫৪৮. ‘‘যো পন ভিক্খু সুগতচীৰরপ্পমাণং চীৰরং কারাপেয্য অতিরেকং ৰা, ছেদনকং পাচিত্তিযং । তত্রিদং সুগতস্স সুগতচীৰরপ্পমাণং – দীঘসো নৰ ৰিদত্থিযো, সুগতৰিদত্থিযা; তিরিযং ছ ৰিদত্থিযো। ইদং সুগতস্স সুগতচীৰরপ্পমাণ’’ন্তি।
548.‘‘Yo pana bhikkhu sugatacīvarappamāṇaṃ cīvaraṃ kārāpeyya atirekaṃ vā, chedanakaṃ pācittiyaṃ . Tatridaṃ sugatassa sugatacīvarappamāṇaṃ – dīghaso nava vidatthiyo, sugatavidatthiyā; tiriyaṃ cha vidatthiyo. Idaṃ sugatassa sugatacīvarappamāṇa’’nti.
৫৪৯. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
549.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
সুগতচীৰরপ্পমাণং 29 নাম দীঘসো নৰ ৰিদত্থিযো, সুগতৰিদত্থিযা; তিরিযং ছ ৰিদত্থিযো।
Sugatacīvarappamāṇaṃ30 nāma dīghaso nava vidatthiyo, sugatavidatthiyā; tiriyaṃ cha vidatthiyo.
কারাপেয্যাতি করোতি ৰা কারাপেতি ৰা, পযোগে দুক্কটং। পটিলাভেন ছিন্দিত্ৰা পাচিত্তিযং দেসেতব্বং।
Kārāpeyyāti karoti vā kārāpeti vā, payoge dukkaṭaṃ. Paṭilābhena chinditvā pācittiyaṃ desetabbaṃ.
৫৫০. অত্তনা ৰিপ্পকতং অত্তনা পরিযোসাপেতি, আপত্তি পাচিত্তিযস্স। অত্তনা ৰিপ্পকতং পরেহি পরিযোসাপেতি, আপত্তি পাচিত্তিযস্স। পরেহি ৰিপ্পকতং অত্তনা পরিযোসাপেতি, আপত্তি পাচিত্তিযস্স। পরেহি ৰিপ্পকতং পরেহি পরিযোসাপেতি, আপত্তি পাচিত্তিযস্স।
550. Attanā vippakataṃ attanā pariyosāpeti, āpatti pācittiyassa. Attanā vippakataṃ parehi pariyosāpeti, āpatti pācittiyassa. Parehi vippakataṃ attanā pariyosāpeti, āpatti pācittiyassa. Parehi vippakataṃ parehi pariyosāpeti, āpatti pācittiyassa.
অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স। অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স।
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
৫৫১. অনাপত্তি ঊনকং করোতি, অঞ্ঞেন কতং পটিলভিত্ৰা ছিন্দিত্ৰা পরিভুঞ্জতি, ৰিতানং ৰা ভূমত্থরণং ৰা সাণিপাকারং ৰা ভিসিং ৰা বিব্বোহনং ৰা করোতি, উম্মত্তকস্স, আদিকম্মিকস্সাতি।
551. Anāpatti ūnakaṃ karoti, aññena kataṃ paṭilabhitvā chinditvā paribhuñjati, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattakassa, ādikammikassāti.
নন্দসিক্খাপদং নিট্ঠিতং দসমং।
Nandasikkhāpadaṃ niṭṭhitaṃ dasamaṃ.
তস্সুদ্দানং –
Tassuddānaṃ –
রঞ্ঞো চ রতনং সন্তং, সূচি মঞ্চঞ্চ তূলিকং।
Rañño ca ratanaṃ santaṃ, sūci mañcañca tūlikaṃ;
নিসীদনঞ্চ কণ্ডুঞ্চ, ৰস্সিকা সুগতেন চাতি॥
Nisīdanañca kaṇḍuñca, vassikā sugatena cāti.
উদ্দিট্ঠা খো, আযস্মন্তো, দ্ৰেনৰুতি পাচিত্তিযা ধম্মা। তত্থাযস্মন্তে পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থাযস্মন্তো, তস্মা তুণ্হী, এৰমেতং ধারযামীতি।
Uddiṭṭhā kho, āyasmanto, dvenavuti pācittiyā dhammā. Tatthāyasmante pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyasmanto, tasmā tuṇhī, evametaṃ dhārayāmīti.
খুদ্দকং সমত্তং।
Khuddakaṃ samattaṃ.
পাচিত্তিযকণ্ডং নিট্ঠিতং।
Pācittiyakaṇḍaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā
১. অন্তেপুরসিক্খাপদৰণ্ণনা • 1. Antepurasikkhāpadavaṇṇanā
২. রতনসিক্খাপদৰণ্ণনা • 2. Ratanasikkhāpadavaṇṇanā
৩. ৰিকালগামপ্পৰিসনসিক্খাপদৰণ্ণনা • 3. Vikālagāmappavisanasikkhāpadavaṇṇanā
৪. সূচিঘরসিক্খাপদৰণ্ণনা • 4. Sūcigharasikkhāpadavaṇṇanā
৫. মঞ্চসিক্খাপদৰণ্ণনা • 5. Mañcasikkhāpadavaṇṇanā
৬. তূলোনদ্ধসিক্খাপদৰণ্ণনা • 6. Tūlonaddhasikkhāpadavaṇṇanā
৭. নিসীদনসিক্খাপদৰণ্ণনা • 7. Nisīdanasikkhāpadavaṇṇanā
৮. কণ্ডুপটিচ্ছাদিসিক্খাপদৰণ্ণনা • 8. Kaṇḍupaṭicchādisikkhāpadavaṇṇanā
৯. ৰস্সিকসাটিকসিক্খাপদৰণ্ণনা • 9. Vassikasāṭikasikkhāpadavaṇṇanā
১০. নন্দত্থেরসিক্খাপদৰণ্ণনা • 10. Nandattherasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
১. অন্তেপুরসিক্খাপদৰণ্ণনা • 1. Antepurasikkhāpadavaṇṇanā
২. রতনসিক্খাপদৰণ্ণনা • 2. Ratanasikkhāpadavaṇṇanā
৩. ৰিকালগামপ্পৰিসনসিক্খাপদৰণ্ণনা • 3. Vikālagāmappavisanasikkhāpadavaṇṇanā
৪. সূচিঘরসিক্খাপদৰণ্ণনা • 4. Sūcigharasikkhāpadavaṇṇanā
৫. মঞ্চপীঠসিক্খাপদৰণ্ণনা • 5. Mañcapīṭhasikkhāpadavaṇṇanā
৬. তূলোনদ্ধসিক্খাপদৰণ্ণনা • 6. Tūlonaddhasikkhāpadavaṇṇanā
৭. নিসীদনসিক্খাপদৰণ্ণনা • 7. Nisīdanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
১. অন্তেপুরসিক্খাপদৰণ্ণনা • 1. Antepurasikkhāpadavaṇṇanā
২. রতনসিক্খাপদৰণ্ণনা • 2. Ratanasikkhāpadavaṇṇanā
৩. ৰিকালগামপ্পৰিসনসিক্খাপদৰণ্ণনা • 3. Vikālagāmappavisanasikkhāpadavaṇṇanā
৪. সূচিঘরসিক্খাপদৰণ্ণনা • 4. Sūcigharasikkhāpadavaṇṇanā
৫. মঞ্চসিক্খাপদৰণ্ণনা • 5. Mañcasikkhāpadavaṇṇanā
৬. তূলোনদ্ধসিক্খাপদৰণ্ণনা • 6. Tūlonaddhasikkhāpadavaṇṇanā
৭. নিসীদনসিক্খাপদৰণ্ণনা • 7. Nisīdanasikkhāpadavaṇṇanā
৮. কণ্ডুপটিচ্ছাদিসিক্খাপদৰণ্ণনা • 8. Kaṇḍupaṭicchādisikkhāpadavaṇṇanā
৯. ৰস্সিকসাটিকসিক্খাপদৰণ্ণনা • 9. Vassikasāṭikasikkhāpadavaṇṇanā
১০. নন্দত্থেরসিক্খাপদৰণ্ণনা • 10. Nandattherasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā
১. অন্তেপুরসিক্খাপদৰণ্ণনা • 1. Antepurasikkhāpadavaṇṇanā
২. রতনসিক্খাপদৰণ্ণনা • 2. Ratanasikkhāpadavaṇṇanā
৩. ৰিকালগামপ্পৰিসনসিক্খাপদৰণ্ণনা • 3. Vikālagāmappavisanasikkhāpadavaṇṇanā
৪. সূচিঘরসিক্খাপদৰণ্ণনা • 4. Sūcigharasikkhāpadavaṇṇanā
৫. মঞ্চপীঠসিক্খাপদৰণ্ণনা • 5. Mañcapīṭhasikkhāpadavaṇṇanā
৬. তূলোনদ্ধসিক্খাপদৰণ্ণনা • 6. Tūlonaddhasikkhāpadavaṇṇanā
৭. নিসীদনসিক্খাপদৰণ্ণনা • 7. Nisīdanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
১. অন্তেপুরসিক্খাপদ-অত্থযোজনা • 1. Antepurasikkhāpada-atthayojanā
২. রতনসিক্খাপদং • 2. Ratanasikkhāpadaṃ
৩. ৰিকালগামপ্পৰিসনসিক্খাপদং • 3. Vikālagāmappavisanasikkhāpadaṃ
৪. সূচিঘরসিক্খাপদং • 4. Sūcigharasikkhāpadaṃ
৫. মঞ্চসিক্খাপদং • 5. Mañcasikkhāpadaṃ
৬. তূলোনদ্ধসিক্খাপদং • 6. Tūlonaddhasikkhāpadaṃ
৭. নিসীদনসিক্খাপদং • 7. Nisīdanasikkhāpadaṃ
৮. কণ্ডুপটিচ্ছাদিসিক্খাপদং • 8. Kaṇḍupaṭicchādisikkhāpadaṃ
৯. ৰস্সিকসাটিকসিক্খাপদং • 9. Vassikasāṭikasikkhāpadaṃ
১০. নন্দত্থেরসিক্খাপদং • 10. Nandattherasikkhāpadaṃ
